المساعد الشخصي الرقمي

مشاهدة النسخة كاملة : مسدار يا اهل المسادير


الصفحات : [1] 2

mohamed merghani
04-27-2007, 09:24 AM
جيت أبيع الموية للسقّا إبن السقّا
سيلكم عمّ ساسى وليهو نخّر وسقّي
يا أهل السدار مسداركم لعروقنا بلّ وسقّى
وروضة كلامنا اليانع بلحيل تدور تتسقّى

من فصاحة داركم ببين بعيد الشُقّـة
بحاول أجاري كلامكم رغم العنت ومشقّة
مرّات أنوح مجنون قافل على الشقّـة
وأحيانآ أضحك سااااى لمّن أكاد إنشقّ

بان شرابكم حالى يسكرني بي فد بُـقّة
يا النور بهاكم طالع فى الدنيا ساطع بقّ
قولوا نم مسداركم الفيهو وصفآ دقّ
وجيبوا عنجآ لاذع اليوم بدور إتدقّ


مانى ود البادية بعرف غريب ألفاظا
بس عين الإله للساني تب حفّاظة
حلوقنا واعيات ديمة للشينة ما لفّاظة
وسمح الكلام بنجيبو زي زهرة فوق الفاظة

mohamed merghani
04-27-2007, 09:31 AM
أهل الفصاحة سلام كيفن يغيب مسداركم
وإنتو ناسو وأهلو ونشـأ زمان فى داركم
ود مرغني الغنّاي عارف عظيم مقداركم
جايي بس إتعلّم ويدور فى سامي مداركم

mohamed merghani
04-27-2007, 09:38 AM
ما تقولوا شن مقداري وأنا الجديد البحبي
يمين تسيروا معاي نلقالنا ساحتآ رحبة
إيدينّا متماسكات لامّـانا أجمل صحبة
والما عندو عجلـة برضك بياخد سحبة

mohamed merghani
04-27-2007, 09:56 AM
لى مدّة غايب وجيت ولقيت هناك إنذاري
المانى فاهم حكمو عشان التزم بحذاري
أسباب غيابي كتيرة وواحدة من أعذاري
عندي نذرآ قاطع ولازم أوفّى نـذاري

mohamed merghani
04-27-2007, 10:06 AM
أرجوني بكرة بجيكم من صباحآ بدري
عشان نتلمّ جملة نشهد مطالع البدري
نقول للكل كلامنا للبدري والما بدري
كل يوم مجلسنا معروف فى ساحة بدري

mohamed merghani
04-29-2007, 10:20 PM
يا أخويا القلب حسابو كلو ملخبت
مشاعرو بتندفع وأصلو ما بتثبت
إن غاب العقل في غفلة راح إتخبت
يا دوبو الضياع قامت فروعو ونبّت

في فصول الحب قلبي إتملحق وربت
والنفس الدنية يا أخويا ما إتربت
كلما شحمها يقوم قوام بسيح ويتربت
ومافي زولآ حاني في كتفي ساكت ربت

في درب الغرام كم عيونآ كبت
والقلب الحسير في قيدو ذاب وإتكبت
يتاوق بحسرة زي اللصوص يتلبت
والمحبوبة في طناش لنداهو قط ما لبتّ

mohamed merghani
04-29-2007, 10:25 PM
السيل الجرف ما بتصمد أمامو الجمرة
والعادات جبل خطوطا دايمآ حمرة
يا العادم الكفاءة عقلك بدور العمرة
كيفن أبوالدرداق بدور يعرس قمرة

أصلو الكفاءة قروش ياريت تجيك منهمرة
كل يوم تصبح عريس كارفاك ريحة الخمرة
الفلس الشديد لخبت عليك حال سمرا
خلاك تكوس في مكة الزوغة قبل العمرة

الفلس الشديد أشد خبثآ ومكرا
بخلي العشوق كل يوم بفارق مكره
عشان يدبر حالو غالباهو والله الفكرة
مترجي العشم والخوف الشديد من بكرة

mohamed merghani
05-01-2007, 08:49 AM
فى حب السدار رويحتي جات إنجرفت
من بحرو العظيم كم بالجرادل غرفت
سارت عديل فى دربو وحاشاها ما إنحرفت
ريحة دعاشو النادي كم للعشوق قد كرفت

