سلامات يا زووول يا رائع (ازهرى محمد على فى رثاء مصطفى ود سيد احمد)

[همبـــــــــاتى]

تعالوا وشاركوا
الفكره
نمسك الشعراء واحد واحد ... ننثر اريجهم ونعيش انفاسهم .. نقتلهم بحثا ... شارك ولو بالقليل يعنى الكثير لدينا ...
كبدايه نبدا بشاعرنا المهول ابو وضاحه الشاعر ازهرى محمد على ... شاعر غنى عن التعريف يكفى انه مصصطفى سيد احمد صدح بالكثير من اشعاره ... تعالوا نشوف مرثيته سلامات يا زول يا رائع...

مدخل أول:
لمتين متيمم شطر النيل
متوقى اليابسه ووارد
متوكى الغنيه عصا موسى
بتهش فى غيم الالفه الشارد
مهدوده القدرة وفترانه
حردان الضل البارد
بتوجل لى يوسف فى البئر
يطلع من بطن البير المارد!


مدخل ثانى:
فات الكان بدينا أحساس بالالفه
وكان راوينا
فات الباكى جرحنا وناسى جرحو
ولافى ورانا مدينه .....مدينه
فات الصاحى ونحن نغط
فى النومه السابعه
طالق حسو ولا حسينا
حتحت فينا غناهو الطاعم
وفات قنعان من خيرا فينا
سلامات يا زول يا رائع
سلامات عوافى!
سلامات ياخلاصة الخير الفى الناس
وترياق الزمن المتعافى
سلامات يازول يا رائع
سلامات عوافى
محاصر فيك
بسأل عن سكة تطلع منك
أو سكة تودى عليك
بسأل عن مخرج منك وليك
زى نهر بينبع
وما لاقى مصب
بتمدد عشقك من أقصى ضواحى الروح
لى أقصى نواحى القلب
يتكثف بسعة اطلاق الرب
وأنا كنت بفلى القلب بسيرتك
سميتك حلاب الغيم
من ضرع الجدب
وظنيتك مارست الفعل السرى
وحفظت فحولة النيل
أيام الخصب
ولمحتك وانت بتتمشى
وترقص فى حمامك
على حمة ايقاع الحرب
وتكلكل جلد الكلمة الحافه
لحبيبة بتفتح مجرى الغنا فى الدم
وتفلس بيبان القلب
فيا بنوت الشارع الطاعم
قومن كب!
قومن للماقصر فى غناكن ضمة
ولاأتلوم بوراكن تب!
لو تبقى السكة الماشة طشاش
ماتبقى السكة الجاية ضهب
وسلامات يازول يا رايع
البارح عصفورتك ركت فى البال
رقصت وادت عصفور الريد شبال
وطارت من قولة كر
ما الزول النهر العصفورة
بحرض فى كلاب الحر
لابسنى وداخل فى اللحم الحى
راصد كل البسأل عن حالى
حرش ضلى على
ونتف زغب الخاطرة التخطر على بالى
ومنع العصفورة تحوم
أستجوب كل الناس البجو فى النوم
ما تقوم !
يازول يا رايع ومهموم
يامضيع ضى عينى وراك
واقف حاحاى للنوم
يامستف رئة الدنيا شهيق
ومشحتف روح الخرطوم
كيف حال يا أبوى
كيف حال يا خال
وتعال!
أتفضل على باحة بيتنا الطيب
ماعون الاطفال
ضمد جراحاتك تعال!
من ضلاماتك تعال!
من حافة البرزخ تعال!
من شرفة الملكوت تعال!
أدينا هينين من صبر
ما السكة أبعد من مشيك
والجرح أعمق من حدود الاحتمال
السابلة والاطفال هناك
قدامك المشوار طويل
والريح وراك
كل البيوت اتشرفت لى طلعتك
والونسة ماكملت معاك
القرقراب والقهقهه
مين سمى ترحالك غياب!؟
والغيبة بتزيدك بها
لو يرتق الحزن المصاب
كان بعدك الموت انتهى
يا أقصى حالات الحضور المشتهى
يا منتهى!
تعال فرحنابى دهشة غناك الحى
وحى من جرحك الدامى!
وفتر حيلك
وحى من ضلك الرامى
وحمل شيلك
تموت متل الشدر واقف
تموت واقف على حيلك
فيا حليلك...يا حليلك

