صفحة 3 من 4 الأولىالأولى 1234 الأخيرةالأخيرة
النتائج 21 إلى 30 من 38
  1. #21
    إمبراطور متوج الصورة الرمزية الرايح
    تاريخ التسجيل
    May 2010
    المشاركات
    21,297
    معدل تقييم المستوى
    32

    افتراضي

    [gdwl][gdwl].. العـــــــــــــيد .. [/gdwl] [/gdwl]
    [gdwl][gdwl]
    اسباب اساى وسر بكايا العيد يمر
    للناس فرح وانا لى ترح من حالىكر
    الناس تقوم تمرق تحوم قبل الفجر
    بين هاش وباش وانا دمعى راش لازم الصبر
    الطير نضم رسل نغم فوق التمر
    شوف يا رفيق كم بى ضيق العيد فقر
    وانا حالى حال ما فى بال مشغول كتر
    بى زول نجع لى ما رجع من كم تشر
    شيشك بشيش لو لى ريش كت ليك زر
    كت عاد بجيك واتهنى بيك باقى العمر
    بعدك يمين انيت انين فوق الجمر
    كيف النجاة وطعم الحياة فى حلقى مر
    جوفى اتحرق وانل ما مرق حدى العصر
    لى مافى زول يهدى ويقول ياخد الاجر
    انا ما بلوم لو جيتنى يوم فوقى النذر
    قبال اموت والروح تفوت امشى القبر
    زولى الحنين القالو وين عاد العذر
    خلانى تب آه ما كتب لى فد سطر
    بين السحاب اتلاشى غاب ضى البدر
    سود على دنيانا حى عز الضهر
    مبروك عليك العيد يجيك بى حال يسر
    يلقاك معاى فى بيت هناى يا الليكى در

    [/gdwl][/gdwl]


    ياريتني لو أفضل معاك
    رايح

    ولو طول العمر

  2. #22
    إمبراطور متوج الصورة الرمزية الرايح
    تاريخ التسجيل
    May 2010
    المشاركات
    21,297
    معدل تقييم المستوى
    32

    افتراضي

    [gdwl][gdwl]لــيل مأســــــاتي .. [/gdwl] [/gdwl]

    [gdwl][gdwl]
    ودع وفات رحل دون عودة ليل مأساتى
    طل صباحو واشرق نورو فى ساحاتى
    ريدك ضو يا محبوبة كل ظلماتى
    صار لى الدليل يا روحى فى طرقاتى
    قبلك كنت غرقان فى بحور دمعاتى
    فى المى وعذابى انا كنت فاقد ذاتى
    عمرى العشتو غيرك ضاع مع اناتى
    طال لامن بقت لى كالسنين ساعاتى
    متجرع براى يا روحى كاس مأساتى
    ما لقيت ليا زول شاركنى فى آهاتى
    لكن جيتى لى لملمتى كل اشتاتى
    خليتينى ليكى اصدح واجيب غنواتى
    واهديك من قليبى الحابى كل كلماتى
    حتى القلتو قبالك كمان والآتى
    ليك جارى النغم قوقن بو قمرياتى
    منتشى ديمة من طيبة عبير زهراتى
    والكون قام رقص ردد جميع ابياتى
    فرحان قال معاى حالف يعيش لحظاتى
    ترديد اسمك اصبح لى من عاداتى
    فى سرى وكمان فى جهرى بين غنياتى
    منقوش ديمة بى نور فوق قصور جناتى
    عاشقو انا ليل نهار زايدلو فى دعواتى
    غيرك تب محال تخضر يوم واحاتى
    ما بيرشع وراكى الغيث يرش واطاتى


    [/gdwl][/gdwl]


    ياريتني لو أفضل معاك
    رايح

    ولو طول العمر

  3. #23
    رفاعي إمبراطور
    تاريخ التسجيل
    Sep 2008
    المشاركات
    11,082
    معدل تقييم المستوى
    24