جيتكم أمل سابقني وعيني قط ما طرفت
قلت ناس الهُوى يداووا العيون الذرفت
فاتح غُرف قلبي وعنى الخلوق إنصرفت
يا ناس رفاعة الآن الفيكم يمين إنعرفت

فور وول إسم طابور محصور مخصّص ناسو
والضيف الجديد ليهو الخلوق بتنـاسوا
ما بشحـد كرم للجـود أكـون حـنّـاسو
والقول الصريح بعرف أجيبو جناسو :mad:

عبدالله السفاح
05-01-2007, 01:03 PM
حبيبنا ود ميرغني

أنا جنس قولك دا تب ما بعرفوا
ما بقول غير اصبر بجيك البخبرو
يازول ألف مرحب بيك ودارنا قط ما تهجرو

ابوزاهر
05-01-2007, 01:53 PM
آخوانا زولا يقارع ود المرغني ساي مافي كلكم ناس خرتوم

معتصم سليمان بابكر
05-01-2007, 02:03 PM
فى حب السدار رويحتي جات إنجرفت
من بحرو العظيم كم بالجرادل غرفت
سارت عديل فى دربو وحاشاها ما إنحرفت
ريحة دعاشو النادي كم للعشوق قد كرفت

جيتكم أمل سابقني وعيني قط ما طرفت
قلت ناس الهُوى يداووا العيون الذرفت
فاتح غُرف قلبي وعنى الخلوق إنصرفت
يا ناس رفاعة الآن الفيكم يمين إنعرفت

فور وول إسم طابور محصور مخصّص ناسو
والضيف الجديد ليهو الخلوق بتنـاسوا
ما بشحـد كرم للجـود أكـون حـنّـاسو
والقول الصريح بعرف أجيبو جناسو :mad:

مرحبتين حباب ود الاكارم
الجاي جاري النم
اتلومنا فيك الا العذر بنتم
أملك مابخيب وحاشاك مابتندم
كان ود الخدر فينا كان لاقاك
وليك ناضم

فور اوول انت منو وفيهو
ورفاعة البليب ضيفها بترضيهو

ود الميرغني يا أخي والله فترت وانا مازول مسادير
بس والله شعرت باللوم الكاسيني بعدقريت كلامك ده
وفهمتو واتمنيت لو ود الخدر قاعد اليومين ديل كان
جادعك سمممممح (حاتم الخضر)

الف مرحب بيك ياعاشق المسادير والظاهر اننا في
مواجهة زول ماهين . . . . .

علي فوراوي
05-02-2007, 08:38 AM
من ديم العوض للطفي نحنا أحباب
جونا ناس ام در وبقولنا اصحاب
شايلين شوق وسلام يسر الالباب
عامر دايم منتدانا البيهو بقينا قراب


ظهر منتدانا وجانا ودمرغني مطايب
رافع مساديرو قال أنا عشوقا دايب
لاهل رفاعة وقراها أنا جايب
سمح الكلام البيهو يعود الغايب



فوراوي ،،

عبدالله السفاح
05-02-2007, 09:40 AM
من ديم العوض للطفي نحنا أحباب
جونا ناس ام در وبقولنا اصحاب
شايلين شوق وسلام يسر الالباب
عامر دايم منتدانا البيهو بقينا قراب


ظهر منتدانا وجانا ودمرغني مطايب
رافع مساديرو قال أنا عشوقا دايب
لاهل رفاعة وقراها أنا جايب
سمح الكلام البيهو يعود الغايب



فوراوي ،،


العزيز فوراوي

قمة الابداع .... اها يا ود ميرغني جوك ناس ابوسن
رايك شنو ؟؟؟؟

mohamed merghani
05-02-2007, 09:58 PM
رياح سداري الليلة جاتا ريح منخفضة
خلّت كركعوبتي دايرالا أكبر نفضة
عشان نلازم الدرب الناس تكون منتفضة
وبرجع أرد للكل خلّوني ساكت أفضى

