سلافة الكنافة( ارشيف2005 للكاتب فيفيد الشفت)

[vivid]

[align=justify:4fa02e693f]مدخل أول

أمس الأول رأيت فيما يرى النائم ذلك التمثال البرونزي الرائع الذي يقال له (سلافة الكنافة). رأيتها على أكمل صورها الجذابة و هي تتهادى و تتمايل و تتقدّل و تتبختر بين أزقة و شوارع (حي البهلة) الجهنمية كأنها الغزال الشارد في مشيته. و على قمة كتفها الشمال يجلس (قطها النمري) في كبرياء و عنفوان كأنها ينصّب نفسه (الحارس الأمين) لهذه (السلافة) من كيد الطامعين و المتربصين الذين يملئون شوارع (حي البهلة) و الذين ليس لديهم أي (هم) سوى أن تتعطف و تتلطف و تتكرم عليهم (الجميلة سلافة الكنافة) بنظرة خاطفة تشعرهم بإنسانيتهم و آدميتهم المفقودة.
و بينما كانت (سلافة الكنافة) تسير بين أحضان ذلك (الشارع المعروف) صادف أنه كان هنالك (فار جقر) يسير في الجهة المقابلة لها من (الشارع) و بالتحديد فوق (الحيطة الشاهقة) لذلك المنزل (الأثري) الذي تمتلكه (حاجة نعمات الدخينابية). لكن الشيء الملفت للنظر أن ذلك (الفار الجقر) كان يمشي بنفس الطرقة و الأسلوب الذي إعتادت أن تمشي به (سلافة الكنافة).
توقفت (سلافة الكنافة) عن المشي عند رؤيتها ذلك (الفار المقلد) الذي قام بشيء ليس من حقه و أرتكب جرمٌ يستحق عليه العقاب الفوري. لذا كان من الطبيعي جداً أن تجتاح (سلافة الكنافة) موجة من أعاصير الغيرة (العمياء) التي ملأت جوانحها بسرعة البرق، و شعرت بالاستفزاز (القاتل) يتسرب إلى حنايا قلبها من ذلك (الفار الجقر) الذي يقلدها في مشيتها. فما كان منها إلا و أن اتخذت قرارها المناسب للثأر لنفسها من ذلك (الفار الجقر) (قليل الأدب)، حيث نظرت إلى (قطها النمري) القابع فوق كتفها و قالت له بصوت (الآمر) الذي لا يتراجع عن قراره :

يا (بسبوس) روح بسرعة هاتلي (الفار الجقر) القاعد يبرطع فوق الحيطة ديك.

كشف ذلك (القط النمري) عن أنيابه الحادة لدى سماعه لأوامر (سلافة) (الصارمة) ثم قفز من على قمة كتف (سلافة الكنافة) (الرقيق) و تسلق حيطة (حاجة نعمات) الشاهقة بسرعة رهيبة كأنه (الجان)، و بدأت المطاردة (المميتة) بين (قط سلافة الكنافة) و ذلك (الفار المقلد). انتهت المطاردة (المميتة) بمقتل ذلك (الفار المقلد المأفون) الذي تجرأ على محاكاة (سلافة الكنافة) في مشيتها. إلى هنا فإن الموضوع (عادي و طبيعي) – بس الشيء الغير طبيعي هو أنه في اللحظة التي أراد فيها (القط المنتصر) النزول و هو يحمل (جثمان) (الفار المقلد) لم يعرف لذلك سبيلا. مما جعل (سلافة الكنافة) تطلب المساعدة من أهالي (حي البهلة) :

يا خرااااااشي – يا خرااااااابي – ألحقووووووني

كنت أنا في ذلك الوقت أجوب شوارع (حي البهلة) بحثاً عن (دجاجتي الفيومية) التي لم يعجبها المقام في (دارنا) فآثرت الرحيل دون أن تترك ورائها أي دليل يقودنا إليها. و عندما أطلقت (سلافة الكنافة) عقيرتها (بالبكاء) طلباً للمساعدة، لم تخيب أذناي الطويلتان (ظني) فيهما، إذ إلتقطت (صراخ) (سلافة الكنافة) من على بعد ثلاثة شوارع من موقع (الحدث). و أقول لكم بصراحة تامة أنني أستطيع تمييز صوت (سلافة الكنافة) من بين جميع أصوات نساء (حي البهلة)، و ذلك لأنة توجد في صوتها (بحة حنينة) تعبث بأوتار (قلبي) متى ما أطلقتها. لذا فقد قمت و بطريقة تلقائية و لا شعورية (بتلبية) ذلك (النداء السلافي) كما قد قام (بتلبيته) قبلي (قطها النمري). و عند وصولي لمكان (الحدث) كانت (سلافة الكنافة) وحدها في (موقف) لا يسر عدو و لا صديق، و عند رؤيتها لي أسرعت نحوي تثتغيثني:

سلافة (و هي تبكي): يا (فدفودي) ألحقني

أنا و عندما سمعت (سلافة الكنافة) (تدلعني) بإسم (فدفودي) بصوتها الذي يخرج من شفتيها (كفتافيت) السكر، شعرت أنني لا أمتلك تلك الأطراف التي يقال لها (كرعين) بل أنني أمتلك (جناحين) طولين يمكنني أن أصنع بهما (المستحيل) من أجل (عيون) و (حلاوة) صوت (سلافة الكنافة) :

أنا : مالك يا (سلافة ؟!!!) – الزعلك دا من منو دا؟!!! – شاوري لي ليهو بس و إنشاء الله ما يطلع عليهو (صباح) تاني.
سلافة (و هي تبكي) : (بسبوس) يا (فدفودي)
انا (مفزوع): بسبوس مالو؟!!!
سلافة : مش عارف ينزل من على حيطة (حاجة نعمات)
انا : بس كدا؟!!! و لا يهمك يا (صغيرتي) لحيظات و يكون (بسبوس) بين يديك
سلافة : انت مش عارف معزة (بسبوس) عندي – و الله يا (فدفودي) انا (بعزو) ذيك كدا
انا : و الله انت رائعة يا (سلافة)
سلافة : روعك الله يا (فدفودي)

تسلقت حيطة (حاجة نعمات الشاهقة) ذي الأعمى و الأطرش عند سماعي لهذا الغزل العذري (العفيف) و لم أشعر بشيء إلا و أنا قابض على (بسبوس) من (بطنه) اللينة:

سلافة (مفزوعة): أبعد يدك يا (فدفودي) من بطن (بسبوس) لأنو أمس كان عندو (مغص)
انا : سوري يا (سلافة) و كفارة ليهو و سلامتو ألف سلامة
سلافة : يللا هات لي (بسبوس) بي سرعة
انا : انتظريني يا (سلافة) أشوف لي طريقة أنزلو ليك بيها
سلافة (و هي تنظر لقميصي بتاع الكاروهات) : قميصك حلو يا (فدفودي) و ما خفيّ أعظم.

أدركت بعقليتي المتفتحة ما تريده مني (سلافة الكنافة). و بدأت بتنفيذه على الفور. حتى تكللت مجهوداتي بالنجاح في عملية (إنقاذ) صاحب الفخامة و العظمة (بسبوس) مستعملاً في ذلك (فنيلتي الداخلية و بعض خيوط قميص الكاروهات الذي كنت أرتديه) و أنزلته بأمان حتى أجلسته على قمة كتف (سلافة الكنافة) الرقيق:

انا : كدا مبسوطة يا (سلافة) يا (ست الستات)؟
سلافة (فرحة) : ممنونة أوي يا (فدفودي) – و الله أنت أجمل واحد في (حي البهلة)
انا : آه ياني يا (سلافة) انا (ركبتيني) سيبت
سلافة : و حات أبوي يا (فدفودي) أنا (جادة) في كلامي دا - انت (أجمل) شاب في (حي البهلة)
انا : و (مازن)!!!
سلافة : يا (فدفودي) انت في نظري (أجمل) من مليون (مازن) لأني أنا أمس أكتشفت أنو (مازن) دا قامت ليهو (حبة دهنية) في جضمو الشمال. و انت عارفني انا لمن أشوف لي (حبة دهنية) (شعرة جلدي بتكلب).
انا : لكن يا (سلافة) انا (إضنيني) كبار ما ذي (اضنين) مازن
سلافة : يا (فدفودي) انت (اضنينك) بالنسبة لي ذي (اضنين سوبرمان). و كمان أنت هسي أنقذت لي (بسبوس) بي نفس طريقة (سوبرمان) الذكية.
انا : و (مازن)!!!
سلافة : يا (فدفودي) (مازن) دا راجل (خفيف) قدامك يعني لسة في (سنة أولى)
انا : يعني انتي (بتحبيني) يا (سلافة)؟
سلافة (مكسوفة) : آآآآآي يا (فدفودي) بموت في (دباديبك)
انا (مكسوف) : و (مازن)!!!
سلافة (مكسوفة): مازن دا حتة (فنطوط) لا رح و لا جاء
انا (مكسوف) : يعني (أنا) فارس أحلامك يا (سلافة)؟
سلافة (مكسوفة) : آآآآآي يا (فدفودي) و مستنياك تجي تخطفني على ضهر (الحصان الأبيض).
انا (مكسوف) : و (مازن)!!!
سلافة (مكسوفة) : (مازن) دا راجل (خملة) ما عليهو أي (تكل)
انا (مكسوف) : طيب (يا سلافة) استنيني أنزل من الحيطة عشان أوصلك انتي و (بسبوس) لي بيتكم.
سلافة (مكسوفة) : أنا في انتظارك يا (فدفودي) يا (فارس أحلامي).

آآآآخ من دا حظ - في اللحظة التي هممت فيها بالنزول من حيطة (حاجة نعمات العالية) أدركت إنني في (ورطة) حقيقية و هي أنني لا أستطيع النزول من حيطة (حاجة نعمات) و ذلك نظراً لارتفاعها (الشاهق). كما أنه لا سبيل للنزول منها إلا عن طريق(سلم ذو حجم عائلي) أو عن طريق عملية (إنقاذ) كتلك التي قمت فيها أنا (بإنقاذ) صاحب العظمة و الفخامة (بسبوس). لذا فقد آثرت طلب المساعدة من (سلافة الكنافة) قبل أن يسمع بي أهالي (حي البهلة) و تصبح (سيرتي) على أي لسان و أسقط في نظر (سلافة الكنافة) (شمار في مرقة):

ألحقيني يا (سلافة) أنا ما قادر انزل من علي الحيطة
سلافة (مفزوعة) : سجمي يا (فدفودي) انت قبيل طلعت الحيطة دي كيف؟
أنا (مفزوعة) : و حاتك يا (سلافة) - صوتك و كلامك العسل دا هو الخلاني (اتشعبط) الحيطة دي بدون ما أشعر

و بما أن النساء عموماً (يفضلن) الصوت العالي لتوصيل أفكارهن فلم تجد (سلافة الكنافة) طريقة لإنقاذي سوى :

يا خرااااااشي – يا خرااااااابي – ألحقووووووني (فدفودي) مش عارف ينزل من على الحيطة
أنا : آآآخ منك يا (سلافة) كدا انا حا أروح في (الكازوزة) و فضيحتي حا تبقى بي (جلاجل)
سلافة : يعني أعمل ليك شنو يا (فدفودي)؟ انت عايز تموت؟
انا : لوكي الصبر شوية يمكن (يعقوب الفلاتي) صاحبي يجي (مفحط) بي جاي و يشوف لينا (حلل)
سلافة : (فدفودي) انت كدا حا تموت
انا : خايفة علي يا (سلافة)؟
سلافة (بي خجل) : آآآآي يا (فدفودي)
انا : و مازن!!!
سلافة : مااااازن؟!!!!! و الله ذكرتي يا (فدفودي) – (مازن) عندو (سلم) ممكن يجي ينقذك
انا (صارخا) : مااازن (لا) يا (سلافة) – أي حاجة إلا (مازن)

لم تلتفت (سلافة الكنافة) ألي (احتجاجاتي) بل أسرعت (كالصاروخ) للمنزل الذي يسكن فيه (مازن) ذلك (العدو اللدود). و عند رؤيتها لـ(مازن) قالت له و كمية من الشوق و الحنين تتطاير من عينيها:
(فيفيد) في ورطة يا (مازن) خلينا (ننقذو)
مازن : (فيفيد) الشوبارة؟!!! و الله الود (العيفة) دا حا (يضيع روحو) في يوم من الأيام.

جاء مازن و هو يحمل سلم (الهيئة الكهربائية) التي يعمل بها و كان يرتدي قميص (جينز أزرق) مفتوح (الزراير) يكشف عن عضلاته (المفتولة)، و قد ذادته خصلة شعره (الأمامية) (جمالاً) على (جمال). حيث تلامس تلك الخصلة (الأنيقة) (خده الأيسر) و تمتد في شكل (دائري) جذاب مغطيةً تلك المنطقة (الحساسة) التي قالت عنها (سلافة الكنافة) بأنها توجد بها (الحبة الدهنية) التي تشمئز منها. تلك (الحبة الدهنية) التي أبتعدت بسببها عن (مازن) و في نفس الوقت ذادتني(قرباً) منها.
و لكن عندما داعبت تلك النسمة ( الهوائية العابرة) شعر (مازن)، اهتزت تلك (الخصلة) الناعمة و عندما (دققت) النظر لمحل و مكان (الحبة الدهنية) اكتشفت أنه لا يوجد لها أي أثر. و هذا يعني شيئاً واحداً : إن (مازن قد شفيّ من حبته الدهنية و ربما تعود إليه سلافة قريباً قريباً ).

و خلال دقيقتين قام (مازن) بتثبيت السلم على الأرض، ثم (صعد) فوق حيطة (حاجة نعمات العالية) و نزل و هو يحملني بيد واحد في منظر كان (مخجلاً) بالنسبة لي (قلل) من رصيد أسهمي عند (سلافة الكنافة) بعد أن كنت (بطلها) في تلك (اللحيظات الماضية)، و في نفس الوقت ذاد من مكانة (مازن) لديها خصوصاً بعد شفائه من حبته الدهنية. ثم جائتني الطامة الكبرى :

مازن : روح يا (خفيف) تاني حركات (الشفّع) دي ما تعملها لينا هنا
انا (مغيوظ): ؟؟؟؟؟؟؟

لم أجد شيئاً أقوله (لسلافة الكنافة) التي فيما يبدو أنني سقطت في نظرها و لم أجد شيئاً أقوله لـ(مازن) لأنه يظهر عليه أن شفي من تلك (الحبة الدهنية). عندما استدرت عائداً (للبيت) رأيت (سلافة الكنافة) و (مازن) يقفان كتمثالين من (البرونز) كل منهما يلائم و يناسب الآخر. ثم سمعت كلمات تمنيت عند سماعها أنني لازلت معلقاً في حيطة (حاجة نعمات):

مازن : و (فيفيد)!!!
سلافة : (فيفيد) دا راجل (صغمبروتي) - لسة ما طلع من (البيضة) يا (مازن).

مدخل ثاني

خالتي السعدية : أصحا يا فيفيد – (كديسة) ناس (سلافة) دايرة تشرب (اللبن) بتاعك
صحيت من النوم مخلوع ذي (الطاقاني) (عقرب) و مديت يدي تحت السرير و سحبت (عكاز) (عمي منصور) و صرخت في (خالتي السعدية) :
وينها (الكديسة) الملعونة دي؟
خالتي السعدية (مخلوعة) : طلعت في حيطة (حاجة نعمات)


فيفيد
في 22/05/2005م

بهلابي حتى النخاع[/align:4fa02e693f]

[abumoram22]

الأخ vivid السلام عليكم ورحمة الله وبركاته
وين كانت العبقرية دي مدفونة والله خليت الواحد يتبختر في شارع تمبول واقعد قدام دكان عجبت ولا دكان أحمد ود السرة كان سلافة القيافة تديهو نظرة وكيفن مازن ساكن حي البهلة وأوصافو تشبه الحي البريطاني في زمنا زي دى مابقدر اشق حي البهلة
خيال رائع واسلوب رصين وعبارات سلسة أمنياتي لك بالتوفيق

[Anonymous]

الرائع "ففودي" منتهى الدلع ، مش كدا

وكمان كنت بتحلم ، يالا أحلم على طول علشان نشوف هذه الإبداعات

ألم أقل لك يا سمير " ففودي " يتساهل ليه منتدي خاص بيهو هو وبس ، إنت لو شفت وقريت رواياتو وقصصو في منتدي سودان تو ، أكيد حتقلع القبعة وتنحني ليه

فيفيد ، الرائع ، خليك معانا طوالي وفرح خلق الله ، وكثر الطلة تأكد ما بتمسخ خلايق الله

حفظك الله ورعاك وزادك من خيره لتتحفنا بالروائع

عبدالله

[Anonymous]

والله أنا لا زائر ولا حاجة أنا عضو أصيل لكن أظنه حسبني زائر ساكت

[vivid]

[align=justify:f2189b0912]العضلات

العضلات

العضلات

انتو عارفينا انو عقدتي من ما قمت من بطن أمي هي العضلات ؟

لأني انا راجل نحيفوني

و ضعيفوني

و على قدر حالي

و الغنماية تاكل عشاي


عشان كدا لمن اشوف لي عضلات تبش

و الا عضلات ذي المنقة النجيضة

بقوم بحسد صاحبها عليها

و كمان أي معركة بدخل فيها بكون انا الخسران

حتى و لو كانت المعركة دي مع الجنس اللطيف


انتو يا جماعة الناس ديل العضلات دي بجيبوها من وين؟

يكون في سوق ببيع عضلات؟

و الا في وصفة سحرية بتفور العضلات ؟


سوق (ام دفسو) للعضلات التبش

سوق (ليبيا) للعضلات الفاخرة

سوق (الناقة) للأكلات الجهنمية التي تساعد على تربية العضلات


يا جماعة اخوكم مزنوووووق و داير ليهو شوية عضلات

ان شا الله في كيس نايلو

يا جماعة وصفوا لينا الحاجات دي بربوها كيف

عليكم الله


الناس قالوا لي : يا (فيفيد) عليك بي شيل الحديد

بس شلنا الحديد ما نفع

تاني قالوا لي العب رياضة

لكن لعبنا ما نفع

و فيهم من قال لي اكل كويس

و الله اكلنا بس لا سمنا و لا ربينا عضلات


اها في يوم ذو معالم تبشر بي كتاحة ترابية جاني صاحبي (السكرية)

و قالوا لي بي سخرية: حالتك متأخرة يا فيفيد

و انا بنصحك تلحق نفسك و تشتغل (طلبة)

عشان تقوي (سدرك) و يديك العاملات الذي (المساويك) ديل

و انو (الطلبة) هي (علاجك) الوحيد لتربية العضلات


قمت اليوم داك قررت ادخل إلة عالم (البناء) و (الطُلب)

و فريرة مشيت للمعلمين و الاسطوات في (حي البهلة)

بس الواحد لمن يشوف خلقتي و جسمي كدا

بقوم يقول لي :

لا و الله عددنا تامي يا (فيفيد)

الله اجعل ليك رزق مع واحد تاني يا (فيفيد)

و الله لمن نلقى لينا شغلانية بتاعت (قزقزة) كدا بنقوم نناديك يا (فيفيد)


اها الحكاية لمن طولت قمت كلمت صاحبي (السكرية)

و قلت ليهو : يا ود يا (سكرية)

يا سن (ابرة)

يا (كنافة)

يا (قشطة)

و الله اخوك (فيفيد) حتى شغل الطين دا ما لاقيهو

وريني اعمل شنو؟

قام قال لي : يا (فيفيد) خليك تفتيحة و شايل مفاتيحها

قوم امشي اقعد في القهوة بتاعت (الكجاريس)

و حا اجو المعلمين و الاسطوات اسوقوك تشتغل معاهم (طلبة)

انا : لكن يا (سكرية) انا شكلي كدا ما بتاع طين

و خايف اكون بضيع في وقتي ساكت

السكرية : يا (فيفيد) يا زفت

الطلبة هي اقصر طريق لتربية (العضلات) المفتولة

و بناء الجسم و الدفاع عن النفس

انا : خلاص نقوم بكرة انا و انت مع النجمة نصاقر قهوة الكجاريس



اليوم التاني في قهوة (الكجاريس)

كنا جالس انا و صاحبي (السكرية)

و الحق يقال انو صاحبي (السكرية) عضلاتو باينة ذي (التبش)

و الواحد من شكلو كدا بعرفو انو زول شغل

بس انا كنت خايف على روحي اني ما القى لي شغل


و فعلاً بعد خمسة دقائق كدا

جاء سرب من الجنوبيين و ساقو معاهم صاحبي (السكرية)

و بعد عشرة دقائق كدا

كدا جات مجموعة من اولاد النوبة و ساقوا كل العمال في القهوة

و بقيت براي

الله و رقبتي ذي (الشيطان)

و الله اكنت عايز (اجوعر) من حظي المنيل

و قلت لي روحي :

يا ود يا (فيفيد) لازم تصبر

اصلو الحكاية دايرة صبر

و كل مشاهير العالم ذاع صيتهم بعد ما سفوا تراب الواطة


المهم لمن جات الساعة تمانية صباحاً

جاني واحد جسمو ستة في ستة

طول في عرض

راجل ملوي هدومو

عضلاتو مدردمة ذي قلة خالتي (السعدية)

و قال لي بي صوت خشن كدا :

تشتغل يا (شخص)

انا : انت بتتكلم معاي انا يا (عمو)

الراجل : انت يا زول شايف في واحد غيرك في القهو دي؟

انا و بكل ثقة : ايوة بشتغل يا (عمو)

الراجل : انت بتعرف تشتغل شنو يعني؟

انا : اي حاجة يا (عمو) ان شاء الله بتاع (سقالات)


قام الراجل عاين لي كدا من فوق لي تحت

و قام نادى صاحباً ليهو من برة و قال ليهو :

شوف (العيفا) دا ينفع؟

و الله ما لقينا غيرو

صاحبو : و الله ما بنفع بس نقوم نسوقو نفك بيهو (الحيرة) بتاعتنا

اصلو الحيطة بتاعت الجالوص الدايرين نشتغلها صغيرونية و ما دايرة ليهو طلبة (نجيض)


قام الراجل قال لي خلاص ورحكاكا اشتغل معانا

طبعا انا ماصدقت


مرحباً بالعضلات

مرحباً بي (فيفيد)

(فيفيد) ابزرد

(فيفيد) شيال التقيلة

(فيفيد) مدرج العاطلة

(فيفيد) فارس الحوبا

(فيفيد) عشا الضيفات

(فيفيد) ضباح الجمل من ركبتو



اول ما وصلنا لموقع (العمليات)

عرفت ليك انو المعلم الحا اشتغل معاهو بقولوا ليهو (الدخينابي)

المهم لمن بدا الشغل

الدخينابي : يا محترم

انت داير تشتغل لي بي هدومك بتاعت (القشرات) دي و الا شنو؟

انا : اطمئن يا عمو

و خت في بطنك (بطيخة) صيفي انا حا اغيرهن بعد شوية

الدخينابي : اقطعني لو انت بتعرف شغل (الطلبة)

طبعا انا كنت ما عايز الشغلانية دي تطير مني :

و الله انا اعجبك يا (عمو)

انت قايلنا اول مرة نشتغل الشغالنة دي و الاشنو ؟

انا و الله الاسطوات بجروا و راي جري (الحمير) عشان اشتغل معاهم



قمتاغيرت هدومي بي سرعة

و لبست لي سروال (دمورية) كنت مستلفو من صاحبي (السكرية)



و اثناء الشغل

الدخينابي : يا ود يا (فيفيد) قوم جيب لي (كنيزر)

انا : (الكنيزر) دا شنو يا (عمو)

الدخينابي : الله اطولك يا روح

انت ما عارف (الكينزر) شنو و داير تشتغل (طلبة) ؟

و الله سجم امك

انا : خلي نفسك بارد يا (عمو) خليني افهم بالهداوة

الدخينابي : انا جبتك هنا عشان تشتغل و الا عشان افهمك؟


اها بعد جهد جهيد عرفت انو (الكنيزر) هو جزء صغير جدا من (الطوبة)

غالبا ما يستعمل لملئ الفراغات بين الطوب خاصة في عمل الزوايا



بعد فترة

الدخينابي : يا انت يا اللي اسمك (فيفيد)

انا : ايو يا عمو


الدخينابي لمن سمع كلمة (عمو) دي عايز اظعط شعرو من الغيظة :

يا عين امك انا هنا بقولوا لي (معلم) مش (عمو)

انا : يا (عمو) بس انا حبيت ارقيك و حبيت احترمك شوية

الدخينابي : حبيت !!!!

انت جاي تحب و الا جاي تشتغل

شايفنا انحنا هنا (حبشيات) و الا شنو؟

انا : قول لي يا عمو عايز شنو و انا اجيبها ليك زي الحمامة

الدخينابي : جيب ليك طوب و تعال أملئ (العراميص) ديل

انا : انت زعلت و الا شنو يا (عمو) ؟

انا كلمة (العراميص) دي ابوي ما قالها لي

الدخينابي : يااااااااااا سجم الرمااااااااااااااد انت

تعال املئ (العراميص) ديل

انا : و الله انا ما املاها

إلا تحسن ملافظك و تغير كلمة (عراميص) دي


الدخينابي لمن الحكايا فاضت بيهو

بقى زي التور الاسباني الزعلان

و صرخ فيني : تعاااااااااااااال املئ (العراميص) ديل

و الا اختاني كدا و الا كدا


انا : و الله لمن الراجل صرخ فيني لمن طلع مني صوت بي تحت


الدخينابي : يا بتاعين المدارس العراميص هي فتحات الطوب

انا : I see , Uncle

و الله يا (عمو) انا كنت فاكرك بتنبز فيني


الدخينابي : خلاص روح املئ (العراميص) ديل بلاش فلفسة معاك

بعد ما مليت الحاجة اللي اسمها (العراميص)

الدخينابي : ناولني (تلت) طوبة

انا : خد يا (عمو)

قمت اديتو (تلت) طوبة

الراجل لمن اتناول مني (تلت) الطوبة

قام تلب من السقالة و جا جاري بي وراي

دا تلت يا (مغفل)

يا اولاد المدارس

يا اولاد آخر زمن

يا


بقيت القصة غير قابلة للنشر و لا يمكن عرضها أو الوصول إليها

لأسباب عارفها انا براي


المهم بعد تلاتة يوم

طلعت من البيت و عرفت من صاحبي (السكرية)

انو (تلت) الطوبة في قاموس لغة البناء

هو تلاتة ارباع طوبة



يا حليل الدخينابي لحدي هسي ما لاقي ليهو واحد اشتغل معاهو


اليوم التاني جاني قال لي :

يا ود يا (فيفيد) انا دير المرة دي اشغلك (حراسة)

يعني شغل مريح جدا ما ذي الطلبة

دايرك يا (فيفيد) تحرس لي الاسمنتي دا بالليل

عشان ما اجي واحد اسرقو

انا : عُلم يا (عمو)

و الاسمنتي بتاعك في ايدي امينة

الدخينابي : و الله يا ود يا (فيفيد) انا كلمة (عمو) دي بتجيب لي الجلا

انا : خلاص يا معلمي تاني بقول ليك معلمي

الدخينابي: المهم يا (فيفيد) اوع تنوم

انا : نوم قفا يا معلمي و ما تشيل اي هم

نحن لها و برضو نعجبك



الدخينابي كان بجيب لي كل يوم بالمساء (بطيخ) قدر الليلة و بكرة


اها في يوم كدا

لمن جات الساعة تلاتة صباحاً جاتني دقسة صغمبروتية كدا

و حلمت لي حلم عجيب جدا عن (الدخينابي)


من الصباح جيت لي (الدخينابي) عشان أديهو البشارة و قلت ليهو :

و الله يا معلمي امس حلمت ليك حلم عجيب

الدخينابي : حلمت لي انا؟

يا مغفل هو انت نمت لمن حلمت؟

امسك دا حسابك تاني ما توريني وشك الكريه دا تاني

انت و الله حا تخرب لي بيتي



انتو عارفين الدخينابي كان بجيب لي البطيخ لي شنز؟

عشان الليل كلو اقوم ابول و ما يجيني نوم

اصلو كان خايف علي الاسمنتي بتاعو



من يوميات فيفيد
في 24/05/2005م[/align:f2189b0912]

[الفاتح محمد شريف]

اول حاجه يا شفت السلا مه عليكم والله مشتاق ليك كتير

بس من الضحك لحد الان ما قادر اوصف شوقي
وانا بعرفك كتير يا ابو العضلات 0000000000000
اسعد يو م في حياتي اليوم دا
لانو الواحد اخير لقي مرفاء ينتكي عليه
بين اهله وناسو وينسي كل همومه ويسمع حكاوي عن شخصيات
بعرفه حق المعرفه وصدقني يا شفت
ممكن الواحد في اليوم بيزور اكتر من عشر مواقع وبيقراء قصص اقرب من الخيال
وهي كفيله بانو يعش بي تفكيرو وكيانو علي حسابه طول اليوم بس جهلك بي الشخصيات وابطال الروايه بفقدها طابع اساسي اتوجدة عشانو

سعيد جدا جدا جد اجدا بي قراة حروفك ((ومعاناتك مع العضلات))
وعشت القصه باحساس ذول مشتاق وربنا يدوم بين المحبه والاخوه
ولك كل تقديري
[marq=left:5013e5d41b]اخوك الفاتح تنقو :D :D [/marq:5013e5d41b]

[عبدالله إبنعوف]

يا شفت يا روعة والله إنت تحفة ، شكراً على الرواية الحلوة الظريفة ، والله الواحدمشتاق يشوفك بعد ما جيت السعودية ، قدرت تعمل عضلات ولا الوضع كما هو عليه ؟

واسمح لي عبرك أحي الأخ الفاتح تنقو ونقول ليهو الكلمات اللي إعتدنا عليها : الدار دارك والبيت بيتك ومرحب بيك ، ولي عتاب عليه أرسلت ليه أكثر من مرة عبر الياهو قروب علشان نعرفو عن قرب وكل أبناء رفاعة ، يا ريت نشوفوا عضو فاعل ومشارك معاك في المنتدى بتاعك ياشفت

وياريت كمان يدخل قروب التعارف علشان تتم المعرفة بين ابناء رفاعة

دمتم أهلاً وحللتم سهلاً ورفاعة فرحانة بيكم ولي قدام نوروا ساحات ومنتديات رفاعة بوجودكم وبحروفكم المموسقة الرائعة

مع كل التقدير والمعزة
عبدالله

[الحسام]

:lol: :lol: :lol: :lol: :lol: :lol:


عسي منو تسلم يا كنافة


حقيقة رائع بمعني الكلمة


وليقدام

[vivid]

[align=justify:a94a64489b]abuheba

مشكور جداً على كلام الجميل دا
و الله انا الكلام دا كلو م ساهلو
و في ناس كتيرين استاهلو و كمان احسن من الكلام دا


الفاتح

سلامات يا رائع
المعرفة واصلة يا الفاتح
بس انتو لا حس لا خبر
و الحمد لله على اولاد الشرقية القدروا يلموا اولاد رفاعة[/align:a94a64489b]

[vivid]

[align=justify:4122f8c468]ابو مروان

تسلم على التعليق الجميل
و ما دام بتعرف شارع تمبول كويس
و عرفت عجبت و احمد ود السرة

معناهو انت من مرتادي حي البهلة الرائع
معناتو انت ختيناك في قائمة الاحباب

ههههههههههههههه

و تسلم مرة تانية


عبد الله

الكمبيوتر دا مالو معاك
قلت لي سجلك زائر

هههههههههههه

و الله انت ذي ما قلت اصيل اصالة ناس البهلة
لا بهشوا و لا بنشوا

و لي قدام يا زول و سيبك من الكمبيوتر الوهمان دا[/align:4122f8c468]

[abumoram22]

الأخ فيفد
صباحك سعيد ما دام بعيد من الكتاحة
اليوم الخميس التلقى الكتاحة مسوية هوايل وبالمناسبة دي نحن اولاد اعم البهلة لزم ناس فريق الرسول معندكم حنقوق عرفتهم ز القبتاب) الامتداد الطبيعي للبهلةوشارع تمبول القديم حق ناس القبتاب من طاحونة ود الحسين مارا بالعمراب ومندامت ودكان ود العاقب الله يرحمو وجامع الفادنية واللفة ببيت ناس عمك جعفر البشير ليعانق شارع تمبول الجديد عند بيت عمك دفع الله عبدالباقي اها بعد كدي عرفتني؟ حاول مرة اخرى ولا أديك اختيارات؟
والله أنا سعيد بيك وسعيد بتمسكك بأهلك وباسلوبك الرشيق الرصين .
متعك الله بالصحة والعافية ووفقك فيما تصبو اليه

[vivid]

[align=justify:179bcfe92e]الزمان : الساعة الثامنة مساء من عام 1981م - المكان سريري الدافئ بـ(حي البهلة)

دجاجي يلقط الحب و يجري وهو فرحان
كأن عيونه خرز له في الشمس ألوان

عمي منصور : ود يا فيفيد - أقفل خشمك دا و أمشي نوم
أنا : يا عمي بكرة عندي تسميع بتاع قصيدة - خليني أذاكر شوية
عمي منصور (غاضباً): قلت ليك أمشي نوم يا ولد، قبل ما أجي و أعلقك من لسانك

تعلقني من لساني؟ - أنت أيها الرجل الأمي!!! أيها السفاح!!! أيها الشرير!!!؟ سامحك الله أيها العم. و لكن يجب عليك أن تعلم أيها العم بأنني إنسان لا يحب و لا يرضى أن يتحكم فيه الغير. انا إنسان حر و طليق منذ أن ولدتني أمي، و لن أسمح لك بتسييري كما تشاء. لك زوجتك و لك أولادك – إذهب و تحكم فيهم كما تشاء و لكنك ليست لديك أي سلطة تنفيذية على فيفيد.

نعم إن عمي منصور هو عم قاسي بكل بمعنى الكلمة. أعرفه كما أعرف نفسي: رجل بحجم و ضخامة حيوان منقرض. له عيون كعيون القط البري. فارع الطول. كث الشعر و الحاجبين. ربااااه – إن كل شيء في جسد عمي منصور تمتاز بالمتانة و الضخامة. يخيل لي عندما يلاعبني و يرفعني إلى قمت رأسه بأنني ارتقي إلى عنان السماوات العلى. و أفقد معه الإحساس بالزمن. إنه إنسان غريب، الكل في بلدي يعرفه. و الكل في بلدي يحترمه. و الكل في بلدي يخاف منه. ماذا تراه يحسب نفسه؟ لماذا يكن له الناس كل هذا الإحترام و كل هذا الخوف؟ مع إنه رجل عادي مثله مثل بقية الرجال في بلدي. ربما يكون إختلافه الوحيد عن بقية الرجال يكمن في تلك القطعة الزائدة من اللحم التي يقال لها النخلة. نعم – يتميز عمي عن البقية بأن له نخلة. و أن الآخرين لا يملكون أي نخلة. يمتلك عمي منصور نخلة غريبة شكل. تحتل موقعاً استراتيجياً بجوار عينه الشمال و بالتحديد عند الطرف الأقصى من العين.

من أين أتى عمي منصور؟ من أين أتى هذا العم الغريب؟ أيكون من كوكباً آخر؟ انه يستطيع أن يتنبأ بالكثير من الأحداث التي المستقبلية. أذكر عندما مرضت دجاجتي الفيومية جراء اجتياح ذلك الوباء الغامض قال لي عمي: "يا فيفيد ان دجاجتك الفيومية سوف تعيش". كيف عرفت أيها العم الغامض بأن دجاجتي الفيومية" سوف تعيش؟" من أين أتيت بهذه القوة التنبؤية؟. أتكون ورثتها من جدي السادس؟ لابد من وجود سر. لا شيء يحدث في هذه الدنيا إلا و يكون وراءه سبباً فما هو مصدر قوتك و صرامتك و نبوءتك؟

نعم انها هي، لا بد أن سر عمي منصور يكمن في تلك النخلة. تلك النخلة التي تميز بها عمي عن غيره و التي اتخذت موقعاً استراتيجياً عند طرف عينه الشمال لابد أن يكون لهذه النخلة سر غامض. نعم . . لقد تميز عمي منصور بهذه النخلة دون غيره من الرجال. هل جدي السادس ذلك الرجل الصالح يمتلك مثل هذه النخلة؟. الكل في حي البهلة ينظر لـعمي كأنه آلهة. هل يكون ذلك من تأثير هذه النخلة العجيبة؟ نعم انها النخلة دون شك. كل هذا الغموض و كل هذه القوى و البسطة في الجسم تكمن في تلك النخلة. انها السر الذي منحه له الله دون غيره من الرجال. ماذا تراها تكون؟ أهي مجرد قطعة لحمة زائدة ليس لها أي تأثير أم أنها بمثابة (عصا موسى) التي ميزه الله بها دون كل الرسل. الغول العنقاء و الخل الوفي انها من الخرافات أيكون عمي منصور هو رابعها؟

لابد أن أكتشف السر الغامض لهذه النخلة التي تنمو و تكبر بهذه الصورة مدهشة. لا بد أن أعرف سرها. لا بد أن أرضي فضولي من هذه اللحمة الزائدة. لا بد أن أضع حداً لإستفساراتي. ربما لو لمستها تأتيني تلك القوة التي انفرد بها هذا العم. ربما يريد هذا العم أن ينفرد بهذا السر لوحده؟ آآآه منك يا عم – كم أنت بخيل و كم أنت قاسي. لو كان سر قوتك يكمن وراء هذه اللحمة الزائدة فلماذا تبخل به علينا؟ دعنا نصبح أقوياء مثلك. دع أجسادنا تنمو و تكبر مثل جسدك العاتي. لو كنت مكانك لوزعت أسرار هذه النخلة على كل أخواني. بل على كل أفراد اسرتي. لا لا لا سوف أوزعه لكل أهالي حي البهلة المساكين.

"يا فيييفييييد نوم قبل ما أجي و أقطع ليك ضنبك"

يا للهول انه الغموض بعينه ، كيف عرف هذا العم أنني لم أنم؟. و كيف يقطع ذنبي و أنا لا أملك أصلاً ذنبا؟. نعم أنا لا أملك ذنبا . أيكون عمي هو من قطع ذنبي و أنا صغير؟ يا للكارثة !!! يا للمصيبة!!! أين ذنبي يا عم؟. لماذا قطعت ذنبي يا عم؟. لو أنك أنت من قطعت لي ذنبي و أنا صغير فهذا يعني أنني لا أملك ذنبا في هذا الوقت الحاضر؟؟ فلماذا تهدد بأن تقطع ذنبي؟. ماذا سوف تقطع الآن؟ أنني لا أملك ذنبا كي تقطعه. أتريد أن تقطع شيئاً آخر؟. لا لا لا كل أشيائي ثمينة و لن أسمح لك بقطع أي شيئاً آخر. يكفيك الذنب الذي أخزته على حين غرة، و لكن بقيت أعضائي تخصني أنا لوحدي.و سوف يأتي يوماً أنتقم لذنبي المقطوع أشد الإنتقام. مهلاً . إن خالي بله لا يملك ذنبا هو الآخر. و كذلك سمسمه و عبودي لا يملكان أذنباً هما أيضاً . نعم إن الله خلقنا بدون أذناب ربما يخاف علينا إن خلقها لنا أن يقطعها أمثال عمي منصور. إن الله أراحنا من هذه الأذناب لأنه يحبنا و لا يردنا أن نكون مضطهدين من الغير. على العموم لو كانت لنا أذنابا و قام عمي منصور بقطعها حلالٌ عليه، لأن المعركة (كرٌ و فر) و إنها البداية التي بدأها عمي و سوف أنهيها أنا و بأسلوبي أنا الذي سوف أعرفه.

