مسمار (بالعشرة) ..المريخ يقهر الهلال

[ايهاب صالح سليمان]

دوزن اشاوس المريخ بالامس اجمل واحلى سهرة كروية في استاد الفن والمتعة وامام الرئيس السوداني عمر البشير ورئيس الاتحاد الدولي بلاتر ورئيس الاتحاد العربي بن همام والعديد من قادة الرياضة بالبلاد وخارج البلاد....امام كل هذا الحشد الراقي والكبير قدم لاعبو المريخ اجمل مباراياتهم هذا العام علي الاطلاق ولعبوا كم لم يلعبوا من قبل واستطاعوا مسح الصورة السيئة التي ظهروا بها امام الهلال المباراة السابقة و استطاعوا ان يقهروا الهلال وبعشرة لاعبين بعد طرد علاء الدين يوسف (الصحيح ) وذلك بهدف ولا اروع من راسية فيصل العجب في الربع الاخير من المباراة التي شهدت تالقا جماعيا من لاعبي المريخ مع افضلية خاصة لكنيد وايمن الكاس ودامر وقلق الذي سبب قلقا شديدا للاعبي الهلال ....وتبارى لاعبو المريخ في اضاعة الفرص التي اتيحت لهم خاصة قلق والعجب ...ولم يستطع لاعبو الهلال مجاراة لاعبي المريخ في اداءهم الرفيع ومستواهم الفني الكبير ...وظهر اختفاء هيثم مصطفى اللاعب الفنان الذي كان غائبا تماما مع الضعف الذي صاحب دفاع الهلال ما عدا ريتشارد ....نقول مليار مبروووووووك للمريخ اخر دروع الانقاذ (درع الشهيد الزبير ) وهاردلك للهلال
[marq=down:8db91040e5][glow=#FF3333:8db91040e5]ايهاب صالح سليمان [/glow:8db91040e5][/marq:8db91040e5]

[Nazar Hussien Babkir Frie]

الاخ : وعد اللقيا :-احر التهاني بمناسبة الفوز الغالي والمستحق على الموج الازرق بعد ثلاثية قاسية ومؤلمة اذاقتكم طعم السهر لدرجة انها اقالة مجلس ادارتكم بقيادة الوالي الغالي واعادت اليكم وجه السعد بعد طرده شر طردة عقب الفوزين المتتالين وبرضو اولهم كان بالعشرة ، اما ثانيها فكان بضربات الحظ .
وقد كتبنا لكم عقب الثلاثية الشهيرة بان لنا الكورة وليكم المقصورة وبرضو تاني بنقول ليكم مبروك الفوز وكمان المشاركة في البطولة العربية عن طريق الواسطة لانكم لم تستحقونها عن جدارة ، وذلك لانكم خرجتم خالي الوفاض من بطولات الموسم الفارط بدون رصيد يعني (ميطي) ، رغما عن تواجد عجبكو زميدو وشيخ معطوب والنونو وشيكوزي كمان والذي ستر عليه الله بالامس الاول وذلك لانه كان حاجز للعودة مبكرا من حيث اتي ، والحمد لله ، فقد كان فوزكم بمثابة البلسم لجراحكم الغائرة ، وكمان ازيدكم من الفضل نحن ابياناها عديل لاننا من انصار وزمان كنا بنفوز عشان الزبير محمد صالح لا غيره ، وليس لانو درع الانقاذ لنو نحن ناس تجمع عديــــــــل .
فياخي التهاني موصولة لنادي المريخ فرع المؤتمر الوطني بقيادة ابن فداسي الوالي الغالي (ودي طبعا مستلفة من الواد اللعاب المرحوم الوالي الدين ) .لذلك كانت لنا دوما الاولوية وبعدها تاتي اندية التوالي بقيادة مريخ السعد ، وتعرف ياود صالح لاول مرة اتعشي والهلال مغلوب تعرف ليه لانو والله الهدف الجا دا اعاد لى ذكريات اول مبارة دخلتها بين الهلال والمريخ وكان برفقتي استاذي ودفعتي في الجامعة الاستاذ الشاذلي الاغبش وبرضو انتهت بفوز المريخ بهدف المرحوم سيكا طيب الله ثراه ، ودي حقيقة بكيت فيها لانو الاستاذ كان قاليني مريخابي بعدها انقلب على ضحكا وتهريجا لحدي ما وصلنا البركس في جامعة الخرطوم وقال لاسماعيل التاج مصطفي صاحبك نزار ما طلع هلابي والله لو عارفو هلالابي ما كان سقتو معاي الكورة ، ولكني اقول ما اشبه الليلة بالبارحة لانو ممكن تفوزو في الودي ومباريات المناسبات لكن في الدوري الفوز لنا عنوة واقتدارا، بعدها غادرت الى مغرب دنيتي الافل ؟؟؟؟!!!!
فمليون مبروووووك ليكم ولى الروبي ولكل محبي الاحمر الوهاج ولصاحبكم مزمل يعقوب عراب صفقة الشيخ معطوب ولقليينو ودامركو وغيرهم ولنا لقاء قريب حينها حترجعو شيكوزى لاهله مهزوما وحزينا والمرة دي خروج نهائي بلا عودة ويا خوفي على وجه السعد من الرجوع خالي الوفاض ، وحنرجع التوالي احياءا لذكري الوالي الغالي ولا ازيد .
الزعـــــــــــــــــــــــــــــل مرفوع .
ممثل دار هلال في المنتدي الرياضي
ابو فاطمة

