دارفور بين سندان الحكومة ومطرقة التدخل الأجنبي

[أمير عمر]

تجدني اقف في حيرة بين تأييد أو معارضة التدخل الأجنبي في بلادنا. فما افرزته قضية العراق إنما ينم عن جهل تام للحكومات الغربية عن واقعنا العربي. وكما يقال "العاقل من إتعظ بغيره". ونحن اليوم شهود ٌ على ما قدمه التدخل الأجنبي للعراق - بالعربي كده جا يكحلا عماها -.
الحكومة السودانية رغم تخبطها وإختلاقها لهذه القضية ترى أن التدخل الأجنبي له مآرب اُخرى وهو النفط السوداني التي حُرمت أمريكا من التنقيب عنه بعد أن أدمت شركة شيفرون الأمريكية السودان واستنزفت موارده "باحتلال سلمي" تحت مسمى التنقيب عن النفط. أما المعارضة السودانية اللاهثة وراء السلطة -لأغراض شخصيا لا علاقة للسودان وشعبه المغلوب على أمره بها- فقد إرتأت التدخل الأجنبي حلاً لهذه القضية الشائكة وتبجحت السيدة مريم الصادق المهدي أن المسيرات التي هزت جنبات الخرطوم ما هي إلا حثالة من تبعات النظام في محاولة لعكس صورة مضللة للشعب السوداني "المُرحِبْ" بالتدخل الأجنبي.

افيدونا يا أصحاب العقول ... والله الواحد محتار.

ودمتم

[Abdo Osman]

اولا :
التدخل الاجنبى لا ثم لا بل 1000 لا ..
اما قول بت الصادق هى لا تفقه شيئا فى السياسة
واذا كان ابوها الولدها لا يعرف .. لاسيما وانه جلس على رئاسة الوزراء ثلاث مرات لم يحافظ عليها
وبعد ما تعدى 75 برضك جارى ورى المال والجاه والسلطة
شوف اولاد البيتيين ديل
لا بيحلوا ولا بيربطو
كان ال المهدى او ال الميرغنى ديل لو شافو ليهم حاجة تانى كان احسن
انا بقولها بكل صدق
حكومة الانقاذ احسن السيئيين
وربك من وراء القصد

[عبدالرحمن على حسن]

أمير .. المحتار !!
أراك تتكلم عن التدخل الاجنبى .. كأنه شئ سيحدث مستقبلا .. وهو واقع قد حصل فعلا !!
قوات الامم المتحدة (عشرة الاف) حسب بنود اتفاقية السلام .. وقوات الاتحاد الافريقى (سبعة الاف ونص) .. ويان برونك .. ومش عارف مين عاشور .. والسبحة جارة .. وتقول لى مسيرات غضب واحتجاج .. نحتج على شنو بعد ما الفاس وقع فى الراس ؟؟
الفرق شنو بين جندى امم متحدة من يوغسلافيا أو نيبال أو الهند .. وجندى اتحاد افريقى من بوروندى او النيجر أو حتى مصر .. ما كلهم اجانب ..
وبعدين .. الوصلنا للحتة دى منو .. الساسة والله العسكر ؟؟ وكلو محصل بعضو .. وحفر ايدك بيغرق ليك !!
تعرف يا أمير أحسن حاجة يرجعونا تانى قبل سنة ستة وخمسين .. وبدل التدخل الاجنبى .. يرجعوا الانجليز يحكمونا .. ويرجع السودان تسعة مديريات ومعاهم الادارة الاهلية .. ويرجع جنيهنا يساوى تلاتة دولار ونص .. ونرجع اكبر مصدر للقطن طويل التيلة .. وعندنا فايض فى الميزانية .. وحاجات كتيرة سمحة ...... ولو حاولوا يدونا استقلال "هبة" نقول ليهم تفوتوا وين .. تخلونا لى منو ؟؟ ناس الاحزاب البسلموها للعسكر .. والله العسكر البقلعوها من الاحزاب .. والله لى ناس الانقاذ خلطة الاحزاب والعسكر .. والكل يتعلم فينا الحلاقة !! ولما القصة تجوط معاهم .. هجم النمر .. هجم النمر !!
ياخى الهند القريت فيها دى .. ما كانوا الانجليز مستعمرنها وطلعوا منها .. زينا يعنى !! طيب ليه عندهم احسن ديموقراطية ونظام حكم .. وفايتننا كتير اقتصاديا ؟؟ خلاص .. نقول للانجليز ما تفوتوا لحد ما نبقى هنود !! أو لحد ما نتعلم نبقى هنود لو مستعجلين !!
ولو لسع محتار .. خليك فى مانشستر .. يمكن لما الانجليز يرجعوا .. يجيبوك معاهم !!!
لك العتبى ..

