مسرحية المك نمرعبق من نشيج البطانة وشندي

[ريم الفلا]

	تأليف ابراهيم العبادى(الجزء الأول) ----------------------------------------------------------- طه: أخوك يا ريّة أخوك وقت الخيول يدبكن اخوك يا ريّة أخوك وقت الرماح يشبكن أخوك جبل الثبات وقت القواسى يتحبكن كم بكيت وكــم قشيت دمـوع الببكن ريّه: وراك أسـود علىّ ما نمت أسـع طيب طه: ها بسم الله قـــولى أخــوك طيب وشديد وحاضـر وقلبوُ ماهـو مغـيب إلا الشفتو فى النـوم من هوايلو اشيب ******* الزول فى الصُحى مهضوم عليه شقاهو وإن غمد شويه تجى الهموم لحقــاهو الصف أب لؤيس أنا ما بخاف لقيـاهو يا ريت الحلم فى صحاي كان بلقـاهو ****** كان خير ولو شر برجاه ما بهـم بـالى وحارثنى الثبات من الكبـار قُبّـــالى وقت حســع حسيت وشفتك قاعدة قِبَالى إن إتلخبط الكـون تـانى مـانى مبـالى ريّه: كعب نوم النهار أمس العصير كنت نايمه رأيت قدام فريقن اشوف صقـوراً حايمه كبير غـار على من نـوم تبين غـايمه صحيت مهجومه لا مفصل ولا فينى قايمه طه: إنتى كمان رأيتى صقور (هنا يشعر طه ان حلمهم مع بعض) علامة كافيه ظنيت الحكايه قريبه هاك من الصحيح الما بتدخلو الريبه هذه الحله بعينىّ أشوف تخريبه دحين يا اختى يلاك لأرض الجعلين نعيش هناك باقى حياتنا معاهم ( هنا ريّه قنبت تبكى) طه: ما بفيد البكى وكلامى احسن تنسى ريّه: كيف ما ببكى كيف افوت مراتع انسى افقد كل شىء عزي ورجالى وجنسى تطلق فوقى ناراً عقباً تقولى أنسى ************ ما ببكى الفريق ببكى الرجال قُبالو شن طعم الفريق ما بيوت شُقاق وحبال خرابُُ انت حين ما بمر بالبال إلا يقع قتالا بعده نلقى وبال طه: هاْ فأل الخير أخير ما شفنا شيتن جدَتَ كل الشفنا احلام فى طريقَ اتعدت قبل الليله بيدى حمان قط ما ندت مانهدم شرفنا لو السماء انهدت ريّه: ورينى الحلم التورك مذهول طه: اصبرى لىّ أروق عقد الفكر ممهول احكيلك شنو الشفتو والله مخول شفت الوحده..وشفت النار وشفت الهول احيلك تمام الشفتو ما بتغابه جاين العصير أنا وانت من الغابه سايقه ليك بهم قدامك برقابه بين والفريق اتولعت التقابه قدر ما نشوف بعيد قدّامن نلقى حريق وقت النار علت ما شفن تانى فريق باصرن المروق مالقين لينا طريق تشكى من العطش واخوك يابس ريق فترتى قعدتى وانا محتار جلست حداك حاقب الدركه ختيت سيفى فوق أوراك وقت بِعد البهم دا كسحتى انتى براك كسحتى وجيتى ومعاك كور صقور تبراك تبيت بعجل شافنى جفلن وطارن غابن من عيونى فى اللعوت إضارن ما غابت كتير جن إقدلن يتبارن قدامهم كبيرن عيننى وغارن سلّ سيف لاقاهم اخوك يالضامرة تور غنز ام هشيم الفى المجامع دامرة سيل تلا واندفق فوق السحابه الهامره حجر الصاقعه فرتاق الصفوف العامره بادرنى الكبير ، ديلك استعدن وقفن مامهلتو طار راسو وجناحيه يرفّن طاراً ديلك وقت بريشو رقد إتكفن ريّه: عارض ومات الليله يمكن عفّن طه: نحمد ربنا اليله مات عارضنا وان كان عمرو طال يا ريّه كان قارضنا يلحقو بعجل ديش همنا المارضنا انبدا زواجنا بكرة منو البجى يعارضنا بطال البعيش فى الدنيا اصلو مناهو إن كان مالو راح غير اهلو مومدناهو سمح الفوق اساس ابواتُ تّم بناهو والزول دون قبيلةُ مناهو شن معناهو ما بنفرح بمال ونقول كفانا ورثنا نفخر بالرجال فى الحارة يبقوا ترسنا نجمع ناسن هيلنا من الكبار حارسنا يحضروا اهلنا فرحانين يباهوا عرسنا كل بطحانى يفرح بعرسنا مناهو ساعت جمعتهم بيتنا بنتم بناهو عزاب عيش يا ريّه