النتائج 1 إلى 6 من 6
  1. #1
    رفاعي إمبراطور
    تاريخ التسجيل
    Jan 2007
    الدولة
    من ابناء مدينة رفاعة - فريق وسط
    المشاركات
    7,548
    معدل تقييم المستوى
    21

    افتراضي الزول دا لو طوَّل بيلحق برشلونة الغُتُس


    يا جماعة أنا و الله بشجع برشلونة دى من زمان يمكن واحدين

    منكم الزمن داك ما مولودين ... عشان فنايلهم زى فنايل

    الموردة و أن موردابى مدمن ... لامن جاهم الولد كلويفرت

    الهولندي إنعصرت عليهم تب لأنو ولد حريف شديد .. و خلقتو

    زاتا خلقة موردابى أصلى ... بزعل شديد لامن يغلبوها و بفرح

    شديد لامن تغلب .. و اســتمريت في تشجيعها أكتر و اكتر ..

    لامن رايكارد بقى مدربها و جاب نجم النجوم .. ميسى الحريف

    بقيت أداوم على حضور مبارياتها و أشترى بطاقات الجزيرة

    قبال الدوا زاتو ... و هي ماشة لى قدام ... وكت جابوا

    جوارديولا مدرب و الموردة نزلت من الممتاز في السودان

    بقيت مدمن برشلونة بس ... و كان الزمن الحلو مع جوارديولا

    و الكاسات المطر ... و أحسن فريق لعب كورة على ظهر الأرض ..

    بقى لعب برشلونة عندى كيف زى الشاي و الجبنة ... بعد فات

    جوارديولا و جا فيلانوفا الإمور كانت ماشة كويس ... لما الله

    أخدو و جا مساعدو أب راس ماكن داك .. برضو الإمور كانت

    ماشة .... إتسلطوا عليها الهتيفة و جابو مارتينو الله يطلِّع

    ميتينو بدل يدرب اللعيبة بقى يتفرج فيهم ... ما مصدق

    إن القدامو ديل ناس مسى و شافى و أنييستا و بيدرو ..

    كان قايلهم من كوكب تانى زى ما بقولوا .... خلى البرشا

    تتدحرج تتدحرج ... لا كورة سمحة لا نتيجة تصبرنا عليه ..

    راح في ستين لفة مُش كويسة و ارتحنا مـنّو ... قاموا

    جابوا الكابوس أبونضارة الحالي .... مشت معاهو كويس

    لما لاقى الحمام الميت في الأول ..... تمانية أسابيع

    ماشة معاهو ألسطا ... لامن جوهوا الجماعة الكانوا

    زمن جوراديولا و فيلانوفا زبايننا و نديهم بالتلاتة

    و الأربعة و الخمسة و الستة .... زولنا الجديد إنبرش

    واطة تب و سوَّا لينا قصة جاموس رقد ... الزباين

    نجمونا تمام لِعِب و غُلُب ... خلونى أشوت في

    الهوا و رجعونى أيام الخيش ... يا حليل الخيش

    و أيامو .... اليوم داك نوم ما في ... و ما عارف

    صلاح الجار بيكون عمل شـنو ما هو زيى بيشجع

    البارشا ... الله يكره أنريكى و الجابو يدرب البارشا ..

    أول أمس لاعبين مع سلتافيجو .. قلنا خلاص

    طالما البعاتى العضاض دا لاعب ... فالمباراة

    مضمونة ستة أو سبعة ... بقى لينا زى قصة

    عبد المعين الجابوهو يعين لقوهو بتعان .. فاهمين

    دى ... يعنى طلع ماسورة مصدية ... و السلتا

    رشت البارشا برضو و نحن طبعاً أكلنا هوا تااااااانى ..

    و الجايات حارااااااات ... و الزول دا العامل فيها

    الرجل الوطواط بى نظارتو الشينة دى لو طـوَّل

    مع البرشا بيلحِّقها الغُتُس و في ناس بتجيهم

    سكتة قلبية .... قولوا معاى الله يقلعو قلعة

    مسمار خشب بى كماشة سنينة ...

