أمين السيد
07-05-2010, 11:38 AM
ركبتا الطيارة للقاهرة .... طيارة سودانير ..... هرج ومرج في الطيارة ما عادي .... تجي المضيفة طايرة .... انا على حد علمي انو المضيفات ديل بيكون عندهم مواصفات خاصة .... اهم شي في المواصفات دي انها تكون لبقة جدا وانها تكون قادرة على التعامل مع الزبائن وتكون بشوشة وضحكتا ما بتفارق خشما .... ناهيك عن انها لازم تكون حليونة ورشيقة حسب المواصفات والمقاييس ( مقاييس الأوزان ) العالمية المعروفة والمتفق عليها لأنها تعتبر واجهة حسنة لجذب الزبائن لتشجيعهم على السفر على متن الخطوط الجوية الناقلة وكدا ..... ما علينا نرجع لموضوعنا .... اها جات المضيفة طايرة مكشرة وتتجدع .... انتي هييييي لمي ولدك دا عليكي خلي الناس تمر .... وانتا يا أخ ما شايف الدرج الفوق دا مليان ؟ يعني عايز تخت شنطتك دي وين .... وانتا يا ولد امشي اقعد جنب امك .... يلا بالله خلونا نطير ... انا ما عارف ناسنا دايمن بيختارو مضيفات لسانم طويل كدا ليه .... المهم اتاخرت الرحلة أكتر من نص ساعة .... واخيرا طرنا .... بعد شوية جات مضيفة تانية اغايتو شكلا أحسن شوية من الفاتت .... جات بتقدم عصير .... واحد من الركاب قال ليها يااااااخ انتي عصيركم دا ليه مسيخ كدا .... ردت عليهو بنهرا : والله دا العندنا عجبك اشربو ما عجبك خليهو وكأنها بتقول ليهو بالبلدي كدة ( عايز تطفحو أطفحو ما عايز ما تطفحو في زول جابرك؟ ) .... سبحان الله دي الأنا اتوسمتا فيها خير وقلتا يمكن تكون أحسن من القبلها .....
بعد مدة جابو عشاء للركاب ... أكل هايف خلاس ... وعلبة بسكويت صغيرة .... تخيلو انو البسكويت منتهي مدة الصلاحية .... تاريخ الصلاحية بنتهي في نفس يوم الرحلة .... هاجو الركاب .... كيف تدونا بسكويت منتهي الصلاحية .... المضيفة قالت لسة ما انتهت الصلاحية ما بتعرفو القراية كمان ؟ ..... وتعالت الأصوات بالشتايم لسودانير واليوم اللى سافرو بيها و.... و..... عمنا قاعد ورا زولا ظريف خلاس حاول يرطب الجو .... قال للمضيفة يا بتي والله عشاكم هايف خلاس .... عليكي الله بدل العشا الهايف دا لو أديتي كل واحد بوسة ما كان أحسن من العشا القدمتيهو دا ؟
والناس ههههههههههههههههههههههههههههههه فقعتا ضحكة ..... المضيفة وشها حمر وصدقت القصة وكشرت للزول واتلفظت بألفاظ لا تليق ابدا ببت .... ممكن يكون هو أخطأ في كلامو معاها .... لكن الراجل كان قصدو يلطف الجو ويغير الكلام والهيجان بتاع الناس في انو البسكويت منتهي الصلاحية والناس زعلانة .... وفعلا الناس إتلهت في مشكلة الراجل دا مع المضيفة .... علا المضيفة اخدت الكلام بالجد والموضوع كان حيطور ويبقى كبير خلاس علا الناس الفاهمين قامو ووقفو مع المضيفة وطيبو خاطرا بكلام حلو وهدوها وغلطو عمنا في كلامو .... عمنا قام اعتذر ليها .....
نوادر كتير عن سودانير شي صح وشي كضب .... مرة جماعة قاعدين يتكلمو في سودانير وخدماتا الزي الزفت قام واحد سرح بالجماعة قال ليهم كنتا مسافر بسودانير القزاز القدام بتاع الطيارة مكسر والسواق لافي ليهو شال في وشو ولابس نضارة من الهوا .... تفتكرو كترة النوادر دليل على شنو
و يا ترى ليه مضيفاتنا دونا عن باقي المضيفات كدا ؟ كل الود
بعد مدة جابو عشاء للركاب ... أكل هايف خلاس ... وعلبة بسكويت صغيرة .... تخيلو انو البسكويت منتهي مدة الصلاحية .... تاريخ الصلاحية بنتهي في نفس يوم الرحلة .... هاجو الركاب .... كيف تدونا بسكويت منتهي الصلاحية .... المضيفة قالت لسة ما انتهت الصلاحية ما بتعرفو القراية كمان ؟ ..... وتعالت الأصوات بالشتايم لسودانير واليوم اللى سافرو بيها و.... و..... عمنا قاعد ورا زولا ظريف خلاس حاول يرطب الجو .... قال للمضيفة يا بتي والله عشاكم هايف خلاس .... عليكي الله بدل العشا الهايف دا لو أديتي كل واحد بوسة ما كان أحسن من العشا القدمتيهو دا ؟
والناس ههههههههههههههههههههههههههههههه فقعتا ضحكة ..... المضيفة وشها حمر وصدقت القصة وكشرت للزول واتلفظت بألفاظ لا تليق ابدا ببت .... ممكن يكون هو أخطأ في كلامو معاها .... لكن الراجل كان قصدو يلطف الجو ويغير الكلام والهيجان بتاع الناس في انو البسكويت منتهي الصلاحية والناس زعلانة .... وفعلا الناس إتلهت في مشكلة الراجل دا مع المضيفة .... علا المضيفة اخدت الكلام بالجد والموضوع كان حيطور ويبقى كبير خلاس علا الناس الفاهمين قامو ووقفو مع المضيفة وطيبو خاطرا بكلام حلو وهدوها وغلطو عمنا في كلامو .... عمنا قام اعتذر ليها .....
نوادر كتير عن سودانير شي صح وشي كضب .... مرة جماعة قاعدين يتكلمو في سودانير وخدماتا الزي الزفت قام واحد سرح بالجماعة قال ليهم كنتا مسافر بسودانير القزاز القدام بتاع الطيارة مكسر والسواق لافي ليهو شال في وشو ولابس نضارة من الهوا .... تفتكرو كترة النوادر دليل على شنو
و يا ترى ليه مضيفاتنا دونا عن باقي المضيفات كدا ؟ كل الود