    افتراضي

    [frame="14 80"]
    مشتاقة لي ؟؟

    مشتاقة لي ؟؟
    واللهِ بالأكتر أنا !!ّ
    **
    واللهِ من شوقي العَلَي
    أنا ماني عارف مين أنا !!
    أنا هسّه ميت ولاَّ حي !!!؟
    **
    الانتظار قاسي ومرير
    الثانية تتمدد سنة
    مشتاق ومشتاق بالكتير
    في الاحتمالات والمنى
    إتلاشى كالحلم القصير
    إتعبَّا واتوجّع ، غُنا
    لو بي إيدَيْ كان المصير
    أخفيكي جوة الذات هنا
    **
    أشواقي ليك شهقة غريق
    يتشابَى بي آخر نَفَس
    صرخات نداهو المستغيث
    دوّت في صمت الليل جرس
    إستدعى إسمك طوق نجاة
    ما كلّ صوتو ولا انحبس
    مستني فيك وعد الضفاف
    إسترخى بين إيديكْ همس
    **
    أشواقي ليك ..
    ولـَـه القماري وحِـنَّــها
    شغَـفَـا ولُهاها وجَـنَّـها
    لو فكَّ .... جنّح منَّها
    بين الرياح ـ
    طلْوَح جناها وطشَّ راح
    لكنها ....
    بالصبرِ تستنى الإياب
    آهاتا ما قسّنها
    بالصَّبْـرِ تحتمل الغياب
    دمعاتا ما نسّنها
    تتلهى بالأمل العــــذاب
    ما خاب رجاها وظنها
    **
    أشواقي ليك
    رحلات غيوم من غير بداية وانتها
    عبَرَت فضاءات الحنين .. عدَّت حدود الإشتها
    يا ريت عشان أوصل أجيك
    يا ريتن ، لو يوم كنتها ..!
    [/frame]
    [flash1=http://www.marafi-alebda.com/up1/uploads/files/marafi-alebda.comc562d9a8c6.swf]width=600 height=200[/flash1]

  4. #24
    إمبراطور متوج الصورة الرمزية الرايح
    تاريخ التسجيل
    May 2010
    المشاركات
    21,297
    معدل تقييم المستوى
    32

