المساعد الشخصي الرقمي

مشاهدة النسخة كاملة : انت سوداني


shona
07-26-2012, 09:45 AM
انت سوداني

عارفك انت سوداني
ومولود في بلد تاني
دايرك تعرف السودان
... ... وتنقل عني الحاني

اكلت الكسرة باللوبه؟؟
بتعرف تقلب الهوبه ؟؟
وعمرك شفته راكوبه؟؟
في يوم فلقوك بي طوبه ؟؟

لبسته الجبه مقلوبه ؟؟
حضرت العرضة والنوبه ؟؟
بتعرف يمه حبوبه ؟؟
وكت تمرق سعن روبه

لعبت شليل شليل وين راح ؟؟
عضم بالليل عضم وضتـاح
جهاله غبش نفتشو صاح
ونلعب يومى ما بترتاح

بتعرف تمشي كداري
تسوق العجله سداري
وتركب في الحمار جاري
تشوت الكورة ضفاري

هوي يا بنيه قشي الحوش
ومشطي شعرك المنكوش
وخلي البيت دوام مرشوش
وفرشي في البرنده بروش

وكت حماد قعد صنقر
وحلب البقره واتحكر
ومرق العجلة من الكر
وقال للكلبه ابعدي جر

اشرح لي قولة عــر
معاها الدوكه والقنقر
وقندول الفريك اخدر
والفرة البتخلع فر

ادليت عقرت خدار
ودحشك فر منك وعاار
وحشيت في الجنينة عدار
وغنيت في الفجر مسدار

اكيد ما بتعرف الزغرود
وما جربت ضرب السوط
ولا غنن لك البنوت
ولا غنمك رعن حنتوت

اياديك ناعمة ما حشن
ولا جربت مويه الشن
وما قفيت غنم طشن
لقيتن في الخدار خشن

في شركت لي طيره
وشركك هبت في غيرا
في ديك عمتك خيره
وترقد صوف وفريرة

بتحضر مولد المختار
وتسمع للمديح بالطار
والدرويش يلف دوار
ونلف برا نحن صغار

في يوم قرقرت زمباره
حضرت الحفلة في الحاره
وباريت ليك طمباره
سمعت الدنيا زوااره

تعرف الليقة والتربال
شال طوريتو راس المال
وحرم التكة والسروال
وقال للواطه جوكي رجال

رجال تسقي الخدار بالليل
اياديهن خشن بالحيل
بياكلو حلال حليلن ديك
كرام والله زي النيل

خروف مضبوح عشان الضيف
وجه مطروح صديق ما زيف
خصالن تتعب الوصيـــف
وكان واصلت ما حاقيف

سمعت الساقيه لافة تدور
ونضم السلياق للتور
والحاحايه فيها سرور
زهجان علبو الزرزور

ديك حسبان مع الواسوق
واحد يشد وواحد يسوق
وديك حنيات هناك بي فوق
يشتتو في الخدارماروق

هداك اللوري شايك السوق
وحس البوري سوا القوق
سيدو الحاج شهامة وزوق
وما فات ليه قط مخلوق

جدودك في الدواس ظاهرين
وساعة الحارة معروفين
اسود الخشه نابت شين
يقصو الزول عديل نصين

السودان كريم وحبيب
بلد مضيان وسيع وحيب
اسال عنه اي غريب
بقول ليك زيو مافي قرين

اخيرا بسال الرحمن
يسلم بلدك السودان
يرقيها ويعلي الشان
وتصبح عاليه اعلى مكان






ملطوووووووووش للأمانه

محمد ود القدال
07-26-2012, 06:08 PM
ياسلام عليك ياخ
والله دي أجمل و أحلى لطشه
وكده اللطش يا بلاش
قصيده كل بيت منها بيحكي عن أشياء جميله في بلدنا الحبيب
قصيده تحكي عن أجمل واقع عشناه وممكن نعيشو تاني وتعيشو الأجيال اللي بعدنا
القصيده شكلت لوحه لي سودان الطيبه و التصوف و الشجاعه و الكرم و الاخلاق و الاعراف و العادات السمحه .. الخ
و الله ماف اجمل من كده
شكر الله سعي اللاطش والملطوش منه
تحياتي

