لصغيرة شجيرة الأراك
ياقمر عشرة الفي سماك
شاغلة روحي وقلبي المعاك
وين لقيتك لامن آباك
القمر بوبا عليك تقيل
الصغيرون الما كبير
الرقيبة قزازة عصير
السنون براقن يشيل
العيون متل الفناجيل
مابتحش قش التناقير
مابتشيل جردل على الزير
الزراق فوقا تقول حرير
شتتي الشبال يا أم ضمير
خلي قلوب الصبيان تطير
انتي ريحتك دمور فرير
ولا بت السودان اصيل
القمر بوبا عليك تقيل
القديما قديما الحمام
الويزيزين في موجو عام
ياما رايقه قليلة كلام
واااحلاتا تقول السلام
يا قمر بوبا عليك تقيل
الغزال الفوق في السلم
المحبة تزيد الألم
كل يوم اصبحلي في هم
سيسبان عودك منظم
شمعدان نفسك يا ام ختم
البرتكان نهدك مدردم
القمر بوبا عليك تقيل
الجزيري ام بحرا حما
فيك روحي وحبي النما
مابسيبا ان بقا في السما
ما بخلي الناس تظلما
روحي في دربك سايما
يا غرق يا جيت حازمة
القمر بوبا عليك تقيل
الصغيرون ام الجنا
ياكريم ربي تسلما
تبعد الشر من حلتا
جنه للأم الولدتا
الفي جبل عرفات وضعتا
تسلم البطن الجابتا
دي ترباية حبوبتا
التميرة الفي سبيطتا
الصفار صابغ خضرتا
معزورة امها كان دستا
وااااهلاكي الناس شافتا
معذباني انا ود حلتا
القمر بوبا عليك تقيل
الدفيفيق الدابو ني
البسيمتو بتكويني كي
اهلو ضنو عليهو وعلي
حبك النساني والدي
ما بخليك إن بقيت حي
يا قصيبة السكر الني
نهدك الما رضع جني
ووب على امك ووبين علي
القمر بوبا عليك تقيل
الديوان الديمة مقشوش
بالزهور والورد معروش
بالحرير الأصلي مفروش
ريحتو مايقوما بلا رتوش
كان دا وصفو ماهو مغشوش
قدروا الساكنينو في الحوش
القمر بوبا عليك تقيل
بحر الدميرة العبا ونزل
مرة يسقي الفل والنخل
فيهو عام وزينا وقدل
يانى انا البيك عقلي انشغل
بعت روحي عشان ليك اصل
وانت ابعد لي من زحل
يا قمر بوبا عليك تقيل
المبارك شيخ الظهر
العليك ساسقت وفتر
قلي جنيت ولا دستر
واي أنا المرضان مكنتر
جابو لي حكيم خير وشر
قالي يا زول مرضك كتر
سببك ام شلاخاً خضر
القمر بوبا عليك تقيل