"انت لسه صاحي يا فييفييد؟"

نعم أنا صاحي – لم أنم بعد. لو أخبرتك بذلك نخلتك المتعجرفة تلك فتعال واجهني. إنها ساعة الإنتقام أيها العم الغامض. نعم انها ساعة الإنتقام و لن أضيعها. أريد أن اقتص منك أيها العم أريد أن أرضي فضولي أريد أن أعرف سر النخلة.

يا ترى مما تتكون تلك النخلة التي هي مصدر أسرار و إلهام عمي منصور؟ هل هي حقيقة أم من نسج الخيال؟. هل يتخفى ورائها ساحر أم إنها هبة من الله لأن عمي يكثر من الصلاة؟. لا شك أنها هبة من الله لأن عمي برقم أسلوبه الصارم و القوي في المعاملة إلا أنه لا يفرط في عبادته. إنه لا ينام كل الليل. تجده طيلة اليوم و هو يركع و يسجد لله، عكس خالي بله الذي أضاع ثلثي عمره وراء المنكرات و ملزات الدنيا. إذا كانت هذه النخلة هبه من الله فلماذا يكتم عمي السر و لا يحدثنا بذلك. أيخاف على هذه النخلة منا؟ هل إذا حدثنا بسر هذه اللحمة الزائد سوف يأخذها الله منه و يعطيها لشخص آخر؟ ماذا لو صحا من نومه و وجد أن هذه النخلة تحولت منه و طلعت عند خالي بله. بالتأكيد إن خالي بله سوف يسيء التصرف بها. سوف يوظفها لإرتكاب المنكرات و توافه الأمور. سوف يوظفها مادياً لجمع الأموال التي عجز عن توفيرها و هو بكامل قواه.
ان السر أقوى من أن أفكر فيه هكذا. يجب أن اتخذ خطوة فعليه حتى أصل لسر تلك النخلة الغامضة. ربما لو عرفت سرها تنتقل قواها الغامضةلي و أصبح مثل عمي حازماً صارماً مشدود الجسم، لا يقف أمامي شيء إلا وصرعته و هزمته. يجب علي الوصول بسرعة لسر تلك النخلة العجيبة قبل أن يخطف الموت عمي. الكل يموت في النهاية. ربما يكون الموت على قيد أنمله من عمي. إن عمي ليس معصوم من الموت. نعم يمكن أن يموت ذلك العم بهدوء كما قد مات جدي السادس بهدوء. هذا ما قالته لي خالتي السعدية. نعم خالتي السعدية تعرف سر جدي السادس. لقد توارث أجدادي القصة عن بعض، إلى أن وصلت لي. أيكون عمي منصور هو خليفة جدي السادس؟ و لم لا- أعرف الكثير من أصحاب القوة القامضة يورثونها لأبناءهم. انها أسئلة كثيرة و محيرة يجب أن أضع لها حداً. يجب أن أعرف سر تلك النخلة الغامض يجب أن أعرف ماذا يخبء لنا هذا العم. يمكن أن يكون هذا العم من عالم آخر و نحن لا ندري. كل هذه الإسئلة توجد إجاباتها في تلك النخلة القابعة في طرف عين عمي منصور.يجب يجب يجب أن أصل لعمي و هو في سريره و أعرف سر تلك النخلة.

رفعت غطاء البطانية من وجهي بكل هوء، و أنزلت رجلي اليمنى أولاً، خوفاً من عواقب ما أقوم به. ثم أتبعتها رجلي اليسرى. ثم وجدت نفسي و أنا واقفاً بكامل جسدي على الأرض. نزلت على الأرض و بدأت أحبو في إتجاه ذلك السرير العريض، الذي يتمدد عليه عمي الغامض مع نخلته العجيبة. إن عمي الآن غارق في نوم عميق حتى أذنيه. توجهت لسريره كالسير الذي يسير نحو المنحدر. و لكن بدون أن أصدر أي صوت. ثم وقفت عن منتصف السرير. إن عمي يملئ السرير كاملاً. ياه!!! يا لضخامة جسمه. هذه هي المرة الأولى التي أتمعن في جسد عمي الضخم. إن عمي حاجة مهولة إذا ما قارنته بـخالي بله. إنه صورة عكسية تماماً لخالي بله كالفرق بين السماء و الأرض. أدرك تماماً إن هذا الفرق مصدره تلك النخلة. مسكين يا خالي بله كم أنت مظلوم. لو كنت في مثل سنك لكنت ارتكبت جناية في هذا العم الظالم و في نخلته المتعجرفة. ثم تقدمت حتى كاد جسدي يلامس جسده، و شعرت بحرارة جسده تسري في جسمي كالتيار. عندها هتف لي منادي : "يا فيفيد ارجع لسريرك و اتقي شرور تلك النخلة". و لكني تمالكت نفسي و رددت لذلك الهاتف "أنه لا رجعة اليوم". إما أنا و إما النخلة. لا يمكن أن تهزمني تلك النخلة اللعينة. اما أن يكون عمي هذا كائناً إنسياً مسلماً و إما شيئاً من نسج الخيال. شيئاً صنعته تلك النخلة القابعة عند نهاية عينه الشمال. إنه الآن يرقد أمامي كالميت . . أتراه ميت أم نائم؟. أدرك تماماً إنه يراني عن طريق نخلته الغامضة و لكنه يتظاهر بالنوم. قم أيها العم و واجهني وجهاً لوجه. سوف أفضحك في الإجتماع القادم للأسرة، سوف أقول إنك شيء لا وجود له، إنك تمشي و تسير بواسطة قطعة من اللحم لا يتعدى حجمها حجم بلحة صغيرة. ثم تقدمت و بدأ لي عمي ميتاً، لا لا لا يجب أن لا تموت أيها العم قبل أن أعرف سرك و سر نخلتك و أفضحك وسط كل أفراد الأسرة. يجب أن لا تموت يجب أن تبقى ليعلم القادمون من بعدي ماذي يعني لهم عم منصور. نظرت إلى رأسه و إلى قدميه، إن عمي منصور رجل بطول الزرافة، لا نهاية لجسده. إنه جسد غير طبيعي لا يمكن لإنسان أن يكون له مثل هذا الجسد العجيب. و لكني الآن لا إهتم لجسدك. إن الجسد له وقته المناسب الذي سوف أهتم به. و لكن هدفي اليوم هي تلك اللحمة الزائدة. تلك اللحمة التي سيطرت على عمي و صنعت منه الرجل المهاب. و مددت يدي إلى تلك النخلة الغامضة كي ألمسها. و لكن عمي إنقلب في نومه. فسحبت يدي بسرعة قبل أن يصحو ذلك العم التعيس. لا تتظاهر أيها العم بالنوم، أدرك تماماً أنك و نخلتك على كامل وعيك. مددت يدي ثانية و شعرت بأن شنبه كفرشة الألون. أنه شنب غير طبيعي. إن كل ما في عمي غير طبيعي. يا لها من عيون غائرة في محاجرها كأنهما قطعتين من الجمر. و شعرت بأنفاسه الحارة تلهب يدي كأنها أبواخ من جهنم. إن عمي حار في طبعه و حار في جسده و حار في نفسه أيضاً. و مددت يدي و لمست النخلة العجيبة. سرت في جسدي رعشة لم أتعودها من قبل. أتكون قد سممت بدني هذه النخلة؟ لا لا لا . . . لو سممتني لكنت الآن راقداً مثل عمي دون حرك. ما هذه الخطوط الغريبة و العجيبة. إنها كخطوط جبهة عمي. كما إنها لينة كحبة الزبيب العملاقة. ماذا سوف يحدث لو عصرتها أتراها سوف تنفجر في يدي و تملأني بذلك سائل العجيب الذي أشاهده في الأفلام الأمريكية؟. ليس هنالك سحر في تلك اللحمة. لا توجد قوة غامضة. إنها مجرد لحمة. لحمة عادية. لا تسمن و لا تغني من جوع. إنها مجرد ديكور لإخافة الناس. إذا لم تكن كذلك لكانت إلتهمتي الآن عندما لمستها و عصرتها. إن عمي يستخدم تلك النخلة فقط لإخافة أهالي حي البهلة المساكين. و لكني من يوم غدِ سوف تجدني لك بالمرصاد أيها العم. لا أخاف و لا أخاف من نخلتك.

ثم عدت إلى سريري و أنا أشعر بداخلي بإحساس لذيذ نتيجة إنتصاري على نخلة عمي منصور.

صباح اليوم التاني

خالتي السعدية : مالك يا فيفيد بترجف كدا
انا : شاعر لي بي حمى يا السعدية.
خالتي السعدية : الله يستر عليك من الملاريا
انا : لا لا لا حمتي دي ما من الملاريا
خالتي السعدية : أها من شنو يا فيفيد؟

إلتفت إلى جدي منصور و هو جالس يسبح فوق سجادته. وجدته يبتسم إبتسامة غامضة و مخيفة. ثم نظرت إلى نخلته العجيبة فوجدتها قد إذدادت تألقاً و بريقاً و غموضاً.[/align:179bcfe92e]

[عبدالله السفاح]

الرائعون دوماً أبناء بلدي الحبيب كم أنا مسرور بانطلاق المنتدى والموقع قريباً إن شاء الله
أما عن أخونا فيفد والعضلات , فانا اختلف عنه بأنني املك اقوي عضلات يعني عضلات تبش وصدر صبه
وكرعين كمر وذلك لأنني انتمى لمدينة العلم رفاعة.
فدمتم ودام التواصل ديدننا.
السفاح.

[الفاتح محمد شريف]

:shock:

اخي تتالق دوما وتسعدنا بروائعك
وتعدنا بين السطور ان ننتظر جديدك دائما


لك كل الود


الفاتح تنقو

[Nola]

الاخ vivid :

دلفت الي هنا

والفضول يدفعني دفعنا لمعرفة المفردات (الكنبزر و العرموص و البطيخ)

ووجدت ويا لهول ما وجدت

يا الهي احرف تمشي علي سيقان

مفردات تحكي عن نفسها

بالجد سرد جميل ومشوق

استمتعت كثيراً به

وشكلي كدا تاني حا اتكي بي جاي والله الا يجروني جر تاني

[عبدالله إبنعوف]

يا أخوانا أخونا فيفيد الشفت الأيام دي مشغول جداً وأنا أنتهزهذه الفرصة لكي تستمعوا بهذه القطعة الرائعة ، وكمان يكون جميل لو أديتونا رأيكم

أخوي العزيز فيفيد : أنا ما استأذنت منك ، لكن والله حرام الجماعة ديل ينتظروا أكثر من كدة ، فلك العتبى حتى ترضى



إلى كل المظليين و الظلاميين و الضهبنجية و الحبيبين

و أبوريسين خفيفة

أهدي لكم هذه اليومية و أقول لكم بملئ فمي

"يا أخواني عليكم الله مدوا كرعينكم قدر لحافكم"

مجرد نصيحة لوجه الله تعالى

لا أريد منكم مقابلها جزاء و لا شكورا.

أقولها لكم و ليس في نيتي أي شيء تجاهكم

و ليس لي أدنى قصد في أن أخرب عليكم السوق بتاعكم

أو أن أكون حقنة

أو أن أقف حجر عثرة في طريقكم

و لكني أخاف عليكم من نفس المصير الذي عشته مع البنت الشقية

ذات اللون الأبنوسي و المعجونة بي موية العفاريت سوزان عود الزان

و ذلك عندما كنت طالباً بريئاً بالمرحلة الثانوية.

أتدرون من هي سوزان عود الزان؟

آآآآآآخ منك يا سوزان عود الزان

آآآآخ ثم آآآآخ ثم آآآآخاتٍ متتالية لو الزمن بس يرجع لذلك اليوم

الذي عرفتك فيه (كان يوم أسود و مهبب)

آه لو لقيت لي فيك فرصة تاني حا أخلي ريحتك طير طير

و حا أعلمك كيف تلزمي حدودك

و حا أخلي الما يشتري يتفرج

و ستدركين أن اللعب على فيفيد كالعب بالنار

و أن الهظار مع فيفيد ليس كالهظار مع غيره من الرجال

قبل أن أدلف لكم في حكايتي مع المصيبة سوزان عود الزان

أحب أن أوضح لكم و لكل من يجهلني معلومة مفيدة

لها علاقة بهذه اليومية التي ترددت طويلاً قبل أن أقوم بنشرها.


أنا فيفيد إبن أبيه

قد ولدت و نشأت و ترعرعت بمدينة رفاعة

و بالتحديد في (الحي رقم 13).

و لو جئنا لوصف هذا الحي

لوجدنا به شذوذاً واضحاً كوضوح الشمس في شهر مايو

عن بقية الأحياء بمدينة رفاعة

حي ليس كغيره من الأحياء

يحتوي على أربعة قطاعات كاملة و متكاملة،

لها وزنها و ثقلها المشهود لها بين كل أحياء مدينة رفاعة و هي:

قطاع الحسيناب

و قطاع الزيداب

و قطاع القبتاب

و قطاع الفادنية

و بينهما برزخ يمكنكم أن تطلقوا عليه اسم (قطاع المنطقة الوسطية)

و هو منطقة التماس التي تتوسط القطاعات الأربعة

التي ذكرتها لكم آنفاً

و لولا الدسائس و المحن و الإحن

لتم الإعتراف بهذا القطاع من قبل أهل الحل و العقد

بأنه القطاع رقم خمسة بـ(الحي رقم 13).

و قد شاء الله أن نكون نحن من ساكني (قطاع المنطقة الوسطية)

لكن المشكلة

أنه و برقم انتساب اسرتنا و علاقتنا الأسرية بـ(قطاع القبتاب)

إلا أن القدر قد حكم على أن يكون منزلنا في منطقة التماس،

أي في (المنطقة الوسطية) المهمشة و المتنازع عليها

بين هذه القطاعات الأربعة

بمرور الزمن

قد شكلنا نحن أهل المنطقة الوسطية قوة ضاربة لا يستهان بها،

و تمكنا و بقدرة قادر من توجيه الرأي العام بمدينة رفاعة

للإعتراف بنا كحي له كيانه و ذاتيته

و بأننا حي لا يقل قوة و منعة عن بقية الأحياء الأخرى برفاعة.

و قد كان لنا ما أردنا و تم تسمية حينا (بحي الوسطية)

و لكنه يتبع في حكمه و إدارته للرئاسة العامة للحي رقم (13)

بقطاعاته الأربعة.

بس أصحاب النفوس السيئة و الأفكار المريضة

قاموا بتوجيه حملتهم الشيطانية و الظلامية

مستعينين ببعض القوة الأجنبية المعادية

و ببعض الشخصيات الدخيلة المشكوك في إنتمائها أصلاً لمدينة رفاعة،

حيث قاموا بزرع بعض العملاء بغرض إثارة الغلاغل و روح العدائيات

بين قطاعات حينا الأربعة

حتى يوقفوا قرار الإعتراف الذي صدر بحق حينا (حي الوسطية).

و لكننا تصدينا لكل هجماتهم العدوانية

و رددنا فلول الحاقدين و المتربصين حتى ولوا الأدبار.

و الحق يقال أن العدو لم يهدأ له بال

و لم يعترف بالهزيمة المنكرة التي منيّ بها

بل أظهر العناد و المكابرة الواضحة

و قام بتبديل أسلوبه العدواني الصريح إلى أسلوب العدوان الخفي

متشكلاً كالزئبق

و مستخدماً أسلوب اليهود في معاداة المسلمين

حيث قام هذا العدو بتلطيخ حينا (حي الوسطية)

بأقبح الأسماء إلى أنفسنا.

و كان لهم ما أرادوا في هذا الجانب

و تم تحويل اسم حينا من اسم (حي الوسطية)

و تسميته جوراً و بهتاناً و ظلماً بإسم (حي البهلة)

و هو اسم نابع من أن نساء حينا كثيرات الولادة

الشيء الذي أدى لإزدحام الحي بالسكان

لكننا نطمئن أهلنا القابضين على جمر قضيتهم

بأنه لن يهدأ لنا بال

و لن نتوقف عن تقديم الغالي و النفيس في سبيل قضيتنا

حتى نرد كيد الحاقدين و المتربصين إلى نحورهم

و عندها سوف يرون منا شيئاً بإذن الله،

و عندها أيضاً سوف يتم إلغاء اسم (حي البهلة)

ليعود لنا اسمه و كنيته القديمه ألا و هي (حي الوسطية).



حينا (حي البهلة)

يمكنني أن أصفه لكم بأنه حي يحمل كل صفات

و سمات الخنشرة و الغبشنة و النشاف الروحي و الجسدي

و أن بيئته رافضة رفضاً باتاً و قاطعاً و جازماً

لكل معنى من معاني النعومة و السحسحة

و الموضة و التقليعات الرجالية أو النسائية.

و من الصعب معرفة الرجل من المرأة إلا عن طريق شهادة الميلاد.



و قد تعود كبارنا أن يقولون لنا :

يا أهل حي (البهلة)

إن الأعداء متربصون بكم

من فوقكم و من تحتكم و بين يمينكم و عند شمائلكم

و إنهم يتمنون أن تغفلوا عن عاداتكم و مبادئكم

التي تركها لكم أجدادكم

فيميلون عليكم ميلة رجل واحد و عندها

ستكون السقطة و الإنزلاق في مهاوي الكفر و الرزيلة

(تكبير : الله أكبر – تهليل : لا إله إلا الله).



و عند إلغاء خطب الجمعة و في المناسبات الدينية،

يقومون بتوجيه الإنذارات المخيفة لأهالي حينا

بالجحيم الأبدي وبالثعبان الأقرع لو أننا خضنافي طريق الحب

و العلاقة بين البنت و الولد الدخيل على حينا(حي البهلة)

الذي طالما تمنيت أنني لست من سكانه

لأنه كان سبب للخلاف الذي حدث بيني و بين سوزان عود الزان.



أذكر ذلك اليوم جيداً

كنت خاتي لي صحن بتاع (مديدة تمر)

و راقد في العنقريب بتاعي في نص البيت،

و ضارب الهمبريب الساعة اتناشر بالليل

و قاعد أفكر في برنامج يوم بكرة.

لأنو يوم بكرة ليس كغيره من الأيام.

إنه يوم خاص.

يوم زواج واحد من حناكيش (الحي الأمامي) اسمه (ياسر)،

و كانوا بيدلعوهو بإسم (يسّورة).

المهم قادني تفكيري إلى (الحي الأمامي).

الحي الأمامي و ما أدراك ما الحي الأمامي،

حيث لا عينٌ رأت و لا أذنُ سمعت.

تحكي لنا به الحبوبات

كأنه شئ كمدن الأحلام الوردية التي تسكنها الأميرات الحسناوات

اللاتي يتم زواجهن عن طريق الإختطاف الشرعي بواسطة أحبائهن من الأمراء

الذين يأتون راكبين على صهوات جياد ناصعة البياض.

جنات عدن كُتب على بابها :

(لراغبي الزواج أو الخطوبة إن المعاملة بالدولار و الشيكات السياحية)

يعني لا مكان لناس قريعتي راحت.

و أن وسيلة المرور المعتمدة بين أحضان هذه الجنة هي (البنز)

و ليس سيراً على الأقدام كما يفعل سكان (حي البهلة).

الواحد يقول ليك :

[موته هنية في الحي الأمامي و لا عيشة نكد في حي البهلة].

و لو صادف أنه يوجد حفلة زفاف في (الحي الأمامي)

تلاقي ناس (حي البهلة)يقولوا ليك نحنا ماشين (بيت البِكا)،

و السبب في ذلك أنو أي واحد يقوم يشاهد ليهو حفلة بهذا الحي الرهيب

يخرج محمولاً على نقالة الغرام

أو نقالة المستشفى أو نقالة المقابر.

الشيء الذي حدا بالمسئولين

أن يقوموا بتوفير سيارة إسعاف كاملة التجهيز

مع إعلان جزئي لحالة الطواري بهذا الحي

دون غيره من الأحياء، و ذلك في حالة وجود أي مظهر من مظاهر

البارتيهات – المزازيك – حفلات الزواج – حفلات الخطوبة -

حفلات الطهور – حفلات النجاح – الحفلات التي تقام بي مناسبة -

الحفلات التي تقام بدون مناسبة –

التجماعات لزيارة مريض – و عند حدوث وفاة.



يقال أن فنان السودان الأول (وردي)

عندما أحيائه لحفلة له بـ(الحي الأمامي) قلبو انخطف

عندما رمى النظر بتاعو زاوية تسعين درجة

لي واحدة من بنات (الحي الأمامي) كانت بترقص قدامو،

و التي كانت حاتاهو قرض مع الجكس بتاعها،

الراجل يا عين أمو تم باقي الحفلة و هو جالس في عتبة المسرح.

و كان وردي في ذلك الوقت بيغني في غنية (سوات العاصفة)

و كان مفروض يقوم يغني المقطع بتاع الغنية

(هيا أقدلي و سكتي الخشامة و أنزلي في العوازل كي)

بي سرعة و بدون ترديد لكلمة (أقدلي)،

بس صوتو علق عندما شاف بنت اللذينا دي ترقص مع الجكس بتاعها،

و بقى يردد (هيا أقدلي – هيا أقدلي – هيا أقدلي . . . .)

لمن حلقو نشف و البنت البترقص قدامو وقفت الرقيص.

حتين (وردي) قدر يتم المقطع (و سكتي الخشامة و أنزلي في العوازل كي)،

و منذ ذلك اليوم بقى هذا المقطع يُغنى بهذه الطريقة.

و بعدها صرح(وردي) تصريحاته النارية الشهيرة

" بنات رفاعة جمالهن بيظهر من الرضاعة".



و يقال أيضاً أن أغنية سميري لعميد الفن السوداني (أحمد المصطفى)

قد تم تأليف مقطعها الأول في إحدى فاتنات (الحي الأمامي) برفاعة

و ذلك عندما رآها في حفلة مخمسة ليها كرسي مع الجو بتاعها:

و قال قولته المشهورة : الحي الأمامي جوار الأسبتالية وين سميري . . .


لكن شاعر الأغنية لم يستطيع أن يتم القصيدة

لأنو قالوا جات مطرة ليها خاوية قامت فرتقت الحفلة.

و شاعرنا الهمام بذل المستحيل عشان يتم قصيدته المشهورة

بس لم يسعفه الوقت في إنهائها

لأن البنت الفاتنة قد زاغت من أما عيونو بي سبب المطرة.

و المصيبة انو الشاعر دا طلع راجل عِكليتا

و دمو بقري قال ستين يمين إلا يشوف بنت (الحي الأمامي) دي

عشان يتم القصيدة بتاعتو.

قام قعد يشمشم في الأخبار من الشفع و النساوين العجايز،

لحدي ما عرف أنو بنت (الحي الأمامي)

سوف تسافر بكرة مع النجمة للخرطوم،

و حا تنزل في الخرطوم تلاتة عشان تحضر طهور الود (راشد)

و هو أخو صاحبتها (ريري).

شاعرنا العنيد قام

قنص ليها تحت شجرة نيم فيها عش سمبرية في الفرع الآخير.

و شاف بنت (الحي الأمامي) و هي ماشة تشتري ليها علبة صلصة

من البقالة الناصية بتاعت عرب الجزيرة،

و قام بعد ذلك بوضع اللمسات الآخيرة لقصيدته المشهورة

(و انا دستوري نازل في الخرطوم تلاتة وين سميري)

المهم أثناء تفكيري في (الحي الأمامي)

كنت قاعد أقارن بين فاتنات هذا الحي العتيق

و بين الوحوش الضارية التي يقال لها الجنس اللطيف بـ (حي البهلة)

و تذكرت حينها طرطيش كلام

كان سمعتها من التوم ود اللقية

أنو بنات (الحي الأمامي) ديل بنات لذينا خلاص،

الواحدة تسرق اللبانة من خشم الواحد و هو يكون ما جايب خبر

و كمان في واحدات كدايسرقن الكحل من العين بدون العين ما ترمش.


و بالنسبة لي أنا ، فأنا انسان متواضع و على قدر حالي

و عارف مؤهلاتي تجاه السحر و الغموض في عالم حواء:

راسي خفيف و حنين كحنين الحبوبة لي أولاد بنتها،

و كمان أنا من عشاق و مدمني برنامج كلام نواعم

الذي يعرض على قنات الـ (MBC)،

تلاقيني جالس قدام التلفزيون عند بداية هذا البرنامج

ذي الجدادة الحاضنة ليها بيض.

و كمان أموت و أدفع نص عمري

في غناء و لسان الفنانة الدلوعة نانسي عجرم

لأنو صوتها ذي فتافيت السكر.



كنت خائفاً مترقباً أنو لو بكرة مشيت حضرت الحفلة بتاعت عرس (يسورة)

أقوم أصادف لي واحدة من بنات (الحي الأمامي)

اللاتي ينافسن نانسي عجرم في جمالها و أنوثتها

و تقوم ترقص لي حواجبها و الا تكشحني بي ابتسامة تجيب أجلي

و تنسيني (حي البهلة).

لأنو السنة الفاتت قالوا أنو الشيخ ود كلتوم و أثناء جقلبته و حوامته

بي عند ضهر بيوت (الحي الأمامي)

و هو على ضهر حماره المكادي.

اصطادته عيون واحدة من بنات مغتربي (الحي الأمامي)

و قعدت تبحلق في الحمار بتاعو.

كانت دي أول مرة تشوف فيها حمار.


مسكين يا الشيخ

الراجل افتكر أنو البنت دي بتعاين ليهو هو و ليس للحمار بتاعو.

و من ديك و عيييييييك،

تم الإعلان الرسمي عن اختفاء صاحبنا الشيخ ود كلتوم

من (حي البهلة) في ظروف غامضة.

و بعد مرور أسبوعين على إختفائه، إنقطع فيهو الأمل

و قالوا قطع شك يمكن يكون كشوهوا ناس الإلزامية و سفروهو الجنوب.



لكن الشيخ ود كلتوم الحنين

طلع أنو كان كاسر ركبة هو و الحمار المكادي بتاعو

مع صاحبو (عمر ود خير الله) بالحي الأمامي

و تلاقيهو اليوم كلو مادي رقبتو مترين بي فوق الحيطة

في انتظار خروج بنت اللذينا

و خطافة قلوب الرجال(بنت المغترب).



المهم و أثناء ما أنا راقد في عنقريبي و أفكر في يوم بكرة

جاني ليك صوت خالتي ذي هجمة كلب:

يا فيفيد يا زفت

يا طير السُقد

أنا : مالك يا الخالة قاطعة لي حبل أفكاري

الخالة : يا يابا إنشاء الله الحبل اللي يخنقوك بيهو

أنا : ما تداعيني يا خالة

الخالة : خلاص اتخمد نوم قبل ما أقوم ألطشك بي مركوب خالك بلة

انا : أها يا خالة اتخمدتا



صحيت اليوم التاني و كلي حنية في انتظار الحفلة بتاعت زواج (يسورة).

كان كل تفكيري في ذلك اليوم عن الداهية التي يقال ليها (الحي الأمامي)

و في عرس الود (يسوري) هل حا يكون هذا العرس كما تخيلته؟

هل حا أصادف فيها حبيبة المستقبل

التي طالما قد حلمت بها؟. يا ترى ما شكل هذه الحبيبة المجهولة؟

ممكن تكون خديرا زي خدرة جروف جناين رفاعة

ممكن تكون صفيرا ذي منقة سنجة

ممكن عسولية ذي البنت قليلة الأدب بكيزة السبابية.

ممكن تكون أبنوسية - أكيد حا تكون أبنوسية

أنا أمس حلمت لي بي واحدة أبنوسية

قاعدة تكاوي فيني و تمد لي في لسانها بي فوق الحيطة

يا خرابي لو كانت أبنوسية.

قطع شك حا تكون أبنوسية اللون

أموت في اللون الأبنوسي

أعشق اللون الأبنوسي

و صاحبات اللون الأبنوسي

و كل من يعشق اللون الأبنوسي

أعشق اللون الأبنوسي حتى النخاع و حتى الثمالة

يا ربي البنت الأبنوسية بتاعتي دي حا تكون بتدرس في ياتو درسة؟

في مدرسة متوسطة؟ (من علب الصلصة ووووب علي انا)

في مدرسة ثانوية؟ (اللبني الجنني * * * اللابس اللبني)




المهم عند المغربية قامت الحفلة دورت (بالحي الأمامي)

بنات أشكال و ألوان، عاملات زي حلاوة مولد،

شيء أخضر و شيء أحمر و شيء أصفر و شيء مالوش لون.

كان كل همي أني ألاقي الأبنوسية بتاعتيالتي حلمت بها أمس

بين جموع و جحافل الجكس بتاع (الحي الأمامي)،

لكني لم أجدها.

انتظرت حتى بدأ اليأس يدب في أوصالي،

و في النهاية قلت لي نفسي:

يا ود يا فيفيد

أحسن حاجة تعملها تقوم تجرجر أزيال خيبة الرجاء و تكسح البيت.



بس جائني صوت يعقوب الفلاتي دافئاً حينما قال لي و بهمس :

يا فيفيد – شوف العذاب الجالس هنااااااااااااااااااك داك

أنا : اخرب بيتك يا يعقوب – دي انا العايزها من زماااااااان

مشيت عليها بدون ما أستحي.

لقيتها قاعدة تطق الحنك مع واحد أملس كصلعة جدي الطيب.

قمت جلست بي سرعة جنبهم ذي الكلمة الشاذة

و قعدت إتمحلس عليهم.



لكن الجماعة ديل كانوا في وادي و أنا في وادي.

الود الأملس : تعرفي يا سوزانا – أنا بكرة ماشي الجيش

سوزان : يا لهوي يا عاصم دا أنا كنت أروح فيها

الود الأملس : بعد الشر عليك يا سوزان

أنا واسطتي وزير بديوان الحكم الاتحادي

و حا اتوزع ضابط في موقع محترم في البحرية

سوزان و هي تبكي: انا خايفة يقوموا يوزعوك غواصات يا عاصم

الود الأملس : يخصي عليكي يا سوزان،

تاني ما تقولي كدا انا دموعي في طرف عيوني



في اللحظة ديك قمت بي سرعة ناديت الود يعقوب ود الفلاتة و قلت ليهو :

يا يعقوب عليك الله تعال بي سرعة بدورك تعمل لي خدمة

يعقوب : شنو يا فيفيد دا وكت خدمة؟

بالله عليك خلينا نشوف الرزق بتاعنا

انا : خصمتك بالرسول يا يعقوب

بس تطفش لي الود الأملس القاعد مع البنت الأبنوسية داك

يعقوب : يا فيفيد – مد كرعيك قد لحافك – البنت دي انت ما من توبك

انا : انا قدها و قدود يا يعقوب و خت في بطنك بطيخة صيفي

يا يعقوب أخوك ما ينقدرش عليهو

يعقوب : المهم أنا حذرتك

و بكرة ما تجي حانف لي وشك و تخلي الناس تضحك فينا




بعد شويتين كد الود يعقوب مشى جاب ليهو قزازة بتاعت بيبسي

حاشر فيها حكاية خمسة نملات أم ريش.

و عمل ليها عملية إنزال جوي ناجحة بين طيات ملابس الود الأملس

ثم كانت الصرخة من الود الأملس




و كانت دي فرصتي اللي مش ممكن حا أضيعها

أنا : يا مراحب

سوزان : بسم الله الرحمن الرحيم – انت مين

انا : فيفيد

سوزان : و عايز أيه لو سمحت

انا: و لا حاجة – بس تعرفي يا اخت انا شايفك من زمان

هي : شايفني انا؟ - لالالالا يا اسمك مين انت

الظاهر انك غلطان انا ما قاعدة أشوف حتات

ذي القاعد تشوفها انت دي

انا : طيب خلاص تكوني انتي البنت الأبنوسية الحلمت بيها امس

هي : هي حصلت انك تشوفني في النوم؟

انا : لا يا أخت - عيب عليك نحنا ناس محترمين

الحكاية بما فيها حلمت أني قاعد أجكس لي في واحد أبنوسية

و قلت لازم أحقق حلمي بتاعي دا و أقوم أتعرف لي علي واحد أبنوسية.

هي : I see

انا : عليك النبي اتذكري يا أخت

يمكن تكوني جيتي (حي البهلة) و لو بالغلط

هي : (حي البهلة) دا يطلع شنو؟ - ذي (الحي الأمامي) كدا؟

أنا : لالالا – دا حي الرجال – حي الناس الحمشين

حي الجعليين الما خمج - شيالين التقيلة و مدرجين العاطلة

هي : بري أنا منكم يا ناس (حي البهلة)

أنا : و الله يا أبنوسية أنا اتمنى انك تقومي تزوري (حي البهلة)

هي : سجمي يا ولد – مالك علي

انا صغيرة و جاهلة و الدنية دي لسة ما شفت فيها حاجة

أنا : خلينا طيب نتعرف علي بعض

هي : لكن أنا ما اقدرش اتكلم مع واحد مستواهو الاجتماعي اقل من العادي

أنا : أنا بعجبك و كلي فهلوه

هي : تسمح تديني نبذة عنك؟

أنا : محسوبك فيفيد – فيفيد الشفت من سكان قطاع (البهلة)

هي : ياااااي (يا ناس البهلة) انتو الأسامي دي بتجيبوها من وين؟

هي الأسامي كملت و الا شنو؟

أنا : يا أبنوسية كلمة فيفيد دي يتعني قوي و جميل

هي : هاهاهاهاهيهيهيهيهوهوهوهوهو ما هو باين

يعني سيماهم في وجوههم

أنا : بلاش تجريح

هي : عندك يا محترم عشرة دقائق تعبر فيها عن مكنونات قلبك و بعدها

حا أقدر أقرر مدى استمراريتي في الحديث معك



قمت حكيت ليها عن حي البهلة

و عن كتل البوليس للكلاب السعرانة في (حي البهلة)

و عن مركوب خالي بلة الذي أدخلناهو لعملية تجميل مستعجلة

و حكيت ليها عن إشاعة ظهور حيوان وحشي في خور حي ديم العوض

و قتله لبنتين من بنات النوبة،

حكيت ليها كمان كيف خالتي بتعمل الحلو مر

بدون ما تضيف ليهو بهارات كتيرةعشان ما يعمل لينا (التهاب مصران)

و ما هي الطريقة المثلى لتفادي الأولاد الضهب في الموقف الصعب

و كيف تحافظ على لون بشرتها الأبنوسية من أشعة الشمس القاسية.

وكيف الواحد يعمل نيفة من راس خروف بلدي

و ما هي كمية الفلفة و التوم التي تضاف لي صلطة الروب الخطيرة.



و الله الساعة القلت فيها صلطة الروب،

البنت الأبنوسية دي لفت (360) درجة و صرخت :

الروووووووووووووووووب يا بتاع (حي البهلة)،

واااااااااااااااااي انا منك فقعت مرارتي


و سحبت شنطتها و اختفت من قدامي في لمحة بصر مخلفة ورائها منديل

مطرز بأجمل و أحلى حرير طبيعي شاهدته في حياتيكُتب عليه بالإنجليزي

" To my sweetheart Asim, the only man whom I fell in love with him"

و ترجمتها بالعربي "إلى حبيبي عاصم الرجل الوحيد الذي قد أحببت".


