من كل بستان..زهرة.

[روان مصطفى سليمان]

فن التعامل مع الاخرين..

1) الاهتمام بمشاعر الاخرين.
2) مخالطة الناس ومشاركتهم.
3) حسن الكلام وحسن الاستماع.
4) تقدير الصنيع.
5) قضاء الحوائج.
6) حفظ الاسماء.
7) الفطنة واللباقة.
8) محادثة الناس على قدر عقولهم.



القران والاجازة..

يا صديقي وقتك كبير فاجعل منه وقت لحفظ القران
الكريم وتلاوته واعلم ان السلف الصالح كان الواحد
منهم يحفظ القران قبل ان يبلغ العاشرة من عمره
اينك منهم؟؟ انت انسان قوي العزيمة وارادتك تصل
الى القمة واعلم ان العلماء قد بذلوا الجهود لتحصيل
العلم لذا استغل وقتك لحفظ القران وتجويده .فالعلم
في الصغر كالنقش ع الحجر ..

انشودتي..
لغز السماء..

لنـــــــــا فضـــــاء ازرق مــــــزركش منــــــمق
كم نجمة في ليـــــــلة قنديلها معلـــــــــــــق
تبقى عيوننـــــــا لــــها طول الدجى تحـــــــدق
واي اقمــــــــار بــــــــه واي شمس تشــــــرق
كم غيمة مـــــــرت بــه بمائـــــــها ترقـــــــــرق
مرت على نجومــــــــــه فخلتها ستغـــــــــــــرق
لنـــــا فضـــــــــاء ازرق به الجمـــــــــــال ينطق



حكم وامثال..

احذر من الكريم اذا اهنته.
ومن العاقل اذا احرجته.
ومن اللئيم اذا اكرمته.
ومن الارعن اذا مازحته.

(واني ذقت الطيبات كلها فلن اجد اطيب من العافية , وذقت المرارات كلها
فلم اجد امر من الحاجة الى الناس .)
( واني حملت الصخر والحديد ,,فلم اجد اثقل من الدين.)
( واعلم يا صديقي ان الدهر يومان: يـــــوم لك , ويــوم عليك فان كان لك فلا
تبطر, وان كان عليك فاصبر.)
للاذكيــــــــــــــــــاء فقط!!

مع احمد خمس برتقالات في سلة, وامامه خمسة اطفال , فكيف
يعطي لكل طفل برتقالة وتبقى في السلة برتقالة؟؟؟؟؟؟؟؟؟

اصدار..
روان ووئام مصطفى سليمان.

[Nazar Hussien Babkir Frie]

كيفك وكيف ايامك ، وليس لدي ما اقوله سوي انو ربنا يحفظك ويرعاك وعيني عليك باردة ويلا واصلي بمثلما بداتي وكلنا معك .
متمنيا ان اجد مواضعيك الرائعة دائما في المقدمة ، قريبا سوف تاتي اليك العصافير من ابناء وبنات رفاعة ، لتحيلوا غربتنا الى جنة زاهية ونحن نشهد لكم بالتفوق والابداع والابتكار فانتم جيل المستقبل لرفاعة والسودان .
عمك وخالك
أبو فاطمة

[ابو النيييييز]

روان اذيييييك...
والله يا روان ما عندي لسه اطفال
لو كان عندي كنت جبتهم ليك وقعدتهم قدام كمان
لكن ان شاء الله قريب ح اعمل امهم وبعدها ح اجيبم ليك
بس خلي ليهم مكان فاضي جنبك
ولو ما خليتي ليهم مكان ح اخليهم ازعمطوك
..وانا اول ما سمعت ردك مشيت طوالي للاطفال البعرفم واقنعتهم ادخلوا عندك
وان شاء الله ح تشوفيهم قريب معاك ...وديل اولاد اختي خلي بالك منهم
وعشان انتي ذيهم المره الجايه ما تقولي لي عمو نزار ...قولي خالو نزار
...
في حاجه تانيه يا ست الناس
الحاجه العارفها انه اطفال رفاعه اولاد شاطرين وحققوا نتايج حلوه
اها نحن نعرفها كيف
ما تقولي لي؟
اول حاجه تقولي لينا انت نتيجتك كيف
الحاجه التانيه تفتحي المجال للاطفال الباقين اقولوا نتيجتهم
وفي نهاية الاجازه نختار مع بعض احسن 3 نتايج علشان نديهم جوايز
واختاري انت الجوائز البتعجبك
وانا ح اقنع ليك ناس خالو وعمو وكل الكبار الفي المنتدي احضروا الهدايا
بس علي شرط يا روان
اذا فزتي انت بالجائزه...ح نقسمها مع بعض
موافقه؟؟؟
..بعدين ما تنطي

