المساعد الشخصي الرقمي

مشاهدة النسخة كاملة : حــــــــــــــجــــــــــــــــــوه

صديق الاخضر
03-23-2006, 11:21 AM
سلام وعوافى
بالامس كنا انا وعبد العظيم الشاذلى بعد عودته من السودان جلسنا وتسامرنا واثنا السمر اخرجة منه هذه القصيدة وكان عنوانها حجوه وهى .....
..............................................

حجيتكم ما بجيتكم
كان غشاكم واكل عشاكم
كانت طغمة وكانت امنه
وكان يا اخوانا البلد رخيص
وخيرو عتيد
وشعاً حبيب وعاتو رزينا
كان فرد وعسكر صر
غلى اللقمة وزاد الفجعه
ولما جانا الشهر الشر .... تعبت امه
وفاتت نعمه
كنا نقول يا اخوانا أصبروا
امكن نكسة وتعدى بخير
لكن الحبل امتدأ
ستة وعشر كانت رجعه
تطبيل وهتاف .... تكسير وخراب
تمجيد لريس ..باعلو فلاش
وكان وكان
نميرى شنو
نميرى امام نميرى اب عاج
نميرى محطة نميرى المرسى
نميرى الكان وكل الكان
اصبح كان وخبر كان
وجانا ابريل..ولمة الخلق اجناس اجناس
حى البوستة ومدنى السنى.. ورفاعة ابوسن
وكل الوطن الداسو نميرى وكتم انفاسو
هبو ... ولبوللحرية نداها
وداسو الباغى الوحش الكاسر
وكان وكان وكان
كده انا حجيتكم
صديق الاخضر
ابورزاز
عن ابن خالتى
حمدله على السلامة يا عظمه
معتصم سليمان بابكر
03-23-2006, 12:23 PM
سلام وعوافى
بالامس كنا انا وعبد العظيم الشاذلى بعد عودته من السودان جلسنا وتسامرنا واثنا السمر اخرجة منه هذه القصيدة وكان عنوانها حجوه وهى

صديق
والله كان المنى ان التقيك هناك تماما
كما سعدت بلقاء عبدالرحيم والصادق
ولكنها المشيئة...واللقاءات موزعة زى
الارزاق....والجاى اخضر

بمناسبة حجوة عبدالعظيم الشاذلى
خلينى افت ليك الحجوة دى
بالمناسبة ياعبدالعظيم حمدا لله على
سلامة الرجوع.....لكن أخجل والله
تعاين لى ياعبدالعظيم ياشين وانا اقول
دقيقة وتفرتق؟؟؟
الحجوة.....
طبعا ياعبدالعظيم شناتك مافى زيها اتنين
زى ما قال الزول الكان معاى اليوم داك
وانت طالع من البنطون اشرت ليك بيدى
عشان تتريث شوية...وانا مبسوط انى شفتك
لامن اطلع العربية الانا سايقها اليوم داك
ألقاك ياشين فرتقت....
الزول المعاى قال لى امكن ماعرفك
قلت ليهو طيب ليه انا عرفتو؟؟
قال لى يا اخى هو شناتو دى فى منها اتنين؟؟
عارف اليوم داك ياصديق لو ماكنا على
ارتباط مهم ولازم نغشى العزيبة
كان جهجهتو ليك فى الطريق
وكنت عملت ليهو الكاميرا الخفية

عند اللفه بس:
-----------
كان نفسى والله اقابلو لكن الظروف ما سمحت رغم اننا كنا فى وقت واحد وبينى وبينكم هو عداها كلها برة رفاعة (دى شكوى للريس) والبركة فى مقابلتى لدكتور عمار الشاذلى...واسماعيل التاج وخالد التاج
ناصر الباشا
03-23-2006, 01:06 PM
لكم الروعة صديق الاخضر / عبد العظيم الشاذلي