الآن

و بعد مرور أكثر من ثمانية سنوات على هذه الحادثة

و بعد شروعي في موضوع خطوبة رسمية

لا زلت أحتفظ بهذا المنديل الذي خلفته بنت المخفية سوزان عود الزان

فهل ترون أن أخبر به خطيبتي؟

أم أكتم عنها الماضي الأليم الزي تركته هذه السوزان




من يوميات فيفيد
تم النشر في 12/12/2004م

[الحسام]

الولد الشفت فيفيد

ابداع مكنون بين الخواطر


ولك مني الف مليون تحية علي هذا السرد الرائع


حقيقة مبدع وليقدام اخي فيفيد

[vivid]

[align=justify:fe3c04f36d]
أول يوم دخل فيهو التلفزيون بيت ناس (جبارة) . . . . . كان يوم عالمي . . . . . اليوم داك وقفونا طابور . . . . . و وزعوا لينا اللقيمات . . . . . و قعدونا دواير دواير . . . . . و جابوا لينا قدحات مليانات مديدة حلبة . . . . . و بالليل جابو ليهم صرة مدفوسة كمون أسود و علقوها في أريل التلفزيون . . . . . خايفين عليهو من العين و الحسادة . . . . . (جبارة) زاتو بقينا ما بنشوفو . . . . . حاربنا و قطعو معانا ناشف . . . . . بقى يعاين لينا بي طرف نخرتو . . . . . هو من ما قام غتيت . . . . . و جيت التلفزيون دي زادت الغتاتة بتاعتو . . . . . قدر ما نعاين ليهو بي فوق الحيطة نلقاهو محكر قدام التلفزيون . . . . . حكيرة ست الكسرة . . . . . حارسو من صفارة البداية لحدي صفارة النهاية . . . . . الإرسال لمان ينتهي يخلوهو فاتح و يشخشخ لحدي الصباح . . . . . كية للجيران و شان ما يجيهم حرامي يحيرهم فيهو . . . . . تستاهل يا التلفزيون و عجبتني ليك . . . . . انشاء الله تضوق زلة اكتر من كدا . . . . . انت زاتو الخلاك تقطع البحر و تجي لي ناس (رفاعة - حي البهلة شنو).
وكتين التلفزيون ربعن و تم أربعينو . . . . . جاني (جبارة) في البيت و هجمني هجمة السواد و اللواد . . . . . جاء مكابسني مع دغش الرحمن التقول طالبني دين . . . . . وشيهو ورمان و عويناتو منططات و مليانات قضا . . . . . دللللللل شات باب حوشنا بي كراعو الطرشا ديك جاب أجلو . . . . . كان كم مرة قلت ليهو يا (جبارة) يا أخوي وحاااات النبي كراعك دي ما براها . . . . . فيها سفلي . . . . . شوف ليك فقير خليهو يحواها ليك . . . . . لكن ود اللذينا ما صدقني . . . . . راسو ناشفة ذي كراعو و ما بسمع الكلام . . . . . ناس (حي البهلة) كلهم ريسينهم ناشفة و ما بسمعوا الكلام . . . . . وحات الله وكتين سمعت (جبارة) شات الباب . . . . . قلت قطع شك دا سيد اللبن جاء . . . . . قمت من سريري مخلوع . . . . . و قمت جاري و سروالي ناصل لي رُكبي عشان أجيبلو جك اللبن . . . . . أصلو باب حوشنا دا ذي بيت ست العرقي . . . . . ناس (حي البهلة) ديل بجو مقطوعين ظووووووووط . . . . . و لا قاعدين يدقوا الباب و لا حاجة . . . . . الباب ما بدقوا عيلا سيد اللبن بي عكازو اللتيت داك . . . . . و أصلاً ما في فرق بين عكاز سيد اللبن اللتيت و بين كراع (جبارة) الطرشا . . . . . الاتنين يا كافي البلا فيهن سفلي . . . . . أها . . . . . (جبارة) جاني داخل مادي بوزو مترين . . . . . و مسكني من تكة سروالي . . . . . خلعتي لمان زادت زيادة . . . . . الله بسعلني قلت (جبارة) دا مسكتو لي تكة سروالي عيلا عندو غرضاً تاني . . . . . عيوني الصغيرونية ديك قعدن يودن و يجيبن . . . . . واحدة تعاين لي كراع (جبارة) الطرشا . . . . . و التانية تعاين لي تكة سروالي في يد (جبارة) . . . . . . الليلة الله يكفيان شرك يا (جبارة) . . . . . محمد جانا ما تغشانا . . . . . بعد شوية قام قال لي يا (فيييفيييد) . . . . . أسمع مني كويييييس . . . . أنا عارفك انت بتاع قوالات . . . . . في شان كدا بدورك تكتم السر البقولوا ليك دا . . . . . أنا من يوم الليلة قررت أبقى زول مشهور ذي ناس التلفزيون . . . . . الحمممممد لله . . . . . وكتين قال لي كدا خلعتي ديك بردت شوية . . . . . و فكيت منو تكة سروالي . . . . . . و تحكرت في الواطة . . . . و جريت نفسي و مسكت (جبارة) من فاخورتو العريضة ديك . . . . . برضو فاخورتو نشفانة زي كراعو . . . . . لكن ما عارف يكون فيها سفلي و الا لا . . . . . قلت ليهو يا (جبارة) الليلة مالك؟ . . . . . نعل مو محموم و الا ميرود . . . . . باقي اليومين ديل الحمى البتطلع فوق الراس دي لافة . . . . . التقول قاطعين رحطها في (حي البهلة) الواحد يكون ماشي في الشارع في أمان الله . . . . . بعد شوية اتجم و يجي يتكلم كلام خارم بارم ذي كلامك دا. . . . . انت ماك نصيح يا (جبارة)؟ . . . . . داير تبقى مشهور؟ . . . . وحااات النبي انت ما بتنفع . . . . . و ما فيك حاجة بتبقيك مشهور . . . . . إلا كراعك الطرشا دي . . . . . و قبل كدا نصحتك تمشي تقابل بيها فقير عشان يحواها ليك. . . . . لكن انت راسك ناشف ذي حجر الطاحونة . . . . . هسي كانت شركة البيبسي علقت ليك صورتك جمب صورة روبرتو كارلوس . . . . . و هي زاتا الشهرة دي الواحد بكوس ليها و الا بفتش ليها يا (جبارة) . . . . . الشهرة دي بتجي داخلة للواحد توووووووش و هو قاعد في مكانو . . . . . . ذي دخلة كمال حامد يوم الجمعة. . . . . هسي يا (جبارة) كدي خليني النسعلك . . . . . انت (ضحوية) جارنا دا كاس للشهر؟ . . . . . وحاااات الرسول (ضحوية) دا بقى مشهور و هو في بطن أمو . . . . . أنا من ما قمت و تبيت علي وش الدنيا دي . . . . . لقيتو زول مشهور . . . . . مشهور أكتر من بتاعين التلفزيون . . . . . مع أنو بليد بلادة أبو الدقيق . . . . . و أهبل ريالتو يقطعوها بالمقص . . . . . لكن عشان الزول دا أصابع كراعو الشمال كبير . . . . . بقى مشهور . . . . . قالوا يوم ولادتو أمو كانت متوجعة بيهو وجع شديد خلاس . . . . . (ضحوية) لابد جوة و حالف يمين ما يطلع . . . . . الداية باركة و حارساها يومين كاملات . . . . . برضو ما في فايدة . . . . . (ضحوية) عنيد . . . . . اليوم التاني لمن غلبت معاها حيلة . . . . . الداية قالت كدا و كفكفت يديها . . . . . و قعدت تسوط و تجوط في المراة . . . . . ضحوية كاملة و هي تسوط. . . . . عشان كدا الراجل سموهو (ضحوية) . . . . . عيلا برضو الداية ما قدرت تنكتو من بطن أمو . . . . . و (ضحوية) حالف يمين ما يطلع . . . . . عكليتة خلاس . . . . . ما داير يطلع بالساهل . . . . . في النهاية الداية الحريفة ديك . . . . . قبضتو من أصبع كراعو الشمال . . . . . و هي الغبيانة قايلاهو دا راسو .. . . . . و قالت لي أمو المتوجعة . . . . . حمد لله علي السلامة يا حاجة . . . . . خلاص انحليتي . . . . . هدا صنقورو ولدك قابضاهو في يدي.
يا (جبارة) يا أخوي . . . . . وحات الله الوالد دا بعد ما ولدوهو . . . . . التقول ماكل ليهو مال يتيم. . . . . قدر ما يكبر أصبع كراعو الشمال يكبر معاهو . . . . . تشوف أصبعو دا من بعييييد عامل زي دقاق النوبة . . . . . و حات الله يا (جبارة) الراجل دا شدة ما مشهور . . . . . يقول للمحافظ انت شنو . . . . . اليوم داك وكت خالتو ماتت . . . . . المحافظ جاء يشيل ليهم الفاتحة . . . . . و لي التعترو قعد جمب (ضحوية) . . . . . مسكين . . . . . الناس كلهم تعاين في (ضحوية) . . . . . و لي أصبع (ضحوية) . . . . . بتاع الكميرا خلى المحافظ و قعد صاقر (ضحوية) . . . . . المحافظ زاتو قعد يعيان في (ضحوية) . . . . . محتار . . . . . و (ضحوية) ابن الكلب قاعد يعاين في بتاع الكميرا الحليوني. . . . . و قدر ما يعين لي بتاع الكميرا الحليوني داك . . . . . أصبع كراعو الكبير يتاورو و ينقشمو . . . . . وحاااات الله بتاع الكميرا نجدتو قومة المحافظ.
اليوم داك يا (جبارة) بتزكر مشيت السينما . . . . . قاعد في الكنبة القدامية . . . . مبسوط اقرقر . . . . كنت بحضر في فيلم بتاع (نادية الجندي) . . . . . السينما كلها مكبسة في الفيلم . . . . . عيلا ناس كنبتنا . . . . . كلهم كانو مهمومين . . . . . الناس تعاين لي (نادية الجندي) . . . . . و ناس كنبتنا يعاينو لي ورا . . . . . أتاريهو ضحوية كان قاعد ورانا . . . . . و انا ما جايب خبر . . . . . مبسوط أقرقر . . . . . (نادية الجندي) عاد ما سمحة خلاس . . . . . بعد شوية اتلف عشان اشتري لي تسالي من ست التسالي صاحبتي . . . . . كان ألقى ليك الكنبة فاضية . . . . . قرد ما فيها . . . . . و الجماعة كلهم محكرين في الواطة . . . . . اتلفت وراي . . . . .لقيت أصبع (ضحوية) تحت كنبتنا . . . . . ينقشم فيهو . . . . . . قرب علي . . . . . قمت مهجوم هجمة السيح و الريح . . . . . و جريت بي سرعة و اتحكرت في الواطة . . . . . مع ناس كنبتنا. . . . . و ناديت ست التسالي ديك . . . . . و اشتريت منها التسالي كلو . . . . . و وزعتو علي الجماعة المتفنين في الواطة . . . . . كرااااااامة و سلااااااااامة.


فيفيد في
03/06/2005م
شكر خاص لست التسالي[/align:fe3c04f36d]

[عبدالله إبنعوف]

والله الليلة عملت فيني عملية عمرها ما حصلت ، فرجت فيني الشركة كلها ، اضحك بيطول حسي ودموعي جارية ونخريني سايلة ، وزي ما قال عادل إمام ، ناس المكاتب الجمبي جوا يعرفو الحاصل شنو وأنا أضحك وأبكي وهم ما عارفين البضحكني ويبكيني في نفس الوقت

والله إنت حاجة عجيبة وشي تاني ، وأنا متأكد سجيمان لو جا هنا عندنا حينحني ويرفع القبعة وتاني عمرو ما يكتب بس يفضل يقرا ليك

بنشكر اليوم السعيد الجابك لينا

ربنا ديك العافية ويحفظك ويخليك لينا

مع خالص التقدير والإحترام

عبدالله إبنعوف


Saturday, June 04, 2005 12:40:03 PM

[Nola]

فيفيد الرائع

صاحب السرد الممتع

والحرف النغم

الانحناءه لك ثلاث مرات

[الفاتح محمد شريف]

فيفد يامبدع
لك الود والله فيفد بقيت بنتظر كتاباتك
وابداعك فلا تحرمنا وتجعل انتظارنا يطول
يديك الف الف عافيه

لك امتناني

[vivid]

[align=justify:c095a75ece]

ابو هبة

ام فريحانة دي شنو المسكتك دي

خلي بالك في شغلك

لو داير تشوف كراع ضحوية

خليني ارسلها ليك فاكس

صورتها موجودة معاي


نولا

سلام يا ناس بحري

و برضو الانحناءة لي ناس رفاعة عموماً

مشكور جدا علي تعليقاتك الحلوة


الفاتح

شنو يا حبة

نسأل عليكم زي الشيء السمح

وين انت

ليه ما بتجوش

مش تبقوا تجو[/align:c095a75ece]

[الفاتح محمد شريف]

حنبقي نجي
بس لما تقول لي ولدك دا ماعايزه

يشتغل طلبه ولا شنو قلته احسن توري درب العضلات

من هسي

المهم انا بشغلو ليك مع الخال ود الكاهلي بي واسطه

طبعا و من غير بطيخ :lol:

[ابوسجود]

يافيفيد......واللة انا متبع كريعاتك خطوة خطوة . فى منتدى النيلين كنت معاك مع عمك جبارة وودضحوية .... وعشانك ورغم اننى غير رفاعى انتسبت لهذا المنتدى وافخر بذلك..... واقول لك نصيحة لوجه اللة واللة على مااقول شهيد وعن تجربة ....... حكاية المنديل دى فى المرحلة القادمة وانت مقبل على زواج احسن تخليها سر فى بئر . واذا قلت الان لجكسوية المستقبل عنها الان سوف تقبلها وتقول ليك واللة كل واحد لية ماضى . ولكن بعدماتتمكن منك سوف تكون حياتك كلها دموع واللة منديلك ذاتو مايقدر يمسحها فددحين اسمع الكلام وماتخليك عبيط ......ومهما كنت شفت فكلهم زى سوزان.........نسوان.
اخوك ابوسجود

[vivid]

[align=justify:ac56e13a00]يا الفاتح

و الله الصورة دي هدية

عشان قصة العضلات

رايك شنو[/align:ac56e13a00]

[vivid]

[align=justify:aa465e6922]برطوش خالي بلة

معلم بارز من معالم الاسرة الكريمة

صنع بمدينة رفاعة

بأيدي بلدية مية المية

على يد النقلتي المتمرس

و صاحب الباع الطويل في صناعة البراطيش

المغفور له بإذن الله المكرم / ود الجعيل



هذا البرطوش يجمع بين جميع فصائل الأحزية

الجزمة

و الشبشب

و المركوب

و به ريحة من ريحة الشبط


عشان كدا كان من الإستحالة معرفة نوعه بالتحديد


لذلك أطلق عليه لفظ برطوش



يقولون أن ود الجعيل لمن جا عشان يصنع هذا البرطوش

صب فيهو كل عصارة علمه و جهده في علم البراطيش

و أخرجه في هذه الصورة الرائعة

التي أكسبته الشهرة و السمعة الحسنة


هذا المركوب مصنوع من جلد حيوان غريب

غالباً ما يكون حيوان منقرض



بعد مرات خالي بسقي بيهو البقرة بتاعتنا الموية

لمن ما يلقى ليهو جردل فاضي


صلب كالفولاذ

تقيل ذي صاج المونة

عفن زي ريحة الفطيسة


أذكر في يوم

كان خالي بلة مشى عشان يوصل البقرة بتاعتنا لي مكان السرحة

قامت البقرة قالت كدا و فحطت

خالي بلة عاد جراي جنس جري

ملص برطوشو

و فحط وراها

البقرة تجري

و خالي بلة جاري وراها


صادف اثناء ذلك انو الود جمعة النوباوي

جاء لي مكان السرحة

عشان يلم الزبالة بتاعت البقر

قام لقى البرطوش بتاع خالي بلة

افتكرو في اللوال انو كوم بعر

لمن اتكيف و ضرسو الآخير ظهر

و قال : و الله بقرة ناس فيفيد دي الليلة بطنها ما كويسة

و الله الليلة جابت ليها بعر شكلوا غريب خلاس

و ريحتو ‍‍‍‍‍‍‍- أشهد أن لا إله إلا الله


قام شال معاهو المركوب في قفة الزبالة

وحات النبي لو ما ناس حي البهلة كان المركو دا تكون ريحتو في الأرياح مافي




لمع صيت هذا البرطوش في اوائل الثمانينيات

و بالتحديد يوم ولادة بنت جيرانا الشقية سماسم

اليوم داك و الناس فرحانين بي ولادة سماسم

جاء دبيب طولو مترين

انتو يا الشفع شوفوا الدبيب و اقعدو سرخوا

النسوان لفحن تيابن و شتتن

الرجال جابوا العكاكيز الغلاد

و كسروها في الدبيب

بس انت يا الدبيب راسك و ألف سيف ما تموت



في النهاية كدا جاء خالي بلة

من الحواشة بتاعتو

شايل إبريقو في يدو

و حاشر ليهو مسواك في فرقات سنونو


و الله الساعة السمع ليك صوت صفية بت أم هلاهلا قاعدة تصرخ

شالتو ليك الجعلية و الهاشمية

و كان في شمارات ب

تقول انو صفية دي كانت فردتو زمان

بس فكتو عكس الهوا

لأنها قالت السنون بتاعات خالي ما عاجباتنها



المهم خالي بلة لمن سمع السكلي بتاع صفية

جاء جاري زي التور الهائج

و ماسك طرف جلابيتو بي سنونو

و سروالو كاري بالواطة

قال : انا موجود و البنت صفية تصرخ!!!!!

و الله الرجالة طارت يا رجال

قال كدا و ملص فردة برطوشو الشمال

و نتح ليك الدبيب بي طرف البرطوش بتاعوا

لمن قسم الدبيب دا لي نصين


و من ديك بو عيييييك

رطوش خالي بلة بقى حديث ناس الحي بتاعنا

لا يكتمل الحديث بدونه

تاني لو جات مطرة و قفلة السكة

بلة بقوم بشيل البرطوش بتاعو و يفتح بيهو السكة

لو في كلب سعران يجيبو ليهو برطوش بلة يكتلوهو بيهو

لو في حيطة دايرين يليسوها

يجيبو برطوش بلة يعملوهو طالوش



و حاااات الرسول قالوا في يوم كدا

و الكهرباء قاطعة

جات حاجة فاطنة بت الحلو مر

تتحمدل لينا السلامة بتاعت الغنامية بتاعتنا

لأنها ولدت تيمان

المرا الغبيانة دي

جات تتكاوش ذي التركتر

و الله الساعة الدقشت ليك برطوش بلة

لمن ودوها العناية المركزة

و الدكتور قال : لا زم تاخد ليها حقن تتنس



اليوم داك

شلنا انا و خالي بلة الخرتوم

و كسرنا ركبة مع جماعة لينا هناك

ناس حلوين و مرتاحين كدا

الجماعة ديل من طيبتهم

قعدونا في الطابق الآخير

لكن الظاهر عرفوا غلطتهم الشنيعة

حاج بلة دا عندو عادة ثقيلة

لمن يجي يقلع البرطوش بتاعو

بقوم بيضرب بيهو الواطة

طاااااااااااااااااااااااااخ

لمن قرايبنا بتاعين الخرطوم ديل

بقوا ما بنومو إلا خالي بلة يقلع البرطوش بتاعو


اها

يوم كدا جينا متأخرين من مبارة الهلال و المريخ

لمن بقينا علي النوم

خالي بلة قال كدا و ملص الفردة اليمين من البرطوش بتاعو

و ضرب بيهو الواطة

و قلع الفردة التانية

و الساعة الداير يضرب بيها الواطة

اتذكر ليك قون المريخ في الهلال

و سرح ليك مع القون

و قام خت الفردة بتاعت البرطوش بتاعو

بدون ما يخبط بيها الواطة

و الجماعة بي تحت

منتظرين خالي بلة يقلع الفردة التانية عشان ينوموا

انا و خالي نمنا و الجماعة منتظرين بي تحت

لمن الحكاية طولت

و اذان الصبح اذن

الجماعة جونا طالعين لينا فوق

و قال لي : يا فيفيد

الله يكسرك حتة حتة

كان تقول لي خالك دا يملص الفردة التانية عشان ننوم



فيفيد في
03/07/2005م[/align:aa465e6922]

[الصادق عبدالله ضرار]

هذه اللغه والمفردات طالما غابت عنا حينا من الزمان...
اعدتنا للماضى
قف
عليك ماخذ؟؟؟؟؟؟؟

وين انت كنت زمن طوييييييييييييل كده

[معتصم سليمان بابكر]

بالله يافيفيد مافى طريقة نستنسخ بيها برطوش خالك دا عليك الله ونعمل منو نسخة ديجيتال

او ان شاء الله شرائح بس واكيد مابكون محتاج رقم ولا حتى اعادة شحن رصيد

:lol: :lol: :lol: :lol: :lol: :lol: :lol: :lol: :lol: :wink: :wink: :wink: :wink: :wink:

[الفاتح محمد شريف]

:lol:الحبيب فيفد
لنا زمن اترغب ابداعك لا تتركنا ننتظر طويلا
ابدعت في صياغة روايتك واتحفتنا

وفقك الله

[vivid]

[align=justify:bd7105ac15]جني و جن الزول البجي يلقاك ممدد و نايم . . . . . و يكون عارف إنك نايم . . . . . و الدليل على نومك إنو انت بتكون مكوم . . . . . و ملفلف . . . . . و مكرفس في السرير بتاعك . . . . . قدام عويناتو . . . . . و قاعد تحلم بي ناس فلانة و علانة . . . . . لكن بعد دا كلو. . . . . يجيك يتكاوش . . . . . و خامي علالة كرعينو قدامو . . . . . و يتورك و ينعنعك . . . . . و يقطع ليك نومتك الظريفونية ديك . . . . . . عاد حركة بايخة خلاس . . . . . تخلي راس الواحد . . . . . تح تح تح تح . . . . . ينتح النهار كلو . . . . . وحاااات جدي السادس . . . . . لمن يجيني زول قطّاع نومات ذي كدي . . . . . و يجي يقطع لي حلاوة نومتي . . . . . ذي التكنو يكون أداني بي طبنجة في نص صنقوري . . . . . . و تاني لا بحادثو لا بناضمو لا بناغمو . . . . . سلام الله دا ما بديهو ليهو . . . . . و عيني دي لو هنق و كاكا ذي الجدادة ما برفعها ليهو . . . . . اليوم داك كنت ناااايم . . . . . و مدمدم بي بطانتي أم عفنة . . . . . بطانتي أم عفنة دي . . . . . جابا لي إدريس التُجم و كتو الجا من السعودية . . . . . بتذكر وكتين إدريس التُجم دا كان شايل السعودية . . . . . جانا في البيت عشان يوادعنا . . . . . قام قال لي . . . . . يا فيفيد دايرني أجيب ليك شنو من السعودية . . . . . قلت ليهو يا إدريس التُجم . . . . . بدورك تجيب لي بطانية تخيييينة . . . . . الراجل كتر خيرو . . . . . أول ما جا صاد من السعودية . . . . . جاب لي ديك يا البطانية . . . . . النوم زاتو بقا لي حلو جنس حلاوة . . . . . بقيت احول سريري من ضل لي ضل . . . . . جخخخخخخ أنوم . . . . . و من أوضة لي أوضة . . . . . جخخخخخخ أنو . . . . . أصلو بطانتي دي ما بتفارقني . . . . . خالتي السعدية سمتها ام عفنة . . . . . عشان أصلو ما قاعد استاجر فيها و اغسلها . . . . . الجماعة العزابة االساكنين حدانا قالو لي . . . . . يا فيفيد البطانية قدر ما تبقى عفنة . . . . . و شبعانة بي ريحة العرق . . . . . النوم حلاوتو بتزيد . . . . . عشان كدي . . . . . بقيت أصلو ما بغسلها . . . . . و بعفنها و بخمرها برااااااي . . . . . عنية كدا بس . . . . . النوم دا ما بلاقي جفوني . . . . . عيلا أشم ريحة عفنة بطانتي دي . . . . . ناس بيتنا كلهم بعرف بطانتي أم عفنة دي . . . . . بقت جزء مهم من ديكور البيت . . . . . أجي من النادي بالليل . . . . . ألقاها مطبقة و ممنجها . . . . . و ريحتها تقول يا واحد . . . . . كديستنا المنقرطها أم شطور . . . . . بلقها ممدا و نايمة تحتا . . . . . اجي و اشيلة ارقدها في الواطا . . . . . و ارمي ليها طرف بطانتي في الواطا . . . . . عيلا لكن . . . . . قدر ما يجو يغسلوا هديمات البيت . . . . . انا أرفض أغسلها . . . . . خالتي السعدية تحمر لي عويناتا . . . . . و تقول لي . . . . . قوم يا فيفيد جيب ام عفنة هيلتك . . . . . أقول ليها أبييييييت . . . . . احسن ليك تقوم تجيبا . . . . . أبيت ابيت ابيت . . . . . عاد انا طبعي عجيب خلاس . . . . . قدر أم عفنة دي ما يغسلوها لي . . . . . اتذكر كلام العزابة الجمبنا . . . . . امش اوسخها تاني . . . . . و اخمرها . . . . . مش بطانتي؟ . . . . . و جابا لي إدريس التُجم من السعودية؟ . . . . . وحاااات الله اعمل فيها الحاجة الدايرة . . . . . بطانتي و انا حر فيها . . . . . . إنشاء الله أقطعها لبد بتاعات حمير . . . . . و انشاء الله حتى اعملها كركاسات لي طلاب المدارس . . . . . انا خسران شنو . . . . . إدريس التجم كان جا صاد من السعودية . . . . . تاني بقول ليهو جيب لي معاك بطانية تخينة . . . . . ساعة يجونا ضيوف . . . . . . ام عفنة دي تكون منصوبة و مقنطرة في نص السرير . . . . . منظر يجنن . . . . . السعدية خالتي من تشوف ليها ضيوف . . . . . تقعد تسرخ . . . . . أم عفنة أم عفنة أجروا دسوها . . . . . . ناس البيت يقولوا كدا يتشلبوها . . . . . و يرميها لي فوق راس الدولاب . . . . . . عيلا الضيوف لمن يدخلوا و يتلفتو في البيت . . . . . يتحيروا في الدهمة المكومة فوق راس الدولاب دي . . . . . شكلها غريب خلاس . . . . . بتذكر تاني وكت النعيم ود كرم الله جاء من السعودية . . . . . جاتني خالتي السعدية عشان توصل لي البشارة . . . . . جات جارية . . . . عويناتا منططة زي الضب الطابيهو باب . . . . و تتنطن برة من راسا . . . . لقتني نايم و ملفوف في أم عفنة . . . . . و قالت كدا و جرتها مني . . . . و رصعتني بي ايدا اللتيتة ديك تاااااااااااااح . . . . . في صلبي . . . . . قووووم يا فيفيد . . . . . النايم ليها شنو . . . . تنوم السهر اللقدد عيونك . . . . . عندك الكنتين الناصية و الا الشاحنة الواقفة في خشم الباب؟ . . . . . . عاد يا يابا انشاء الله نومت أهل الكهف . . . . . قوم يا الخملة شوف النعيم جا صاد من السعودية . . . . . النعيم الكان خملة داك؟ تتزكروا يا فيفيد . . .. . . ولد نجاة خرا الجداد . . . . . المرا ديك العاملة زي الرغيفة الطوطسي . . . . . عرفتو و الا لي هسع؟ و الله يا فيفيد و ما طالبني حليفة . . . . . النعيم ولد نجاة خرا الجداد دا . . . . . كان قريب دا جاري بي سروالو . . . . . و ريالتو ساربة في هديماتو . . . . . . و شدة ما عوير و أهطل . . . . . كان بقول لينا الجدادة عندها شلاليف . . . . . خسمتك بالرسول يا فيفيد . . . . . . تقوم من دربك دا تمشي تتفرج فيهو . . . . . و الله جا صاد من السعودية حليووني . . . . . و جضومو منفخات تقول التفاح . . . . . و منظر الخمالة و البياضة و التناحة داك راح منو . . . . . ربى ليها جنس فقرة . . . . . السيف ما يقطعا . . . . . عيني باااارد عليهو . . . . . و الله جاب لي اهلو جنس جيب . . . . ما خلى حاجة . . . . . . حتى المعدوم جابو ليهن . . . . نخاسات السنون جابا بالكوم . . . . . و سلاكات الاضنين جابها بالردوم . . . . . و السلوك بتاعات علاقات الهدوم جابها بالهبل. . . . .اريتو حالك يا فيفيد . . . . و تجيب لينا داك يا الجيب . . . متل النعيم ود نجاة خرا الجداد . . . . . و ترفع لي راسي دا فوووووق . . . . . و تخليني أقدل في نص حي (البهلة) . . . . . عشان أعمل الكية لي نجاة خرا الجداد . . . . . و اغيظا . . . . . هسع يا فيفيد . . . . . النعيم دا قروشو شن طعمها . . . . . قالوا كان شغال في السعودية في عربية بتاعة صرف صحي . . . . و نحنا من ما قمنا و فتحنا عويناتنا في الدنيا دي . . . . . الصرف الصحي دا ما بنعرفو . . . . . يطرشنا . . . . . ما سمعنا بيهو كلو كلو. . . . . عيلا بنعرف (عيفونة) . . . . . متل (عيفونة) بتاعنا . . . . . الكنا بنقول ليهو . . . . . عيفونة شطة بي ليمونا . . . . . لكن بعد داك الكفيل بتاعو رقاهو . . . . و بقاهو حارس . . . . . الشهادة لله يا فيفيد . . . . . انا لمن سمعت امو نجاة خرا الجداد دي قالت لي . . . . . ولدي ساب شغل (العيفونة) . . . . . و بقوهو حارس . . . . . افتكرتو بقى حارس مرمى . . . . . و الا حارس بنك . . . . . و الا حارس بوابة وزارة . . . . . لكن لقيتو شغال حارس في زريبة . . . . . زريبة عدييييل كدا يا فيفيد . . . . . حارس ليهو تيس . . . . . اتاري الجنا النعيم دا . . . . . رقوهو حارس تيوس . . . . . يكسرني حتة حتة يا فيفيد . . . . . قالوا الوليد دا قاعدوا الفترة دي كلها . . . . . كان حارس ليهو تيس في السعودية . . . . تيس فرد واحد . . . . . آآآي و الله . . . . . الكلام دا حدثتني بيهو اللقية . . . . . كان حارس ليهو تيس بتاع غنم ليهو ضل . . . . . جايبنو ليهو من هولندا . . . . . شغلو كلو . . . . . بي التصاريح . . . . . يا النعيم طلع التيس . . . . . يا النعيم دخل التيس . . . . . الكفيل بتاعو بصرف ليهو (ألفييييين) ريااااال . . . . . في حراسة التيس بس . . . . . و بدوهو كمان تظكرة بتاعت طيارة . . . . . تجيبو السودان و ترجعو لي تيسو . . . . . أريتو حالك يا فيفيد يا ولدي . . . . . و تسافر لينا السعودية . . . . . . و تلقى ليك تيساً تحرسو . . . . . متل تيس النعيم ود نجاة خرا الجداد. . . . . شنو يا فيفيد طرمت و عوجت لي قدومك دا كدا . . . . . نان تيوس السعودية ديل ذي التيوس هيلاتنا ديل؟ . . . . . ديلن بجيبن الريال . . . . . الما خمج . . . . . وحات الله من يوم الليلة دي . . . . . . تاني ما بخليك تكمل قرايتك . . . . . من بكرة فجر . . . . . تمشي للنعيم دا في بيتو . . . . . يعلمك شغلانية الحراسة .
اليوم التاني مشيت لي النعيم . . . . . قام قال لي . . . . . يا فيفيد انا إجازتي يومين بس . . . . . طبيعة عملي ما بتستحمل التأخير. . . . . اجيب ليك شنو معاي من السعودية؟ . . . . . قلت ليهو بدورك يا النعيم . . . . . تجيب لي بطانية . . . . . بطانية تخييييينة.[/align:bd7105ac15]

[vivid]

هذه اللغه والمفردات طالما غابت عنا حينا من الزمان...
اعدتنا للماضى
قف
عليك ماخذ؟؟؟؟؟؟؟

وين انت كنت زمن طوييييييييييييل كده

[align=justify:05c033a9cf]اخ الصادق

تسلم يا اخي

و الله بس زنقة شغل ما اكتر

بالله عبد الرحيم اخبارو شنو[/align:05c033a9cf]

[vivid]

بالله يافيفيد مافى طريقة نستنسخ بيها برطوش خالك دا عليك الله ونعمل منو نسخة ديجيتال

او ان شاء الله شرائح بس واكيد مابكون محتاج رقم ولا حتى اعادة شحن رصيد

:lol: :lol: :lol: :lol: :lol: :lol: :lol: :lol: :lol: :wink: :wink: :wink: :wink: :wink:

العزيز جدا معتصم

تدفع كم

بالمناسبة الموضوع دا دعاية بس

مودنو المتحف هسي في الخرطوم
سمعانين بيهو و دايرين يعملوا ليهو اعادة تقييم

[vivid]

:lol:الحبيب فيفد
لنا زمن اترغب ابداعك لا تتركنا ننتظر طويلا
ابدعت في صياغة روايتك واتحفتنا

وفقك الله

الاخ الفاتح

و الله زي ما قلت ليكم زنقة شغل

لكن انشاء الله الفكرة قربت

ياخي تلفوناتكم وين انا ما لامي فيها

[الصادق عبدالله ضرار]

فيفيد

الولد العجيب
لا اشك يوما ان تكون كما الطيب صالح الان ...متى ذلك لا اعرف لكن تذكر قولى جيدا وساذكرك انا ذلك...عبدالرحيم بخير ولا ادرى لماذا يغيب طويلا فى الدخول للموقع رغم انو شغلو على النت..لعل المانع خيرا
دمت

[عبدالله إبنعوف]

يا عثمان

تغيييييب فتتتتتترة وتجينا بلاويك دي ، زي ما قال أخونا معتصم بالله عايزين نسخة من مركوب خالك ، وحكاية بطانيتك دي ذكرتني واحد أخونا في الرياض عندو جلابية واحدة بينوم بيها وسنين ما غسلها ، أصحابوا قالوا الجلابية لو وقعت من الشماعة بتقع وافقة يعني من شدة الوسخ ما بتتكوم زي الهدوم لما تقع من الشماعة ، فأعتقد أنو القطعة بتاعتك دي مستنسخة من جلابية أخونا ، وهو معانا هنا في المنتدى ياريت يقرأ ويتذكر جلابيتو

خليك على طول وما تغيب

تحياتي

[Nazar Hussien Babkir Frie]

ياخي امتعنا خالاس غاية الامتاع ، وبمناسبة التنافس بين حلتنا وحللتكم فهو قائم حتي الان بدليل ان انا ذاتي حامل اقامة حارس تيوس ، يعني عديل مصرين ننافسكم حتي هنا في السعودية ، رغما عن تفوق ابن حلتكم في الراتب الفين يافيفيد حته واحدة ، انا والله اول قابلت كفيلي قالي سبعمائة ريال لانك عامل تربية مواشي ، وندمني على اليوم الخلاني اجي السعودية دحين ود حلتكم ده خليوه يكلم كفيلو عشان انقل كفالتي عليهو واديني الف بس انا راضي .
ولك مودتي

[معتصم سليمان بابكر]

نزار الظريف

كفيلى كفل كفيلك

اقدر كفيلك يكفل كفيلى

زى ما كفيلى كفل كفيلك

قولها 10 مرات وليك منى جائزة موصى عليها فيفيد (الشفت)

[Nazar Hussien Babkir Frie]

والله دي غلبتني عديل كده ، وذكرتني زمان وانا في الابتدائي وامكن لحد الان اذا كان جاء حرف الفاء في اول الجملة بقطع عديل وكمان لازم ادخل حرف الواو عشان اقدر اقراء الجملة .وهديتي متنازل عنها بس انتو ماوريتني هي شنو ؟؟؟؟!!! ودي سببت مشاكل كثيرة في حصة التسميع زمان زمان زمان .بس بطلب منكم ما تطولو الغيبة ودي اعظم هدية لى ولكل الناس الحلوين المشاركين معانا .
ولكم مني الود والاخاء
ود فريق السناب
ابو فاطمة

[الصادق عبدالله ضرار]

الطيب صالح فى الزمن اللى جاى

[vivid]

يا عثمان

تغيييييب فتتتتتترة وتجينا بلاويك دي ، زي ما قال أخونا معتصم بالله عايزين نسخة من مركوب خالك ، وحكاية بطانيتك دي ذكرتني واحد أخونا في الرياض عندو جلابية واحدة بينوم بيها وسنين ما غسلها ، أصحابوا قالوا الجلابية لو وقعت من الشماعة بتقع وافقة يعني من شدة الوسخ ما بتتكوم زي الهدوم لما تقع من الشماعة ، فأعتقد أنو القطعة بتاعتك دي مستنسخة من جلابية أخونا ، وهو معانا هنا في المنتدى ياريت يقرأ ويتذكر جلابيتو

خليك على طول وما تغيب

تحياتي

يا ابوهبة

هههههههههههههههه

زول الرياض دا ما يكون نزار

[vivid]

نزار الظريف

كفيلى كفل كفيلك

اقدر كفيلك يكفل كفيلى

زى ما كفيلى كفل كفيلك

قولها 10 مرات وليك منى جائزة موصى عليها فيفيد (الشفت)

معتصم

علي الطلاق نزار دا لو قال الكلام دا

ألا نديهو تابعية في حي البهلة

[اسامه الكرور]

الأخ /فيفيد

نقرأ لك باستمتاع ونعيد القراءه مرتين وثلاثه

ياريت كل يوم تنزل لينا بوست زى دا

[Mchamza]

المبدع فيفد
عاوز اسالك سؤال...انت بطانيتك دي كانت طويله والا قصيرة، لانه هنا بجيبوا لينا بطاطين دائما بتكون تخينه بس كمان فيها القصر..وبيني وبينك شكلها كده صينيه لانه ما مقاسنا..انا كان عندي بطانيه مارضاني مرض اجرها لي راسي القي رجولي بره..ما بتدي الواحد فرصه يتمدد ويلقي النومه بتاعتك دي وآخر شيء جبت لي واحده تانيه وبقيت ادبلن ودي كمان عيبهم انهم بقو مشكلين فرن آلي..عشان كده يا اخوي وريني بطانيتك اذا كانت طويله ماركتها كانت شنو؟ عشان امشي اشتري لي واحده بدل بطاطين الملح ديل....
وعلي فكره مركوب خالك ده ممكن تطلع منه (سيفتي شوز) تنافس كل الماركات العالميه (ردوينع ولا اقوي من كده).....
لك التحيه وانت تعزف اجمل الالحان... تملاء هذا الملاء بكلمات فرح..تكتل انفاس الوجع..بالله عليكم كيف هو من يرسم ويبدل كل حزن بابتسامه؟...المذيد يا فيفد..

