رحيـــــق ..

[ناصر محمد محجوب]

حاولت أكتب بالرحيق
عن روعتِك عِطْر الكلام
إحساس على أهداب وتر
وإنتي المداخل للربيع
وانا لليباس داسيكي فال
شارحك ظروف
سلّوكه حجاية قيوف
داخرك جروف
يا غيمه وهْدبت اليراع
بين حِبْري وانفاس الحروف
يا كاتله حيلك في الشهيق
يا راسمه ضُلِّك في المسام
لوّمتي حيلي مع السفر
يا نسمه حين وقف النهار
واتمدَّ فيّ من العصب
لا حد زوايا الإحتمال
راجيك ولِسّه على اليقين
إنِّك غُنا ونسمة شمال
هِمِّي الخُطى وياكي الرفيق
يا جايه من حُضْن الغمام
زي حاجة الضُّل للشدر
هِمِّي الخُطى ورُشِّي الصباح
دفقات على الليل اليباس
شاحبات فوانيس العشم
والطيف يجابد في النعاس
وانا يا متاريس الطريق
رعشة مُنى ودهشة زحام
تصريحي مسكون بالفتر
من وين بيبداني الحريق
وانا شرفه نايحه على الظلام
الشمعه والريح والخطر
حاولت أكتب بالرحيق ....

قصيدتي ( رحيـــق ) ..

[عبداللطيف محمد علي خالد]

مشكور ي ناصر ....كلمات رائعه

[محمد صديق]

تانى بقول ليك يا سلام يا ناصر

شعر جميل ...حقيقى

بس لو نزلت أى قصيدة من قصايدك فى بوست منفصل : حتصعب علينا المتابعة / وقصائدك تستحق

المتابعة...

أرجو إنّك تنزلها كلها فى بوست واحد.

مع تقديرى

[m-alhadi1]

يا رائع ===الحريق سيلتهمك بداية من احساس قبلك النابض بالابداع---في اضابيرنا التي يشغلها سفاسف الامور-ولو ادخلت اسم @@@@الرئيس @@@@@الانتخاب@@@@ لتهافتنا -لرشف المزيد من حسك@@@@كما قال شيخنا عليك بالصبر ومواصلة الرشق بالابداع فحتما ستتدحرج ثمرات من الشجر الكثيف المشرئب لمثل خط سيرك--النبيل-
دم بود

[ناصر محمد محجوب]

عبداللطيف ومحمد صديق
تسلمو كتير
اتمنى ان اكون حضورا بقامة هذا المنتدى الاخضر
تحياتي ..