حِجِّي جوَّة الرُّوح وطوفي .../... إهداء إلى تماضر الخنساء حمزة ...

[مهند الجيلي بادي]

إهداء ... :

إليك حين عودة الخضرة
إعلاناً أن الزمان الجميل يقف عند أبواب القلب
يستفز الطرق خطاي
فأنهمرت
أقصد ..
تدحرجت نحوك منقادا لرائحة الروف
أدعوك :

أن اقتربي ...


زقاق :

هناك ..
حيث كنتِ تأتلقين وتختالين في عباءات حروفك البهاء
كان هذا الصدح ..
أتراني .. أفي مقامك شعرك صدق وصف
لا أظن
فحرفي قاصر


هذا ما أتي الآن
وأنتظر أنا .. طوافك حول قلبي

[مهند الجيلي بادي]

[align=center]حِجِّي جُوَّة الرُوحْ .. وطُوفِي[/align]


أَوَّل بَدِيتْ بالدَهْشَة
واسْتَنِّيت مَسَاربْ الكِلْمَة
تَفْتَح طَاقَة مِنْ وَهَج الحَنِينْ
غَنِّيتْ كَلامِكْ مَرَتِين
مَسِّيت حَوَاسِّك
وانْتَكيتْ
كَيَّفْتَ (خَرْمَةْ) شُوقِي للنَضْمّْ الرَزِين
ومَا شِهِدْتَّ عَلى المِرُوق
كُنْتَ قَاصِر
رَغْمِ إنو اللَّهْفَة أَكْبَر مِنْ صَدَى
والغُنْوَة
رَنَّاتْ الوَتَر
أَوْضَح مِنْ الشَمِس النِّهَار
لكِنْ شِهَادَةْ الزُول الصَغِير
مَا بْتَفِيد
لَحْظَة تَكُون البَيّْنَة
رَتْلين مِنْ سِطُوعْ
والصَدْحِ أَعْمَقْ مِنْ قَسَم
مَحْلُوف
عَلى القَمِح البِنَادِي المُويَّة خُشِّي


إسْتَبِنْتِك
وانتِِ بِينَات الخِلُوق
مَلْيَانَة بالكُورَاك (تَعَالْ)
حَلقِك مُلازِم للغُنَا
والقِيفَةَ مَا فَتَرَتْ تَردِدْ دَخْلَتِك
النِّيل وَكِتْ شَافِك سَكَت
الغِيمَة لامِنْ شَافَتْ المُوج جَاري لِيك
إتْمَحّْنَِت
والغُنْوَة مَازَالتْ بِدَايَة
إنْكَفيت
فِي لَهْفَة الخُوف مِنْ مَدَاخِل
سَاكْتَة بِتْرَاجِع حِِصَصْ أَوَّل شُعَاع
طَلَّ مِنْ تَال البرُوق
يَا زُول أَقِيفْ
أَحْسَن تَرُوق
أَحْرِسْ ضِلِيل النَّخْلَة
مِنْ نَمْلاً بيَطْلع للتَمُر
وَكْت الشِرُوق
وأدْخُل إِذَا سَكَتْ الصَبَاح
رَدَّدتَ بِسمِ الله
وقُمتَ عَلى الوَرَق
خَتِّيتْ حُرُوف الإِلْفَة
واتْرَجِيت هطُول
القَمْرَةَ مَا خَانَت مَوَاقِيت الحَجِيجْ
إِتْهَلَّلَتْ
وأنَا كُنتَ مُتْرَجِي الضِيُوف
فِي تَلَّتي
اصْطَفِيت فِي لَحْظَة أَوْرَاقِي
وقَعَدْتَ بنِادِي لِيكْ :
أَنْ أَحْرِمِي ..
وأَوَعِك تَزِيدي الفَرضِ لَفَّة
وفَضَلْتَ مُتْرَقِّبْ سَعِيك
هَرْوِلي
أقِيفِي فُوقْ عِرْق الوَرِيد
يمْكِنْ بنَغْفِر لِيك صَفَاك
أنَا ..
والوِليدَات البِشِيلُو الكِلْمَة
أوْرَادْ
فِي المِسَا


مرفق :
حاجة لا بتنشاف
ولا بلفاها شفقان المحبة
بـــــــادي

[احمد امين]

دايماً مبدع..
ومبدع...
ومبدع......

[تماضر الخنساء]

مِنْ أوَّل ..بَديتَك
ماإستنيت..
مسارب الكلمة
لاوهج الحنين
عارفني مكتول بين كليماتك عديل.

وشِن بِفيد نظم الحروف..
في زول غلب وصفو الكلام
مسيت حواسي وإنتكيت؟؟
شلهتا في حِسِّي الغرام
إنتا ياحلو القصيد
أنا فيكا أتعبني الملام
مابقول برضك هويت
وفارق العين المنام
لكن أظِن ...
روحي هجَّت ليك عديل
ستَّفت قلبي العليل
طبَّقت جوَّاو ..وريد..
وفي الطرف ..شوقك مرتَّب..
وبماإني مستعجل سفر..
معليش نسيت كمين كلام
معليش شنيطتي ماشالت كتير
فوق المرتّب..جاط عمر..
وفوضى من تحناني ليك.

إستبنتك ..
: (تعــــــــــــــــال)
..

