النتائج 1 إلى 7 من 7

الموضوع: العمدة .... جابر

  1. #1
    رفاعي عبقري الصورة الرمزية Nola
    تاريخ التسجيل
    May 2005
    الدولة
    khartoum
    المشاركات
    6,103
    معدل تقييم المستوى
    21

    افتراضي العمدة .... جابر


    العُمْدَهْ جابِر

    والصباح نَديان رطيب

    فى اِيدو كان مَاسْك الشروق

    فى جيبو كان طاوي الغروب

    فى كرْشُو قَاعِد منْبَسِط

    فى الكُرسي كان

    مَاهِل خصيب

    ما عُمْدَهْ يَاخْ

    والفرَح أِْكَال يطِيب

    الشَيَّهْ والجمر الشَّهي

    الشِيشَهْ والشَّنَب المولِّع حُمَّى

    قِفْ

    العُمْدَهْ جابر - الكرسى طَقْطَق تِحْتُو-

    مَدَّ ايدو على الأوامرِ

    والأوامِر

    ما بتطْلَع بَسْ كلام

    مِن جسمو بِتْنِز

    مِن حَشَاهو

    مِن صلَف مَعْمور وعامر

    مِن قبور أجدادو تزحف

    للأصاغِر ..والأكابِر

    مِن منابِت شَعَرو تَطْلَع

    مِن نهايات الأظافر

    دَه الصباح

    العُمدهْ جابِر

    نَادَى صالِح وَدْ قِنِعْنَا

    الله ..الله على الأوامِر:

    إسْتَلِم يا وَدْ قِنعْنَا

    تسْتَلِم أَمْر الأوائل

    تَلْقَى طالِع للأواخِر

    تَسْتَلِم أمْر اللِّى عايش

    تلْقَى من أهل المقابِر

    واوْعَىَ من فضلك تَغَالِط

    دِى الأوامِر

    ودِى الدفاتِر

    ودِى العساكِر

    وافتَح السِّكهْ اليَمُر

    سيدنا آمر

    ابن جابر

    واسْتَلِم يا وَدْ قِنِعْنَا:

    إنتَ عارِف بيت سُعاد ،

    وعارف إنَّك من قَبيلَهْ

    لا رأينَا

    ولا سِمِعنْا

    ولا عِشمْنَا ولا ..

    طِمعْنَا

    وانت مُرْسَال يا ..بَجَم

    تدخل البيت زى كأنّك..

    مارِق الآن...

    من جهنم

    ولمَّا تَطْلَع ليكْ سُعاد

    كُون خفيف ..زي الأمل

    ومرَّه أتْقَل

    زي جَبَل :

    أوْعَىَ تَفْرَح ..

    أوْعَى تزْعَل

    واقْصِر ايدك من سلام

    خلّى نَظَركْ يِكُون كفيف

    ومَشِيكْ يكون...

    ناعم..

    مُغرْبَل..

    ولما تَطْلع ليك سُعاد

    زي حلم فى توب رهيف..

    أدّيهَا ضَهَركْ يا ..

    مُغفّل..

    وبكُلِّ ما علّمْتُو ليكْ

    من طاعَهْ

    من ذُّل..

    من وجل...

    أمْرُق حشاي قِدَّامهْا يلْمَع

    بالوجع..

    قُول ليهَا..

    لمَّا الشوق يبين..

    مابين ..شجيرات الأراك

    والفرحَه تغْسِل طرْحتهْا

    والبدر يمشى على الهلاك

    والخوف يكون لسَّع جَنين

    فى رُكْنِ من ساحة الوَّلَه

    فىزاويَهْ من ساعة الحنين

    ما بين..

    دِى ارْضَك..

    ودَاكْ سَمَاك..

    العُمْدهْ منْتظْرِك هِناك..

    ومِن هِناك..

    درْبَك عديل..

    نادِى المُدرِّس .. وَدْ خَدوم..

    والمديرِس وَدْ خدوم..