[روان مصطفى سليمان]

هاي عمو وكيفك خالو الكرور..
انا منتظرة اولاد اختك ياعمو ومرحب بيهم.
اما نتيجتي فالظاهر انك
ما قريت رسائلي الاولى في منتدى الاقتراحات اقراها
وانا هسي بقولها ليك :الحمد لله انا طلعت الاولــــــى
على المدرسة بنسبة100%.

اما نتائج الاصدقاء في رفاعة عرفتها بالتلفون وحاعمل
تهنئة ليهم وباقة ورد لكل متفوق..

بس انت جهز الهدايا (وبصراحة انا خايفاك انت التنط..) :wink: :wink:

وفي حاجة تانية يا خالو. انا عملت فقرة للاذكياء وفيها
لغز ياريت تجاوبه لانو مافي زول حلاهو..

باي..روان.

[ابو النيييييز]

رنو...شنو ياخي مالك ...اللغز بتاعك ده حرق لي روحي عديييل...لي ساعه بحاول احله وهو رافض...
لغاية ما راسي ازعمط من التفكير....عليييييك الله حليه لي انا بس وما بكلم زول
...وبخصوص نتيجتك فانا كنت متأكد انها ما ح تكون اقل من كده ...ولو السنه الجايه جبتي اقل من كده ح ازعمطك...والحاجه التالته قبل ما انساها والله قبل شويه كنت بتكلم مع صفويه وقلته ليها لازم تدخل المنتدي وتشارك معاك ( صفويه ديه بت اختي وهي ذي عمرك كده يعني اكيد ح تكونوا اصحاب) ...المهم يا ستي انا اصريت عليها تدخل هسي لكن طبعا علي دوووب ما تتعلم كيف الكتابه عاوزه ليها يومين ...انت اصبري عليها...اوكي يا خالو...دقيقه دقيقه تاني نسيت حاجه ...انا عارف اني معطلك وبتكلم معاك كتير لكن والله يا خالو بقيت بجي جاري جري علشان اشوفك كتبتي شنو الليله ...وعلشان اتكلم معاك...وان شاء الله بعد ما صفويه تدخل معاك ...تاني لما ادخل لازم ألقي كل يوم في موضوعين او تلاته...الكلام ده مفهوم ولا اعيده...ابيييت ما ح اعيده ...مفروض اكون مفهوم من اول مره ... اسمعي اسمعي دقيقه...اتذكرته تاني حاجه عندي نكته سمعتها من امبارح وقلت بس اجي اقولها لرنو علشان افقع مرارتها من الضحك وانت لو عاوزه ليك دقه الليله ما تضحكي...
المهم يا ست الناس : قالوا في مساطيل بلعبوا في الزلط ...البتضربه عربيه اكون بره...
( ده شنو مالك ما ضحكتي ...ما فهمتيها؟؟)...الليله الا تقولي لي حل اللغز حتين اقول ليك يعني شنو
...خلاص يلا مع السلامه علشان ما تجوطي فيني وتقولي لي اخرتي من كتابة الموضوع....يلا يا ست الناس وما تنسي تقري اية الاخلاص والمعوزتين قبل ما تنومي

[روان مصطفى سليمان]

هاي عمو نزار و خالو زعمطة...
شكلك يا خالو بتزعمط كتييييييير يعني جنك زعمطة..وعشان كده
حتتزعمط كتيير باين عليك!!
اما حل اللغز فهو : استعد..
جاهز..
اقوله ليك..
ما بتكلم زوول..؟
طب لو كلمت زوول..
خلاص ..خلاص.. طلعت زعاميطك..
(اوعى تجيب لي برطوش خال فيفيد....)
الحل هو.......
تصدق اني نسيته :wink:
بكرة بتذكره ليك..
عشان اقوله ليك بعد بكرة..(هاهاهاها).
مكافاة ليك لانك صبرت وقريت كل السطور دي وما
زعمطني حاديك لغز تاااااااااااني..
لكن اقراهوو في الموضوع بتاع فكر معنا (للاذكياء).

