المساعد الشخصي الرقمي

مشاهدة النسخة كاملة : موضوع خطير جدا ... مطلوب خادمات سودانيات للعمل بالإمارات


الصادق عبدالله ضرار
02-27-2011, 10:42 AM
ورد إعلان في جريدة قون بتاريخ امس السبت 26/02/2011م بإعلان مفاده ان هناك فرص عمل نادره بدولة الامارت والوظائف
1- مشرفات اطفال
2- عاملات نظافه
الراتب للمشرفات 1000 درهم بدون سكن وترحيل والتأمين الصحي
الرتب لعاملات النظافه 800 درهم
والاكل على حسابهم لانه لم يرد له ذكر

المهم في الامر ان مسمي هذه الوظيفتين لطيف وفيه غش وتوريه لحقيقة العمل , لكن العمل هو كخادمات في الاولى وخدم تنظيف في الثاني
المشكله ان الاعلان ورد في الجريده وهناك ترخيص من مكتب العمل لهذا المكتب
فهل يسمح قانون العمل بخروج السودنيات كخدم ؟
طيلة ما عرف السودانيين الإغتراب لم نسمع بخادمه سودانيه
لكن يبدو ان قيمتنا إنحطت لدى العرب
وانا متأكد ان الكثيرات تقدمن لهذه الوظيفه
وهن لا يعرفن قساوة الغربه للرجال ناهياك عن البنات
والخوف عليهن من جور الزمان واولاد الحرام
وهن اعراضنا جميعا
وهل هذه الرواتب كفي للاكل ناهيك عن ان ترسل الواحده منهن لأهلها ؟
فهل هناك سبيل لإيقاف هذا النوع من الإستقدام
وانا واعوذ منها بصدد الكتابه للصحفي عثمان ميرغني للكتابه في هذا الامر الخطير وتنبيه الجهات المختصه
مرفق صورة الاعلان
http://www.rufaaforall.com/board/uploaded/534_1298795964.jpg

جبصي
02-27-2011, 10:48 AM
والله يالصادق ياخوي ما عيب إلا العيب

بعدين من زمان السودانيين شغالين في القصور وعرفو بالأمانة

بعدين حيكونو بعيدين عن الأطماع والتحرش وخلافو

مصطفى كشة
02-27-2011, 10:51 AM
لا حول و لا قوة الا بالله

يجب التريث و التبصر .. اظن

و الله اعلم ان الرواتب الحقيقية اعلى

من كدة بكتير من اصحاب العمل و لكن الظاهر

ان هذا المكتي سيقوم بالدور الذى تنتهجه

شركات التشغيل و الصيانة و الذى

يتمثل فى ان يستلم المكت مثلا راتبا قدره

2000 درهم من صاحب العمل

بينما يعطى المكتب العامل

راتبا 1000 درهم

و الله اعلم

الصادق عبدالله ضرار
02-27-2011, 10:57 AM
والله يالصادق ياخوي ما عيب إلا العيب

بعدين من زمان السودانيين شغالين في القصور وعرفو بالأمانة

بعدين حيكونو بعيدين عن الأطماع والتحرش وخلافو

عيب والله ياجبصي
بنانا الحرائر يخدمن في البيوت
هل ترضاه لأي من بنات اسرتك ؟
والسودانيين الشغالين في القصور على الاقل رجال مش بنات (لاحظ العمر 30) ودي عندنا لسه ما فكرت تتزوج
وكيف حيكونز بعيدين والتحرش في البيوت بالخدم مودود
سودانيه خدامه
عيب والله يا جبصي راجع نفسك

الصادق عبدالله ضرار
02-27-2011, 11:04 AM
لا حول و لا قوة الا بالله

يجب التريث و التبصر .. اظن

و الله اعلم ان الرواتب الحقيقية اعلى

من كدة بكتير من اصحاب العمل و لكن الظاهر

ان هذا المكتي سيقوم بالدور الذى تنتهجه

شركات التشغيل و الصيانة و الذى

يتمثل فى ان يستلم المكت مثلا راتبا قدره

2000 درهم من صاحب العمل

بينما يعطى المكتب العامل

راتبا 1000 درهم

و الله اعلم

يابن خالتي سلام
إنشاء لله البركه فيكم
الغريبه الاعلان والله منشور جنب خبر وفاة عمكم رحمه الله في قوون
الموضوع واضح ما عاوز تريث
الرتاب مذكور وبغض النظر الشركة بتاخد كم المهم انو البصل البت كم
بعدين نحن رافضين من حيث المبدأ الفكرة
وخلونا نصوت عليها

راشد بلال
02-27-2011, 11:11 AM
هذا ليس عيب فقط ياحبيبنا الأخدر .. هذا قمة الإنحطاط والسفالة من كافة المسؤلين عن هذا الجانب بالحكومة ..