    افتراضي

    [gdwl][gdwl].. مايقـــــــــــــــوما .. [/gdwl] [/gdwl]
    [gdwl][gdwl]
    في العاصِمة ــــ الخرطوم
    في لحظة ، من ذات يوم
    والجــو هَبوب وسَموم
    كابَّات غيومـو سِمــوم
    إنسان ،، وإنسانة
    ماهُنْ عروس وعريس
    شيطان .. وشيطانة
    كـان تالِـتُن إبليـس
    عمداً وبي إصرار
    لاخوف ولا رهبة ..
    من جُرْم أوعاقْـبة
    إشتعلت الرغبــة
    انعدمت النخــوة
    إتبَهَلَت الشهــوة
    واندلعت النــزوة
    واتمادوا في الهفوة
    إتمادوا فاتوا الميس وحَدّ اللعب بالنار
    عِـِيكْ
    غابوا في النشوة
    وانزرعت البذرة ،
    والبذرة ، مشئومة
    مايقوما ، مايقوما
    **********
    وسواري آخر الليل ــــ اللاّفي راكبي الخيل
    حايمي ومشيها تقيل ..
    إتسمَّرت وقفت .. حَرَنت ، صهيلا صهيل
    لما القلوب وجَفَت ــــ شقَّت سكون الليل
    صرخة وأنين وأنين
    في خور تِحِت كُبري ــــ إتناوشَنْ كلبين
    اتهاوشَن جَمْ كـوم
    نهَشَنْ طَرَف طرحة
    مابين صراخ وعويل ــــ الكوم نزفْـلُو دموم
    والعسكري الضكران ..
    فَتْ ،، نَطَّ ،، جَبَد الكوم
    واتفرزعَن كلبين
    كاكيكهو شِرْبَ الـدم
    وعينيهو دمَعَتْ ،، دم
    شال نفَسُو ــــ واتحزَّم
    الطرحة لمّاها
    الطفلة ضمَّاها
    وفي دفتر الأحوال ــــ سمّاها مايقوما
    من عطفو أدَّاها
    مايقومـا ،، ودّاها
    لي حي عتيق وعفيف
    عامر بِنَاساتو ..
    من كلِّ جِنْسِِ شريف
    مليان سوادنة نُضَاف
    والماهو سوداني
    ضيفََنْ عزيز ونضيف
    ومايقوما ــــ ضيفة الحي
    مايقوما منقايي ــــ قامت في قلب الحي
    لكن هِي ما كانت ــــ زي أيِّ كائن حي
    مقطوعة من شدرة ــــ ثمرا المحرّم نَيْ
    بي طيبة الطيبين ــــ الدار بِقَت دارا
    وارثين مكارم طي ،، ما مات لهب نارا
    الفقرا ، ما فُقَرا
    شان خاطر الأطفال
    بيناتُن النبقة ــــ واللقمة مقسومة
    **********
    لكن في ناس ، غادي ، ما جايبي أخبارا
    ناس علَّت اسوارا ــــ واتلملموا السُّمَّار
    في بهارج الأنوار ــــ محتفلي بالمليار
    ساوَّالا هلّولة
    وغناها في الفاضي ـــــ داقَّالا مِزّيكا
    نضميها في الفاضي ،، تطرش كواريكا
    ما شايلي هم غيرا
    ولي غيرا ما فاضي ،، منشدهي في شيكا
    وبي كاشا مشغولة
    ناسَنْ تقول ما ناس ،، معدومة الاحساس
    نافخي ،، وكأنو خلاص
    كلَّ البلد هُولا ،، وكان البلد هُـولا
    إذن ... الغلط هُولا ،، كلّ البِموت هولا
    والبِتْولِد هــولا
    حتى إن بقت طفلة ،، مرميِّي مجهولة
    الفاجعة من هولا
    في دفتر الاحوال ،، سَمّوها مايقوما
    **********
    ما ذنْبِ مايقوما
    تمرق على الدنيا ، مجهولة الوالدين
    محرومة ،، محرومة
    لاعم ولا خالة ، حضناً قريب وحنين
    تدفع تمن لحظة ، إتقاسمـوها اتنين
    لا من ضمير صاحي ، لاخافوا رادع دين
    لا حتى قولة خير ،، وسيرة عديلة وزين
    عمداً وبي إصرار
    لاخوف ولا رهبة .. من جُرْم أوعاقْـبة
    إشتعلت الرغبة
    انعدمت النخوة ،، إتبهَلت الشهوة
    واندلعت النزوة ..واتمادوا في الهفوة
    إتمادوا فاتوا الميس وحًدْ اللعب بالنار
    عِـِيييييكْ ،، غابوا في النشوة
    وانزرعت البذرة ، والبذرة ، مشئومة
    مايقوما ، مايقوما
    **********
    مايقوما ولدوها ،، مكتولة ،، موؤدة
    في الدنيا ما ادّوها ،، غير دنيا مسدودة
    تمسك ثدِي الحرمان
    ترضع وجع وهوان ،، تشبع نبيشة حال
    من كلِّ زول ولسان ،، من قيلْ وقِيلَ وقال
    بي حالا ، لو راضي
    ناجضنَّـها الفارغين
    بي سِيرة الماضــي
    الشافعي ، يا ظالمين
    مايقوما ،، مظلومـة
    **********
    يا مؤتمر وطني ،، لو إنتَ صِحْ وطني !
    يا مؤتمر شعبي ،، لو إنتَ صِحْ شعبي !
    يا إتحاديين ،، لو إتحاديين !
    يا حركة شعبية
    بعثِ وشيوعية
    يا أمة ، يا أمة ، كان إنتو صِحْ صادقين
    يا ناس يا حاكومة ،، يا معارِضِين ،، ياهووووي !
    يا مشتَّتين ،، جبهات
    ومفرَّقين ،، حركات
    ومقسَّمِين ،، جِـيهات
    يا اْخوانّا بالذِّمَّـــة
    اتجيَّهوا ، اتلمّـــوا
    ما أروع اللّمة
    ما أجمل الأمة
    لمَّان تكون ، لمَّا
    على قلْبِ زول واحد
    متماسكي ملمومة
    تسمع صراخ طفلة
    مسكيني، محرومة
    ما نطقـت اليابـا
    ما شافت اليُمّــة
    في دفتر الأحوال
    سمّوها مايقومـا
    **********
    في اليقظة ، في نوما
    والقعــدة والقومـة
    المَرْقَـة والحومــة
    مايقوما مجروحــة
    مكسورة الخاطر
    تنضـارا في روحـا
    وطوَّالـي مغمومــة
    يوماتـي مهمومــة
    كُلْ ماتشوف لها زول
    واقفلُو جَمْ زولـــة
    في دنيا مزحومــة
    بي آهة مكتومـــة
    تسأل سؤال ضهبان ..
    ياتُن أبوي وأمــي ؟
    وتصيح تصيح وتصيح
    وصياحا شايلا الريـح
    واضيعتي وهمِّـــي
    من نزفي من دمــي
    من أيِّ دنا
    ياتُن أبوي وأمـــي
    من أيِّ دنا
    ورُّوني ابوي وامـي
    من أيِّ دنا
    كُوسُولِي ابوي وامي .