بنستناك على صهوة جياد الريح
بنستناك
فى الزمن اللديح القيح
على باب الحلم فى غناك
بنستناك!
رحيلك شلهت الدنيا
ورتب العالم البهناك
بستناك!
وأنا تانى وراك شن لاحق؟
دهستنى فى بعدك
حدو الخوف
الداخلة عليك بالساحق
أدينى القدرة التمنحنى
بحجمك سعة الشوف
لو أقدر أطل من شاهق
لو أقدر الوح لعيونك تلمحنى
وانا ضعفى أمامك فاضحنى
سامحنى!
ماقدرت أطولك
سامحنى
شفتك من وجع طالع
على برزخ ملتقى النيلين
كنت هناك وحيدك
وكل الناس أثنين اتنين
براك واقف!
فى حد السيف
براك الماواقف بين بين
تغازل حلمك الفارع
فتح بابين على الملكوت
تسلم على حضرة جلال الموت
وتفتح فى الارض نفاج
أذا امتلا الفراغ بالصوت
فيا باطن الاديم أفتح
براحات الحنين مشرع
وانده لمدن شاخت
أنده لاطلال الغنا الراحت
بيوت فى بيوت
تمرق من شبر مسرح
مدن فاضلة
وعلم باتساع الحلم
بقامة يشتهى التابوت
فما لفظ البحر يونس
ولا أنسدت شهية الحوت
ويازول يارايع تمشى بالحسرة وتموت!
وسلامات يازول يا رايع

وسلامات يازول يا رايع
سلامات عوافى
ونواصل .....................

شاركنا رأيك عبر الفيس بوك ...

[همبـــــــــاتى]

معاي وغشيتك

معاي وغشيتك اسلم عليكي
واتكل قصادك هموم الحراز
اطمن طيوف الخريف الوشيك
وابشر دواخلك بوعد الرزاز
مـودر مـلامـحك غبـيتك
لقيتك بتلفظ شوارعك بيوتك
تصادر خطـاي وتكاجر مشـيك
تغالط حواسك ملامحك
وتحرد عيونك مقاطع وشييك
سالتك خبارك؟خبارك مسوكر لسانك وصمتك يشفق
خبارك بتغرب شموسك.. زمان الشموس البتشرق
تضيع الملاح التعطن وجيهك ومنك تدفق
خبارك غريبة؟
بقلب دواخلك بكوس الحبيبةال لعللك بتفرق
بتفرق حبيبتي البتلبس فصول الخصوبة
بتضحك اغاني وتدفق عزوبة وبتنزل مطر
عشقتك لانك ..لانك حبيبتي و بحبك بحر
عشقتك لانك خواتم الحقيقة وطريق الوصول
لانك بداية الخليقة واساس القبول
بحي الغيوم البتفطم زبولك ترضع سهولك مواسم الهطول
واحي المداين البتفتح حدودها وتمنح عيونك جواز الدخول

يزيد خيرك ولا طابت بلاك عيشة
مقسمة انتي في غيرك مقسمة فيكي ما فيشة
ومخيم ليللك العسعس
لا برقن بروق صحوك ولا صبحك رضى اتنفس
يحندك في العطش غيمك تمطري انتي في الخاطر
وتنفضي من دواخلي العس
بديت اتسامى للآخررميت توب البيات الرس
قويت .. وإتيقنت روحي
وسقط من الكلام الغتس
دنا الداخرك بصيرة وشوف
يا بقع الضو في عتمة قلبي المحفوف
ومسربل في الشتا والليل والخوف
فارعة ومليان بكى ضيقةعليك البشرة
انا غيبتك بيني وكنتك زملتك في الخاطر بشرى
نزلتي ستار الجلد الهـش وطلعتي من الجسد القشرة
تاوقت لقيتك ..لقيتك فيني النفس الكاملة
تتوقي اليابسة والنهر
يتسارق ضوك خافت متهافت نحوك اجري واهرول راكض
سابقت خطاي وحدقتي الغيمة وضل وبحيرة
ضاربتك بيني وضاريتك من الحزن القابض نفسي وروحي و رابض عارض
ستفت عيونك بالمطرة وقررعتك ضد الزمن الراكض
وحدقتك حبيبتي البتلبس فصول الخصوبة
بتضحك اغاني وتدفق عزوبةوبتنزل مطر
عشقتك لانك.. لانك حبيبتي وبحبك بحر
ونواصل ..............