[ايهاب صالح سليمان]

الاخ الغالي نزار ....اكيد الزعل مرفوع بس دي راجعة ليكم انتو .....والزعلان كلمو اليقع الخزان ...ههه
شكرا لتهنئتك وده من ذوقك ...وروحك الرياضية ....حارد ليك حسب نقاطك :
** محمود سعد (وش السعد) كان لازم يرجع البلد ... الخواجة برانكو شقلب ناس المريخ فكان ان انهزموا من الهلال ...معقولة زي قلق ده يلعب طرف ....قلق شديد في النص ..ومع العجب خطير ...
**نحن لينا المقصورة وبرضو لينا الكورة ...
**شيكوزي مبالغة من الاحراش لكورة الهلال .....زولو كان لاعب براه.....وين سيدا ؟؟؟....عجبكو
**المباراة يا نزار كانت موثقة من قبل الفيفا ذاتا ...بلاتر اشاد بالهدف الغالي .وبن همام ...والسعد والعالم كلو ...بعشرة لاعبين ....قلق مبالغة .....حسبو طبل هيثم مصطفى في قفص ...صح والا لا؟؟؟ علي الحرام انا مشيت حضرت الكورة مع الهلالاب في محلهم وكنت واثق انو فكي فوزي ما بدوم ليكم رغم اني حسيت ان الكورة ما راضية تدخل القوووون الا ان كنيد والعجب كان ليهم راي تاني .....
** واحد هلالابي نص الشوط التاني غالطني وحلف بالله انو هيثم مصطفى اتغير بلاعب نيجيري ....حسبو ده مغطي هيثم حتي من المشاهدين ....مبالغة لكن
** هلالابي تاني رسل لي رسالة بداية الشوط التاني قال لي مبروك عليكم الكورة .....
** احلي حاجة في الكورة قومة الهلالاب بعد قوون ريتشارد السااااااااااارق واااااااضح واراك يا نزار قمت معاهم ......ايمن الكاس ما خلا هيثم طمبل يشوفها .....وبهجة اكد لي انو قونو الفات في الرشيد فيصل كان صدفة عمياء وبسبب الرشيد ذاتو ....الله يجازيه .....بس شيكوزي مبالغة لكن
** اسئلة لنزار والاهلة .:.:.؟؟؟ من هو الفريق الوحيد الذي احرز كاس خارجي للسودان ؟؟؟؟؟
** من هو الفريق الذي فاز بالدوري من غير تعادل او هزيمة ؟؟؟ وبتعادل واحد مرة اخرى ؟؟؟؟؟
** من هو الفريق صاحب اجمل واحلي وانضر استاد في السودان ؟؟؟؟؟
** من هو الفريق الذي فاز باخر درع للانقاذ ؟؟؟ ومن هو صاحب الهدف ؟؟؟؟؟
ترسل الاجابات (محمولة جوا) عبر منتدى رفاعة ...ويكتب علي الظرف واحد صفر ....العنوان (الرد كاسل ) ...شركة عجبكو للاهداف الراسية الحاسمة ....وشركة شيكوزي( القابضة ) ...وكنيد (الرافعة)
ولا عزاء للمهزومين ......قلق شديد وعجب فريد وقون ويحيد ودرع مجيد ...وبلاتر شهيد .....
مع تحياتي ايهاب صالح

[نادر الداني]