    [/gdwl][/gdwl]


    ياريتني لو أفضل معاك
    رايح

    ولو طول العمر

  5. #25
    رفاعي إمبراطور
    تاريخ التسجيل
    Sep 2008
    المشاركات
    11,082
    معدل تقييم المستوى
    24

    افتراضي

    [frame="14 80"]
    الزول ده صلاح
    وصلاح ، في أيِّ مكان ..
    في أيِّ زمان ..
    كانَ ، وما زالْ .. حيظل للوطن الصامد أمضى سلاح
    كالسيف المابي النوم في غمدو وحالف ما يرتاح
    **
    وصلاح ،
    ما كانَ ، وما حيكونْ زول نوري وبس ..
    ما كانَ ، وما حيكون زول مروي وبس..
    ما كانَ ، وما حيكون زول بنجــد وبس ..
    كانَ وما زال ، حيظل زول السودان ... كل السودان
    الدرع الواقي ، سلام وأمان ..
    **
    كتفو الشَّياَّل ... ما زال شيَّال
    كفُّـو الكاتال ... ما زال كاتال
    مطرو الوشَّال ... لسع وشال
    **
    قمرو الوضَّاح ... لسَّع وضَّاح
    تمرو الدَّنداح ..... لسَّع دنداح
    نهرو المنداح .... لسَّع منداح
    كيرو اب تمساح .. ماهو الرحراح
    مابَرِحَ ، وأمسى واصبح ساكن في الوجدان
    وجدان الناس العبّا قلوبُنْ أمن واطمئنان
    **
    الناس الأدّا وريدُن والشريان
    الدم الصافي
    الصحة العافي
    النادي ... البير ... المسجد ... والإسعاف
    القلم ، الدفتر والكراس
    الناس الكانت دايشي
    تكاتل عايشي
    الكانت تشرب في الحرمان أزمان أزمان
    الناس الكُر من حالُن كُر
    الماسكي حبال الصبر المُر ،
    وتشُر الوهم وتَجُـر وتَجُـر
    في بحرو تـَكُـر
    الكُلمَا اتعارض لي خطواتو كَجُـر
    فكَّت ساجورا يقين وايمان
    اتوارى دَعَت ... إنضارا صَقُـر
    يا عيني دقُر
    شايلالا نذُر
    لاتهون ... لا تخون
    لا يوم تتباكى ولا بتتشاكى ولا بتضر
    **
    الزول دا صلاح ..
    المننا فينا
    اللينا البينا
    الزَّيَّنا زينة
    أمَّاتو بيوت الطين
    أبواتو خلاوي الدين
    الزَّيَّنا ساعت كنَّا عوين
    سوّا الزُّمبارة من الكُرَّيق
    فتل الآشميق
    قلع الصارقيل
    قَـرَش الدِّفيق
    دنقر فوق جدول وبلَّ الرِّيق
    البِمْلا قــُفاف السُّكَّر
    للعرُّوب والحلب الفوقنا مدين وكُريق
    سدَّ السَّرسار ... نتق الكوريق
    جبد الكارديق .... لمَّ الكاويق
    جرى لحق القدرو بُـطان
    اندردق فوق قيزان الرملة جِنِس درديق
    اتعفَّـر وشُّو غـُبار
    نفض العرَّاقي وقام
    قام دقَّ الكف ... صفّق صفّيق
    قام جرَّ الصَّف
    الزول طنبار
    يعشق في الطار
    قطع العرجون طبطاب
    الفي الآرتيق .. بَربَر بربورو ، ولعب الطاب
    كورة الشُّرَّاب
    ساق النُّوريق
    سطَّـح فوق راس القطر
    أو صنقر فوق شوَّال التمر الشايلو اللوري على امدرمان
    ومساعد اللوري رفيق وصديق
    عدل الهبَّار
    شرّك للكودِّي ... القمري .. الكُرَجِي .. أبو الترتار



    البي الكشكوش
    فوق الهوليق
    كَشْكَشْ كِشْكيشْ
    في إيدو حبال
    ينهر في الطير من تالا العيش
    وإن مال البيت .. أو مال الحال
    سند الآرنيق ..
    مرسال وهميم
    ما اندهده غاب
    ما مشى بالباب
    تلَّب بالحيطة وللجيران ودّا الرَّوَّاب
    لمَّاح وفهيــــم
    وبسيط وفخيم
    الشايل من تاريخنا قديم وجديد
    وجديد وقديم