Wad Gaily
05-05-2007, 12:42 PM
يا ود مرغني يا أخوي كلامك زين
مسدارك سمح نضمك جميل ما شين
فيه فصاحة تب وأيضاً التلحين
وأنا زولاً جديد في سكة السالكين
ولك كل الود والشعر الشعبي من أجمل وأصدق الشعر .

mohamed merghani
05-06-2007, 11:09 AM
حبيبنا ود ميرغني

أنا جنس قولك دا تب ما بعرفوا
ما بقول غير اصبر بجيك البخبرو
يازول ألف مرحب بيك ودارنا قط ما تهجرو


يا عبد الله أخوي ليك الشكر بتحاول
الكرم الوفير لعلاك يجيك متطاول
من قومة الجهل كم للفقير بتناول
بنيت علاقات ياما يا العشت فينا مقاول

mohamed merghani
05-06-2007, 11:16 AM
آخوانا زولا يقارع ود المرغني ساي مافي كلكم ناس خرتوم

لو قلت للخرطوم أخوك سكن ما جارو
ماني جيت متحدّي قاصد فحولنا يجارو
القول الرصين كيفن بكون نـجّـارو
وأنا الجيت مؤمّـل يجوني ناس يتجارو

mohamed merghani
05-06-2007, 11:23 AM
مرحبتين حباب ود الاكارم
الجاي جاري النم
اتلومنا فيك الا العذر بنتم
أملك مابخيب وحاشاك مابتندم
كان ود الخدر فينا كان لاقاك
وليك ناضم

فور اوول انت منو وفيهو
ورفاعة البليب ضيفها بترضيهو

ود الميرغني يا أخي والله فترت وانا مازول مسادير
بس والله شعرت باللوم الكاسيني بعدقريت كلامك ده
وفهمتو واتمنيت لو ود الخدر قاعد اليومين ديل كان
جادعك سمممممح (حاتم الخضر)

الف مرحب بيك ياعاشق المسادير والظاهر اننا في
مواجهة زول ماهين . . . . .

ياها المؤمّلة فيكم وأصلو العشم ما خاب
فى ساحة رفاعة نشرب هوي الأنخاب
جموعا جاية بفرحة وهادرة فى تصخاب
وجدت هناها الكامل هلالاب ومرّيخاب

mohamed merghani
05-13-2007, 09:40 AM
أب خلقآ عظيم مدحو الإله فى كتابو
أدّاها الأمانة ونصح الخلوق بخطابو
بى ذكر الحبيب نفوسنا عمروا وطابو
ساءلين الإله نمشي ونزور أعتابو

الصلاة والسلام عدد العصاة النّابوا
تغشي المصطفى تسكن هناك فى جنابو
تقهر للّعين الفينا كشّـر نابو
تقطع دابرو تب وتطمس على أذنابو

فى حب المصطفى كم قلوبآ دابو
وقلبي قام من غفلة الليلة صحصح دابو
والطرف الحسير بدموعو غسل أهدابو
ومديح المصطفى أنشد غناهو شدا بو

جيتك يا الرسول وعزايمي جد إنصابو
وصنم المهالك شامخ واقفين على أنصابو
ما فينا المزكّي ومالو تامّـى نصابو
وما فينا المصلّي الفرضو إتوصّـى بو

راجيين الشفاعة الليها الجموع إتشابو
فى يومآ رهيب فيهو المراضع شابو
ود ميرغني المحسور بحر الذنوب كم شابو
شارب من مياهو ومتغذّي بى أعشابو

بى حبّك مؤمّل فى الآخرة يلقى ثوابو
ينغسل الدرن الحـلّ فى أثوابو
باليد اليمين نشرب حياض أكوابو
والفردوس يرحّب وفتح عريض أبوابو