ياعمو..
انا دايما بقرا اية الكرسي لكن اية الاخلاص دي جبتها
من ويييييين؟ :lol: :lol: :lol:


اما نكتتك فهي مزعمطة ومميتة فهمت ولا ما فهمت؟؟؟؟؟؟ :wink: اكيد فهمت..
bye...روان

[ابو النيييييز]

اذييييك يا روني
اول حاجه وين كنتي امبارح
اتكلمي سريييييييييييييييييع
تاني تغيبي يوم واحد ح اجيك في الرياض وح ازعمط ليك شعرك العاجبك ده
...ما تضحكي انا ما بضحك معاك :x :x :x
الحاجه التانيه انا اللغز بتاعك حليتووووووو... يلا انتي حلي اللغز بتاعي ده ولو غلبك كلمي بابا احله ليك
يلا حليه
جدادتي الربطا تجيب الخبر من قعر الواطا

الحاجه التالته عمو نزار التاني قال ليك بجيب ليك هديه ...الموضوع ده ماتسكتي عليه نهائي كل يوم اسأليه وانا برضه ح اسأله من الموضوع ده...وما امشي اجيب ليك باربي بتاعة البقالات دي...اتأكدي اولا انها الاصليه وعلي فكره انا بعرف الاصليه ذي جوع بطني وريني ليها وانا ح اقول ليك اصليه ولا لا...اتفقنا...
الحاجه نمره اربعه انت مالك مكشوفة حال كده ...يعني لازم توري الجيران وناس البقالات انو خالو نزار غلط وكتب اية الاخلاص بدل صورة الاخلاص...كويس انا ح اوريك...شفتي تاني لو غلطي ليك في حرف ما ح اسكت ليك
الحاجه نمره خمسه...روني انت بتعرفي ترسمي ...ما تقولي لي ما بعرف...لاني جني وجن البت المزعمه الما بتعرف ترسم
يلا خلاص كفايه كده لاني جعان جعان جعان ...بمناسبة جعان دي ...انت ما تعملي لينا في المنتدي بتاعك ده تورتات وحركات والحساب النص النص...انت نص وعمو نزار فريجون نص وانا علي الاكل

[Nazar Hussien Babkir Frie]

صبحك ومساك فل وورد وياسمين :-
طبعا خالو نزار الكرور عاوز يغشك وانا عارفو شيطان ، وعاوز يقاسمك الجائزة زي ما كتب ليك اول مرة ، وانا عاوزك ما توريهو الجائزة البتصلك بكرة مع بابا ، ويمكن نخليهو يفكر فيها لحدي ما يزمعط شعروا ، ويممكن يكون ما عندو شعر شعر يعني اصلع عديل كده ، عشان كده بهددك بانو حيزمعط ليك شعرك العاجبك ده ، وعشان كده ننزل لغز الجائزة حقتك في موقعك الخاص للاذكياء فقط وكان توصل للاجابة الصحيحة انا بوعدك ارسليهو جائزة مماثلة رايك شنو ؟؟؟
بخصوص الغازك والله العظيم عديل كده غلبتني ، وبيقوليك الكلام ده سر واوعي تكلمي زول انا والله جني وجن الحساب ولمن كنت قدرك كنت متفوق فيهو بس في سادسة جلدني استاذ فيصل ابو شريعة جلدة الله ما اوريك ذيها ، بعدها بيقيت بكره الرياضيات كرهي لملاح الورق ولحدي الان ما حافظ جدوال الضرب ، بس بتي فاطمة شاطرة وجات الاولي ذيك وقفلت الحساب وانا طلبت منها تشففني حلول اللغز وبعدين لمن يصلني ردها بحلو وبرسلوا ليك .
ثانيا خالو نزارالكرور باينعليهو جنو اكل عاوزنا نعمل التورتة وبعدين ياكلها كلها وما اديننا منا اي حتة ، عشان كده بنكلم صفوية بت اختو تعمل ليهو براهو ، وبعد ما يشبع ارسل لينا الباقي في الرياض رايك شنو .
وسلام ليك ولخالو نزار الكرور وبت اختو الصغيرة صفوية .
عمك وخالك
ابوفاطمة