    [/frame]
    [flash1=http://www.marafi-alebda.com/up1/uploads/files/marafi-alebda.comc562d9a8c6.swf]width=600 height=200[/flash1]

  6. #26
    إمبراطور متوج الصورة الرمزية الرايح
    تاريخ التسجيل
    May 2010
    المشاركات
    21,297
    معدل تقييم المستوى
    32

    افتراضي

    [gdwl][gdwl]الســــد ـــ الـــرد [/gdwl] [/gdwl]

    [gdwl][gdwl]
    الرَّدْ ــــ السََّدْ
    السد ،، السَّدَّ بوابات الظُلمَة
    الهَـتـَك استار الغُمَّة
    وكهرَبْ عصبات الليل
    كشفت أنوارو العتمة
    **************
    الرد ــــ السد
    السد البلَّل ريق العطش الكان
    متوهِّط فوق شفتين النيل
    العطش الحرَّق جوف الأرْضِ
    وخلاَّ جروفنا ..
    حصا وضانقيل
    كَتَل التمرات ..
    الكانت
    شيّالة ، سبيطا اتكابا
    هلك البقرات ..
    الكانت
    مندلِّى ضروعا وحلاَّبا
    ومحَّق كوم صبرِك يا أمة
    **************
    الرد ـــــ السد
    السد ،، منَّ الله مدد
    مدد الله ،، المالو عدد
    السد ،، عرق الإنسان
    السد ،، جُهد الانسان
    إنسان ،، هذا السودان
    إتوكّل على ربُّو ووحَّد
    **************
    الرد ـــ السد
    السد
    بعد الدمعات ،، البسمة
    بعد الكتمات ،، النسمة
    بعد البكمات ،، الكلمة
    بعد الآهات ،، النغمة
    على كلِّ ثغور ،، البسمة
    وقالدي العتمور ،، النسمة
    ومندلقي سطور ،، الكلمة
    ورنّة طنبــور ،، النغمة
    لي شعبِ صبور ،، السد
    لي شعبِ جسور ،، السد
    **************
    الرد ،، السد
    السد ،، رابض .. ضرغام
    السد ،، هَدَم الهــدّام
    السد ،، لُقمة ،، وهِندام
    الهازم ،، غيلان الجوع
    الجاسر ،، طوفان "النوع"
    الكاسر ،، طوق الجِّهويّة
    الآسر ،، شبح الإثنيـة
    الراوي ،، رؤيـة وأحلام
    ومداوي ،، كِلْيَة ، وأورام
    السـد ،، هبَّتْ أنســام
    خُرتايــي ، ودفتر واقلام
    للشفع ،، فقرا وأيتام
    أرزاق ،، قَسَمَا القَسَّام
    للنبتة ،، وكلَّ الأنعام
    **************
    يا حارسَ اْقوان أسيادك
    يا لاعب .... قدَّامُنْ باك
    الباب مفتوح .. مفتوح
    تنتاوق ليه بالشُّبـــَّاك ؟
    يا رامي الشبكة الأفاك
    تصطاد في الموية العكراني
    صدقني حتجني الأشواك
    أشواك في قلبك يافاسق
    المنَّك مرقت بالساحـق
    رجعت لك ،، صدّت بالماحق
    يا تور الله الأنطـــح
    ترباية الســـي آي ايه
    ومدوعَلْ عند "الشَّاباك"
    قرنينك "عوزي" و"ساركوزي"
    "باراك" .. الدَّفَرَك وباراك
    ما اتعلم من دقـْسَت "بـوش"
    "الزيدي" وضرب البرطوش
    ادخل لا جُوَّة وناطِحْنا
    بالسد بنناطحك ..
    بننافحك
    بالحق الناصر نصر الله
    بالعزم الثوري الشافيزي
    **************
    الرد ــــ السد
    السد ،، قهرك ، هزمَكْ
    السد ،، دحرك ، لطمَكْ
    السد ،، هكمك ، دكَمَكْ
    السد ،، صفعك ، لكَمَكْ
    السد ،، هجمك قَهَمَكْ
    السد ،، كمّل فهَمَكْ
    السد ،، لجَمَك ، لخَمَكْ
    السد ،، دقشك، صدمَكْ
    السد ،، سجَّم سجَمَكْ
    السد ،، نهشك ، كدمك
    السد ،، فتلك . برمك
    السد ،، كتلك . فَرَمَكْ
    ***************
    السد ،، لطشك ، صفَعَكْ
    السد ،، قشطك ، لبَعَكْ
    السد ،، ربَشَك ، خلعَكْ
    السد ،، فنَّاك ، جدَعَك
    في النيـل ، والنيـل بلَعَكْ
    كُلْمالَكْ ، تحتل ، تغرَقْ
    تتغورر ،، لامِنْ تشْرَقْ
    تنطنبج .. تشهق ما تلحق
    **************
    المحكمة ...!! قُتَّ جنائية؟
    الجن الكلكي الفي اضنيك
    تتعلّق قِـرَبُو ويغباك
    الحَقْ يأباك ... يأباك
    ألْحَقْ ياباك... ياباك
    أهدافك غابت ما جابت
