النص ليس رثاء لمحجوب شريف بقدر ما هو احتفاء به .....
النص مهداء لكل من يشاركني الحب والوفاء والولاء لمحجوب شريف ..
................
رابط تحميل الصوت : http://www.m5zn.com/d/?15376061
النص :
....................
كده يعني تمشي برا وداع
تستكر احضانك علي
لا يزورني طيفك في الخيال
لا تجيني في الخاطر حلم
مالك بتديني الشمس
وضليلك اوسع من وطن
وات من متين
يا ابويا ما بتقيف معاي
ما كل ما احتاجك بشر
ات ليهو كت اامن حصن
والليله جاي اونسك
بي حالي واحوال البلد
ينهال علي نبل الفراق
وتيتم ا ابوي ملتك
شن ورتك
هادي القبور
او اغرتك
بي ياتو نور
او يمكن اتذكرت انك زينا
وايقنت كونك ما ملاك
قررت تزعل مننا
يا ابوي عليك هادي البلاد
والله وكل الانبياء
بس اعفي لي
شان ما قدرت احصلك
واهديك هادي الروح فداء
ياخ قوم كفاك
طيبت هادي الارض لامن بتقت
ودع ثراك
وامرق علي
داير اقولك جملتين
قول كلمتين
او ياخي افرح بي لقاك
قام في ثبات
بعد التبسم والهظار
اوحالي قال
الليل قميصو وبقجتو
النيل بواقي محنتو
المحنانه في سيل الشتر
يلولا في قول الشعر
لسنات عجم
ابكم يدافس في الكلام
انضف حروف
جات طالعه من بطن الجعان
اه يا زمان
اخر مصلينك كفر
كل الحكاوي اتفرطقت
زي طلقه في خاطر محب
راح لي الدرب
لاح ليهو في الافق العجب
منظر خوازيقنا الشفوت
يتسالمو ويتصالحو
ويتبايعو ف اول ملف
واحد حلف
قام داك هتف
ونحن النعاني من القرف
ما الصبر اكسير التمتع بالحياه
بالرغم من وافر الهلاك
والموت زوال الامنيات
ان شق صدر النيل ملاك
ما ضرا غير ردحي السلاح
فوق لي صدور العاشقين
والخائنين
في اقصي ساحات البذخ
يا من تراني ولا اراك
شاخت حروف الحق
وطاب ليها المنام
صنت طبول العزه
في قلب الهواك
كل الهتافات زي بعض
حتي الهتاف الاصطفاك
خاوي الوفاض
ما فيهو شئ من محتواك
كفر الذين يثلثون الحق
يمتهنون تأويل الحراك
يا من اراك
فيما يسمي غريب فكر
انا ماشي لي الله وبراي
اما المعاي
بيناتنا حب ومعزه دين
طوبي لنا
والاخرين
طوبي لهم
بي فكرهم
وانا بيني بين المولي عهد
كل ما عصيتو يمد لي
واهو كل يوم بتدلي لي
يستني كان يسمع دعاي
الكفر في هذي المدينه
قول حق في وجوه الظالمين
نحن الرعاع
نؤمر نطيع
خارج حدود المستطاع
وهم الملوك
قولهم مطاع
نظرهم دفاع
اما عن الواقع عليك
بنات افكارم الفاسدات
بمارسن في العهرعلنا
جزاهن خير
وكت حملن
حلمت انا
وقفت سنه
علي باب الله مستنيو
يأذن لي اكالمك
ونتواعد
علي ما اسلفت شفتاك
وخط بنان ضميرك حق
ح نبنيهو
مجرد من فسق قابيل
معتق بي طهر يوسف
مدوزن بي نغم قران
صوت اذان وتقابه
نوبه وكم جرس كنسي
ح نبنيهو
ونحارب بيك ات تيهو
فيا المحجوب
اما بلغك عن الخرطوم
وقت طلانا ابريل جاء
عن اليوم الفقدنا جلل
بدل نفرح قلبنا عزاء
عزانا صمود ضميرك
لامن فضيت سريرك
واياك يا ابوي تتجرس
دي الناس الجات تبكيكا
قد ضاق الوضع عليها
ودموعا النزلت فيكا
نزلت من شوقا وتيها
من لهفة روحا عليكا
الوجعه مستفه بيها
يا زول وحياة عينيكا
عدمت حياتنا الجيهه
مالك صنيت يا والد
شفقت قلوب بالفيها
لساي يا ابوي بهواكا
غير دربك ما لي جيهه
الفرحه دوام فحواكا
وحياتك قايمه عليها
محجوب الفرحه الكامله
الدنيا هي بيك مليحه
صن واستمع
يا معشر الباكين حزن
لو نفخة الصور البكر
بعديها عزرائيل بموت
انتو المبكيكم شنو
نعم الرحيل
والمستحيل
يرحل كلامو الي الابد
هذا البلد
ما ضر واليو من لبد
بل ضل واديو في لبد
اصدق ولد
ما حاد عن الدرب ورجع
ما عاق
ولا سراق
انبل عشق
كان داخرو للشعب البطل
كل الامل
يا ريت نكون زي ما هو كان
في بورسودان
او حين تطوبر
جوه كوبر
بابتسامه وروح رضيه
ندي اعدانا المحبه
نبسط اليدين تسامح
ننكر الذات والقبيله
وندي هادا الشعب حقو
علي طريقو
نقطع لكن
لا حد السيف
ولا بالسكين
حبرا ضواي
يهدي التايهين
يفتح نفاج
بين الاديان
نرسمبو ستار
للخلق الشين
ماني الحداث
الما سواي
لكنو الذوق
معني الانسان
كلنا من طين
يا زيزو اخوي
براء وعمار
بي نفس الدين
يا فتحي كفاك
وكفانا انين
محجوب يا حر
ح نظل
واقفين
كما شئت
علي بابك
نتاوق كان نشوف سرك
ونتشابي
بنتشابه
علي بابك
كتار لا حول لا قدره
علي بابك
خلق متفائله بي بكره
علي بابك
في ناس تتسول الشهره
رخاص انفس
وقوتم من دماء الاموات
شليل ما فات
يا مصطفي
من تلك الاراضي سلام
ابوك قدام
بمهد لينا في الطرقات
قسم قد مات
ولكن حي
بما اورثنا من اخلاق
اذا لا بد
نحاكي الافعي
في مليص جلود الذات
مريم جات
ومي بهناك
مع حميد
وماما اميره في المطبخ
جابت الشاي
وماني براي
هداك نبيل
بونس في حبيبتو عصر
عن المشروع وخوتنا
قناعتنا
وانا الممكون
قدر ما انوم
بشوفك يا ابوي تضحك
مع الطيبين
ده ما كان شوق
ورغم حزنا واشواقنا
بنفرح بيك يا يابا
وخليك ديمه مطامن
بانو عشمنا في باكر
يكون اجمل
وراح نعمل
مطامينك
نغرد في ميادينك
ورغم سذاجة العاطفه
عقولنا بتواصل طريقك
ننور دروب الغلابه
وننفي الضلام بي بريقك
مهذب عرفتك
وطيب بأصلك
فعش ما تشاء
في قلب البحبك
لانك لوحدك
كسبت الحبايب
وحتي الدبايب
وقوفا في صفك
اخيرا بقولك
وداعا عظيما
وشكرا جميلا
علي ما تركت
ومعاك السلامه