هدف في الذاكرة

[نادر الداني]

كلما ارجعت ذاكرتي للوراء قليلا اتذكر هدف مهاجم المريخ جعفر القادم من فريق العباسية درجة اولى فيي مرمى هلال بورسودان في كأس السودان ، حيث لعب المريخ امام هلال بورسودان وكانت المباراة حامية الوطيس حيث تقدم هلال بورسودن على المريخ بهدفين نظيفين ليعادل المريخ وتستمر المباراة حتى انتهى الزمن الرسمي وكنت وقتها اتابع المباراة عبر الاثير بصوت المعلق الرياضي الرشيد بدوي عبيد حيث ذكر عباراته الشهيرة (( دلوقت حسب زمني انا المباراة انتهت وبنلعب في الزمن بدل الضائع )) وفعلا تستمر المباراة وتمر اربعة دقائق ونص في الزمن بدل الاصلي وهذا حسب ساعة الرشيد بدوي عبيد وفي الدقيقة الخامسة من الزمن الضائع يقول الرشيد حاجة عجيبة دلوقت في تغيير في المريخ طالع قاقرين وخاشي جعفر واربعة دقائق ونص في زمن بدل اصلي خاشي جعفر وطالع قارقرين والكورة في زمن بدل اصلي )) وكانت الكورة فاول لصالح المريخ بعد وسط الملعب ونفذها سكسك مباشرة على رأس جعفر الذي اودعها الشباك مباشرة من اول لمسة وهنا صاح الرشيد بدوي عبيد في دهشة واستغراب وباعلى صوته ( جعفر الخش قبال ثانية جعفر الخشه قبال ثانية كررها اكثر من ثلاثة مرات باندهاش واستغراب بحرز الاصابة الثالثة للمريخ وبعدها وضع اللاعبون الكورة في دائرة السنتر واعلن الحكم بعدها نهاية المباراة بفوز المريخ على هلال بورسودان بثلاثة اهداف مقابل هدفين وخرج الجميع ولم يصدق احدهم ما حدث باستاد المريخ حيث احرز اللاعب حعفر هدفا لن ينسى من ذاكرتي ابدا ..
ولكم كل التحايا والتقدير
نادر الداني

[نـــــزار الدانـــــــــي]

تحياتي لك أخي ود الداني
وتحية خاصة لكل الأهل والأحباب والأصدقاء برفاعة

إنت لسع مذكر الأيام دي ،،، المريخ كان زمان ، تعال شوف هسع وخلينا في الواقع الأليم ،،، الناس ماشين لقدام ونحن ماشين للوراء ،،،،

بعدين في ملاحظة :
يا أخي انت مفروض تكون محايد كمشرف للمنتدى الرياضي ، لكنك عملتها لينا كلها مريخ أي نعم أنا مريخابي وكل مريخابي بيحب الحديث عن المريخ لكن برضوا الواحد مفروض يكون منصف ويتحدث عن الفرق الأخرى لأنو الفرق الأخرى لها مشجعين ومؤيدين ومتابعين ولا انت عايز تقلب لينا المنتدى جريدة المريخ وجريدة المشاهد الكلها مريخ .

زمان اللاعبين كانوا بيدفعوا من جيوبهم للرياضة ومع ذلك حققوا كاس أفريقيا وكانت الفرق السودانية ليها شنة ورنة وهي بعبع مخيف لكل الفرق العربية والأفريقية وأذكر مرة اطلعت على جريدة الرياض السعودية وكان فيها صفحة تتحدث عن الرياضة أيام زمان فجايبين تعليق لمباراة الهلال السعودي مع الهلال السوداني في السعودية والكاتب فرحان جداً بمستوى الهلال السعودي وإنوا مثل الكرة السعودية خير تمثيل واستطاع أن يقف نداً قوياً للهلال السوداني بل واستطاع أن يحرز هدفاً و و و و و و المهم في النهاية اتخيل النتيجة طلعت كم بعد الشكر دة كله .... 3/1 لصالح الهلال السوداني طبعاً مع الرأفة وبرضوا هم فرحانين جداً وبنططوا من الفرح لأنو ياأستاذ الفرق السودانية كانت زمان معروفة بقوتها

أما اليوم والحال يغني عن المقال اللاعبين بيدفعوا ليهم ملايين وما قادرين يجيبوا كاس الاتحاد الأفريقي أضعف منافسة على مستوى الأندية الأفريقية بل بنخرج من الأدوار التمهيدية ولمن نهزم اريتريا بنفرح ،،، دة كلام ياناس ....

