كورة ..... اخير منها الليق

[Nola]

يا جماعه والله العظيم انتوا تعابنين ساي .. عارفة كلامي ده ممكن يزعل ناس متعصبين

مني ..لكن لما نضع الملح على الجرح وان كان يؤلم بكون دا بدايه الشفاء ... وفي النهايه الكلام الحا

اقولو ده مواجهه الحقيقه وقراءة للواقع

بس بذمتكم كده قولوا لي في كوره في السودان بتمتع المشاهد الرياضي و ما تقولوا لي هلال ولا مريخ ولا مورده ... ولا حسن عطيه ...

والله كوره الشراب اخير منها ولا اقول ليكم الليق بتاع ميدان عقرب اخير منها !!!

كلامي ده ما بس عشان عندي حب للهجوم على الرياضه في السودان وخصوصا كره القدم ... بس و

الله زعلانه وبجد نفسي يرقى مستوانا للكره الأفريقيه و العربيه (العالميه دي بعيده شديد)

طيب تعالوا نحاول نحلل مشكلتنا تكمن وين بالضبط ولا هي مجموعه عوامل اتضافرت خلتنا ننزل

للمستوى ده بعد زمن جكسا وقاقرين ..

* هل ياتري المشكلة في الصحافة الرياضية – وخاصة اعلام البنشر - ولا في برنامج التلفزيون المقدموا يرفع كثافة الواحد ...

*هل يا ترى المشكله في التدريب (جبنا مدربين من بره ,لكن ....)

* محتاجين نطعم الفرق بلاعبين محترفين من الخارج (ما جبنا وجربنا ,لكن... )

*عندنا مشكله في عدم احتراف اللاعبين المحليين للعب كره القدم فقط ... بره يا يمة تلقا الواحد فيهم مدلع دلع ماعندنا شغله غير الكوره عندنا(اما يكون موظف ولا شغال في السوق والكوره دي عندو بارت تايم )

* الاهتمام بالتغذيه (بووووش وفووول لمن يأمنوا .. والمعسكر المقفول باسطه وحقن ويكه في الركب عشان الزلقه تكون مبرره)

* اللياقة (تلاقي الواحد فيهم مشمع في الحافله ولا طاقاهو الشمس في السوق العربي )

*الملاعب زمان الوحد فيهم يشوت الكوره تقوم كتاحه تجيب الأزمه للي ماعنده ... لكن للأمانه اتحسنت لكن عايزين ليها الأفضل . . والعجب استاد المريخ مبالغة عديل وبصراحة كدا لمن يكون المريخ لاعب بحضر المباراة عشان الملعب السمح دا ....

عليكم الله دي ما أسباب تخلينا نطقط بره بالخمسه و السته ... وزي ما قال حسين خوجلي ليبيا

تغلبنا ومصر تغلبنا وتنزانيا تغلبنا وكل مرة ننوم موجعين وتعابنين وسهرانين ... دي ما فضايح

دي .. وين زمن السودان و كأس ـأمم أفريقيا.. لو زول عايز ينتقدني ياريت يكون كلامه مرفق بأسباب

تخليني أقتنع معاه ..

أما لو سألتوني هلال ولا مريخ ... أحلى الأمرين ... حا اختار الهلالالالالالالالالالالالالالالالالالالالال

العظيم واتمنى ليهو التطور و التوفيق

[الموناليزا..]

