شبيهة القمرة (أغنية) من تأليفى

[mamoun mutasim]

شبيهة القمرة

يـا مدارات النجوم و يا مسارات الكواكب
فَتِّشن لَى عن شبيهة القمرة في وسط المواكب
و بلِّغنها ريدى ليها رمانى في لُجَّة متاعب
و شوق غِيابَا سقانى من مُرْ المصاعب
و رغم ذلك لا نسيتا و لا جفيتا و لا بعاتب
يـا مدارات النجوم و يا مسارات الكواكب
المسافة البينى بينِك يا قمر غامضة وبعيدة
و قصة الريد اللى بيننا في الوجود نادرة و فريدة
و المحبة المنى ليك كل يوم تصبح جديدة
و انا متفائل بأنو النهاية تكون سعيدة
يـا مدارات النجوم و يا مسارات الكواكب
طال زمان الفُرْقَة بينَّا و بحثتَ في كل المداين
قالوا لَى في الدوحة حلّت و نوّرت كل الأماكن
و بيها جات البهجة نازلة وظلَّلت كل المساكن
و فرّحَت كل الأزاهير و الفراشات في الجناين
يـا مدارات النجوم و يا مسارات الكواكب
ليكَ شُكراً يا زمن جِبتَ لَىْ أحْزنْ خـبر
الحلوة قُلتَ اتأهلت و اْنْا قلبى أصبَحْ فِيْ خطر
ما قالت انتظر الحبيب يِمكِنْ يجمِّعنا القدر
لا قدَّرتْ تَعَب السنين و لا مُعاناةَ السهَـر
يـا مدارات النجوم و يا مسارات الكواكب
أما عن حالى أنْا ، أحزانى ما بِتوَصَّفَن
وآلامِى من أصل الوَجَع اْلمَا بِعالِجن الزمن
مُناى ليك تلْقِى الوِلِف وعينَىْ دِمُوعِن يوقِّفَن
و لَىْ ربِّى فَوَّضَتَ الأمُرْ يِشفينى من كُلْ الحَزَن
يـا مدارات النجوم و يا مسارات الكواكب

[جبصي]

جد جميلة

يا جاري العزيز

[البحراوي]

عمل جميل ومتقن اخي مامون معتصم ارجو المواصلة في الابداع ..متابعين ومستمتعين
اها ان شاء الله القمرة فزت بيها في النهاية..اكيد..
وانا اقرا في القصيدة عجبتني الاغنية التالية وبالصدفة تحمل نفس اسم القصيدة ..نار حمرا وتشبه القمرة ..ارجو الاستمتاع باللحن :

[البحراوي]

[محمد صديق]

شكراً الأخ مأمون ...ونأمل فى مداومة الإسهام فى حركة المنتدى الأدبى .

[mamoun mutasim]

جد جميلة

يا جاري العزيز

حـبابـك هــنا يـا نصرالدين

و لك التحيات الطيبات و عـاطر الأشــواق ...

و مـشــكور جـداً عـلى الـمجامـلة ....

[mamoun mutasim]

عمل جميل ومتقن اخي مامون معتصم ارجو المواصلة في الابداع ..متابعين ومستمتعين
اها ان شاء الله القمرة فزت بيها في النهاية..اكيد..
وانا اقرا في القصيدة عجبتني الاغنية التالية وبالصدفة تحمل نفس اسم القصيدة ..نار حمرا وتشبه القمرة ..ارجو الاستمتاع باللحن :

الأخ العزيز / البحراوى

سـلامى و إحــترامى

مـشــكور كـتير عـلى المجاملة و ربنا يـسـهل الإمور و نواصل ..

هههها ... القـمرة يا اخ و الحمدلله عندى من زمان ... أم الأولاد

ربنا إديها الصحة و العافية و العمر الطويل الصالح ...

القصيدة دى عملتها لى واحـد صـاحبى هـنا ... إتـشــوكش

لأنو إتأخـر شــهرين من الموعد اللى إتزوجت فيهو ...

و لامن لـملم بعضو و مشى يخطبها من أهلها ... قالوا

ليهو الزولة زوجناها قـبل شـهرين و سـافـرت مع زوجها

الدوحة ... و صـاحبى حرقو الشاكوش و قال لى لازم

تكتب لى قصيدة ... و طوالى رشــيتو بيها و لحناها

و غنيناها ســوا ... ســـنة 1998 .... و كانت مأسـاتو

و تسليتو في نفس الوكت ...

و شــكراً على الأغنية المهداة ... بس الإسـم ما لايق عليها ...

كيف تكون نار حمرا و في نفس الوكت تشبه القمرة ؟؟؟

[mamoun mutasim]

شكراً الأخ مأمون ...ونأمل فى مداومة الإسهام فى حركة المنتدى الأدبى .

و شـــكراً ليك إنت بـرضـو يا مـحمد

و إن شاء الله أداوم معاكم بى جاى كمان ...

الحقيقة منتدى جميل جداً بس أنا إنتبهت ليهو مؤخـراً ..

[صحوة خريف]

mamoun mutasim

كلام جميل و رائع
أتمنى أن تتحفنا بالمزيد على الدوام
و أتمنى لك كل الخير

[الصادق عبدالله ضرار]

مسكين ...
ناس الدوحه صعبين ...
اوع تكتب ليهو قصيده في الدوحه كمان ...
محل الحبان ...