[حسين الامام]

السياسة لعبة قذرة أُساسها الكذب والضحك علي الدقون
فإن لم تكذب لم تكن سياسي بارع ، فكل يوم جديد نصبح
نجد الساسة الفي السلطة أوخارجها بموديلات جديدة من
الكذب والتضليل ،وما تصريحات شيخ الجبهجية ببعيد.
حبل الكذب قصير ،الفي السلطة لازم يكذب عشان يحافظ
علي كرسي السلطة وخارجها يكذب عشان يدخل السلطة
والضحية الشعب المقلوب على أمره .فلايهم من في المعارضة
أن تكون هنالك قوات دولية في غرب السودان فهم مع وجود القوات
الأجنبية فاذا سألتهم لماذا تؤيدون وجودها في السودان ؟الإجابة
طبعاً جاهزة مواويل من التبريرات الكاذبة تجعل المتابع للأحداث
في حيرة من أمره.
وهو كذلك من في السلطة يعارض وجود قوات أجنبية والتبريرات جاهزه
أما المجتمع الدولي وعلى راسه أمريكا يؤيدون لشئ في نفس يعقوب.
نسأل الله أن يحفظ البلاد والعباد من كيد الكاذبين والمنافقين ومن شايعهم.

[أمير عمر]

أمير .. المحتار !!
أراك تتكلم عن التدخل الاجنبى .. كأنه شئ سيحدث مستقبلا .. وهو واقع قد حصل فعلا !!
قوات الامم المتحدة (عشرة الاف) حسب بنود اتفاقية السلام .. وقوات الاتحاد الافريقى (سبعة الاف ونص) .. ويان برونك .. ومش عارف مين عاشور .. والسبحة جارة .. وتقول لى مسيرات غضب واحتجاج .. نحتج على شنو بعد ما الفاس وقع فى الراس ؟؟
الفرق شنو بين جندى امم متحدة من يوغسلافيا أو نيبال أو الهند .. وجندى اتحاد افريقى من بوروندى او النيجر أو حتى مصر .. ما كلهم اجانب ..
وبعدين .. الوصلنا للحتة دى منو .. الساسة والله العسكر ؟؟ وكلو محصل بعضو .. وحفر ايدك بيغرق ليك !!
تعرف يا أمير أحسن حاجة يرجعونا تانى قبل سنة ستة وخمسين .. وبدل التدخل الاجنبى .. يرجعوا الانجليز يحكمونا .. ويرجع السودان تسعة مديريات ومعاهم الادارة الاهلية .. ويرجع جنيهنا يساوى تلاتة دولار ونص .. ونرجع اكبر مصدر للقطن طويل التيلة .. وعندنا فايض فى الميزانية .. وحاجات كتيرة سمحة ...... ولو حاولوا يدونا استقلال "هبة" نقول ليهم تفوتوا وين .. تخلونا لى منو ؟؟ ناس الاحزاب البسلموها للعسكر .. والله العسكر البقلعوها من الاحزاب .. والله لى ناس الانقاذ خلطة الاحزاب والعسكر .. والكل يتعلم فينا الحلاقة !! ولما القصة تجوط معاهم .. هجم النمر .. هجم النمر !!
ياخى الهند القريت فيها دى .. ما كانوا الانجليز مستعمرنها وطلعوا منها .. زينا يعنى !! طيب ليه عندهم احسن ديموقراطية ونظام حكم .. وفايتننا كتير اقتصاديا ؟؟ خلاص .. نقول للانجليز ما تفوتوا لحد ما نبقى هنود !! أو لحد ما نتعلم نبقى هنود لو مستعجلين !!
ولو لسع محتار .. خليك فى مانشستر .. يمكن لما الانجليز يرجعوا .. يجيبوك معاهم !!!
لك العتبى ..