أختي نولا..هانحن نلتقي في منتدى الرياضة ...
موضوعك تمام وفي محله.. وفعلا كرة القدم عندنا محتاجة
للكثير.. هذه المداخلة لأني من عشاق كرة القدم منذ صغري..
وكثيرا ما الغي مشاوير بسبب مباراة..!!
أولا.. أنا معك بان الكرة السودانية جد تعبانة..وكلنا أمل في
أن ترجع لمستواها..ولعصرها القديم كما يحلو لنا تسميته بالعصر
الذهبي لها..
وشايفة كل الأجهزة الرياضية والمعنية بأمر الرياضة ما فتأت
تحاول وتحاول علها تصلح الحال في السنين القادمة..ومافي شي
بعيد.. بعد ذلك الاهتمام الكبير الذي تحظى به كرة القدم من مدربين
واعداد لعيبة (مدارس الأشبال..) مستشفيات الطب الرياضي...
إعلاميين وصحف رياضية..قياديين..ومدن رياضية وملاعب وطبعا جمهور عريض...
إلى غير ذلك..
ثانيا..تعرفي إلى أن ينصلح الحال أنا بعمل شنو!!
بتابع القنوات الرياضية مثلا..(الجزيرة الرياضية/art sport/دبي)
وغيرهم ..
تعرفي..مستوى شنو وتحليل شنو إبداع في إبداع حاجة تانية خالص..
قمة الإبهار يعني ناس عارفة هي بتعمل في شنو..روعة جد..وصدقيني
بقدر إحساسي بذلك الانبهار والرقي أشعر بالأسى
لحالنا..وأتمنى أن نصل لهذا المستوى في يوم من الأيام..
وهنا تجديني أتنقل بين هذه القناة وتلك..تارة أتابع روعة الليقا
الإسباني خاصة المباريات التي طرفها البارسا او الريال الملكي
أو فالنسيا..
وكمان شوفي الروعة والإثارة عند الديربي الإنجليزي وينك وين
بين أرسنال ومانشستر يونايتد ولا ليفربول...
بالجد حتتحسري على الواقع المرير بتاع كورتنا.. لكن جد الكورة الأوروبية
على مستوى..
ولسة لسة أنا ماخلصت.. تعالي معاي لقارتنا السمراء.. وشن بتقولي
في أمم أفريقيا حكاية ما بتخلص..وعلى فكرة دي في راي أقوى بطولة بعد كاس العالم..
يا سلام على الكاميرون ونيجريا والسنغال
وابداعهم في كاس العالم السابق..وكمان جنوب أفريقيا..وغانا..وغيرهم..
روعة تنسيك مأساة كرتنا السودانية..
نولا.. أنا طولت شديد لكن خليني أتفشى اصلي لي زمن ما اتكلمت عن الكورة..
(باقي شوية اصبري علي..)
أما كاس العالم ده خلي ساي حكاية ولا كل الحكايات كالعادة طبعا نشجع اولا الفرق
الافريقية وللأسف بتطلع بدري نقوم بعدين نجري على ناس البرازيل..
والمرة دي أسيويا حنشجع السعودية (حكم الانتماء يعني)..
كورتها مشت .. ودي المرة الرابعة تتأهل لكاس العالم على التوالي أخير مننا والله..
شايفة الحماس ماليني كيف!! ده كله منتظرة بيهو كاس العالم الصيف القادم إن شاء الله..
(إيه رايك المرة الجاية نتابع في اللعيبة المشاهير والهدافين والاندية بتاعتهم..؟)
صدقي يانولا حتى صغاري في البيت مولعين بالكورة.. وجنهم متابعة .


الموناليزا..

[Nola]

موناليزا :shock: :shock: :shock:

لكن ما لقيتك [s32:1a1cab556f] [s32:1a1cab556f] [s32:1a1cab556f]

رهيبة عديل ولا الرشيد بدوي عبيد في عصره الذهبي

اها انا موافقة نحاول ندوزن مع بعض الحال المائل دا

والله يا نادر الداني وعبد الله السفاح شوفوا ليكم حل

مع الهجوم التتاري بتاعنا دا علي منتداكم

[الموناليزا..]

سلام يا نولا..
اها رايك شنو.. نواصل المشوار الرياضي ؟؟
نبدا من وين ؟ من قارتنا ولانمشي على ناس الليقا احسن ؟؟
برضو تصفيات كاس العالم يكون احلى واحلى.. لو تناولنا الفرق التي تاهلت بالتحليل الشامل..
وكمان ممكن نعمل كوكتيل رياضي لمختلف الانشطة ..
وابراز النجوم والهدافين وانتقالات المحترفين واسعارهم في البورصة..
انا جاهزة والبداية ليك لانك صاحبة البوست..

اسمعي.. شوية شوية نخش على ناس البهلة :wink:

الموناليزا..

