المساعد الشخصي الرقمي

مشاهدة النسخة كاملة : مكتبة عبد الرحمن الريح


الرايح
09-14-2010, 07:24 PM
حكمة

حد يشعر بالسعادة يمشى يختار البعـــــــاد
حكمه والله وحكاية تشغل اذهان العبـــــــاد
ناس بتتعذب وحيدة ونــــــاس بتنعم بالوداد

قبل ما تشوفك عيونى بيك سعدت وقلبى راد
نظرة فى مراة خدودك احلى من كسب الميعاد
يا جمال يا عاطفه صادقة انت بتحب العنـــــــاد
ولا بتحاول بدلك تشــــــــــــــغل الروح والفؤاد

احكى لى قصة غرامك كيف بديت الحب زمان
وكيف بديت فى الحب كلامك يا ينابيع الحنان
كنت بتبادل المحبه ولا بتعاند الاحــــــــــــــبة
ومقصودك انبل مــــــــــــــــــــــــــــــــــــــراد

ناس بتنعم بالموده وليها مجد الحــــــــب يعود
وناس تحاول ليها مدة وما لقت غير الصدود
حكمة والله وحكاية ادهشتنى من البدايـــــــــة
وكيف تكون بكرة النهاية لو عنادك شايفو زاد

الرايح
09-14-2010, 07:26 PM
خداري

خداري البي حالي
ماهو داري جافاني
متين يزورني حبي
محياهو يضوي داري
أقول جلست مره
مع الطير الخداري
من بعدو في هواهو
و لي روحي كم أداري
إيه قصدوا من عذابي
لو ما قصد وداري
كل ما رأيتو باسم
الطيب يجيني ساري
كل ما رأيتوا تايه
يزداد علي حساري
لولاهو ما إشتبهت
في يميني أو يساري
لولاهو ما صبرت
على ذلي و إنكساري
في فكرة الكواكب
و الأنجم السواري
و الحور مع جمالن
بالنسبه ليك جواري
أظهر أمام عيوني
لا تبقى متواري
أنا جارك البحبك
أوعك تخون جواري
لو ما حبيبي يرحم
لاشك في دماري
نار الغرام صلتني
في الأدمع إنهماري
ما دام صبحت عاشق
و الحب صبح ثماري
سيبوني في الأرايك
أسجع مع القماري

الرايح
09-14-2010, 07:28 PM
الزمان زمانك

أهدى لي مـن فـضـــلـك نـظـره فى رمانك
يا الفريـــــــد فـى عصرك قلبى فاقد امانك
حرام عليك تهجرنى وترضى بى حرمانك
بالكـمــال شــرفـــــت مـنــاطق ام درمانك
وبالجمال امــتــــــزت عـلـى شباب أزمانك
يا أنيس الصـيـــــــد أنــا فى الغرام إنسانك
انت روح شعـــرى وانا فى الشعر حسانك
ان قصدت هلاكــى تـجــدنـى مـن فرسانك
وان عـطــفــــت عــلـــى ذاك مـن إحسانك
يا الحنـيـــن فـى نفـسك قولى ويـنه حنانك
شلت قلـــبـى ودمــى خـضـبـت بيهو بنانك
ان مرقت تـــمــر فى الـروض عـلى افنانك
النجوم تـتـغــزل فــى بـيـاض اسنانك
بالله يافتان عطفك على ولهانك
زبت فى الامى وعقلى ضاع فى رهانك
برضى خاضع ليك انا ياحبيبى مهانك
ان نكرت هواى ورينى ايه برهانك

الرايح
09-14-2010, 07:31 PM
يا مدلل

يا مـدلل سـيب دلالك دا
هـاك قلبي هديتو ليك وردة
يامـدلل ايـه حصل مني
اسبوع كامل بقيت تغيب عني
احب شوفتك الليها متمني
دلالك سيبو حن علي زورني
يـا مـدلل ياشـبيه الفـل
احـبك انت وانت سيد الكل
احـب حديثك ولو حديثك ذل
لأن حديثك زي غنا البلبل
يامدلل عقلي فيك احتار
دوام خيالك عندي ليل ونهار
يامدلل عشقت فيك خدار
خدار روحي للاشعار
يامدلل انت يوم ولدوك
كم شعرا عجزو ما وصفوك
ياملاكي انت يوم خلقوك
تمام قمرا والملايكة حفوك