[همبـــــــــاتى]

وضــاحـــه
الصباح الباهي لونك .. وضاحة يا فجر المشارق ..
غابة الأبنوس عيونك .. يا بنية من خبز الفنادق ..
****
شيدت في جواي صوامع للفرح ..
وفتحت في دنياي مسارح للمرح ..
وبقيت لي سكة وعيون .. لا قدرت اطولك شان أجيك ..
لا قدرت من غيرك أكون .. وأنا بيك ماليني الكلام ..
حركت بيك عصب السكون ..
جلبت ليك الغيم رحط .. طرزت ليك النيل زفاف ..
حرقت ليك الشوق بخور .. و فرشت ليك الريد لحاف ..
****
لا السكة بيك بتنتهي .. ولا معاك مليت طواف ..
ياريتني لو أقدر أكون .. وضاحة يا فجر المشارق ..
الصباح الباهي لونك .. يا بنية من خبز الفنادق ..
غابة الأبنوس عيونك ..
****
استمع وضاحه عودhttp://www.zshare.net/download/waddaha1-wma.html
ونواصل ........ بسسس مننتظرين مشاركتكم

[بابكر عثمان مكى]

ياسامى .......ماااااااااااااااااااااااالك يااااااااااااااااااااااااااااااخ


نحنا الجرح ده بنغطغت فيهو .. وقاعدين فى الصقيع ..

بالله شوف المقطع ده

كل البيوت اتشرفت لى طلعتك
والونسة ماكملت معاك
القرقراب والقهقهه
مين سمى ترحالك غياب!؟
والغيبة بتزيدك بها
لو يرتق الحزن المصاب
كان بعدك الموت انتهى
يا أقصى حالات الحضور المشتهى
يا منتهى!



مااالك ياسااااامى ياخ ماكنا كويسين قاعدين فى غربتنا دى .

[همبـــــــــاتى]

المشاركة الأصلية كتبت بواسطة بابكر عثمان مكى

ياسامى .......ماااااااااااااااااااااااالك يااااااااااااااااااااااااااااااخ


نحنا الجرح ده بنغطغت فيهو .. وقاعدين فى الصقيع ..

بالله شوف المقطع ده

كل البيوت اتشرفت لى طلعتك
والونسة ماكملت معاك
القرقراب والقهقهه
مين سمى ترحالك غياب!؟
والغيبة بتزيدك بها
لو يرتق الحزن المصاب
كان بعدك الموت انتهى
يا أقصى حالات الحضور المشتهى
يا منتهى!



مااالك ياسااااامى ياخ ماكنا كويسين قاعدين فى غربتنا دى .

الغالى جدا جدا زيــــــــــــــــــكـو
بتصدق اذا قلت ليك وانا بنزل فى القصائد دى وانت فى راسى ..... عاااااااااااااااارفك بتنهبش واحبك بحر لمن تنهبش يا زيكو لانك حا تنبهل هنا والكثيرين انا متاكد الكثيرين يا زيكو منتظرين يشوفوا ابداعك اقوووله ليك بالدارجيه ادينا الكلام البيجى من النخاشيع الجوووووووووه ......
زيكو بتمنى وبالجد بتمنى نشوف ولو القليل من ابداعك دعنا نروى ظمأنا من رحيق كلماتك
اصدح ..... نحن فى الانتظار
ازهرى قال فى يوم موراة المرحوم مصطفى

مصطفى .. ما دفناك لكن زرعناك لينبت الف مصطفى

اقووول ليك لا قدام وتبقى مساحات السكون والترقب لك وبك اخى زيكو ((اشتقت لى علاء وهشام))

[احمد امين]

ولعل ابلغ الكلمات التى سمعتها فى رثاء ( ابو سامر ) هى كلمات الاديب ( محمد حداد )
قمرً تجاسر واختفى ...
عن مجرى الشرايين واستدار ...
كان الامانى المرهفه..
كان الوفاء ...
كان اسمه مصطفى .....