اليس ممثلي وأعضاء تلك السفارات بالدول العربية والخليجية لايعلمون ماهي نظرة المجتمعات لهذا ... وماهي التبعيات لتلك المرمطة ..

والله كم تمنيت من قبل أن لا أسمع يوم بهذا الموضوع دام ماأنني ينبط في نبط على هذه الحياة ..

غايتو الله يستر ياأرتكبنا لنا جريمة ... يالملمنا عفشنا وبقينا متخارجين للبلد .

vivid
02-27-2011, 11:26 AM
هل ترضاه لأي من بنات اسرتك ؟


كيفن ما برضاهو؟؟؟
كمان برضى بناتو يلبسن بناطلين ضيقة
و برضى يفكن شعرن في السهلة

جبصي
02-27-2011, 11:27 AM
عيب والله ياجبصي
بنانا الحرائر يخدمن في البيوت
هل ترضاه لأي من بنات اسرتك ؟
والسودانيين الشغالين في القصور على الاقل رجال مش بنات (لاحظ العمر 30) ودي عندنا لسه ما فكرت تتزوج
وكيف حيكونز بعيدين والتحرش في البيوت بالخدم مودود
سودانيه خدامه
عيب والله يا جبصي راجع نفسك

والله لا عيب ولا حرام

وبنات اسرتي ديل خليهن بعيد نحن هنا بنتكلم هنا شريحة من المجتمع السوداني ممكن يكونو ارامل ومطلقات لقن فرص للعمل في الخليج خادمات - المشكلة وين

والله السودانية وباقي الجنسيات كلهن من آدم وآدم من تراب -

والله في رايك أقرب القاهرة مش كدة

جبصي
02-27-2011, 11:30 AM
كيفن ما برضاهو؟؟؟
كمان برضى بناتو يلبسن بناطلين ضيقة
و برضى يفكن شعرن في السهلة

ازدواجية في المعايير بعيد عنك

بنت بلدى
02-27-2011, 12:07 PM
الله الموضوع من ناحية عيب وحرام فهو لاعيب ولا حرام بعدين قالو العمر لايقل عن 30 سنة يعنى الواحدة كبيرة وعارفة الحاصل فى الدنيا وقادرة على مسؤليه نفسها وعلى الاقل بتكون شغالة مع اسرة وفى حاجات كتيرة انتو خايفين عليهن منها بكون هى اصلا مافاضية ليها من المسؤلية العليها وفى سودانيات شغالات فى الامارات فى كافير وحنانات مافرقت لم تكون بتخدم عشان تتطلع لقمة عيشها بالحلال فى السودان بشتغلن ستات شاى وسط الرجال الظروف هى الجبرتن على كدا مافى زول قاعد انظر ليهن نظرة دونية مادام الوحة بتشتغل بى يدها وتكسب لقمتها بالحلال مااظن فى مشكلة فى الحتة دى .

جبصي
02-27-2011, 12:22 PM
هذا ليس عيب فقط ياحبيبنا الأخدر .. هذا قمة الإنحطاط والسفالة من كافة المسؤلين عن هذا الجانب بالحكومة ..

اليس ممثلي وأعضاء تلك السفارات بالدول العربية والخليجية لايعلمون ماهي نظرة المجتمعات لهذا ... وماهي التبعيات لتلك المرمطة ..

والله كم تمنيت من قبل أن لا أسمع يوم بهذا الموضوع دام ماأنني ينبط في نبط على هذه الحياة ..

غايتو الله يستر ياأرتكبنا لنا جريمة ... يالملمنا عفشنا وبقينا متخارجين للبلد .

ملك الدراب

شنو يا أخوي عملت لي فيها عمر المختار

فكر في الموضوع بعقلانية وفكر في الأنو الماشة تشتغل دي أنسانة تقطعت بها السبل - ما عندها مصدر دخل - تعمل شنو ؟؟؟؟

راشد بلال
02-27-2011, 12:24 PM
نحن لاقلنا عيب ولا حرام العمل للمراءة ..
ولكن العيب والحرام أنك تسمح لها بالعمل وسط مجتمع أغلبه عيوب ويرمى بها في المهالك ..
وعندما تكلمنا وأستنكرنا هذا لعلمنا الشديد بتلك المهنة ومايشوبها من تبعيات ومخاطر لفتاتنا ..
فليس يعقل أن يرمى بها في متاهات هي ليست لها علم بها .. نحن أدرى بها لذلك تكلمنا في هذا ..
وفي نهاية الأمر لانقدر نغصب أو نمنع أحداهن .. لكن الواجب بحتم علينا أستنكار ذلك ..
كل الذي نقدر عليه هو أن نجتهد حتى نأقلم أنفسنا لتحمل الألم والجرح لتلك الإهانات لبنت البلد إذ ما سمعنا بها فيما بعد تتناقلها شتئ وسائل الاعلام .
وكل من أحببت ذلك فهنالك الدليل والعنوان تجده في جريدة قون ... وكل مانستطيع ونقدر عليه نقول (( الله يسترهن ويحفظهن )) ويصدن سالمات غانمات .