الرايح
09-14-2010, 07:35 PM
الشادن

الشادن الكاتلني ريدو هلك النفوس و الناس تريدو
مـالو لو يـرحم مـريـدو
في الكون وحيد والكون وحيدو فـيـه لا يـوجـد طـريدو
نـظم القلوب في سلك ريدو لبسـن قـلايد في وريـدو
الجيل قديمو علي جديدو بيه اعـترف مـعدوم نديدو
فاق السلاح وفضح حديدو نـقرابي فـي صفحة خديدو
يصعب علي وصف فصيدو صـعبان علي انظـم نشيدو
دا غزال وسارح بين صيدو يازيد مـحال شركك يصيدو
انسان كحيل ناعس هجيد جيد الغـزالة كـأنو جـيدو
مهما اقول والقول اجيدو انا وصفو كـيف اقدر اجيدو
كلما اقول الحظ يعيدو نحس الزمان يشرح سعيدو
القطر دانيهو وبعيدو هو هلال صيامو ويوم عيدو

الرايح
09-14-2010, 07:36 PM
لي في المسالمة غزال

لي في المسالمة غزال نافر بغني عليهو
جاهل وقلبو قاسي وقلبي طائع ليهو
مصباح الظلام الربنا معليهو
زايد في الجمال نور الجمال جاليهو
لو شافو الغزال على نفرتو بواليهو
وان شافو القمر أنوارو تخجل ليهو
ان جاه النسيم زي الفرع يتنيهو
والثمر الرطيب كذب البقول يجنيهو
باللمي والخدود ياذا العشوق بفنيهو
الصحا والنعاس والسحر في عينيهو
كل من شافو قال انا بالنفس افديهو
هو غصن الرياض الزاهي في واديهو
أزهار الربيع مازج زهور خديهو
وجدلات الحرير ما لينه ذي ايديهو
والدو معجنو على فطرتو مربيهو
هو الفرد الوحيد في الدنيا ما في شبيهو
يتجاهل علي وأنا حالي ما غابيهو
سالبني في نار هواه شال قلبي يلعب بيهو

الرايح
09-14-2010, 07:39 PM
ياروحي انصفني

يا روحي أنصفني في حكمك
لأنو قاسي علي أنا ياحبيب ظلمك

تظلمني والأيام قد تنصف الانسان
يشاهد المحبوب عفوا عيان وبيان
بالنسبة للطفك والرقة يا فتان
ما كنت تظلم من قد أضحى بيك ولهان
تتركني للماضي مع انه في الامكان
نجدد الذكرى وننسى كل الكان

و هيامي بيك يا فاتن مصدره الانصاف
انصفت حسنك حب وانصفت حبي عفاف
ذوبت نفسي معاني دقيقة في الاوصاف
هومت روحي خيال في معبدك طواف
سكبت ذاتي على كاس المحبة سلاف
كيف بعد هذا أكون لسهام نواك أهداف

أنا يا حبيبي غرامي تركته للايام
تركت حب ودموع تركت شوق وهيام
عودت نفسي اذا ما اشتدت الالام
اصبر على الحرمان واضحي بالاحلام
جنة هواي العذري ندية كالانسام
تخلي نار الشوق بردا علي وسلام

الرايح
09-14-2010, 07:43 PM
ياحمامة

يا حمامه مع السلامه
ظللت جوك الغمامه
طيري في جوك المعطر
وانشدي شعرك المسطر
قولي للشادن المبطر
زيد دلال وزيد وسامه
انشدي شعري بين دورو
علو يذكرني في خدورو
اوعي يلعب عليكي دورو
اسأليهو عن المحبه
وعن فؤادي الذي احبا
ليتو يسأل عن الاحبه
مره في عمرو يا حمامه
الغرام ناسي فيهو ذاتي
فيهو خاطرتا بي حياتي
اين حبي وذكرياتي
اصبحت روحي مستهانه
كلميني عن الموده
كيف ضاعت وكيف صد
بعد ذلك اذا استبدا
قابل الجا بي ابتسامه
الجمال يا حمامه فاتن
فيه اروع من المفاتن
كل من يعشق المحاسن
قل ان يوجد السلامه