الاخ الكريم وعد اللقيا
والاخوة في منتدى الرياضة ولكل الاهل والاحباب حبابكم عشرة والف
بعد التحية والسلامات للاخ وعد اللقيا كتباتك جميلة وردك تمام وعشرة على عشرة والظاهر عليك مريخابي جد اصيل ..
نقطة واحدة حبيت اقولها انو المريخ عبر تاريخه الطويل الممتد قبل ان يولد الهلال امتاز لاعبوه باللعب الرجولي وعدم الاستهتار بالخصم وبالحماس والقوة والغيرة على الشعار والنفس الطويل وعدم الاستسلام ولقد غابت هذه الملامح في اللقاءات الماضية ( الثلاثة ) مع فريق الهلال حتى شاهدنا كيف عادت تلك الملامح البطولية في ليلة الخميس الاغر حينما انتفض اولاد ابوالعائلة وجندلوا الهلال ووروهو العين الحمرا حينما كشرو ا عن انياب الجد وعقدوا العزم قبل المباراة على عدم التحدث او الحديث عن مكافأتهم وقالوا لجمال الوالي بالحرف الواحد ( نحنا حديثنا حايكون في الميدان وما عاوزين نتكلم عن المكافاءات الا بعد الكورة ) لان الموضوع اصبح بالنسبة لهم اثبات ذات لمحو آثار الهزائم الهلالية فكان لهم ما ارادوا بالعزيمة والاصرارا واللعب الرجولي وقد وضح ذلك منذ بداية المباراة والتي امتلكها المريخ تماما واختفى الهلال حتى خلنا باننانلاعب فريق درجة ثانية ( مع الاعتذار للهلال لانو فريق كبير ) لكن لاعبي الهلال اعطونا هذا الاحساس ..
كل من شاهد المباراة اكد ان المريخ كان بامكانه احراز اكثر من هدف طوال زمن المباراة وقد اعطانا المريخ هذا الاحساس من منطلق تطبيق اللاعبون لخطة مدربهم تطبيقا ممتازا كان نتاجه امتلاكهم للملعب وحصر الهلال في منطقته الدفاعية والدليل على ذلك تالق ريتشارد جاستن ومحمد ادم ولولاهم لحدثة كارثة في مرمى الهلال بينما غاب الباقون وآثروا التفرج على وسط المريخ الذي جندل وسط الهلال بتحركات قلق المزعج جدا والذي اثبت تفوقه في خانة لاعب الوسط المتقدم بينما تأكد احتياج المريخ منذ فترة لخدمات لاعب بمواصفات ميرغني كنيد والذي تألق بصورة ملفتة للانظار وهو العائد بعد غيبة ...
عموما انتهت المباراة وانطوت صفحة لابد فيها من اخذ العبرة والعظة فالهلال عليه ادراك السلبيات ومعالجتها وهي واضحة ووضوح الشمس اما المريخ فلقد وجد نفسه في المدرب الفذ محمود سعد واثبت رماته قوة فريقهم وان ما حدث لهم في الفترة الماضية كان مجرد كبوة جواد عاد بعدها المريخ اكثر قوة وثبات فهاردلك للهلال ومبروك المريخ الفوز التاريخي ونقول تاريخي نسبة لعظمة المناسبة وتشريف سعادة الريس والمستر بلاتر لها. فدائما ما يكون المريخ هو المريخ في المواقف الصعبة وعشت يامريخ موفور القيم
وللحديث بقية
نادر الداني

[ايهاب صالح سليمان]

مشكور اخي وعزيزي نادر الداني ....
وقد تعرفت اليك من قبل ان التقيك عبر الاخ الغالي وقريبك الرائع جدا محمد السر ابجبة وحدثني عنك وانا سعيد اننا معا علي درب منتدى رفاعة نتفيأ ظلالها من على البعد وعلي درب منتدى الرياضة التي كانت لي مع صفحاتها صولات وجولات عبر الصحف الرياضية السودانية برفقة الاخوان درمة وعلي البيتي في الهدف والمشاهد والقمة ....وايضا علي درب الاحمر الوهاج ...مريخ السعد ونصر البلد ....
شكرا لمرورك وردك واشادتك ومداخلتك الاروع ......وانا وانت والشباب المرخاب ورا نزار لحدي ما يسلم الراية ...علي فكرة يا نزار اهداف العجب الراسية لا تزال تدك حصون الاهلة والمرة دي اتنين راسيات في هلال كادوقلي ...
ايهاب صالح سليمان ......مع تحياتي