Mutasim Obeid
10-20-2005, 12:55 PM
أحبائى فى جنتنا الحلوة
صباح الخير
انا ومرام مسجلين غياب يوم التلاتاء ... برضوسماح وخصوصاً الحارس مافى مشغول مع الصغيرونة فاطمة والمرة الجاية انشاء الله نكون فى الميعاد
مواصلة لقصتنا الفاتت : كما ذكرت القصة اليومية التى احكيها لمرام هى من نسج خيالى المحض ولازم تكون منطقية وبتسلسل والا الاسئلة حتهرينى مثال مرة دار بينا الاتى
مرام: يالله يابابا ونس
انا : كان فى سمكة اسمها بلطية قالت لى بنتها انا يا بنتى ماشة السوق اشترى حاجات ... اوعك تطلعى من البيت ولا شبر لحدى ما أرجع ... ولكن السمكة الصغيرة ما سمعت الكلام وتركت امها بلطية تمشى من هنا وراحت مزوغة من هنا وطلعت من بيتهم
مرام : هو السمك عندو بيت ؟؟؟
انا : ايوه عندو بيت
مرام : شكلو كيف ؟؟؟
انا : مبنى من القش زى عش الطير
مرام : لكن ما الموية بتخربوا
انا : لا ده نوع خاص بجمعوا السمك من الاعماق ويبنى بيه وهو اخضر وما بيخرب
مرام : آه .... يالله ونس
انا : لما السمكة الصغيرة مرقت لقاها تمساح كبير وجب بلعها جوه بطنو
مرام : مقاطعة لكن يابابا ما خنقتو ؟؟
انا : لا هى ما صغيرونة مرت ساى فى حلقو
مرام : لكن يابابا (حمودى) ما خنقتو الحلاوة
انا : لكن يا بتى التمساح خشمو كبير ما زى حق حمودى الصغيرونى ده
مرام : انا زاتى خشمى كبير اها شوف ( وبدات محاولات فتح الخشم اكبر ما يمكن )
انا : خلاص .. خلاص ارقدى لكن انا يوم بوديك الحديقة فى السودان عشان تشوفى التمساح خشمو قدر شنو وخلينى اكمل باقى القصة علشان ننوم ... بكرة عندى شغل بدرى يا بت
اها لما الام بلطية جات من السوق ما لقت بنتها وبقت تفتش وتفتش وتسأل كل السمك الحولها ما شوفتو بتى ؟؟ بتى كانت هنا ما شفتوها مشت وين ؟؟ قام القرموط ( تحاول مرام المقاطعة لتسأل عن القرموط اقفل ليها خشمها واقول ) القرموط نوع من السمك الاسود بعيش فى الموية وبياكل الصراصير
المهم نواصل القرموط قال للبلطية انا شفت التمساح حائم قبل شوية بى هنا .. اخاف يكون خطف بنتك ... قامت البلطية جرى على وكر التمساح وانتظرت لحدى ما التمساح فتح خشمو للطير عشان ينظف ليه اسنانو قامت البلطية على طول دخلت جوة خشم التمساح ودخلت بطنو ولقت بنتها جوة سليمة وتبكى ... قامت ركبتها فى ظهرها بسرعة مرقت من دون التمساح ما يحس بيها
مرام : بابا ما تكضب
انا : ليه يامرام عيب تقول بابا كضاب دى ما حجوة ساكت
مرام : لكن يا بابا التمساح ما بعضيهم لو دخلوا فى خمشو ( تقصد خشمو )
انا : انت ما سمعتى انو سيدنا يونس دخل فى بطن الحوت وقعد فترة طويلة وبعد ده مرق حى
مرام : وهى تتثاءب قلت شنو ؟؟؟
انا : باين عليها ما فهمت اى شى وما اقتنعت باى شى لكن الحمد لله وضعت يدها تحت راسها وبدات فى النوم ودورت انا الناحية التانية وهاك يانومة
اشوفكم التلاتاء الجاية انشاء الله