[عبدالله إبنعوف]

الإخوات نولا والموناليزا

تحية وإحتراماً

حقيقي أقف إحتراماً لكم والله برهنتو إنو عندكم فكر كروي أكثر من كثير من الموجودين هنا ، لو كنت المسئول في جهاز الرياضة في السودان والله أشيل كل الموجودين ، مدربين كانوا أو معلقين ، وخلينا من الراجل العامل للناس كلهم وجع وش كل يوم جمعة ، خلا الناس يشوفوا التلفزيون يوم الجمعة حديث الأطباء وخطبة الجمعة ويا سلام لو كانت من الدكتور عصام أحمد البشير ، وبعدها الناس تمشي يمين وشمال حتى الساعة خمسة وبعدها يفكروا يشوفوا قناة السودان مرة تانية .

كلامكم حقيقي جداً يوم الأحد المساء قناة النيل الأزرق عرضت مباراة الهلال والميرغني والله العشرين لاعب داخل الملعب ساكين الكورة ولما تعايني للملعب تلقي أجزاء كبيرة جداً فاضية ومساحة صغيرة مليانة لأنو العشرين في منطقة واحدة ، كان الله في عون المشاهدين البدفعوا قروش

تعرفي سلطنة عمان كانت في كل دورات الخليج بتكون الطيش ويكون فيها على الأقل عشرين أو أكثر من الأهداف وعندها في رصيدها هدف أو إثنين والنقاط صفر ، قاموا عملوا شنو قبل كم سنة كادا لمو مجموعة من الشباب صغار السن من 13 و 15 ورسلوهم البرازيل يعني علشان يتعلموا كورة من الصفر ، والسنة البعدها والبعدها وهكذا ، آخر دورة خليج كانوا هم الفريق الثاني ونافسوا في الدورة الآسيوية وكورتهم بقت منتهى المتعة ولاعبيهم الأندية الخليجية أصبحت تتسابق علشان يحترفوا فيها وحارس المرمى بتاعم إحترف في الدوري الإنجليزي وكل سنة بيفرخوا لعيبة أحسن من الماضية .

في السودان لابد أن يوقفوا الجرايد الرياضية اللي أصبحت أكثر من اللاعبين ولما يكون في مباراة وتشوفي الجرايد الرياضية تقول يا ربي نحن وين في إيطاليا ولا البرازيل ولا إسبانيا ، وفي محررين يكونوا كاتبين تعليقهم على الكورة قبل ما تلعب ويكتبوه في الجرايد .

أخوانا نادر الداني وعبدالله السفاح أنا بشوف أحسن تشوفوا ليكم منتدى تاني الجماعة ديل قاصدينكم عديل قفزوا من الدور الرابع وجوكم هنا في الدور السابع ، والخوف على ناس البهلة ويا الشفت شوف ليك شغلة تاني .

وتحياتي ليكم

[نادر الداني]

الاختان نولا والموناليزا

اولا التحية لكم في هذا المنبر الرياضي وحقيقة انا اول المندهشين للمعلومات بتاعتكم ولا اخفي اعجابي الشديد باسلوبكما في الكتابة عن الرياضة في السودان واكيد المنتدى كسب وجوه جديدة يمكن ان ترسي افكار وحلول لنشل الكرة السودنية من الوحل الذي تعيش فيه .. لانو المرأه بطبعها لما تكون ورا موضوع اكيد حا تثير نخوة الرجال للعمل الدؤوب من اجل ايجاد بوارق من الامل لتصحيح مسار الكرة السودانية.
والفكرة التي طرحتها الاخت الموناليزا فكرة اكثر من رائعة بتناول (إيه رايك المرة الجاية نتابع في اللعيبة المشاهير والهدافين والاندية بتاعتهم..؟) والكلام ده حق الموناليزا ولو طبقته على ارض الواقع يكون افضل واحسن كمان لو تابعت الهدافين والاندية بتاعتهم وحكت لينا عشان نستفيد معاها ويستفيد القارئ لمنتدى الرياضة وبذلك تكون قدمت خدمة عظيمة للرياضة بل وساهمت في تطورها لانو اكيد الناس سوف تستفيد من الكلام ده والمعلومات دي ..