[حاتم الخضر عثمان]

فيا باطن الاديم أفتح
براحات الحنين مشرع
وانده لمدن شاخت
أنده لاطلال الغنا الراحت
بيوت فى بيوت
تمرق من شبر مسرح
مدن فاضلة
وعلم باتساع الحلم
بقامة يشتهى التابوت
فما لفظ البحر يونس
ولا أنسدت شهية الحوت
ــــــــــــــــــــــــــــــــــــــ
همباتى يارايع وينك من زمان ولا وين أنا
سوف اكون فى الإنتظار لاأبرح
باحة شعرك الدفاق ,, وحسن أختيارك لللقافية
أشجينا من شعر من ذكرتهم

أبو الخضر ِ

[بت الجنيد]

الهمباتييييي جاءكم تقيل ...

* كلما قرانا مفردة جميلة ...
تركت شفق في النفس ورقة في الاحساس ...
وكانت تنهيدة في الداخل ...
ونغم في الروح ...

تسلم ... وفي الإنتظار ...

[muiz motasim babeker]

يا جاي مارق من دخول الغيث
شرايين التراب السايقة أوردة الوطن
قشرا اليباب ... نشرا العطش
كل ما سرت قطرات درب الرحمة...
في جوفو أرتعش حال الشجر
بال العصافير الخيالها مع الدغش
مشدوه متل خاطر طفل
من ضل برش راكوبة فوق حافة حجر
واقع سجر ...واقف يعد نقط المطر ....

الاخ الهمباتي .... تورت علينا الاحزان .... لكن داوها بالتي كانت هى الداء ... نرجو المذيييييييييييييييييييييد و لك 1000000 تحيه ....

[همبـــــــــاتى]

الاخوان / احمد امين ... حاتم الخضر عثمان ... واخى الاصغر المعز .....الاعزاء
اختنا الغاليه بت الجنيد
بعد التحيه
شكرا على عبوركم ولكنى كنت اتوقع المزيد منكم اتوقع مشاركتكم ومشاركة الجميع
فتحنا النافذه لنرى نور ابداعكم .. التحيه لكم مرة اخرى
قبل ان نواصل مع ابداعات ازهرى تعالوا نشوف مرثيات مصطفى وانشالله لنا عوده مع ازهرى

مرثيات عن الراحل المقيم مصطفى سيد أحمد

الشاعر صلاح حاج سعيد
ما كنت قايل نفسي يوم
أرثيك يا أصدق خليل
أنا كنت بتخيّل أكون قبلك
أسافر غنوة في الوتر الجميل
زي ما عبرت معاك صروف زمن المسافة
وجينا للحزن النبيل
أنا كنت داير الدنيا تمهلنا
ونغني الفرحة لى الزمن الخُرافي .. المستحيل
ورحلت ما كان ده الأوان
رحت وحرقت حشا الغنا
خليتنا لى الزمن الهوان
والإرتهان لى خيول زمان الشنشنة
كل المطارات والمواني
وشفع البلد الفتارى
لسة بارين القطاري
يسألوا الناس عن خبر زولاً
مسطّر إسمو في قلوب العذارى
وفى عيون كل المساكين ... الحيارى
زول بيطلع من نفس طورية ضامة الطين
تكابد طول نهارا
زول بيسكن في عيون أطفال
تأمّل ديمة يديها البشارة
يا خي والله الفرقة حارة
وفقدك أكبر من محيط الدنيا
وأكوانها ... ومدارا
طليتنا زي حلماً جميل
فجأة في غفلة أنسرق
أسطورة تحكي أماني جيل
في حب غناك كان ليهو حق
أديتو في الدنيا الأمل
وريتو كيف في الحق يقيف
من غير وجل أو إنبهار
علمتو بى حس النغم إنو الكلام
لازم يكون واضح كما شمس النهار
صدقك ملاهو حماس .. يقين
بالخير وبالحق .. والنضار والإفتخار
إنو الحبيبة هي الأرض
والتضحيات عشان عيونا هو الفرض
والدنيا ورّاثا الصغار
وعرفنا يا زول قسوة الضنا والتعب
والإرتحال في غفلة الزمن الصعب
وقولة الوداع بالضبط
والسفر الأبيد من غير رجوع
أو غير متاع
وبكت عليك كل الشوارع في المدينة
ناحت عليك كل الفواصل
في الغنيوات الرصينة
وإنكتم نبض الغُنا
جلل سواد حزنك سنا
وإتوشح المنا بالضياع
وكان بدري يا زول الوداع
لا سكة لى درب الرجوع
بعدك أغانيك إلتياع
مسكونة بالأسى .. والخشوع
لكن بريقك ما خبا
أبداً بريقك ما هو ضاع
ساطع كما نور الشعاع
منو قال هو فات
زولاً وهب كل الحياة للأغنيات
منو قال هو فات
ما أظنو زيّك يقولوا فات
يا من وهب كل الحياة للأغنيات
يا من ترك في قلوبنا أنبل ذكريات
يا من ترك أحلامو في كل الجهات
وخلّد معاني الروعة بى كل الصفات
ما أظنو زيّك يقولوا فات
يا من وهب كل الحياة للأغنيات
****
ورحلت ما كان الأوان
رحت وحرقت حشا الغنا
خليتنا لى زمن الهوان
والإرتهان لى خيول حروف الشنشنة