وأذكر أنني شاهدت مباراة الهلال السوداني مع الترجي التونسي ووقتها بعد نهاية المباراة مباشرة سأل معلق المباراة مدرب الهلال قائلاً رايك شنو بعد هذه النتيجة الكبيرة التي حققها الهلال ،،، وماكان من المدرب إلا أن قال مباشرة هي مش نتيجة كبيرة .... بالله عليكم دة ما معلق فضيحة والأطم من ذلك أننا نعتبر فوزنا على أحد الفرق الأفريقية بنتيجة 2 / 0 نتيجة كبيرة بالله دة كلام ....واتفرجوا ياجماعة ........

[نادر الداني]

اخي وشقيقي نزار
اولاً انا سعيد جدا بمشاركتكم معنا في المنتدى واتمنى ان تواصل الكتابة خاصة في منتدى الرياضة لانو قاحل جدا والناس اصبحت ما بتتكلم في الرياضة خاصة المغتربين لانهم بعتبروا الكتابة في الرياضة ضياع وقت ساكت واكبر دليل على ذلك الشح الكتابي في المنتدى الرياضي ولا امكن لانو الدوري واقف وعلى العموم مرحب بيك ضيف عزيز على المنتدى ورواده .
بالنسبة لكلامك في قصة ان اكون محايد اقول ليك ما المانع في ان ابدي لونيتي وان اكون مشرف في نفس الوقت يااخي انا شايف انه مافي مانع من ذلك لانو اصلو مافي زول اصلا بكتب في الرياضة وبعدين منو القال ليك انا بكتب عن المريخ بس انت قريت كل كتاباتي ولا كلامك ساي خارم بارم ( مع الاعتذار بدون قصد )
ثانياً انا بتحدث عن الرياضة بصفة عامة اكثر من المريخ والهدف من المنتدى الرياضي هو البحث عن مخرج للكرة السودانية من التدهور الحاصل في البلد والهلال والمريخ اكبر فريقين في السودان بالرغم من امكانياتهم المتوضعة مقارنة طبعا بالاندية العربية الاخرى .
الكرة السودانية زمان كانت افضل من الكرة السعودية ده كلام ما فيهو اي شك واي زول عارفه تماما كمعرفتي بك اخي ولكن نحنا وين وهم وين الآن نحنا عاوزين نتكلم عن اسه والحاصل شنو في الاندية والفرق الوطنية والشباب عاوزين نتكلم عن المراحل السنية وكيفية النهوض بالرياضة السودانية خاصة كرة القدم ..
ولمن نذكر هدف في الذاكرة بنحاول ننعنش الذاكرة شوية وندخل بعض المرح ونلطف الجو شوية ثم نعود للبحث عن مخرج للكرة السودانية من جديد ولازم طبعا ننوع شوية في الكتابات حتى لا يمل القارئ ..
وتركيزي على المريخ فيه بعض الانتماء لا استطيع ان انكر ذلك لان دافعي في الكتابة هو المريخ العظيم وتأكد اخي نزار ان المريخ لن ولم يبق كبيرا الا بالهلال لان قوة الهلال في قوة المريخ والعكس صحيح تماما ..
اخر المداد ..
عندما يهل فجر الكرة السودانية تكون القيامة قامت ( كلمة قالها عمنا المرحوم عز الدين الداني طيب الله ثراه وجعل مثواه الجنة )
** ابوعنجة وإبراهومة وكمال عبد الغني وطارق احمد ادم واحمد آدم ( عافية ) اسما ء لا يمكن محوها من الذاكرة اصبحو ا الآن مدربين يشار اليهم بالبنان واستفادوا من القمة .
*** هل في الامكان ان تتطور الكرة السودانية ؟ مجرد سؤال
*** قرار جديد سوف يصدر في مقبل الايام القادمات سوف يساهم في تطور الكرة الرياضية وكنا ننتظره بفارق الصبر من زمان ترقبوه بالمتابعة للرياضة ..
*** واخيرا فاق الاتحاد العام من غيبوبته الطويلة وسوف يقرر ان ......
*** غدا نواصل