الصلاة والسلام تلازم الرسول فى ركابو
فى الحقب المضت والجايي من أحقابو
وإبليس اللعين مردود على أعقابو
يتدمّر خذول وفى الآخرة يلقى عقابو

mohamed merghani
05-13-2007, 09:44 AM
يا الزاد نواك أنا في هواك قلبي فاقد البوصلة
ولو تطول بينا المسافات كيفن ديارك بوصله
كم عشت مكسور الجناح عصفور وخاوي الحوصلة
مجنون أعيش والكهربة سلوكا فيني موصلة

mohamed merghani
05-13-2007, 09:46 AM
في الحب والهيام يا أخويا كان شن لينا
راجين الوصال يهب نسيمو علينا
بي موية الرهاب كم لي شباكنا ملينا
وفي مهب الريح طايرين تقول فللينة

mohamed merghani
05-13-2007, 09:49 AM
بحور الشوق بخوضا براى وأقاسي الحب هوان وحروق
جروح الريد علاجن صار أخو العنقا يمين ما شفت أىّ فروق
نحول جسمي وذهاب عقلى ونوم العين دوام مسروق
وفى حب الحسان الغيد صرت شهيد ومكتوب لىّ تب ما أروق

mohamed merghani
05-13-2007, 10:02 AM
كل ما يطول غيابي تزيد معاهو شجوني
والقيد المتلت حابسني جوة سجوني
أطري أم قوامأ لادن الضامر العرجوني
يا ريت الحلم يتحقّق وأحبابي مرّة يجونى

نجمات السحر ساهرات معاي ناجوني
نسوني الهموم والقعدة عند ناس جوني
بي ذكرة أمدرمان بي ناسي كم حجوني
وذكرت ود البنا وذبت في الفرجوني

mohamed merghani
05-13-2007, 10:09 AM
جيش الغرام من بدري لي روحي شن غزا لا
بقيادة مليح بي طرفو يرنو غزالة
أشجت شغاف الروح لمن بقت غازالة
ولي نسيج أشعارو بلحيل بقت غزّالة

mohamed merghani
05-13-2007, 10:10 AM
نشوان الحروف سويتو مركب ساري
للشوق البفيض ويملا يميني يساري
سابح في الخيال ممدود طريقو مساري
أنظم في غناك وأحيا وأموت بحساري

mohamed merghani
05-13-2007, 10:14 AM
الليلة الغرام جمّع جنودو وجانى
غزا وإنتصر وسجنّـي زي الجاني
يا رب العباد خالق البشر تحجاني
تجمع شملي بالأهدر دماي مجّانى

mohamed merghani
05-13-2007, 10:18 AM
السمحة أم حروفآ بشبه بناها حروفى
زي سنبل نضير شرّف نواحى جروفى
فى جنب البحر ساكن هناك فى أب روفى
كل ما أقول أجيها تمنعني والله ظروفى

mohamed merghani
05-13-2007, 10:20 AM
شيطان السدار بالله اقعد ساي
ما تشاغل زول قلبو الجريح نساى
كيف اكون نظام بفن البديع كساى
وانا فى غربة ما بقدر اقولو رثاى

ضاع جمال معناى باهت كلام انشاى
وفراق ام خدود جمرة فى احشاى
محال انسى ربعك يا ام درر حاشاى
بدور قعدة جنبك وكيفنا جبنة وشاى


طريت محيا الحبيب جبينو شع ضواى
اثار كوامن شوق عايشة فى جواى
بدور اليها القومة بس قيدى جد لاواى
وفكرى اصبح عزمو حداث وما سواى

فى بلد التغرب ضيقة جد دنياى
ولى سك المعايش نططت زى الياى
والليلة صار املى والله وكل مناى
انجم فيك يا امدر بصوت الوتر والناى

mohamed merghani
05-13-2007, 10:22 AM
وجدي زايد زايد وللدموع ما حابس
جابراني الظروف للغربة أجرى أكابس
واصبح حصادى سراب ووجه صارم عابس
وقلبا جد حزين وريقى ناشف يابس

mohamed merghani
05-13-2007, 10:24 AM
لى فضل الكريم نحمد نزيد فى شكرو
أصلو ما ناكرنّو وبالخير نوالى فى ذكرو
لكن الزويل مطموس دوام فى فكرو
من أوّل ملف تلقاهو باين كفرو