عمكم معتصم عبيد
صباح الخير
انا ومرام مسجلين غياب يوم التلاتاء ... برضوسماح وخصوصاً الحارس مافى مشغول مع الصغيرونة فاطمة والمرة الجاية انشاء الله نكون فى الميعاد
مواصلة لقصتنا الفاتت : كما ذكرت القصة اليومية التى احكيها لمرام هى من نسج خيالى المحض ولازم تكون منطقية وبتسلسل والا الاسئلة حتهرينى مثال مرة دار بينا الاتى
مرام: يالله يابابا ونس
انا : كان فى سمكة اسمها بلطية قالت لى بنتها انا يا بنتى ماشة السوق اشترى حاجات ... اوعك تطلعى من البيت ولا شبر لحدى ما أرجع ... ولكن السمكة الصغيرة ما سمعت الكلام وتركت امها بلطية تمشى من هنا وراحت مزوغة من هنا وطلعت من بيتهم
مرام : هو السمك عندو بيت ؟؟؟
انا : ايوه عندو بيت
مرام : شكلو كيف ؟؟؟
انا : مبنى من القش زى عش الطير
مرام : لكن ما الموية بتخربوا
انا : لا ده نوع خاص بجمعوا السمك من الاعماق ويبنى بيه وهو اخضر وما بيخرب
مرام : آه .... يالله ونس
انا : لما السمكة الصغيرة مرقت لقاها تمساح كبير وجب بلعها جوه بطنو
مرام : مقاطعة لكن يابابا ما خنقتو ؟؟
انا : لا هى ما صغيرونة مرت ساى فى حلقو
مرام : لكن يابابا (حمودى) ما خنقتو الحلاوة
انا : لكن يا بتى التمساح خشمو كبير ما زى حق حمودى الصغيرونى ده
مرام : انا زاتى خشمى كبير اها شوف ( وبدات محاولات فتح الخشم اكبر ما يمكن )
انا : خلاص .. خلاص ارقدى لكن انا يوم بوديك الحديقة فى السودان عشان تشوفى التمساح خشمو قدر شنو وخلينى اكمل باقى القصة علشان ننوم ... بكرة عندى شغل بدرى يا بت
اها لما الام بلطية جات من السوق ما لقت بنتها وبقت تفتش وتفتش وتسأل كل السمك الحولها ما شوفتو بتى ؟؟ بتى كانت هنا ما شفتوها مشت وين ؟؟ قام القرموط ( تحاول مرام المقاطعة لتسأل عن القرموط اقفل ليها خشمها واقول ) القرموط نوع من السمك الاسود بعيش فى الموية وبياكل الصراصير
المهم نواصل القرموط قال للبلطية انا شفت التمساح حائم قبل شوية بى هنا .. اخاف يكون خطف بنتك ... قامت البلطية جرى على وكر التمساح وانتظرت لحدى ما التمساح فتح خشمو للطير عشان ينظف ليه اسنانو قامت البلطية على طول دخلت جوة خشم التمساح ودخلت بطنو ولقت بنتها جوة سليمة وتبكى ... قامت ركبتها فى ظهرها بسرعة مرقت من دون التمساح ما يحس بيها
مرام : بابا ما تكضب
انا : ليه يامرام عيب تقول بابا كضاب دى ما حجوة ساكت
مرام : لكن يا بابا التمساح ما بعضيهم لو دخلوا فى خمشو ( تقصد خشمو )
انا : انت ما سمعتى انو سيدنا يونس دخل فى بطن الحوت وقعد فترة طويلة وبعد ده مرق حى
مرام : وهى تتثاءب قلت شنو ؟؟؟
انا : باين عليها ما فهمت اى شى وما اقتنعت باى شى لكن الحمد لله وضعت يدها تحت راسها وبدات فى النوم ودورت انا الناحية التانية وهاك يانومة
اشوفكم التلاتاء الجاية انشاء الله
عمكم معتصم عبيد