صفحة 2 من 11 الأولىالأولى 1234567891011 الأخيرةالأخيرة
النتائج 11 إلى 20 من 107
  1. #11
    الادارة
    تاريخ التسجيل
    May 2005
    الدولة
    السعودية - مدينة ينبع الصناعية
    المشاركات
    2,861
    معدل تقييم المستوى
    10

    افتراضي

    [GRADE="00008B FF6347 008000 4B0082"]الوريف معتصم ..
    دائما لا نعرف قيمة الحاجة .. الاّ حين نفقدها .. وجدة من بعدك خلا !!

    وبعدين معاك ؟ يعنى طوالى سؤال المليون !! ونحنا لسع بنسخن !!
    شوف يا سيدى .. الموضوع دا عاوز تنقيب و بحث و استعانة بأكثر من صديق .. حأديك رؤوس اقلام .. ووعد بالعودة مرة اخرى يمكن فى بوست منفصل ..
    الصحيح هو العايدابى و ليس العيدابى .. نسبة لجدهم الكبير .. عايد ..
    أصلهم بديرية دهمشية .. من الشمالية .. وفى رواية أنهم شايقية .. وعايد دة ينحدر من السواراب .. وشى منهم دناقلة .. زى ناس محمد دياب و حمزة خيرى .. وشى جعليين زى ود كوداب .. يعنى فى النهاية سودانيين عديييييييييل وليس من الذين اتوا على ظهور امهاتهم (بلاش عنصرية !!) ..
    أستقروا برفاعة بدرى شديد .. وكان جدى ود العايدابى يعمل بالتجارة .. توفى قبل أن اولد .. يمكن 1948 ..
    بعدين الفريق دا كله أهل و نسايب .. شى بالامهات و شى بالابوات .. يعنى حوش ود العايدابى دا كان السنتر و حواليه .. ناس ود علوب .. ود ابوسوار .. ناس الجاك ود نميرى .. المبارك ود بجاوى .. ناس الطيب الريح .. عبيد واحمد مختار .. حوش الخليفة عثمان .. ناس مجدوب ..الخ .. وتمشى فريق ورا حوش ود ارباب .. شربكة شديدة ما يحلك منها غير يا خال ويا خالة .. شفت الرندكة مفيدة كيف !!
    أما الشايقية أعمامى فقصتهم تانية ... خليها شوية !!

    لمن بالغ وكبر وصلى .. وقام اتعزز الليمون ومحمد سلام !! يا راجل يا عجوز يا مجلكن !! دى فى السبعينات .. بعدين محمد سلام دا كان صيحة .. بيغنى و بيرقص .. سمع و شوف .. ولا نانسى عجرم !!

    التاريخ 6 اكتوبر 1977 ..
    المناسبة .. زواج شقيقتى مريم .. الذى رأى الوالد أن يتم برفاعة عشان ما يتلتل اهلنا و أهل العريس (من مدنى) بالسفر لعطبرة .. شوف الناس دى كانت فاهمة و وبتقدر كيف !!
    من النهار .. رفاعة كلها عارفة الحفلة بى محمد سلام .. و العميان شايل المكسر .. و حيطة "حدوقة" جنوب الصيوان ..محل الجكس .. و لم تتحمل من كانو عليها .. وما كانوا يقومون به !! و طاحت الحيطة بمن عليها .. وفرتقت الحفلة و الفاصل الاول لم ينتهى .. و ما زال الليل طفلا ..
    يااااااااااااااااااه يا معتصم .. ذكريات !!

    أبو هبة .. الكرسى الساخن .. مع النيو لوك .. استوجب ذلك .. وقدمى بعض من كلك .. و أنت حادى الركب الذى جمع اهل و محبى رفاعة فى هذا الملتقى التحفة "الشديييييييد" !!

    عبده عثمان ... سميّى .. لك الود.. لك الشكر ..
    بعدين تعال .. ابو ريد دا .. ليه علاقة ب"عديلى" الاستاذ حسين سعيد محمد خير و أخوه أحمد سعيد؟؟ فتش كدة يمكن نطلع أرحام !! [/GRADE]
    عبدالرحمن على حسن

    رأيك صواب يقبل الخطأ ... ورأيي خطأ يقبل الصواب

  2. #12
    عضو إداري الصورة الرمزية عبدالله ابنعوف
    تاريخ التسجيل
    May 2005
    الدولة
    الخرطوم - رفاعة
    المشاركات
    13,443
    معدل تقييم المستوى
    10

    افتراضي حدوقة

    ياااااااااااااه عبدالرحمن ، تعرف حدوقة دي يبدو من أسماء الجن الفاتت على أخونا مهلب علي مالك .