    العُمْر مربوط بالجرَس

    والصبْرِ مشْنوق الضُحى

    والخوف نَزَل من غير حَرَس

    والعُمْدهْ فوق كل الأصول..

    لمْلًم جِرايواتُو و..

    جَلَس..

    عُمدةْ فوق كل الفصول

    فى التلاميذ..

    فى الطباشير

    فى التعابير ..فى النَّفَس

    يا طه يا ..

    يا إنتَ يا

    يا ودْ خدوم..

    ملعون أوهو الكان ده يوم

    الإنتَ عريان وقَّفَك

    والعمدهْ قدَّامك رَفَس

    وعليكَ إنتَ براك تخمّن

    هل تكّلم

    أم تنَحْنَح

    !!أم عَطَس

    والعُمدهْ قال:

    يا إنت يا ..

    يا طه يا

    يا ودْ خدوم

    أنا عندي إنتَ براكَ كوم

    والحِلَّهْ كوم..

    يَاخ ديل بَقَر

    فى أحْسن الأحوال غجَر.

    أنْسَانى من كومَة هدوم

    مشْرورَهْ فى الطين..

    والهموم

    ما حاتَنْشَف

    حتى لو نِشِف البحر

    والنساوين

    والغيوم

    ما حاتَنْشَف ..ما حاتَنْضَف ما..

    والعمدَهْ فوق راسك هتف:

    (مسئول كبير زاير البلَد

    وانتَ يا طه العِماد..

    إنتَ الفهَم..

    إنتَ السنَد

    لِمَّ الصغار

    وزِّع عليُهم كلِّ واحد..

    فَرْد ..فَرْد

    الفرحَهْ

    وافرُش سِكّتْهم مرات طراوَهْ و..

    مرّهْ وَرْد..

    ولمَّا يهتفوا فى الفصول

    يحيا ويدوم عاش البطل

    !!ما يكون هُتاف

    من أىِّ فَم..

    يطْلَع زَخم..يطْلَع زبَد

    تنْهدَّ حيشان البيوت

    والفرحَهْ فى أحسَن مزاج

    لا تْخَلِّى دابَهْ..

    ولا تُرابَهْ

    ولا أحد)

    هل انتهى يا ربى زيَّاك العَمَد

    يا ود خدوم

    وانت سايس للعقول

    دَه عليكَ إنت بَراك بعْرِف:

    هل تقدّم

    أم تزحْزَح
    !أم جَمَد

    والمديرِس ودْ خدوم

    مع إنّو فى حلْقُو مو عَلّق

    كُلَّ أجراس المدارِس

    كلَّ صوت فى الدنيا عابِس

    بِرَجْفَهْ لصَقَت فى سُنونو ،

    كلُّ رجفات المساكين ،

    والعواجيز ..

    والعوانِس ..

    صوت بيتْعرَى ويضِيع

    ويلمُّو صوت تَرْيان.

    ولابِس..

    وصرخْتَ يا طه وصرَخ

    ضُل المشاوير..

    فى الأصيل.

    فى الساحَهْ رفَعَت مُقْنَعهْا

    الذِّلَهْ ... والصبر الطويل

    رقَصَت مع الكلمات

    شُجون..

    وجَرَت ورا الأحرف

    خُيول :

    "!!يا عُمْدهْ هوي"

    حامت على الناس القَماري

    وزّعَتْ سَعَف النخيل..

    " !! يا عُمدهْ هوي"

    مَشَت سحابَهْ

    وجات ربابَهْ وزفَّهْ قامت

    فى الطبول

    "!!يا عمدة هوي"

    الغافى فارق غَمْدَتُو

    والصاحى تَمْتَم..

    فى ذُهول

    قام ودْ خدوم

    "يا عُمْدهْ هوي"

    يا عُمْدهْ بالله إخْتَشِى..

