كمّين سنه
وشايلك أنا
حِسِّك مكحّل بالسكــــوت
رجْعـاً موسّــــم بالمُنى
لحناً معشعش في البيوت
بلحيل موهّط في الغُنا
كمّين سنه
شايلك أنا
ايقاع مقــــــــاديفو القلم
موعِد نِسيمه
و بوح صــــباح
نقّاع أماني علي العشم
مولِد بِسيمه
وانشـــــــراح
قوليلي ليه بحّ الهديل ؟
صحّى الاغاني على الندم
عِز الرياح النوح بديل
سايق قوافلي على الوهم
كمّين سنه
وساكنّي يا وجعي القديم
من كل مسام الاحتمال
حد ما اتاوق ضامّني
وفارد ذراعاتك ظـــــلال
ســـــــــــــــــاكنّي سيد
يا ريت اكون
آخــــــــــــــــــــــر العبيد
وانا يا بواقي الحيل مِداد
فوق تُربة الوجــع العنيد
قِصّـــة معـــــــــــــــــــاد
من كم سنه
ناديت عليكي
وقلتلِك
ادّيني مقدافـــــــك مهر
والليل مسافر في العروق
عدّيني عتمــــــور الفتر
لو حتى ما باين شـــــروق
يا وعد في خاطر المطر
والصيف يدافر في البروق
من كم سنه
وفيض إلتياع
طشّ الصـــــــــــــــــــدى
وما كان وداع
لمّن كتبت على المــــدى
ومن غير يراع
انا بس نزفت على الندى
كمّين سنه ..

قصيدتي ( كمّــــين سنه ) ..