art والجزيرة وممارسة التحكم في المتعة

[ايهاب صالح سليمان]

الاسلوب البغيض الذي مارسته قناتي الاي ار تي والجزيرة الرياضية جعل الجميع يصبون جام غضبهم على ادارتي القناتين ...ما الذي حدث ؟؟ قامت الجزيرة الرياضية بتفعيل اربعة قنوات كخطوة اولى واشترت حقوق بث الدوري الاسباني الممتع والدوري الايطالي القوي والبرتغالي (العادي) وكاس انجلترا ...ومع اجمل تصوير على الاطلاق واجمل استوديهات للتحليل والعرض كان لابد ان تكون الخدمات غالية ولكن جاءت القيمة قليلة جدا في مجملها حيث لا تساوي كل تلك المتعة فقط مائة ريال لا اكثر لمن لا يشتركون في باقات الاي ار تي (الاوائل) ...اما مشتركي باقات الاوائل والذين يتمتعون باقوى واميز واعنف دوري اوربي ( الانجليزي) والالماني وبطولات كاس الابطال الاوربي والاتحاد الاوربي وبطولات القارات وكاس العالم وبطولة افريقيا للبلدان والاندية بنوعيها الابطال والاتحاد وكاس العالم للشباب والناشئين التي ستنطلق في سبتمبر القادم ..وغيرها من البطولات التي تنسي الانسان نفسه وهو يتمتع بمشاهدتها ...قامت الجزيرة الرياضية بالانضمام الي باقات الاوائل اضافة لعرضها بطاقات وكروت للاخرين ....ولكن ما فعلته القناتين اليوم يعتبر تعدي علي حقوق الناس وممارسة سيئة للتحكم في متعة المشاهدة والمتابعة للملايين من عشاق الرياضة عامة وكرة القدم وخاصة عشاق الليغا الاسبانية والكالشيو الايطالي ...لتقوم قناة الجزيرة الرياضية ببث لقطات لبداية مباراة برشلونة والافس وايضا فالنسيا وريال بيتيس وعرضت فقط الاستديو التحليلي للمباراتين بطريقة تعالوا حصلونا ...المشكلة ليست في التشفير او الاسعار فقط المشكلة في ان المشتركين في قناة الاي ار تي والذين دفعوا ايضا مبلغ الجزيرة الرياضية لم يستطيعوا المشاهدة ولا المتابعة ....يمكن ان يكون هذا هو ما حدث في اول يوم لانطلاق الدوري الاسباني وغابت ابداعات رونالدينهو كما غابت اهداف صمويل ايتو ولارسون وجولي وذلك حتى الدقايق الاخيرة للمبارة .....بقي السؤال الان ما الذي سيحدث غدا ؟؟ وريال مدريد المرصع بالنجوم يبدا انطلاقته نحو استعادة الامجاد ..؟؟؟
وهكذا فان لغة المال اصبحت هي صاحبت الكلمة الاخيرة في المتعة الرياضية واصبحت القنوات هي المتحكمة الوحيدة فيها .......؟؟؟؟ ايهاب

[نادر الداني]