الاخت نولا :
انا طبعا متفق معاك في كل الكلام بتاعك انو في السودان ما في كورة والكورة اخير منها كورة الليق لكن طبعا يا اختنا نولا انحنا عاوزين نعالج الليق ده ونرتفع بيهو ونطرح السؤال المعتاد الحل شنو ؟؟؟
كيف تصبح الكرة السودانية في مستوى الكرة العربية اولا ؟؟ بعد داك نمشي نفتش للعالمية او يمكن ان نقول كيف تصبح الكرة السودانية في مستوى الكرة الافريقية اولا ثم العربية ثم العالمية اخيراً ؟؟؟
والعافية درجات زي ما بقولوا ... وعلاج المشكلة يبدأ بالاهتمام بالناشئين والعمل على توجيههم التوجيه الصحيح من الاول ومن ثم صقلهم بصورة صحيحة حتى يواكبوا التطورات العالمية ايضا من المعالجات التي طرحت حديثاً الاهتمام بالناشئين على مستوى السودان وتكوين دوري للناشئين وذلك على المستوى القومي لتكوين منافسة يستخلص من خلالها الخلاصة لهؤلاء اللاعبين ومن ثم الاهتمام بهم عن طريق مدربين اصحاب خبرات في هذا المجال مثل المدرب حسن المصري والذي تولى فكرة المدارس السنية في نادي المريخ ولكن هذه المدرسة الآن لم تحقق النتيجة المرجوة نسبة لدخولها في دوامة الميزانية والصرف حيث لم تستطع ادارة المريخ الصرف عليها بصورة متكاملة مما ادى لبعض النفور والفتور لهذا المشروع الضخم والذي وجد صدى ممتازا في بداية عمره .

ونصيحتي لكل من يتحدث عن الكرة السودانية بانها غير مواكبة وانها متخلفة او غيره من هذا الحديث نقول له الكلام ده الناس كلها عارفاهو ونحن عاوزين واحد يتكلم عن الحلول العملية لان السلبيات معروف لدى الجميع وعاوزين نعمل على نهضة الكرة السودانية ويا اخوانا دائما لازم نكون متفائلين لانو ده الواقع بتاعنا ونبدأ بالآتي:

اولا ً : الاستمرار الاستمرار الاستمرار والمشاركة في كل المناسبات الرياضية على مستوى الاتحاد الافريقي والعربي والدولي لكرة القدم ولقد كررت كلمة الاستمرار لماذا كررتها ؟؟ لان التوقف عن المشاركة سوف يؤخرنا سنوات الى الوراء ومادام نحنا اصلا متأخرين فيجب ان نستمر حتى لوظللنا في ذات النقطة التي نحن فيها لان التوقف يضعف المستوى اكثر ويجعلنا في القاع الاكثر ظلاماً بينما المشاركة في البطولات وعلى جميع المستويات لها فوائد عظيمة ليست في تحقيق النتائج فقط وانما في تحقيق مكاسب جديدة تتمثل في مبد|أ المشاركة ذات نفسه فكل دولة لها الحق في المشاركة لمعرفة النواحي الاجتماعية والثقافية والاقتصادية في البلد الذي تقام عليه البطولة المعنية والغياب يضعف هذه الناحية وله اثاره السلبية على المدى البعيد ولنأخذ مثالا لذلك فدولة مثل مورتانيا مثلا او غيرها من الدول الافريقية المغمورة والتي لا تشارك في البطولات الافريقة الا بعدد اصابع اليد مثلا لاتجد لها خارطة في دوائر الاتحادات او الدول العربية ولا يمكن ان يعرفها الناس في تلك الدول والمعلومات عنها تكاد تكون معدومة حتى تصير نسيا منسيا ..
ثانياً :
العمل على الاهتمام بالناشئين لانهم عماد المستقبل القادم وذلك بوضع خطة طويلة المدى وذلك كما تفعل الدول المتقدمة من حولنا ولنأخذ المانيا مثلا فان هذه الدولة تمتلك مدارس لكرة القدم منذ سنين طويلة ويعتمدون اعتمادا رئسيا على هذه المدارس في مد الفرق القومية الالمانية بالاعبين المتخرجين من هذه المدارس حيث يتدرج فيها الناشئ الى فرق درجة اولى ثم الى فرق الدوري الممتاز عندهم ومن ثم الى الفريق الاول وهكذا حيث يكون اللاعب قد تشرب ومنذ الصغر باساسيات كرة القدم ويكون قد تعلم كيفية التحكم في الكرة واتقان التمرير والثبات في الملعب وغيرها من فنون كرة القدم الاساسية .. بينما نحن ما يزال لاعبونا يفتقدون لمثل هذه المهارات والتي تعتبر ابسط مقومات كرة القدم .
ثالثاً :
في اعتقادي ان الحلين الاول والثاني لايمكن ان يتم تطبيقهما على ارض الواقع الا باهتمام القائمين على امر الرياضة في بلدنا السودان بامر الرياضة وذلك بتخصيص ميزانية كاملة للرياضة كما تفعل الدول الاخرى واقربها الينا مصر الشقيقة حيث تخصص مصر ميزانية متكاملة للفرق القومية وتهيئ لها المعسكرات الخارجية وتستجلب الفرق القوية للمنازلة داخل مصر وخارجها وهكذا فان وزارة الشباب والرياضة لا تقل شأناً عن الوزارات الاخرى ولكن ... هل حدث هذا فعلا ؟؟؟ والموضوع يطول شرحه في هذا الحيز الضيق ..
رابعا ً :