جبصي
02-27-2011, 12:27 PM
نحن لاقلنا عيب ولا حرام العمل للمراءة ..
ولكن العيب والحرام أنك تسمح لها بالعمل وسط مجتمع أغلبه عيوب ويرمى بها في المهالك ..
وعندما تكلمنا وأستنكرنا هذا لعلمنا الشديد بتلك المهنة ومايشوبها من تبعيات ومخاطر لفتاتنا ..
فليس يعقل أن يرمى بها في متاهات هي ليست لها علم بها .. نحن أدرى بها لذلك تكلمنا في هذا ..
وفي نهاية الأمر لانقدر نغصب أو نمنع أحداهن .. لكن الواجب بحتم علينا أستنكار ذلك ..
كل الذي نقدر عليه هو أن نجتهد حتى نأقلم أنفسنا لتحمل الألم والجرح لتلك الإهانات لبنت البلد إذ ما سمعنا بها فيما بعد تتناقلها شتئ وسائل الاعلام .
وكل من أحببت ذلك فهنالك الدليل والعنوان تجده في جريدة قون ... وكل مانستطيع ونقدر عليه نقول (( الله يسترهن ويحفظهن )) ويصدن سالمات غانمات .

آمين يا رب العالمين :025:

العابر
02-27-2011, 12:27 PM
ياتون علي هذي المسميات ولكن يمارسون اشياء تقشعر لها الابدان ولك ان تتخيل اعوذ بالله منهنننننننننن

راشد بلال
02-27-2011, 12:33 PM
ملك الدراب

شنو يا أخوي عملت لي فيها عمر المختار

فكر في الموضوع بعقلانية وفكر في الأنو الماشة تشتغل دي أنسانة تقطعت بها السبل - ما عندها مصدر دخل - تعمل شنو ؟؟؟؟

إت ياخوي مابقدر عليك علا أصحابي (( المؤسيقار وفوفو ))

نحن شايلين هم كل البلد وشاعرين بكل تلك المعاناة ..
ولكن هل يجوز أن تكون الحلول بالشكل هذا .. يعني مافي أي حلول غير الشغلة دي ..
وهذا من ضمن المشاكل التي من أجلها بهدر أخونا ودالشريف ..
أكان كدا تاني النشيل لوحنا ونهدر معاهو ..
أصبر بكلم ليك الخزين ،، اليومين دي بشوفو اتغير مسك درب ناس صبري .

ود كنان
02-27-2011, 12:52 PM
معروف اللون السوداني اسود مع ديكور القصر عشرة علي عشر

الصادق عبدالله ضرار
02-27-2011, 12:53 PM
هذا ليس عيب فقط ياحبيبنا الأخدر .. هذا قمة الإنحطاط والسفالة من كافة المسؤلين عن هذا الجانب بالحكومة ..

اليس ممثلي وأعضاء تلك السفارات بالدول العربية والخليجية لايعلمون ماهي نظرة المجتمعات لهذا ... وماهي التبعيات لتلك المرمطة ..

والله كم تمنيت من قبل أن لا أسمع يوم بهذا الموضوع دام ماأنني ينبط في نبط على هذه الحياة ..

غايتو الله يستر ياأرتكبنا لنا جريمة ... يالملمنا عفشنا وبقينا متخارجين للبلد .

ااااخ يابن عمي ...
نحن بناتنا يشتغلن خدامات
زي الاسيويات والاثيوبيات
وينضربن ويتهانن
زمن ....

الصادق عبدالله ضرار
02-27-2011, 12:56 PM
كيفن ما برضاهو؟؟؟
كمان برضى بناتو يلبسن بناطلين ضيقة
و برضى يفكن شعرن في السهلة

إستغفر الله
طلعت الزول ما عندو غيره عديييل
نحن بنعرف الجبصي كويس العب غيرا دفعه في الاميريه والثانويه (وراهم بي سنه)

انت بمناسبة موضوع البنطلون والضيق ما رديت على التساؤلات هناك
منتظرك انا
موضوع الطرمبه الجنبكم مجاهداتك فيها وكدا
وحديث الكحيان
ورأيك في الفيديو واسلوب المعامله
شايف فطيت بوستي الموجه ليك وتوش على ابوشروق

الصادق عبدالله ضرار
02-27-2011, 01:21 PM
والله لا عيب ولا حرام

وبنات اسرتي ديل خليهن بعيد نحن هنا بنتكلم هنا شريحة من المجتمع السوداني ممكن يكونو ارامل ومطلقات لقن فرص للعمل في الخليج خادمات - المشكلة وين