    والله كرسيك الساخن دا يبدو حيدينا الجديد في التوثيق لرفاعة فريق العايداب وفريق وراء ، طيب ما تقوم يا اخي بلا عطبرة بلا بطيخ ( طبعاً المعلومات دي كلها نحن عارفنها كويس ) بحكم الجيرة .... ودكان عمنا أحمد ود كوداب والعنقريب وكمال القريضة ويا عم أحمد أدينا تمر ( مافي ) يا عم أحمد أدينا حلاوة ( مافي ) ويا عم أحمد أدينا صابون ( مافي ) ، ودا طبعاً كلو عشان ما يقوم ويدخل الدكان من جوة البيت مشوار طويييييييييييييييييل وتفوته شيء من الونسة .....

    بعدين يا أخوي تعرف بيت حدوقة دا وين حالياً ؟

    ودمت أبو منى ومحمد

  3. #13
    رفاعي مُتميز الصورة الرمزية Mutasim Obeid
    تاريخ التسجيل
    Jun 2005
    المشاركات
    1,246
    معدل تقييم المستوى
    16

    افتراضي

    أخى الباشمهندس عبد الرحمن على حسن
    لك تحياتى وعاطر الامنيات لك والعيال بدوام التوفيق والسداد
    ربما لم نلتقى وجهاً لوجه لكننى عرفتك من خلال ابن عمتى أمير تاج السر وصديقى المرحوم احمد الامام ويومها كنت جديداً على جدة والسعودية وذلك فى العام 1999م وكان أصرار اخىوصديقى احمد الامام ( الف رحمة ونور عليه ) كبيراً لملاقاتك عسى أن اجد وظيفة لديكم فى مصنع الكلوروكس بحكم التخصص والخبرة التى جئت بها من السودان فى مجال المنظفات والزيوت وتمكنت من زيارة د. عمر الحسين معه وكانت الزيارة الاخرى مقررة لكم لما سمعته عنك من طيب معشر وحب فى المساعدة الجادة لكل من هو من رفاعة ولكن يقدر الله الاشياء لشئ محسوم ذهبت للرياض لاستخراج الاقامة والعودة لملاقاتك ومن يومها لم أخرج من الرياض الى اليوم .... وسعدت أيما سعادة بتواصلك فى المنتدى وكنت كمن رآءك رأى العين بعد ان عرفناك بخواطرنا .... لك الود ولاهل هذا الصرح العظيم كل الامتنان
    حدثنا ماذا أضفت لك الغربة غير المادة ؟؟؟ وماذا اخذت منك ؟؟
    أذا عاد بك الزمان 30عاماً للوراء هل تختار نفس مسارك الحالى لو كان لك الخيار ؟؟؟
    قرار تصحيحى تود ان تأخذه قريباً له اثر فى مستقبل حياتك ؟؟؟
    وقرار لم تأخذه وحمدت الله أنك لم تأخذه ؟؟؟
    هل لديك قطعة ارض فى رفاعة ؟؟؟

    ولى معك عودة

    معتصم عبيد

  4. #14
    الادارة
    تاريخ التسجيل
    May 2005
    الدولة
    السعودية - مدينة ينبع الصناعية
    المشاركات
    2,861
    معدل تقييم المستوى
    10

    افتراضي

    اقتباس المشاركة الأصلية كتبت بواسطة abuheba
    ياااااااااااااه عبدالرحمن ، تعرف حدوقة دي يبدو من أسماء الجن الفاتت على أخونا مهلب علي مالك .

    والله كرسيك الساخن دا يبدو حيدينا الجديد في التوثيق لرفاعة فريق العايداب وفريق وراء ، طيب ما تقوم يا اخي بلا عطبرة بلا بطيخ ( طبعاً المعلومات دي كلها نحن عارفنها كويس ) بحكم الجيرة .... ودكان عمنا أحمد ود كوداب والعنقريب وكمال القريضة ويا عم أحمد أدينا تمر ( مافي ) يا عم أحمد أدينا حلاوة ( مافي ) ويا عم أحمد أدينا صابون ( مافي ) ، ودا طبعاً كلو عشان ما يقوم ويدخل الدكان من جوة البيت مشوار طويييييييييييييييييل وتفوته شيء من الونسة .....