    للعوْرَهء ما بِنْفَع هُتاف

    للسوسَهْ

    ما بْفِيدَك حَشِى

    علّمْتَنا الجري فوق جروحنا

    وقلتَ:أبداً

    !!دَه المَشِي

    خَتْيتْنَا فى قلب المشاكل

    وصِحنا كُلّنا

    " مافى شِي..

    كلمَهْ واحدَهْ..

    جناب سعادتَك

    من ضمير ما مُرتَشِى

    الحِلَّهْ يا .."

    والعُمدَهْ ..أو سلطانو قام:

    "الحِلَّهْ أيه..؟

    حتَّه مُعلم مُبتدىء..

    الحِلَّهْ أيه

    مسئول كبير زاير البلد

    لا ودْ خَدوم

    ولا ألفِ شُوم

    أو ألأف بوم

    !!حيَعَلِّم الوِّز كيف يعوم"

    والعُمدَهْ جابِر..

    دَه الصباح

    مدَّ إيدو على الدفاتر

    وقبلما ما ينْصَر جبينو

    كان شطب كلَّ المساخِر

    اللِّى حاضِر

    من مساخِر

    والمُسافِر

    ما عدا السجن العُمومي


    عمر الدوش

  2. #2
    رفاعي مُتميز الصورة الرمزية صديق الاخضر
    تاريخ التسجيل
    May 2005
    الدولة
    اعيش فى حضن الالم
    المشاركات
    1,390
    معدل تقييم المستوى
    16

    افتراضي

    سلامات وعوافى
    نولا
    طولنا من كتابت اسمك فى الردود
    بقينا ننتظرك ذى هلال رمضان
    ما تطولى الغيبه تانى .
    شكراً لاختيارك هذا النثر الثرى
    سلم اختيارك وسلمتى انتى
    ربما أتى
    صوتاً صاخباً يكسر الصمم
    عند اللفه
    عايزين من بيت الكلاوى يا نوناى
    ونست بيك كل النجوم
    الباسمه فى ثغر السما وحلفت بيك أسقى
    الغيوم زمزم نقاك والامكنه وناديت
    عليك رجع الصدى و ردد معاى
    (الدنيا دونك مبهمه)

  3. #3
    رفاعي عبقري الصورة الرمزية Nola
    تاريخ التسجيل
    May 2005
    الدولة
    khartoum
    المشاركات
    6,103
    معدل تقييم المستوى
    21

    افتراضي

    صديق الاخضر ...

    سلامات يا مخضر الدواخل

    عندما اصاب قلمنا ... الانهزام ... اتينا بما كتبه الآخرين

    لعله يستفز ... ليعاود النشيد من جديد .....

    لكن دعني ... اهمس لك ... قد يعود ... لمواصلة النشيد


    مشكور علي توقعيك الانيق

  4. #4
    رفاعي عبقري الصورة الرمزية أمير عمر
    تاريخ التسجيل
    Apr 2006
    الدولة
    دبي - الأمارات
    المشاركات
    2,384
    معدل تقييم المستوى
    16

    افتراضي

    :mh46: :mh46:حتى لو توقف القلم فيظل العقل يختار الجميل ... لا تتوقفي حتى لا يمل القلم من الوقوف ويأبي الرجوع :mh46: :mh46:

    لا يَبْلُغُ العاقُلُ مِنْ خِصْمِه ... ما يَبْلُغُ الجاهلُ مِنْ نَفْسِهِ

  5. #5
    رفاعي نشط الصورة الرمزية عبد الرحمن حسين بدر
    تاريخ التسجيل
    Jan 2006
    المشاركات
    858
    معدل تقييم المستوى
    14