والله السودانية وباقي الجنسيات كلهن من آدم وآدم من تراب -

والله في رايك أقرب القاهرة مش كدة

كيف ياشاب
بنسحب الموضوع عليك طالما ارتضيتو معناه يجب ان ترضاه لنفسك اولا
الهدي النبوي بقول كده
جاء في الحديث عن أبي أمامة قال ان فتى شابا أتى النبي صلى الله عليه وسلم فقال يا رسول الله ائذن لي بالزنا فأقبل القوم عليه فزجروه وقالوا مه مه فقال أدنه فدنا منه قريبا قال فجلس قال أتحبه لأمك قال لا والله جعلني الله فداءك قال ولا الناس يحبونه لأمهاتهم قال أفتحبه لابنتك قال لا والله يا رسول الله جعلني الله فداءك قال ولا الناس يحبونه لبناتهم قال أفتحبه لأختك قال لا والله جعلني الله فداءك قال ولا الناس يحبونه لأخواتهم قال أفتحبه لعمتك قال لا والله جعلني الله فداءك قال ولا الناس يحبونه لعماتهم قال أفتحبه لخالتك قال لا والله جعلني الله فداءك قال ولا الناس يحبونه لخالاتهم قال فوضع يده عليه وقال اللهم اغفر ذنبه وطهر قلبه وحصن فرجه فلم يكن بعد ذلك الفتى يلتفت إلى شيء. أخرجه الإمام أحمد رحمه الله في المسند ج5/ص 256

يعني سيدنا النبي صلى الله عليه وسلم لما كلم الشاب , الشاب ما قال ليهو خلي اختي وخالتي وعمتي انا عاوز ارتكب الفاحشه لنفسي لاني ما قادر اصبر ...
كلا ياجبصي
اتؤمنون ببعض الكتاب وتكفرون ببعضه
ياتقبلوا للجميع ياترفضوا للجميع
وبعدين البلد فيها مليون وظيفه
شوف مؤهل الخادمه ثانوي
طيب ما تشتغل في بلدها كاتبه او مدرسة او في روضة اطفال او تبيع اكل في كافتريا في الخرطوم
او او او
ماتقول لي داك زنا وكدا
انا ضربت ليك مثل في انو الزول لا يرضى لغيره ما لا يرضاه لنفسه
اما قصة مطلقات وكلام من النوع ده ال 1000 درهم دي اكل هي ما تكفيها في الامارات اسألنا نحن ناس الخليج
لاقين الجداد والفول الرخيص ده في جده وقايلين الناس زيكم
خلاصة الرد إنو عيب ان تعمل السودانيه خادمه
وكل الحكومات السابقة وهذه حتى الان لا تسمح بخروجهن للعمل كخادملت
اما القاهره فانا ما عارف فيها شنو نورنا
لكن هن بمشن القاهره وعرفن دربا متين وكم ليهن بدن المشي لهناك ؟
سؤل برئ ما تفكر فيهو بخبث

الصادق عبدالله ضرار
02-27-2011, 01:34 PM
ياتون علي هذي المسميات ولكن يمارسون اشياء تقشعر لها الابدان ولك ان تتخيل اعوذ بالله منهنننننننننن

خايفين عليهن من الفي بالك وبالي
الغربه ما بترحم

الصادق عبدالله ضرار
02-27-2011, 01:35 PM
معروف اللون السوداني اسود مع ديكور القصر عشرة علي عشر

الاخ بتاع ديكو داخلي

جبصي
02-27-2011, 01:52 PM
كيف ياشاب
بنسحب الموضوع عليك طالما ارتضيتو معناه يجب ان ترضاه لنفسك اولا
الهدي النبوي بقول كده
جاء في الحديث عن أبي أمامة قال ان فتى شابا أتى النبي صلى الله عليه وسلم فقال يا رسول الله ائذن لي بالزنا فأقبل القوم عليه فزجروه وقالوا مه مه فقال أدنه فدنا منه قريبا قال فجلس قال أتحبه لأمك قال لا والله جعلني الله فداءك قال ولا الناس يحبونه لأمهاتهم قال أفتحبه لابنتك قال لا والله يا رسول الله جعلني الله فداءك قال ولا الناس يحبونه لبناتهم قال أفتحبه لأختك قال لا والله جعلني الله فداءك قال ولا الناس يحبونه لأخواتهم قال أفتحبه لعمتك قال لا والله جعلني الله فداءك قال ولا الناس يحبونه لعماتهم قال أفتحبه لخالتك قال لا والله جعلني الله فداءك قال ولا الناس يحبونه لخالاتهم قال فوضع يده عليه وقال اللهم اغفر ذنبه وطهر قلبه وحصن فرجه فلم يكن بعد ذلك الفتى يلتفت إلى شيء. أخرجه الإمام أحمد رحمه الله في المسند ج5/ص 256