الاهتمام بترقية الاعلام الرياضي وانشاء كليات في الجامعات لهذه المهنة بصورة موضوعية وجعلها مهنة اساسية يتخرج فيها المتلقي بفكر يواكب الحركة الرياضية داخل وخارج السودان ليكون مفيدا للكل بما يكتبه من كلام في الجرائد الرياضية .. ولن اتحدث عن الشهادات التي يحملها من يكتب اليوم في الجرائد الرياضية فالغالبية العظمي من كاتبي الاعلام الرياضي لاتحمل شهادات جامعية الا ما ندر ..
وغالبيتهم يكتب بحكم الخبرة او الهواية او الحظ او الاهتمام بامر الرياضة على المستوى الشخصي حتى صار لهم شهرة بكتاباتهم .. ونحن في هذا المقال لانريد ان ننقصهم حقهم او نطالب بذهابهم وانما نطالب بخلق جيل جديد في كل شئ ابتداءاً من انشاء الكليات الاعلامية المتخصصة في الاعلام الرياضي والتخصص يمكن ان يكون تخريج معلقين ومدربين وصحفيين رياضيين وحكام وغيرها من التخصصات في الرياضات ككل واقول ان افتتاح اكاديمية تقانة كرة القدم والتي حضرها المستر سيب بلاتر هي البداية او الخيط الذي عن طريقه يمكن الوصول الى تحقيق هذا الهدف ان استغل استغلالا صحيحاً .
خامساً :
يأتي دور الجمهور وفيه اقول ان الجمهور دائما ما يشجع اللعبة الحلوة ولا يريد الجمهور الا الانتصار واللعب الجميل وحينما نطبق البنود الاربعة اعلاه فان الجمهور اتوماتيكيا سوف ينصلح حاله تماما وسوف تغيب السلبيات التي يفتعلها لان الجمهور السوداني بطبيعته واعي وراقي ويشجع التقدم والتطور ولا اعتقد انه سوف يشكل عائقاً في سبيل تقدم الكرة السودانية .

ختاماً ارى انني قد اطلت في هذا الموضوع وفي الخاطر الكثير من الافكار والتي طالما تراودني للخروج بالكرة السودنية من وهنها وما قلته او سردته هو قطرة من فيض عن الكرة السودنية المغلوبة على امرها وسوف نعود غدا لان الغد دائما ما يكون مشرقا بالآمال العراض وما حديث رئيس الجمهورية في افتتاح تقانة كرة القدم عن الناشئين والاهتمام بهم الا بارقة امل وضوء خافت نستمد منه الخطى والطريق لبدء رحلة المعافاة للكرة السودانية ..
مع خالص تحياتي لكم دوما
نادر الداني

[عبدالله السفاح]

