فنجان القهوة

[روان مصطفى سليمان]

فنجان القهوة..
تعتبر القهوة الشراب المفضل لأغلب الناس ،
والعرب أول من اكتشف القهوة وأشاع شربها.
ولم تصل إلى أوروبا إلا في القرن السادس عشر
عندما كانت تستعمل في صناعة الأدوية بعدها
أصبحت مشروباً لجميع الناس..
ويختلف طعم القهوة من نوع إلى آخر باختلاف
طريقة التحضير والتحميص وغير ذلك من طرق
المعالجة..
أما السبب الرئيسي لاختلاف الطعم فهو اختلاف
نوع البذ رة وموقع الزرع وتزرع القهوة في ارتفاعات
تبدأ من450 متراً حتى 1800 متر فوق سطح
البحر وأجود الأنواع هو الذي يزرع في المناطق
المرتفعة وتنقسم القهوة تجارياً إلى فئتين :القهوة
البرازيلية والتي تأتينا من أشهر بلاد كرة القدم
(بلاد السامبا) والقهوة المزروعة في مناطق أخرى
من العالم ، وتسمى القهوة المعتدلة ..
وكل نوع له مذاق خاص وطريقة تحضير خاصة
والتذوق أيضاً يتطلب مهارة كبيرة..
والدعوة موجهة للجميع لتناول فنجان قهوة في
جنة الأطفال...

روان..

[Nazar Hussien Babkir Frie]

شكرا ليك يارنو على القهوة الظريفة وكمان على كرمك الحاتمي ودعوتك رواد المنتدي لتناول فنجان قهوة سوداني اصيل ، والليلة انا مكيف من الجبنة حقتك دي وان شاء الله تكون في جبنة فخار وكمان معاها بخور تيمان حرزا من العين ، وكمان اهلنا ناس شرق السودان غنو ليها وقالوا (فنجان جبنة بشمالو اسوي الدنيا بحالو ) وناس امدرمان عندهم طقوس خاصة بتناول القهوة ، واحلى قهوة هي قهوة الحبوبة وقت الضحوية بعد صلاة الظهر مباشرة .
وسلام ليكم وين تنو وصفوية اختفوا من الجنة الحاصل شنو .
ويلا واصلي الابداع ونحن متكيفين اربعة وعشرين قيراط وشاربين الجبنة بتاعت جنتنا دي .
عمك وخالك ابوفاطمة

[ابو النيييييز]