مرض مناهو سمح الزول حبيبى يلد ويربى جناهو (كان والدها لم يتم السنه عايزاه كلام ذى دا لا يذكره حكايه العرس) ريّه : دا الأعوج ترا والشين نهاية حدّو وان شاع دا الخبر يمل الفريق لآ حدو يقولو اب كبس من دخل ودّ جدو فرحوا وعرسوا لا من حزن ولا جدو وان كان فى الفريق ماتت مرّيه ذليله للحول يرفعوا العرس البختُ الليله خليه أب كيس راس الرجال وقليه لو كان بيقيله تعد تبقى قليله خليه الكلام وعرسنا سيد الحال من بالك أمرقُ محال والف محال على ميتت أبوى الليله حول ما حال نصبح بكرة ونسه ونشب بشاتين حال طه: هأ الموت موشمت غايت البفوت والببرو والجد والحزن ما جابو زول من قبلو الزول فى الشدايد اول يلزم صبرو بترج الكريم مولاه كسرو يجبرو بنخاطر من الوجعه هيلنا برانا نحن اهل المصاب الناس لُزم جابرانا فى آخر المراح دايما تجى الفترانا عات الحد ندوسه الناس عقب تبرانا ريّه : الناس بالمكارم والفعال تتباها وينشأ الزول فطرة حسب مرباهو عادت جِدُ عادتو ومثل أباه نباهو يلبس توب قبيلتو ان دار والله اباهو من الليله حول نقضيه تانى اتكلم الداير يتم رب العباد ان سلم طه: تانى انا أقضى حول وانا بالحسار أتالم علىّ حكمك صعب أنا قابلو ما بظلّم لكن مشيتى للسنه قاسيه وصعبت علينا ريّه: تمّ الاتفاق من الكلام خلينا زي عادت البلد لازدنا لا قلينا إنشاء الله السنه بخير عايده علينا يا طه البهم قاربن راجوعت الراح بنات واولاد هديل ناس فريقن الراح تصبح سمعتها من الكبار الراح قالوا العربى ما بنعز كما مراح (هنا تخرج ريه ماشه ويظل طه يعاين ليها ويقول) طه: آه يا ريت السعادة ان كان بقت بديه كنت اعيش هنى فى الدنيا بالزنديه علىّ حكمُ ناس الفيّ طلبوا الدِيه الموت بالعطش والمويه بين إيدِيّه ريّه علىّ قاسيه وجايرة فى التفنين آه يا ربى أرحم صدرى أنس ضنين يمحق دى السنه ربى الحليم وحنين يخصم من حياتى رضيت بعشرة سنين كيف أهن واعيش وانا صبرى ولاّ مودع وسبب الدخرج المن مامتور مفدّع جنيت وجنى جنّ وحالى اصلُ مبدّع اهج فى الجيش اهج فاضلى تانى أجدع ( قامت ماشه على الفريق لاقوها جماعه كدا قدام الفريق بجمالن وبتاع-دا يعنى ملامح من الحلم تقريباً يعنى ديل نفس ود كين ومعاهو جماعه ماشين حِته اسمها ام شديده جات مارة كدا فوقهم ساكت فايته فوقهم ناقم واحد عربى مع شيخ العرب قاليهم) العربى: بالضيفان تمرّ لا سلام ولا كلام صدقوا اهل المثل توب العرب صُح لام (هنا ريه تلتفت اليهم وتقول) ريّه: حبابكم عشرة من دون كشرة والف سلام يا وجوه العرب المتلى ما بتتلام أنا بت الرجال اهل الحدق والسيف بت الما بهم بحساب الخريف والصيف بت البيحجزوا المرقوب البكرموا الضيف انا ريّه ان كان شفتكم افوتكم كيف العربى: من وين فى الأهل يا بنيه كفاك فخر ريّه: أنا بنت البيوت المن بعيد معنيه أنا بت أب كبس فى النسبه بطحانيه (هنا شيخ العرب عرف زولتو الدايرة لانو قُبال كدا سمعان بيها ساكت ردّ عليها) شيخ العرب: آآآهـ عبد الله اب كبس عز البطانه وفخرى وفى رأس العرب بنعدو ما هو الوخرى كريم وهميم وصميم وكان للقبائل دخرى بت شيخ العرب هيلك صحيح تفتخرى توقد نارو ديما الما بكوس الجمره وفى ضيفان يمين وسكين دايما حمره بكاس ما عبر لبن يجيك بالعمره هيل الشكر..هيل الرّآس..