الخل الوفي ذكّرنى أنعام ربّي
والذكري تنفعني ولى قلبي ديمة تربّي
أحمدك مولاي مهوّن لى أكلي وشربي
وفيك زايد عشمي تهديني تكشف كربي

mohamed merghani
05-13-2007, 10:26 AM
قمر السبعتين إنتي والندادة كواكب
في الثوب القشيب بتقودي أحلي مواكب
بس صادة ونفورة لمشاعري ما بتواكب
دا السهر عيوني وخلاها جارية سواكب

mohamed merghani
05-13-2007, 10:28 AM
الزول اب هموم بصعب عليهو رقودو
كيف حيقدر انوم لو ما اتوجد مفقودو
والخشوم فاتحات ما بتكفى ليها نقودو
والببرى الغنم على الزريبة تقودو

mohamed merghani
05-13-2007, 10:32 AM
أصلو النصيب مقسوم وناسو لازم يرضو
فى اللوح المسطّـر المولى فارض فرضو
كلّ كائن بحيا فى سماهو وأرضو
مهما يحصل ليهو بكون مسلّـم برضو

mohamed merghani
05-13-2007, 10:33 AM
المولى الكريم نشكر دوام انعامو
جودو لى مخلوقو هدايتو بل اطعامو
ورزقو غامر قوما عن عبادتو تعاموا
وحلمو سابق غضبو بغفر ذنوبا عاموا

mohamed merghani
05-13-2007, 10:34 AM
وادينى وين يا قلبى يا الفى الحرام مغموس
دايما اراك لى غلبى جايب رغيف وغموس
لهلاكى ما بتتكلف شايفك دوام مطموس
حالف يمين يا الاغلف تضوق طهور الموس

mohamed merghani
05-13-2007, 10:36 AM
عشان اقهر لعينى اعلنت استنفارى
زايدة كل اورادى خصوصا استغفارى
بس ابليس لعين متابعنى فى اسفارى
ما براعى الاصول ودايما بشوت ضفارى

mohamed merghani
05-13-2007, 10:38 AM
الليلة جاتك اية فى وضوحا ناقة صالح
ارضى يوت بنصيبك للنفس هادن صالح
واجعل كل شغلك فى الدنيا عملا صالح
وخلى الصداقة تبرى من كل غرض ومصالح

mohamed merghani
05-13-2007, 10:39 AM
لو مالك كتر الناس بجوك فرادى
تصبح مغنطيس تجذب حديد وبرادة
ولو الحال اتقلب بجفوك اهل وفرادة
ما اصلو المفلس سنيح ودمو قرادة

mohamed merghani
05-13-2007, 10:41 AM
الظبية الشريدة السارحة فى وديانا
حلات الخدرة فوقا مترّعة ورويانة
ما مسخت وجيها بى كيلى وللا ديانا
زي كومر قديم كل يوم بدورلو صيانة

mohamed merghani
05-13-2007, 10:43 AM
فى عتبة الدار اليوم قعدت متفّـن
أرقب المارّين وفى قلبى شوقى مدفّن
بريت بنات أفكاري بى غادى لمّن لفّـن
وبس فاتن بعيد وضربت كـفّآ كـفّـآ

mohamed merghani
05-13-2007, 10:45 AM
كل لحظة تفوت الشوق سقاني حمي
ساكي الرهاب عشمان ألاقي جرعة مي
كل ما اقول وصلت أزداد عطش وظمي
أسقيني نبع حنانك حرام عليك يا مي

mohamed merghani
05-13-2007, 10:47 AM
يا كعبة هواي بديت معاكي طوافي
أرسم دهشتي وأنحت بهاكي قوافي
من حد الكمال قربتي أو بتوافي
يا نور البدور والله عوافي عواقي

mohamed merghani
05-13-2007, 10:52 AM
واحدين فى القصور يا أخوي سكونهم فيللا
فى الخيرات بتـسبـح لامّـة القـروش والفلّـة
وواحـديـن الفلس فـالّى النـفوس كم فلّـة
فى عنق الـزجاجـة ظـابط الـقفـل والفلّـة

