فريد دة زول صاحبى شديد من ايام الثانوية وهو اكبر منى بسنين عددا لانو طلع من المدرسة كم سنة وجا راجع تانى قرا معانا وهو فعلا يشبه هذا الاسم لانو فريد فى كل شئ عندو طباع وخصائص فريدة عشان كدة انا صاحبو الوحيد القادر على فهمو وقادر اتعايش معاهو لانو اى زول بصاحبو بطفش منو وهو زول غير جادى نهائي فى حياتو واى حاجة بياخدا ببساطة وهظار يعنى ممكن يكون طالع الجامعة فى الخرطوم يلقى واحد ماشى بحرى طوالى بغير اتجاهو ويمشى معاهو وينسى موضوع الجامعة ومرات يلقى الناس يتناقشو فى مشكلة طوالى يخش شمال بى حاجة ما عندها علاقة بالموضوع مع انو هو عامل فيها حلال مشاكل لكن دايما مشاتر.
وهو زول بحب القصص الرومانسية وكان بيتمنى يتعرف على بت يعيش معاها حياة رومانسية وحبكانيات وحدائق واعياد ميلاد ومن كافتيريا لى كافتريا لكنه زول خجول وكبكابة قدام البنات مرة قابلتو بت سمحة فى الاستاد سألتو من مواصلات جامعة الخرطوم قاليها اركبى مواصلات الثورة بالشنقيطى وانزلى المؤسسة شارع الجامعة عشان كدة مالقى طريقة يتعرف على بت الا بالفيس عمل ليهو صفحة باسم فريد عصرو وخلفية صورة رونالدو وشغال ليل نهار فى الفيس طلبات صداقة لاى بت اسمها سمح او خاتا صورة سمحة لى ممثلة او فنانة او مذيعة اصدقاهو اغلبهم بنات وشغال دردشات وكضب مع البنات..المهم صادق ليهو بت اسمها زهرة الريحان وخاتا خلفية ممثلة تركية ماسكة ليها زهرة وانا طبعا اول مرة اعرف انو الريحان عندو زهرة عشان كدة من اسمها دة ما عجبتنى لكن صاحبى فريد منداح معاها حب تقيل وكل مرة يورينى دردشتا كلام غزل وزهور وقلوب تنبض.ولسؤ حظو يوم طلبت منو يرسل ليها صورتو لانها مشتاقة لى شوفة حبيب الروح لكن هو ضاربو الشيب حتى الشنب بقى ابيض وهو عامل ليها انو لسة فى ريعان شبابو صاحبى جانى مرتبك من الهجمة المرتدة الجاتو دى قلت ليهو اطمئن وديتو الصالون ظبطت ليهو حلاقة ومشينا شارع النيل صورتو كم صورة جوة الموية ووسط الزهور وصورة فوق كبرى المك نمر والخلفية برج الفاتح دى عجبتو شديد وقرر يرسلا لى حبيبة العمر خش عليها فى الماسنجر وقاليها امسكى اعصابك الصورة جاياك وطوالى عمل ارسال للصورة بعد شوية جاهو الرد باي باي يا عمو يا غشاش طوالى سريع رسل ليها صورة ود اختو صغير قاليها دى صورتى الاولى ديك صورة خالى جاتك بالغلط واتلفت على قالى معقولة انا كبرت للدرجة دى؟؟ قلت ليهو انت لسة فى ريعان شبابك بس زولتك دى عندها ضعف نظر وانا خايفا تكون خالتو وقطرا فات وغنايا مات..قالى دى لسة صغيرة وجاهلة من صوتا.قلت ليهو خلاص اطلب منها صورة عشان نشوف تاجوج زمانا لكنها بدت تعتزر باعزار غير منطقية وزاغت نهائي قلت ليهو خلاص اطلب تلاقيها بكرة.قال لى لكن ود اختى الرسلت ليها صورتو سافر السعودية كدة حاتعرفنى غشاش. قلت ليهو بلقى ليك مخرج بعد تلاقيها.طوالى رسل ليها طلب انو عايز يلاقيها بكرة لانو مشتاق شديد يشوفا ويعزما طوالى هى ما صدقت وافقت طوالى ورسلت كم بسمة وزهرة وقلب واتفق معاها يلاقيها فى عفراء مول جنب الركشات وطلب منها تلبس احلى لبسة وتشيل معاها حاجة علامة عشان يعرفا بيها قالت ليهو عندى عباية خليجية مزركشة حلوة وطرحة زيتية وبشيل فى يدى قصبة سكر عشان اكون ظاهرة وتعرفنى...يا جماعة دى رومانسية شنو البتشيل ليها قصبة سكر لى لقاء رومانسي دى شكلها شغالة فى الحواشات الله يستر من شكلها وصاحبى قاليها انا بلبس بنظلون بيجى وتيشيرت اسود ونظارة شمسية وهو اصلا ما عندو تيشيرت اسود لكن قالى دة تمويه وكدة ههههههه..نام وهو يردد ويدندن: يا يوم بكرة ما تسرع تخفف لى نار وجدى..صحيت الصباح بدرى لقيت فريد عمل العصير والشاى فى النار وهو مبسوط يغنى: الغريبة الساعة جنبك تبدو اقصر من دقيقة والدقيقة وانت مافى مره ما بنقدر نطيقا ترررن ترررن ..
مر الوقت بطئ جدا وصاحبى مقلق ومتوتر طمنتو قلت ليهو هدئ اعصابك الموضوع ما بحتاج الكبكبة دى لازم تخليك زول ريلاكس ..رسلت ليهو قالت ليهو انا فى المواصلات ماشة على عفراء قالى يلا نمشى ننتظرا هناك قلت ليهو بطل الشفقة وخليك تقيل بعد نص ساعة دورنا العربية وفى الشارع شغال معاها دردشة وهى وصلت قبلينا لما نحن وصلنا بركنت العربية بعيد وقلت ليهو خليك فى العربية وأوعك تقوليها وصلنا قوليها فى زحمة الشارع امشى انا استكشف ليك الوضع خشيت فى الزحمة وسط الركشات شايف لى كوم قشر قصب سكر قلت بكون فى مكنة عصيرقصب سكر هنا لما قربت القى ليك واحدة لابسة عباية خليجية وطرحة زيتية وجنبها كليقة قصب سكر وشغالة كرم كرم وماسكا الجلاكسى تدردش وتتبسم اتاكدت تب دى زولة صاحبى زاتا بشحمها ولحمها يعنى لو ما قربت منها من بعيد بتقول دى ركشة جيت سريع لى صاحبى قلت ليهو امشى شوف زهرة الفريزيان الهولندية فى الحواشة جنب الركشة الخدراء ديك وقلت ليهو امسك اعصابك انا بنتظرك فى العربية عليك امان الله زولى بعد شوية جا جارى وخاشى توش العربية انا قلت ساكنو ناس الالزامية نفسو قايم وقالى يلا سريييع رجعنا البيت وطوالى قفل التلفون قلت ليهو اها زهرة الريحان لقيتا كيف؟؟ قالى دى لعوتة كتر ياخى ..بعد وصلنا البيت بى ساعة كدة قلت ليهو افتح التلفون انشوف زهرة الخليج عاملا شنو..بس مع فتحت التلفون كدة طوالى اتصلت قالت ليهو دى عملة تعملا يا فريد شارينى ساعتين؟؟ قاليها يا بت الناس انا ما فريد انا خالو فريد جاتو اقامة ومات السعودية الله يرحمو وطوالى قفل الصفحة وطلق الفيس.
تحياتى أبو منة