هيلُ الأمره المرحوم ابوك كان للقبيله قطاه عزاك قديم حسين ابوطه إنشاء الله يكون اخوك دى السكه ما تخطاه (دايره تديه كلمه ناقصه فى ودعمها) ريّه: كما بسد مكانو قدم ليه يطاه لا يفوت ولا يموت السعى وت مغشيه تُهابه الفريق يوقد صباح وعشيه زايد فى الرجال طالق غفايه وغشيه ضيوف الليل يكفيهم مرارة وشيه شيخ العرب: مادخلت التراب البركه فى الزرّيه والخلاك وراه ماهو المات يا ريّه دايماً فى القبائل سيرت ابوك مطريّه بيك وبأخوك تزيد ودى المحريه (تانى العربى داك سأل) العربى: ما بتسألى لا من وين ولا وين ترسو ريّه: كيف العربى يسأل ضيفو كيف تنسو اول بكرمو وبخابرو ساعه انسو من مغلب حديث تعرف ابوه وجنسو العربى: عملتى حسابو ضيفك وكرمو وجيتى ويخجل كان سالتى واسمو ما عرفتى واسم شيخ العرب سامعابو ما عرفتى (داير يوريها بان حمد ودكين دا راجل غنى وراجل كذا وكذا..عشان تقبل بيه) دا خريف البطانه الفيها ما لو مشارك هيل السارحه...هيل الصاهله..هيل البارك ماوقع ليك كلامى ساكت لشنو خبارك فخرك ود دكين جاك فى فريقك زارك ريه: مرحب بالعز وموهو كفايه اب ناراً تولع للضيوف دفّايه بشيخ العرب الافتخار ما كفايه تابعو ان جانا نفخربو ونخدمو حفايه شيخ العرب: بارك ربى فيك عقلك يدوم يا ريه وكرمك موهو كُلفه دى طبعتك فطريه إياك بت اب تروب والسمت فيك محريه قديم فوت البطاحين عزّة للشكريه (هنا فى المحل دا جاء طه ودعمها) طه: سلام شيخ العرب مرحب خريفن الزارنا مرحبتيت حبابك واشرفنبو ديارنا مرحبتين حباب البيه كل مزارنا تنزل فى الدرب ليه ماتت نارنا شيخ العرب: حباب طه الضرس الفى الصهيباب راس الجود والكرم هيلك قديم ميراس نارك ما بتموت يا ولدة الحُراس قاصدين أم شديدة ومعانا عوجة راس طه: لعدوك العوجات فى الكبس سراى راسك ما بدوس مليان رجاله وراى باكر لأم شديدة بركب معاك براى يا شيخ العرب لكن تختو كراى (كراى دى لخمت شيخ العرب ما قدر يعرفها قال لطه) شيخ العرب: هادى الشورة يا طه القلبنا دليلا كل البنزلو فيك نلقاهو قليلا طه: كراى الدايرو تبقوا ضيوفى انتو الليله ترقدوا فى الفريق حتى ان عشاى بليله شيخ العرب: مسكنا الدرب اسرع قوام ما تلعب ودارك ديمة عامرة والسمح ما بتعب بكفينا الوصف لا تشد جمل لا تتعب وهدنا الطريق عقب الوصول ما يصعب طه: يمين تخشوا الفريق بتفوتو نحن مغابر؟ شيخ العرب: ما تهدم فرحنا انشاء الله آمر واياك مرسى العابر مشطوطين خلاس مسكن فى الزمل لزم خاف عوجة الطريق من للمغور خابر طه: دريب جابر مزم والسكة سالكه ورايقه فرقان ما بلاقوك ما بعقوك عايقه أخت خاطرن نحن قالوا واصله السايقه بتتراوح ام شديدة باكر وماملك فايقه شيخ العرب: الزول إن وعد شين كان ميعادو يخلفو وفى ربط اللسان يسخابو دمو يتلفو سفرى الليله زولين فيه ما بختلفو &nbs p;ضرورى اصل ام شديدة على وعد بحلفو ما بعرف ازواق من نشيت تبيت فريقكم لى فريق وبيتكم يمين بيت اجيكم ديناً علىّ ان بقيت حفيت هاك وعداً نجيض أرجاه بكره مبيت شوفتى للفريق أيام بُكى أبواتك موغابينى حال وسمعت بأخواتك فريقك بكرة نحن ضيوفو وما بفوت وحياتك الا احققك وبراى اشوف نفحاتك يا ود الهميم النفسُ مومعارضاه كرم الضيف عليك مكانت ابوك فارضاه جايك فى أمر أن تاب وان ترضاه غيرك ما بكوس واملى بس تقضاه طه: غرضك مقضى إن احتاج لخيل وجمال والضان والأبل سارح يمين وشمال شيخ العرب: فوق القلتو أنا لىّ فيك آمال طه: ها الغرض بدمّى دا أقضاه خلى المال (دا ماشى بجاى ودا ماشى بجاى لكن طه عرفو داير شنو) شيخ العرب: سمح وين الدرب خطرنا طه: دربكم فى السلم شيخ العرب: والله تب ما ودِرنا وبكره نجيك إن قلينا والله كترنا (وقاموا فاتوا)