mohamed merghani
05-13-2007, 10:53 AM
بالحب العميق صوتي مرفوع داوي
للساكن فؤادي ووجهو لامع ضاوي
زي بدر التمام فى الشكل بيضاوي
بالصد والوصال بجرح ومرة بداوي

mohamed merghani
05-13-2007, 10:54 AM
الحال فى وجع من غربة هدّت حيلنا
والناس الهناك تب ما بتقول يا حليلنا
دايرين القروش ومرسالا زايد ميلنا
كل ما نقول جمعنا , تبرك وحاتك خيلنا

mohamed merghani
05-13-2007, 10:55 AM
الدنيا العبوس كل يوم يفور تنّورا
ينضح بالمصايب طافى لمعة نورا
تقلع فى المسا الكان حبت فى بكورا
ما بتدوم فى حال وبينا لاعبة الكورة

mohamed merghani
05-13-2007, 10:58 AM
الفارق ديارو يا اخوي بلاقي هوانو
وفي الغربة اللعينة بعيد حنان اخوانو
وجيوش الهموم بتصيبو ما بتوانو
والشيب والعجز بجيهو قبل أوانو

mohamed merghani
05-13-2007, 11:00 AM
ولما الشوق يزيد منسوبو بسرح مالي
أعانق بقعة ام درمان محط أمالي
خيالا يلوح يحاصرني يميني شمالي
بدور أرجع وفير الزاد بعلمي ومالي

mohamed merghani
05-13-2007, 11:03 AM
سهام الغربة مسمومة واذتنا أذية
بشوفا تجور وقارصة علينا بالزردية
ناشفة أياما ماها زاهية ماها ندية
وردتيتين شغل والراحة نص وردية

من أمر الغنيمة قنعان أخوك بالمرة
بس دايرين نعود من غربة قاسية ومرة
تسرق نور شبابنا كل ما الزمان طال مرا
وقديم قال المثل الزول بعيش فد مرة

mohamed merghani
05-13-2007, 11:07 AM
النار في القلب يا اخويا شابة خلاص
وما لقينا أصلو من هوي الشابة خلاص
قلبي الكان حزم الليلة ما رخي لاص
من عمايل جاهلة ما بتعرف الإخلاص

mohamed merghani
05-13-2007, 11:09 AM
النار في القلب جمرة بتبق حراقة
والدنيا العبوس يا اخويا جد فراقة
تخدع بالوصال وزي السراب براقة
واتسيك أخوك الما لاقي ليو مراقة

mohamed merghani
05-13-2007, 11:24 AM
كل الذكرتو الفات يا أخواني والله نماذج
من بعض المنتديات وماني المغفّل ساذج
يمين داير حروفكم لحروفى تأتي تمازج
وتشوفوا منّي الجديد القطعو أخدر طازج

mohamed merghani
05-13-2007, 08:56 PM
من ديم العوض للطفي نحنا أحباب
جونا ناس ام در وبقولنا اصحاب
شايلين شوق وسلام يسر الالباب
عامر دايم منتدانا البيهو بقينا قراب


ظهر منتدانا وجانا ودمرغني مطايب
رافع مساديرو قال أنا عشوقا دايب
لاهل رفاعة وقراها أنا جايب
سمح الكلام البيهو يعود الغايب



فوراوي ،،

فوراوي العزيز البي الخُلُق متحلّـي
جاب در الكلام وقصدني جوّة محلّي
جيت أجيب الرد ما عرفت ربطى وحلّي
بعد ما قلت يوت جيت بردّك أحـلّـي

Wad Gaily
05-14-2007, 09:57 PM
الغربة كم ذلت جني عزّام
خلت ليلو ليلين والشهر أعوام
ظروف الناس بتجبر والقدر حكّام
كتير أوضاع مريره بتفرضه الأقسام
ولك كل تقديري يارايع وواصل كفاحك ،،،،،،،،،،،،،،

mohamed merghani
05-14-2007, 11:38 PM
ا
ولك كل تقديري يارايع وواصل كفاحك ،،،،،،،،،،،،،،