    بعدين يا أخوي تعرف بيت حدوقة دا وين حالياً ؟

    ودمت أبو منى ومحمد

    [GRADE="00008B FF6347 008000 4B0082"]تعرف يا عبدالله كرسيكم دا نفض غبار السنين .. كلما اكتب حاجة .. تتدافع الذكريات و تتسابق ..
    دكان ود كوداب .. كان مرتعنا فى الاجازات .. نصه صناديق فاضية !! والطربيزة مليانة حاجات موزونة جاهزة .. وقية شاى .. نص رطل سكر .. بن بى قرشين .. وطبعا هو فى العنقريب الهبابى فى الراكوبة .. و" ما فى" مش بس عشان الونسة ما تفوتو .. برضة لو كانت البيعة ما بتستاهل يقوموا ليها .. زى يا ود كوداب ادينا ملح بى تعريفة !! تتذكرحلاوة دربس؟ و البسكويت المعمول بأشكال الحيوانات؟ وحلاوة طحنية سعد من الصفيحة؟
    بيت حدوقة .. أمكن أكون ملخبط فيه شوية .. الاحتمال الاكبر أنه كان مكان بيتك الحالى .. و جايز محل بيت عبدالله عثمان الكان متزوج أم ستين بت عبيد مختار !!
    كيف معاك الوهمة دى ؟؟؟

    أما عطبرة دى فكلامها تانى ..
    لك خالص الود ..[/GRADE]
    عبدالرحمن على حسن

    رأيك صواب يقبل الخطأ ... ورأيي خطأ يقبل الصواب

  5. #15
    رفاعي نشط الصورة الرمزية razaz
    تاريخ التسجيل
    Jul 2005
    الدولة
    egypt
    المشاركات
    730
    معدل تقييم المستوى
    15

    افتراضي salam

    [FRAME="11 70"][GRADE="00008B FF6347 008000 4B0082"]التحية للاستاذ عبد الرحمن على صاحب السرد الجميل والكلام السلس الذى ياخد الواحد الى عوالم من السحر والجمال وكأن لنا بك معرفة قديمة ...... شدتنى مقدمتك وجعلتنى اتابع حديثك وردودك على اسئلة كل محبيك ...لقد جلس قبلك ابو هبة والصادق الاخضر ولم اتمكن من طرح اى من الاسئلة قولت ناس رفاعة كلهم اهل مع بعضهم واكيد تكون اسئلتهم فى محيط رفاعة وماحولهم يعنى وقفت حائرة اقرأ فقط دون النطق باى حاجة او الاتيان باى سؤال خفت ان يكون ليس محل اهتمام او عدم الرد عليه وقولت احسن المتاوقة بس ودة برضو شرف لينا نحنا خارج رفاعة ولكن وجدتك وانت فى الكرسى الساخن ان اتقدم ومن دون مقدمات او اعطاء نفسى التفكير حتى .... اكيد عشان السرد كان مختلف او الحكاية كانت بتشد الواحد عشان يقف عليهاويعرف صاحبها...انا ما بقلل من الاخوان الاعزاء ابو هبة والصادق بس الواحد عرفهم اكتر من خلال الكرسى الساخن وعاش داخلهم من اجاباتهم للاسئلة....
    الاستاذ عبدالرحمن انا سعيدة بمعرفة العائلة الكريمة وربنا يخليهم ليك ويوفقهم جميعا وما احلى ان يلتقى طب العيون مع طب الاسنان وهندسة الاتصالات وعينا باردة ومسكنا الخشب وربنا يحفظهم ويحفظ ليهم امهم وابوهم ......
    طبعا سؤالى اليك ماهى حكايتك مع الرقم13 بالرقم من انه ما حلو عند بعض الناس؟[/GRADE][/FRAME]
    وطنى ليس حقيبة...
    وانا لست مسافر...
    اننى العاشق.. والارض حبيبة

  6. #16
    الادارة
    تاريخ التسجيل
    May 2005
    الدولة
    السعودية - مدينة ينبع الصناعية
    المشاركات
    2,861
    معدل تقييم المستوى
    10