يعني سيدنا النبي صلى الله عليه وسلم لما كلم الشاب , الشاب ما قال ليهو خلي اختي وخالتي وعمتي انا عاوز ارتكب الفاحشه لنفسي لاني ما قادر اصبر ...
كلا ياجبصي
اتؤمنون ببعض الكتاب وتكفرون ببعضه
ياتقبلوا للجميع ياترفضوا للجميع
وبعدين البلد فيها مليون وظيفه
شوف مؤهل الخادمه ثانوي
طيب ما تشتغل في بلدها كاتبه او مدرسة او في روضة اطفال او تبيع اكل في كافتريا في الخرطوم
او او او
ماتقول لي داك زنا وكدا
انا ضربت ليك مثل في انو الزول لا يرضى لغيره ما لا يرضاه لنفسه
اما قصة مطلقات وكلام من النوع ده ال 1000 درهم دي اكل هي ما تكفيها في الامارات اسألنا نحن ناس الخليج
لاقين الجداد والفول الرخيص ده في جده وقايلين الناس زيكم
خلاصة الرد إنو عيب ان تعمل السودانيه خادمه
وكل الحكومات السابقة وهذه حتى الان لا تسمح بخروجهن للعمل كخادملت
اما القاهره فانا ما عارف فيها شنو نورنا
لكن هن بمشن القاهره وعرفن دربا متين وكم ليهن بدن المشي لهناك ؟
سؤل برئ ما تفكر فيهو بخبث

والله يا الصادق من عرفتك لي اللحظة دي ما عارفك شايت وين

ياخي أنا برضاه لي أهلي ولا ما برضاه دي ما المشكلة المشكلة انو لا عيب ولا حرام - أنتهى كلامي

vivid
02-27-2011, 01:56 PM
إستغفر الله
طلعت الزول ما عندو غيره عديييل


الصادق
انت العندك غيرة
وينا غيرتك من ذات البنطلون الضيق

مش كدا؟؟؟

بابكر عثمان مكى
02-27-2011, 02:11 PM
كيف يالصادق ..

تذكرت حادثة حقيقية تدل علي كبرياء المرأة السودانية تلك التي لم يغشاها ظلام الانقاذ حتي ذاك الوقت
جاءت إحدي زميلاتي خريجات مدرسة العلوم الادارية بجامعة الخرطوم للإلتحاق بالعمل في السعودية حيث تعاقدت من السودان
بوظيفة محاسبة حسب تخصصها وشهاداتها وذلك للعمل وقد شجعها ان الكفيلة إمرأة مثلها ولكنها عندما حضرت هنا فوجئت
بما لم يكن في الحسبان حيث العمل كان تقديم قهوة ونظافة بلاط وماشابه .. فاتخذت موقفا واضحا بأن رفضت العمل وقررت العودة الي السودان
وقالت للكفيلة ا نحن عزيزات النفس كريمات لانقبل الاعمال التي تحط من قدرنا وفرضت الكفيلة عليها كل انواع الحصار والغرامات وثمن تذكرة العودة ، ذهبت زميلتي واستعانت بالسفارة السودانية ولكن السفارة السودانية لم تتدخل في الامر عالاطلاق فدفعت زميلتي ثمن التذكرة وكل الغرامات وعادت للسودان

هي أشياء لاتشتري يالصادق .

.......
أعلم جيدا أن الحاجة لا ترغم الانسان علي إمتهان كرامته

روز
02-27-2011, 03:55 PM
اللهم أحفظ بناتنا السودانيات داخل و خارج السودان من الغش و الخداع و مصائب الزمن العجيب و المخيف ...


الصادق عبدالله ضرار
02-27-2011, 08:37 PM
الصادق
انت العندك غيرة
وينا غيرتك من ذات البنطلون الضيق

مش كدا؟؟؟

لما اعرف غيرتك من طرمبة العرقي الجنبكم وجهادك فيها بوريك غيرتي
بالمناسبه برضو منتظرك
الطرمبه
الكحيان
رايك في اسلوب المعامله
وفي موضوع جديد عاوز اعرف غيرتك فيهو
تابعنا

الصادق عبدالله ضرار
02-27-2011, 08:45 PM
والله يا الصادق من عرفتك لي اللحظة دي ما عارفك شايت وين

ياخي أنا برضاه لي أهلي ولا ما برضاه دي ما المشكلة المشكلة انو لا عيب ولا حرام - أنتهى كلامي

حاضرين ياسعادتك
عيب والله لكن كل زول عندو فهم للعيب
الشايفو ما عندك عيب
عندنا عين العيب
برضو انتهى كلامنا معاك