أمل الأغاني
كلمات: مدني النخلي
شرد الكلام مني وسكت
حس الأغاني الملهمة
لبس النغم ثوب الحداد نزف المقاطع مؤلمة
لمتنا بيك يمين ظروف في ليل رياحو ملتنا هم
أنت الأخو وبرضو الصديق والبينا كان إحساس ودم
للكل فتحت القلب دار .. ومزجت روحك بالنغم
يا حليلو زمناً كان معاك يا حليل جدارنا الأنهزم
روح الرحابة الما بتضيق
يا باهي يا دفق الرحيق
شاقي الدروب الموحشة
فارش عشم وترك طريق
دايس علي الجرح الأليم
في أحلك اللحظات رفيق
يا حليلو أملاً كان معاك
خلانا لى جرحاً عميق
نجم الحروف المرهفة
ضد الذبول والإنطفا
لكنو من بعدك رحل خلانا فات يا مصطفي
يا حليلو شدواً كان معاك
وأمل الأغاني الإنطفأ

ضرب الإبرة
مدني النخلي
ضرب الإبره .. فوق الإبره
راسم زي وشم.. فوق ساعدو
كل ما يقول قريب
تعكس ظروفو .. تباعدو
راكز .. في الزمن
ماطر سماهو ورعدو
فوق حدب الصبُر
مترجي ..زولو الواعدو
غنيلنا .. قول يا زول
بُعد المسافة براح
من جرحك النزاف
رسِّل .. غناك صداح
نوِّر مداخل الليل
بصبحك الفضاح
شِد الوتر ..دندن
وأفرد نداكَ.. وشاح
طيور القمري..
ما غنت
ولا لوّن مداك شادي
حليل ولداً بشيل همّك
شرّ غناهو في الوادي
نده مطراً سحايبو ملت
وشتت برقو عبّادي
وليد الصابره ست الجيل
رقد واقف قصاد النيل
حبيباً جرحو فينا نزيف
وفكراً فاتح التأويل
مرق من بين ضفاير البنت
حبيبتو اللونا.. كاكاوي
نهارا شمالي .. كتـّاحه
مناخاً جنوبي.. غرباوي
دخل شرق الحِلم حفيان
سند ظهراً .. حناهو الهم
حليلو الكان جميل النم
حليلو .. البينّا خوة دم