يا خرطوم حاشاهم ديل يكونوا اولادك
و شان تتأكدي يا ام درمان شوفي ترابك
بتلقي عبق اجدادنا ورود
وطين ابواتنا شذاه فريد
شوفي ترابك تعرفي ديل تمام اغراب
غلطة كرمك يا خرطوم مفتوحة ربوعك و الابواب
و غفوة مجد اكتوبر لحظة صبحت كل الارض يباب
جوة القصر بترعى ذئاب
و من المسجد صوت غراب
جسد العازة يصارع مخلب و عفتو تصرخ في الانياب
و ساري الليل يهتك ابنوسك و في سيقانو يطول لبلاب
و الامر عجاب
التاريخ وقف مذهول و الاكذوبة بقت اعجاز
شهادة الشهداء منحة دولة و جنة عدن على التلفاز
الذل الفقر صبح ترفيه الجوع المرض الموت انقاذ
ما اغرب لفظك يا انجاز
ملامحك تاهت خلف قصورهم يا ام درمان
خريطة العالم فقدت نورك فقدت اسمك و العنوان
ملامح الفرحة ضهبت فيك النغم اتيبس و الالحان
نغم الغنوة ازيز الدوشكا زئير المدفع عويل الدان
زفافك اصبح يا ام درمان موت انسان
غناوي السيرة صبحت تنزر بالاحزان
قسيمة الزوجة شهادة موت وبخور الجرتق يفوح جبخان
يا خرطوم شوفي ترابك كل جنياتك تحتو اندفنوا
في شان رادوك تحتو الوف احفادك سكنوا
في شان حبوك اختاروا ترابك يبقى بيوت
شان كرهوا الغرباء انتي اولادك عشقوا الموت
يا خرطوم اصمدي اصمدي
ليل الصيف ما عمرو قصير
يا خرطوم بكرة اكتوبر تاني يثور
يطهر ارضك من احقادهم للنازية يسوي قبور
يغسل ارضك من افعالهم يطهر منك كل فجور
و تعود البسمة لام درمان و صباح البقعة يعود مسرور
و تسمعي صوت شاشاي البادية يعنق فرحة صوت طنبور
و يعود تاريخنا لمجراه و من القصر يضوي النور

لكم الروعة
اعزائي صديق الاخضر / عبد العظيم الشاذلي
فقد رجعتم بنا كثيراً بالقصيدة و صحيتم جروحاً
لم تندمل ..............................................
مجدي ابوشرا
03-23-2006, 01:38 PM
يا اخوانا لي زمن بفتش على الزول ده (عبدالعظيم الشاذلي ) بس عايزين حجوة الناس العملوا كروش !!!
الصادق عبدالله ضرار
03-24-2006, 08:34 PM
عبدالعظيم رجل فنان
وكتاب
لكنه مقل كما النحله
تعطى القليل
لكنه مفيد
نتمنى ان يتحفنا بما كتب فى اماضى..
ابو النيييييز
03-24-2006, 11:40 PM
رغم جمال القصيده..
برضه الشوق حاكم و جبار
والله مشتاقين كتير يا صديق
وفاقدنك وفاقدين اهتمامك بالمنتدي ...و روحنا مشحتفه لكلماتك
..يلا قول لينا زي زمان
صديق الاخضر
03-25-2006, 10:00 AM
سلام وعوافى
ليس كل ما يتمناه المراء يدركه
الان انا التقيك يومياً على هذه الصفحات المعطره باريج كلماتك
الف شكر ليك
ولك الود
صديق الاخضر
ابورزاز
صديق الاخضر
03-25-2006, 10:05 AM
سلام وعوافى
الباشا صاحب القلم المتفرد لك التحية والاحترام
والف شكر لك على المرور الجميل والرد الاجمل
واتمنى انو هذه القصيده تفتح لك الباب وكل الابواب القديمه كى تنثر عبير كلماتك فى هذه الصفحه
مرحب حبابك
صديق الاخضر
ابورزاز
صديق الاخضر
03-25-2006, 10:09 AM
سلام وعوافى
مجدى ابوشرا
مشكور على مرورك واتمنى تكون لقيت الرائحه
عبد العظيم موجود لكن اول اتصل على السكرتيره اشان تحدد موعد معاه
مرحب بيك مره تانى واتمنى انو عبد العظيم يقراء القصيده والردود ويجد ردك
ويتم التواصل
سلام
صديق الاخضر
ابورزاز
صديق الاخضر
03-25-2006, 10:14 AM
سلام وعوافى
اخى
مشكور على المرور الجميل
وهو انت قلت عبد العظيم راجل فنان ومبدع
يلا الدور عليكم انتم هناك معه اخرجو منه الكلمات
وانشروها بأسمه حتى تصل لكل الدنيا
مشكور على المرور والتعليق
صديق الاخضر
ابورزاز
صديق الاخضر
03-25-2006, 10:21 AM
ابو النيز
سلام وعوافى
عدت من جديد أمسك قلمي
وألملم من تشققات قلبي الأوراق
لأكتب شعراً ...يقطر خمراً
وحباً.... ودماً.... مراق
عدت كما الشمس دوماً
تهوى في صباحنا الأشراق
عدت كنجم يبرق في السماء
في أوقات الصفاء في الآفاق
عدت وانتم الملاذ الوحيد لى
صديق الاخضر
ابورزاز
تخريمه
كيف أخبارك عساكم بخير
وين ما ظاهر ولا الاشراف انهك قواك