عمي الفرده الما محتار
اولاً إنت فاكرني أحمد الجلبي عشان يجيبوني الإنجليز معاهم؟؟ ... ثم من قال لك أن الإنجليز عايزين يرجعوا ... الإنجليز قالوا إنحنا ما صدقنا على الله إتخارجنا.

ثانياً ... ساسة ولا عساكر دي ما المشكلة الرئيسية والنقاش في الحتة دي لن يخدم القضية. فالتفكير الحكيم أن نحل المشكلة أولاً وبعدين نتحاسب.

ثالثاً ... وده الأهم ... هناك فرق كبير بين قوات الإتحاد الأفريقي التي أتت بموافقة وتأييد الحكومة السودانية - والتي مهما إختلفنا معها فهي الحاكم الشرعي للسودان اليوم وهي التي يفترض بها أن توفر الحماية للسودان والسودانيين كحدٍ سواء ... فلو إنتزعنا منها ذلك الحق فلن يكون لنا الحق في محاسبتها (وعشان محاسبتها دي كبيرة علينا في السودان خلينا نقول لومها أو إنتقادها أو حتى معارضتها بصورة حضارية)- وبين قوات تريد الإدارة الأمريكية فرضها رغم انف الحكومة التي هي بمثابة ممثل عام للشعب السوداني.

عمي الفاضل ... هناك مشكله حقيقية تهدد وجودنا كدولة حرة ذات سيادة. في نظري المتواضع إن تواجد قوات اُممية في دارفور غصباً عن الحكومة السودانية مهما كانت درجة خلافنا أو إتفاقنا معها هو شرخ عميق لن يندمل أبداً لسيادتنا كدولة ... وصدقني وإن حدث ذلك -وانا متفائلاً بطبعي- فلن تقوم للسودان بعدها قائمة ...وقد يؤل السودان الى ما آلت إليه الصومال ولبنان ورواندا والكثير غيرهم.

قبل أن أضع قلمي دعني أهمس في أُذنك بسؤال هل نجح التدخل الأجنبي في حل أي قضية من قضايا العالم يوماً من الأيام؟ إن كان فعل فمرحباً ألف مرحب بالتدخل الأجنبي في أراضينا ... وإن كانت الإجابة بلا فلننظر ماذا نحن فاعلون.

لكم العتبي ولعمي عبدالرحمن كل التقدير والإحترام. ودمتم

[عبدالرحمن على حسن]

أمير .. الغالى ..
حاولت انو ما ارد !! لانو لى زمن حالف اتعاطى أى منغصات .. وخصوصا ما يتعلق بالسودان سياسيا !!
بعدين لقيتك محتار .. وحقك على اناصحك .. تقوم تجرجرنى فى الكلام؟؟ ما عليك .. التعليق بالاحمر وسط الكلام .. (ما مريخابى .. بس شغل مدرسين وكدة) .. وشوية على عمك .. نحنا لسع بتاعين ابو الزهور خرق الدستور !!!