    أهدافك خابت ما صابت
    دعواكَا فشَنْك وماسورة
    ***************
    ما شايف ! عينك تتقدْ
    بالرمد الرامــد تنسدْ
    الدنيا شعوبا المأسورة
    في غزة ... وقانا ..غوانتانامو
    في بحر البقر المقهورة
    بُوغريب ... هيروشيما .. وتورا بورا
    الناس معصورة وممصورة
    أطفال مطحونة ومصهورة
    **************
    ما شايف ؟؟ عينك تتقـَـدْ
    أحَوَلْ ؟ أعور ؟ مكفوف ؟
    الحَوْلا بصيرتَك ... عورا
    مكفوف إحساسك وضميرك
    مين زيك إنت ومين غيرك
    في الدنيا جريمة انسانية !
    **************
    تتذكر !
    إنت بتتذكر ؟
    تتذكر "تاتشر" و"الفوكلاند" !
    تتذكر إنت "ارجنتينك" ؟
    عِنْ ساعت الجد والحارَّة
    هارب مرقنّك كرعينك
    فكّيت البيرك على هارفارد
    تندسدس إنت وتتلصص
    تتعلم كيفن تتجسس
    ما أبخس علمك في هارفارد !
    ما أرخص علمك في هارفارد !
    يا ماص الدم .... الدم
    من عرق الحرف المعتوه
    ياداس السم .... السم
    في كاس العدل المشبوه
    السم اليهري مصارينك
    تتبجح وتنبح في لاهاي
    إِشْ يا كوراك .. كوراك
    كَرْ يا كاكاي ... عَرْ .. وِشْ
    عَـرْ .. وِشْ .. يا جار الكارو
    جر يا نبَّاح ... لاهاي
    الصقعة الصاقعة ... الصاقعة
    اللبعة اللابعة قفاك
    الصفعة الصافعة الخد
    اللبقة التزرد حلقومَـك
    حلقومك إنت وحرُّومك
    حرُّوم المحكمة ... إتلمن
    غزلَن فتلَن
    المشاطات
    اللخباطات
    الهراطات
    الفراطات
    السواطات
    الفبراكات
    الأفاكـات
    الشرباكات
    اللفاقـات
    النقناقات
    زرعَـن ... شَتَلَن
    في ليلِن إنت الوطواط
    يا ثعلب....... والثعلب فات
    في إيدينو ... سبعة كضبات
    ومذكرة حتلت في البير
    واتماصت من قولَتْ تِيت
    والبير إتهدَّت هد
    إندفنت ... جافاها الطير
    صاحِبْهَا .. واحد خنزير
    خنزير، في صورة إبليس
    إبليس سمّوهو لويس
    الزير ... زير الحرّوم
    ما زيرنا .. وما موية النيل
    النيل الحاضن السد
    والسد ...سوداني أصيل
    **************
    حالفين ... حالفين .. حالفين
    حالفين بالسّوّا جبل مرة
    نتوحد في الحلوي ومُرّة
    وبحقِّ الخلق الرّجّاف
    ما فينا الراجل الرّجّاف
    والنصب البركل وتوتيل
    والنخلة الفارهة على النيل
    الشمش
    الطير والانسان
    القمر الساطع والليل
    حالفين .. حالفين .. بالقرآن
    يس ... بي نون .. والرحمن
    قسم التوراة والإنجيل
    بالمد الشعبي الإتوحد
    والغضب الشعبي الإتمدد
    ماب نركع يوم بين أقدامك
    نتصدى نقيف لك قدامك
    نتحدى .. ننجِّم نجّامـك
    ونشد بطّانك ولجامــك
    ***********
    ياخويا عمر ... ياخَيْ
    ياصاحي ضميرك حي
    كيَّك مُو نَيْ .. مُو نَيْ
    حَرِّق مروادك ونجِّضْ
    فوق كبد اوكامبو الكي
    وبنونة تقول لك سَـيْ
    ومهيرة تقول لك سَـيْ
    قول لي مورينيو المبدول
    رُوقْ أدّها صنّة واسمعنا
    إشْ معنى بلدنا وإشْ معنى ؟
    نحن الشاتلنــا وزارعنا
    غير الله كدي اليجي يقلعنا
    أصبحنا بِـِ الله وأمسينـا
    رصينا صفوفنا اتواسينـا
    أخلصنا النية اتواصينــا
    وان بقى شايفنا اتمسكنّـا
    بالمسكنة نحن اتمكنّـــا
    ***********
    يا خويا عمر يا خَــيْ
    نضمك مُو نَيْ .. مُو نَيْ
    قول لي مورينيو المبدول
    وسمِّـع أركان المجهول
    دارفور دي أهَلْنَا وأحبابنا
    دارفور اخواننا واصحابنا
    دارفور دي ترابنا وتيرابنا
    جامِعْنَا الدين والوطنية
    سحنات الزنج العربية
    وسِمَات العرب الزنجية
    في حوش القـُرْب الإنساني ..
    على بَعـْضِ اتفتحت ابوابنا
    [/gdwl][/gdwl]