    و بس .. تصدقوا الطاهر حسيب الله يرحمو

    كان أحرف من بيليه و مارادونا و ميسى ؟؟

    ما تقولوا لى عمك دا ببالغ ساكت .. أنا

    شفتهم التلاتة بس إنتو ما شفتوا الطاهر

    رحمة الله تظللو في قبرو .. و الله لو كان في

    بلد أروبى أو غربى كان الناس هسع يقارنونهم

    بيهو ... بس نصيبو يكون سودانى ..

    و دى الأرزاق ....

  2. #2
    رفاعي عبقري الصورة الرمزية عبدالرحمن محمد احمد الطيب
    تاريخ التسجيل
    Mar 2006
    المشاركات
    2,654
    معدل تقييم المستوى
    16

    افتراضي

    حباب المامون ود المعتصم

    ربنا يسعدك و يفرحك دائماً مع اصحابك ناس برشلونه

    متعك الله بالصحة و العافية
    عبدالرحمن محمد احمدالطيب

  3. #3
    مشرف منتدى الصورة الرمزية شنبوو
    تاريخ التسجيل
    Sep 2006
    المشاركات
    3,611
    مقالات المدونة
    1
    معدل تقييم المستوى
    17

    افتراضي

    الأستاذ مأمون معتصم ،، سلام واحترام
    وترحيب كبير بيك وبتواجدك في المنتدى الرياضي وياريت تكون طوالي معانا
    برشلونة الايام دي لا تسر لا عدو ولا حبيب .. ويوم غد 5/11/2014م عندها
    مباراة غاية في الأهمية للاعبين وللمدرب (ابو نظارات) لو خسرتها لا أعتقد
    انه سيستمر وهي مباراة في دوري الأبطال أمام أياكس امستردام
    تخريمة
    انا لأني بشجع ريال مدريد اتمنى ان تنتصر برشلونة ليستمر المدرب لويس انريكي
    ليضمن الريــال نقاط الاياب في الدوري

    نقره لتكبير أو تصغير الصورة ونقرتين لعرض الصورة في صفحة مستقلة بحجمها الطبيعينقره لتكبير أو تصغير الصورة ونقرتين لعرض الصورة في صفحة مستقلة بحجمها الطبيعي
    [motr][ليت الذي بيني وبينك عامر **** وبيني وبين العالمين خراب
    إذا صح منك الود فالكل هين **** وكل الذي فوق التراب تراب][/motr]

  4. #4
    رفاعي إمبراطور
    تاريخ التسجيل
    Jan 2007
    الدولة
    من ابناء مدينة رفاعة - فريق وسط
    المشاركات
    7,548
    معدل تقييم المستوى
    21

    افتراضي

    اقتباس المشاركة الأصلية كتبت بواسطة عبدالرحمن محمد احمد الطيب مشاهدة المشاركة
    حباب المامون ود المعتصم

    ربنا يسعدك و يفرحك دائماً مع اصحابك ناس برشلونه

    متعك الله بالصحة و العافية

    هلا هلا و الله حبابك مليار / الخليفة عبدالرحمن

    سلامى و أشـواقى

    هههههها مشكور كتير على الدعاء الطيب

    ربنا يفرحنا و إياكم و جميع المسلمين بدخول

    الجنة إن شاء الله ...

    و إنت كمان يا خليفة يمتعك بالصحة و العافية

    المال الكتير ...

  5. #5
    رفاعي إمبراطور
    تاريخ التسجيل
    Jan 2007
    الدولة
    من ابناء مدينة رفاعة - فريق وسط
    المشاركات
    7,548
    معدل تقييم المستوى
    21

    افتراضي

    اقتباس المشاركة الأصلية كتبت بواسطة شنبوو مشاهدة المشاركة
    الأستاذ مأمون معتصم ،، سلام واحترام
    وترحيب كبير بيك وبتواجدك في المنتدى الرياضي وياريت تكون طوالي معانا
    برشلونة الايام دي لا تسر لا عدو ولا حبيب .. ويوم غد 5/11/2014م عندها
    مباراة غاية في الأهمية للاعبين وللمدرب (ابو نظارات) لو خسرتها لا أعتقد
    انه سيستمر وهي مباراة في دوري الأبطال أمام أياكس امستردام
    تخريمة
    انا لأني بشجع ريال مدريد اتمنى ان تنتصر برشلونة ليستمر المدرب لويس انريكي
    ليضمن الريــال نقاط الاياب في الدوري

