المساعد الشخصي الرقمي

مشاهدة النسخة كاملة : رواق بدرالدين ود البرعي للشعر الحلمنتيشي

بدرالدين بابكر عبدالرحيم
12-18-2005, 04:06 PM
لمن جيتك
رميت ازمة البنزين وراي
امتطيت ركشة الهوى السعران
وكنت براي
بغازل في صف الرغيف
وانشتل في الطريق حفرة
يا زمني الضعيف
وغنماية الزمن الرهاب
دخلت مدارس الانجليز
وفتحت كتاب
اسمو الضهب انت السبب
يا ازمة مصانع الدقيق
زمنا كعب
كعب طويل زي عواميد الكهربة
تسكن براك في دنقلا
وحللك ديمة مكربة
بدرالدين بابكر عبدالرحيم
12-18-2005, 04:11 PM
غصيدة " حطب المصير " للرائع انا

في ظل تخاريف الحقائق عزالخريف

انبطح شوق الغنا الهابط على عناجريب الغسيل

وكتبت عنك سكة الوهم الرحيل

يا لوري هوستن جر فينا نور طويل

وينهم ناس خليل؟

واستهبل الاحساس علي

والليل لبس لون السواد لي جزمتو

واتخذنا الشوق زبادي

وبدينا نبحث عن شوايب في كشاتين النوادي

وبي هناك لقيت جدي عرس ليك هنادي

قمت انتعلت الريد رغيف

وجاتني نسرين شايلة في شنط الحديد الذكريات

جاتني زي ديك عدة الحافلة المطارد بالعكاكيز والهواجس

وجوني بيتين من شعر

واحد اجار والتاني فسحة فيها نيمة

نيمة من زمن الاذاعة على الهوى

وياهوى سرحت ليك شعري اتكوى

وكواني ليك شوق البنفسج للزبرجد

وعتبرتك مستحيل

ورحلت ام بده السبيل

وسمعتي مني شعر جميل

يا عليلة يا علة الزول العليل

يا قصيرة يا طول الفتيل

وجوني منك شبشبين عبر الهوى

ضربوا بغداد ياعرب

وشباشبك الشول البيوض

جوني عابرين الحدود

يا خروف جلد القدود

اتمكيج الضب بالدلال

حتى الضبابين في غناك اتحنكشت

كل البنات اتشلخت

وانا غشاني عباس بالعشا

وجيت لقيت كل الدكاكين قفلت

والله بالجد
بدرالدين بابكر عبدالرحيم
12-18-2005, 04:19 PM
كوابيس مغترب - للرائع انا برضو

قام هجام فريق بت ام زين

مريت على بتاع اللبن شفقان

ونفيسة جارتنا جابت ولدين

واحد شرد والتاني اغترب في الصين

عبده اندفس في صف الرغيف شلوت

عباس زعل وباع العتوت

في سوق السمك

كتاكيت تبشر في عرس الاسد

وكدايس تخمخم في الودك

طشط الغسيل جاط في الحبل

مروان في الامتحان اتقطعت بيه السبل

بخراتو نامن في العسل

غسلن غسيل كل الحلل

في زمن تراشق البسكويت

عيون البوتجاز دمعن

وصوت بكاهن للفريق سمعن

كل الجرايد في السوق افلسن

حميده حلق شعر عبد اللطيف

زرع في صلعتو شتلات قطن

لكن ما طرحن طاقية وعمم

وسوسن عرست تمساح سمين

من زمن فيضانات الدمازين

جعفر اغترب في تشاد

مشى وزي ما مشى عاد

لكن امونه بالصبر اتسلحت

في زمن الجفاف اتكحلت

لواري يوسف في الزلط وحلت

وكلاب الحلة اشترت صعوط

سفن لما بالغن في الشرود

وحرامي سرق ناس عبد الودود

جلكوز معلق في الوريد

محمود يوزع في البريد

سيد الركشة جنب بالطرف

وصاعقة كوت هدوم شرف

الجداد اعلن تمرد بالبلد

ما في بيض يا ولد

كلم ابوك ينوم خفيف

وفي المنام يقرض رغيف

يا كستر اللبن الظريف

تعبت من كتر الحكي

مشيت لسيدنا الفكي

قال مالك بتشتكي

اداني مستكة قال احشيها سندوتش

ياروعة الزمن الفرش

دلوكة مسخنة بالفحم

سكر مجلبط باللحم

حسين مفرطق بالشحم

علويه هاجت وفترت

زعلانة قامت كشرت

ود الحسين ركب القطر

وبهناك صب المطر

قبل العصر

صاحبك قام اتزنق

وفي الزاوية ديك اتعصر[/color]
ro2a
12-18-2005, 08:00 PM
شكرا ليك ياخوي بدر الدين ود البرعي شكرا ليك على الشعر العزب اختك رؤى بت البرعي
بدرالدين بابكر عبدالرحيم
12-18-2005, 10:23 PM
تسلمي يا عسل انت :lol:
الصادق عبدالله ضرار
12-18-2005, 11:11 PM
الوجيه بدر الدين

امطرتنا متعه وشعرا يتكلم عن حالنا...المسكوت عنه..

اعيبك انك خربت طبعنا بهذه الطريقه لاننا لن نقبل باقل مما كتبت االيوم لاحقا...

معك نسمع ونرى عبر الاذن...والعين

دمت
Nola
12-22-2005, 03:27 PM
بدرالدين بابكر عبدالرحيم

يا الرائع انت برضو ...

:lol: :lol: :lol: :lol: :lol: :lol: :lol: :lol: :lol:

بالجد امتعتنا بقصائد تحفه

:lol: :lol: :lol: :lol: :lol: :lol:

يا اخي دقيقة نسيتني زاتو ارحب بيك ..

مرحب حبابك عشرة في منتدي البهلة ... وابقي اظهر ما تغيب


:lol: :lol: :lol: :lol: :lol: :lol: :lol: :lol:
ALI MUBARAK ELSHEIK AHMED
12-23-2005, 01:07 PM
أخي ودالبرعي......
سرحت بفكري العاشق

الي ابعد من حدود خيالك
الي عالمك الجميل الي شعرك الاصيل
فتعلق كل مابي بك
لمجرد الخيال
واصبحت ارى كل شي بعين الجمال
وتمنيت ان يأتي يوم اللقاء
وقلوبنا تحظى بالاتصال......
بدرالدين بابكر عبدالرحيم
03-06-2008, 04:48 PM
تسلموا على الردود والمرور الجميل بروعة اهل المكان والزمان