    افتراضي

    [GRADE="00008B FF6347 008000 4B0082"]أضافت لى الغربة الكثير ..
    أولا .. حسن أسلامى .. وقد تلاحظ هذا فى الكثير من السودانيين .. المسلمين بالفطرة .. الذين يلعب مكان تواجدهم دورا كبيرا فى تشكيل سلوكياتهم و التزامهم الدينى .. أقصد هنا الصلاة فى وقتها وفى المسجد .. حلقات التحفيظ و التجويد .. العمرة .. الحج .. الصيام التطوع .. الزكاة و الصدقات .. والابتعاد عن المحرمات .. أما الدين المعاملة .. والوسطية .. فقد رافقتنا من السودان ..
    ثانيا .. الزيادة فى العلم (الدنيوى) وتحقيق الذات .. وقد كنت محظوظا بالعمل فى شركة معيار الموظف فيها هو تطوير الذات و مستوى الاداء بغض النظر عن جنسك أو لونك أو دينك .. وافخر كثيرا (كسودانى و بدون غرور) بالكم الهائل من المعرفة والمهارات والقدرات التى اكتسبتها خلال فترة عملى فى السعودية ويزداد إحساسى بقيمتى عندما أقوم بعمل برامج تدريبية فى شكل محاضرات أو ورش عمل لموظفى الشركة فى مختلف المجالات الفنية و الادارية والسلوكية ..
    ثالثا .. زيادة الترابط على مستوى الاسرة الصغيرة .. الزوجة والعيال .. فهنا تعيش حياتك و تربى عيالك بدون تدخلات .. تواجدك فى البيت – بعد الدوام – أكثر .. مشاركتك فى مسئوليات البيت أكبر .. انتماؤكم لبعض .. اعتمادكم على بعض .. السكن والمودة والرحمة .. ويمكن دى تكون تجربتى الخاصة غير القابلة للتعميم !!!
    رابعا .. الكثير من العلاقات .. و الزملاء .. وقليل من الاصدقاء .. تشيكلة من مختلف الاجناس .. والالسن .. والعادات ..
    خامسا .. وضوح الرؤى والاهداف .. والقدرة على الاجابة على "ماذا" و"لماذا" و"كيف" و"متى" فى كل شىء تقوم بعمله !!
    وسادسا ... وعاشرا .. وقديما قالوا .. سافر ففى الاسفار خمس فوائد .. تفريج هم واكتساب معيشة .. علم واداب وصحبة ماجد ..

    ماذا اخذت منى؟ عمرى ..؟ طيب ما أصلو العمر رايح بغربه أو بدونها !! وبعدين الاخذ و العطاء ديل معادلة موزونة .. وبمنتهى الصراحة .. لم تأخذ منى الغربة بقدر ما أعطتنى ... و اليوم الحتكون فيه المعادلة معكوسة .. ستجدنى فى السودان !!

    أذا عاد بك الزمان 30عاماً للوراء هل تختار نفس مسارك الحالى لو كان لك الخيار ؟؟؟
    اليست الحياة كلها خيارات؟؟ تحكمها المعطيات فى الزمان والمكان!!
    خلال ال35 سنة الماضية كانت هناك محطات مهمة و خيارات صعبة .. كنت استشير واستخير .. ولكن كان القرار الاخير بيدى ..
    علمى والله أدبى .. احياء اضافية والله رياضيات اضافية ؟
    هندسة المعهد الفنى (مهندس) والله تمتحن تانى(ترقع) وتدخل طب الخرطوم (دكتور)؟
    تشتغل معيد فى المعهد الفنى والله مهندس تنفيذى ؟ حكومة والله قطاع خاص ؟ فى الخرطوم والله برة الخرطوم ؟
    تتزوج من الاسرة والله من خارج الاسرة ؟ الحب القبل الزواج والله البعده ؟
    تواصل فى السودان والله تهاجر ؟
    متى تعود الطيور المهاجرة ؟؟

    لا اعتقد ان اختيارى سيكون مختلفا اذا لم تختلف المعطيات !!

    قرار تصحيحى تود ان تأخذه قريباً له اثر فى مستقبل حياتك ؟؟؟
    هما قراران .. الاول يتعلق بعادة سيئة .. اجاهد نفسى للتخلى عنها وهى التدخين .. ولا شك ان ذلك سيكون له أثر ايجابى فى مستقبل ما بقى من حياتى .. صحيا ..
    و الثانى يتعلق بالعودة النهائية للسودان .. والتصور واضح فى ذهنى .. وبدأت فى تنفيذ الخطوات الاولى .. نسال الله ان يبلّغنا ذلك ..

    وقرار لم تأخذه وحمدت الله أنك لم تأخذه ؟؟؟
    يووووووووووووووووه .. ماتعدش !! وكلها .. حمدو فى بطنه !!

    هل لديك قطعة ارض فى رفاعة ؟؟؟
    فشلت فى قراءة مابين وما خلف سطور هذا السؤال المقلب !!
    بصراحة لا .. و بأمانة ليس فى نيتى .. و بمنتهى التجرد .. هناك من هم أحق منى بذلك .. ألم أقل لكم فى أول تعريف .. من رفاعة .. بس تايلاندى !!!