    نقره لتكبير أو تصغير الصورة ونقرتين لعرض الصورة في صفحة مستقلة بحجمها الطبيعينقره لتكبير أو تصغير الصورة ونقرتين لعرض الصورة في صفحة مستقلة بحجمها الطبيعي

    إبن الأخ الكريم / شـنبو

    ســلامى و إحـترام و شكرى الجزيل على ترحيبك بشخصى

    الضعيف في منتداك العامر ... و أبشــر إن شـاء الله معاك

    من هسع ... كمان شكراً ليك على المؤاساة الطريفة ..

    و إن شاء الله الريال زاتو كمان يتعشكب كدا عشان نتسدى

    حقنا فيهو ... هههههها ... و بعدين دى فورة صابون ساكت

    هسع بيجى شهر فبراير و جماعتكم ديل كل واحد بيكون

    قابض في كراعو زى كل سنة ... و نحن نجيكم معشقين

    بى نمرة خمسة ... ههههههه ...

    و عارف يا شنبو .. إنتو الديامة ديل من زمن العامل و النهر

    و التاكا و الشعلة ... واقفين في الناحية التانية المقابلانى ...

    هههههههه ... كنت مجنن ليك ناس النهر جـن ... بس ناس

    الشعلة محظوظين لأنى ما طولت مع التاكا ... و لو ما

    جات الرياضة الجماهيرية ... كنت برضو جننت الهلال ...

    هههههها ...

    تحياتى الطيبات ...

  6. #6
    مشرف منتدى الصورة الرمزية شنبوو
    تاريخ التسجيل
    Sep 2006
    المشاركات
    3,611
    مقالات المدونة
    1
    معدل تقييم المستوى
    17

    افتراضي

    اقتباس المشاركة الأصلية كتبت بواسطة شنبوو مشاهدة المشاركة
    مباراة غاية في الأهمية للاعبين وللمدرب (ابو نظارات) لو خسرتها لا أعتقد
    انه سيستمر وهي مباراة في دوري الأبطال أمام أياكس امستردام
    تخريمة
    انا لأني بشجع ريال مدريد اتمنى ان تنتصر برشلونة ليستمر المدرب لويس انريكي
    ليضمن الريــال نقاط الاياب في الدوري

    نقره لتكبير أو تصغير الصورة ونقرتين لعرض الصورة في صفحة مستقلة بحجمها الطبيعينقره لتكبير أو تصغير الصورة ونقرتين لعرض الصورة في صفحة مستقلة بحجمها الطبيعي
    الحمد لله انتصرت برشلونة وبكده المدرب ( أبو نظارات) ح يستمر لفترة اتوقع خلالها
    هزيمة اخرى في الليقا قبل ما يجي الريال ويطبق الحنة
    نقره لتكبير أو تصغير الصورة ونقرتين لعرض الصورة في صفحة مستقلة بحجمها الطبيعي
    [motr][ليت الذي بيني وبينك عامر **** وبيني وبين العالمين خراب
    إذا صح منك الود فالكل هين **** وكل الذي فوق التراب تراب][/motr]


ضوابط المشاركة

  • لا تستطيع إضافة مواضيع جديدة
  • لا تستطيع الرد على المواضيع
  • لا تستطيع إرفاق ملفات
  • لا تستطيع تعديل مشاركاتك
  •  
الساعة الآن 03:14 AM
Powered by vBulletin® Version 4.2.3
Copyright © 2020 vBulletin Solutions, Inc. All rights reserved.
Translate By Almuhajir
المواضيع والمشاركات في منتديات رفاعة للجميع تعبر عن رؤية كاتبيها
vBulletin Skin By: PurevB.com