شاركنا رأيك عبر الفيس بوك ...

[بابكر عثمان مكى]

الاخت ريم الفلا .. اختيار موفق ، لك الشكر

هذه من المسرحيات السودانية التى يجب ان نقدمها للعالم لما فيها من تصاوير حية لمجتمع من المجتمعات السودانية وهى دليل اكيد على الفروسية وحمل المكارم واحترام الآخر حتو ولو كان عدو وكذلك فيها كل العناصر والمركبات الثقافية للبيئة السودانية الهجين .
وهى يمكن ان تمثل كفلم لانها تحوى كثير من المشاهد التراجيدية العميقة والموحية بالخيال العميق فقط نحتاج لمخرج استثنائى وامكانيات كبيرة وقدرة على نطق الحروف العامية بوضوح حتى تصل الى الآخرين فلهجتنا مازالت بعيدة عن فهم المتلقى والمشاهد .
ان بيئتنا الحياتية غنية بالمواد الحية التى يمكن ان تكون مشاهد تمثل وتعكس كل القيم النبيلة فى مجتمعاتنا ولكن هيهات .

[ريم الفلا]

:mh1313: الأخ بابكرم
اجل التحايا والأمنيات
وانااتفق معك فنحن بحاجة ماسة للعودة للجزور ومسرحية المك نمر من اروع ما عبر عن حياة اهل البطانة في زمن اشبه بالخيال ونتمنى ان نعود اليه ونستنشق عبيره

[BiT Rufa3a]

الاخت ريم الفلا...

اشكرك كثيرا على نقل هذه المسرحية البديعة.... والتي تثري النفوس لمجرد قرائتها... وفي انتظار جديدك

[حاتم الخضر عثمان]

كنت قد رددت على هذا الموضوع من قبل ولكن لامانع من الإفادة بإراد بعض الحقائق نقلاً من مواضيع سابقة
وصدقونى فقط لتهم الفائده فقد إنتهى زمن تبحث فيه الناس عن قبيلتى وقبيلتك فقط لمنتع أنفسنا بعبق تاريخ البطانة وشندى

(نقلاً عن موضوع سابق )

أســــــــــــأل القيقى البلد المقامو البوص
أسأل بطانة أبعلى والبرق البقوم حرقوص

لم أجد فى تاريخ الشكرية شيخ بإسم حمد ودكين منذ أن بدأ الشيخ عوض الكريم الكبير أب على وحسان فى تأسيس معلم قبيلة الشكرية (أهل الفضالة والبال الواسع كما عرفو بين القبائل ) والدليل على أن قبيلة الشكرية لم تتعرض للإهانة من قبل إى قبلة (حتى الدولة السنارية بهيبتها ) سيطرتها التامة أرض البطانة التى عرفت بإسمها . قبال الحكومات ماتروق العكرانة

أسيادك كتلو مكوك وطرحوا بطانة
وقفلو الخط على منقستو والرطانة
قبال الحكومات ماتروق العكرانه
جبال قرسى كلو ممركا الفرحانه

قبال الحكومات ماتروق ا لعكرانة : أيام كانت الأمور تعتمد على القوة والسطوة
جبال قرسى : جبال فى البطانة
ممركا : وضعت عليه علامه
الفرحانة : النحاس

الفرحان طريت ود كسيبة وقحت
سيوفها إتلامعت متل البروق وإنلحت
الفرسانها مابزح الجبال إن زحت
ضاقت مقامات الضحوى أب حصاناً بحت

فرسان الشكرية الذين نعرفهم بحق وحقيقة أمثال :
عوض الكريم الكبير جدالشكرية /ود كسيبة / حسان / على / كسلا جبهة الفيل /كاكوم اللحيمر / عمارة /
إبراهيم ودقلبوس /أبزبد عدلان
وكثيرون هم من مهروا أرض البطانة بدمائهم
وصدقننى لم أكن لأتعرض للحديث عن قبيلة الشكرية ومناقبها لولا هذة التراهات التى يتداولها البعض (شريط ريا )
لم يسمعوا بالمعارك التى خاضتها قبيلة الشكرية ضد الدولة السنارية والتى كانت قبيلة الركابين أقوى قبيلة فى ذلك الحين طرفاً فيها حيث لم يكن هناك ذكر لأى قبيلة سواها تمجد فيها الشكرية إيما تمجيد ناهيك عن واقعة سلب فتاة قد لا تكون صحيحة وفيها إهانة أكثر لقبيلة البطاحين لوكنتم تعرفون التلميح :البطاحين الذين نعرفهم أكثر من غيرنا ( وصف قبيلة البطاحين وهى ترتجف فرائضها خوفاً من شيخ قد يغزو قبيلتهم لأخذ أحد بناتها والغريبة البطاحين بهيبتهم يعقدون الشورة لفتاة ( النشاور ريا إمكن ريا مى دايراك ) هل هذا معقول
دعونى أحدثكم عن تاريخ الشكرية الذى لم يكن فى نيتى أن أتعرض له لولا (نشاور ريا إمكن ريا مى دايراك) ألم أقل إنها إها نة لقبيلة البطاحين فى المقام الأول
نحن أولاد شكير نحن السمح معروفنا
مانرمى الحجل من العشيرة ضيوفنا
الفونج والهمج ضاقت ملاقى سيوفنا
تتباشر صقور الجو قدر ماتشوفنا