رغم اني ما بحب القهوه...لكن اتخيلي كده ...عمو نزار الاول جاب ناس فاطمه في الرياض ومشينا نسلم عليهم ...انا وصفويه ركبنا العربيه ومشينا غشيناكم انت ووئام وركبتوا معانا وماشين علي ناس عمو نزار لاقانا في الاشاره عمو ابو هبه وراكبه معاه هبويه...رجلينها في الكرسي القدام ...وراسها في الكرسي الورا...وانا قلت ليه : الحمد لله لاقيتك ما عرفت الوصف كويس...قال لي خلاص اوك خليك وراي بس...المهم مشينا وراه وكانت صابه مطره بسيطه والجو رهيب ..ونحن ماشين وراه ...البت وئام دي قالت الا اشتروا ليها ايسكريم...انا قلت ليها لا مافي طريقه علشان ح نضيع من عمو عبدالله...لما عاينت ليها في المرايا لقيتها كرفست وشها...وصفويه قالت لي كده ح تزعل ويمه يا خالو...لا لا الا زعل ويمه...ضربت لي عمو ابوهبه قلت ليه اقيف شويه جنب محل الايسكريم البعد الاشاره ده ...ونزلت اشتريت ايسكريم لست الكل...واتحركنا ...ووصلنا جنب ناس عمو نزار ...ونزلنا لقينا عمو هبه ساكت وبعاين ...قلنا ليه مالك؟...قال لينا البت هبه دي كانت مدسيه في العربيه ورا وفتحت الحلاوه الجبتها لفاطمه ...وقعدنا نضحك ...المهم ويمه وصفاء شالوها وطلعنا...دقينا لناس عمو نزار الجرس مافي زول فتح لينا ...قام عمو عبدالله ضرب ليه في الموبايل...عمو نزار قال ليه:: ايوه ايوه ايوه ...نحن منتظرنكم فوق في السطوح...المهم طلعنا ...روني جرت قدامنا وبعدها عمو عبد الله بصلح في عمته الكانت معفصاها هبويه ...وويمه وصفويه كانوا ورانا كل واحده بتقول للتانيه خليني انا اشيلها..وهبه بتاعين شويه لصفويه وشويه لوئام...وانا ماسك الحلاوه الجابها عمو عبد الله وكل مره تقع مني واحده وانزل ارفعها من اثار العدوان الغاشم من قبل هبويه...المهم وصلنا السطوح لقينا ليك الجو لذييييييييييذ..وعمو نزار مفرش وخاتي الكراسي...وريحة القهوه ماليه الجو...حاجه رهيييبه ...المهم سلامات بجاي وجوطات وناس هبويه وفاطمه معلقين فوق من يد ده الي يد ده...المهم قعدنا وروني بتحكي لينا قصص غريييبه وانا كل مره ألكزها في رجلها تقوم تغير القصه...قام عمو نزار شال ليك هبويه وبقي بلعب معاها...بس هبويه شوووووووووت كشحت ليك القهوه في جلابية عمو نزار....يا ساتر يا ساتر...فاطمه اتلفتت يمين واتلفتت شمال...وقامت جاريه للجبنه زاتها شالتها ليك وجرت ليك لعمو عبدالله كشححححححححت كشحتها ليك في جلابيته....والجوطه قامت...شكله لرب السما ...وجوا ليك الجيران ونزار فريجون اشيلنا ليك اتنين اتنين وارمي فينا...وجيته انا جاري ما بعيد ...مسكني ليك من يدي وخته رجلي في ركبتي ولب رماني...وصحيت وح اعمل تنسيق وارسل الرد

[روان مصطفى سليمان]

يااااااااااااااااااااااااااااااااااااااااااااااااي ..ياعمو الكرور...
وااااااااااااااااااااااااااااااااااااااااااااااااو يا خالو نزار..
والله العظيم إنت أحسن واحد يحكي حكاية حقيقية .. ودي قصة عديييل كده .
كمان نحنا أبطالها !! خليتني أصدق إنها حقيقة فعلاً .. وبقيت ماشة معاك خطوة ..
بخطوة .. من ما جيت غشيتنا إنت وصفوية وركبنا معاك ... وصدق وئام فعلاً جنها
إيسكريم .. وتخيلت أبو هبة ومعاهو هبوية وماسكة الحلاوة .. وماعايزة تدينا معاها !!
كمان لمن وصلنا بيت ناس عمو نزار أبو فاطمة ولقيناهم منتظريننا في السطوح والمطر
راشة .. ولغاية ما فاطمة وهبوية كشحو القهوة في جلاليب ناس عمو ..
بس جديع عمو نزار ده مامعانا بنبقى سلطة بعدين ...
والله يا عمو قصة حلوة وخلتني أعيش وأتمنى إنها تتحقق ... مفروض ما تكون رد
ويكون ليها بوست لحالها .....
ياعمو أنا عندي ليك إقتراح رهيب : شنو رايك تبقى مشرف معاي ؟؟ عشان نألف مع
بعض .. بعدين عمو نزار (أبو فاطمة ) مشرف للبهلة .. وعمو( أبو هبة ) المشرف العام..
يعني إنت فاضي .. كدي فكر ورد ..

يللا باي..
روان .