الصادق عبدالله ضرار
02-27-2011, 08:48 PM
ابز الزييك
لا كبرياء للمرأه الن إلا من رحم ربي من الحرائر
بنات بلدي بخير ووهن هنا نموذج لهن وإن لم تفعل تلك لبنت ما فعلته لما كانت سودانيه اصيله
فعزة النفس والكرامه ليست لدى كل الناس
فمن يهن يسهل الهوان عليه ....
ياحليل اخوات مهيره

عمار حبة
02-28-2011, 09:50 AM
الصادق عبد الله ضرار

قمة الأهانة للمرأة هى العمل كخادمة فى الخليج ولا مجال فى هذا للمكابرة
أوصلت رسالتك كاملة وأوصل رأيى بكل صراحة ان هذا عيب وعين العيب..
هل وصل بنا المقام لهذا الدرك الأسفل ولماذا هى الفرص ضيقة عليهن فى بلدهن
حتى يلجأن لهذه الحلول..
كل تقديرى واحترامى لك

شنبوو
02-28-2011, 11:18 AM
الاستاذ الصادق
سلام واحترام ،،

العمل في حد ذاتو مافيه مشكلة وبعرف كتير من بنات العرب
شغالات خادمات في السودان منطقة النيل الابيض ..
ولكن المشكلة ان تعمل السودانية في الخليج خادمة حيث مفهوم
الخليجين للخادمة اهانة وذل وانتهاك لكل الحرمات وخصوصا في
ظل الدور السلبي للسفارة السودانية في الخارج وعدم وقوفها بجانب
منتسبيها ونصرتهم ..
لو الكلام ده حدث ح يجر مشكلات لا حولة لنا بها
اسأل الله ان يفتح عقول الخارجية والقائمين بهذا الامر وايقافه فورا
وبدل ذلك العمل علي ايجاد فرص عمل في الوطن على الاقل لو تعرضت
لأي حاجة عندها ابوها او أخوها وحتى كل المجتمع متراحم
تحياتي

عثمان عبدالمنعم
02-28-2011, 12:16 PM
مشكور الاخ الصادق
تحية صادقة لتجدك انت واسرتك تنعم بالصحه والعافيه
اخى بالنسبه لهذا الاعلان انا كشخصى واعمل فى دولة الامارات والسعودية محاسب
وتكون المنصرفات باقل نسبه يعيشها العامل العادى البسيط
1/ ثلاثه وجبات ( سادوتش فقط بيض + جبن ) ( 5 درهم للسادوتش 5*3 = 15 درهم 15*30 = 450 درهم
2/اقل مشوار ليموزين داخل الامارات ب 20 درهم افترض مشوار واحد فى اليوم ب 20 درهم = 600 درهم
3/ مكالمات واتصلات لاهلها فى السودان اليوم ب 10 درهم كادنى شى 300 درهم
4/ اغرض خاصه مستلزمات خاصة نسائية 250 درهم
الاجمالى 1600 درهم

المعادلة 1600 + سكن = 1000 درهم
يعنى نقول المستخدمة لازم يكون عندها 600 فائض عشان تعيش حياة كريمة يعنى طول عمرها مديونه ومافى تحويل ولا مجاملات
فهذا هو الوضع الفعلى والمعاش فى الامارات والحقيقه ومن المفترض الناس توعى وتعرف الحقائق وتتعامل بالمنطق وليست بالتظاهر .

الصادق عبدالله ضرار
03-02-2011, 04:39 AM
مشكور الاخ الصادق
تحية صادقة لتجدك انت واسرتك تنعم بالصحه والعافيه
اخى بالنسبه لهذا الاعلان انا كشخصى واعمل فى دولة الامارات والسعودية محاسب
وتكون المنصرفات باقل نسبه يعيشها العامل العادى البسيط
1/ ثلاثه وجبات ( سادوتش فقط بيض + جبن ) ( 5 درهم للسادوتش 5*3 = 15 درهم 15*30 = 450 درهم
2/اقل مشوار ليموزين داخل الامارات ب 20 درهم افترض مشوار واحد فى اليوم ب 20 درهم = 600 درهم
3/ مكالمات واتصلات لاهلها فى السودان اليوم ب 10 درهم كادنى شى 300 درهم
4/ اغرض خاصه مستلزمات خاصة نسائية 250 درهم
الاجمالى 1600 درهم

المعادلة 1600 + سكن = 1000 درهم
يعنى نقول المستخدمة لازم يكون عندها 600 فائض عشان تعيش حياة كريمة يعنى طول عمرها مديونه ومافى تحويل ولا مجاملات
فهذا هو الوضع الفعلى والمعاش فى الامارات والحقيقه ومن المفترض الناس توعى وتعرف الحقائق وتتعامل بالمنطق وليست بالتظاهر .