مافى زرعآ مهمل براهو أثمر ونبّـت
وبقول براى الغفلة تبّـت يداها وتبّـت
بي ضفري بحُك جلدي بركز يمين وإتثبّت
وحروفى ديك نايرات فى ظهورا ما إتخبّت

ود قيلي شكرآ ليك شكرآ منافى الواسطة
يا الجيت سندت أخوك سندة راقية وظابطة
من شهرآ سبق أقوالى جات مترابطة
زي السدر بى هناك وأذّن براهو فى مالطا

فهمى بشير
05-16-2007, 06:22 PM
ياخوى الكلام منك جميل بالحيل
ناتج عن فهم ودرايه بالتحليل
ظاهر زول شعر بحرك قصير و طويل
متمكن خلاص ما تقبل التعديل

ود طابت معاك عايز يكون تلميذ
وريهو الحروف وعلمو التهميز
لو كان يوم دقس بى جهلو غلبو اجيز
افرشلو البرش واحرمو من الجيز

mohamed merghani
05-18-2007, 10:17 AM
ياخوى الكلام منك جميل بالحيل
ناتج عن فهم ودرايه بالتحليل
ظاهر زول شعر بحرك قصير و طويل
متمكن خلاص ما تقبل التعديل

ود طابت معاك عايز يكون تلميذ
وريهو الحروف وعلمو التهميز
لو كان يوم دقس بى جهلو غلبو اجيز
افرشلو البرش واحرمو من الجيز

مسدارك متين ماهو المرخرخ ربكة
حاويهو الجمال كم مرة أضحك وأبكي
الحروف مرصوصة جات فى إتساق منحبكة
جكس لبنان النضيف السوّي رقص الدبكة

ود طابت معاي إيدي بتصافح إيدو
والعهد المتين عازمين على تأكيدو
فى درب السدار سايرين لو جو العوادي يكيدو
وننثر للفرح فى قلب طال تنكيدو

ماني المحترف لكني زيّك هاوي
من سما المسدار جيتك متلّب هاوي
عاشق للشعر زي المتيّم وهاوي
عمّرت منتديات صاخبة ومعاها قهاوي

mohamed merghani
05-23-2007, 08:57 AM
أسبوع تمام متغيّب والحال مشابه حالو
لا ردّآ جديـد لا سدارنا زول بصحى لو
زي التكنّي غريب طالب أشوفو محالو
ما تعجبوا لو ود ميرغني فات وشدّ رحالو

خالد عثمان
05-23-2007, 01:27 PM
ود ميرغني الكلس إنت النضم جيّهتو
ورخيتلو اللجام ليهو الحبل طوّلتو
في أمهبج البراح جدول نغم سيلّتو
في دوحتك خلاس جملي تب عقّلتو

mohamed merghani
05-25-2007, 08:07 AM
ود ميرغني الكلس إنت النضم جيّهتو
ورخيتلو اللجام ليهو الحبل طوّلتو
في أمهبج البراح جدول نغم سيلّتو
في دوحتك خلاس جملي تب عقّلتو

يا خالد أخوي نضمك درر منظومة
أقعد مستريح ما احتجت لى عازومة
القوافى الشاردة بلحيل لزمت لزوما
عقّل حداى الجمل والصورة كبّر زوما

خالد عثمان
05-26-2007, 11:29 AM
الدرر الغوالي منك مدردقة ومنساقة
ومترتب كلامك ونغمتو جاية دقاقة
كان ماالظروف واحكام القدر فراقة
ماكان هجينامنو بلدنا لي غربة حراقة

mohamed merghani
05-27-2007, 09:59 AM
الدرر الغوالي منك مدردقة ومنساقة
ومترتب كلامك ونغمتو جاية دقاقة
كان ماالظروف واحكام القدر فراقة
ماكان هجينامنو بلدنا لي غربة حراقة