الرايح
09-14-2010, 07:47 PM
طيف وطايف

جاني طيفه طايف
لحاظه كالقذايف
وانا من عيونه خايف
جاني طيفه طايف
في ثوب من الطرايف
خدود كالقطايف
ليهو العنب شفايف
حبيبي دمعي زارف
غرقني سيله جارف
لماذا عني صارف
وهالكني وانت عارف
حبيبي انا حالف
في عوازلي ليك اخالف
قلبي ليك محالف
ومتي ياغزال توالف
تلا في هواي صحايف
ولقي حبي غير زايف
قال لي اراك خايف
ودون تشرح انا شايف
ياملهم العواطف
ومهدل المعاطف
متي ياجميل تلاطف
وتكون علينا عاطف

الرايح
09-14-2010, 07:50 PM
زيدني في هجراني

زيدني في هجراني
وفي هواك يا جميل
العذاب سراني
على عفافك دوم
سيبني في نيراني
لمتين تطراني
أنظرك في النوم
جوز نواعسك راني
طرفي قصدو يراك
و ما قصدت تراني
ما بسيب حبك
و الله لو ضراني
يا نعيم أزماني
يا حياة روحي
و بهجة أمدرماني
في الحياة غيرك
مافي زول هماني
و في بعادك أزاي
و في وصالك أماني
بلبل الأغصان
غنى بي ذكراك
و بالنويح أوصاني
الجمال خصاك
و العذاب خصاني
و الدلال أوصاك
علي دوام تعصاني
يا درر ألحاني
يا أزاي و دواي
يا راحي يا ريحاني
إنت نايم
و أنا ألم البعاد صحاني
حن عليّ بغرامك
و الله كان يمحاني
مال فريعك باني
فيه بدر و ظلمه
و فيه ردفا" باني
حين نسيم الليل
بي روايحك أتاني
زاد عليّ الشوق
و دمعي سال هتاني
و على عفافك دوم
زيدني في هجراني

الرايح
09-14-2010, 07:54 PM
الطاؤوس

ملك الطيور ارقص وسط الطيور نشوان
خلي الزهورتفتح مختلفة الالوان
ارقص وهل في الكون
طاير جميل مثلك بيهو الوجود مفتون
من درك المكنون
اكشف كنوز حسنك ورينا فيك كم لون
ما بين جمال وفنون
للزهر تصحو عيون
تهدي الشذي واحيان
تهدي الهوي النديان
للعاشق الولهان
يا اجمل الاطيار
ليك في الحديقة ديار
مبنية بالورد ومعروشة بالازهار
مخضرة الاشجار في شواطئ الانهار
ملتفة والاغصان بالخفة والميسان تلهب الانسان
انشر جناحك و ميل حي الربيع يا جميل
خلي الشمس تسكب ذهب الاصيل في النيل
في رياضك النضرات
النور يسير قطرات
محمرة العبرات
الروعة تستكمل
يبقي المكان اجمل زي لوحة الفنان

الرايح
09-14-2010, 08:02 PM
مارأيت في الكون

مارأيت في الكون ياحبيبي اجمل منك
فـي دلالك و تيهك وفي جهالة سنك
من كمالك وظرفك ومن جمالك اظنك
يا حـبيبي نـساء الدنـيا ما ولدنك
راجي عطفك ولطفك وراجي حلمك وحنك
ديما يا مريودي تجدني سائل عنك
ياجميل المنظر كيف كيف اذمك
سيبني في آلامي وبالعلي مايهمك
خالي عقلك وقلبك وفاضي فكرك وهمك
المدام المسكر والعسل في فمك
ياحـبيـب الانفـس مـابتوب مـن حـبك
ان صـليتني بنـارك بـرضي برضي بحبك
مـرة تـيه فـي دلالك ومـرة ارعي محبك
و مـرة خـليك جـاير ومرة خاف من ربك
قلبي ذاب من نارك وصبري ضاع من صدك
هل اداري حياتي ام اعالج ودك
نسمة الاسحار مزاجا نفحة ندك
وزهرة الازهار بستانا صفحة خدك
السرور اوقاتك والمحاسن خمرك
والزمان خدامك وممتثل لي امرك
ان امرتني بقبل بالوقوف في جمرك
نحن والايام اعمارنا يفدن عمرك