    ياريتني لو أفضل معاك
    رايح

    ولو طول العمر

  7. #27
    إمبراطور متوج الصورة الرمزية الرايح
    تاريخ التسجيل
    May 2010
    المشاركات
    21,297
    معدل تقييم المستوى
    32

    افتراضي

    اقتباس المشاركة الأصلية كتبت بواسطة سولارا مشاهدة المشاركة
    حفظ الجميل والامتنان .. طبع النفوس الخيرة



    ودا احلى بيت
    امكن لانو القصيده كلها بتدور حوله


    ابداع والله يا الرايح
    من اجمل القصائد القريتها
    [gdwl][gdwl]
    في حضرتك تخجل حروفنا وتنزوي ويضاءل القول والشرح
    [/gdwl] [/gdwl]


    ياريتني لو أفضل معاك
    رايح

    ولو طول العمر

  8. #28
    إمبراطور متوج الصورة الرمزية الرايح
    تاريخ التسجيل
    May 2010
    المشاركات
    21,297
    معدل تقييم المستوى
    32

    افتراضي

    [gdwl][gdwl] ابوشروق التحايا لك مثني وثلاث ورباع .. [/gdwl] [/gdwl]


    ياريتني لو أفضل معاك
    رايح

    ولو طول العمر

  9. #29
    إمبراطور متوج الصورة الرمزية الرايح
    تاريخ التسجيل
    May 2010
    المشاركات
    21,297
    معدل تقييم المستوى
    32

    افتراضي

    [gdwl][gdwl]افتش لك ولاقيكي . [/gdwl] [/gdwl]
    [gdwl][gdwl]
    افتش لك
    وكت اضهب
    وسط ليل الضنا الودر على اثرك
    حرس كل الدروب .. قنَب

    الاقيكى ..
    نجيمة تضوى قدامى
    اماسى سنينى وايامى
    قوافل الشوق تقوم ترحل
    عديل قاصداكى ما بتتعب

    افتش لك
    وكت بحر الاسى التسب
    تماسيح موجو والشيمة
    على فى نصو تتكالب

    الاقيكى
    جروف آمالى قاصدانى
    ايديك ممدودة خاتفانى
    على كفيكى شايلانى
    تجاه بر الامان مركب

    افتش لك
    قسا الايام لدغ عقرب
    فراقك سمها الهارى
    قطع اوصال شرايينى
    يفور فى الجوف اهضرب بك
    اناجيك والفكر غيب

    الاقيكى
    بسيمة تلوح امام عينى
    دموع ريدك تآسينى
    حنان الهمسة واللمسة
    بلاسمى اكركعا واشرب

    افتش لك
    سموم الدنيا كتاحة
    هجاير فُرقتك مرة
    متل اقدارى لفاحة
    كما الازمان دواليبا
    تدور وتدور وتتقلب