نحن أولا شكير نحن الصغيرنا مقرى
نحن جراريق الدوس البنابا الـــترة
ندخل الوكرة أم نغيت والحــــــــرة
نحن الفوق مشارع الدم بنشرب شرة

بدأ تاريخ الشكرية كما ذكرت عندما قتل أفراد من قبيلة الركابين أحد أبناء عوض الكريم الكبير جد الشكرية وكان متزوج من زوجتين أحداهما من العيشاب فرع الشكرية وهذه والدة على الذى سمى عوض الكريم به (أبعلى )
الثانية كما ذكر البروفسور أحمد أبراهيم أبسن أم حسان ( قلبوسابية ) من القلابيس فرع الشكرية وسوف نتعرض لذلك لاحقاً
فى قول أب دقينة (الطابق الإسمين ماخسرهن )
المهم فى الأمر طالب عوض الكريم بدم أبنة وقد كان صديقاً قبل الواقعة للشيخ ود عبد الصادق شيخ الركابين شيخ المندرا التى تقع فى وسط البطانة اللآن فنصح له الشيخ عبد الصادق أن يعفوا خاصة وأن قبيلة الركابين فى ذلك الحين كانت تحت حماية الدولة السنارية (من مواليها ) فنصح الشيخ ود عبد الصادق عوض الكريم بأن يعفو عن دم إبنة وقالها بعبارة مازال الشكرية يتداولونها ( أرعى بيهو القش )
بمنى أنة لو تعرض لحرب الركابين سوف تحرم أنعامه من رعى القش فسمع عوض الكريم النصح ورجع ولكن أخوال الولد المكتول العيشاب لم يقبلوا بمثل تلك الإهانة فأخذو الثأر من القاتل
فثارت ثائرة الركابين وأستعدو لشن الحرب فأستنجد عوض الكريم برأى الشيخ ود عبد الصادق فذهبا معاً لقبيلة الركابين فكان أول مافعلوه هوذبح ناقة الشيخ ود عبد الصادق دليل على رفضهم الصلح .

فدق عوض الكريم النحاس فإتجمعت له قبائل الشكرية عن بكرة أبيعا فإجمعت القيادة لحسان وكان فى الثامنة عشر من عمرة ( عند ما كانوا يقولون أن حسان قاد الجيش وعمره ثمانية عشر عاماً أتذكر عمر إبن كلثوم البشكرى وهو أيضاً قاد الجيش وعمره ثمانية عشر عاماً )

أو لقاء كان لقبيلة الشكرية من جهة ضد الفونج والهمج والركابين من جهة لم يشارك فية على بن عوض كريم لِأسباب يعلمها هو لحزنة على أخية أو لأنة لا يرى فى القوم من أحق باللقاء ,

قاد حسان جيش الشكرية وكرنكة أبدوف جيش الفونج والهمج والركابين ودار رحاها وأول الصرعى كرنكة أبدوف الفارس الذى عولت عليه جيوش الفونج والركابين كثير اً

فأنشد أبو دقينة خال حسان القلبوسابى قائلاً :
تشهد عنيبة الموز ما لامتو
شافت كتال اعوق الصامتو
ضرب كرنكة أب دوف شق هامتو
وخلى الركابين إتحامتو

تشهد عنية الموز مى من القباح
شافت كتال حسان تور النطاح
ضرب كرنكة أبدوف من سرجو ماح
الليلة على الركابين قدر الله طاح

تشهد عنيبة الموز عنز الخوى
شافت كتال الهام البنطوى
فرتق دريس العوق البتلوى
ضرب كرنكة أبدوف جاب حافرو القوى
حسان ياود حرتى
قولى البجرو عليك من صًرتى
فرتق دريس العوق أب سُرتى
وسكاهن بداد يا حفيرات الكُرتى
إسم عنيبة هى خطيبة حسان سميت على عنيبة الموز زوجة عوض الكريم جد الشكرية


هذه حرب حقيقية وليس من تأليف العبادى أو بايزيد زول دلوت (الله يرحمة)
إلى القاء فى القاء الثانى من حرب الشكرية مع الدولة السنارية

[حاتم الخضر عثمان]

[
نقلاً عن مواضيع سابقةSIZE="6"]أطلقت القبائل على تلك الحرب عدة أسماء من ضمنها إسم الروقت (يعن بها السحابة )
يقول شاعرهم مخاطباً البطانة :
يومها الروقت يوم ناس كرنكة الجوك
حسان فيها ماسالهم شلن شالوك
وشلن شالوك لعبة كان يلعبها الصبية وهى خطف الأشياء وهم معتلون ظهر الحصان