الرايح
09-14-2010, 08:58 PM
أنت نور

أقول أنت نور
ولا أقول زهور
ولا أقول نسيم
فواح بالعطور
•••••••••
أقول أنت نور
من أفق الوجود
ولا أقول زهور
من روض الخلود
ولا أقول نسيم من عطر الورود
أراك في الحقيقة
مع كل دقيقة
ومحاسنك رقيقة
كأنك حديقة ومفاتنك زهور
•••••••••
أقول أنت نور
من أفق الجمال
ولا أقول زهور
من روض الخيال
ولا أقول نسيم
السحر الحلال
أقول انت ايه
محيرني ليه
أحب أسألك
أشوفك تتيه
أخاف أخجلك
لأنك نبيه وكلك شعور
•••••••••
فليك حق تكون
تحب العلوم وتهوى الفنون
وديع كالرضيع
بعيد عن ظنون
وما في الفؤاد يبين في العيون
لأن الوجوه
تكاد أن تفوه بما في الصدور
•••••••••

الرايح
09-14-2010, 09:02 PM
بدر الحسن

بدر الحسن فاق القبلو ووراه
بين اجيالو حايزحسن الكون براه
آمن في قراه تعبانين وخاسرين الجارين وراه
القاصد وصالووالعايز يراه
ماطايلين خيالو ومانايلين سماه
مابنطال سماه امتي يجود ويرحم بي ودو ولماه
مالو منع وصالو واختفي في حماه
يانسيم روح واسأل عن سببو الحماه
اسكر من شذاه واطرب من محاسنو وارتاح لي اذاه
بي صدو ونفورو آلامي ورزاه
مهما جازي قلبي اقل عن جزاه
مابجيب من دعاه ولابيرحم فؤادي الحتي الطير نعاه
بي نيرانو عذب قلبي ومارعاه
مابنفع بلاه وكيف اعمل معاه
يانع في نداه وقايم بالمحاسن من اول بداه
دمع الهجر رافع خبرو ومبتداه
ضيع عمري ظلماً فلتسلم يداه

الرايح
09-14-2010, 09:05 PM
حائر في امري معاك

حاير في امري معاك
لاقدرت القي وفاك
ولا قادر انسي هواك
حاير في امري معاك
وعيوني حيرانا
في امري والانجم
من سهدي غيرانا
الغمده تهجرني
والليل يسامرني
تحمل نسيم شذاك
ياروحي ما احلاك
في مشيتك محتار
ماقدرت اعرف كيف
ياناير الوجنات
جسمك رشيق وخفيف
نتلاقي في الخطوات
وتقسم البسمات
تحمل نسيم شذاك
ياروحي ما احلاك
حاير في امري معاك
لاقدرت القي وفاك
ولا قادر انسي هواك

الرايح
09-15-2010, 05:11 PM
احترامي اليك

إحترامي اليك من صميم قلبي
غير ما أشعر
اتفاني عليك والدليل حبي
تسمح تنظر
شوف دموع عيني سايلة فى خدي
من اللهيب الشوق..برضو مافي خلاص
هكذا يا ظالم جزا الاخلاص

دبتَّ في حبك
و الفؤاد مجروح
ما فضل مني شئ خلاف الروح
هكذا الأشواق تسمو بالعشاق
من ثري الأشباح
لسما الأرواح
حيث تروي هلال
للنجوم معناك سامية في علياك
طاهرة كالاملاك

إنت ابهج نور من بدور الكمال
تجعل الفنان عبقري الخيال
لو نظم أشعار او عزف أوتار
تندهش افكار
والعقول تحتار
ياجميل ياما في الجمال أسفار

أنا في شخصك بحترم أشخاص
و طبعا عندي إحترامك خاص