[vivid]

العزيز أسامة الكرور

مشكور على المرور السريع

و الله سائلين عنك بس ما لامين فيك


يا Mchamza

و الله بطانتي دي مكفياني و ساتراني كويس

بس نا بيتنا يشوفو الجن ما يشوفوها

لمن جيت السعودية وصيتهم عليها

للذكري بس

[vivid]

فيفيد

الولد العجيب
لا اشك يوما ان تكون كما الطيب صالح الان ...متى ذلك لا اعرف لكن تذكر قولى جيدا وساذكرك انا ذلك...عبدالرحيم بخير ولا ادرى لماذا يغيب طويلا فى الدخول للموقع رغم انو شغلو على النت..لعل المانع خيرا
دمت

و الله سئلين منو

و كان وعدنا بالاتصال بس طنش

[ابو النيييييز]

...بالمناسبه يا فيفيد دي المره الخامسه اقرا القصه الكاتبها دي...وكل مره اقول ارد عليك ...اتحير اقول ليك شنو...والله لو ما خايف من ناس النظام العام كنت قلت ليك الكلام ده بدون البتاعه ديك البضربوها ما بتكتب ولا حاجه..قريت المره الاولي لقيت نفسي ماسك اصبعي في خشمي ذي الشافع البتحجي فيه حبوبته...جيت قريتها تاني قلت...امممممك الموضوع اكبر من شغل حبوبات...ده شغل ناس عارفين بكتبوا في شنو...وحاولت افهم البعد التالت للموضوع ...لقيت اني برضه لسه في البعد الاول مشترك..وكل المحاولات الباقيه كل مره بفهم القصه بطريقه مختلفه...قررت اني ما اشتغل بيك كتير و اتعامل مع كتاباتك كلوحه سرياليه...كل مره افهمها بطريقه مختلفه وبمزاجي انا
...الهاميني هسي ...انك تكون مهتم بكل الكتبته وجامعه ...فالباقي تكتب الاهداء...علشان الواحد اشيل كتابك واقراه قبل ما انوم ...فكتاباتك ما محلها كرسي وشاشه ...منتظرين اكتر واكتر...مع خالص الاحترام..والطمع في المذيد

[vivid]

[align=justify:ee5f3cd7a6]هنادي بت الخلا . . . . . كدي . . . . . و الصلاة على النبي عليها . . . . . بت قصيرونييييية و مدردمة حلاة درديمة . . . . . تحلف بالتقطّعك حتة حتة تقول التبشة الرويانة . . . . أي شيئ تهبشو فوقا مدردم . . . . . العيون مدردمات و ناطات من جحرتن لي قدام . . . . . النخيرة مدردمة و مكرضمة حدها القديديم . . . . . القديديم!!! وقعت وراء النبي سبعة مرات من القديديم . . . . درديمتو مخالفة و مشاترة . . . . . زي التقول ماكلة ليهو شيتاً حاااااار . . . . . الوش!!! . . . . . برضو دا كمان مدردم . . . . . عيلا تحسو انو مطاول لي فوق . . . . . و كافي ليها العين شوية . . . . . الجضيمااااااااات . . . . . واااا حلاتن . . . . . قطع برجل . . . . . عيلا لكن يا ناس . . . . . البت دي بعد دا كلو . . . . . و الشهادة لله . . . . . الواحد لامن يشوف الدرادم و الكراضم حقون البت دي كلها مع بعض . . . . . يشوف البنية دي سمحة جنس سماحة . . . . . و حلوة جنس حلاوة . . . . . عسل نحل صافي و مصفي . . . . . وشها نعمنو مطاول لي فوق . . . . عيلا لكن يبرق و يجهر زي المنضرة . . . . . أول يوم شفتها فيهو كنت اليوم داك شايل المدرسة . . . . . ماشة و منكربة و تترتر بي شارع تمبول . . . . . قلبي قعد يسوي دل دل دل دل . . . . . تقول نوبة الشيخ عبد الله . . . . . عاد انا قلبي دا الفيهو عارفو و خابرو . . . . . قاعد علي الهبشة . . . . . و فاضحني من زمااااان مع بنات الناس . . . . . . ناس حي البهلة كلهم . . . . . الكبير و السغيروني . . . . . مسكتو ربشة من البت دي . . . . . يبركوا و يصنقروا ليها مع صباحات الرحمن في نص الشارع . . . . . نساوينا ذاتن . . . . . يتلفحن بي تيابن و يحرسنها تجي الدغشية . . . . . عاد البت حلوة . . . . . و حلاةً زي دي ناس حي البهلة ديل . . . . . لا شافوها لا سمعوا بيها . . . . . حتى سموها هنادي قصب السكر اللحمر . . . . و النسوان البقرانات منها قاعدات يقولن ليها كراضم . . . . . انشاء الله الكرضمة التعور ليكن عيونكن . . . . . هسي أمانتن في زمتكن فيكن واحدة بتشبها . . . . . بس أنا في سري البت دي سميتا هنادي بت الخلا . . . . في شان هي بتجي ناهرة و مقلّعة من جيهة الخلا الشرقي . . . . . زي برق المطرة أم هبوب . . . . . تجي دافرة مصنقعة راسا و شانقاهو فووووق . . . . . واطات الله دي ما عاجباها . . . . . ما دايرة تعاين ليها كلو كلو . . . . . عارفة روحا حلوة . . . . وحاااات النبي ليها حق . . . . في شان هي عارفها ناس حي البهلة ديل كلهم . . . . . قاعدين يبركوا ليها و يتفنو ليها في الواطة . . . . . و استنوها . . . . . عيلا لكن . . . . . . البت دي فيها عيب . . . . . عيب وااااااحد بس . . . . . ما دايرة تخليهو . . . . . ناس حي البهلة ديل كلهم مو جايبين ليهو خبر . . . . البت دي يا كافي البلا . . . . . من يوم ما عيوني دي وقعن فوقا. . . . . مخاخيتا دي سايلة . . . . . من أول يوم شفتها فيهو و هي تجرجر و تكرُف في مخاتتا . . . . . ساعتا التاخد ليها كرفة تحلف تقول قماش دمورية و شرطوهو النص . . . . . النخرين المكرضمات ديلك شغالات جووووووووو . . . . . يقولن لي سباليق المطرة انتن شنو . . . . . الكدوبا فوق راس قدوما عاملة خرايط كنتورية . . . . . و معشعشة طبقات طبقات . . . . . لكن بعد دا كلو قلبي رادا . . . . رادا من الشوفة الأولى . . . . و بقيت أصحا من النوم و استناها تجي ماشة المدرسة . . . . . اضنيني اتعودن علي نغمة مخاخيتا . . . . . و قلت عشان اعمل لي خطوة إيجابية . . . . . في اللوال اعرف البت دي ساكنة وين . . . . . البت دي كل يوم تجينا مقلّعة من جيهة الخلا كدا . . . . . حكايتا شنو . . . . . نحنا اسياد بلد . . . . . لازم نشمشم الأخبار . . . . . و نعرف البت دي ساكنة وين . . . . . بس .. . . . قدر ما قطرتها . . . . . و قدر ما مشيت في خطراتها . . . . . ما عرفت آخرها . . . . . البت دي من ساعة ما أباريها . . . . . تكون ماشة زي أبو القدح . . . . . علي مهلتا . . . . . عيلا وكتين تطلع من حي البهلة دا . . . . . تشيل برطوشة في يديها و هاك يا جرية . . . . التقول في زول قاعد يرجاها هناك بي سوط عنج. . . . . جراية جنس جري . . . . . الجن دا ما يلحقها . . . . . . وكتين تجري . . . . . الكريعات المدردمات يسابقن جسما . . . . . و اليدين اي يد تطير ليها في اتجاه . . . . . و راسا المطاول داك . . . . . تنساهو وراها . . . . . الحقيقة منظر يحير . . . . . انا لامن أشوفا البت دي قامت جارية قدامي . . . . . أقول كدي و أجري وراها . . . . . لساني دا يقع تحت ركبي . . . . و تخليني اليوم كلو أناهد ذي الكلب العطشان . . . . . لكن يسمني فيها . . . . . المخلوقة دي أصلو ما حصل حصلتها . . . . . كل يوم بجري وراها بدون فايدة . . . . . كل يوم أسوي في السويدي . . . . . و ألعب في الدافوري . . . . و آكل في الباسطة . . . . . و أمزمز في المنقة النجيضة . . . . . و أربي في اللياقة . . . . . عيلا برضو ما في فايدة . . . . . ريحتها في الأرياح دي ما قاعد أشمها . . . . . التقول رابطة ليها كرونة كلب.
امس كنت راقد في سريري . . . . . و خالف كراعي أربعة بالإنقليزي . . . . . و قاعد اجبد لي في حجر شيشة . . . . . الجوال بتاعي دق . . . . . ألوووو معاي منو . . . . . انا الجبور صاحبك يا فيفيد . . . . . مالك يا الجبور نعل مافي عوجة. . . . لالالالا يا فيفيد ما في عوجة تب . . . . . بس عرفت ليك هنادي بت الخلا ساكنة وين . . . . . البت دي يا فيفيد شوف عيني دي . . . . . ساكنة في حي أديني سفة . . . . . و الله يا فيفيد جريت وراهي لامن بلابيطي وقعن . . . . . تلاتة سنوات و انا جاري وراها . . . . . لكن اليوم داك كنت جاري وراها . . . . . قامت عترت ليها درابة . . . . . و جات مندرشة علي قدوما . . . . . و قامت فسراع فسراع . . . . . و توووووووووش . . . . . داخلت بيتهم في حي اديني سفة . . . . . قدام عيني . . . . . لو ما كدي . . . . و حااااااات النبي يا فيفيد . . . . . لو جريت وراها للحول ما كنت بحصلا . . . . . لكن عندي ليك نصيحة يا فيفيد . . . . . البت دي أختاها كدي و الا كدي . . . . . وحاااااات الرسول دي جري سااااكت كدي تقصر أجلك. . . . . البت دي يا فيفيد خلت مخاخيتي سايلات زي نقاع الزير.

و انا أقول مخاخيت البت دي سايلات مالها . . . . . اتاريهو دا كلو من الجري الكتير . . . . . دب دب دب دب . . . . . كملت ليها مخها كلو . . . . . شكيتك علي الذي لا حياً بعدو يا هنادي يا بت الخلا . . . . كتلتيني بالهجيمة . . . . . ساكنة في حي أديني سفة يا هنادي؟ حي أديني سفة يا هنادي !!!!. . . . . كنتي دايرني أزازي و أجري وراك المسافة دي كلها؟ !!! و انا اقول برضي مخاخيتي دي سايلة من ما جيت السعودية لي شنو.[/align:ee5f3cd7a6]

[الصادق عبدالله ضرار]

الود المصيبه فيفيد

الله يديك العافيه

قالوا فريقكم بجيبوا الكيس للشافع مع قفة الملاح صحى
ده فريقكم ولى القبتاب...
بالمناسبه وين انس المدنى غاطس

[الفاتح محمد شريف]

الحبيب فيفد (( الخلا ))
متعك الله بالصحه والبسك ثوب
الابداع دوما


اخوي انا من زمان سامع بي فريق اديني
سفه دا لكن وحاتك لحد الا ن ما بعرفو ؟؟؟؟
ممكن اجيك نمشي سوي علي الاقل امكن
نلاقي هنادي دي وقفت تاخد ليها هجسه
ونشوفه معاك

بس الا الذي دي اوقفا الوقف غزال (( نولا )) داك


لك ودي وتقديري

[اسامه الكرور]

الأخ / فيفيد

شكرا على الحاجات الحلوه دى بتخفف علينا كتير من الغربه

لكن فريق أدينى سفه دا مش بتاع ناس أنس المدنى؟

[Nazar Hussien Babkir Frie]

مني ليكم السلام وللود المعطون بالابداع الرائع فيفيد ، ولكن انا عارف انو ماحيجاوب ليكم عن فريق اديني سفة ، تعرفوا ليه لانو بيقول في اول كتابتاته في المنتدي انو هو من سكان المنطقة الوسطية من حي البهلة ، وانا بدويهو جائزة احلى من جائزة رنو بس اوريني هو ساكن وين ، وطبعا انا عارفو مابرد لى تعرفو ليه لانو فريق اديني سفة ده مشهور وكان مغالطني امشوا دار الرياضة في رفاعة بشارع تمبول ، واغشوا في الاول دكان عمنا العماري مرغني سلمان وكان قافل امشوا للعماري ود فورجنب دكان عبد الرازق ومن هنالك وبمجرد وصولكم للكبري الجنب بيوت العمراب ، اشرعوا اكياسكم بتاعت الصعوط وشوفو لمن توصلوا دار الرياضة بفضل ليكم قدر شنو ؟؟؟ ، وانا متكفل بالتعويض ، عشان ناس الود فيقيد معطونين برائحة العماري ولانو قالوا بولد الابداع وبصفي الذهن لذلك اعتادوا عليه صغارا قبل الكبار ، ويافيفيد انا والله بريدكم عديل كده بس انتو مكاجريني ساكت انت وصاحبك اب نظارات ، وزمانيا الفاتح ويا اسامة الجماعة ديل كانوا بلعبوا الدافروي والجائزة صحن فتة حار يعني حلاوة دربس مافي ّّّ!!!!! ولسه انا والله ما كشفت للجماعة موقع فريق اديني سفة منتظرك انت تعزم الشباب رحلة في سوح فريق اديني سفة وانا معاهم ، وكان ابيت عديل كده بكشف الموقع بتاع فريق اديني سفة بالوصف الدقيق ومعاهو كمان خريطة توضيحية كاملة للمداخل والمخارج لفريق اديني سفة الاستراتيجي وبعدها ما توصفني بالعمالة او الخيانة العظمي !!
وياود الكرور المتلي بيابوا ،كده ندخلك واسطة عشان الود فيفيد اقبل يكلم صاحبو الراتبو الفين ومهنته حارس تيوس اكلم كفيلو عشان انقل كفالتي عليهو وبالف واحد انا راضي ، وبعدين جلابيتي قاعدة وسوف اضيف عليها عراقي كدة وبعرضم في المزاد العلني ، بشرط ان يعرض فيفيد بطانتو العاجباهو دي ، ونشوف اعلى سعر البيجيبو منو !!!!
وفي الختام لكم ودي واعزازي
الممثل الشرعي لفريق السناب
ونائب دائرة ديم العوض لحين ظهور الود عبده عثمان
اخوكم
ابوفاطمة

[اسامه الكرور]

الأخ / نزار

تحياتى

ياخى تعال لينا فى فريق التستاسات وأنقل كفالتك علينا

وعليك أمان الله كيسك بتاع السعوط ترجع بيهو زى ماهو

بس ورينا فريق أدينى سفه حدودو وين والساكن فيهو منو

عشان الجماعه الناكرين ديل

[Nazar Hussien Babkir Frie]

كيفك حالك واحوالك :
ياخي مشكور على قبولكم نقل كفالتي وعلى محافظتكم على كيس صعوطي وانا قبلان انقل كفالتي عليكم ،ولكني منتظر الود فيفيد يرد بعدها انا والطوفان يعني بفتو كلو ، واشيل الصبر شوية بديهو مهلة يومين اكان مارده بنشروا كلو وكمان في المنتدي العام ، لانو ما كل الناس بتقراء منتدي البهلة الادبي وحيكون ىبعنوان مثير وهو عنوان : لجنة تقصي الحقائق تكشف بالادلة الدامغة موقع فريق اديني سفة الاستراتيجي ، صبرك على يافيفيد !!!!وسلام للكفلائي الجدد ناس فريق التستسات وما تخافو بجيب كيسي معاي من عبد الحميدصديق بقري نضيف لزوم الشية والبصل من خالى حسن الجني وكان ما لقيتو برضو عيسي حدارو فى ، واستاذنكم اعزم الود الصادق الاخضر معاي ، بس بعدين توصلوا بيتم ، واوعي اغشكم ويقوم اغشي حوش البقر !!!!!
ولك ودي ومحبتي
اخوك
ابوفاطمة

[vivid]

الود المصيبه فيفيد

الله يديك العافيه

قالوا فريقكم بجيبوا الكيس للشافع مع قفة الملاح صحى
ده فريقكم ولى القبتاب...
بالمناسبه وين انس المدنى غاطس

العزيز جدا الصادك

هم داب شفع!!!

ديل مخلوقات من كوكب تاني

[vivid]

الحبيب فيفد (( الخلا ))
متعك الله بالصحه والبسك ثوب
الابداع دوما


اخوي انا من زمان سامع بي فريق اديني
سفه دا لكن وحاتك لحد الا ن ما بعرفو ؟؟؟؟
ممكن اجيك نمشي سوي علي الاقل امكن
نلاقي هنادي دي وقفت تاخد ليها هجسه
ونشوفه معاك

بس الا الذي دي اوقفا الوقف غزال (( نولا )) داك


لك ودي وتقديري

الفاتح

بوديك لكن ما مسعول منك

[vivid]

الأخ / فيفيد

شكرا على الحاجات الحلوه دى بتخفف علينا كتير من الغربه

لكن فريق أدينى سفه دا مش بتاع ناس أنس المدنى؟

يا أسامة

أسكت أنس دا ما يسمعك يمشي يشتكيني لي ناس بيتنا

[vivid]

مني ليكم السلام وللود المعطون بالابداع الرائع فيفيد ، ولكن انا عارف انو ماحيجاوب ليكم عن فريق اديني سفة ، تعرفوا ليه لانو بيقول في اول كتابتاته في المنتدي انو هو من سكان المنطقة الوسطية من حي البهلة ، وانا بدويهو جائزة احلى من جائزة رنو بس اوريني هو ساكن وين ، وطبعا انا عارفو مابرد لى تعرفو ليه لانو فريق اديني سفة ده مشهور وكان مغالطني امشوا دار الرياضة في رفاعة بشارع تمبول ، واغشوا في الاول دكان عمنا العماري مرغني سلمان وكان قافل امشوا للعماري ود فورجنب دكان عبد الرازق ومن هنالك وبمجرد وصولكم للكبري الجنب بيوت العمراب ، اشرعوا اكياسكم بتاعت الصعوط وشوفو لمن توصلوا دار الرياضة بفضل ليكم قدر شنو ؟؟؟ ، وانا متكفل بالتعويض ، عشان ناس الود فيقيد معطونين برائحة العماري ولانو قالوا بولد الابداع وبصفي الذهن لذلك اعتادوا عليه صغارا قبل الكبار ، ويافيفيد انا والله بريدكم عديل كده بس انتو مكاجريني ساكت انت وصاحبك اب نظارات ، وزمانيا الفاتح ويا اسامة الجماعة ديل كانوا بلعبوا الدافروي والجائزة صحن فتة حار يعني حلاوة دربس مافي ّّّ!!!!! ولسه انا والله ما كشفت للجماعة موقع فريق اديني سفة منتظرك انت تعزم الشباب رحلة في سوح فريق اديني سفة وانا معاهم ، وكان ابيت عديل كده بكشف الموقع بتاع فريق اديني سفة بالوصف الدقيق ومعاهو كمان خريطة توضيحية كاملة للمداخل والمخارج لفريق اديني سفة الاستراتيجي وبعدها ما توصفني بالعمالة او الخيانة العظمي !!
وياود الكرور المتلي بيابوا ،كده ندخلك واسطة عشان الود فيفيد اقبل يكلم صاحبو الراتبو الفين ومهنته حارس تيوس اكلم كفيلو عشان انقل كفالتي عليهو وبالف واحد انا راضي ، وبعدين جلابيتي قاعدة وسوف اضيف عليها عراقي كدة وبعرضم في المزاد العلني ، بشرط ان يعرض فيفيد بطانتو العاجباهو دي ، ونشوف اعلى سعر البيجيبو منو !!!!
وفي الختام لكم ودي واعزازي
الممثل الشرعي لفريق السناب
ونائب دائرة ديم العوض لحين ظهور الود عبده عثمان
اخوكم
ابوفاطمة

يا نزار

و الله انت صحي ود السناب

شكيتك علي الذي

[vivid]

...بالمناسبه يا فيفيد دي المره الخامسه اقرا القصه الكاتبها دي...وكل مره اقول ارد عليك ...اتحير اقول ليك شنو...والله لو ما خايف من ناس النظام العام كنت قلت ليك الكلام ده بدون البتاعه ديك البضربوها ما بتكتب ولا حاجه..قريت المره الاولي لقيت نفسي ماسك اصبعي في خشمي ذي الشافع البتحجي فيه حبوبته...جيت قريتها تاني قلت...امممممك الموضوع اكبر من شغل حبوبات...ده شغل ناس عارفين بكتبوا في شنو...وحاولت افهم البعد التالت للموضوع ...لقيت اني برضه لسه في البعد الاول مشترك..وكل المحاولات الباقيه كل مره بفهم القصه بطريقه مختلفه...قررت اني ما اشتغل بيك كتير و اتعامل مع كتاباتك كلوحه سرياليه...كل مره افهمها بطريقه مختلفه وبمزاجي انا
...الهاميني هسي ...انك تكون مهتم بكل الكتبته وجامعه ...فالباقي تكتب الاهداء...علشان الواحد اشيل كتابك واقراه قبل ما انوم ...فكتاباتك ما محلها كرسي وشاشه ...منتظرين اكتر واكتر...مع خالص الاحترام..والطمع في المذيد

العزيز جداً نزار

مشكور علي كلامك الجميل و المرتب

جهاز الكمبيوتر ملياااااان بس انكرب

باقي واحد من اصحابي ديل قال لي قصصك دي

التقول فيها فاليوم الواحد يقراها النعاس يجي كابسو

[البرينسيسه]

السلام عليكم
الاخ فيفيد
ما اى حاجه ممله بتنعس فى حاجه ممتعه وبرضو بتنعس وانا نعست بس ما من كلامك الواحد لمن اقعد كتير قدام الشاشه بنعس دا مامعناه انت (براى)

[vivid]

[align=justify:a3a5cd84ee]فجأة و بدون سابقة إنذار و بدون معرفة مكان و سبب نشوء هذه الظاهر الغريبة انطلق اسم (هيثم) في ذلك الوقت كالنار في الهشيم من بين شوارع و أزقة و حواري (السودان) عموماً، الجميلة منها و العويصة وسط كميات من الزغاريد و التهليلات و التبريكات و الأماني بحياة عصرية فريدة لكل مولود يطلق عليه اسم (هيثم). و أصبح الكل في ذلك الوقت يتمنى أن يرزق بولد عشان يسميهو (هيثم). و أصبحنا عندما نسمع اسم (هيثم) تقوم عقولنا الصغيرة و المغلوبة على أمرها برسم صورة ولد وجيه و جميل و لذيذوني و مسمسم و شعرو طويل و ناعم - ممتلء الجسم و الوجه – نشأ و على فمه الدائري الصغير معلقة من الذهب الخالص أبو (واحد و عشرين قيراط) - يرقد و هو خالف رجل على رجل على تل من القروش (يعني قام من نومو و لقى كومو محفوظ و عليهو بوسة) و أن الجميع بإختلاف أعمارهم و ألوانهم و سحناتهم هم تحت تصرفه متى ما شاء و متى ما أراد - يأمر فيطاع - يضحك فيضحك الكل من حوله - يبكي فتجد الدموع قد سالت لبكائه.
و مع ظهور اسم (هيثم) ظهرت و لأول مرة بالسودان ما يسمى بالطبقات (الناعمة) و تم لأول مرة أيضاً تقسيم (الأولاد) إلى قسمين (حناكيش و خناشير) – (ناعمين و خشنين) – (أسماك و قراميط) – (عصافير و صقور) – (فراشات و زنابير). الواحد يقول ليك :
و الله امس قابلت لي واحد ذي الليل شكلو كدا اسمو (هيثم)
شوف (الهيثم) اللذيذ داك!!!
يا ود انت قايل نفسك انك (هيثم)؟

و بمرور الزمن أصبح كل من يطلق عليه اسم (هيثم) يقوم بالتصرف على أرقى المستويات و يبذل و ينفق الغالي و النفيس على نفسه حتى يقال أنه اسم على مسمى. و هو أمرٌ كانت له نقاطه الإيجابية على البلد عموماً. و أصبح (هيثم) هو مصدر رزق لتجّار الأزياء و الأحذية و تجاّر الكريمات و الشامبوهات و المسوحات و الغسولات. و حدثت ثورة و نهضة تقنية عالية في مجالات الصناعة و أدوات المكياج و التجميل الرجالية و النسائية في كافة أرجاء السودان، امتدت آثارها حتى يومنا هذا و تم إفتتاح صوالين (الحلاقة) باحدث المستويات. و أصبح للشباب سياراتهم الخاصة و مصروفهم المدرسي اليومي و أصبحت الكافتريات تبتكر أحدث الطرق و الوسائل في صناعة الأطعمة إرضاء لهؤلاء (الهياثم) و حبيبات (الهياثم). و ازداد دخول العملة الصعبة للبلاد مع ظهور اسم (هيثم). كما انقلب الحال السوداني (180) درجة من شباب ذو مروة و حارة إلى شباب يقلب عليهم الطابع الناعم و اللين. و ظهرت أنواع شتى من أنواع الموضة في اللبس و الهندمة و حتى حلاقات الرأس.
أما فيما يخص الجنس الناعم فنجد الواحدة منهن تدفع نصف عمرها لمصادقة واحد اسمه (هيثم) :
يا بنات الما حب هيثم مفروض تاني ما يحب - (عند الافتخار بين البنات)
هو (هيثمك) دا (هيثم)؟ بالله عليك تعالي شوفي (هيثم) بتاعي (عند المقارنة بين البنات)
دا هيثم و الا كوم بعر – (عندما يطول لسان البنت)
دا هيثم يمشي على العجين ما يلخبطوش (عند الغزل العفيف)
هيثم حبيبي؟!!! دا ود يتاتي ذي قدلة جنا الوزين (عند الغزل الصريح)

تقول النظرية الشيء الذي يذيد عن حده ينقلب ضده – و أن دوام الحال من المحال. حيث و من الملاحظ أنه و مع تقدم العمر بهؤلاء (الهياثم)، اكتشفنا نحنا ناس (قريعتي راحت) اكتشاف خطير جداً، و هو أن هؤلاء (الهياثم) طلعوا فالصو و عبارة عن ماركة (صينية) لا تقوى على المنافسة. حيث نجد أن وجوههم الجميلة قد تغيرت شكلاً و لوناً و حجماً و حلت بدلاً عنها وجوهاً لا تكاد تعرف أولها من آخرها. و طلعت لهم جباه عالية و فواخير (دبل قبين). و تبدلت شفايفهم (الرقيقة) إلى براطيم (الياباني و التاباني). و عرفنا لأول مرة الصلعة التي تلامس حدودها الخلفية الضهر. و انقلب حال على هؤلاء (الهياثم) من أن (الناس) تسعى لمصادقتهم إلى (أنهم) يسعون لمصادقة الناس. و في نهاية و بالعربي الفصيح كد " بقت منهم جفلة". و تم تهميش و مقاطعة هؤلاء (الهياثم) من جميع قطاعات المجتمع.
بعد استمرار التهميش و المقاطع لكل من يسمى بـ (هيثماً) و عندما لم يتقبلهم المجتمع، شكلوا هؤلاء (الهياثم) مليشيات لا بأس بها لإسترداد حقوقهم المسلوبة. حيث نجدهم أنهم قاموا بالإستنجاد بالجانب الرياضي حتى يلفتوا إليهم الأنظار، فتجدهم في الدور الممتاز يشكلون ربع الفريق - الواحد فيهم (وشو) يلعن (قفاه). و البعض الآخر (دقش) دوري الدرجة الأولى و نال نصيبه منها.أما فرق (الحواري) فحدث و لا حرج :
الكورة عند هيثم (دنقلا) و يديها لي هيثم (أم بدة) - هيثم (أم بدة) ماشي و لسة ماشي و يديها بطريقة حلوة للجناح الشمال اللي هو هيثم (المنشية) الذي يقوم بترقيص هيثم (التونسي) من الفريق (الآخر). و يشوت كووووورة جميييييييييلة تلج الشباك من تحت أقدام هيثم لاعب فريق (الآخر) معلنة الهدف الأول.
دا كلام يا (هياثم) خربتو علينا (أولادنا) و عايزين تخربو علينا (كورتنا)؟
هسي كورتنا دي ناقصة ليها (هياثم) كمان؟.

بالنسبة لي أنا فقد واجهتني مشكلة مع هؤلاء (الهياثم)، و هي و عند ولادتي حلفت خالتي (السعدية) (بالتقطعها) إلا تقوم تسميني (هيثم)،تيمناً بي (هيثم) (ود اللقية جارتنا)، مما أدى إلى موجة من الاحتجاجات من جانب كل من خالي (بلة) و عمي (منصور) الذي قال قولته المشهورة: علي بالطلاق لو الود سميتوهو (هيثم) إلا أشيلو أرميهو لي كلبة الجيران. لكن خالتي (السعدية) الله يحفظها لينا أصرت و ألحت على ان يسموني (هيثم). و كادت أن تقع معركة تسيل فيها الدماء. و تم تدارك الأمر بعقد صلح بين (عمي منصور) و (خالتي السعدية) على أن يتم البت في هذا الموضوع بعد أن يمر الأسبوع الأول على (ولادتي). لكن لحكمة يعلمها الله اننى لم استطيع أن أفتح عيوني إلا بعد مرور (خمسة) أيام من (ولادتي) و بعد أن كادوا يفقدون الأمل في (عيوني). فما كان من خال بله إلا و أن قال:
الحمد لله انو الولد فتح (عيونو) - هسي بالله عليك يا (السعدية) دا شكل واحد يسموهو (هيثم) ؟ و الله دا لايق عليهو اسم (يعقوب)
خالتي : هيثم و بس
عمي منصور : فيفيد و الا بلاش
مرت الأيام و الناس تناديني بي (أبو عفان) و خالي بلة يناديني بي (يعقوب) و خالتي السعدية تناديني بي (هيثم) و عمي منصور يناديني بي (فيفيد القرد). و لكي أقوم بترضية (خالتي السعدية) أطال الله عمرها، فقد اتجهت لشلة (الهياثم) بالحي (الأمامي) برفاعة و عملت ليهم غسيل مخ، لحدي ما أقنعتهم أن اسم (فيفيد) دا هو اسم من أسماء (الهياثم) النادر. ثم دخلت المدرسة (الابتدائية) و أنا ملتصق ب (هياثم) الحي (الأمامي).
و لكن عند دخولنا للمرحلة (المتوسطة) أدركت كم هو صعباً أن تكون (هيثماً) : حيث كنا لحظة خروجي من (درس) العصر بعد صلاة (المغرب) مع (هياثم) الحي (الأمامي) نجد أن (الخور) الذي يقبع أمام مدرستنا مليء (بالزنابير) من ذوي الحجم العائلي في انتظار هؤلاء (الهياثم) لغرض السلب و النهب و لأشياء أخرى أدرك البعض منها و أجهل الكثير منها أيضاً. كان هؤلاء (الهياثم) يحتمون بي برقم أحجامهم (الضخمة) و كنت أنا أدافع عنهم برغم جسمي (الهلفوت) و عضلاتي (المنيلة بستين نيلة) :
أذكر عن خروجنا في ذلك اليوم بعد صلاة المغرب و عند حلول الظلام، برز لنا أربعة (الزنايبر) من أواسط ذلك (الخور) المشهور، و كان في معيتي عدد (3) (هياثم) و عدد واحد فيفيد (انا). و برزت السكاكين و تم اتهامي في ذلك الظلام (بالهيثمية) فما كان مني إلا و ان قلت لهم :
هوووووي يا انتو و الله انا اسمي (فيفيد) – و الله اسم (هيثم) دا من ما قمت انا (بكجنو) و ما بريدو
زنبور : كدي تعال لي هنا خلينا نشوفك شكلك (هيثم) و الا حاجة (تانية)
انا : و الللللله يا (شجعان) انا (فيفيد) و حتى بقولوا لي (فيفيد القرد)
زنبور آخر : لالالا انت حا تكون (هيثم) من (الهياثم) لأنك قاعد تمشي (معاهم)
انا : يا جماعة و الله انا من (حي البهلة) و هم خاتني (لغم) للجماعة ديل
زنبور آخر : (لغم) كيف يعني؟
انا : (اللغم) معناهو (الدسيسة) عشان اعرف تحركات هؤلاء (الهياثم) و اوصلها لجماعة (البهلة)
الزنبور الأول : هاتولي (فيفيد القرد) دا خلوني اشوفو و اتمعن في (وشو)

بعد مرات يكون من المفيد جداً ان تستخدم طرق ملتوية للدفاع عن نفسك و هو ما تحلله الحروب و المعارك. و لكي تكتب لي النجاة من هؤلاء القوم (السيئين) فقد كانت طريقتي للدفاع عن نفسي هي "كرعيني الطويلة" اللتان لم تخزلاني أبداً في أي معركة أخوض فيها. لذا و عندما (هم) هؤلاء الزنابير بالقبض علي لتحديد هويتي ما إذا كنت (هيثماً أم لا) ، كنت قد أطلقت العنانان لساقي الطويلتان. و خلال خمسة ثواني كانت ريحتي في الأرياح ما في.

صباح اليوم التاني أطلقت سيل من الشائعات التي تقول أن اسم (فيفيد) هو اسم لنوع نادر من (القرود).


دا كلو هين بس الحاجة الغريبة انو نحنا ما سمعنا لينا لحدي هسي بي واحد اسمو (هيثم) بقى (وزير) و الا بقى شخصية (كبيرة) اللهم إلى لاعب (كورة)


فيفيد
في 17/07/2005م
مع الإعتذار للأغنية[/align:a3a5cd84ee]

[معتصم سليمان بابكر]

يافيفيد

انت عارف يافيفيد اقول ليك حاجتين :

الحاجة الاولى لامن كنا فى المدرسة الثانوية كان عندنا استاذ لغة عربية الله لا ورّاك يافيفيد والحمد

لله ان جيلكم ماحضرو (جيل الهياثم) تعرف دا خليك من هيثم الحاجة الداير اقول ليك عليها

انو فى نفس الوقت كان معانا فى الفصل واحد شييييييييين (يقطع الخميرة من البيت) وكان اسمو

يوسف (الاستاذ كان بيقول ليهو اسم التضاد)

تعرف مرة واحد مقرم زيك كدى ومابتلفت وكان ما بعرفو كويس كنت بقول انو بتاع سطلة تعرف الراجل

دا اهلوا اتصلوا بيهو باعتبارو كبير البيت قالوا ليهو والله فلان (اسمو من فصيلة هيثمياتك) المهم قالوا

ليهو هناى دا اتقدم لخطبة اختك فلانة واهلوا جو نا ونحن قلنا ليهم والله شورتا عند اخوها وبنتصل

بيهو ونرد ليكم...

تعرف سيد الشورة قال ليهم شنو؟؟؟

كدى خلونا من الخطبة والشورة هو هناى دا( بلغ ؟؟؟؟؟)

[vivid]

السلام عليكم
الاخ فيفيد
ما اى حاجه ممله بتنعس فى حاجه ممتعه وبرضو بتنعس وانا نعست بس ما من كلامك الواحد لمن اقعد كتير قدام الشاشه بنعس دا مامعناه انت (براى)

يا برنسيسة و الله انا براي

و الناس كلهم شاردين مني

بس اعملي حسابك ما تبقي مدمنة بري

[Nazar Hussien Babkir Frie]

الله يجزاي محنك يافيفيد
، بالنسبة لصاحبك اقول له انو ود المجدوب مدير مدرسة رفاعة الثانوية في حقبة تاريحية سابقة ، كان مشهور بحب الجمال ايا كان ، فالجماعة بتاعين اخر كنبة في الفصل قالوا يمقلبوا فتم الاحلال والابدال الحلوين في الخلف والشنيين قدام وكانت الحصة حقتو فدخل الفصل الذي يحفظه عن ظهر قلب ففؤجي بالتغيير الحاصل فقال اظني اخطات في الفصل فاجاب الجميع لا ياستاذ الحصة في فصلنا ده فاجاب ارجعوا الاوضاع كما كانت ثم بعدها ندرسكم الحصة .
اما استاذنا الوجج فكان يقول يانت ياحته ياابو زارير سته مما شوفتك انبسطت حبك رماني من الحمار بردلاب حينما تكون قبيحا مهما كانت شطارتك .
ودحين يافيفيد الزنابير ديل اوعي يكونوا من فريق السناب !!!!!؟؟؟

[ايهاب صالح سليمان]

مداخلة لك الاخ فيفيد ....كل يوم افتح القصة واقراها واعيش معاها كاني ممثل ......شهوة في النوم بس .....والله بالجد حلوة وتستاهل جائزة فيها ....اتمني انك ما تنوم كتير عشان تتحفنا طوالي بدررك الحلوة دي .....ولك خالص التحايا
[highlight=#99FFFF:4f4e359b7a][marq=left:4f4e359b7a]ايهاب صالح سليمان [/marq:4f4e359b7a][/highlight:4f4e359b7a]

[عبدالله إبنعوف]

يا فيفيد ربنا يزيدك من نعيمو ومن الهياثم ويكتر ليك بطاطين إسبانيا ، لأنو إنت الآن في السعودية

تعرف يا نزار الأول ، كلامك عن الناظر ود المجذوب - رحمه الله وعطر ثراه - حقيقي وهو كان راجل أديب أريب لا يشق له غبار ، وكما ذكر أخونا نزار يحب الجمال في كل شيء ، الناس الشافو بيتو بيحكو عنه حكاوي ولا حكاوي ألف ليلة وليلة ، ومدرسة رفاعة الثانوية في عهده الميمون كانت آخر جمال وروعة ، أنوار بمختلف الألوان ، حدائق غناء ، الشاهد إنه فصلنا كان إسمه المازني في الجهة الجنوبية الغربية من المدرسة يعني أقصى مكان في المدرسة وأقرب لمدرسة لطفي من الباب الرئيسي ، كان في واحد من فصلنا من الفئة بتاعة الخيران اللي بتتكلم عنها دي ، ود المجدوب كان لما يقابلوا بيغطي وشو عشان ما يشوفوا أو بدور للجهة التانية ، ويا ويلوا لو ود المجدوب شافو في الصباح البدري ، حديهوا إجازة ود المجدوب يعتكف كل اليوم وما يظهر

آخر حاجة عملها ودالمجدوب ، وعشان ما يشوفوا خالص ، تعرف عمل شنو والله فتح ليهو باب مخصوص في الجهة الغربية من المدرسة وحذروا ما يدخل من أي باب غير الباب المخصص لهيو ، وصاحبنا من يومها من الباب للفصل وبالعكس ، الناظر ود المجدوب إرتاح منه حتى طلعنا من الثانوي ما شافو مرة تانية .

يلا يا فيفيد ما تغيب كتير وخلينا نشوف ونطلع على الروائع

[vivid]

مداخلة لك الاخ فيفيد ....كل يوم افتح القصة واقراها واعيش معاها كاني ممثل ......شهوة في النوم بس .....والله بالجد حلوة وتستاهل جائزة فيها ....اتمني انك ما تنوم كتير عشان تتحفنا طوالي بدررك الحلوة دي .....ولك خالص التحايا
[highlight=#99FFFF:906c14bb04][marq=left:906c14bb04]ايهاب صالح سليمان [/marq:906c14bb04][/highlight:906c14bb04]

كيفك يا إيهاب

ياخي سائلين منك اخونا معتصم

و انا كل يوم معاهو و بسألو منك

رسل لي الجوال على الخاص

[vivid]

يافيفيد

انت عارف يافيفيد اقول ليك حاجتين :

الحاجة الاولى لامن كنا فى المدرسة الثانوية كان عندنا استاذ لغة عربية الله لا ورّاك يافيفيد والحمد

لله ان جيلكم ماحضرو (جيل الهياثم) تعرف دا خليك من هيثم الحاجة الداير اقول ليك عليها

انو فى نفس الوقت كان معانا فى الفصل واحد شييييييييين (يقطع الخميرة من البيت) وكان اسمو

يوسف (الاستاذ كان بيقول ليهو اسم التضاد)

تعرف مرة واحد مقرم زيك كدى ومابتلفت وكان ما بعرفو كويس كنت بقول انو بتاع سطلة تعرف الراجل

دا اهلوا اتصلوا بيهو باعتبارو كبير البيت قالوا ليهو والله فلان (اسمو من فصيلة هيثمياتك) المهم قالوا

ليهو هناى دا اتقدم لخطبة اختك فلانة واهلوا جو نا ونحن قلنا ليهم والله شورتا عند اخوها وبنتصل

بيهو ونرد ليكم...

تعرف سيد الشورة قال ليهم شنو؟؟؟

كدى خلونا من الخطبة والشورة هو هناى دا( بلغ ؟؟؟؟؟)

و الله يا معتصم لو سمعوك الهياثم إلا .....

[vivid]

الله يجزاي محنك يافيفيد
، بالنسبة لصاحبك اقول له انو ود المجدوب مدير مدرسة رفاعة الثانوية في حقبة تاريحية سابقة ، كان مشهور بحب الجمال ايا كان ، فالجماعة بتاعين اخر كنبة في الفصل قالوا يمقلبوا فتم الاحلال والابدال الحلوين في الخلف والشنيين قدام وكانت الحصة حقتو فدخل الفصل الذي يحفظه عن ظهر قلب ففؤجي بالتغيير الحاصل فقال اظني اخطات في الفصل فاجاب الجميع لا ياستاذ الحصة في فصلنا ده فاجاب ارجعوا الاوضاع كما كانت ثم بعدها ندرسكم الحصة .
اما استاذنا الوجج فكان يقول يانت ياحته ياابو زارير سته مما شوفتك انبسطت حبك رماني من الحمار بردلاب حينما تكون قبيحا مهما كانت شطارتك .
ودحين يافيفيد الزنابير ديل اوعي يكونوا من فريق السناب !!!!!؟؟؟

يا نزار علي الطلاق زنابير السناب

تصدير حي البهلة

ههههههههههههههههههههههههه

[vivid]

يا فيفيد ربنا يزيدك من نعيمو ومن الهياثم ويكتر ليك بطاطين إسبانيا ، لأنو إنت الآن في السعودية

تعرف يا نزار الأول ، كلامك عن الناظر ود المجذوب - رحمه الله وعطر ثراه - حقيقي وهو كان راجل أديب أريب لا يشق له غبار ، وكما ذكر أخونا نزار يحب الجمال في كل شيء ، الناس الشافو بيتو بيحكو عنه حكاوي ولا حكاوي ألف ليلة وليلة ، ومدرسة رفاعة الثانوية في عهده الميمون كانت آخر جمال وروعة ، أنوار بمختلف الألوان ، حدائق غناء ، الشاهد إنه فصلنا كان إسمه المازني في الجهة الجنوبية الغربية من المدرسة يعني أقصى مكان في المدرسة وأقرب لمدرسة لطفي من الباب الرئيسي ، كان في واحد من فصلنا من الفئة بتاعة الخيران اللي بتتكلم عنها دي ، ود المجدوب كان لما يقابلوا بيغطي وشو عشان ما يشوفوا أو بدور للجهة التانية ، ويا ويلوا لو ود المجدوب شافو في الصباح البدري ، حديهوا إجازة ود المجدوب يعتكف كل اليوم وما يظهر

آخر حاجة عملها ودالمجدوب ، وعشان ما يشوفوا خالص ، تعرف عمل شنو والله فتح ليهو باب مخصوص في الجهة الغربية من المدرسة وحذروا ما يدخل من أي باب غير الباب المخصص لهيو ، وصاحبنا من يومها من الباب للفصل وبالعكس ، الناظر ود المجدوب إرتاح منه حتى طلعنا من الثانوي ما شافو مرة تانية .