إنتهى الحرب الأولى ومات كرنكة أبدوف والذى قلنا كانت تعول عليه قبائل التحالف كثيراً فى القضاء على قبيلة الشكرية ليس إلا لأنهم رفضوا الظلم :
بدأت القبائل المهزومة ترتيب أوضاعها يداعبها الأمل فى نصر تمحو به عار الهزيمة التى لحقت بهم من قبيلة صغيرة يقودها شاب عمره 18 سنة , تجمعو ا وعهدوا بقيادة الجيش لخميس وإسم خميس كما هو واضح فونجاوى ووعدوه بالزواج من عنيبة ويقال أنهم ربطوا له (حريرة ) دليل على أنه عريس ساير على عروسه , وعنيبة خطيبة حسان سميت على عنيبة الموز جدة الشكرية :
دقت طبول الحرب وبدأت بطون وعشائر الشكرية تتجمع تحت راية عوض الكريم ,وذكر من أرخ لهذا الحرب أن الخيول التى شارك فيها كانت سبعة خيول وقصد بها على ماأعتقد سبع قبائل من الشكرية والتى سميت فى مابعد بالخيول السبعة قال شاعرهم :

أمانة تشيل أمانة تخت أمانة توهط المزايد
من حجر العسل ياعن قبوب ودزايد
منو الضاق الدفرة الجنينها ندايد
منو الضاق كماجنا عقبان جانا عائد
يقصد بحجر العسل حدود البطانة شمالاً وقبوب ودزايد جنوباً
الدفرة : دفرة الحصان فى الحرب , جنينها :من الجنيات وهم الشباب ,ندايد : أتراب أو فى عمر واحد
الكماج : الحرب وعقبان : عقب أو مرة أخرى

وقال أيضاً نفس الشاعر :
من حجر العسل ياعن حدود تكرور
خيولها السبعة ما خلت صقورها تجول

تجمع الشكرية بخيولها السبع وبدأت تشحذ الهمم وتستعيد ذكرى الحرب الأولى والتى كما ذكر لم يشارك فيها علىً وهو أكبر من حسان فبدأ عبد القادر أبودقينة خال حسان ينشده بعض الأبيات لعلها توقظ فيه الهمة

قال أبودقينة :
علىً يالتركب الترمح وشيك
علىً ياالتدخل الهرف الدريكا
لدراً قبل قرقر عفن اللجيكا
قمر عشرة وفدق للبالو فيكا

الترمح : الحصان : وشيكا : الوشيك السريع
الهرف : المكان الخطر مأخوذة من هرف البحر : الدريكا : الخطيرة التى تدرك الموت فيها
لدراً : اللدر: التمساح قبل قرقر : المكان المقرر الذى يختبئ فيه التمساح , اللجيكا أو البجيكا : الذى يأتى لتحديك قمر عشرة وفدق : فدق : أربعة بلغة الهدندوة أى قمر أربعة عشر
البالو فيكا : الذى يضع فى بالو أن يهزمك
كان ينشد حسان من قبل ويصفة بى (ودحرتى ) أى إبن أخته يقول

حسان ياود حُرتى
قولو البجرو فبك من صُرتى
فرتق دريس العوق أب سُرتى
وسكاهن بداد ياحفيرات الكُرتى

يواصل أبودقينة إثارة الحماس فى نفوس الفرسان ويتحمس علىً (إهوش) ويمسك بالسيف ويعتلى ظهر الحصان ولكن ظهر الحصان يثنى ( ينفزر ) ولايتحرك من ضخامته وحماسه لذا يطلق البعض على الشكرى ( ود فزار ضهور الخيل ) أعتلى علىً حصن آخر جلب خصيصاً للحرب ولكن للأسف كان مشكل أى مربوط رجلة الأمامية مع رجلة الخلفية وذُكرأن أبودقينة قال لأم على تحدث معه يعنى( أشغليه ) حتى أقطع ( اُلشكال)
لأنه لو قلنا له أن الحصان مشكل قد تفتر همتة أو يقل حماسه ,فبدأت أمه تتغنى له

على ياتور الِننا
كسر حديد النِنا
جبهتك بالدم حننا
ياود الما إنتهمت بالزنا
ده الدايراهو ليك أنا
فقطع أبودقينة الشكال وأنطلق الحصان يخوض غمار المعركة وأول ماقابله خميس واول ماقطعه الحريرة التى بيده وذكر أنه قال ( أمسكى يا عنيبة عريسك ) تهكماً وطاح براسة ففقد الجيش ثباته وأنفلت عقده فمات من مات ونجى من نجى :
فأنشد أبو دقينة :

علىً يالتركب الترمح تتاتى
علىً ياديدح السدر المشاتى
علىً يالدقيت كراع لى أمات قطاطى
وعلى يالكًبر خميس يوم جانا خاتى

الترمح الخيل, وتتاتى تمشى بى مهل
ديدح السدر المشاتى : الديدح الأسد الذى يتخذ من شجر السدر عريناً له . ومشاتى يعنى فى الشتاء حيث تنمو أشجار السدر (تفتق )
الدقيت كراع : يعنى ثبت وجودها . أمات قطاطى الأبل
كبُر , قطًع خميس عندما أخطأ فى حقهم