الاخ ايهاب التحية لك على هذا الموضوع المهم والشيق
اخي :ـ
نعم والله اخي ايهاب اتكلمت في الوجع وفي الجرح الغائر ـ فبقدر ما تطور العالم واصبح قرية بقدر ما صارت هذه القرية لاناس دون غيرهم فالمشاهد العادي اصبح مغلوب على امره واصبحت مشاهدة المباريات العالمية في خبر كان لكل من لم يملك حق التشفير انها مصيبة عظيمة ولكن المصيبة الاعظم هي في الدوري السوداني (( الممتاز )) فبالرغم من انه لا يمكن مقارنته بالدوري حول العالم الا اننا اصبحنا ايضا نعاني من عدم مشاهدته وحتى مشاهدة الاهداف في عالم الرياضة اصبحت في خبر كان والحاصل شنو ما قادرين نعرف حاجة ...
انها لغة المال والتحدث بلغة المال هو العولمة ذات نفسها في زمان اصبح المال فيه كل شئ وهو سيد الموقف بلا منازع العندو عندو والماعندو يفتح الانترنت ويقرأ نتائج المباريات فقط او يكون مسطح على طول الخط ..
العالم اصبح يأكل بعضه البعض بسبب المال يااخي اقرب مثال مصر الشقيقة الدوري بتاعهم اقوى دوري عربي فيهو اندية قوية وبتنافس الاهلي والزمالك وبتأخد كاس مصر كمان هذا الدوري متاح لكل المصريين مجاناً وفي القناة المصرية كل المباريات منقولة على الهواء وخاصة مباريات الاندية الافريقية ومباريات المنتخب المصري ايضا يتم نقلها لهم ... ما عارف في السودان ده ما بيحصل ليه نحن احسن من غيرنا في شنو يعني والغريبة انه كورتنا متدهورة وبرضه بشفروها تفتكر السبب شنو ؟؟ أكيد لانو السودانيين معروفين بحبهم لكرة القدم خاصة مشاهدة هلاريخ مع بعض او مع الاندية الاخرى ...
والمواطن المغلوب على امره لسان حاله يقول خلاص كرة القدم الشئ الوحيد الفيه السلوى للشعب السوداني كمان بقيتوها بالقروش في التلفزيون ...
ورجعنا مرة اخرى لدوري الدرجة الاولى وبدون هلاريخ يعني نشاهد بيت المال والعباسية وابو سعد وهلم جرا في استاد الخرطوم ودار الرياضة هذه هي كرتنا التي تعرض على المشاهد العربي في حين ان مباريات المنتخب والتي تلعب في الرد كاسل مشفرة لا يشاهدها الا قلة قليلة لا تذكر هذا هو التقدم والتطور في نظر دكتور شداد والذي شد علينا في الفرجة ونقول له يا اتحاد ياعام يا اخ معتصم جعفر ايه اللبيحصل ده ...
من المعروف ان الشعب السوداني تواق لمشاهدة كرة القدم بشراهة ولكن نعمل شنو في ظل العنجهية ورأس المالية ( والشكية لغير الله مزلة يا تلفزيون ) ...
اخر الآخبار :ـ
** الدوري السوداني الممتاز سوف يتوقف لمرات عديدة وذلك للعب مباريات المنتخب السوداني امام كل من ليبيا وساحل العاج وجاي علينا رمضان وايضا البطولة العربية كل تلك الوقفات على حساب المريخ والهلال فقط طيب بقية الاندية تسوي شنو تلعب مع بعض ولا تنتظر الهلال والمريخ لمن ينتهوا من المباريات ..

*** سؤال للاتحاد العام ليه الدوري السوداني دائما شغال في حين انتهاء كل المنافسات العالمية وعندما ينتهي الدوري السوداني يكون الدوري في العالم بدء في اسبوعه الاول .. حاجة غريبة والله ..

*** هيثم الرشيد لاعب المريخ الفنان وهدافه الافريقي المتميز الحصل عليهو شنو ياخوانا ...

*** العجب تم الكشف عليه بالرنين المغنطيسي وتأكدت سلامته من الاصابة وعافية ياعجبنا ..


**** المريخ يلاقي مريخ الثغر في تجربة ودية بدون الدوليين غدا الاثنين ...

*** محمود سعد سافر الى مصر لقضاء اسبوع اجازة في قاهرة المعز ...

*** الهلال محافظ على فارق النقطتين بينه وبين المريخ وهو سوف يواجه الاتحاد مدني في مدني والتاكا كسلا في كسلا بينما يلعب المريخ مباريتين في الرد كاسل وامسكو الخشب ...

*** رشح المراقبون في ان يفوز الهلال على الفريق الموريتاني وخسارة المريخ من الفريق الجزائري وكرة القدم اصبحت حاليا لا تخضع لهذه التكهنات فالعطاء داخل الملعب هو المقياس ..

*** برنامج عالم الرياضة اصبح باهت ومملل ولا يطاق ابدا وزمان كان الناس بتحضر البرنامج لمشاهدة التحليل الفني للممتاز ومباريات الفريق القومي ولكن اصبح البرنامج حاليا لا يساوي شئ يذكر ..

*** ختاما مجرد سؤال سياسي بسيط (( ماذا لو قام البشير بالغاء ضرائب المغتربين واصبحت صفر لكل الفئات )) تفتكروا حاتكون نتائج الانتخابات في السودان شنو ... ومين حا يكسب مجرد سؤال لرئيس الجمهورية ... في ظل الديمقراطية .... سمعنا انه ربما .... يتم ذلك ... من اجل ال... المغتربين ....