[روان مصطفى سليمان]

شكرا ليك يارنو على القهوة الظريفة وكمان على كرمك الحاتمي ودعوتك رواد المنتدي لتناول فنجان قهوة سوداني اصيل ، والليلة انا مكيف من الجبنة حقتك دي وان شاء الله تكون في جبنة فخار وكمان معاها بخور تيمان حرزا من العين ، وكمان اهلنا ناس شرق السودان غنو ليها وقالوا (فنجان جبنة بشمالو اسوي الدنيا بحالو ) وناس امدرمان عندهم طقوس خاصة بتناول القهوة ، واحلى قهوة هي قهوة الحبوبة وقت الضحوية بعد صلاة الظهر مباشرة .
وسلام ليكم وين تنو وصفوية اختفوا من الجنة الحاصل شنو .
ويلا واصلي الابداع ونحن متكيفين اربعة وعشرين قيراط وشاربين الجبنة بتاعت جنتنا دي .
عمك وخالك ابوفاطمةهاي عمو نزار أبو فاطمة ...
شكراً يا عمو لأنك قبلت الدعوة لفنجان القهوة..
وأكيد لمن تمشي السودان حتشرب قهوة الظهر مع البخور..
بس انتبه فاطمة ما تكشح القهوة في الجلابية ..
شايف يا عمو حكاية خالو نزار الكرور كأنها حقيقة
عشان كدا منتظرين جيّة فاطمة عشان تتحقق...
بس خايفين تقوم تجدعنا مع ناس عمو..
يلا باي ياعمو..

روان..

[Nazar Hussien Babkir Frie]

تعرفي يارنو والله العظيم القصة دي عجبتني لدرجة انو انا يومين قاعد وبحلم انو انتو وتنو وصفوية والعسل هبوية ومعاكم الود الشقي خالكم ده المجنني وعايز اطلعني بتاع مشاكل ، رغما عن اني طول عمر بمشي جنب الحيط يعني لا بجدع ولا بجيب الحجار وكان عملت حاجة غلط بقعد اعاتب نفسي كتير ، وفصاحتي في قلمي دا العمل مشاكل كتيرة في السودان ، ويوم جيتكم ولمتكم دي عندي بيبقي يوم الهنا والمني ، بس كشيح القهوة ما معانا رغما عن انو حبوبتي الشتلة بتقول دا فال خير ، وبعدين انا وعدتكم بمفاجاة الها المفاجاة انو فطومة _(تونة ) حتجي العمرة هي وامها وبعدين انا عازكم كلكم لفنجان قهوة في كورنيش جدة وانا عارفك يارنو بتحبي جدة لانو مولودة فيها وكمان لانو جدة غير ، وما تخافو خالكم بتكفل بالترحيل وانا وعمو ابو هبة علينا حق النزين وكمان فنجرة ساكت علينا حق الايسكريم ، وكان ما جيتوا بخلي تونة تتصل عليكم وتبارك ليكم العيد وكمان بخليها تشترك معاكم وتراسلكم من جدة وكمان برضو بعد ماترجع السودان بوصي امها كل مرة ترسل ليكم قصص من السودان .ويلا يابت يارنو كبي لي القهوة لاني خرمان شديد بس اوعي خالك اكشحها لانو عارفو شقي وبتاع مشاكل كمان ،بس الترميس اوعي يكون وارد اليابان لانو هو بكسروا لينا عديـــــــــــــــل ، لانو نحن بنحب ترامس السويد .
عمك وخالك
ابوفاطمة

[Nola]

روني البت العسل

والله يا روني ريحة جبنتك جابتني من الدور الفوق جات سايقاني سواقه لي عندك هنا ...

اها يا الحبيبه كبي لي فنجان عشان اعدل راسي الجايط دا ... انتي اصلك ما عارفه خالتو

نولا كييييفيه قديمه بتاعة قهوة وما بتبدا يومه بدونه .. عشان كدا يا روني عندي مع القهوة

دي علاقة خاصة جدا جدا وعشق عجيب والله ... والعجب كان بقت قهوة عصريه معاها بخور

جاولي .... يا سلالالالالالالالام قمة والله ..


والله تسلمي يا روني علي فنجان القهوة المظبوط دا ....

http://www.arab3.com/upload/images/Aug05/maab1973_welcome37.gif

[روان مصطفى سليمان]

هاي خالتو نولا ..
وينك يا خالتو مطولة الغيبة ... ؟ أنا عارفة جابتك
ريحة القهوة .. والبخور.. وكمان طلعت (كيييفة ) ..
خلاص نحنا منتظرينك تزورينا في الرياض .. وأول
حاجة ح نقدم ليك القهوة .. مع البخور ..

روان ..