علىً يالتركب الترمح تطبق
علىً ياديدح السدر المنبق
علىً يالتدخل أم مسكاً معبق
علىً يالتجدع الفارس مسبق

السدر المنبق : الذى أثمر بالنبق
أم مسكاً معبق : الحرب حيث يصبح اللون الدم والرائحة رائحة المسك .ومعبق : من عبق أى فاح
تجدع الفارس : ترمى به مسبق أى يسبق دائماً بالضرب

علىً يالسقد وعلى ياساق سقد علىً يا أب نايب
علىً يا أبزيد دلال النصايب
علىً الفى الكتال ما بتدى صائب
علىً الدليت سرج الزمول أمات حقائب

السقد وساق سقد أ[نايب ألقاب تدل على القوة
أبزيد : أبزيد الهلالى : دلال النصايب يأتى بالمصائب
الفى الكتال : فى القتال مابتدى صائب : لا يعطى فرصة لغيرة
دليت سرج الزمول أمات حقائب : نزل سرج الجمال الكبيرة وهى عبارة يعنى بها نزل من قيمة أعدائة

هدأت الحرب وتفقد الناس بعضهم البعض أصيب عوض الكريم بجرح فى جبينة وسال عنة فقال أحدهم
بشوف رأسو مع رأس الحصان إتلتت
بشوف الدم فوق حاجبو المليح إشتت

كان فى التحالف فارس يسمى مفتاح بدر وصف بالقوة سأل عنه هل نجى أم قتل فقال علىً أنا قتله فلم يصدقة البعض فذهب لأرض المعركة وأحضر رأسة فأنشد ابودقينة :
علىً يالتركب الترمح بهمة
على ياود القبائل المستهمة
علىً التجدع الفارس عند اللخمة
على يالمفتاح بدر جب راسو رمة [/SIZE]
إلى القاء
أبو الخضر (فقط لتعم الفائده )

[mohamed merghani]

لعل مسرحية المك نمر من أجمل ما كتب من مسرحيات شعرية .....
رجل البندر إبراهيم العبادي حين كتب هذه المسرحية لم يدعي أنه رجل مؤرخ وأن كل احداث تلك المسرحية حدثت بحذافيرها ....
فهو كاتب مسرحي أستوحي هذا النص من واقعة كانت ستحصل بين الجعليين والشكرية بسبب إجارة المك نمر لطه قاتل شيخ من شيوخ الشكرية ....
هذه هي الواقعة التاريخية المثبتة .... ولكن أسباب قتل ذلك الشكري من قبل طه البطحاني هي ما حوره العبادي فى مسرحيته .....
ولعل غضب أهلنا الشكرية من هذه المسرحية نابع من سيل الشتائم التى أجراها العبادي علي لسان المك نمر ذمآ فيهم وانتقاصآ من مقدارهم .... ولمعادلة ذلك حاول العبادي إيراد بعض المقاطع التي تمتدح الشكرية وتعلى مقدارهم مثل ...
الشكرية فرسان ومستحقين شكري
الحق بقولو ليك أنا لا بخاف لا مكري
وفى نهاية المسرحية يورد العبادي رأيه فى القبلية ويدعو لمحاربتها ويذكر بعدم جدواها ....
شايقى ودنقلاوي وجعلى إيه فايداني
غير خلقت خلاف خلت أخوي عاداني
خلّوا نبانا يسري مع البعيد والداني
يكفى النيل أبونا والجنس سوداني

[حاتم الخضر عثمان]

ود مرغنى كلامك منصف جداً وواقعى فى نفس الوقت وقد تكون قد أصبت كبد الحقيقة ولكن لى تعقيب بسيط عليه :

غضب الشكرية ليس من سيل الشتائم التى أجراها العبادى على لسان المك نمر فقط بل إيضاً لأن تلك الشتائم مستحيل أن تكون صدرت من الملك نمر بدليل :
*عندما بدأت حملات الدفتردار الإنتقامية أول شئ فعله نمر هو ذهابه إلى النصوب بالبطانة وطلب المساعدة من زعماء الشكرية ليس لأن الشكرية أكبر وأقوى قبيلة فى ذلك الوقت بل لأواصر القرابة التى تربطه بهم .
* إختار الواهمون بتلك الواقعة المزعومة تاريخ قد يكون دليل ضدهم وليس دليل بصحة الواقعة ويردون أن يوهموا الناس بصحتها (1818 ) هذا التاريخ قريب جداً لتاريخ غزو إسماعيل باشا للسودان (1821) يعنى بعد ثلاث سنوات من تلك الواقعة بدأت حملات وحروب الدفتردار على المك نمر, وهل يعقل أن الشكرية الذين ساعدوا الملك نمر فى حربه ضد الدفتردار (موقعة النصوب ) والذين أمنوا له طريق الخروج للحبشة هم نفسهم المعنين فى تلك المهزلية لا أعتقد !!!
****
قولك (ولمعادلة ذلك حاول العبادي إيراد بعض المقاطع التي تمتدح الشكرية وتعلى مقدارهم مثل) الشكرية بالرجوع لتاريخهم وتاريخ شعرائهم ليس فى حوجة للعبادى لكى يمتدحهم ولا ان يعلى من شأنهم فهم أهل الشعر وخاصة شعر الحماسة