[highlight=#FFFFCC:b5732e56ba]أخوات احمد بابكر وصلاح مشكلة
عفواً اقصد نولا والموناليزا
والله بجد كلامك دا في الصميم وحقيقة أدهشتمونا بفكركم العالي ومعلوماتكم عن الرياضة
ورأيكم شنو تبدلونا نحنا نمشى منتدى حواء وانتو تجو المنتدى الرياضي .
نكون جادين شوية .
أولا يا نولا كلامك صحيح وفعلاً الكوره في السودان لا ترقى إلي مستوى كورة شراب لأنو بنقصها كثير جداً عن بقيت الدول الأخرى وكل واحد بقول الإمكانيات أنا مع هذا الراى لكن دا ما السبب الرئيسي فهنالك مثلاً البرازيل التي تعد من أفقر دول العالم و كلنا نعرف مكانة البرازيل رياضياً ولا تقتصر على كرة القدم فحسب بل الكره الطائرة ومختلف الأنشطة.
فأذن المشكلة ما مشكلة إمكانيات وبس بل افتقار السودان للمواهب الحقيقية وخبرات واعية توظف تلك المواهب
وإدارات حريصة على تنظيم العمل الرياضي والي أخره .
ونتمنى ان نرى الرياضة في السودان بمظهر خلا ب يجذب الأنظار والمتابعين للرياضة في العالم ولي عوده للحديث عن هذا الموضوع .[/highlight:b5732e56ba]

[نادر الداني]

العم العزيز عبد الله

كلمة مرور ناجح التي عنونت بها المقال هي كلمة بقولها الرشيد بدوي عبيد كثيرا في تعليقه على المباريات ...حيث يقول ( الراجل ماشي ماشي بالكورة وبعمل مرور ناجح من الباك بتاعو ) وهكذا
واتمنى ان اكون قد صدقت القول في مرورك الناجح وطلتك البهية علينا في منتدى الرياضة وتعليقك على الاختين نولا والموناليزا اتفق معنا انا والاخ عبد الله السفاح ولكن نتمنى الا يكون مرور الاختان نولا والموناليزا مرور ساكت وعبور على المنتدى نحن فعلا متحاجين للفكر الانثوي حتى يشجع الباقين زي ما قلت في مقالي السابق واما طلتك علينا عمنا عبد الله ففيها الكثير من الفوائد لاننا عرفنا انك برضو مكلوم بتدهور الكرة السودانية زينا وياريت تدينا من منبعك لاننا محتاجين لرجل في قامتك وفكرك خاصة وانك ما شاء الله عليك معلوماتك الرياضية مية المية وتجربة سلطنة عمان هي خير تجربة يمكن ان تطرح كحل من الحلول التي تساهم في تطور الكرة السودانية بل يمكن ايصالها الى المسئولين عن طريق سرد خطاب معنون باسم منتدى ابناء رفاعة ـ المنتدى الرياضي ويسلم لكمال حامد في التلفزيون عن طريق الفاكس ومستعد ان اتبنى هذه الفكرة وارسال الفاكس لكمال حامد في برنامج عالم الرياضة ولكن هل سيقرأ كمال حامد الخطاب ويقوم بسر ما فيه ... هذا هو السؤال لان غالبية الفاكسات التي تأتي لبرنامج عالم الرياضة يقرأ منها كمال حامد جزء يسير جدا والباقي بكون كمله بالكلام بتاعه القادينا بيهو ده ولو خلى الكلام الكتير والشكر لفلان ولعلان في البرنامج اكيد البرنامج حا يكون مية المية ...
مجرد سؤال
من الذي يستطيع اصلاح حال الكرة السودانية ؟
الاجابة : الجميع
هل في الامكان اصلاح حال الكرة السودانية ؟ اذا كان الاجابة بنعم كيف ذلك واذا كان الاجابة بلا فصمتك افضل
الاجابة : نعم واما كيف فان اعطوك ما ءالبحر حبرا ماحايكفيك حلول لذا اقول بالمواكبة فقط
متى ينصلح حال الكرة السودنية ؟ الرجاء تحديد التاريخ ؟ وعلى اية اساس هذا التاريخ
الاجابة : في العام 2015 إن شاء الله على اقل تقدير على اساس بناء المدارس السنية
هل يستطيع السودان الوصول الى نهائيات كاس العالم ؟ وكيف
الاجابة : نعم يستطيع بالعزيمة والاصرار والمواكبة والتطلع ونبذ الخلافات والمشاحنات وتطور البلد اقتصاديا ..
لماذا حصل التدهور المريع للكرة السودانية منذ التسعينات وحتى الآن؟
الاجابة : لغياب المواكبة والتقوقع في المحلية الضيقة واعتماد الاندية على جيوب الاداريين فقط لتسير امور النوادي خاصة هلاريخ وعدم توظيف امكانيات الاندية لشركات تدعم هذه الاندية وتتبناها.