    معتصم يا غالى .. لك الشكر على الاسئلة "الغميسة" !!
    كم من عشرة يا معلم ؟؟؟؟؟؟؟؟؟؟
    [/GRADE]
    عبدالرحمن على حسن

    رأيك صواب يقبل الخطأ ... ورأيي خطأ يقبل الصواب

  7. #17
    رفاعي عبقري الصورة الرمزية اسامه محمد عبد الباسط
    تاريخ التسجيل
    Oct 2005
    الدولة
    السعوديه _الرياض
    المشاركات
    2,468
    معدل تقييم المستوى
    17

    افتراضي

    الاخ العزيز / عبد الرحمن علي حسن
    السلام عليكم ورحمة الله وبركاته

    نحمد الله الذي أنجب لنا من رحم رفاعه أخوة نهتدي بنورهم ونتمني أن نسير
    في دربهم ، والشكر كل الشكر لاخونا الكبير / عبد الرحمن علي حسن ، الذي كان دائما
    سباقا علي فعل الخير ولم يبخل علي أمه رفاعه بماله ووقته ونتمني من الله العلي العظيم أن يمده بالصحه والعافيه وأن يجعل ما قدمه في ميزان حسناته 0

    كتبت الاخت / ملاذ حسين الاتي
    1/ رندكه /فلنكه / جلك / عضه / موبايل / يا حسس / كسير الثلج / البشوشو ده
    ( فسر لنا هذه الكلمات مع خالص الشكر )
    *هل الجيل الحالي من ابناء رفاعه داخل وخارج الوطن يطورون مدينتهم 0
    * الجيل الحالي وغيرهم من أبناء رفاعه في الغربه ماسكين قوي علي أموالهم
    ولا يشاركون في ابسط الاشياء مثل دفع اشتراكاتهم في الجمعيات هل توافقني0
    * ماذا تعني أني اسمع جعجعه ولا أري طحينا 0
    * لو خيرت في السكن في السودان هل تختار عطبره أم رفاعه ولماذا 0
    والي اللقاء في اسئله اخري .
    التعديل الأخير تم بواسطة اسامه محمد عبد الباسط ; 03-15-2006 الساعة 03:20 PM
    ابو احمد

  8. #18
    رفاعي عبقري الصورة الرمزية حافظ جعفر حسن
    تاريخ التسجيل
    May 2005
    الدولة
    الدمام
    المشاركات
    3,172
    معدل تقييم المستوى
    18

    افتراضي

    اٍستاذنا الفاضل الباشمهندس عبدالرحمن
    نحن على ثقة بأنك ستحيل كرسيك من سخونة وحرا الى بردا وسلاما بحنكتك ودبلوماسيتك ولي سؤالا واحدا حيث أننا نعيش في زمامن القهر والتحديات وحياة الغربة المليئة بالقلق والأوجاع وعالمها المنخور المليء بالهموم والمعاناة !!!!! ما مصيرك في الغربة وفي زمن سقطت فيه كلمة الرحمة والجري والبحث عن كسرة خبز يابسة نسد بها رمقا ملتهبا ومشتعلا ومنقسما بين الكفاح للأعالة وتحمل المرارة والتحدي ألا تعتقد انك ونحن بلغنا مرحلة التخمة من الغربة وحان الوقت لوضع عصا الترحال ؟؟؟؟؟؟؟
    رفاعة ليست بلد نعيش فيها رفاعة بلدا تعيش فينا

  9. #19
    الادارة
    تاريخ التسجيل
    May 2005
    الدولة
    السعودية - مدينة ينبع الصناعية
    المشاركات
    2,861
    معدل تقييم المستوى
    10

    افتراضي

    اقتباس المشاركة الأصلية كتبت بواسطة razaz
    [FRAME="11 70"][GRADE="00008B FF6347 008000 4B0082"]التحية للاستاذ عبد الرحمن على صاحب السرد الجميل والكلام السلس الذى ياخد الواحد الى عوالم من السحر والجمال وكأن لنا بك معرفة قديمة ...... شدتنى مقدمتك وجعلتنى اتابع حديثك وردودك على اسئلة كل محبيك ...لقد جلس قبلك ابو هبة والصادق الاخضر ولم اتمكن من طرح اى من الاسئلة قولت ناس رفاعة كلهم اهل مع بعضهم واكيد تكون اسئلتهم فى محيط رفاعة وماحولهم يعنى وقفت حائرة اقرأ فقط دون النطق باى حاجة او الاتيان باى سؤال خفت ان يكون ليس محل اهتمام او عدم الرد عليه وقولت احسن المتاوقة بس ودة برضو شرف لينا نحنا خارج رفاعة ولكن وجدتك وانت فى الكرسى الساخن ان اتقدم ومن دون مقدمات او اعطاء نفسى التفكير حتى .... اكيد عشان السرد كان مختلف او الحكاية كانت بتشد الواحد عشان يقف عليهاويعرف صاحبها...انا ما بقلل من الاخوان الاعزاء ابو هبة والصادق بس الواحد عرفهم اكتر من خلال الكرسى الساخن وعاش داخلهم من اجاباتهم للاسئلة....
    الاستاذ عبدالرحمن انا سعيدة بمعرفة العائلة الكريمة وربنا يخليهم ليك ويوفقهم جميعا وما احلى ان يلتقى طب العيون مع طب الاسنان وهندسة الاتصالات وعينا باردة ومسكنا الخشب وربنا يحفظهم ويحفظ ليهم امهم وابوهم ......
    طبعا سؤالى اليك ماهى حكايتك مع الرقم13 بالرقم من انه ما حلو عند بعض الناس؟[/GRADE][/FRAME]