يلا يا فيفيد ما تغيب كتير وخلينا نشوف ونطلع على الروائع

هاهاهاهاهاهاهاهاهاها حلوة!!!!!

[vivid]

[align=justify:442b56c263]غايتو بطني دي فاضحاني فضيحة السيح و الريح قدام خلق الله . . أصلو ما قاعدة تنستر معاي . . تختار أظرط المواقف و تقع فيني فضائح . . هي و الفضيحة بيناتم قرابة . . أخوات بنات عم لزم . . و عاملات مذكرة تفاهم مع بعض . . و ديمة متباريات سوا سوا . . قرادة في أضان كلب . . مع اني أصلو ما قاعد أقصر معاها كلو كلو . . و لا خليتا يوم تشكي من جوع و الا عطش . . صحيتي من النوم أقعد أستف ليها رفوفها و أملئ في براميلها . . لبن الطير دا لو اتوحمت بيهو بدبرو و بجازفو ليها . . عيلا لكن بعد دا كلو غليانة و دغلة . . قاعدة تداغل علي . . و تسوي لي الغتاتة . . قدام خلق الله . . غايتو عليها جنس حركات . . التقول ما حقتي . . وكتين زهجتني . . شلتها خميتا و وديتا العيادة . . قلت اعرف بت اللذين دي قصتا معاي شنو . . يمكن في شيتاً عايش جوة و انا ما خابرو. . دخلوني علي الحكماء و الحكيمات . . من شافوني جابو عدتهم و جوني . . عملوا ليهم دايرة . . و مددوني في سرير علي ضهري . . و رقدوني عيلا بي سروالي . . و قعدوا يعاينو و يلمسوا في بطني . . و من ساعة لي ساعة ينططوا لي في عويناتم . . و يرطونوا . . شيء انقليزي . . و شيء ما خابرو فرنسي و الا ألماني . . مرات يقعوا غلاط في بعض . . الغلاط و كت سخن انقلب نبذ و سبيبة و نعلان والدين . . تاني قامت جابت ليها مد ايدين و عكم و ملاواة . . واحدين يحلفوا بي أبواتن و شيوخ قبايلهم. . في حكيمة وسط الجماعة ديل طلقوها طلاق تلاتة علي صمت خشما . . قدام عيني . . عاد بطني دي حيرتم عديييييل كدا . . غلبم البسوهو فيها . . آخر المطاف أفتوني . . قالوا دي حالة نادرة . . و قبل كدا ما مرت عليهم . . و قالوا لي أوعك تاكل اللحم . . فارق اللحمة دي فراق الطريفي لي جملو . . و تاني ما تاكل لحمة البتة . . عيلا الغريب . . بطني دي كانت من يوما ما بتريد اللحمة . . يومي البغلط فيهو و أديها لحمة . . تعمل لي سهر الجداد . . تخليني اليوم كلو أبزق و اتنخّم . . زي التكرنو ماصرين لي ليمونة جوة . . لكن وكتين سمعت كلام الدكاترة عن اللحمة. . سوت لي شغل الغتاتة . . و قعدت تدلّع و تتفلهم علي . . قدام خلق الله . . و بقت ما ترضي عيلا بالحمة . . من يوم تشم ليها قطعت لحمة تقوم تتمرعف . . و تبقى شبه مرفعين الخلا . . مرعفتا دي ما تسويها لي عيلا قدام الضيوف و البنات الحلوات . . بعد مرات تقرب تجيب ليها جنا . . تتلولو و تتمطمط لي قدام تقول مترين . . و تعمل ليها اصوت مرفعينية مخيفة . . مرات تزغرد زي بنات سلاح الموسيقى . . مرات تجيبو مكاجر و مشاتر . . تقعد تهنق زي الحمار المكادي الشايف القش و ما محصلو . . وكتين أشوفا كدي . . أخمها و أجري بيها المطبخ . . ألملم ليها لحمة الملحات كلو . . بس عشان تسكت مني . . و متجعر . . عيلا اليومين ديل دلعها زاد زيادة . . و بدت تستبز فيني . . بقت ما بترضى بي حاجة أقل من ضلعة . . من تشوف ليها شبح ضلعة تسوي فيني العجب . . ترفس زي الشافع المنعتو أمو من الرضاعة. . مرات تسوي دافوري . . مرات تنطلق فوقا نارية و تقعد تقرص و تنخس فيني . . التقول فيها زول ساكن بي شفعوا جوة . . بقيت قدر البشتغلها أمشي اشتري ليها لحمة و اسوي ليها ضلعة . . كل يوم ضلعة كل يوم ضلعة . . وكتين لقيت الحكاية مكلفة كدي . . قلت اخير أصاقر بيها الأعراس . . ما في طريقة اسكتها بيها عيلا الضلعات المجانية . . بقيت قدر ما أسمع لي بي عرس . . اتشنط و اتزبط و اخمها قدامي و أمشي . . العرس لو بعرفو و الا ما بعرفو بمشيلو . . أمشي كمان أقعد جوة خيمة . . و أخلف كراع فوق كراع . . زي أجعص جعيص . . و عاد بطني تسوي في البدع . . ناطة لي قدام و تتحرقص و تتفرقص . . و تتشابا لي صواني الغدا . . تصفق و تصفر فرحااااانة . . زي بتوع السينما . . ساعتي اللجي أقعد لي في صينية . . تجرني و ترزعني و تكتفني في كرسيني . . تقول لي الصينية دي ضلعتا نتشة و سغيرونية ما بتخارج معاي . . احسن تنتظر الصينية الجاية . . تجي الصينينة الجاية . . اجي أقوم تحكلني من عراقيبي و تجيبني متكايس في كرسيني تاني . . تقول الصينية دي فيها راجل عجوز . . ما بترضى أقعد في صينية فهاي راجل معشكب . . الرجال المعشكبين ديل أكالين و بلاعين . . و خشومهم زي مسجلات العربيات . . قاعدين بس للبلع . . ما قاعدين يمدقوا . . بصقعوا الجرة بس وكتين يرجعوا لي بيوتهم . . طيب انتي داير شنو يا السوسة . . حيرتيني معاك . . تقول لي دايراك تقعد في صينية الناس المهمين . . الناس البياكلوا بي أصبعين و يشنقوا أصبعين و الأصبع السغيروني راسمين فوقو حنة . . ديل ما بعرفوا ياكلوا . . بقيت قدر ما امشيلي لي عرس انجعص عشانها وسط الجماعة المهمين . . خاسة الجايين من الخرتوم . . بقت تتكيف مني كيف شديد . . و كمان بعد ما ناكل الضلعة تقول لي اشيل العضم معاك لي البيت . . و أعملو لي بزازة . . بقيت قدر ما تجي تعمل لي حركاتها ديك أجر ليها عضم الضلعة من التلاجة و أديها تمصة . . هسي ليها زمن قاعدة مؤدبة زي العروس ليلة الدخلة.
لكن اليومين ديل ظهرت لي بلوة جديدة . . عويناتي السغيرونية . . قدر ما يشوفن ليهن بت ماشة في الشارع يقعدن يرفني . . يكونن عملن ليهن مذكرة تفاهم مع بعض؟.[/align:442b56c263]

[معتصم سليمان بابكر]

فيفيد...............

شكيت محنك على الله

اما العوينات الانا عارفهم الله يستر من الجاى وراههههههههههههههههههم

لك التحية يارائع

[البرينسيسه]

الاخ فيفيد
حفظك الله
الا بطنك دى ذكرتنى طفولتى لمن اطلع مع امى نمشى لينا لى ناس وصلتنا كدا اكان اكلتنى فى البيت اول ما اصل بيت الناس اقول ليها انا جعانه امى تشيل وتضاير وانا اصر على انى جعانه اها المشكله بيقت اكبر بعد ماكبرت واتزوجت لو على اتغدا واتعشا جاهز بس اكون نظيف

[ابو النيييييز]

يا خي اسمع بالله واحد كده...انت الكلام ده قاعد تجيبو من وين؟؟

[Nazar Hussien Babkir Frie]

لكي اخي فيفيد خلاصة الكلمات فانت والابداع صنوان لايفترقان ، عليك الله الكلامده كلو عن بطنك ، بالله عليك وانا عارفه انها ما متعودة على الاكل كامل الدسم ، اديها شوية شوية شوية ، بعدين الخواجات الرطنو ديل قايلانك وارد جاردن سيتي ما عارفنك وارد البهلة وجار الحي الامامي ، بعدين يا اخوي يافيفيد السليقة الحارة بتاعت الدافوري حقكم زمان مالك متجاهلها وعوز تعبئ بطنك بدجاج البيك ، عشان انك طفس لازم بطنك تعورك بالسعودي دي ، الرجوع للحق فضيلة رشوشة ساكت وكان كمان مافي انشاء الله كسرة معجونة بطاطم ومويه اصلو الخدرة دي حقتكم براكمواوعك من الحمرا عليك بالخضراء !!!!!؟؟؟(ودي بتحير نزار الكرور) ،
بعدين شوف نزار الكرور اوعي توريه الكلام بتجيبوا من وين لان ان عرف بضيعك يافيفيد انت خريج الفرع واظنو خريج الاهلية ولا كمبيوتر مان وبعدين بتقول ابوفاطمة نصحني وانا ما سمعت النصيحة .
سلام ليك ولصاحبك ابو نظارات
وشوق بحر ودموع مطر لحدي ما نتقابل !!!
ابوفاطمة

[bakry Almahi]

[highlight=#0099FF:60fc9b66b3]سلام يا ناس رفاعه يا رايعين وسلام خاص ليك انت يا فيفد الشفت الحقيقه انا سعيد جدا انو القي ناس من رفاعه مدينه العلم والنور . وانا معجب شديد بي كتاباتك [/highlight:60fc9b66b3]

[vivid]

فيفيد...............

شكيت محنك على الله

اما العوينات الانا عارفهم الله يستر من الجاى وراههههههههههههههههههم

لك التحية يارائع


معتصم

و حاتك انت العوينات الايام ديل شغالات شغل الجن

[vivid]

الاخ فيفيد
حفظك الله
الا بطنك دى ذكرتنى طفولتى لمن اطلع مع امى نمشى لينا لى ناس وصلتنا كدا اكان اكلتنى فى البيت اول ما اصل بيت الناس اقول ليها انا جعانه امى تشيل وتضاير وانا اصر على انى جعانه اها المشكله بيقت اكبر بعد ماكبرت واتزوجت لو على اتغدا واتعشا جاهز بس اكون نظيف

البرنسيسة

الله يكون في عونا انا وانتي

يا ربي الناس التانين ديل ساكين علي بطونن مالم

[vivid]

يا خي اسمع بالله واحد كده...انت الكلام ده قاعد تجيبو من وين؟؟

[align=justify:6bb4f63269]يا نزار


قول بهلة

وحات الله اوريك جبتو من وين[/align:6bb4f63269]

[vivid]

لكي اخي فيفيد خلاصة الكلمات فانت والابداع صنوان لايفترقان ، عليك الله الكلامده كلو عن بطنك ، بالله عليك وانا عارفه انها ما متعودة على الاكل كامل الدسم ، اديها شوية شوية شوية ، بعدين الخواجات الرطنو ديل قايلانك وارد جاردن سيتي ما عارفنك وارد البهلة وجار الحي الامامي ، بعدين يا اخوي يافيفيد السليقة الحارة بتاعت الدافوري حقكم زمان مالك متجاهلها وعوز تعبئ بطنك بدجاج البيك ، عشان انك طفس لازم بطنك تعورك بالسعودي دي ، الرجوع للحق فضيلة رشوشة ساكت وكان كمان مافي انشاء الله كسرة معجونة بطاطم ومويه اصلو الخدرة دي حقتكم براكمواوعك من الحمرا عليك بالخضراء !!!!!؟؟؟(ودي بتحير نزار الكرور) ،
بعدين شوف نزار الكرور اوعي توريه الكلام بتجيبوا من وين لان ان عرف بضيعك يافيفيد انت خريج الفرع واظنو خريج الاهلية ولا كمبيوتر مان وبعدين بتقول ابوفاطمة نصحني وانا ما سمعت النصيحة .
سلام ليك ولصاحبك ابو نظارات
وشوق بحر ودموع مطر لحدي ما نتقابل !!!
ابوفاطمة

و الله يا ناس السناب

يا بتاعين الرشوشة و السخينة و .......

بطني دي اصلو ما وزتني اني امشي عليكم

انتو بتعرفوا اللحمة عليكم الله

قالوا انتو ربع الكيلو بتاع اللحمة بتربطوهو في دلقان و خيط

و تختوهو في الحلة دقيقتين

و تنشلوهو لي لي ملاح بكرة

الكلام دا صحي و الا كضب يا نزار

[vivid]

[highlight=#0099FF:c27ad02ff2]سلام يا ناس رفاعه يا رايعين وسلام خاص ليك انت يا فيفد الشفت الحقيقه انا سعيد جدا انو القي ناس من رفاعه مدينه العلم والنور . وانا معجب شديد بي كتاباتك [/highlight:c27ad02ff2]

آخيراً

رحبوا معي بي الباشمهندس بكرس الماحي

احد رجالات حي البهلة الأصيلين

و هو فعلاً مكسب لي منتدى حي البهلة

لأنوهو زاتو من حي البهلة و جارنا بالحيطة


و كم مرة طردني من بيتهم عشان بطني


مرحب بيك يا باشمهندس

[كرموش]

[align=justify:ae35df9a9d]
هههههههههههههههههههههههههههه

و الله انا مطاردك من منتدى لي منتدى[/align:ae35df9a9d]

[vivid]

[align=justify:8306ae358c]مدخل أول :

أنا : يا التوووومة ا التووووووووومة يا التوووووووووووووووومة
التومة : سجمي . . البكورك لي دا منو
أنا : دا أنا (فيفيد) . . واقف ليكي في (الطاقة) يا (خالة)
التومة : و داير شنو يا (فيفيد) . . بتكورك لي مالك – يعني نقوم نخلي ليك البيت دا و الا شنو؟
أنا : روقي المنقة شوية يا (خالة) و خلينا نتفاهم
التومة : نتفاهم علي شنو يا دلاهه . . وريني داير شنو فسراع فسراع
أنا : الليلة يا (خالة) شايف (شجر الحنة) بتاعكم عااااامر بالحبايب؟
التومة : قصدك شنو يا (لوح) انت
أنا : هاهاهاها . . شايف لي واحد قاعد مع (سميرة) بنتك تحت (شجر الحنة)
التومة : و انت الشلاقة ليك شنو
أنا : داير اشوف الحاصل شنو تحت (شجر الحنة) . . نحنا كمان لينا حق الجيرة يا (خالة)
التومة : أبعد من الطاقة دي يا (فيفيد) قبل ما البعك بي قالب طوبة اجيب اجلك
انا : تلبعيني يا (خالة) عشان انا خايف علي بنتك؟
التومة : آآآآي بلبعك و ألبع قبيلتك كلها يا أبو عيون (زايقة)
أنا : طيب بس قولي لي في اللوال القاعد مع (سميرة) بنتك دا منو
التومة : دا استاذ (سليمان) داير إدي سميرة بنتي دروس خصوصية
انا : يعني نحنا متنا و الا استشهدنا يا (خالة) . . انا كان برضو ممكن أدي ليكم (سميرة) بنتكم دي دروس خصوصية و توفروا حق الاستاذ الخصوصي.
التومة : مشكور يا خفيف انت . . امشي شوف ليك أي واحدة غير بنتي دي و اديها دروس خصوصية كفاية المرة الفاتت

مدخل ثاني :

سميرة : سلمونتي
سليمان : سمورتي
سميرة : بحبك
سليمان : بعبدك – بعشقك – بهواك - بموت في دباديبك يا (متوحشة)
سميرة : يا لهوتي يا (سلمونتي) بالراحة علي انا ما بقدر الكلام دا
سليمان : آآآآه انا منك يا (سمورتي) يا رمز (الحب الوليد) و (العمر المديد) و (الزمن التليد)
سميرة : دا من قلبك يا (سلمونتي)؟!!! وحات الله خجلتني عدييييل كدا
سليمان : آآآآه ياني يا (سمورتي) . . دا من صميم قلبي يا (سمورتي) . . من أعمق أعماق قلبي يا (سمورتي)
سميرة : آه منك يا (عفريت) يا أبو عيون (زايقة) . . كلامك الزي العسل الابيض دا كان وين من زمان؟!!!
سليمان : عيوني زايقة لي حلاوتك يا (سمورتي) . . يا صينية بقلاوة . . يا صندوق كنافة مستوردة . . يا كوم هريسة غرقانة في بحار سكر (كناني).

أنا : دا شنو يا (سميرة!!!) شكيتك علي الله . . هسع ما لقيتي ليك واحد إلا استاذ (سليمان) دا عشان تقعدي معاهو تحت (شجر الحنة؟!!!) . . حرام عليكي يا مفترية.

سميرة : سجمي يا (سلمونتي) . . كلامك دا داير يدوخني
سليمان : انا دايخ لي سنتين بي حبك يا (حياتي) . . يا توأم (روحي) . . يا نور (عيني)


أنا : و الله عال يا (جدعان) البلد دي ما فيها (راجل) و الا شنو؟!!!


سميرة : سجمي (فيفيد)!!! . . محمد جانا ما تغشانا
سليمان : مالك يا (سمورتي) . . و دا منو (أبو رقبة) طويلة الواقف في (الطاقة) ديك يا (حبيبتي)؟
سميرة : دا (فيفيد الشليق)
سليمان : و مالو مادي لينا (رقبتو) مترين بي عند (الطاقة) ديك؟
سميرة : و لا يهمك يا حبيبي . . (فيفيد) دا عيونو ذي قدود الجلد ما بشوف أي حاجة
سليمان : الخوف يكون سمع كلامنا (الدقاق) دا . . اصلو (اضنيهو) عاملات زي رفرف (التركتر)
سميرة : و لا يهمك يا (سلمونتي) . . (فيفيد) دا كان (مستلطفني) من أيام المدرسة . . لكن انا قاطعاهو معاهو ناشف
سليمان : يعني منو خوف و الا (لا) يا (حبيبتي)
سميرة : (فيفيد) دا راجل (إضينة) و (موهوم) ساااااكت يا (حبيبي) و ما منو أي خوف


انا : اها ها ها تلاقيك يا (سميرة) حكيتي ليهو عن (عيوني الدقاااق) . . و عن (اضنيني الكبااار) اصلي انا عارفك من زمانااا . . خابزك و عاجنك.


سميرة : انت (غيراااان) علي من (فيفيد) دا يا (سلمونتي)؟!!!
سليمان : انتي عارفة يا (سمورتي) أنا (بغار) عليك من (الطير الطاير) . . و (الهواء الطاير) . . و (القلوب الطايرة)

أنا : أهاهاهاها و الله انت (دقوسة) يا (سليمان) . . (دقوسة) و شبه (الكوسة) كمان
سميرة : (أموت فيك) و انت (غيرااان) علي (سلمونتي) . . (اعشقك) و انت بتخاف علي . . (أهواك) و انت بدّافع عني
سليمان : انتي جادة يا (سمورتي)؟
سميرة : آآآآآآي يا روحي

أنا : بالراحة على الرجل يا سميرة . . الراجل دا ما قدرك . . حا يفطس تحت يديك

سليمان : يا سمورتي . . انا خايف (فيفيد) دا يقوم يفضحنا في البلد
سميرة : نوم قفا يا (سلمونتي) و خت في بطنك (بطيخة) صيفي . . (فيفيد) دا حا اسكتو ليك بعدين
سليمان : حا تسكتيهو بي شنو يا (سمورتي)؟
سميرة : حتة (بسمة) على حتة (لمزة) على حتة (غمزة) بتجيب (أجلو)
سليمان : (غمزة!!!! لمزة!!! بسمة!!!!) الكلام دا انا شايفو كتير عليهو يا (سمورتي)
سميرة : و لا كتير و لا حاجة يا (سمورتي) . . اصلو فيفيد دا لسانو ذي (الفلقة) – لو أطلق ليهو العنان تاني ما بسكتو إلا الشديد القوي


أنا : أبعدوا يديكم من بعض يا (هلافيت) . . يا (أوانطجية) . . ما تخلونا نقلبا و ناكل اللبا


سليمان : طيب يا (سمورتي) . . أذاكر ليك شوية قبل ما (فيفيد) دا يقوم ينقش موضوع علاقتنا (الغرامية) دي
سميرة : انا جايباك هنا يا (سلمونتي) عشان تديني دروس في (الحب) . . دروس في (العشق) - دروس في (الهوى) و دروس في مناجاة (الحبيب للحبيبة)
سليمان : خلينا ناخد في الأول درس (كان و أخواتها) بعدين نحب بعض ذي ما نحنا عايزين.
سميرة : لالالالا . . الدرس حا يكون عن (سميرة و اخواتها) . . عن (سميرة و حبيبها) . . عن (سميرة و سليمان) . . عن (سميرة و سلمونتي)
سليمان : أمووت انا في (سمورتي) و عيونها (الغزلانية) و خدودها (الأماظية) و شفايفها (الذهبية)

أنا : هاهاهاهاهاها . . و الله عال . . دي الحكاية استوت على الآخر

سميرة : شايف في عيوني شنو يا (سلمونتي)
سليمان : شايف (الجنة و نعيمها) . . (شايف النعيم الأبدي) . . (شايف الحياة السرمدية)
سميرة (بي خجل) : و في خدودي شايف شنو كمان
سليمان : يا خرااااااابي من (الخدود) – دا أنا شايف بلاوي متلتلة


أنا : روق المنقة شوية يا (سليمان) ما تجيب آخرك بي سرعة كدا . . عشان ما يقنطروك و يشوتوك ضفاري


سميرة : تعال يا (سلمونتي) نلعب لعبة (مناجاة الحبيب و الحبيبة)


أنا : لا لا لا يا (سليمان) - أي حاجة إلى لعبة (مناجاة الحبيب و الحبيبة) – كدي حا تروح بلاش (ذي الناس التانين)


مدخل ثالث : بعد مرور يومين:

استاذ سليمان : يا التوووومة ا التووووووووومة يا التوووووووووووووووومة
التومة : سجمي . . البكورك لي دا منو؟!!!
سليمان: دا أنا استاذ (سليمان) يا (خالة) – واقف في (الطاقة) فوق يا (خالة)
التومة : داير شنو يا استاذ (سليمان) - بتكورك لي مالك؟
سليمان: تعالي كدي حدسيني
التومة : اها في شنو يا (سجم الرماد) انت؟
سليمان: الليلة شايف (شجر الحنة) بتاعكم عااااامر بالحبايب؟
التومة : جيب من الآخر يا انت
سليمان: هاهاهاها . . شايف لي واحد قاعد مع (سميرة) بنتك تحت (شجر الحنة)
التومة : و يعني
سليمان : داير اطمن علي بنتك بس
التومة : دا أستاذ صديق بتاع (الدين).

سليمان : دا شنو يا (سميرة!!!) شكيتك علي الله . . هسي ما لقيتي ليك واحد إلا استاذ (صديق) دا عشان تقعدي معاهو تحت (شجر الحنة؟!!!) - الله يكون في عونو.[/align:8306ae358c]

[vivid]

[align=justify:9e96c54f08]
هههههههههههههههههههههههههههه

و الله انا مطاردك من منتدى لي منتدى[/align:9e96c54f08]

[align=justify:9e96c54f08]لقتني و الا لسع يا كرموش؟[/align:9e96c54f08]

http://www.rufaaeast.com/board/images/smiles/icon_lol.gifhttp://www.rufaaeast.com/board/images/smiles/icon_lol.gifhttp://www.rufaaeast.com/board/images/smiles/icon_lol.gif

.

[bakry Almahi]

:lol: :D :) :lol: :wink: :lol: :D :)
[glow=#FF3300:a42d6076e5][shadow=#FFFF00:a42d6076e5][highlight=#3333FF:a42d6076e5]ههههههههه هاي الله يجازي محنك يا فيفد الشفت [/highlight:a42d6076e5][/shadow:a42d6076e5][/glow:a42d6076e5]

[Nazar Hussien Babkir Frie]

اولا بعد الؤية البصرية ، وثانيها بعد المكالمات الهاتفية ، وثالثها بعد قرائتي المتنانية لما يخطه بنانك الفنان ، ولكنك بصراحة حيرتني عديـــــــــــــــــل العيونان الصغار بودنك في داهية ، اعمل حسابك الراجيك كتير وكتير ، بعدين بعد احتفائكم بي في جدة غير ، والله يافيفيد ومعاك صاحبك اوب نضارات داك عليكم الله تعالوا لينا في الرياض لانو والله نحن جدة غير بتفصمنا شئ كورنيش وشئ درة العروس وده كلو كوم وانتو كوم ، حسي عليكم الله بعد الكوبري اكان فكرنا في كورنيش رفاعة مالو خاصة وانو الكرو جنبنا وكمان مزروع وما عايز غير شوية بلاط واضاءة معانو ناسنا بيضو براهم وانت عارفهم يافيفيد ؟؟؟؟
شكيتك على الله بتاوقك مالك للناس بالطاقة دحين خشم الباب مالو ، وانت مادام مكسر ومحتت ما تعمل بكلام ود ابنعوف بت الجيران اولي رغما عن علمي بانك عازم على قطع البحر في رحلة اللا عودة .
كمان اضينتك ديل ماشاء الله عليهن حتي الكلام الدقاقة بتسعموا ، وكلامها صاح انت راقد حطب يعني نظرة وبسمة وبس بتوديك الاخرة عديــــــــــــــــــــــل ، دي بهلاويه اما ان كانت من الناس البيفصل من بينكم وبينهم فاصل مداري وحراري وجمالي كان وديناك الطائف، والطائف دي اسال منها صاحبك ابو نضارات !!! .
وغايتو بعد الشوفة منك خوفة ، وياناس المنتدي شدوا حليكم الزول بيقتل ليهو زول واخاف ان اكون اول الضحايا .
ولك مودتي
بالمناسبة الطفل المعجزة دهحامل توقيعك اوعي يكون ساكن البهلة ؟؟
ابوفاطمة
من رياض الخير

[بابكر عثمان مكى]

الأخ فيفيد ...

ضللنى الاسم عن شخصيتك القريبة للذاكرة ... حتى زارنى الاخ الغالى ابوبكر محترق القصيم الجمعة الفائتة ... فاستغربت شدما استغراب ... وتاكد ت الآن بلفظ (فيفيد الشفت) على انك ذلك الذى فى ذاكرتى اكثر من 15 عاما" ... ربما آخر مرة رايتك فيها عند المغارب حينما صفر الحكم بنهاية تمرين فى احد ملاعب رفاعة ... حيث شكرتنى على تمريراتى السحرية لك ومضيت . اظنك مضيت منذ حينها الى غيابات الجب.
احييك على سردك العجيب ... تماما" مثل مراوغتك للكرة فى ذلك الزمان ...

أهديك نص لأمل دنقل .. يشبه سرد قصتك تماما" ولكن لم يكن المسرح مغازلة تحت شجرة الحناء
وانما كان المسرح مساحة وطن ... كما يطغى علي النص الجانب الحزين .

ذات عام
زار الرئيس المؤتمن إحدى ولايات الوطن
وقال هاتو شكاواكم فى العلن
ولاتخشو احدا" فقد مضى
ذاك الزمن
فوجم الناس جميعهم
الا صاحبى حسن
فقام وقال
ياسيدى الرئيس اين الرغيف واللبن
واين تامين السكن واين من يشرى الدواء للفقير دونما ثمن
فقال السيد الرئيس
أحرق الله جسدى ياولدى
اكل هذا حاصل فى بلدى
جزاك الله خيرا" سوف ترى غدا
......
وبعد عام
زارنا السيد الرئيس
قال هاتو شكاواكم فى العلن ولاتخشو احدا" فقد مضى زاك الزمن
فوجم الناس جميعهم الا انا
فقمت وقلت
ياسيدى الرئيس
اين الرغيف واللبن
واين تامين السكن
واين من يشرى الدواء للفقير دونما ثمن
ثم عذرا" سيدى الرئيس
اين صاحبى حسن ؟؟؟؟؟

ونواصل ....

[عبدالله الشفيع]

والله يافيفيد انت رائع فى كل كتابتك واجد نفسى اقراء كلامك وانا فى اشد الانتبا واتمنى ان لا تنتهى القصة
رجاء لا تطيل القيبة وتحرمنا من هذا الابداع

[bakry Almahi]

[highlight=#FFFF00:63fbcc0cd0]الرائع فيفد الشفت لماذا اطلت الغيبه علينا ؟.
الله اخليك لينا.لكن عليك الله نحنا منتظرين الجديد بفارق الصبر[/highlight:63fbcc0cd0]

[vivid]

[align=justify]
جارنا الساكن قبالتنا . . راجل شبعان و تقيان خلاس . . التقا دا ينقط من وشو . . و عاجباهو روحي دي جنس عجب . . لامن مسمي روحو بلنجة . . دا كلو من التقا الفايت الحد . . و زولاً زي بلنجة دا انا عمري ما شفت . . طقتو و خبتتو ما منها قومة . . الكمدة بالرمدة . . و بلنجتو مريحة خلاس . . توديك الترب في رمشة عين . . لا فرفرة لا بحبتة و لا يا أمي ألحقيني . . البشوفو كلو بخلي ليهو السكة . . و أي واحد في حلتنا يكون مشيهو ملولو و الا مكعوج . . قطع شك يكون بلنجة دا هجمو و فشّا فيهو غبينتو . . دي حاجة ما دايرة ليها فهلوة و ما دايرة ليها كتير فهم . . هسع عيني باردة عليهو . . راس مالو . . عندو لوريين سفنجة . . و قلاب بتاع تراب على الزيرو . . و مراح بتاع غنم ما ليهو حد . . مستأمن عليهن عربجي من عرب الضهاري حقونا ديلك . . و بالنسبة لي جارنا الساكن يمين لينا . . عاد عندو حلات جسم . . جسمو يخزي العين . . مشيتو دي في الشارع مشية بتاعت قدلة و بخترة و شوفوني . . و كان انت راجل و ود رجال و عاجباك روحك . . و داير تغتس حجرك . . و تروح شربت موية . . أمشي اتشولق و قول ليهو السلام عليكم . . وحااااات أبوي تكون اتلومت في روحك شديد اللوم . . و بقوم يخت في بالو انك قلت ليهو انعل أبو أمك المطلوقة . . و يرصكع و يهرسك و يعجنك . . و تاني تكوس لي البحجزك منو ما تلقاهو . . عشان كدي لو غلتا و أديتو سلام الله . . شيل كرعينك فوق راسك و فز . . دا حلك الوحيد . . تاني ما شايف ليك أي حل تخارج بيهو روحك من الداهية دا. . و شدة هو مو مانع و جسمو وسيع و وهيط . . أها . . عين الشمش الواحدة دي يسدها لط . . و الدنيا دي ما فيها شيتاً عاجبو عيلا روحو و اسمو . . عشان كدي سمى نفسو فليتة . . و ديمة زعلان . . البشوفو كلو بصرصر ليهو وشيهو . . لا سبة لا سبيبة . . و ما في شيتاً بباريهو و عامل معاهو علاقة غرام عيلا الضبان اللخدر . . الضبان اللخدر دا عامل ليهو قاعدة انطلاق عسكرية فوق لي أطراف نخرينو . . و كل ساعة زمن يرفع شلوفتو الفوقانية و يهش بيها أسراب الضبان المكوم من فوق طرف نخرينو . . عيلا لكن بعد دا كلو أصلوا الضبان دا مو قاعد يهشو بي يدو . . بستكتر فيهو رفعة الليد . . الليد اللتيتة دي لاميها للبني آدمين . . حقارة كدي بس . . فليتة دا شغال عتالي . . لوري العيش و الأمباز عندو ذي شغل قزقزة . . بنهزن و يعتلن و هو بقرض ليهو في رغيفة طوطسي . . راس مالو في الدنيا . . خمسة حواشات و تركركين . . واحد مشغل فيهو راجل بتو الخيبان. . و التاني خاتيهو ازبير لليوم اللسود . . بالنسبة لي جارنا البي الشمال . . جسمو ما زي جيرانا التانيين . . جسمو زي جسمي دا كدي . . مسلوع و معصعص . . لكنو شفت و مفتح . . و عارف نفسو بعمل في شنو . . و كمان عينو حارة . . مسمى روحو دابي الليل . . لو طنطن ليك . . و حدر ليك بي طرف عيونو المقلبنات ديلك . . شيل على روحك الفاتحة . . و لو عندك وصية اخير ليك تنتكل فوق أقرب ضل يلاقيك و تكتب وصيتك . . الموت من الحياة مو مضمون . . و دابي الليل دا طنطنتو و كحلت عويناتو دي مو مضمونات برضو . . عيلا لكن هو راجل حريص . . و آخرو دا لو نقزتا و طمبرتا ما بديك ليهو كلو كلو . . و تعاملو كلو بالكاش البقلل النقاش . . شغال بياع لقيمات قدام مدرسة بنات ثانوي . . لكنو برضو عايش علي اسمو و شكلو . . و الحكاية دي وارة معاهو ور جد . . راس مال دابي الليل دا . . انو نايم ليهو فوق خمسة أرصدة بنكية . . و بعد دا كلو هو راجل خسيس خلاس . . أصلو ما بخليك تعرف رصيدو كم . . لكن انا الحاجة البعرفا . . انو المحافظ و عيالو كل خميس بجو يتعشى معاهو . . و الضحك بتاعهم يقول يا واحد . . المحافظ وكتين يكمل عشوتو و ضحكو يطلع من بيت دابي الليل دا و شايل ليهو سبت مليان نعم و طيبات . . لسة ما عرفت السبت دا فوقو شنو . . عيلا لكن قريب دا بعرف . . بالنسبة لي جارتنا الورانية . . دي مراة تخينة جنس تخونية . . و لتيتة جنس لتاتة . . شكلها مربع . . مقصاتا و مقانصا باينات في السهلة . . سمع أضاني دي بقول ليها بخيتة مجروس . . شغالة سبابية بتاعت طلح . . الضقل بتاع الطلح بتشيو بي يد واحدة . . و يدها التانية تبايع بيها لي زباينا . . جنها أكل و رمرمة . . قدر الواحد ما يجي ماشي بي عندها يلقى عندها ابو الشهاق . . أبو الشهاق دا يا كافي البلا اصو ما داير يفكها . . لو قلت ليها : ازييييك يا بخيتة مجروس . . تترّّعع في اللوال حتين تقول ليك : زي حال أمك الممسوخة يا ولدي . . عيلا لكن عشان اسمها دا . . حفلة عرس بتها جابو ليها كمال تربس . . اليوم داك رقصنا و انبسطنا و ادجدعنا جنس تجدع . . راس مالا بخيتة مجروس دي . . عندها بيت ناصية حدادي مدادي . . و ودت و ليداتا و بناتا لي اروبا عشان يتعلموا هناك . . و ولدا البكر اشترت ليهو حافلتين خط . . شغالات رفاعة الخرتوم . . عاد بعد دا نحنا نسوي شنو . . الناس ديل كلهم شبعانين و تريانيت بي اساميهم . . اليوم داك الحكاية دي عجبتني عجب بالحيل . . و حلفت بالتقطعتني حتة حتة عيلا اسمي روحي اسم فوقو فايدة . . لازمن أسمي روحي اسم زي اسامي جيرانا ديل . . هم احسن من في شنو؟ . . الفيني فيهم . . و نحنا بلا الدولار اب صلعة دا دايرين شنو . . و زمن ذي دا تاخد حاجتك و حاجة غيرك بي اسمك . . و الراجل اليومين ديل بدل يقيسوهو بي جيبو و بي تعليمو و نضميهو . . بقوا يقيسوهو بي اسمو . . و انا عشان نحيفوني و معصعص و ملحوس من لحم الدنيا دي . . ما فضل لي شيتاً أشبع بيهو و أمن بيهو مستقبل حياتي عيلا أقوم أسمي روحي اسم ضكران . . أقب بيهو لي وش الدنيا . . أصلو أنا ممرمط روحي فوق أم كم . . التعليم عمل لي شنو . . ضيع لي زمني بس . . و ضحك فوقي خلق الله . . كلها اسم من حرفين تلاتة . . يعرس لي و يأمن لي مستقبل أولادي . . هسع جيرانا الأربعة خيرهم باسط . . و أمنو مستقبل وليداتهم . . عيلا ناس بيتنا . . لسة يساسقوا وراء لقمة العيش . . و اليومين ديل الحالة صعبة . . و اسم فيفيد دا ما بأكلني عيش . . دا اسم برا جايب لي الجلا و الكلام البطال . . تاني ما جايب لي حاجة . . اخير لي أسمي روحي اسم يحميني من القيال و القال و طول اللسان . . انا من يوم الليلة دي أسمي تمساح الدميرة . . و بعد دا العاجبو عاجبو و الما عاجبو يقع فوق رقبتو . . و كع يكسرا . . لكن من يوم الليلة انا اسمي تمساح الدميرة . . الحاضر يكلم الغايب . . انا اسمي تمساح الدميرة . . قمت جريت ملصت قميصي و بنطلوني . . و لبست لي سروال دمورية و فلينة داخلية . . جبت لي عكاز غليييد مليان كراضم . . عيني الشمال اللكتا بشاغل بيها و بغمز بيها لي بنوت الثانوي ختيت فوقا حتة قطنة . . و لفيتها بي خرقة بتاعت قماش شقيتا من توب خالتي السعدية . . و فنقستا تحت صاج حبوبتي النعمة و كردت السكن اللسود بتاع الصاج بتاعها . . و رسمت لي شخيتين مايلات فوق ضهر جضومي و شخيتين تانين فوق سدري . . عضيلاتي ديلك ربطتهن بي دبارة . . و عنكشتا فوق الدبارة حجابين كان لقيتهم داك الليلة مرميات فوق كوشة . . الخلال بتاعي غزيتو فوق شعيراتي . . نان شنو . . لازم تمساح الدميرة يكون كدي . . شكل غير دا ما بجيب قروش . . هي القروش و الطرطيبة دي بتجي بالساهل؟ . . بدور أعرس و داير أضمن مستقبل مرتي . . و وليداتي ديل لمن أجيبهم يلقو ليهم بيت يبطعو فوقو برطيع العتان الشبعانة . . بيت يكون حدادي مدادي . . ذي بيت بخيتة مجروس . . قمت طلعتا في الشارع . . و دقيت سدري ستة مرات . . اتلفت يمين و اتلفت شمال . . لقيت لي كلبة ميتة . . ضارباها عربية . . و دمها يشخ . . و لحمها دا مشتت فوق الواطة . . قلت اول حاجة انا اتبنى موت الكلبة دي . . عشان الناس ديل يعرفو تمساح الدميرة دا شخسية مرعبة . . و طوالي سرخت في الناس القاعدة فوق لساتك العربات . . و الناس المتفنة فوق الواطة . . يا ناس هووووي . . يا ناس هوي . . كلبة إدريس الكِبة دي كتلتها أنا تمساح الدميرة . . و الداير يناقرني و يتفاصح معاي يطلع معاي لي الخور القدامنا دا . . الناس دي صننننننن صنت . . قعدوا يعاينو لي . . قلت خلاس . . الناس ديل شكلي و اسمي دا خوفن . . و تاني القال شافني بنيت بيتي جمب بيت المحافظ ما كضب . . و ختيبتي دي الليلة الله أداها . . حا تعرس ضو القبيلة . . هي ذاتها جهزت ليها اسم يليق بي مقامها . . انا البعرسا دي عيلا يكون اسمها يناسب اسمي . . لازم تناسب تمساح الدميرة . . عشان كدي ختيبتي دي عيلا أسميها البعاتية أم شنبات . . دقيقتين تلاتة كدي . . كدي كان أشوف ليك إدريس الكِبة شايل ليهو فلكابة في يدو العسرا . . و جاء جاري في اتجاهي . . كستا للبتحلني . . آخر حاجة سرخت فيهم . . هووووووي يا الجنون الراجل فيكم يلحقني . . قبلت و اديتهم ضهري و هاك يا جرية. . [/align:3b5ec634f7]

[الفاتح محمد شريف]

:lol:] الحبيب


تمساح الدميره الجراي
الحمد لله اني ما ود جيرانكم
لكن احلي شي انك اخ رائع وصديق كريم
امنياتي لك دوما بوافر الصحه والا بداع[/color]

[Nazar Hussien Babkir Frie]

لك الانحناءة والتجلة وانت تنثر عبيرك الفواح ، ولكني دائما كنت ومازلت مصرا على انو تماسيح الدميرة مننا نحن ناس فريق السناب وديم العوض ، وبعدين الليلة بحكليك حكاية عن الجماعة اياهم المصر انت تبقي زيهم ، مجموعة كانوا جلوسا في وسط حيهم يتانسون في المسطبة الشهيرة بوسط الحي حقهم ، فحينما التفتوا الجمتهم الدهشة لانو واحد من تماسيح ديم العوض اصر ان يمارس هواية السباحة عصرا بدري فاعتمل عكازه الشهير المضبب وانطلق سابحا يزرع شوارع الحي جيئة وذهابا فتوجسوا خيفة منه ولكنهم قالوا نعمل حق الاسلام ونقريه السلام ، متسائلين خير انشاء الله شقة غريبة يازول يافلان فالتفت اليهم قائلا الليلة انا كايس الختا ، وحاتك حينما اكمل حرف التاء والتفت ناحيتهم لم يجد الا طوب المسطبة .
والليلة جريتك دي ياهو ذاتها حقت الجماعة الذين يفصل بينكم وبينهم فاصل حراري ومداري وجمالي ، اما وانك تتشبه بتماسيح حلتنا والليلة انا ماشئ ليهم وبكلمهم ليك يافيفيد والجري منهم ما بحلك ، وبالمناسبة مندوبهم موجود في كيلو تمانية عضلاته تبش ، اعمل حسابك .
وبعدين يافيفيد الواطة دي انشاء الله تكون جنب الشارع الاحمر عشان تبيعها وتكمل بيها حق التلج ،هذا ان تبقي هو فقط ، وبعدين العمرة قربت والمرة دي الضيافة ثلاثية اناو فاطمة وامها(الحتة دي بتكون عجبت نزار الكرور )انا عارفه بيضحك ولكني اخاف عليه من الازمة ترجع تاني ، واللحم جهزوا وما تعتذروا لى الكورنيش فيو تفتيش والوقت متاخر فاهمين ولا اجيب حقي ناشف من ود الكرورولا بكلم ليكم ابوهبة .
ويلا كل قصة ونحن طيبين وسالمين وغانمين ومبسوطين .
ابوفاطمة

[عبدالله إبنعوف]

الرائع عثمان

لك الإحترام والتقدير

رائعة كسابقاتها ونطمع في المزيد ، بس يا أخوي السواي مو حداث ، امشي أعمل عملتك دي وشيل عكازك وأتحداك تجي فريق الرفاعيين ، بتعرف ناس القجج ، لكن يا حليلم أصبحوا في منتهى الوداعة بعد ما أخذت السنين حقها منهم ، طيب أعمل نفس العملة ، وزي ما قال ليك نزار الأول ، أمشي شق فريق السناب ، غايتو إلا يفكك منهم نزار دا ، لكن أنا متأكد " الكشيف " ما بلحقك ، يا أخوي وين المعتصم الأول ، مختفي الأيام دي .