لماذا ومتى وكيف وكل حروف الاستفهام لن تكفي اسئلة عن حال الكرة السودنية ونحنا عاملين زي دخلت نملة واكلت حبة وطلعت ودخلت نملة واكلت حبة وطلعت وهلم جرا حتى جاء جميع النمل وشال حبة واكل وصاحبنا واقف يتفرج عليهو لحدي ما النمل شبع ومشى دخل جحوره وصاحبنا واقف وجاء المغرب واظلمت الدنيا في وجه صاحبنا وبعد داك مشى نام بدون عشاء لانو ماعندو حق العشاء وكان واقف يعاين للنمل وبحاول يحل مشكلته لكن في النهاية طلع بفائدة واحدة هو ان النمل اكل وشبع ودخل جحره اما هو فقد دخل عليهو الظلام ومشى للنوم لانو وقف يتفرج على النمل وهو يعمل وياكل فكان لازم يكون مصيره في النهاية ينوم من غير عشاء .
وقصة النملة هي ابلغ تصوير لحال الكرة السودنية وهي واقفه تعاين للدول من حولها تتقدم وتعمل في مجال كرة القدم وهي واقفة ساكت في مكانها لا تتحرك قيد نملة عفوا اقصد قيد انملة .
وتحياتنا لنمل × نمل
على فكرة الكلام ده ما حق نمل في نمل ( العمود المشهور )
مع خالص تحياتي لكم
نادر الداني

[vbadmin]

http://www.sudany2026.com

خليكم مع الجماعة ديل علشان ينصلح حال الكورة السودانية والسودان ينظم كأس العام سنة 2026 ، أعتقد فيها مبالغة شوية ، يحتمل سنة 2226 !!!!!

[عبدالله إبنعوف]

الإخوان الأعزاء

الأخ نادر

لك الشكر والتقدير على التعليق الظريف ، فعلاً في فترة ماضية كنت متابع جيد للرياضة في السودان وما زلت في بعض الأحيان أطالع الصحف الرياضية عبر النت .

تعرف مشكلة المشاكل في السودان بالنسبة للكورة شنو ؟ كل القائمين على أمر الرياضة في السودان معرفتهم بالرياضي كمعرفتي باللغة الصينية واليابانية ، كلهم أو غالبيتهم ليس لهم أي علاقة بالكورة وليس لهم فكر رياضي ، إنما الموضوع وجاهة ليس إلا ، لذلك يجب أن يعطوا الخبر لخبازه . إن كانت هناك وزارة أو مصلحة أو قسم مسئول عن الرياضة في السودان لابد وأن يكون على رأسه راجل عرك الميادين الرياضية وعركته ، الأندية رئاستها وإدارييها وكل أجهزتها من إدارية أو فنية أو تدريب ، التحكيم ، التعليق الرياضي ، الإتحادات الرياضية وغيره وغيره ، لأن هؤلاء الناس ما حيمشوا خطوة وإلا حيكونوا هم عارفين بيعملوا شنو . أنظر لجارتنا مصر وشوف من هم في رئاسة الأندية والإتحادات الرياضية وحتى المعلقين الرياضيين ومن يقدم برامج الرياضة في كل القنوات المصرية هم من قدامىاللاعبين .

الرياضة المدرسية يجب إن ترجع إلى سابق عهدها من المدارس الأولية وحتى الجامعة ، زمان المدرسة الأوليه فيها كل ما يخص الرياضة بمختلف الأنشطة ، حتى الجمباز كانت هناك الأجهزة من حصان ومتوازي وغيره ، الأهتمام بحصص الرياضة وأن يكون في كل مدرسة إستاذ متفرغ للرياضة خريج معهد التربية ، المعهد في السودان يخرج ويهاجروا يشتغلوا مناديب مبيعات وأساتذة من منازلهم !!!!