    [GRADE="00008B FF6347 008000 4B0082"]رذاذ .. أم .. رزاز ؟
    ما تفرق .. فكله من مشتقات الماء .. سر الحياة !!
    لك الشكر على الاطراء و التشجيع الذى يدفعنى للمواصلة ..
    الاحساس باننا وسط اناس لا نعرفهم ولا يعرفوننا .. عائق كبير للتواصل .. وزى ما احجمتى عن المشاركة مع ابوهبة والصادق .. يحجم غيرك .. و أنا منهم .. عن التعليق على مواضيع كثيرة فى المنتدى .. لعدم معرفته بكاتبها .. وخوفا من الفهم الغلط لعدم معرفة الكاتب بالمعلق وخلفياته ..
    الكرسى الساخن ..فى رأيى .. فرصة لمزيد من التعارف والتواصل بين أعضاء المنتدى .. لذا حاولت أن اوضح بشفافية وبتفصيل – قد يكون مملا للبعض – من أكون .. وكيف افكر .. وما اسهل التعامل مع انسان تعرف من يكون و كيف يفكر !!

    الرقم 13 رقم تشاؤمى عند الكثيرين .. و بالرغم من أن ديننا الحنيف ينهانا عن الطيرة و التطير .. برضة بتلاقى البعض يتشاءم بالرقم 13 !!
    أنا بالعكس .. اتفاءل بالرقم 13 و اجتهد فى الارتباط به ..
    بدايات ارتباطى بهذا الرقم .. فى داخلية المعهد الفنى قرب قسم الشرطة الجنوبى فى الخرطوم .. سجلنا أنا و زميل من عطبرة الثانوية متأخرين .. ولم نجد مكانا فى سكن البرالمة .. وكانت هناك غرفة (سكن لشخصين ) فى مبنى السناير فارغة للسبب اعلاه !! و تم احتلالها و لمدة اربع سنوات بواسطتى و زميلى .. واخى الذى لم تلده أمى .. مصطفى ..
    كانت احلى سنوات الشباب .. ونجاح وراء نجاح .. و بدون ملاحق .. وكانت ملتقى الغاشى و الماشى .. وكان رقمها .. 13 !!
    أول وظيفة التحقت بها فى 13 مايو 1973 !!
    الناس كانت بتعرس دائما اول الشهر .. قريب للمواهى لزوم النقطة !! وكان زواجى يوم 13 اكتوبر 1977 .. وكمان ازيدك وهم .. صارحتها برغبتى فى الزواج بها يوم 13 مارس .. وخطبتها رسمى يوم 13 مايو !!
    ومنى زى ما ذكرت مولودة يوم 13 فبراير ( وعاملة زعلانة لأنى قلت سنة كم !! ) ..
    مش لى حق أحب الرقم 13 ؟؟
    حتى فى الكنكان – وناس رفاعة مشهورين بيهو – بتنطط عيونك لما الورق يكون عامل 13 ومنتظر الخمسييييييييييييييين !!!

    لك الود والتقدير .. رذاذ ،،،،،،،، [/GRADE]
    عبدالرحمن على حسن

    رأيك صواب يقبل الخطأ ... ورأيي خطأ يقبل الصواب

  10. #20
    الادارة
    تاريخ التسجيل
    May 2005
    الدولة
    السعودية - مدينة ينبع الصناعية
    المشاركات
    2,861
    معدل تقييم المستوى
    10

    افتراضي

    اقتباس المشاركة الأصلية كتبت بواسطة اسامه محمد عبد الباسط
    الاخ العزيز / عبد الرحمن علي حسن
    السلام عليكم ورحمة الله وبركاته