*** قالوا السبب في ان تصريف المياه باستاد الهلال عال العال لانو طبيعة التربة باستاد الهلال رملية تساعد في شراب الموية وامتصاصها على طول والمزرعة الفي استاد الهلال بتشرب كل الموية النازلة من الامطار ... بينما في الرد كاسل التربة الظاهر طينية وما في مزرعة لانو في مضمار للجري عشان كدي الموية بتكون واقفة فوق المضمار وما في تصريف كويس ... ده كلام ده ياخوانا اعقلوا شوية ...

** ختاما لكم التحية والتقدير
نادر الداني

[ايهاب صالح سليمان]

الاخ العزيز نادر الداني
تحياتي واشكرك لاثراء المنتدى بالمعلومات الهامة والجديدة في غياب السفاح العريس ..وصديق عمر الجاك المختفي ونزار فريجون الذي ينتظر فوز الهلال على المريخ ليعود ويمارس ادب العكننة اللذيذ
ويبقى اخونا الروبي في المتابعة والربط وجهود نولا الحثيثة في محاولة نفض الغبار عن الازرق الهلكان (تاريخيا) و( انجازا) ....
* هيثم الرشيد عاد لمزاولة نشاكه مع ناديه المريخ وينتظر فرصته للمشاركة التي اصبحت صعبة في وجود السعودي باهدافه الاكروباتية وديوب بقذائفه النارية والننو العائد للتالق مع العجب (عيني باردة)
لذلك فاختفاء هيثم طبيعي ....
* مزمل ابو القاسم قال للاهلة تصريف استاد المريخ سئ رضينا بالكلام ده ويبقى استاد المريخ الاجمل والازهى في فصول السنة الثلاثة (ما عد الخريف ) ويبقى استاد الهلال الاسوأ في كل فصول السنة الاربعة
* تعرف يا ود الداني اي انتصار للمريخ خارجيا مرتبط بحارس مرمى ولاعبين الوسط لو تضمن لي ديل اضمن ليك التاهل لنهائي العرب وما سالين في اي فريق
* الحديث عن القنوات والتشفير اصبح داخل الصفحات الاقتصادية وعلى الرغم من دفع كل المبالغ المطلوبة من الاوائل الا انني لم اتمكن من مشاهدة البارسا الا دقائق معدودة وليس وحدي بل عامة المشتركين اتمنى ان تزول المشكلة اليوم ويبقى العزاء في لقاءات ارسنال وتشيلسي والمان يونايتد في اقوى دوري اوربي
تحياتي ايهاب

[ابو النيييييز]

الصديق الغالي...وهبه
سلامات...
رغم اني ما عندي معلوماتي كفايه في موضوع الكوره والحركات دي
لكن موضوعك ده انا عندي عنه معلومات...وسريه كمان
بس مهما كانت درجة سريتها ...ما بتغلي عليك
المهم يا سيدي موضوع التشفير وراه ايدي خفيه
ايدي خفيه عندها مقدره كبيره علي التكتيك والتخطيط
ايدي ما زالت تواصل الاستيلاء علي ممتلكاتنا و رغباتنا
يعني ناس الجزيره والa r t ما عندهم حيله
وهم نفسهم مغلوب علي امرهم
المهم يا سيدي وعلشان انا ما بخاف ...بقول ليك الايدي الخفيه ديل منو
ديل النسوااااااااااااااااااااااااااااااان يا هيبه
النسوااااااااااااااااان عدييييييل
...كانوا بنقنقوا في موضوع الكوره والكاسات
واشتكوا من شيلتها لرجالهم منهم
ونقنقوا ونقنقوا ...وما في راجل اشتغل بيهم
وقرروا ما دام الرجال ما اشتغلوا بيهم ...هم بعرفوا شغلم
واشتغلوا شغلم
...اها بعد كده الراجل الما بقدر اشترك في القنوات...ما عنده طريقه الا اشغل قناة مرته
...والراجل العامل فيها راجل ومشي اشترك في القنوات دي...واطاته صبحت
لو يوم فتح خشمه وقال ما عنده قروش اشتري توب
بقلبوا ليه العيون وبقولوا ليه ...والقروش الاشتركت بيها دي كانت قروش صدقه
واكرهوه اليوم الاشترك فيه...لغاية ما اكسر التلفزيون...وكده تكون المره ارتاحت من الكوره ومن الاتجاه المعاكس..
...ايهاب لو راجل رد علشان المشيت تسمع ليها في وردي دي تكسر راسك وراس الكمبيوتر زاتو