مرثية عبد العال السيد
بسمع صدى صوتك مزامير في عشيات
الشتا والريح سوافي
وأطرق على بابك أواخر الليل وألاقيك
إنت مافي
وأنشد على بابك حزين "عز المزار"
وكل السنين صارت منافي
وأهتف وأناديك في سديم الليل
يضيع حسي وهتافي
قمراً وقف مستني تال الليل
نهارات العصافير والقوافي
رجع الصدى وحس الرياح
مجنونة في الساحات تعربد
وإنت مافي
غابت نهاراتك ولكن
لسة صوتك في العروق يا صاحبي ساكن
لسة صوتك يسري في كل الأماكن
"يا قمرة أقلبي السنسنه الحمرا
وشوفي ليه ما جاء"
لسع على أفق المدى ترجاك
"صبية" جراحا نازفة
لسة واقفة
تسأل عليك مجلس صحابك في الليالي
تسأل عناقيد الدوالي
تسأل عليك عصفور مرق ينفض
نعاس عينيهو من سهر الليالي
يا صاحبي لسع جراح الفرقة صاحية
وتر الغُنا المشدود ينوح
يسأل عليك في كل ناحية
كانت ليالي " الديم" فوانيس
والعمر مغسول صبابة
وكنا ما بشغلنا غير وتر
الغُنا وحرف الكتابة
يا صاحبي .. يا ليتها الأيام تعود
أنا في منافي العمر ضيعت الوعود
يا صاحبي .. هطلت على
قبرك سحابات الخزامى
وناحت " على بابك " يمامة
وشرقت شموس ترسم على باب
النهارات إبتسامة
رحيل اليوتوبيا
مرثية الشاعر محمد طه القدال
في هذي المدينة الفاضلة
لبس الشعراء تيجان غار وهجوا
مع النشيد .. والبوح وغنوا للغُربة المتلتة
في الزمن المكان الروح
وما بين الرماد والنار
فضا الكلمات ومعناهم
بيمرقوا من هطيل النوح ومغناهم
يشقشق للحياة والموت
يغرد للمدائن الفاضلة جواهم
جزاير دوح
قدر يوتوبي
ترحل في مداين الناس ... مدينة
يندلق حسك حداهم
قطرة قطرة تعبي صوتك بى نداهم
مشدود وتر صوتك ربابة
مسنود عليك صوت الغلابة
مفرود من الزمن المفتق والمرتق بالرتابة
مولود مع الجدة المعتقة والمجرتقة بالرحابة
ينسدل من شدوهِ أنشاد المزامير
ينسمع في شجوهِ ترتيل الصحابة
زمن يوتوبي ترحل في العتامير
والمغاسل والغُنى المندلي من شطر السحابة
من عنا الأطفال وأولاد المسادير
السنينهم فوق جوازات العصافير
الحنينهم بحة الليل الطنابير
الحزينهم حزنه في الجوف المطامير
نبلهُ يطلع زي شعاع
لا ولولة لا شيل ندابة
( يا مطر عز الحريق)
( كمّل الناقص وفرضو )
( يا مشاوير الطريق )
شوفي لي حُّميد وأرضو
يا بلد ليلك غريق
طولو زي طولك .. وعرضو
إن ضلامك حر طليق
أو سلامك أهلو قِرضو
آه من هذا السليق
يشتري الراجل وعرضو
الفرج باقيلي ضيق
والصحاح العندي مرضو
كم إديريجاً حليق
شان يعيش بى دقنو برضو
يا مدد قشة غريق
)يا مشاوير الطريق(
)يا وليدات الفريق(
لملموا الصابرين تعالوا
)رقصوا البنوت أعرضوا(
****
يا نخلة المقبول ظلالك
وأصلة الشموس بى حريرة
ومجدولة من طيب شمالك
مروية في عز الجزيرة
من همي همك سمالك
كسر همومي الجبيرة
لحن الوليد الرمالك
مشرق يجبر الكسيرة
طينك مقالد رمالك
تحتك مياهك خريرة
شعرك جريدك حلالك نمة غُناه الضريرة
غنوة بتقرب منالك
رعشة جروفي الخضيرة
غنوة حبيباً شكالك
هجر البنية الأميرة
عند الترابلة القبالك
ضليلة صهد الهجيرة
يا نخلة السلفاب جمالك
في الناس غناوي المسيرة
لو جيدك الفارع بكالك
موّال دموعي العسيرة
أو نيلك السالك أمالك
جيهة المشاوير الحسيرة
أو قلبك المفجوع دنالك
روح الأناشيد المنيرة
شيليلي عِب وأمليلي شالك
من غناويهُ السميرة
شدي من صوتك حبالك
نشفي العرق الدميرة
قولي للجنيات سؤالك
يا نخلة بس متكية مالك ؟
بطنة سبايطك عضيرة ؟
جدلة سبايبك ممالك
محصورة في فد ضفيرة ؟
ولا السلام البدالك
سراب الأماني الكبيرة ؟
لو صبري بيهدم جبالك
شن تبقى غير عيني الهميرة ؟
****
قدر يوتوبي ترحل يا صديق
زمن يوتوبي ترحل في البريق
والمدينة الفاضلة نامت في العتامة
والعتامة تهاتي بالشعر الهيافة
والشعر متغطي بالكلمة السلامة
والسلام متداري في الولد الشليق
والوليد مندسّي في الحرف القيافة
والحروف الوردة تحلم بالرحيق
والحلم يتجاوز المعنى الرهافة
والمعاني تعاند الزمن الرحيل
والزمن يوتوبي يرحل في السحيق
والرحيل يوتوبي
ترحل يا صديق ؟
الرحيل الشفتو للناس العلامة
الرحيل الشفتو للمتلك قيامة





.............ونواصل .....