    افتراضي

    نولا

    لا تقولي اي شئ .. ركزي انت على الاحساس ودعي القول فما قيل وما سيقال كثير وموجع .. ابتعدي وحاولي عبثا ان تنفلتي قليلا من جاذبيه اسمها الالم ..والكتابه عنه.. فاجدني لم افعل سوى انني اخترت فلك اخر من افلاك الوجع .. فمن اين لي بشئ اخر يسيطر على احاسيسي ويستعبد قلمي .. وانا اري عمري طفل نصف وجهه حيره ونصفه الاخر لعبه مسلوبه من يد القدر .. من اين لي بشئ اخر غير الوجع وهو ضيفي وهو نزيلي وهو سكني وهو كلي وهو بعضي وهو طفل ينمو في رحم متعب الارجاء منهك الشرايين !! من اين لي بشئ اخر غير الوجع .اجتاز عبره واسد وراؤه المداخل فلا يجتازني واوصد مساماتي لاحتفظ باخر كريات تحمل سعاده مشوهه لا يمكن الاحتفاظ بها كما لا يمكن اجهاضها ...


    عودى فنحن نشتاق لقلمك ....
    لست ادرى لما اشعر بأنك مكتوبه فى قدرى مرسومه على ملامحى نابضه فى ذاكرتى وراسخة فى تكوينات عقلى الباطن .. ممزوجة بين أمشاج اطفالى .... !!!! فقط أنتظرك ان تاتي ... كالفرح ... كالمطر .... كالريح العطوف ... !!!!

  6. #6
    رفاعي عبقري الصورة الرمزية Nola
    تاريخ التسجيل
    May 2005
    الدولة
    khartoum
    المشاركات
    6,103
    معدل تقييم المستوى
    21

    افتراضي

    اقتباس المشاركة الأصلية كتبت بواسطة أمير عمر
    :mh46: :mh46:حتى لو توقف القلم فيظل العقل يختار الجميل ... لا تتوقفي حتى لا يمل القلم من الوقوف ويأبي الرجوع :mh46: :mh46:

    د. امير عمر ....

    كيف الحال ايها الرحب

    حتي ان توقفت لن استطيع الهروب ..

    فجاذبية الحروف المغنطيسية تنهار أمام مجالها قوى التمرد الهاربة ..

    فنعود اليها صاغرين .... ويبدأ نزف الحرف الحنين


    تشكرات كتيرات علي المرور الانيق دكتور

  7. #7
    رفاعي عبقري الصورة الرمزية محمد صديق
    تاريخ التسجيل
    May 2012
    الدولة
    الخرطوم بحرى :الحلفايا مربع 7 منزل 88
    المشاركات
    2,474
    معدل تقييم المستوى
    10

    افتراضي

    قصيدة من بيت (الكلاوى[)..وآخر مداخلة فى هذا البوست بتأريخ 14\9\2006/]


المواضيع المتشابهه

  1. المواقف والعطاء ...الراحل المقيم/ العميد احمد على جابر (توثيق)
    بواسطة اسامة عبد الله محمد الحسن في المنتدى منتدى الحوار العام
    مشاركات: 16
    آخر مشاركة: 04-29-2007, 11:29 AM
  2. قصيده في رثاء العمالقه أحمد علي جابر و عثمان عبد الله وقيع الله
    بواسطة bakry Almahi في المنتدى المنتدى الأدبي
    مشاركات: 2
    آخر مشاركة: 02-08-2007, 11:08 AM
  3. رسائل ست الدار بت احمد جابر
    بواسطة muiz motasim babeker في المنتدى منتدى الحوار العام
    مشاركات: 7
    آخر مشاركة: 11-13-2006, 11:05 AM

ضوابط المشاركة

  • لا تستطيع إضافة مواضيع جديدة
  • لا تستطيع الرد على المواضيع
  • لا تستطيع إرفاق ملفات
  • لا تستطيع تعديل مشاركاتك
  •  
الساعة الآن 12:57 AM
Powered by vBulletin® Version 4.2.3
Copyright © 2019 vBulletin Solutions, Inc. All rights reserved.
Translate By Almuhajir
المواضيع والمشاركات في منتديات رفاعة للجميع تعبر عن رؤية كاتبيها
vBulletin Skin By: PurevB.com