يا نزار ربنا يجيبهم بالسلامة وإنشاء الله نشوفك ونشوفهم معاك في الحرم ، يا أخوي نحن جاهزين على طول مش لحمة الخروف جاهز ، وكمان الكورنيش عندنا هنا جاهز بس لكن هم جايين عمرة ، على العموم الجماعة إذا ما قاموا باللازم إنت قول عوك ،ونحن تحت الخدمة .

لكم التحية والتجلة

[Abdo Osman]

أخونا الفيفد
دوما مبدع
نتمى لك خالص الصحة والعافية
عشان نشوف كتير الابداع

[vivid]

:lol:] الحبيب


تمساح الدميره الجراي
الحمد لله اني ما ود جيرانكم
لكن احلي شي انك اخ رائع وصديق كريم
امنياتي لك دوما بوافر الصحه والا بداع[/color]

[align=justify:eafb2ee334]تسليم يا الفاتح[/align:eafb2ee334]

http://www.rufaaeast.com/board/images/smiles/icon_lol.gifhttp://www.rufaaeast.com/board/images/smiles/icon_lol.gifhttp://www.rufaaeast.com/board/images/smiles/icon_lol.gif

[align=justify:eafb2ee334]خايف تكون جاري يا الفاتح؟

قول لي انت ساكن وين خلينا نجي نزورك[/align:eafb2ee334]

http://www.rufaaeast.com/board/images/smiles/icon_lol.gifhttp://www.rufaaeast.com/board/images/smiles/icon_lol.gifhttp://www.rufaaeast.com/board/images/smiles/icon_lol.gif

[vivid]

[align=justify:4c45d45068]وبعدين العمرة قربت والمرة دي الضيافة ثلاثية اناو فاطمة وامها(الحتة دي بتكون عجبت نزار الكرور )ابوفاطمة[/align:4c45d45068]

[align=justify:4c45d45068]انت يا ود فريجون

ود الكرور دا الاخبار دي بتجيهو من وين

اخخخخخخخ نسيت هو ما ساكن في الخبر[/align:4c45d45068]

http://www.rufaaeast.com/board/images/smiles/icon_lol.gifhttp://www.rufaaeast.com/board/images/smiles/icon_lol.gifhttp://www.rufaaeast.com/board/images/smiles/icon_lol.gif
.

[vivid]

وأتحداك تجي فريق الرفاعيين ، بتعرف ناس القجج ، لكن يا حليلم أصبحوا في منتهى الوداعة بعد ما أخذت السنين حقها منهم ، طيب أعمل نفس العملة ، وزي ما قال ليك نزار الأول ، أمشي شق فريق السناب ، غايتو إلا يفكك منهم نزار دا ، لكم التحية والتجلة

[align=justify:e0b48bd708]يا أبوهبة

انت معاي و الا مع الخيانة

غايتو الليلة عرفنا حاجة[/align:e0b48bd708]

http://www.rufaaeast.com/board/images/smiles/icon_lol.gifhttp://www.rufaaeast.com/board/images/smiles/icon_lol.gifhttp://www.rufaaeast.com/board/images/smiles/icon_lol.gif
.

[vivid]

أخونا الفيفد
دوما مبدع
نتمى لك خالص الصحة والعافية
عشان نشوف كتير الابداع

[align=justify:9168780e26]العزيز عبده عثمان

الله يخليك على كلماتك الجميلة

يا اخوي انت وين

علي الحرام ساعلين منك[/align:9168780e26]

[bakry Almahi]

:lol: :P :lol: :P :o :) :D :lol: :wink: الله يخليك لينا وما احرمنا من كتاباتك

[معتصم سليمان بابكر]

تعرف ياتمساح الدميرة

الفى ضهروا الخبوب والطين

حكى لى واحد قبل كدى

وهو بيسكن ودنوباوى

انو صحى من النوم على اصوات الحرامى الحرااامى

طلع الشارع لقى الحسان كتاااااااااااار

قام جارى وراء الحرامى

الجماعة يافلان ارجع ارجع

زولك فى حالة ظهور لكسب اراضى جديدة

على حساب سكت الحرامى

الحرامى كان جارى على القماير

الحرامى اتلفت لقى صاحبنا جارى وراهو وحّدو

وقبل عليهو

اخونا جاء كاتح كتحان رهيب كل الفونى فتحت سواء

وجاء ليك قدام الحسان مارش

من اليوم داك سموهو الورل

بتعرفوا آآ التمساح؟؟

[ابوسجود]

vivid وين انت .....حاربتنا فى النيلين جابوا ليك وشاية ولاشنو

[vivid]

[align=justify:489839134b]كانت مكومة فوق راس حيطتهم . . شايلة ليها مشط و تمشط في شعرا . . و تكرش في رقبتا . . شافتني جاي من بعيد . . قعدت تغني : القطر الشالك انت انشاء الله يتكسر حتة حتة . . طنشتها و أصلو ما قلت ليها بطنطني بتقول في شنو . . قعت تكورك لي بي طول حسها . . يا فيييفيييد هوووووي يا فييييييفييييييد هوووووووي . . حبيبتك لولا رحلت الخرتووووم . . و قرقرقرقرقرقر قعدت تضحك . . وقفت في حتتي ديك ذي عسكري المرور . . اتكومتا و اتبومتا و غلبني البقولو . . قعدتا اعاين ليها فوق للحيطة . . شايفها جوز جوز . . بعد شوية عيوني زغلنن . . و وقعت رُب من طولي داك . . و عوووووووع طرشت طراش العندو مراريا . . عاينت ليها . . لقيتا لسه تقرقر مبسوطة . . و يدها شغالة كاروشة في رقبتا . . شلت لي درابة و فلعتها بيها . . تُف عليك و علي قدومك العفن دا يا عشوشة . . يا دباية اللدبخانة . . انشاء الله يرحلوك التجاني الماحي يا المسخوتة . . رجعت البيت و راسي ينتح زي التكنو في واحد قاعد يلعب صقرية جوة . . اتمدتا في سريري . . جاتني خالتي السعدية تدبا ذي حرامي الجداد . . قالت لي . . يا فيييفييييد . . سمعت الخبر؟ . . حبيبتك لولا ما رحلت الخرتووووم!!! . . الله يقطع لولا و سنين لولا . . انا البت دي الخلاني احبها شنو ؟ . . هي دي لولا و الا نانسي عجرم . . قمت من رقدتي ديك . . صنقرت علي قعاداتي . . و فتحت التلفزيون . . لقيت اللمين عبد الغفار . . قاعد يرقص . . و يعرض . . و يغني ذي السخيل الرايح . . ناس معزتنا ما بنريد غيرهم رحلو خلونا حليلهم . . الليلة الناس دي مالها معاي . . حتى السخيل الرايح دا الليلة ما داير يريحني . . قمت عشان اقفل التلفزيون . . عيلا لكن . . الغنية عجبتني تب . . قمت رجعت و رقدت علي صفحتي اليمين . . اللمين دا النصيحة لله راجل غناي . . و غناهو ما داير ليهو دق نحاس . . تووووووش بخش القلب . . و غنية ناس معزتنا دي بالذات بجضمها صاح . . من اليوم داك بقى البسعلني كلو عن فناني المفضل . . بقول ليهو . . اللمين عبد الغفار السخيل الرايح . . و غنيتي المفضلة . . ناس معزتنا الرحلو خلونا حقت السخيل الرايح . . جيرانا جابو اللمين دا لي عرس بتهم . . اليوم داك اتكيفت جنس كيف . . و قلت عيلا الحفلة دي أوزن ليها راسي السغيروني دا . . حفلة فيها اللمين دي تستاهل ليها وزنة راس . . لازمن نكون نجوم الحفلة . . قمت وزنت راسي ديك يا الوزنة . . و جيت الحفلة . . اولاً بالتبادي . . طلعت لي اللمين دا فوق راس المسرح . . و سلمت عليهو سلام معرفة . . الراجل اتخلع مني . . قلت ليهو . . الله يكسرك حتة حتة يا اللمين . . كان ما غنيت لينا ناس معزتنا الرحلو خلونا . . اللمين دا عاد راجل طيب خلاس . . قام غناها لي أول غنية . . كيفني كيف شديد خلاس مع وزنة الراس . . حبيبتي لولا دي حسيتا واقفة قدامي ذي جنا البط . . و قاعدا تتمرصع و تجبجب معاي . . ضهري في ضهرا . . و وشي قدام وشها . . تتنى قدام عويناتي . . اجي امسكها تزوق مني . . شكيتك علي الله يا لولا . . حتى في الحلم دا انتي بت ما ساهلة . . في نص الغنية وزنة الراس ظبطت . . و دمي فار . . و عروقي راسي انشحطن . . الراجل الجمبي متلفح ليهو بي شال . . قلعتو منو . . و كربت بيهو نصي . . أقرب عكاز لي جريتو . . و مشيت في نص الحفلة . . و قعت أعرض . . الراس موزون و الفنان غناي و الغنية سمحة . . و حبيبتي لولا دي شايفا تغني لي في سيف الفقر قلاّم . . و انا نطيطي كل ما ليهو ماشي زايد . . جاتني مراة عندها صلب كبير . . ظنيتني كيفتها بي عرضتي دي . . قالت لي يا فيييفيييد الرسول فوقك بدور أرقص معك . . قلت ليها ابعدي كدي و الا كدي يا ولية . . و احفظي دمك . . أبت تزح مني . . كوركت لي العريس . . قلت ليهو . . يا عريس الهنا . . المراة ام صلب دي ابعدوها لي من قدامي . . خلوني اتم عرضتي دي . . انت ذاتك يا عريس . . سوق عروسك الشكلوتا دي و أرقص معاها بعيد بعيد . . الجماعة خلوا لي الساحة فااااضية . . و أنا راسي موزون . . و الفنان غناي . . و الغنية سمحة . . و حبيبتي لولا شايفا قدام عيني . . اليوم داك نقزت زيييين . . مافي واحد قال بغم . . بعد الغنية انتهت مشيت لي السخيل الرايح . . قلت ليهو . . يا اللمين هووووي. . الللللله يديك العافية . . بسطنني و كيفتني جنس كيف ما يعلمبو عيلا الله . . و دا قدوم مني . . قمت اديتو قدوم فوق صلعتو . . اليوم التاني . . جريت السوق . . أي شريط لي اللمين عبد الغفار اشتريتو . . أي واحد من اصحابي سمعت عندو شريط اللمين عبد الغفار . . جريت فاوضتو و ساومتو فيهو . . كان رفض . . بسرقو منو . . ما عديت لي شهر من ريدتي لي اللمين الغناي دا . . كان تجيني عشوشة المسخوتة تكرش في رقبتا . . لقتني أسمع في غنية ناس معزتنا . . قالت لي . . يا فيييفيييد . . حبيبتك لوووولا عرسها واااااحد من الخرتووووم . . المرة دي عشوشة المسخوتة دي شفتها سبعة سبعة . . جاني طمام بطن من غنى اللمين . . . . و اللمين دا كرهتو و كجنتو سااااكت كدي . . غنية ناس معزتنا بقيت بكجنا و بكرها من دون الغنا . . جريت لميت شرايط اللمين الموهوم دا كلها . . وديتها السوق . . و فرشتها في سوق الله و اكبر . . و بعتها بالكيلو . . لكن بعد عرس حبيبتي لولا . . اكتشفت انو اللمين دا راجل عكليتة خلاس . . الواحد يسمعو في التلفزيون . . يغني في ناس معزتنا . . و يسمعو في الرادي . . يغني في ناس معزتنا الرحلو. . و يسمعو في اكشاك البارد . . برضو يغني في ناس معزتنا الرحلو . . في أي حتة ترخي أضانك تسمع غنية ناس معزتنا . . التقول الغنية دي ما عندو غيرها . . جيرانا المغفلين ديل جابهو تاني في طهور بنتهم السغيرونية . . التقول قاصدني بيهو . . اليوم داك رقدت في سريري . . و اتغتيت بالبطانية و ختيت المخدة فوق اضني . . قلت السخيل الرايح دا ما بدور أسمع غناهو . . اول غنية غناها . . ناس معزتنا . . غنية غنيتين . . قعد يتبسم لي ناس الطهور و قال ليهم . . و بنااااء على رغببببة الجمهوووووور . . نغني ليكم ناس معزتنا تااااااني كدي بس . . اللمين العوير غناها تاني . . في نص الحفلة تاني قال . . و هاااااكم دي كمان مني أنا . . غنى ناس معزتنا تاني مرة . . قعدت أضحك براي . . قلت اللمين دا تكون حبيبتو رحلت و طفشت منو و سافرت الخرتوم ذي حبيبتي لولا؟؟؟!!! [/align:489839134b]

[bakry Almahi]

:lol: :D :lol: :D 8) :wink: :lol: :D :o شكيت محنك علي الله

[صديق الاخضر]

الاخ العزيز : فيفد الشفت
بصراحه اجمل ماقرأت
قراءات متداخله روئع الكلمات جمعتيها بقالب المسرحيه واعني مسرحية الادب
لنرى شكوة الماضي منذ البدايه الى النهايه
اقرها مرات ثم مرات استوعبتها جل كلماتها فاعجبت بها
شكرا لك ولـــ اناملك على هذه الرائعه
تحياتي لك
ابداً صديق الاخضر
ابورزاز

[Abdo Osman]

بالتوفيق دوما

[الصادق عبدالله ضرار]

انت مسكون بالابداع والله بقرا فى القصه ماعارف شاعر انى جنب بيت ناس الجيلى ود النعير واخوهو

[vivid]

ــــــــــــــــــــــــــــــــــــــــــــــ

[ابو النيييييز]

..عليييييييييييييييييييك الله دي طشمه؟؟؟
من ما الله خلقك شفت ليك زول طاشم بعمل خط مستقيم

[Mutasim Obeid]

ايوه فى
قالوا الثعبان طشم مشى فى خط مستقيم
اوعى تفسر كلامى انو الكاتب ثعبان

معتصم عبيد

[Nazar Hussien Babkir Frie]

تعرف ياابو النيز اصلو الود فيفيد بهلاوي وزمان كانو جماعة منهم بيصفقوا لمن الشمس تغيب ، وكمان في حاجة تانية والعهدة على الرواي انو واحد بلدياتنا سوداني طشم طشمة حبيبك ومشي عديل للقسم في منفوحة وقف قدام الملازم في الكاونتر وقال ليهو عليك الله( ان طشمان شديد وداير ام فتت وشطة حارة دحين دي مازي خط فيفيد المستقيم )وواحد تاني وقف الدورية واستغرب لمن نزل السواق وفتح ليهو الباب وامره بالركوب وبعد ما اتحركوا سمع صوت السيرنة وقال للسائق ادعس البنزين شديد قبال ناس الدورية الحقونا وقد كان ، وبعد دا تقول لي خط مستقيم ؟؟!!!
ابوفاطمة

[صديق الاخضر]

فيفيد كده قول لى الواحد يكتب شنو فى حركة دى

انت عارف انا من امس بعاين فى الصوره وبحاول اكتب بس ما لقيت حروف تعبر

واكتفى بهذه العلامه ؟!


ابداً صديق الاخضر
ابورزاز

[عبدالله إبنعوف]

تعرفوا يالأخوان الفوق الطشمة دي عارفين سرها ثلاثة بس فيفد ومعتصم سليمان و أخوكم ، صدقوا إنها أحلى طشمة أخونا فيفد مقلبكم كلكم بالخط المستقيم دا ، هو وعد بأنو الطشمة دي تستمر لحدي ما تلحقوه إنت وبرضو جاييكم بعدين .

طبعاً طشمة فيفد زي ما قال نزار خط مستقيم ويا معتصم عبيد فيفد ما أصلوا ثعبان لكن بتاع الرملة يلدغ الناس ويدخل تحت الرملة .

وبعدين يا نزار الأول كلامك صاح فعلاً ( زمان ) ناس القبتاب والبهلة بصفقوا لما الشمس تغيب وبرضو لما الشمس تشرق ، والكلام دا على مسئولية واحد أخونا قضى في السعودية أكثر من عشرين سنة لكن غادرنا للسودان قبل كم شهر كدا ، عرفتوه ؟!!!!

وجاييكم فيفد بعدين

[معتصم سليمان بابكر]

ههههههههههههههههههههههههههههه
هههههههههههههههههههههههههههه
ههههههههههههههههههههههههههه

ياجماعة دقيقة بس انتو عارفين

عند جهينه الخبر اليقين . . . . .

المشكلة انو جهينه دا حلفوهو بالطلاق اول

حاجة (طبعا فيفيد خارج دائرة ناس الطلاق حتى الان)

اها قام اول حاجة قال لجهينه شوف يا جهينه انا داير اوريك

سر شمارو حارقنى لكن خايف من زولين بس . . .

النزارين ديل (باكات واحد شمال والتانى يمين)

اها وانا عارف علاقتك معاهم قوية . . . .

نزار الاول من وقتو الصغيير . . . .

ونزار التانى لامن كبر . .

اها اول حاجة احلف لى بالطلاق انك ماتفتوا ..

جهينة عشان مايخسر الشمار الطازج وحااااااااااااااااار

قام دفع الثمن وحلف بالطلاق مايفتوا .....

[الفاتح محمد شريف]

:lol: :lol: :lol: :lol: :lol:


اديك الفي عافيه يا فيفد
والله بضحك ذي المجنون واتلفتع خائف تجيني درابه طايره
علي حسب الفي راسك

[vivid]

[align=justify:9009b4fdc6]

قلت ليكم طشمة

ما صدقتوني[/align:9009b4fdc6]


http://www.23skidoo.org/main-drunkard.GIF

http://www.rufaaeast.com/board/images/smiles/icon_lol.gifhttp://www.rufaaeast.com/board/images/smiles/icon_lol.gifhttp://www.rufaaeast.com/board/images/smiles/icon_lol.gif

[عبد العظيم الشادلى محمد]

اولا سلام للغاليين تانيا يا شباب بالنسبه لفريق البهله والقبتاب هل تعلمو انهم لاس فيجاس رفاعه كان معروف عنهما بالنسبه لنا انهما اكبر مكان للعب البلى ( لين ولا طرطاره) والحقيقه انهم كانو لعابين وقمرتيه فى البلى درجه اولى يعنى نحنا كنا فى فريق الدبور وكان عندك بلى وعاوز يخرتو منك امشى لكازينوهات القبتاب او البهله وتاكد انك راجع ومخروت
ما قصدت انهم كانوا يرحبون بك ايما ترحيب وعينهم على ما فى يدك من بلى
القصد الثانى اثاره الزكريات للاخوة من فى جيلنا وطبعا اخوكم مكرم ارجو ان يكون بخير

كان لعاب درجه اولى اما جيرانهم الفادنيه فلم يكن لهم حسب علمى اهتمامات بالبلى
ارجو ان يعدرنى الاخوه فقد كتبت ماكتب وانا اعيد بعض زكرياتى اد استفزها ما كنت اقراه وطبعا حتى ونحن كبار كانت لنا زكريات فى فريق البهله انا والصديق سيف الزبير له منى التحيه
اخيرا سؤال ........زمادا تم بشأن الكبرررررررررررررررررررررررى سوأل لمن عنده الخبر اليقين واكيد اخونا الادمن ابو هبه عسى ربى يسعده ويهنيه

[معتصم سليمان بابكر]

عبدالعظيم الشاذلى هوى

المصطلحات الانت اوردتها دى ورطتك والله

يا اخى الشباب ديل ماعارفينها وهسع البلى بقى

ديجيتال وبلعبوهو بالرموت كنترول وقالوا ناس

الحى البريطانى ويرليس كمان عدييييييييييييل

لاريموت ولا حاجة شايلناها فى اليد ولعبوا زاتو

مابقى فى الشوارع قالوا كل زول فى غرفتو ويلعب

مع التانى. . .

اها اخخخخخوى الاكبر منى ب 3 سنين ناس

(لين وطرطاره ديل ) شوف ليهم سحارة لمهم

فيها .. .. ..

وعشان اكون منصف السحارة دى يا جماعة كانت بتمثل

فى يوم من الايام الحافلة الكانت فضيه وهسع بقت شنو

ما عارف والله لكن اعتقد مازالت حافلة

[عبد العظيم الشادلى محمد]

اخوى جدا ابو نظارات وطبعا هى دليل قاطع لامتدادات الزمن لديكم
اولا السحاره دى انا قايلها هى عجوز شمطاء تخطف الصبايا وتاكل الناس وما قايل انها كالحافله ودى اثبات لى بقدومى لهدا الكون بعد ان من الله عليكم بالختان من ود منقاش عليه الرحمه كما سمعنا عنه واحسب بالدارجى كم سنه تانيا دفعتى موجوده اولهم صديقيك جدا محمد الزبير جاد الرب ومجدى محجوب عسى ان يكونا بخير والاخ نزار العسل كان معانا بس الصراحه لان والده كان استادا فى المدرسه فهو كان يحضر معنا الدروس يعنى اعتراف منى انه اصغر منى بسنه والاولاد الى تقول عنهم انهم لا يعرفون البلى اكيد انه مر عليهم بس بمصطلح تانى نحن لم نعهده وانا لى طلب انك ولانك اكبر عمرا وعقلا واقدم تاريخا ان تحكى لهم حجوتين تلاته من اللى انت تعرفهم طبعا هم عندهم اسمها قصه ونحنا حجوه (لاتشوفها عجوه) وتلخبطنا واياك....... مع انى بسوقلك العدر هى اثار الزمن المضى ....وربى يطول ويبارك فى عمرك قول امين
اها تانى وين منى؟ نحنا كان بحكو لنا عن جيلكم ولان ا لسنوات زمان كانت تمر ببط شديد عكس سنين هده الايام فلدلك كنا نراها بعيده ( لا يفرحك كلامى وتقول بينا اثنين تلاته ) انا اكاد اجزم انه عقد او اقل طبعا ح تحتج بس ما علينا من احتجاجك سنثبت دلك بالدلائل والبراهين وانا ح اقول لناس المنتدى من جيلى ومن دفعتى وهم سيعلمون وانت قل من جيلك والمقارنه ستتم والحكم هم طبعا الشغله فى الاول والاخر اننا ندكر اخواننا وزملاءنا برفاعه واكيد لكل واحد منا فى المنتدى اخ او قريب وهدا هو المقصد الاساسى من دكر اسماء الدفعه
يلا ابدأ انا اولهم ابوبكر الريح وده للود عادل الريح للتأكد.......... الحاج وراق ...عثمان حاج العوض .عمر حسن عثمان.. الاخ على الخليفه فتت...سامى شفيق..على عبدالله داؤود..عبدو البرميل وده لناس البهله.....محمد صالح بتاع الفواكه .برضو لناس البهله..مرغنى كيكه..وعبود الصادق ود لناس فريق الدومه والاخ الرائع جدا محمد سعد عمسيب......
الباقى ح اقولو لك فى وقت اخر ويلا يا نا س المنتدى ورونا وشاركونا طبعا اكيد فى ناس بتتأخر فى الدراسه ويلحقها من هو اصغر منها ولكننا لمن زكرت من اول سنه الى ان افترقنا فى الثانويه العامه وبصراحه نحنا ما حضرنا الكرانك ولا كانت دراستنا بالجلابييه (جبر )وكنا تانى دفعه فى السلم التعليمى
اها قلت ايه ؟ الركن شايفه امتلأ بالناس شد حيلك اخوى معتصم انا اشهرت لك السلاح .والله يعينك
لك الود اخى وتحياتى للاخوان مصطفى وعمر وقول لمصطفى البنات عجزنك وكبنك ايضا التحيه موصوله لزوجته وهى على ما اعتقد بنت دفعه لهم منى التحيه

[عاطف الحاج محمد حسين]

تعرف يا فيفيد انا مما سجلت فى المنتدى كل ما اقراء كلامك اتحير واقول الجنا ده بجيب الكلام ده من وين تراها طشة فاكيها فينا، لكن والله ام خط مستقيم اريتها طشة حبيبك

[عبد العظيم الشادلى محمد]

وانا اقول..............!!!!!!!!!!!!!!!!!!!!1 اتاريك طشمنجى لانو يا تيفه الطشه غير الطشمه ف..طش يطش طشيشا فهو طاش اى انه كما جاء فى لسان العربان انه ابتعد بعيدا دون هدايه ........ وطشم يطشم طشما فهو طاشم .اى كما جاء بلسانهم انها سكره ينى .يمش ويغنى هى منتهى (الكى) يقول لك فلان كاوى صاح اى انها دون الطشمه .
لطفا راجع فهرس الجماعه فى جلب البتاعه بس مو من حوش البقر او فريق حمدين او ضاحيتنا الجنوشرقيه على اطراف مدينتنا مدينه الضباب او نقول الكتاحه
لك حبى والقصد الترويح عن النفس

[معتصم سليمان بابكر]

عبدالعظيم الشاذلى ازيييييييك

مجدى محجوب شدييييد ولضيض وزايد شنا . .
ود الزبير بقى خرتوووومى . . . وسر تجار
بعدين كان بالدفعة يا حبيب ناس هناى ديلك
والله قدرنا . . . .
عبدالعظيم الشاذلى لامن انتوا بتخشوا السينما نحن السوق فى تلتلة
غايتو البعرفو انا انو ناس ميرغنى كيكة ديل وراى فى المدرسة بى سنة واحدة اظنوا
وكدى بينى وبينك كم سنة كانت عند احسا اقصد ( أعد)

لك الود كما يجب ان يكون والله.....

[Abdo Osman]

ربنا يديك العافية
وكتير من الابداع

[Nazar Hussien Babkir Frie]

تعرفوا يا شباب اروع ما في طشمة فيفيد دي انها ارجعت لينا الود عظمة وارد حي الدبور المستمسك بدوحة قطر قطر رفقة الود اللخدر ، وبعدين وبما انه قد ذكرني في مداخلته الليلة الى شيل شيلته لانو انا من زمان داير الفرصة دي ، بمانو انا كنت مستمع في المدرسة ولكني بستحضر كل الاشياء ودي مصيبتي والليلة حتبقي مصيبة الود عظمة لانو الليلة انا باخد راحتي لاني من الفئة العمرية الادني منو ومن صاحبو المعتصم بن سليمان منافس تيمان امدرمان .
وبما انو شهادتي شهادة للتاريخ وحتكون موثقة اثيريا ، وبما انو الود عظمة بيكبرني سنا ولكن الكتوف اتلاحقت ، فمما هو مدون في الذاكرة فالود عظمة على قصر قامته حينها كان ولد ملعون وكان من رواد الكنار لجلب الاقصاب السكرية ومعاكسة البنية السمهريةودي ماركة مسجلة حصريا للود عظمة واسالو بنشات جامعة القاهرة الفرع منو وكمان اسالوا بتاعين بوتيكات السوق الشعبي منو ومن عمايلو هو رفيقه مولانا الزهاوي ايام زمان ؟؟ مما كان يعرضه للضرب من قبل خاله استاذ عباس وخاله ايضا استاذ على عمر ، يعني كل يوم مجلود والمغالطني اسال سعادة العقيد ولا العميد شرطة الهادي مجدوب الطاهر ولا حامي حقوق الانسان الود سمعة بن التاج المصنف بالخبير الفني لارتياد الحفلات والليالي الملاح ، وبماانه قد ذكر الاخ البودي قارد حقي محمد الزبير جاد الرب ، ودا كان مهمته ارجاعي الى المنزل يوميا بعد انتهاء اليوم الدراسي وذلك نتاج علاقة اسرية ربطت بين والدينا عليهم رحمة الله ، ودي معلومة الليلة المعتصم بيخسر مية ريال عشان اوصلها للودسر تجار رياض الخرتوم ، الحاتل في اوماك محمد الزبير .وبعدين ياعظمة في ناس قلت دفعتك وانا بحلف بالتقطعني لا دفعتك ولا حاجة وكان على دفعة الجامعة انا وحاتك دفعتي في الجامعة استاذ الشاذلي الاغبش وقدامي بسنتين بس خالك عثمان ابورجيلة ؟؟!!!
وكدي النعرج على الود ابونضارات داك ، ودا حكايتو معاي حكاية يعني لمن ركب الطيارات وحاتكم جملة انا الحصاحيصا بعيني ما شفتها ، وكان كنت ناوي امشيها لازم تكون برفقة مامونة يعني امك وابوك وبس ، الا انه والحق يقال كان صنوي ورفيقي في دروب المحبة وعلمني كيفية ان تحب بصدق وان تكره بصدق ودا كاتبو هو في تعريفو وقد استفدت منه في الحالتين ، وكمان علمني كيفية الاناقة وعشق البنات القيافة ودي حكاية طويلة طولية اطول مني انا حاليا .
وياخوان دي البداية والحكاية طويلة ، وبعدما ابتدائنا رحلة كشف الاسرار ، بطلب من الادمن منع الاتصالات الهاتفية وكذلك مراقبة الرسائل الخاصة الواردة لنا في المسنجر ، ومن الان الخائف يرفع يدو ، وانا بكتب والله ما مسؤول لانو الايامدي بتنبابني لحظات من الجنون المتقطع ودي براها بتحمل لينا البراءة ان قدمنا لاي محاكمةلانها من موانع المسئولية ؟؟ ، وبما انو الود عظمة من رواد واهل القانون وكمان تعلم اسرار التحقيقات لدرجة انه بتفوق حاليا على اعتي متحري في السودان فالقضية مضمونة مضمونة مضمونة والجلسة الاولي بعد رمضان لانو الجماعة قربوا يجوا يجوا يجوا ؟؟؟!!!
ويلا يااخونا اوعي تقولولي طشمة فيفيد دي شاريها من وين من الجنوبية ولا من مدينة ولا يكون جايبها معاهو من تمبول والله انا ما مسوؤل ؟؟!!ولحدي ما الاتنين اردوا انا ساكت وبعاين بس وبس ؟؟؟!!!
وابتدا المشوار وابتدا المشوار لكشف الاسرار وسبر الاغوار .
ويلا تصوموا وتفطروا على خير وبعد العيد موعدنا ؟؟!!!
ابوفاطمة

[معتصم سليمان بابكر]

الليلة ياعبد العظيم الشاذلى شيل شيلتك
انا الكبر ماداسيهو ولا ناكرو المشكلة انت

اها جاك واحد من تلامذتى الشاطرييييييييييييييييييييين

انعدل ليهو ساكت....................

ونزار دا الظاهر مخطط الانقلاب مظبووووووووووووووووووط

ماشايفو اول حاجة قطع وسائل الاتصال

والليلة وقعت وما سميت يا عبدالعظيم

وشكلوا حا يطلع ليك حكاية الدردقة الزمااااااااااااااااان

اوع تكون نسيتها

[عبد العظيم الشادلى محمد]

بدايه يبدو ان الشفت نزار الرائع استعدى هيكل (انا) ويانا بدينا طق طق طق فتحت الجلسه واول ما ابدى به هو ان ابعد عنى الاخ نزار لانه اصبح شاهد عدائى وده اعتقد فى عرف المحاكم موجود وبيعرفه
الثانى ان القرائن التى ساقها الاستاد نزار قرائن غير قاطعه ويمكن اثبات ضدها ..صحيح انو الشادلى الاغبش دفعته وابو رجيله ........نعم.. ونعم الا ان هده حالات شاده وغيرها كثير فهما كانا طموحين جدا لم يرضيا بما كانا فيه ومن ثم واصلا دراستهما وللعلم خالى ابو رجيله كان احد طلاب حنتوب ولاسباب تركها وعمل مدرسا فى لطفى وبعد13سنه عاد وامتحن اما دفعتى واولهم محمد الزبير ( البودى قارد بتاعه) كنا انا وهو وهشام البلى .طلاب فى خلوة الفكى البشير بفريق الفادنيه ومنها ترقينا الى مدرسه رفاعه الشماليه لما كان الوالد عليه الرحمه استادا بها ومعه الامين الجزولى ومحمود بشير الطالب وغيرهم وهنا بدأت سنين عمرى الورديه....هى ما ورديه ورديه بس لون غريب!!!!!

طبعا انا لن القى بكل كنانتى ولكن بلم كل اصابعى وافتحها باتجاهك ولسان حالى يقول لو ماوريييييييتك ,,,,,,,
على كل مبروك على الجميع قدوم الشهر الكريم وربنا يوصل الجماعه بخير يا نزار ,,,,,, ويا نزار ..او انس الجيلى بسأل من دكتور وليد الجيلى سعيد ؟ وده دفعه يا نزار هو وانس... ارجو ان يكون بخير وزاد كم كيلو كده يعنى لو وصل 32اكون كويس.. تحياتى له وللاسره الكريمه

[معتصم سليمان بابكر]

[align=justify:7fc8acf52a]
يا فيفيد لولا

سمعنا جبت ليها وليد

اها شد حيلك[/align:7fc8acf52a]



http://www.rufaaeast.com/board/images/smiles/icon_lol.gifhttp://www.rufaaeast.com/board/images/smiles/icon_lol.gifhttp://www.rufaaeast.com/board/images/smiles/icon_lol.gif

[vivid]

[align=justify:ddbc28e1b1]
الأخوان

بكري الماحي

صديق اللخدر

الصادق اللخدر

عبده عثمان

الفاتح

معتصم اب نضارات

اشكركم جزيل الشكر على المرور السريع و إليكم اهدي[/align:ddbc28e1b1]



[ram:ddbc28e1b1]http://www.sudanese.net/index.php?act=Attach&type=post&id=2557[/ram:ddbc28e1b1]

[vivid]

[align=justify:c0133d1e73]
ما من عوايدي السهر بعد حداشر . . بس امس ناس النيل اللزرق الله يجازيهم . . ساهروا بي جنس سهر . . انشاء الله السهر اللقدد نظرن . . و يظهر فيهن في رمضان دا . . سهرتن امس كانت مع سعد و نسرين . . في زمتي لو السهرة دي بقت علي سعد كان نمت من بدري . . عارف الفيهو و العليهو . . غير الضحك ما بخبر حاجة تانية . . لكن اسوي شنو في نسرين دي . . هي البتخليني اساهر الليالي . . وحااات الله لو ما نسرين دي كنت من بدر ادمدمتا و نمتا . . لكن النصيحة لله بعد ضحكو الكتير دا سعد دا شكلو جاي مع الديكور بتاع نسرين . . و نسرين دي التوب البنفسجي خايل فوقا . . انا لو مخرج تاني غير بنفسجي ما بلبسا اي شيتا تاني . . غايتو هي كافة لينا العين . . مزيعتنا كلهن اخير عدمن . . الواحدة وشها زي الركبة . . و شلاليفن التقول جمل البطانة . . كلهن شغالات بالواسطات . . و بعد دا غير الفلهمة و طول اللسان ما بعرفن شي . . الواحدة فيهن تقعد ليها مع ضيف تكتلو بالمغسة . . ما تخليهو يتكلم كلمة تنط ليهو في حلقومو زي العشراقة . . لكن نسرين دي هي الفيهن . . هي الكافة لينا العين . . و هي البتخليني اتابع تلفزيون النيل اللزرق . .