محمد قسم الله عبد القادر
07-26-2012, 11:27 PM
قصيده كل بيت منها بيحكي عن أشياء جميله في بلدنا الحبيب
قصيده تحكي عن أجمل واقع عشناه وممكن نعيشو تاني وتعيشو الأجيال اللي بعدنا
القصيده شكلت لوحه لي سودان الطيبه و التصوف و الشجاعه و الكرم و الاخلاق و الاعراف و العادات السمحه .. الخ

القدال: قلت لي كيف؟
ياخوي ناس مهند ونور ما قاعد تلاقيهم؟
تحياتنا لتركيا من طرف
شونا: دي على وزن سونا؟
غايتو دا اللطش ولا مافي داعي
كل الشكر على الشغل النضيف دا
متعة من إلى.

shona
07-29-2012, 10:36 AM
هههههههها شكرا ليكم كتير وأوعدكم بمزيد من اللطش تسلموووووووو:SnipeR (101)::SnipeR (101):

yosrey mubark aljak
07-30-2012, 12:30 PM
معنااهاااا كان كده اناا ماسودااااني

shona
08-02-2012, 12:36 PM
ههههههههههها يايسري شوف عيني بسوق العجله سداري:SnipeR (54)::SnipeR (54):

yosrey mubark aljak
08-24-2012, 11:41 AM
هههه وووين الكلام ده في السودان ؟؟؟

yosrey mubark aljak
08-24-2012, 11:46 AM
هوي يا بنيه قشي الحوش
ومشطي شعرك المنكوش
وخلي البيت دوام مرشوش
وفرشي في البرنده بروش

معتصم صديق ابوعاقله
08-24-2012, 12:39 PM
شونا: دي على وزن سونا؟

حالتك أستاذ لغة إنجليزية
الـ H لا تنطق يعني Silence
التحية للأخت سونا وود القدال وليك يا ود كريعات ..

Abu Hisham
08-24-2012, 03:53 PM
ياسلام ياسلام .. لكن بأمانة أولادنا المولودين بره لما يرجعوا السودان بيحبوه جدا يا Shona عارفة ليه ؟ لأنو الأشياء الفي القصيدة دي أمتع وأحلى منها مافي .. ويالذات بنات واحد صاحبنا من شندي ولدو في الدوحة ولما رجعوا وعمرهم ثلاث وخمس سنوات
عجبهم (نهيق حمار جدهم ) جوا يجروا لأمهم ياماما ياماما الحمارة ضربت البوري .. وولدي جاء فرحان ينطط قال ياماما : جدعت الحجر مع أولاد الجيران في الشجرة والله وقع لي تفاح صغااار ( النبق) هاها ها ..
دا تصريح من عمك أبو هشام باللطش .. لطشك لذيذ خالص الله يخليك فتشي تاني منتظرينك ..

shona
08-25-2012, 02:31 PM
تسلموووووووووو كتير وأسعدني مروركم جميعا
ودائما السودان جميل مهما حصل فيهو
وأوعدكم بالمزيد والكثير من اللطش الجميل :SnipeR (42):
ولازم تجيب اولادك دايما يا أبوهشام عشان يعرفو المزيد من السودان ههههههههههها والتفاح بتاعو الجميل والبوري المتنوع ولك الف تحيه :SnipeR (29):

shona
08-25-2012, 02:33 PM
هههههههههههههههههههههههههههههههههها قصدك شنووووووووووو يا يسري :002:

yosrey mubark aljak
08-29-2012, 01:55 PM
قصدي هوي يابنيه قومي وشوفي شغلتك وخلي الجلوس اشان الدروس ماتروح

shona
09-02-2012, 08:52 AM
ههههههههههههههههههههههها ترووووووووووح ووووين هو في طريقه والله زنقه زنقه :SnipeR (61):