    كتبت الاخت / ملاذ حسين الاتي
    1/ رندكه /فلنكه / جلك / عضه / موبايل / يا حسس / كسير الثلج / البشوشو ده
    ( فسر لنا هذه الكلمات مع خالص الشكر )
    *هل الجيل الحالي من ابناء رفاعه داخل وخارج الوطن يطورون مدينتهم 0
    * الجيل الحالي وغيرهم من أبناء رفاعه في الغربه ماسكين قوي علي أموالهم
    ولا يشاركون في ابسط الاشياء مثل دفع اشتراكاتهم في الجمعيات هل توافقني0
    * ماذا تعني أني اسمع جعجعه ولا أري طحينا 0
    * لو خيرت في السكن في السودان هل تختار عطبره أم رفاعه ولماذا 0
    والي اللقاء في اسئله اخري .

    [GRADE="00008B FF6347 008000 4B0082"]العزيز أسامة .. زعيم الابطال
    الشكر بعد الله لهذا الملتقى الذى اتاح لنا الالتقاء والتعرف على كل الاخوان أهل و محبى رفاعة .. واتمنى الا يمثل فارق السن حاجزا يحول بين تواصلنا .. فى كل الاوقات .. حول كل المواضيع .. وبمساحة كافية لاستيعاب الرأى و الرأى الاخر وبدون زعل !!
    اتابع بانتظام مداخلاتك .. وخصوصا مشاكساتك الرياضية مع "الود صبرى" ..كنت بالامس فى الرياض .. وكان فى تخطيطى أن أفاجئكم يوم الجمعة فى التمرين .. ولكن ارتباطى باجتماع فى جدة ظهر الخميس أضاع علىّ هذه السانحة وخيرها فى غيرها انشاء الله ..
    نرجع للاسئلة ..
    الراندوك هو ما يطلق على هذه اللهجة المنتشرة فى السودان فى كل الاوساط .. واحاول فهم المعانى – أرجع لبوست الجلك الداقس – لتحسين مستوى التواصل مع الاخرين وحتى لا أكون داقس !!
    الفلنكة و الشرتيت ديل الخموس .. القروش ، الجلك مقصود بيها الزول الكبير (العجوز) ، العضة يقصد بيها الاكل .. يا حسس و يا فردة ديل زى يا ابوالصحب كدة .. وكسير التلج يمكن يكون امور استهبال واستكرات .. البشو شو دى جاية من الشوى يعنى البحرق .. وكدة .. وانا وراهم وراهم .. و حاتعلمها حاتعلمها .. بس يبعدوا لينا من كلام ناس عاصم ونولا وكمان الموناليزا .. دا عايز ليه مترجم عديييييييييل ..
    بالمناسبة الزولة الموناليزا دى مشت وين ؟؟ قنطرتنا فى الكرسى الساخن دا وشتت !! حرّقنا وعطرابتنا ضربت ولا عليها !!!

    ندخل فى الكلام الجد وبدون زعل ..
    فى البدء .. لست فى مقام الحكم على الجيل الحالى ولا الماضى من ابناء رفاعة .. لكن بمرق النصيحة !!
    مشكلة كل السودان .. مش رفاعة بس .. اننا شعب كثير الكلام قليل العمل (ودى تفسير اسمع جعجعة و لا أرى طحنا) .. واحسن من نجيد البكاء على الاطلال ونعيش على ماضى الذكريات .. فى كل المجالات سياسية او اقتصادية او فنية .. و حتى الرياضية ...
    بالله كدة خلونا نرجع للصور النزلها الصادق و كلها تاريخها 2006 !! هل هناك فرق اذا كانت بدون تاريخ ؟؟ 1956 تفرق؟؟ 2026 حتفرق؟؟ وبرضة تقول لى تطوير ..
    اذا لم أستطع أن أطور ما أملك وما هو فى دائرة مسئولياتى المباشرة والذى قرار تطويره بيدى .. فكيف تتوقع منى حتى المساهمة فى تطوير غيرى .. حيى .. مدينتى .. بلدى ؟؟
    الكبرى .. المستشفى .. الطرق .. المدارس .. صحة البيئة ...الخ .. هذا واجب الدولة .. الولاية .. المحلية .. الجهات التى تمثل المواطنين .. تنازليا وتصاعديا .. لقد فشل اهل رفاعة ومن شابههم فى مدن اخرى .. فيما نجح فيه غيرهم من مدن عرفت كيف تقتلع ولو القليل لاصلاح حالها .. وتركوا لنا الشكوى والخيبة التى حاولنا مداراتها بكذبة كبيرة .. خلقناها و صدقناها .. رفاعة معارضة !! رفاعة تفتقد القيادات .. وحدة الصف .. وضوح الرؤيا والاهداف ..
    دعونا ننجح اولا فى اطفاء الحرائق الصغيرة .. زى حافز الجراح .. وصيانة وتشغيل ما هو موجود من مدارس و جوامع وانارة ومكافحة بعوض و.. و... وبعدين نتكلم عن التطوير .. ودايما نتذكر ..لن يغير الله ما بقوم حتى يغيروا ما بانفسهم .. وأن التغيير يبدأ بانفسنا أولا ..