أبو الخضر

[mohamed merghani]

المشاركة الأصلية كتبت بواسطة حاتم الخضر عثمان

****
قولك (ولمعادلة ذلك حاول العبادي إيراد بعض المقاطع التي تمتدح الشكرية وتعلى مقدارهم مثل) الشكرية بالرجوع لتاريخهم وتاريخ شعرائهم ليس فى حوجة للعبادى لكى يمتدحهم ولا ان يعلى من شأنهم فهم أهل الشعر وخاصة شعر الحماسة

أبو الخضر

لا أحد ينكر بسالة وشجاعة ومروءة وكرم وفصاحة وبيان أهلنا الشكرية .....
ولكن لإن يمتدحك الناس بما أنت أهل له خير من أن تمتدح نفسك ....
قنب استريح مشكور سعيك يا عم
ما بندورو تعبك إلا المصيبة أعم
دايرك دم حمد تعفا إن بقيت أنعم
شكرك فى البلاد يسري ونضوقلو طعم
والله والله هذا الكلام العجيب الراقى فى حق محمد ود دكين الشيخ الحكيم مفروض يجب ما قبله من سباب اتوجه أمام رجل طائش ..... حسب ما ورد فى المسرحية طبعآ ....
عندي سؤال صغير أرجو أن أجد عندك يا أخي أبوالخضر إجابة ....
كاتلك شكري وجايينا شن بتكوس
براها الدنيا ماشة معانا بالناكوس
هل هذا المقطع جزء من معارضتكم لمسرحية طه وريّا ؟
يا ريت لو تقول لينا منها شوية ...
ولك الشكر الجزيل على رحابة صدرك

[حاتم الخضر عثمان]

ــــــــــــــــــــــــــــــــــــــــــــــــــ ـــــــــــــــــــــــــــــــــــــــــ
ولكن لإن يمتدحك الناس بما أنت أهل له خير من أن تمتدح نفسك
أرسلت بواسطة ودمرغنى
ــــــــــــــــــــــــــــــــــــــــــــــــــ ــــــــــــــــــــــــــــــــــــــ

أشعار الحماسة هى التى تثير فى الفرسان روح القتال فلا غرو أن صارت
هى المحفز الأول لإشعال جزوة الحروب وإخمادها فى نفس الوقت
قصائد عبد الله بن رواحه خير مثال ومن بعده حسان بن ثابت حيث كانت كلمتهم جيش
بحاله تفعل فى قلوب الأعداء مايعمله السيف والرمح
كذلك شاعر القبيلة على مر الأزمان هو الناطق الرسمى بلسانها ناشر أرائها ومعتقداتها
والمعبر الأول على حال القبيلة وليس بالضرورة أن تستعير الوحدة الساسية عنصر من خارجها
ليتحث بلسانها
أما أن يمتدح شخص.... شخص آخر فهذا مجال آخر يدور فى فلك القبيلة
وليس خارجها حيث يتبادل الناس المدح فيما بينهم فى إمور الكرم والوفاء والعفه
ولا أجد إى غضاضة أن يمدح الفرد مجموعته التى ينتمى إليها سواء آكانت أسرة أو طائفة أو قبيلة أو دولة
ولكن أن يمدح نفسه فهذا لاينطبق على شعراء القبائل البته
ــــــــــــــــــــــــــــــــــــــــــــــــــ ــــــــــــــــــــــــ
كاتلك شكري وجايينا شن بتكوس
براها الدنيا ماشة معانا بالناكوس
هل هذا المقطع جزء من معارضتكم لمسرحية طه وريّا ؟
أولاً أنا ليس معارض لمسرحية ريا أو إى كان أسمها لأنى أحب المسحيات التى تدور فى هذا الفلك إذ إلتزم النص الواقعة الصحيحة وأن ألا يكون هناك تشويه لصورة قوم مهما بلغت قوة النزاع حدته!!!!!
أما عن النص أعتقد أن سببه :

أكان فيك دباغة وناساً بعكو الرى
جلد الزوق مزقق بسلخو هو حى
أســـــــــيادك رتوتاً مابعرفو النى
كتير الكان مــضبن خلفو لو الكى

أسيادك كتلو مكوك وطرحو بطانه
وقفلو الخط على منقستو الرطانة
قبال الحكومات ماتروق العركرانة
جبال قرسى كلو ممركا الفرحانة


لك تحياتى وتقديرى

أبو الخضر