عمي الفرده الما محتار
اولاً إنت فاكرني أحمد الجلبي عشان يجيبوني الإنجليز معاهم؟؟ ... ثم من قال لك أن الإنجليز عايزين يرجعوا ... الإنجليز قالوا إنحنا ما صدقنا على الله إتخارجنا.
ااااى هم ما عايزين يرجعوا .. لكن نحنا عاوزنهم .. وكان بالتحانيس ما جو .. بنبكى ليهم عدييييييييل !!
ثانياً ... ساسة ولا عساكر دي ما المشكلة الرئيسية والنقاش في الحتة دي لن يخدم القضية. فالتفكير الحكيم أن نحل المشكلة أولاً وبعدين نتحاسب.
يا ابوالشباب .. مهى دى المشكلة ذاتا .. ام المشاكل فى السودان .. الحكم وديمومة الكراسى ( ودى بالمناسبة ترجمة ديموكراسى ) .. والباقى دا كله توابع الزلزال ..أو بلغتكم يا ناس الطب والصيدلة .. المرض والاعراض !!
ثالثاً ... وده الأهم ... هناك فرق كبير بين قوات الإتحاد الأفريقي التي أتت بموافقة وتأييد الحكومة السودانية - والتي مهما إختلفنا معها فهي الحاكم الشرعي للسودان اليوم وهي التي يفترض بها أن توفر الحماية للسودان والسودانيين كحدٍ سواء ...
عليك الله انت بى صحك .. حكومة شنو البتوافق وبتأيد !! يا ابوى ديل ناس صفا وانتباه وللخلف دور .. شغالين بالتعليمات .. وكان ما مصدق .. ارجع لثوابت الانقاذ واحسب لى الفضل منها شنو !! وعاين ليهم من هسى عملوا خط رجعة .. ممكن نوافق على قوات دولية لكن بعد اتفاق السلام فى دارفور !!! وحتة الحاكم الشرعى للسودان فيها نظر !!
عمي الفاضل ... هناك مشكله حقيقية تهدد وجودنا كدولة حرة ذات سيادة. في نظري المتواضع إن تواجد قوات اُممية في دارفور غصباً عن الحكومة السودانية مهما كانت درجة خلافنا أو إتفاقنا معها هو شرخ عميق لن يندمل أبداً لسيادتنا كدولة ... وصدقني وإن حدث ذلك -وانا متفائلاً بطبعي- فلن تقوم للسودان بعدها قائمة ...وقد يؤل السودان الى ما آلت إليه الصومال ولبنان ورواندا والكثير غيرهم.
فى الحتة دى ما تشيل هم .. لأن الاتى لن يكون بأى حال اسوأ من الحاضر ..ونحنا حكاية سيادة دى نسيناها زماااااان .... ويا حليلك يا سيدى !!! ...

قبل أن أضع قلمي دعني أهمس في أُذنك بسؤال هل نجح التدخل الأجنبي في حل أي قضية من قضايا العالم يوماً من الأيام؟ إن كان فعل فمرحباً ألف مرحب بالتدخل الأجنبي في أراضينا ... وإن كانت الإجابة بلا فلننظر ماذا نحن فاعلون.
التدخل الاجنبى .. سياسيا أو عسكريا .. وباختلاف اهدافه ..نتاج لقصور أو فشل مننا فى حل مشاكلنا الداخلية .. وفى الاول قلت ليك .. حفر ايدك وبغرّق ليك !!

لكم العتبي ولعمي عبدالرحمن كل التقدير والإحترام. ودمتم[/SIZE][/FONT]

أمير الغالى .. الله يسامحك .. وان تنكش جرح ساس يسوس الذى كاد ان يندمل .. ومحنة الوطن الذى لم يعد عند شعبه ما يقدمه سوى ما بقلبه .. وهو اضعف الايمان !!!!!!

[فخر الدين أبو وعد]

.]الاخ امير لك تحياتى وتطرق بابا السكوت عنه مشكله اولا ماتريده اميركا الذى لايعرف شى عن السياسه ييعلم نواياها اميركا واتباعها لاتريد الخير لاى من كان وماربها معروفه والناس ترجع الى الوراء قليلا والمشاهد مايدور فى العالم يرى دما خراب تقتيل والسبب معروف لذا للذى يرى التدخل حلا متوهما. امريكا بعد ان تنفز ماتريد وهو معروف ستقضى على الاخضر واليابس والدلائل والبراهين امام المشاهدين للاحداث امريكا اذا حاولت الدخول والله وبالله وطالله .الا على الجثث حتى لانرى التقتيل الخراب الاغتصاب والله من وراء القصد..