جاء الحق
لهذا نعرف ان هذه الوظائف مدخل لخروج البنات للعمل في الخرج ويصطدمن هناك بواقع مرير فما تجد إلا أن تبيع نفسها إلا من رحم ربي ...
الحكايه ما عناد ومكابره الموضوع موضوع إنو البنت دي لو إشتغلت في بلدها خدامه بكون أحسن ليها ... بتوفر حاجات كتيره واقلها البهدله ...
ياباشمهندس باقيلك كان إشتغلن خدم بوفن
وكمان كان الشركات طلع من النوع البجيبو البنات ويفكوهم يدبروا حالهم بعد ما تكون الواحده إشترت التأشيرة بالقداما والوالراها تبقى مصيبة كبرى
بلادنا مليئة بالخيرات لكن .....

الصادق عبدالله ضرار
03-02-2011, 04:43 AM
الصادق عبد الله ضرار

قمة الأهانة للمرأة هى العمل كخادمة فى الخليج ولا مجال فى هذا للمكابرة
أوصلت رسالتك كاملة وأوصل رأيى بكل صراحة ان هذا عيب وعين العيب..
هل وصل بنا المقام لهذا الدرك الأسفل ولماذا هى الفرص ضيقة عليهن فى بلدهن
حتى يلجأن لهذه الحلول..
كل تقديرى واحترامى لك

اخونا عمار حبه
كفيت ووفيت ... ولقد عرفنا العيب في تفاصيل الحياه اليوميه البنت لما تعمل حاجه بقولوا ليها عيب
حجه معديه كده لا تعنيها ربما
يبقى انا اوافق ان تذهب أختي للعمل كخادمه واقول ان هذا ليس عيب
ما لهم كيف يحمون

الصادق عبدالله ضرار
03-02-2011, 04:47 AM
الاستاذ الصادق
سلام واحترام ،،

العمل في حد ذاتو مافيه مشكلة وبعرف كتير من بنات العرب
شغالات خادمات في السودان منطقة النيل الابيض ..
ولكن المشكلة ان تعمل السودانية في الخليج خادمة حيث مفهوم
الخليجين للخادمة اهانة وذل وانتهاك لكل الحرمات وخصوصا في
ظل الدور السلبي للسفارة السودانية في الخارج وعدم وقوفها بجانب
منتسبيها ونصرتهم ..
لو الكلام ده حدث ح يجر مشكلات لا حولة لنا بها
اسأل الله ان يفتح عقول الخارجية والقائمين بهذا الامر وايقافه فورا
وبدل ذلك العمل علي ايجاد فرص عمل في الوطن على الاقل لو تعرضت
لأي حاجة عندها ابوها او أخوها وحتى كل المجتمع متراحم
تحياتي

الاخ شنو لك التحيه
نحن قلنا إنو العمل في حد زاتو ما عندنا كلام فيهو
لكن ان تكون البنت السودانيه ضحية لمثل هذه العصبات التي تتاجر بالبشر وتسوم الخادمات سوى في البيوت او اللائي لا يتم توفير عمل لهن بل وتفرض عليهن أتاوات شهريه للجهة المستقدمه ....
البنت السودانيه زيها مافي وكريمه وعزيزه
انا شخصيا عندي عيب

جبصي
03-02-2011, 07:39 AM
مشكور الاخ الصادق
تحية صادقة لتجدك انت واسرتك تنعم بالصحه والعافيه
اخى بالنسبه لهذا الاعلان انا كشخصى واعمل فى دولة الامارات والسعودية محاسب
وتكون المنصرفات باقل نسبه يعيشها العامل العادى البسيط
1/ ثلاثه وجبات ( سادوتش فقط بيض + جبن ) ( 5 درهم للسادوتش 5*3 = 15 درهم 15*30 = 450 درهم
2/اقل مشوار ليموزين داخل الامارات ب 20 درهم افترض مشوار واحد فى اليوم ب 20 درهم = 600 درهم
3/ مكالمات واتصلات لاهلها فى السودان اليوم ب 10 درهم كادنى شى 300 درهم
4/ اغرض خاصه مستلزمات خاصة نسائية 250 درهم
الاجمالى 1600 درهم

المعادلة 1600 + سكن = 1000 درهم
يعنى نقول المستخدمة لازم يكون عندها 600 فائض عشان تعيش حياة كريمة يعنى طول عمرها مديونه ومافى تحويل ولا مجاملات
فهذا هو الوضع الفعلى والمعاش فى الامارات والحقيقه ومن المفترض الناس توعى وتعرف الحقائق وتتعامل بالمنطق وليست بالتظاهر .