    الاقيكى
    نسيمة على الشِتيل هبت
    سرت فى روحو واتربت
    كِبر واتنفس العافى
    قَلب رطبو وشرب لونك
    مندِى متل نداك رطَب

    افتش لك
    بكا صخرك عليك يا خنسا ما كفََى
    تقيد نيرانو جيبة اسمك
    يلوحلو على الطلل رسمك
    يفرتق جرتقو ويرحل
    يموت لا سيرة لا زفة
    رحيل لا قِبلة لا مذهب

    الاقيكى
    وِشى امى اليصابحنى
    كلام اختى اليفرحنى
    حنان بتى التداعبنى
    تكيل فوقى التراب تلعبافتش لك
    وتر محزون بكى اتعذب
    وكت رمت الهدم ثاكلة
    جرت ندبت بكت لطمت
    خدود فجر الغنا الغرََب

    الاقيكى
    قمارى تقوقى حامدى الرب
    حمدتََ الرب تسابيحى
    غناها يزيل تباريحى
    اقيف وسط الخلوق عشقان
    اغبِِِى واترجف واطرب

    افتش لك
    سراب صيف ما دنا وقرََب
    قطع نفس الامل حسرة
    مبارى وما انقطع عشمو
    فقد راس خيتو واتوهدب

    الاقيكى
    لقاك بالدنيا والفيها
    ربيع ما اروع اللقيا
    رحيق ما ابدع السقيا
    مقيلى معاك وسط واحة
    يعيد للفرحة افراحا
    سحاب طوالى دار دمعو
    يجود لا غشََ لا كضََب

    [/gdwl][/gdwl]


    ياريتني لو أفضل معاك
    رايح

    ولو طول العمر

  10. #30
    إمبراطور متوج الصورة الرمزية الرايح
    تاريخ التسجيل
    May 2010
    المشاركات
    21,297
    معدل تقييم المستوى
    32

    افتراضي

    [gdwl][gdwl].. الــــــــــوداع .. [/gdwl] [/gdwl]

    [gdwl][gdwl]
    لسة ما كملت سعادتى ..
    بى وصولك ودار تســافر
    الوداع انا اصلى عارف ..
    قدرى كاتبلى الـــدرادر
    يوم قدومك حالى اصبح ..
    كالربيع يغشى الازاهر
    واستحال حزنى المدفن ..
    فرحة احــكيبا واجاهر
    طلة نور البهجة ساعت ..
    نور محياك جانى زايـــر
    الوجود الكان مضلم ..
    فجأة حسيت بيهو نايــــــر
    شوفنى شوقى الفى عيونى..
    داير اضارى ومانى قادر
    اللسان كان غلبو يحكى ..
    والدمع فاضح المشاعـر
    فيك لقيت املى البكوسو ..
    رجيتو طول العمر صابـر
    ما بصدق كونو القا ..
    وين بيتلقى حلم عابــر
    ودار تسافر ما اظنك ..
    للبيبقى وراك خابــــر
    يتقطع راس خيتى وابقى ..
    كاليتيم فى الدنيا حايـــــر
    اشقى بى سهر الليالى ..
    بى غدر زمنى المكاجــــــر
    واستعيد الماضى علك ..
    لى زمانا الولى فاكـــر
    لو نفد قدر الله فيَى ..
    وليك نعونى من المنابـــر
    لا تنوح شن بسوى باقى ..
    ما زويل غناى وشاعــر
    الوداع آه موج اساى ..
    وراك شوف كاسحبى دافـــــــر
    ما لقيت فى قشة امسك ..
    الوداع فى الدنيا بعدك كل شى
    شايفو غريب ونافر
    لا غنا الاطفال غناهن ..
    ولا ازاهــــــــر الــروض ازاهـــــر


    [/gdwl][/gdwl]


    ياريتني لو أفضل معاك
    رايح

    ولو طول العمر


ضوابط المشاركة

  • لا تستطيع إضافة مواضيع جديدة
  • لا تستطيع الرد على المواضيع
  • لا تستطيع إرفاق ملفات
  • لا تستطيع تعديل مشاركاتك
  •  
الساعة الآن 11:06 PM
Powered by vBulletin®
Copyright © 2021 vBulletin Solutions, Inc. All rights reserved.
المواضيع والمشاركات في منتديات رفاعة للجميع تعبر عن رؤية كاتبيها
vBulletin Skin By: PurevB.com