لكن بعد سماحتا امس نسرين دي حيرتني جنس حيرة ما يعلم بيها عيلا الله . . امس كانن كرعينا مغبشات . . استعجبت و استنكرت الحكاية دي . . انتكيت علي صفحتي اليمين . . و قلت تكون البت دي خافجة ليها طين و الا شنو . . البت دي اهلها قاعدين يخلوها تحوم بي كرعيها و الا شنو . . ما من عوايدا تجي شكلها كدي . . لكن تاني قلت طين شنو و خرا شنو البتعفصو نسرين . . دي تمشي علي العجين و ما تلخبطو . . غيرت رقدتي و رقدتا علي صفحتي الشمال . . و رميت غبشت كرعينا ديل فوق الشتا . . قلت يمكن الشتا نزل في السودان . . باقي الشتا دا قاعد يبهدل بنوت السودان جنس بهدلة . . يخلي الواحدة زي الفول المدمس . . و قمت لمتا ناس النيل الازرق ديل شديد اللوم . . بنية حلوة زي دي كيف يخلوها تخفج ليها طين . . العربات ديل بسون فوق شنو . . انتو حسدنها و الا شنو . . الغبشة الفوق كرعينا دا من شنو . . و لي شنو تخلوها تطلع في الكاميرة و كرعينة زرق زي الزراق دا . . السهرة كلها تحشر و تلملم في كرعينا تحت الكرسي . . خجلتني مع نفسي . .

لمن قلبي اكلني علي ناس التلفزيون وديت عمايلها دي لي جزمتا . . قلت ممكن جزمتا مكطوعة . . بس الجزمة شديدة و ما فيها جنس عوجة . . خلاص دي الحسادة . . في زمتي ناس النيل اللزرق ديل حسّاد . . حسّاد مع سبق الاصرار و الترصد . .

سعد العوير قاعد جمبها يقرقر سااااكت مو جايب خبر . . البت تلملم في كرعيها و هو يضحك ضحك الجن . . السهرة كلها يضحك و يقرقر . . مسكتو ام فريحانة . . جضيماتو من الضحك و القرقرة اتنفخن زي اللقيمي . . خفت عليهن و قلت يارب يسكت . . جضيماتو ديل يقومن يطرشقن و تاني نسرين دي يجي يقعد جمبها بعاتي يحميني مشاهدة النيل اللزرق . . و امس من دون الايام استعجبت من ضحكو الكتير . . كل ما ليهو ضحكو ماشي زايد . . الحكاية فوقا إنّ . . و قلت الكرسي القاعد فوقو دا يكون في واحد من ناس التلفزيون ديل خاتي لي فوقو شيئ عشان يكلكلو بي تحت؟؟؟ . . يكلكلو في تلاجتو . . نان ضحك زي دا ما لاقاني . . ضحك و معاهو ململة . . شيئ مو طبيعي . . و انا قدر ما دققت نظري عشان اشوف الكرسي دا تحتو فوقو شنو . . بس ما عرفت . . و كنت مستني متين السهرة تنتهي عشان سعد دا يقوم من الكرسي . . و اعرف سر الكرسي دا شنو . . لكن ناس النيل اللزرق الحساد قطعوا السهرة قبل سعد ما يقوم من الكرسي . . غايتو يا ناس النيل اللزرق الحسادة بتجيبوها عينك عينك و لا بتختشوا . . كدي الننتظر السهرة الجاية . . النشوف غبشة نسرين و تلاجة سعد حا يحصل فيهن شنو تاني . . غايتو الواحد نظرو ضعف من كترة مراقبة خلق الله.[/align:c0133d1e73]

[razaz]

:lol: اولا يا فيفد رمضان كريم وكل رمضان وانت طيب
والله العظيم يا فيفد بالغت عديل فى موضوع غبشة نسرين وتلاجة سعد وخليتنى اضحك
واقول صاح ليه كدة والمعروف عن ناس النيل الازرق ديل النظافة والوسامة والاناقة
والقيافة يمكن يافيفد عشان رمضان؟؟؟؟؟؟؟؟؟عموما راجياك لو عرفت حاجة تحدثنى
ورمضان كريم

[Nazar Hussien Babkir Frie]

المبدع الود فدفودي ،قادر الله عليك وعلى عيوناتك الصغيرونات ديل والله يجازي محنك ، وبالله عليك شفت عبشة نسرين دي كيف ، لانو انا عارف انو فى ناس كتار اشتركوا في القناة عشان اشوفو البت نسرين دي وبس ، وبعدين جنس حسادتك دي ذكرتني واحد زيك اظنو برضو عندو قرايب في البهلة كتب انو البت نسرين دي حقت النيل الازرق عبارة (سرويس منقة بس) مختوت داخل الاستديو بعني زي بت المهندس بتاعت تلفزيزن امدرمان زمان يعني سماحة جمل الطين ساكت ، ودي والله حسادة عديل كدا ، يعني البت دي ما عندها غير بعض المداخلات البسيطة لانو البرنامج بيقوم اساسا على مقدارات الود الضاحك سعد الفن زي الطيب عبد الماجد زمان مع بت المهندس .
وبعدين انت يافدفودي اكان قعدوك جنبها علا نوديك الطندب عشان يعزمو ليك وتعود سالم وغانم ، لانو والله يافدفودي السماحة دي بتعمل ليك حمي وبتخليك تهضرب وبتخلني اطالب بنقلك للاسبتالية بتاعت رفاعة التي كانت ، وبعدين ياخي العيونات ديل حيرني عديل شافن غبشة الكرعين كيف مع انو الناس بتركز على الوجنتين وعلى حنة الاصابعين ولكنك دائما بتفوت الكبار والقدرك ،وبعدين ياخي الود سعد الفن بقابلها صباح ومساء وما عايزو يضحك كدي قولو الما بخليوه يضحك شنو اكان قاعدة جنبو سرويس المنقة ذاتها .
وعليك الله يافدفودي خليك مع ناس سلافة القيافة وديك البت المسخوته ام نخرين سايلة مالك والبنات السمحات شديد ، وبعدين يافدفودي والله في واحد صاحبي بيسجل اي حلقة بتشارك فيها سرويس المنقة لدرجة ان ادمن مشاهدتها ودا انا كلمتو قال بشتيك لناس حقوق الانسان وارد تلفزيون السودان واعمل حسابك انت مسافر وانا خايف الجماعة انتظروك في المطار وبعدين حق الريحة الناقص ليك دا تاني ما بتم وحتي ترجع لينا وحتقعد تتفكر وتعاين للناس السمحين وتبكي بس .
ابوفاطمة

[vivid]

[align=justify:93b6235adf]
امس جاتني وجعة . . وجعة شديدة خلاس في بطني . . البطن منها و ليها جنّت . . تتنفخ و تنفشا و تاني تتنفخ . . طالع نازل . . كست لي هبوب ساااكت تخفف الوجيعة دي ما لقيتا . . قايتو الدنيا لمن تعاكس، تصاقر الواحد في بطنو . . وكت تتنفخت تبقى قدر القربة . . اقعد احوش فيها بي يديني الاتنين. . و افك ليها زرار القميص عشان تلقى راحتا . . بس الوجيعة ما ابت تخف.

وكت غلبني البسويهو اتسولبت ليها عريان عيلا بي لباسي . . و قعدت ادردق بالواطة . . و اعضعض في المخدة . . اللباس ذاتو وكت ضايقني فكرت اقلعو و اجدعو بالشباك للبنغالة الجمبنا . . اسوي بيهو شنو اللباس . . هو دا وكت لباس!!! . . بس نعلت ابليس . . و قلت الوجعة و لا الفضيحة . . باقي الفضيحة في السعودية فيها ترحيل نهائي . . و لو فهموك غلط فيها قص رقبة . . في شان كدي قلت اخلي لباسي في حتتو و اصحي صاحبي مراد . .

اتلفت لي مراد . . لقيتو نايم مبسووووط . . تورتو و نعنعتو و قطعت ليهو نومتو . . قلت ليهو يا مراد . . بطتني دايرة تنقدة ورحكاكا وديني المستشفى . . مراد قام من نومو زعلان . . لبسني هديماتي ديك و درجّني و تكّلني لي عند باب المستشفى . . دخلوني لي دكتور باكستاني . . وشو قدر الدلوكة . . من شافني زعل و قعد يطنطن . . الظاهر شكلي دا ما عجبو . . قال لي الممرضة بدون ما يفحصني قال ليها . . اديلو حقنة . .

انا النصيحة لله زعلت من كلام الدكتور دا . . كنت داير اقول ليهو . . يا دكتور انا ما بتاع حقن . . و انا بخاف من الحقن . . عليك الله اصرف لي حبوب . . لكن وكت شفت الممرضة الدايرة تديني الحقنة حلوة قررت اني آخد الحقنة . . قمت كوركت ليها و انا ماسك بطني . . تعالي يا اخت . . الدكتور قال ليك اديني حقنة بتاعت وجعة . . قامت جات وقفت جمبي . . و هي شايلة الحقنة . . وكت وقفت جمبي الوجعة خفت مني . . و اتمنيت يجيبو لنا كرسيين واحد لي و التاني ليها. . و نقعد نطق الحنك و نفكر في مستقبلنا الراجينا و اولادنا الجايين . .

وكت شفتها قعدت تعبي لي في حقنة الوجعة، رقدت ليها في السرير سريع سريع . . قلت اسهل ليها مهمتا . . قامت اتخلعت و قالت لي . . ويش بك يا زول . . وقف حيلك . . قمت مخلوع زي الطقتني عقرب و وقفت ليها علي حيلي . . و قلت ليها : نحنا في السودان بطعنونا الحقن كدي . .

أمانة في زمتي الممرضة دي طعنتني الحقنة و انا واقف علي حيلي زي عمود النور . . و وحااات ابوي الحقنة دي لا شعرت بيها و لا حاجة . . الكمدة بالرمدة . . كست لي الوجعة فوق تحت ما لقيتا . .

اتزكرت بت العباسية الحاقدة ادتني حقنة زماااان في مستشفى ام درمان كانت عندي مراريا . . يدينا كانن مليانات عروق . . و عضلاتا يا رحمن يا رحيم . . قالت لي : ارقد في السرير . . قلت ليها و الله ما ارقد . . احسن ليك ترقد . . ما برقد انتي دايرة ترقديني بالرجالة؟!!! . . قامت حنكلتني من كرعيني . . و رمتني في السرير و غزت لي الحقنة في قنقرة ضنبي . . سرخت . . قعدت تضحك فيني قايلة سرختي من الحقنة . . و هي الغبيانة ما جايبة خبر . . انا سرختي دي كانت من يديها . . يديها وكت قعدت تدغدغ في طعنة الحقنة ا كنت حاسي بيها زي الزول القاعد يكرش فيني بي نملية . . و لي يومنا دا طعنة بت العباسية دي ورمانة . . عاملة لي حبن قدر النبقة فوق قنقرة ضنبي . . حسي انا كبييير بعد مرات اكون واقف قدام المدير في المكتب . . وكت الحبن يتاورني اقعد انكرش قدامو زي العوير .

الليلة جاتني فكرة اني أقاضي الممرضة بت العباسية كان اطلع لي منها بي حق دكان ناصية في سوق ام درمان.[/align:93b6235adf]

[vivid]

:lol: اولا يا فيفد رمضان كريم وكل رمضان وانت طيب
والله العظيم يا فيفد بالغت عديل فى موضوع غبشة نسرين وتلاجة سعد وخليتنى اضحك
واقول صاح ليه كدة والمعروف عن ناس النيل الازرق ديل النظافة والوسامة والاناقة
والقيافة يمكن يافيفد عشان رمضان؟؟؟؟؟؟؟؟؟عموما راجياك لو عرفت حاجة تحدثنى
ورمضان كريم

[align=justify:ad6b1e07b1]الاخ رزاز

ما عليك انشاء الله نديك الخبر على الهواء مباشرة[/align:ad6b1e07b1]

[vivid]

اعمل حسابك انت مسافر وانا خايف الجماعة انتظروك في المطار وبعدين حق الريحة الناقص ليك دا تاني ما بتم وحتي ترجع لينا وحتقعد تتفكر وتعاين للناس السمحين وتبكي بس .
ابوفاطمة

[align=justify:e4f3b4c7b6]و الله دا الخايفين منو يا ود السناب[/align:e4f3b4c7b6]

[abumoram22]

بسم الله الرحمن الرحيم
يا أخوي يا فيفد كان سفيت ليك جردقة ولا غليت ليك قرض ما كان اتعافيت وما اذكرت بنت العباسية دي .تجيب ليك التعويض من وين هي لاقية تاكل وبعدين الدنيا رمضان ومناسبة للعفو والسماح خاصة انو قضيتك معاها خسرانة خسرانة وما بتلقى حاجة غير كلمتين تلاتة فاضية وتطلع انت في النهاية الغلضان وما بتخاف الله وبسوي راسك براس مرة تسعى لقوت عيالها اللبوهم هرب بجلدو و خلاها بروحها مع كوم العيال انت ما بتخاف الله يازول ولا شنو . السويتا دي ما سبقك عليها زول وكان راجل شق فريق البهلة تاني.

[vivid]

[align=justify:05fed52f7a]السوداني شخسية غريبة خلاس . . من يوم ما أمو تحمل بيهو و لحدي ما يلدوهو و يبقى راجل تلاقيهو شقيان و مشقيها علي المعاهو . . الشقاوة مبارياهو في خطراتو . . قرادة تحت ضنب كلب . . و سيرتو ما تنفتح عيلا تجي معاها سيرة الشقاوة . . شوفتو النصيبة البقت فينا دي؟

الحاجة العالاني انو شقاوة السودانيين دي لا بتعرف غنيان لا فقير . . تركبك بس و تفنجط بيك . . من يوم ما تعرفك انك سوداني تجيك طاوية حبالا و تتشربك و تتلصق فيك ذي القرادة . . و تاني ما يحلها منك عيلا الموت . .

العجب لو بقى حظك تعيس . . و كانت شقاوتك من النوع الثقيل . . وحاااات ابوي الموت الواحد دا ما يفرملها ليك . . بعد ما تموت و يدفنوك في بطن القبر . . الشقاوة تقول كدي و تلحقك لي عند قبرك . . تجيك في شكل شلة كلاب يبركن في قبرك و يحفتنك من القبر . . و يمرقنك زي الله ما خلقك و يقعدن يعاينن فيك . . لا اياكلنك يريحنك لا يدفننك مرة تاني في بطن القبر . . بس يقعدن يعاينن فيك و يهوهون فرحانات . . شغل بتاع مضرة كدي بس . . عشان الشقاوة تصطادك تاني . . عليكم الله شفتو ليكم شقاوة ذي كدي؟

جارتنا محاسن مراة شقيانة من الدرجة الأولى . . و كتا الماتت اتولن امرها كلاب ود الضريس . . جنها في الليل و حفتن القبر بتاعها و جرنها من سبيب شعرها . . و جدعنها برة في السهلة و قعدن يهوهون فرحانات . . جينا لقيناها ممددا علي ضهرها و الحنة بتاعتا تراري مع نور القمرا . . شلناها سترناها و رجعناها تاني لي قبرها . . و حرسناها التقول شهرين من كلاب الشقاوة.

و بما اني انا سوداني شقيان . . حاولت ابرمج نفسي مع نغمة الشقاوة المصاقرانا دي . . وكتي السافرت اسافر السعودية . . لقيت كفيلي منتظرني في خشم باب الميناء . . كشر فيني ذي كلاب ود الضريس . . قال لي : انت فيفيد؟ قلت ليهو : أيوة انا فيفيد . . قعد يعاين لي من فوق لي تحت و فتح بلاعتو قال لي : و الله يا وليدي بدي منك المساعدة القليلة . . شاحد الله يقلوك في صاج مريسة . . زعلت من كلمو دا في اللوال . . و قلت الداهية دا داير يستكرتني من قولة تيت . . و قلت أصلو ما بديهو قروش ان شاء الله يقرش حلقومو . . و قلت قروشي البشتغلها دي بلفها في تكة سروالي لحدي ما ارجع السودان . . و لو داير يكتلني خليهو يكتلني . . شقاوة كلاب ود الضريس احسن من شقاوة الكفيل

لكن بعد شهرين كدي اكتشفت انو كفيلي دا فلسان . . أباطو و النجم . . و مسيكين الغنماية تاكل عشاهو . . نسيت كوم العيال القاعد اربي فيهو في السودان . . بقيت أربي في كفيلي و عيالوا . . البشتغلها بجي اقسمها معاهو النص بالنص هو و عيالو . . بقيت عايل لي بيتين بيت في السودان و بيت في السعودية . . اجي من الشغل ألاقيهو يبكي . . اقعد ابرك جمبو و اقعد ابكي معاهو . . بعد ما آخد بكيتي . . اديهو الفيها النصيب و امشي أخليهو . . الغريب انو كفيلي دا اليومين ديل بقى لي في رقبتي . . و انا زول محمول . . و بقى لمن يشوفني التقول شاف ليلة القدر . . يشهق لمن تجيهو خمة نفس . . خايفو يموت في يدي و تبقى شقاوتي بي جلاجل.[/align:05fed52f7a]

[محمد عثمان عبدالقادر السماكي]

العزيز فيفيد

الزول دا ما تشيلو ا وتمشي تكفلوا هناك في السودان
باقي.. انحنا طلع عندنا البترول...
وقالوا في كم بئر في ود رحوم... :lol: :lol: :lol:

[vivid]

كانت بتبيع الروب قدام مدرستنا . . ختبا واحد من أولاد الخرتوم . . زول بتاع جرسة و زوغانات . . و مع عندو أي كلمة . . فسخ ختوبتو منها بعد شهرين . . قال ليهم انتو غشيتوني . . أم بخوت دي وكت ختبتها نخرتا ما كانت قدر كدي . . الشيء دي كبرت . . و انا النصيحة لله الخوفة دخلت قلبي . . خايف أجيب لي منها كوم عيال نخرينن زي كيزان الكنافة . . في شان كدي أنا بستسمح خاتركم تدوني اغراضي . . و تاني أي قرداً يطلع جبلو . . بعد فسخان الختوبة من ود الخرتوم . . الكلام كتر عن نخرة ام بخوت و كيزان الكنافة . . و تاني مافي راجل كشكش قال دايرا . .



عبد الجليل ود عمها . . برضو نخرتو كوز كنافة . . دق سدرو قال بعرسا . . قام عرسها بعد اسبوعين من فسخان ختوبتا من ود الخرتوم . . دخل عليها . . حملت منو . . جاب منها استاذتنا ست بهية . . و زي ما بقولوا العرق دساس . . بهية برضو جبدوها بي كوز كنافة في نص وشها . .



بتذكر اليوم داك مشيت المدرسة . . كنت جيعان . . قلت عيلا اشتري لي كباية روب من أم بخوت . . شلت قروشي و مشيت ليها . . جيت لقيتا زعلانة . . و الزعل باين في نخرتا . . عاينت ليها و عاينت لي جردل الروب بتاعا . . لقيت روبا باير . . حننتني و دموعي جرن . . قلت ليها يا أم بخوت بدل كباية اديني كبايتين بتاعات روب . . أم بخوت فرحت بي . . بايعتني كبايتين . . و ادتني نص كباية هوادة . . كرطعتهن سريع سريع و دخلت المدرسة . . الساعة النزل فيها روب أم بخوت دا في بطني . . عرفت روحي اني اتسرعتا . . بطني بدت تروري بي . . و شعرة جلدي كلبت . . و أي حتة في جسمي قعدت تنتش فيني . . اصحابي جوة المدرسة شوف عيني سغااااار . . حتى خليل البوم الدبة شفتو سغير و ضعيفوني . . ام بخوت دي يا ربي باعت لي روب و الا شيتاً تاني . . يكون مريسة؟؟ . . الشيء دا مو روب بس . . ممكون تكون خالطاهو . . قعدتا قدام مدرستنا ذي قعدت ست خمارة . . ما بعيد يكون روبا دا خالطاهو . .



جرجرت كرعيني . . دخلت الفصل و عيوني مزغللات . . جاتنا ست بهية . . أول ما الحصة بدت . . الطشمة حصلت . . و راسي قعد يسوي في النتاحة . . السبورة بقيت شايفا طشاش طشاش . . و ست بهية ما شايف فيها شيء عيلا الدهمة بتاعت نخرتا . . راسي بقى تقيل . . وكت غلبني أشيلو . . وقع مني في الكنبة . . تاني ما حسيت بي حاجة . . ست بهية تدرس فينا . . و أنا طشمان . . و نااااايم . . وكت الطشمة فكت . . رفعت راسي . . سمعت ست بهية تقول . . الواحد فيكم يا أبنائي لو ما عندو أنفة و عزة نفس ما بساوي تعريفتين في الزمن دا . . تاني يخربني ما سمعت منها حاجة . . النصيحة لله كلام ست بهية خلعني . . و حيرني جنس حيرة ما يعلم بيها عيلا الله . . طيّر لي لفة الراس و الطشمة بتاعت روب أمها أم بخوت . .. .



طلعت من المدرسة و انا أوزن في كلام ست بهية الغريب دا . . افتكرت كلمة أنفة القالتها ست بهية دي معناتا نخرة طويلة . . قلت في سري . . ست بهية دي غبيانة و الا شنو . . هي الأنفة فايتاها وين . . بيتهم غيرالأنفات فوقو شنو . . تاني حاجة الناس دي كلها عندها أنفات . . اها في داعي ست بهية دي تقول لينا خلوا عندكم أنفة؟؟؟ . . هي ذاتها الأنفة بتاعتا يرك فوقا ودابرق . . لكن بعد دا هي استاذة مسقفة . . و كان الأنفة ما مهمة ما كان أمها فسخو ختوبتا اللولانية عشان أنفتها شبه كوز الكنافة . . البركة في عبد الجليل ود عمها غتى بيها قدحو . . عبد الجليل أبوها ذاتو شايل ليهو كوز كنافة قدر الضربة في نص وشو . . و شخريهو نص الليل زي التقول بشرط ليهو في توب دمورية . . سليمان اللطرش الساكن حدانا . . الانفة بتاعتو طلعتو من الالزامية . . و حسي في أمان الله . . شغال في شركة البترول . . و بتول بت جاد الله . . كانت بتأشر بيها و تناغم بيها النسوان في بيوت البكاء . . و حنان جارتنا . . الانفة بتاعتها زي فتحت التنشين بتاعة البندقية . . دفعوا مهرها . . خمسة مليون جنيه . . جنيه ينطح جنيه . . و الشيلة جابوها ليها بي لوري ود الشينة . . و ست بهية دي ذاتها حنان جارتنا ضوقتا من الشيلة الجابوها ليها . . كان كدي ست بهية دي حاسدة الناس دي في الأنفات بتاعتن . . و بكرة و حاااااات أبوي كان اقعد ليها في الكنبة اللولانية . . و امد ليها أنفتي مترين . . كية ليها . . النشوفا بتسوي شنو . . مش انفتي؟ . . امدها زي انا ما داير . . لو سالتني عامل كدا لي شنو؟؟؟ . . اقول ليها أصلو عندي أنفة . .



اليوم التاني . . جيت اول واحد في الفصل . . قعدت في الكنبة اللولة . . و مديت ليها نخرتي . . ست بهية جات . . رفعت ليها راسي فوووووق . . و نخرتي فندرتها ليها زي فتاشة العيش . . قعدت تعاين لي . . ما قالت حاجة . . بس استغربت . . و اللستعجاب ركبا من فوق لي تحت . . قعدت تدرس فينا . . وكت تسعلنا سعال . . انا أرفع يدي فووووق عشان اجاوب . . و نخرتي أرفعها فوق لي يدي . . و اعاين ليها بي رشرش عيوني . . ست بهية الغبيانة تعاين لي و تعاين لي توبا و فستانا . . قايلاني قاعد أعاين لي حاجة تانية . . عيلا لكن عرفت روحا غلتانة . . حيرتها عديييل كدي . . و انا مبسوط . . قلت ست بهية دي حا تبقيني الطالب المثالي . . و بكرة تطلعني في نص طابور الصباح . . و تقول للطلبة . . فيفيد دا يا أولاد مثال للطالب العندو أنفة . . صفقوا ليهو . . و تديني جايزة كراس عربي دبل و استيكة و قلم رصاص و مسطرة . . لكن ست بهية الحاسدة ما اشتغلت بي في الحصة . . و لا عبرت انفتي دي . .


اليوم التاني جيت المدرسة الصباح بدري . . و جاتنا ست بهية في الطابور . . قالت لي خليل البوم . . يا خليل أطلع في نص الطابور . . خليل البوم طلع من نصنا يتقلّب زي ضكر البطة في مشيهو . . قالت لينا . . يا أولاد خليل دا هو الطالب المثالي السنة دي . . لأنو عندي أنفة و عزت نفس . . قامت أدتو جايزة كراس عربي دبل و استيكة و قلم رصاص و مسطرة . . انا النصيحة لله زعلت . . و كنت داير اقول ليها ظلمتيني . . كان تعملي لينا مقارنة بين انفتي و انفة خليل البوم . . لكن قلت في سري . . تكون بقرانة من أنفتي دي ؟

[معتصم سليمان بابكر]

[gb:62edf251f8]ابداع يافيفيد وانت تعود لينا بعد غربة وشوق[/gb:62edf251f8]

[محمد عثمان عبدالقادر السماكي]

فيفيد الشفت ..

والله قصتك شفته عديل كدا.... :lol: :lol:

[ايهاب صالح سليمان]

في ناس تكتب موضوع مستعدين نقعد نقرا فيه اسبوع تمام بحالو .... فيفيد ما واحد منهم هو اولهم ... قاعد اقرا ليه والله في زمن جميل اكون فاضي لو ما نسيت قاعد اقفل الجوال (صامت) كلامه عاوز رواقه وقصصه هادية وعنيفة في وقت واحد ما ببالغ ليكم هو انتو عندكم غير المبالغة في المنتدى ده ... فيفيد ابداعك ده لو وقف المنتدى حيبقى زي حصة التربية ... انا عارف ما براك عشان ما اظلم بقية العقد الفريد ناس ود الاخدر وغيرهم من الاحبة .... فيفيد لو الزواج حيغير كتابتك ما تعرس وموت بنص دينك .... لو العرس حياخدك مننا افتح ليه ....لو الشغل كمان برضو افتح ليه ... صدقني انت بتستاهل كل موضوع او قصة تكتبها برواقة تستحق فيها قروش يعني موضوع البطانية لو ب1500 ريال والموضع ده مثلا ب2500 ريال حتلقى حق التلج طلع زمااااان ...انت راقي لانك بتنكتب ابداع من غير عائد مادي .... في ناس في المنتدى حقو مع مواضيعهم يدفعوا لاي قارئ 25ريال ولاي واحد يرد 50 ريال ....بالجد ...عليك الله واصل الابداع الرهيب ده خلينا نتحكر في البهلة ... قريب نطلق باقي المنتديات ونجلس (القرفصاء) معك ونستمع مشدوهين ... يا ابو فاطمة القرفصاء دي ما حقتكم حقتي براي .... ما زي فلسفة التطويح بتاعت ( الجميع ) .... مسعولين من الخير ... وين رحاب ؟

فيفيد شكرا ليك .... انتهيت من الريحة ؟؟؟

وعد اللقيا ( الذي تحقق ) ..... ايهاب صالح

[الصادق عبدالله ضرار]

الرائع فيفيد

انت الروعه نفسها
ذكرتنا المدارس والروب والسلطات والطوابير

ااااه
زمن

[عبدالرحمن على حسن]

الرائع فيفيد !!!
ترى الرجل النحيف فتزدريه ... وفى أثوابه " أسد " هصور !!
" أسد" أعلاه يمكن استبدالها بكل صفات الابداع و "الشفتنة" و برضو ما حتكفى ..
بعد اجتماع الامس و تشرفى بلقائك "وجها لوجه" .. رجعت لكل خربشاتك فى المنتدى مرة أخرى من برطوش خالك وانت طالع فى محاولة لربط الصورة مع الصوت .. و خلصت الى أنه " ياما تحت السواهى ... دواهى " و لم اتوقف عن الضحك و القرقراب الا على صوت الحكومة " يا راجل جنييييت؟ ما لك بتضحك مع الكمبيوتر؟؟"
لك على كل بسمة وضحكة ادخلتها على نفوسنا المرهقة بضغوط الغربة كل الشكر و "ألاجر" (أرمى قدام و سيبك من ريالات أيهاب !!)
و ما زلت امنى النفس بسهرة خميسية قبل سفر المعتصم ... و الروب علىّ !!!

[Ameer Al Ameen]

أخى عبد الرحمن

يا أخوى بركة اللقيت زولة وقفتك من الضحك
حتى لو قالت عليك مجنون ،
نحن لسه بنضحك ...
شكرا أخى فيفيد على هدا التميز الابداعى
وبعد كده امشى راسك مرفوع فى رفاعة و قول انا من البهلة.


أبو أحمد

[ابو النيييييز]

يبدو ان الاخ عبد الرحمن اصابته نفس الدهشه..
فشئ غريب ان كل الابداع ده اطلع من انسان مليان بالطيبه
...مرات بقول احتمال اننا لما نكتم حاجاتنا بتتحول بهدؤ لابداع
او احتمال انها بتتحول لحاجات فوق طاقتنا...فبنحاول نطلعها حاجات بتشبهنا بقدر ما بنقدر
...فيفيد زي كل مره...بتجبر الناس ادحشوا واقروا البتكتبه
عاوزين اضحكوا من غير ما اخسروا نفسهم
انت وبقدرة قادر قدرت تجمع بين احترام نفسنا وفرحها
والغريب الاكتر انه الواحد بقرأ ليك كلام مليان وبعد ده بضحك
خليك من الشفت دي وخليك الساحر...
سؤال اخير:
الاخير ده طلع من الغرفه العلي اليمين ولا العلي الشمال
انا ارشح انها طلعت من الشمال

[vivid]

فيفيد الشفت ..

والله قصتك شفته عديل كدا.... :lol: :lol:

دا انت الشفت يا سماكي

و صورتك شديدة

بس يا سماكي

انا قدر ما اعد السمك الشايلو دا النعاس يكابسني

دحين يا اخوي انت شايل ليك كم سمكة

[vivid]

في ناس تكتب موضوع مستعدين نقعد نقرا فيه اسبوع تمام بحالو .... فيفيد ما واحد منهم هو اولهم ... قاعد اقرا ليه والله في زمن جميل اكون فاضي لو ما نسيت قاعد اقفل الجوال (صامت) كلامه عاوز رواقه وقصصه هادية وعنيفة في وقت واحد ما ببالغ ليكم هو انتو عندكم غير المبالغة في المنتدى ده ... فيفيد ابداعك ده لو وقف المنتدى حيبقى زي حصة التربية ...

خجلتني يا هوبة

و دخلتني من الخجل جوة بطانتي

http://www.rufaaeast.com/board/images/smiles/icon_redface.gifhttp://www.rufaaeast.com/board/images/smiles/icon_redface.gifhttp://www.rufaaeast.com/board/images/smiles/icon_redface.gif

و بعد كلامك دا يا هوبة

بقدر اشحدك و عيني قوية

اديني حق التلج

و باقي القروش الفضلن من قرايتك للبوست دا

خليها لي خمار بعد ما اضمن بت الناس دي

عليك الله سريع سريع انا خايف البت دي تغير رايها المرة دي

[vivid]

ذكرتنا المدارس والروب والسلطات والطوابير

ااااه
زمن

يا الصادق بتعرف روب أم بخوت؟!!!

[vivid]

الرائع فيفيد !!!
ترى الرجل النحيف فتزدريه ... وفى أثوابه " أسد " هصور !!
" أسد" أعلاه يمكن استبدالها بكل صفات الابداع و "الشفتنة" و برضو ما حتكفى ..
بعد اجتماع الامس و تشرفى بلقائك "وجها لوجه" .. رجعت لكل خربشاتك فى المنتدى مرة أخرى من برطوش خالك وانت طالع فى محاولة لربط الصورة مع الصوت .. و خلصت الى أنه " ياما تحت السواهى ... دواهى " و لم اتوقف عن الضحك و القرقراب الا على صوت الحكومة " يا راجل جنييييت؟ ما لك بتضحك مع الكمبيوتر؟؟"
لك على كل بسمة وضحكة ادخلتها على نفوسنا المرهقة بضغوط الغربة كل الشكر و "ألاجر" (أرمى قدام و سيبك من ريالات أيهاب !!)
و ما زلت امنى النفس بسهرة خميسية قبل سفر المعتصم ... و الروب علىّ !!!

حبيبنا و لذيذنا و ذبيبنا عبد الرحمن

شكرا علي كلماتك الراقية و الجميلة

و نحنا الاسعد بي معرفتك و الله يا عبد الرحمن

بس يا عبد الرحمن

صاحبك معتصم ابونضارات

اتصل بي نصت نهار

قال لي ألحق عبد الرحمن قال فيك الكلام المانكتب

و قال لي كمان كنت قايلك زويل لكن طلعت زول

صاحب مستغرب يا عبد الرحمن

هههههههههههههههههههه

بس روبك الجاينا بيهو دا عبد الرحمن ما يكون زي روب فلانة

باقي الروب الايام دي بغشوا فيهو

[vivid]

شكرا أخى فيفيد على هدا التميز الابداعى
وبعد كده امشى راسك مرفوع فى رفاعة و قول انا من البهلة.


أبو أحمد

يا أبو أحمد

عاد بهلتنا بهلة السرور يا ابوي

طارت راحت

و شايف ناس نزار فريجون دايرين يرفعوا حي السناب قبل البهلة

لكن يلقوها عند الداقس

البهلة انطلقت نحو العالمية

و أصبحت من أكثر أحياء السودان شهرة تصدق يا أمير!!!

[vivid]

يبدو ان الاخ عبد الرحمن اصابته نفس الدهشه..
فشئ غريب ان كل الابداع ده اطلع من انسان مليان بالطيبه
...مرات بقول احتمال اننا لما نكتم حاجاتنا بتتحول بهدؤ لابداع
او احتمال انها بتتحول لحاجات فوق طاقتنا...فبنحاول نطلعها حاجات بتشبهنا بقدر ما بنقدر
...فيفيد زي كل مره...بتجبر الناس ادحشوا واقروا البتكتبه
عاوزين اضحكوا من غير ما اخسروا نفسهم
انت وبقدرة قادر قدرت تجمع بين احترام نفسنا وفرحها
والغريب الاكتر انه الواحد بقرأ ليك كلام مليان وبعد ده بضحك
خليك من الشفت دي وخليك الساحر...
سؤال اخير:
الاخير ده طلع من الغرفه العلي اليمين ولا العلي الشمال
انا ارشح انها طلعت من الشمال

يا نيزوووووو

هو فضل فيها غرفة يمين و غرفة شمال

انت عملت فيها اسقاط جوي

و دخلت عنوة و طلعت الفضايح

و بقيت سيد بيت

غايتو يا نزار تصويرك للتلاجة ما واجعني

الواجعني تصويرك للبطانية

شايف صورة بطانتي انتشرت في المنتديات التانية

انت يا اخوي صورة البطانية دي بعتها!!!!

[عبدالله إبنعوف]

يا " أوثمان" نفسي كنت أشوف العيون دي شكلهم بقى كيف بعد الطشمة الكاربة دي ، تعرف الجماعة "هولي " قالوا الراجل دا فعلاً فيفيد ولو ما كان فيفيد الشكل ما كان حيكون بنفس الأسلوب الرائع .

ربنا يتمم ليك على خير بس ، زي ما قال حبيبنا إيهاب ، أنا خايف الأبداع دا يقيف في محطة واحدة ، وأكيد خوفي دا ليهو سبب .

وبعدين حاجة بتضحك " عبدو " ( عبدالرحمن ) دا شيء ما هينة أبداً .

شوف لو ما نزلت واحدة تانية قبل الجمعة أنا حاتصل مع ناس سورية وناس البهلة وناس أم درمان كمان وأكيد الموضوع حيتأجل ، دا ما يطلبه المستمعون والمشاهدين والقراء كمان .