أخونا عثمان عبدالمنعم

الشغالة ياسيدي بتكون ساكنة مع رب العمل في البيت وكل المصاريف التي ذكرتها عدا التلفون بتكون علي رب العمل

أحيان كتيرة حتى التلفون بيكون علي رب العمل

محنك
03-02-2011, 07:39 AM
فى ناس قاعدين فى السودان ما عارفين الحاصل بره

وفى ناس بفتكروا انو الشعب السودانى درجات

عشان كده انا متاكد انو العاملين فى الخليج رجال ونساء سيرفضون من واقع ظروف عمل هذه الشريحة دا ثانيا ( ولكن اولا ) لان الشعب السودانى بعزته وكرامته لا يقبل ولو اشترط الاعلان موافقة ولى الامر لما وجد واحدة

على الحكومة وديوان الزكاة المليارى تولى المساكين والفقراء فالمال مالهم . قبل ان تقول حتى انت يا بروتس

انا ارفض بشده

هجور
03-02-2011, 01:53 PM
حسبيا الله ونعم الوكيل
انا متأكده إنو في عشرات السيدات إنهالن علي
تلك الوظيفه بل جعلوا الواسطات تقع وتقوم ..
كل له ظروفه الخاصه ولكن انا برا يا اخي جبصي
مهما دعت الظروف لاأقبل علي نفسي ولا علي سودانيه أن تلجاء الي تلك الوظيفه
مامعروف الظروف تكون كيف والغربه بطاله ما جربتها بس بتخيل دايما مثلآ لو كنت بعيده
عن اهلي ماذا سيحصل حتي لو كنت مع زوجي ناهيك وانا إمرءة ولوحدي في ز من لا يعرف
الرحمه انا بناشد إي سودانيه ان لا ترضي لنفسها هذه الاهانه جد هي إهانه
والخالق رازق هنا وهناك ,,,,,,,,,,,,,,,,,,,,,

روز
03-02-2011, 02:01 PM
هجور
تحية طيبة و سلام
و منورة المنتدى بردك الرائع
بصراحة أثار إعجابي ردك القيم و الجميل ..
و زي ما قلتي الخالق الرازق هنا و هناك
فلكي جزيل الشكر
مع كل الود و التقدير ...

الصادق عبدالله ضرار
03-03-2011, 05:30 AM
فى ناس قاعدين فى السودان ما عارفين الحاصل بره

وفى ناس بفتكروا انو الشعب السودانى درجات

عشان كده انا متاكد انو العاملين فى الخليج رجال ونساء سيرفضون من واقع ظروف عمل هذه الشريحة دا ثانيا ( ولكن اولا ) لان الشعب السودانى بعزته وكرامته لا يقبل ولو اشترط الاعلان موافقة ولى الامر لما وجد واحدة

على الحكومة وديوان الزكاة المليارى تولى المساكين والفقراء فالمال مالهم . قبل ان تقول حتى انت يا بروتس

انا ارفض بشده

محنك سلام
الزكاة تم شطب جميع المصارف
والتركيز على العاملين عليها
إلا من فتات للفقراء
عربات فارهه ومكاتب كذلك
وشعب يموت من الكلي والسرطان حمانا الله واياكم
شكرا للمرور

الصادق عبدالله ضرار
03-03-2011, 05:32 AM
حسبيا الله ونعم الوكيل
انا متأكده إنو في عشرات السيدات إنهالن علي
تلك الوظيفه بل جعلوا الواسطات تقع وتقوم ..
كل له ظروفه الخاصه ولكن انا برا يا اخي جبصي
مهما دعت الظروف لاأقبل علي نفسي ولا علي سودانيه أن تلجاء الي تلك الوظيفه
مامعروف الظروف تكون كيف والغربه بطاله ما جربتها بس بتخيل دايما مثلآ لو كنت بعيده
عن اهلي ماذا سيحصل حتي لو كنت مع زوجي ناهيك وانا إمرءة ولوحدي في ز من لا يعرف
الرحمه انا بناشد إي سودانيه ان لا ترضي لنفسها هذه الاهانه جد هي إهانه
والخالق رازق هنا وهناك ,,,,,,,,,,,,,,,,,,,,,

الابنه هجور
شفتي الغربه الما جربتيها دي
بالنسبه للخدم ما تتخيلي اي شئ
لانها فوق التصور

عثمان عبدالمنعم
03-03-2011, 11:51 AM
أخونا عثمان عبدالمنعم

الشغالة ياسيدي بتكون ساكنة مع رب العمل في البيت وكل المصاريف التي ذكرتها عدا التلفون بتكون علي رب العمل

أحيان كتيرة حتى التلفون بيكون علي رب العمل

الاخ جبصى تحية وسلام
اهل مكة ادرى بشعابها
الحمد لله عندنا شغالات ونفس القوانيين تتنطبق عليهن
والايام دى الحبش رفعو قرون
يعنى الحبشية بنجيبها ب 1200 الان دايرة 1500 درهم