    اولاد رفاعة فى الغربة .. ماسكين قوى فى اموالهم ؟؟ هى فى اموال يا حبة !! العندو وماسك قوى ده ما بيكون باااااااااين .. ولازم يفك فى حتة تانية .. يعنى بتظهر بتظهر !! أنا عندى ليها منظور تانى .. المسالة قناعات و اولويات .. أذا انت مؤمن بالقضية .. والله الاشتراك – وهو شن الاشتراك .. ياها الطرادة دى؟ - تقطعوا من لحمك (من حنانك فى رواية اخرى) وما لازم متحصل .. تجى براك تكوس محل الدفع !! بس زى ما قال معتصم سليمان نلاقى الجادين وين ؟؟!!..اسفى عليك جمعية الدمام .. وحفظ الله جمعية الرياض ..ويسر لنا أمر جمعية جدة ..
    عارف يا اسامة .. المسألة عاوزة شوية يقين ..1) المال مال الله وانت مستخلف فيه ..2) و ما تنفقوا من خير .. فإن الله يخلفه .. طيب بتجننوا مالكم .. وتتجابنوا؟ بس جربوها .. و ما حتخلوها !!

    لو خيرت .. اسكن وين ..
    عطبرة لم يبق لنا فيها غير منزل وقبر الوالد عليه رحمة الله وابناء عمى النور وصديق الطيب حسن وأخوال أبى بقرية دارمالى حوالى 12 كيلومتر شمال عطبرة .. ولا أظن أنها ستكون خيارا مناسبا ..
    رفاعة .. يا كل الهوى .. خميس وجمعة .. اجازات .. مناسبات .. تمام التمام .. اقامة دائمة .. يمكن جنب الوالدة لو ما قرضنا قبل ما نرجع !!
    نحذف اجابتين؟؟ ما فى خيارات تانية ؟؟

    لك الود اسامة .. و سامحونا اذا الكلام ما اتبلع ليكم ..[/GRADE]
    عبدالرحمن على حسن

    رأيك صواب يقبل الخطأ ... ورأيي خطأ يقبل الصواب


المواضيع المتشابهه

  1. الأستاذ ابو النيييييز يجلس على الكرسي الساخن
    بواسطة الموناليزا.. في المنتدى مكتبة الكرسي الساخن والمكاشفات
    مشاركات: 189
    آخر مشاركة: 01-27-2013, 10:01 AM
  2. الأستاذة ملاذ حسين خوجلي تجلس على الكرسي الساخن
    بواسطة نادر الداني في المنتدى مكتبة الكرسي الساخن والمكاشفات
    مشاركات: 138
    آخر مشاركة: 07-29-2010, 01:28 PM
  3. الأستاذ معتصم سليمان ضيفاً على الكرسي الساخن
    بواسطة الموناليزا.. في المنتدى مكتبة الكرسي الساخن والمكاشفات
    مشاركات: 203
    آخر مشاركة: 04-12-2007, 11:08 AM
  4. الأستاذ أحمد عبدالقادر حجازي ضيفاً على الكرسي الساخن
    بواسطة الموناليزا.. في المنتدى مكتبة الكرسي الساخن والمكاشفات
    مشاركات: 96
    آخر مشاركة: 03-03-2007, 08:45 AM
  5. الاستاذ هاشم الكرور ... يجلس علي الكرسي الساخن
    بواسطة Nola في المنتدى مكتبة الكرسي الساخن والمكاشفات
    مشاركات: 96
    آخر مشاركة: 07-12-2006, 05:13 PM

ضوابط المشاركة

  • لا تستطيع إضافة مواضيع جديدة
  • لا تستطيع الرد على المواضيع
  • لا تستطيع إرفاق ملفات
  • لا تستطيع تعديل مشاركاتك
  •  
الساعة الآن 10:18 AM
Powered by vBulletin® Version 4.2.3
Copyright © 2019 vBulletin Solutions, Inc. All rights reserved.
Translate By Almuhajir
المواضيع والمشاركات في منتديات رفاعة للجميع تعبر عن رؤية كاتبيها
vBulletin Skin By: PurevB.com