لك ولهم كل الإجلال والإعزاز

[Nazar Hussien Babkir Frie]

الزول الرهيف الود فيفيد ، ما عارف اقول اقول شنو حيرتني عديل ، وبعدين بهلتكم البقت عالمية دي عملتوها كيف !!!
وبعدين ياخي بعد حق التلج الباقي ليك شنوالدنيا باردة وانا عارف انو في ناس ملتزمين بحق الثلج شوف ليك اتو تاني ؟؟؟!!! .
وبعدين ياخوي خلي بالك ناس فريق السناب قاعدين ولابدين وممكن نعمل توصية من هنا افرتقوا ليك الحفلة وانت عارفهم تماسيح دميرة ، بتدفع اللازم ولا نرسل ليهم يعملوها، وبعد نصرنا عليكم في سوق الحيوانات الداجنة ان قامت الحرابة والله فدفدوي علا تسكنو تمبول .دحين خليك حريص وانت الفارس وانت الريس وانت العريس ، مبرووووووووووووووك وبالعديل والزين منتظرين ابو النييز يرسل ليك زغرودة طويييييييييييييلة وبعدها بنعرف انو الراجينو تما ان شاء الله لينا حضرة وقدلة وهزة وشبال هناك وسط فريق البهلة بس المواعيد تكون بعد عيد الضحية وكان في امدرمان برضو حاضرين .
توصية : يافدفدوي ما تشوف لي معاك حاجة كدا بدون تصريح وبدون تلميح عارف الجماعة كاشفي الاسرار قاعدين ومنتظرين الحكومات الماجات ومنتتظرين يفتوا كلوا اها دي اضافة في الزمن الضايع ، وياود اللمين الامير عكازي المضبب جاهز للجماعة بتاعين رمضان ديك ؟؟!!!
ابوفاطمة

[vivid]

[align=justify:4ed9554003]
البارح انا واقف قدام المرايا . . غازي كوعي في نصي . . و قاعد اعاين و اتمعن و اتفرّس في عويناتي . . أتاريهن عويناتي ديل حلوات جنس حلا . . و عاجباتني جنس عجب . . هن أحلى شيء أداني ليهو الله . . عيني الشمال . . دايماً فرحانة و سعيدة . . لا سبب و لا سبيبة . . فرحانة كدي بس . . صحيتي من الصباح . . منها و ليها تقعد تفرح و تتبسم . . بي ظروفا . . هو انا خسران شيء؟؟؟ . . خليها تفرح و تتبسم و تنبسط . . كلو أجر و عافية . . أخير من قعاد ساي . . و احسن ليها من الزعل و التصرصر و مد القدوم . . بس أنا شخسياً . . عيني الشمال دي . . بعتمد عليها في امور المعاينة و المتاوقة . . النصيحة لله في الحتة دي مريحاني شديد . . و عافي منها و رضيان عليها دنيا و آخرة . . بس الجبانة بعد مرات عندها الغتاتة و الدغالة . . زيها و زي عيونا الناس التانين . . قاعدة تخذلني في أحلك الظروف . . خسوساً وكت أجي أشاغل بيها البنوت . . الجبانة أصلو ما قاعدة تنستر معاي في الحتة دي . . وكتين أجي أشاغل بيها و الا اغمز بيها لي بت . . قاعدة تعصلج معاي . . قدر ما أجي أقول أقفلها . . تأبى تنقفل . . و تزعل مني . . و تقعد تصرصر لي و تمد لي في قدوما . . تقرب تنط من الجحر بتاعا . . وكتها التزعل عصب جبهتي يتشحّط . . و لونا يبقى أحمر من الزعل . . زي الدفقوا لي فيها ملعقة شطة . . اليوم كلو تحرقني و توووجعني . . العويرة قايلة نفسها بتعاقبني . . بعد مرات أكون قاعد أحضر في نشرة اللخبار . . عيني الشمال تتكيف . . و تصفق من شدة الفرح . . خسوساً وكتين يجيبوا ليهن تفجيرات إرهابية . . الحكاية دي خوفتني . . في اللوال وديت عمايلها دي لي النزعة الدينية . . قلت ممكن عيني الشمال دي تكون محجبة و ملتزمة و انا مو داري . . و أمور المسخرة و اللولوة بتاعتي دي ما داخلة ليها مزاجها . . دا كلام حلو جداً . . بس المخوفني . . و قاطع قلبي . . حالة التكيف و الفرح . . البتقع فيها وكتين تشوف ليها تفجيرات ارهابية . . يكون دا من شنو؟؟؟ . . تكون دي بداية فكر إرهابي؟؟؟ . . الله يستر . . محمد جانا ما تغشانا . . بكرة تقوم تبقى لي عين بت لادنية . . و تجي بكرة أمريكا تصنفها لي ضمن العيون المتشددة . . و يقوموا يرسلوا لي ناس حكومة اللنقاذ فريق تفتيش عيون . . ناس حكومة اللنقاذ ما قاعدين ينستروا مع السودانيين . . من يسمعوا أمريكا جاياهم . . يقوموا يصدروا بيان بقفل عيني الشمال . . و تحديد تحركاتي . . و يمنعوني من السفر . . لحدي فريق التفتيش اللمريكي ما يرفع تقريرو . . فريق التفتيش بعد ما يفحصوا عيني الشمال . . يمشوا و يجوني صادين بعد يومين. . يقولوا لي يا فيفيد عينك الشمال دي عين متشددة . . و لازمن ننكتا من جحرا . . حتى نقتلع الارهاب العيني دا من جذوروا . . و في حالة اعتراضك نسجنك و نرميك في قوانتنامو . . قسم العيون الارهابية.
عيني اليمين عسللي . . مريحاني جنس راحة . . الله يريحا عليها دنيا و آخرة . . هي عكس عيني الشمال . . عيني اليمين مع انو سغيرونية . . و مضبلنة. . و جفونها مرخية . . عيلا هي بتاعت شرشحات و زوغات . . بعد مرات أصحى من النوم أقعد افتش ليها ما ألقاها . . انا أقوم انخلع . . و قلبي يقع تحت ركبي . . أقول ممكن ربها أخدها . . لكن بعد شد و جذب و مط و معافرة . . ألقاها غاتسة و متغتية بي الجفون . . اديها نخسة نخستين تقوم تجيني ناطة . . تقعد ترمش لي و تبربش لي في رموشها . . متكيفة . . انا في الساعة ديك اتكيف جنس كيف . . عيني اليمين دي . . ماشة علي حل شعرها . . و عندها خبرة ما بطالة في الغمز و المشاغلات . . يعني ما قاعدة تخذلني في الحتة دي ذي عيني الشمال. . مريحاني تب. و لمن أقعد في نشرة اللخبار . . تزعل شديد الزعل . . وكتين تشوف ليها تفجيرات إرهابية . . انا جوة نفسي بكن لي عيني اليمين دي كل الود و الاحترام. عيلا انا الخوافة اليومين ديل دخلت قلبي . . خايف بكرة تقوم تحصل مضايقات و مهاترات . . بين عيني اليمين و عيني الشمال . . نتيجة الاختلاف الروحي و الفكري.
غايتو الواحد تعب من كترة المعاينة و التفرس في المرايا . . انا حسع جاتني فكرة . . المرايا دي أقوم أكسرها و أريح نفسي.[/align:4ed9554003]

[اسامة عبد الله محمد الحسن]

امسك عليك عيونك دييييييييييييييل ...

او خليك شفت صحي صحي وعينك الشمال دي بدل بيها العدة عشان ما تجيب ليك مشاكل ...
ولا اقول ليك كدي حاول دقها دقة حارة ........ كان بكت ... حنسها وقول ليها عيني ما تبكي ...

ولا اديك حل اخير ما تكسر المرايا ... اقلب المرايا وخلي الشمال تكون يمين واليمن تكون شمال لامن تتلخبت انت ذاتك وتحل المشكلة ....

لك التحية وربنا يحفظ ليك عيونك الحلوات ... ويديم لك الصحة والعافية ...

[Ameer Al Ameen]

يا أخوى فيفيد

نصيحة لله ، عينك الشمال دى شوف ليك طريقة ووديها للاستخبارات بتاعت ناس "رفيق" ، امكن تلقى ليك طريقة يدسوها ليك قبل الاميركان ما ياخدوها و يكبو ليك فيها فسفور ابيض، اصلو قالو عليهم هم الداسين الجماعة الكبار اياهم.
اما عينك اليمين الله يباركها ، انا خايف عليها من ود السناب شايف اليومين خاتى عيونو عليك اظنو ما لقى فايدة فى صاحبك ابو نضارات.

ابو احمد

[ابو النيييييز]

http://images.google.com.sa/images?q=tbn:g8L-Y43UkRgJ:www.dw-world.de/dw/image/0,1587,1471768_6,00.jpg

[الصادق عبدالله ضرار]

شكرا فيفيد
وانت تزرع الازهار فى منتدانا
وانت تنثر الروعه فى مدانا
وتجد لك بين الافراح مكانا :roll:
رايك شنو فى العيون ديل
والله عوضيه ماعندها

[معتصم سليمان بابكر]

ايواااااااااااااا

عشان كدى يافيفيد

ابتسامتك دائما يمين

[razaz]

السلام عليكم يافيفيد
والله العظيم لوعينك دى طلبو القبض عليها مانحنا اتشحططنا بعدك منو تانى يكتب لينا القصص الجميلة وكل الابداع دة 00
وكمان انت قالو بتقرأ افكارك قبال ماتكتبها يعنى وجود عينك مهم شديد00يا يمة عينك تبرى وتستبرى وبعيد عنك جوانتنامو00

[محمد عثمان عبدالقادر السماكي]

فيفيد الشفت
طبعا اخر شفتنا ومقدرة على السرد القصصي
الحلو الرائع....
بس اوع تقوم تخليها زي عين موشي ديان...
وكدى تبقى حليف للامريكان..
الله اديك العافية على الروعة دي...

[صديق الاخضر]

التحية ليك وانت تنثر حبات الحروف المنمقة فى سردك بس قول لى عليك الله

عيونك وينا هى ولا اشان الناس ديل فى كتير منهم ما شافوك


انت عارف انا لما استعنت بى مزج الشبكية والقرنيه اشان اسوف عيونك

والعجب لما تضحك بختفن مره واحده ورغم ده كلو هن جميلات لانو بخلنك تبدع فى كتاباتك

ولى قدام مليون سلام

ابداً صديق الاخضر
ابورزاز

[Nazar Hussien Babkir Frie]

انا عارف العيون ديل فيهن اسرار خطيرة ومهولة ، وكويس انها طلعت ارهابية انا خفت عليهن اطلعن ماكرات وخطييرات ولكنهن طلعن باردات ما حارات ، وبعدين يافدفدوي اعمل حسابك الجمعة قربت وانت لسه ما استلمت الورقة والجماعة ان تامروا عليك بضيعوك عديل وبتقعد تبكي لينا عديل في المنتدي دا ، خاصة ان وصلت حكاية المغامزة دي للجماعة وارد امدرمان ، وانت غايتو خليك لابد ساي لحدي يوم الجمعة وبعدين خلي لى الامير ود اللمين دا النجضمو ليك شويةلانو من محرقي الحي الامامي ، رغما عن انو وصاني اشتري عكاز مضبب للجماعة بتاعين رمضان ديلك .
وتعال ياخوي لا خبر والا اتر الا التهاني واقعةعليك هبطرش الحاصل شنو لاسلك ولا حاجة ، امكن تكون زعلان عشان ما اتعشيت معانا بسمك ود الكرور الجابو لينا من صالة الالعاب الرياضية لانو انا عارفك طفس ؟؟!!!
بس النصيحة نقول كل مرة منكم بنتعلم الجديد ، وبعد دا نحن ناس السناب بنسلم الراية البيضاء ظاهريا ولكننا سنتبني فكرةالمقاومة السرية لحين ظهور فوارس السناب بعد فك التسجيلات ؟؟!!!
سلام يارائع ومبروووووووك مقدما منتظرين استلام ما يفيد بتوقيع استلام ست الحسان في كشوفاتكم بصيغة ابدية وان شاء الله بعداك العيونات ديل لا بشوفن شمال ولا يمين امدرمان وبس ؟؟؟!!!!.
ابوفاطمة

[vivid]

امسك عليك عيونك دييييييييييييييل ...

او خليك شفت صحي صحي وعينك الشمال دي بدل بيها العدة عشان ما تجيب ليك مشاكل ...
ولا اقول ليك كدي حاول دقها دقة حارة ........ كان بكت ... حنسها وقول ليها عيني ما تبكي ...

ولا اديك حل اخير ما تكسر المرايا ... اقلب المرايا وخلي الشمال تكون يمين واليمن تكون شمال لامن تتلخبت انت ذاتك وتحل المشكلة ....

لك التحية وربنا يحفظ ليك عيونك الحلوات ... ويديم لك الصحة والعافية ...

[align=justify:5087384ada]و الله يا اسامة فكرة بيع العدة دي عجبتني

بس في زمتي

لو بتاع العدة قدر يشوف العينين الاتنين

يكون ما خلى حاجة



تسلم يا الغالي[/align:5087384ada]

[vivid]

يا أخوى فيفيد

اما عينك اليمين الله يباركها ، انا خايف عليها من ود السناب شايف اليومين خاتى عيونو عليك اظنو ما لقى فايدة فى صاحبك ابو نضارات.

ابو احمد

[align=justify:d330f49b77]يا أبو احمد

عيني اليمين دي لو ود السناب دا قرب منها

عيلا نقوم نسوي المديدة حرقتني في نص حي السناب

آحر الزمن سنابي يرفع راسو علي بهلابي؟[/align:d330f49b77]

[vivid]

[align=justify:5df4e0f637]
يا أبو النييييييييييز

وليدك لسة فاكيهو كدي لي شنو

استرو لينا شوية عليك الله

قادر الله عليكم يا اولا حي الجنينة

قالوا كلكم بتحوموا كدي

صحي؟؟؟!!![/align:5df4e0f637]

[vivid]

توصية : يافدفدوي ما تشوف لي معاك حاجة كدا بدون تصريح وبدون تلميح

[align=justify:62a8bb29a0]يا ود فريجون

هو انت خليت فيها تلميح

ما بجيبوها كدي يا ود السناب

لكن ليك علي حاجتك جاهزة كية لي أمير الامين[/align:62a8bb29a0]

[البرينسيسه]

السلام عليكم
الاخ فيفيد اول ماقريت النكته دى ذكرتنى بطنك وحبيت ارسل ليك

قال ليك واحد تكاسى راكبة معاهو بنت كل ما بطنو تكركب يروح ضارب البورى شديد

الحكاية دى كررها ليك عدة مرات و فجاة كدة جات غنماية قاطعة الشارع البنت قالت ليهو : موش الغنماية دي

اصدمها بس عليك الله بوريك العفن دا تانى ماتضربو

[البرينسيسه]

الاخ فيفيد
حفظك الله

عذرا الاطلاع على الموضوع جاء متاخر
بس انا اتخيل نسرين دى حست بيك انت بتعاين ليها فى رجلينها والا ماكان بقت تضاير فيهم كدا وبعدين بركه الما مسحت رجولا عشان تخلى ليك ثغره تتكلم فيها.غايتو جنس حساده عليك بركه الما طلعت مذيعه كان تجنونى بجنس الكلام دا

[vivid]

[align=justify:5af99cbb07](مدخل أول)

تحركت تلك العربة من أمام احد المواقف العامة (بالخرطوم)، تحمل بين جنباتها (خمسة نساء) من أرقى و أطيب نساء (حي البهلة) برفاعة، في طريقهنّ لزيارة أحد (أقاربهن) بأحد أحياء (الخرطوم الراقية). و عند وصولهنّ إلى ذلك (الحي الراقي)، ترجلنّ (الخمسة) من العربة، ثم دخلن و بدون أي علامة من علامات الاستئذان إلى أحد (الفلل) (الديلوكس) التي يعج بمثلها ذلك (الحي الفريد). و لسوء حظهنّ أنهن لم يجدن أحد بتلك (الفيلا). ل>ا فقد آثرن الانتظار لحين وصول (صاحب الدار).

خلال فترة الإنتظار :

(سعاد) و هي تنفض الغبار و الأتربة بحركة (شهوانية) مقصودة من على (خلفيتها) الرائعة، التي أنفقت فيها (الغالي) و (النفيس) لجعلها تنمو و تكبر و تتشكل على هذا النمط و الشكل الجذاب الذي صار حديث و مطمع و مضرب مثل لعامة شباب حي (البهلة) :

أأأأحييي انا يا بنات أمي
انا ما كنت قايلة الخرتوم دي بعيدة كدا

أسرعت (الشول) و الحسد يتطاير من عينيها لمساعدتها في (عملية) إزالة الغبار و الأتربة من على (خلفيتها):

خبارك يا (سعاد) انتي قايلة (الخرتوم) دي قريبة؟
سعاد : و حات أبوي يا (الشول) انا ما قايلاها بعيدة كدا
(كلتوم) : أسكتن يا نسوان ما تقومن تفضحننا في البلد دي
انتن قايلات روحكن في (حي البهلة)؟
فوزية : و الله يا أخواتي كلام (كلتوم) دا صاح
لو سمعنا واحد من ناس الخرتوم ديل بضحك فينا خلق الله
نعمات : هووووي يا (فوزية)
الداير يضحك خليهو يضحك
نحنا كلام ناس حي (البهلة) دا ما بنخليهو


(مدخل ثاني)
امرأة تبكي في أحد (الفلل) المجاورة و تتمتم ببعض كلمات الاستغفار

اتسغفر الله استغفر الله استغفر الله
اللهم اجعل البركة في اولاده و زريته
و اجعل الجنة مثواه

(مدخل ثالث )

فوزية : يا نسوان سامعات الانا سامعاهو دا؟!!!
كلتوم : في شنو يا بنات أمي - انتن سامعات شنو؟!!!
فوزية : انتي اضانك تقيلة يا كلتوم؟
كلتوم : في شنو يا (فوزية) – وحات ابو وليداتي ماني سامع اي شيء
فوزية : معقولة انتن ماكن سامعات الصوت الغريب دا
سعاد : كدي يا أخواتي أسكتن خلننا نسمع كويس
الشول : الله اجازيني دا صوت بكاء
كلتوم : بكااااااء!!!!!
سعاد : آآآآآآي يا أخواتي - و الله دا صوت بكاء
نعمات : المات منو يا اخواتي؟
سعاد : شن خبّرنا يا (نعمات)
نعمات : نان صوت البكاء دا جاي من وين؟
كلتوم : و الله يا بناتي انتن وهمانات ساااااكت
فوزية : طلاق تلاتة دا صوت بكاء
سعاد : كلامك صاح يا (فوزية) دا صوت بكاء
فوزية : لو ما اخاف الكضب أقوليكم البكاء دا عند الجيران
الشول : الجيراااان!!!!
كلتوم : اقطعني حتة حتة كان انا سامعة حاجة
سعاد : نان يا كلتوم نحنا ما نصحناك
قلنا ليك زيت السمسم دا ما تكبيهو في اضنيك ديل
عشان ما يتقلهن ليك
كلتوم و هي تغرز عيونها في خلفية (سعاد) الجهنمية :
سجمك يا (سعاد) كان كدي (حلاوتك) دي فالصو سااااكت
الشول : حلاوة شنو و زيت سمسم شنو انتن ماكن سامعات البكاء دا؟
نعمات : و اللللللله العظيم البكاء دا صوت (مرأة)
فوزية : كمان صوت (مرأة) وحدانية
كلتوم : (مرأة) وحدانية!!!!
فوزية : آآآآي يا (كلتوم )– (مرأة) وحدانية
كلتوم : ممكن يا بنات أمي المراة دي مات ليها زول
نعمات : الظاهر عليها ما عندها (زول) يبكي معاها
الشول : يا حليلها –تلاقيها هسع راسها مقطوع
سعاد : أصلو ناس (الخرتوم) ديل كدا ما عندهم أي صلة رحم
كلتوم : نان يا (اخواتي) صلة الرحم دي ذيها مافي
فوزية : لو ناس (الخرتوم) ديل قاعدين يصلوا رحمهم
ما كان تلاقي المرأة دي تبكي براها كدي الله و رقبتا
الشول : يا (اخواتي) رايكم شنو نمشي (نسخن) ليها البكاء دا
فوزية : و الله كلامك صاح يا الشول يا اختي
سعاد : و نعم الراي و الله
نعمات : انا معاكم الحجل بالرجل
الشول : و انا كمان معاكم
كلتوم : و الله رايكن ما بطال
أصلوا ناس الخرتوم ديل ما فيهم رجاء
نعمات : خرتوم شنو و جن شنو – حي (البهلة) دا مافي زيو
سعاد : خلاص يا نسوان نمشي (نسخّن) ليها البكاء بتاعها دا
الشول : يللا نبكي معاها بكية بكيتين عشان الناس تجيها
فوزية : كلامك سمح خلاص يا (اخواتي)
نعمات : هسي الجنازة دي البدفنها منو لو ما بكينا معاها
كلتوم : يا نسوان قومن ارحكاكن
سعاد : قومي لي من (توبي) يا (فوزية)
فوزية : توب شنو الدايرة تلبسيهو دا يا سعاد
الشول : يا (سعاد) انتي نسيتي انك قاعدة في (الخرتوم)؟
نعمات : يا سعاد أرمي (توبك) دا بعيد
خلي ناس (الخرتوم) ديل يشوفو (حلاوتك)
فوزية : (سعاد) هووووي انا لو عندي ذي ا(لخلفية) بتاعتك دي
و الله امل بيها الكية لي ناس (الخرتوم) ديل كلهم
نعمات : حرام عليك يا (سعاد) تغطيها بي (توبك)
الشول : يا (سعاد) اسمعي كلام (نعمات) و (فوزية)
يمكن تلاقي ليك عريس
سعاد : قلت كدي؟؟؟ خلاص كان كدي (توبي) دا ما يبراني من هنا
كلتوم : بلاش (مسخرة) معاكم يا (نسوان)
قومي يا (سعاد) ألبسي (توبك)
الشول : (سعاد) دي (القطر) حا يفوتها يا (كلتوم)
خليها تمشي بدون (توب) يمكن تلاقى ليها (عريس)
كلتوم : و نان (عريس الغفلة) دا
بدور (عروسو) تمشي مكشوفة في الشارع؟
فوزية : هسي (سعاد) محشورة (25) سنة في بيوت (البهلة)
و لسة ما لقت ليها (عريس)
نعمات : أصلو رجال حي البهلة فلسانين و كلتانين و جيعانين
كلتوم : دا النصيب يا (نسوان) مالكن عليها
الشول : يا كلتوم – النصيب دا عايز ليهو (حبة) مساعدة
كلتوم : انا قلت (سعاد) دي ما بتبارينا من هنا إلا بي (توب)
فوزية : خلاص ألكعي يا (سعاد) ألبسي (توبك)
و خلينا نمشي نلحق (المرأة) ست (البكاء) دي
نعمات : عليكم الله أسرعوا يا نسوان
أصلو (ست البكاء) دي حننتني
الشول : شكلها (مرأة) وحدانية و مكسورة جناح
كلتوم : عشان هي وحدانية انا دايراكم ما تقصروا معاها
سعاد : نقصر معاها!!!! اقصر الملح انشاء الله
نعمات : انا (مرتك) يا عبد الجليل !!!
و الله نعمل ليها بكاء يتكلموا عنو الكبار و الجهال
كلتوم : يا سعاد يا بتي
شيلي ليك جقمة من زيت السمسم دا
عشان تطرقي بيهو صوتك
سعاد : ما تخافي علي يا (كلتوم) انا صوتي ذي المكرفون
كلتوم : كان كدا ورحكاكم بي سرعة
خلينا نفك (ست البكاء) دي حيرتها


مدخل رابع
المنزل المجاور

(مرأة) في مقتبل العمر جالسة بجوار (جثة) رجل فيما يبدو أنه (زوجها)، و قت مات بالسكتة (القلبية).
و عند دخول (كلتوم و فوزية و الشول و نعمات و سعاد)و بي صوت واحد :

وووووووووووووووووووووووووب
ووووووووووووووووووووووووب
وووووووووووووووووووووووب
كُر كُر كُر كُر كُر كُر كُر كُر كُر كُر كُر كُر
واااااااااااااااااااااااااااااااااااااااااااااااي
الليلة يا راجل المرأة الوحدانية
الليلة يا الخليتها وحدانية
الليلة يا السبتها بدون بطانية
الليلة يا البيتك بقى ذي عنبر الباطنية
الليلة يا الكنت بتجيب ليها الجاتوه و الطحنية
اليلة الاكل بعدك كلو بسد النية

خلال مدة نصف ساعة تم تجهيز الجنازة من قبل أهالي الحي و الأحياء المجاورة. و بشهادة الجميع أنها كانت أول جنازة يذلك الحي الخرطومي يتجمهر حولها و يصلي عليها مثل هذا العدد الكبير من الناس.

التحية لنساء حي (البهلة)


فيفيد
تم النشر بالموافقة المسبقة من حاجة (كلتوم) [/align:5af99cbb07]

[عبدالله إبنعوف]

البركة في كلتوم

والبركة في نسوان البهلة الما بقصرن في البكاء والفراش وفي العرس

والحمدلله الرجفة إنتهت بعد أحداث الجمعة قبل الماضي .... والموبايل أظنو بيرن الليل والنهار زي بكاء نسوان البهلة .

شكراً ليك يا عثمان وإنت بتمتع الناس بالكتابات الهايلة دي

وأنا عارف الليلة كلتوم تكون منططة عينيها ، وخاتة يدها في قلبها من الراجيها !!

ولك الشكر والتقدير

[الصادق عبدالله ضرار]

الاخ فيفيد
العود احمد
ياراجل انت خطبت ولى اتخبطت
طوولت الغيبه
ورجعت بالابداع...
شكرا فيفيد وسعاد تعبانه معاك..

[Ameer Al Ameen]

فيفيد أخوى
كشف الحال شنو ؟ يعنى نرحل نخلى ليك البهلة دى ليك براك ، نمشى وين ؟ اكان قلنا فريق قدام ود السناب قاعد لينا بى هناك و ما عارفين حتة تانية تلمنا.
، و الكتبتو عن رجال البهلة كان تكتبو قبل الجمعة و لا خلاص ضمنت الورقة فى جيبك ، يعنى بت الناس دى اخدت مقلب فيك و لا شنو ؟
النسوان ديل انا لميتهم فى قطية ناجر الله و حالفين يخربو ليك البيعة ، و كلتوم ديك التشيل شيلتها ساكت!!!!

[معتصم سليمان بابكر]

لكن يافيفيد

أتاريك مقرم بشكل

غايتو الليلة والليلة

وانا مابتكلم

[البرينسيسه]

حرااام عليك يافيفيد طلعتنا انحنا العايشين فى الخرطوم ديل كيش
الله اسامحك

[ملاذ حسين خوجلي]

صباح الخير فيفيد

لك التحية

ان شاء الله بس ناس كلتوم والشول وسعاد المابتبور ابدا ان شاء الله وفوزية ونعمات ما يزورونا فى الحارة

بس عليك الله قول ليهم اجوا يحرروا لينا اعراس ناس منتدى رفاعة ديل واحد واحد

وسعاد دي هههههههههه بجيب ليها عريس

الف شكر على هذه الروعة

وعلى فكرة معليش جات متأخرة الف مبروك الزواج وبيت مال وعيال ان شاء الله

سلاماتي

[vivid]

[align=justify:d250a5e414]
الضناقلة قالوا هم ملوك الميلوحة و القراصة و الشفتنة . . الآخيرة دي عندي فيها شكك . . وحاااات سيدي الحسن لا شفوت و لا شافوا الشفتنة . . و الشفتنة البقوا فيها الضناقلة ملوك دي شفتنة طايرة عليهم . . شفتنة قطاع طرق . . تشتري الكورية من محمد . . بعد ما تدفع ليهو قروشو . . يديك الكورية بدون غتاية . . يقول ليك أمشي اشتري غتايتها من هارون . . دا كلو عشان تدفع مرتين . . و الله دي لا شفتنة و لا حاجة . . دا قلع عديييل . . همبتة بي طرق علمية . . نان كان مشيت لي هارون و قال لي كوريتك دي ما لقينا ليها غتاية مقاسا . . اكون اتمقلبت . . و ركبت التونسية . . و كوريتي اللتغشيت فيها دي بعد دا عيلا اسويها طاقية . .[/align:d250a5e414]

[align=justify:d250a5e414]كما أن الضناقلة هم من اكثر القبايل السودانية ترويجاً و تسويقاً لمنتجاتها الغذائية . . و ليهم باع طويل في الدعاية و الإعلان . . عشان كدي بقوا مشهورين . . بالقراصة و الميلوحة دون غيرها . . يقال أن أول من أدخل الدعاية و الإعلان في التلفزيون كان ضنقلاوياً معتقاً . . و مختوم ليهو في قفاهو انو ضنقلاوي حفاظاً على حقوقه من الضياع . . عشان بعدين ناس التلفزيون ما يقوموا يستكرتو . . و يطلعوهو ملوص . . يمكن يقولوا ليهو غور كدا و الا كدا . . ما عندك حاجة عندنا . . ناس التلفزيون بعملوها . . قبل كدي استكرتو هاشم صديق في قصايدو . . الزمن دا كلو أبو عركي يغني و يبرطع في التلفزيون . . و يغمت في القروش و يقش في خشمو . . بغم ما قاعد يقولا لي هاشم . . هاشم المسيكين طلع ملوص . . هسي هو حردان و فاتح في أبوعركي قضية تعويض . . انتو بالصح أبو عركي دا فيهو عرق ضناقلة؟؟؟ . .[/align:d250a5e414]

[align=justify:d250a5e414]حبوبتي الله يطراها بالخير . . كانت من المستنكرين للعلاقة بين طبيعة الضناقلة كبشر . . و الميلوحة التي تُحنط و تُدفت في باطن الأرض لشهور عددا . . و هو ما ترفضه الطبيعة البشرية . . و تستهويه الطبيعة غير البشرية . . كانت بتقول لي . . يا فيفيد . . الضناقلة ديل أبعد منهم . . ديل سحاحير و بعاعيت . . عندهم جزيرة اسمها (جزيرة ناوا) . . مليانة سحاحير و بعاعيت . . قاعدين يتمعرفوا فيها كل يوم الساعة 12 بالليل . . و ما قاعدين ياكلو شيء عيلا تماسيح و سمك . . و نحنا العورا واثقين فيهم . . و مخلنهم حايمين وسطنا . . و يا فيفيد لو لقيت ليك ضنقلاوي طايبو و سالمو . . لكن ما تزعلو . . كان زعلتو بسل ليك ضنبو . . و ياكلك في لقمة واحدة . . الكلام دا حيرني حيرة شديدة خلاس . . بقيت قدر ما اطلع الشارع اقعد اتلفت . . لو شفت لي واحد خاتي ليهو جزلان في جيب بنطلونو الورا يقوم يتوارى لي انو دا ما جزلان . . دا ضنب . . ضنب ضنقلاوي . . اذاً دا سحار يمشي بيننا . . اقوم انكرب فسرع فسرع و ازوغ منو.[/align:d250a5e414]

[align=justify:d250a5e414]كلبي في البيت . . اليوم داك جاب ليهو كرع خروف . . ما عارفو جابا من وين . . حفر ليها في نص البيت . . و دفنها . . اتذكرت كلام حبوبتي . . و اتذكرت ميلوحة الضناقلة . . قلت يمكن كلبي دا كلب ضناقلة . . يقوم ينقلب لي سحار . . و تاني يحلني الحل بلة . . انتو بلة دا منو؟؟؟ . . و مالو؟؟؟ . . الله يستر ما يكون كان موكر ليهو مع ضناقلة.[/align:d250a5e414]

[align=justify:d250a5e414]قناة ناس النيل الازرق . . الله يديهم العافية . . عندهم مذيعة . . كانت بتقدم ليها برنامج اسمو (مزازيك) . . اليوم داك سمعتها قالت . . مرحباً بكم في برنامج (بعاعيت) . . النوم طار لي . . و قلت احسن حاجة أقفل التلفزيون . . الحكاية جابت ليها سحاحير و بعاعيت . . المذيعة خشمها قدر مطبقة حبوبتي . . اليوم كلو قاعدة تلملم في خشما . . و انا العوير كنت براقب فيها و مستنيها تقفل خشما . . بس انت يا الخشم ابيت تنجمع . . في النهاية قامت فقعتها ضحكة مع ضيف الحلقة . . بعد ضحكتها دي قنعت من قفلة خشما . . قلت بعد ضحكتها ذات السلم السباعي دي الله اعلم خشمها دا ينقفل قريب . . المذيعة دي كنت زمان مفتكرها. . يا إما شلاليفها قصار . . و الا خشما مقاسو اكس لارج . . لكن بعد السمعتو من حبوبتي دي . . البت دي ظنيتها دنقلاوية.[/align:d250a5e414]



[align=justify:d250a5e414]فيفيد في 24/12/2005م
مع الاعتذار[/align:d250a5e414]

[محمد عثمان عبدالقادر السماكي]

والله يا فيفيد إبدااااااااااع عديييييييييييييييل كدا...الواحد غايتو مواضيعك
لمن ابداها لو ما انتهى منها ما بسيبها ..الله اديك العافية..

[bakry Almahi]

هي اخير ليك ما تنبز الدناقله ديل . لانهم نسابتنا

[حسين الامام]

الي فيفد اقول البشوفك يقول الغنماية تأكل عشاك !!!! لكن يما تحت السواهي دواهي وأنت داهية من دواهي العرب الظاهر انو حيكون في منافس للكاتب الروائ الكبير الطيب صالح وأقول لك مزيد من الابداع والتألق ..

والي ان نلتقي فيس توفيس عشان عندي ليك مفاجئات......

[فائز عثمان التوم]

الولد فيفيد:
أنت ما عارف أنو أي نشر عن حي البهله دة عايز تصريح خاص من سلطات عليا, لأنو حي ختير, ذي الحي اللاتيني في باريس. وكمان الشخصيات الساكنة الحي عندها حصانة دبلماسية ومحمية دوليا"
وعلى رأسهم عمنا (الفنجري) . عشان كدة أعمل حسابك وما تدخل نفسك في مشاكل دولية, وإلا حتلقه نفسك في قوانتانامو.

مبروك العقد سبقتني يا ولد وأنا أكبر منك


فائز عثمان

[صديق الاخضر]

سلامات وعوافى
فيفيد الشفت
http://www.rufaaforall.com/board/uploaded/628_1160360805.gif
تصوم وتفطر على خير

[معتصم سليمان بابكر]

فوووووووووووووق

لمن فاته الاطلاع

اليكم بعض من روائع فيفيد

[جمال عثمان نصر]

فوووووووووووووق

لمن فاته الاطلاع

اليكم بعض من روائع فيفيد



الوريف معتصم سليمان
اثنى
فووووووووووووووووق فى السماء
فيفيد رجل مبدع بكل ما تحمله الكلمه له قدره تصويريه ابداعيه راقيه بقليل من التشجيع والاهتما م سوف يغدو علما ورقما بارزا هادى الطبع نظيف الدواخل كثير التامل ما اجتمعت هذه الصفات فى شخص الا كانت سببا فى نجاحه وتفوقه
التحيه لاخونا فيفيد ونتمنى ان يتحفنا بتلك الروائع النفيسه وان يطلق العنان لخياله الخصب وسرده الجميل الاصيل
ونحن فى انتظار المبدع فيفيد وشكرا المعتصم على التزكير بالروائع
عند لفتك الجميله
قضينا اليوم سهره ممتعه مع فوراوى وفيفيد على مائده دسمه وكعادته كان كثير السرحه شارد الزهن
الولد ده الظاهر بدور اعرس:mh2356:

[التهامي حميد البنا]

أول مرة أصتضم بيك ياشفت وربنا يستر علينا من عضلاتك
الموضوع رائع والخيال خصب والكلمات جزلة واللغة من نوع ( السهل الممتنع )
فجزيت خيرا على ذلك 0
ورجاء خاص أن لا تتعشى بالكنافة حتى لاترى
في المنام ( سلافه الكنافه )
لك شكري وتقديري وإعجابي 0

[جبصي]

الوريف معتصم سليمان
اثنى
فووووووووووووووووق فى السماء
فيفيد رجل مبدع بكل ما تحمله الكلمه له قدره تصويريه ابداعيه راقيه بقليل من التشجيع والاهتما م سوف يغدو علما ورقما بارزا هادى الطبع نظيف الدواخل كثير التامل ما اجتمعت هذه الصفات فى شخص الا كانت سببا فى نجاحه وتفوقه
التحيه لاخونا فيفيد ونتمنى ان يتحفنا بتلك الروائع النفيسه وان يطلق العنان لخياله الخصب وسرده الجميل الاصيل
ونحن فى انتظار المبدع فيفيد وشكرا المعتصم على التزكير بالروائع
عند لفتك الجميله
قضينا اليوم سهره ممتعه مع فوراوى وفيفيد على مائده دسمه وكعادته كان كثير السرحه شارد الزهن
الولد ده الظاهر بدور اعرس:mh2356:

يا جعبوز

من عرفتك زول بتقول النصيحة وما بتاع مجاملات البتة

دحين يا أخوي المجاملة الشديدة ما في ليها داعي

غايتو إلا تكون بتتكلم عن زول تاني

أما فيفيد الأنا بعرفو دة

لا يمت لما قلت بصلة

[علي فوراوي]

يا جعبوز

من عرفتك زول بتقول النصيحة وما بتاع مجاملات البتة

دحين يا أخوي المجاملة الشديدة ما في ليها داعي

غايتو إلا تكون بتتكلم عن زول تاني

أما فيفيد الأنا بعرفو دة

لا يمت لما قلت بصلة



جبصي صباح الخير
فيفيد مبدع وبجيبوا في الجرايد
وجعبوز بقول الحقيقة

في جمالك في دلالك في دلالك


فوراوي ،،،

[جبصي]

دحين يا خوي ما كترت البهارات شوية

عشرقت لينا يا جعبوز

:mh14:

[جبصي]

جبصي صباح الخير
فيفيد مبدع وبجيبوا في الجرايد
وجعبوز بقول الحقيقة

في جمالك في دلالك في دلالك


فوراوي ،،،

قصدك الجرايد الحائطية
:mh14:

[بنت العبادي]

الكاتب فيفد ...
انت زوووووووووووووووول مبدع عديييييل!!!!!
مخبي امورك دي وين انت !!!!!!!!!
وبعد خلاص اقنع .. من العضلات دي...
خلاص راحت عليك ياخوي....!!!!!

قصدك الجرايد الحائطية

غايتو الحاسدين بقو كتيرين ومسيخين
وجابو ليها كمان قوة عين ... ياكافي البلا !!!

[جبصي]

الكاتب فيفد ...
انت زوووووووووووووووول مبدع عديييييل!!!!!
مخبي امورك دي وين انت !!!!!!!!!
وبعد خلاص اقنع .. من العضلات دي...
خلاص راحت عليك ياخوي....!!!!!



غايتو الحاسدين بقو كتيرين ومسيخين
وجابو ليها كمان قوة عين ... ياكافي البلا !!!

أثبتي على حاجة واحدة

كتيرين ولا مسيخين

[جمال عثمان نصر]

يا جعبوز

من عرفتك زول بتقول النصيحة وما بتاع مجاملات البتة

دحين يا أخوي المجاملة الشديدة ما في ليها داعي

غايتو إلا تكون بتتكلم عن زول تاني

أما فيفيد الأنا بعرفو دة

لا يمت لما قلت بصلة

جبصى الرائع
نهارك سعيد
كدى فى الول زى ما بقول مبدعنا فيفيد كلامك ده كلام غيره سااااى ظنيتو زولنا ده نحنا عارفنو كويس مسكون بالابداع
واعمل حسابك ما اقرا كلامك ده اقوم انزل ليهو بوست فيك

[معتصم سليمان بابكر]

الوريف معتصم سليمان
اثنى
فووووووووووووووووق فى السماء
فيفيد رجل مبدع بكل ما تحمله الكلمه له قدره تصويريه ابداعيه راقيه بقليل من التشجيع والاهتما م سوف يغدو علما ورقما بارزا هادى الطبع نظيف الدواخل كثير التامل ما اجتمعت هذه الصفات فى شخص الا كانت سببا فى نجاحه وتفوقه
التحيه لاخونا فيفيد ونتمنى ان يتحفنا بتلك الروائع النفيسه وان يطلق العنان لخياله الخصب وسرده الجميل الاصيل
ونحن فى انتظار المبدع فيفيد وشكرا المعتصم على التزكير بالروائع
عند لفتك الجميله
قضينا اليوم سهره ممتعه مع فوراوى وفيفيد على مائده دسمه وكعادته كان كثير السرحه شارد الزهن
الولد ده الظاهر بدور اعرس:mh2356:

تعرف ياجمال

اول ما اتعرفت على فيفيد ده في جدة
وعرفت نوع كتاباتو وابداعو
قلت ليهو يافيفيد انا لو قلت ليك
حتكون الطيب صالح نمرة اتنين
بكون ظلمتك
لكن حتكون الكاتب عثمان عبدالمنعم طه

وفي نفس اليوم داك سألتو من فيفيد معناها
شنو ؟؟ وشرحها لي

شكرا ليك ياجمال وانت تثني رفعنا

[محمد صالح]

فيفيد راجل مبدع حقيقي

[عوض أبوسن]

الله يطراك بالخير أخ محمد صالح
أخونا الحبيب فيفد الله يطراه بالخير
من عرس غتس فد غتسه :SnipeR (15):

معك نطالب بعوده الود المشاغب
له ألف سلام

[صديق الاخضر]

سلامات وعوافى
فـــــــــــــــيفـــــــــــــــــــــــــد
ســـلافة بتسأل منك
وكل المتداخلين هناء اين انتم
رمضان كريم عودو كما عوتمونا
الزمن الجميل

[راشد بلال]

يادوووب الليلة طب وقعلي منو هو مااازن ..

وانا أشيل وأخت ،، أخت وأشيل ،، وأقول الجنى دا مالو فاقع مرارة المؤسيقار ..

أتاريك ليك زمن تشيل وتنجض فوق المؤسيقار ..!!!

واتاريك يالمؤسيقار إت مازن ونحنا مانا خابرين ..

وحات خوتك يافوفو لو ماك جب خبر الحبة الدهنية لايوم باكر ماكُت جب خبرو ..

أصلو هو متصور معاي زماااان أيامها كانت ملتهبة ومورمة جضمو .

دا لمينا فوكو .. الله يلمني فوق العرجونة سلافة ..