ماشفتا غيرك في الخلوق
لا عِرِفتا إنّو الكون وسيع
فيهو غيرك ؟؟ ومابراك؟؟
أصلي فاكرة الكون عيونك
وراها بتضارى الجميع
وعينيَّ مابتشوف سِواك!
ومابلوم الشوف وحاتك
وبقولُّو في الشفتو ..الكفاك.




يازول شفيف..
وِصلتا حد الشهقة في حِس الكلام
ودخلتا بيّ.. كل المسام
لامَسَت روحي الحروف
هاجرت منِّي الظنون..
ووراها سافر باقي خوف..

في موسم الحج العفيف
يازول نضيف
حجيت معاكا وإشتهيت
برضي لو جوَّاك..أطوف ...
ماأتعبت ..شوقي المسافة..
وياني مامليت مشيك
وأنا في الصفا لو تقيف
المروة لو تعرف وِصالك..
شلتا شوقي إليك سعيت

وقفتا فوق عِرق الوريد..
هل فاجأك فيني الغرام؟؟
أم فيني صادفتا الهيام..

ناديت براك..
قلتا: (حِجي..وطوفي جوّاي ..ياخناس)
..
إتحمّل التطواف..وعيش..
نشوة الزول المعاك.
.

[احمد امين]

والله يا خنساء عندى احساس قوى جدا بأكد لى انو رسايل الشعر الفى جوالات السودانين كلها من اشعارك....
لأنها اشعار ما سمعناها فى غنيه او قريناها فى ديوان شعر....
تسلمى كتير...

[مهند الجيلي بادي]

أحمد أمين ،،


عند منعطف ما
تستفزك مرونة جسدك
فتحاول الدوران حول نفسك
والانعطاف بخفة إرضاءا لغرورك
واختبار مرونتك
ثم تمعن في السير غير آبه
تعيش نشوة فعلك ذاك

هذا كما الحرف
يستفز عقلك
فتتقوقع داخل نفسك
إلى أن يفتح الله لك بتركيبة جديدة من الحروف
تخرج إثرها زفرات الراحة


أحبك كثيرا يا صديقي


مرفق :
كل الأماني التشتهيك
بــــــادي

[مهند الجيلي بادي]

الخنساء ،،


كنت قاعد وحدي
شان
أقدر
أشوفك
وما تجوط
لحظة إشراقك هموم
..
..
تفتكري ممكن هم صغير
يعكر الشوفة القمر
ما أظن ...
قلت كدا ...

وما فكَّرتَ تاني أشوف عيوناتك بياتو طريقة
بس ...

كان هناك في نواصي القلب
بعض من جمال (الشوفة) الأولى
فاستعنت به
كي لا يعتريني الإنشداه
وتتسمر شفتاي قبالة نقائك
وتصوم عن نظم القوافي ...

حشرج الصوت يوم مناداتك آذان
سِمْعَتْ (القِبْلَة) العشق
إستعدت للفرض
وأنا لسة واقف بستعينك للقلب
أن قرِّبي ..
خليني أبداك بي حرف أشواقي
وأتهلل شهر
بتصومك جموع العاشقين
وبتفطرك
حنية الوتر المسا

(وما بنتهي الشوق بانتهاء الفرض)


مرفق :
حبي الكبير
بــــادي

[تماضر الخنساء]

وكنتا فاكر..
إني ذيّك..
براي وقاعد وحَدي
إتغابيت وجودك..في حِداي...
وإحتلالك..مساحاتي البراي
بتطلع إنتا من جوّاي
من شهقة مراسي الغيم
ومن زفرة الإسمو الرذاذ.
بريــــدك إنتا ياملمح الناس العزاز
بشتهيــــــك ..وكتين تطِل عينيك لذاااذ
إنتا ياموسم حراز
ترميني بي النظرات حنين
وأجدع ليكا من خَدري الشهيد
وإتسرّب فيني ياشلال ضنين
بالريدة..أسرح في الوريد
أدفق الشوق ..ياخي جيد
خلِّي التوجُّس..ياحبيب
عارفني برضك مشتهيك..
وداير أجيك.

أبداني من أي كلمة بتعجبك
من أي إحساس..
تلقاهو مكتوووووب ( حتتك)
أبداني من عندك
تلقاني فيكا...ومسكنك
أبداني ..من حيث إنتهيت..
والله بعشق معبرك
أبداني من أي شئ
يخطر ببالك..
أو يصادف فكرتك
أبداني من وكت إنتويت
وإتوضّى من عينيَّ ديل
وأفرش علي روحي ..مصلاية العشق القبيل
وأكتب عليّ...فروضك..ومعبدك!

[تماضر الخنساء]

أحمد أمين
تسلم كتير على رقيق الكلمات
ربي يسعدك

[أبوفاروق]

بين المداخل والدواخل
واقف علي باب الصبر
شادد حزام الإنتظار
راجيك تعود ..
....................
المبدع مهند الجيلي سلاااااااااااام
مبارك علينا إنو لقيناك بي جاي مع شباب رفاعة
وأنا كنت بقرأ كل كتاباتك في منتديات عازة خصوصاً
المقارنة الأخيرة التي كتبها كاسترو .. وأخيراً الواحد
يشعر إنو أمام كُتاب وشعراء كبار يعتز بالتعليق ولو
كان قليلاً على أشعارهم .. والتحية ليك .. وللشاعرة
تُماضر الخنساء فهي لا تقل إبداعاً عن صاحبة الإسم
ولي عودة ريثما أرتب ماذا أريد أن أقول .