توفير البنية التحتية من ملاعب وساحات وغيره ، زمان كانت ميادين الكورة موزعة على الأحياء والساحات ما أكثرها ، حالياً زحفت عليها المباني وغيرها ، وحتى الشارع أصبح غير مهياً ليلعب فيه الصغار الدافوري ، فالحدائق المنزلية الخارجية والأسوار الخارجية إقتطعت أجزاء من الشوراع وما بقي أحتل من العربات التي أصبحت في كل مكان ، ومن المفارقات المدينة الرياضية التي ستنتهي يوم القيامة إقتطعت وزارة التخطيط العمراني جزء كبير من مساحتها وباعتها كمحلات وسكن .

ملحوظة :

الساحات والميادين والشوارع قديماً كانت تعج بما يسمى ( الكشافين ) التابعين للأندية الذين يعرفون اللاعب المميز من حركاته ومن طريقة إستلامه للكورة ويوصون إدارات الأندية بتسجيلهم ورعايتهم ، إختفى هؤلاء وإحتل مكانهم ( السيوبر سمسار ) الذي يبحث عن اللاعب الجاهز لتسجيله للنادي لكي يكسب إعلامياً ومادياً من ورائه .

التخطيط السليم في كل ما يهم الرياضة ، الدعم المالي من الدولة من الشركات والبيوتات التجارية والرعاية للفريق القومي والأندية لابد أن تكون من هذه الشركات ورجال الأعمال والبعد بها عن السياسة والسياسيين ، ولكي يكفيها شر السماسرة والذين يتسلقون أكتاف الرياضة لكي يصلوا لمناصب سياسية وغيرها .

الإحتكاك وجلب فرق رياضية لها وزنها مش زي ( أوفي اليوناني ) فرق تجي للسياحة وتنهزم من الهلال والمريخ وجرايدنا الرياضية تتلع فزنا وهزمنا وقدمنا عروض رائعة وغيرها وهم يخادعون أنفسهم ، زمان كانت الأتيام اللي بتحضر للسودان أمثال الردستارز وسانتوس وغيرها من الأتيام التي لها وزنها وسمعتها العالمية ، أنظروا للجماهيرية الليبية ، أين وصلت كورتها الآن وما ذلك إلا بالتخطيط السليم والدعم المادي غير المتناهي والإحتكاك الخارجي ثم االقائمين على أمر الرياضة هم من أهل الرياضة .

الكرة في غرب أفريقيا لماذا تقدمت وأصبحت لها شأن : لأن أهل الرياضة والقائمين عليها حفيت أقدامهم في الجري وراء الأندية العالمية مثل أياكس الهولندي وغيره من الأندية الأوروبية الكبيرة ، لماذا لكي ينشئوا مدارس للكورة في بلادهم ، تتبى لاعبين صغار السن تعلمهم مبادىء الكورة بإشراف مدربين من هذه الأندية ويصبح هؤالاء اللاعبين تابعين لهذه الأندية ولما يصلوا مرحلة معينة تضم هذه الأندية حاجتها منهم وتبيع الباقي للأندية الأخرى واليوم لاعبي غرب أفريقيا في كل الأندية الأوروبية محترفين لهم وزنهم وفي نفس الوقت الفريق القومي لهذه الدول جله أن لم يكن كله بإحتياطيه من المحترفين ، لماذ لا تنقل هذه التجربة للسودان !!!

أخيراً أكبر مشاكل الكورة السودانية : الهلال والمريخ أو المريخ والهلال لكي لا يزعل أحد ، وبعدهم الصحف الرياضية ومنتسبيها .

ولنا عودة في ذلك!!!!

[نادر الداني]

ابوهبة
والله ما في احسن من كده متعتنا بالرؤية الثاقبة والعقل الراجح وده الكلام ولا بلاش
نادر الداني

[Nola]

سلام شباب

كلام منطقي ورهيب وكل مداخله اقوي من التانيه في التحليل

يلا بجيكم راجعة تاني

ما تقولوا زغته من البوست

بس راسي جاييييييط اليومين دي و البوست دا داير لي قعده بي مزززززززاج وفنجان قهوه مظبوط ..

عشان الواحد يقعد يفلل موضوع الكورة السودانية والاعلامي الرياضي .....
ونشوف في النهاية حا نصل لي شنو ...

اها بجي صاده تاني


نولا مشكلة (علي قول عبد الله السفاح )