الغربة اللئيمة نيرانا حارقة كلاي
غاشّييني السراب اللاح بعيد لالاي
نصارع فى الظروف زي التكنّو كلاي
وفى الآخر بنهزم فارطات عديل أشلاى

حليل وطن الجدود يا أخوي حليل خلّاي
حليل قلبآ خشوع فى وقتو كان صلّاي
البلد النجس زايد علىّ بلاي
وزي المكنة ياخي مشغّلنا بالملّاي

خالد عثمان
05-28-2007, 03:21 PM
الغربة القهر فرقت حبيب من زولو
نشفت اللحم هرست عضم بي طولو
كم من زول حنين أهلو بيعاينولو
وهو مهود هناك إسم بلدو غالبو يقولو

mohamed merghani
05-28-2007, 10:16 PM
الغربة القهر فرقت حبيب من زولو
نشفت اللحم هرست عضم بي طولو
كم من زول حنين أهلو بيعاينولو
وهو مهود هناك إسم بلدو غالبو يقولو

فى الغربة اللئيمة العيش إتحرمنا لذيذو
ننوح نبكي البعاد زول إندعك فى عزيزو
وكم زولآ جهول ما انعرف تمييزو
حاسد للقرد على الحَمار فى ط......

خالد عثمان
05-29-2007, 10:06 AM
البلد العز هناك بي خيلا ونخيلا ونيلا
الكجر الكراه دوام متشالبنها هادين حيلا
كتر تنظير وجلبغة طول نهارها وليلا
بقت محتارة تب كايسة الهادي فاقدة دليلا

محمود الطيب
06-02-2007, 08:34 PM
انشاء الله دايما معاكم وتاني من بيت الكلاوي
شيطان قلبي قال لي كان جريت ماك مارق
من الشلخو شلبايه وتمانية مطارق
السبب الخلاني احسب الحسبة واصبح فارق
قنيديلاً بحلقاً فيهو سبعة جرارق
:mh08:

mohamed merghani
06-11-2007, 07:29 AM
انشاء الله دايما معاكم وتاني من بيت الكلاوي
شيطان قلبي قال لي كان جريت ماك مارق
من الشلخو شلبايه وتمانية مطارق
السبب الخلاني احسب الحسبة واصبح فارق
قنيديلاً بحلقاً فيهو سبعة جرارق
:mh08:

أهلآ مرحبابك وبنرد نقولا مراحب
ومن بيت الكلاوي جيب الدرر يا صاحب
غمرتنا السعادة يوم جيتنا لينا تصاحب
يا محمود أخوي أختالنا لونآ شاحب

أصلو الشوف طشاش وسنّي أصبح طاعن
وستّات الجمال كم قلبي لبّـي أطاعن
فى صميمو الجوّة كم جاهو سيفآ طاعن
جندلنّو وراحن ونازفة فيهو مطاعن

mohamed merghani
06-17-2007, 09:49 AM
يا السادة المشاهدين يا الألف وميّة وميّة
في الأول سلام ثمّ العتاب كميّة
لو قولنا ما عاجبكم ورّونا .. بنمحي للأميّة
ولو عجبكم تب تشجيعكم بزيدنا فى الهميّة

خالد عثمان
06-17-2007, 10:45 AM
الزول الأديب سيد الفــــــــــهم والراي
يوت نمّك بريدو وبحـــلّي بيه غـــــناي
يبعث فيني شوق لدواي الجايي منو أذاي
زيد القول وكتَّر أكيد ماني البريدو براي

mohamed merghani
06-17-2007, 11:11 AM
الزول الأديب سيد الفــــــــــهم والراي
يوت نمّك بريدو وبحـــلّي بيه غـــــناي
يبعث فيني شوق لدواي الجايي منو أذاي
زيد القول وكتَّر أكيد ماني البريدو براي

يا خالد أخوي ليك السلام يا دفعة
تشجيعك أكيد مدّيني قوّة ودفعة
دايرين نسو صندوق يلّاك أبدا الدفعة
عشان باقى الصحاب تصل سيول مندفعة

خالد عثمان
06-25-2007, 11:04 AM
أصلك يا التلب للقول خبير ومقارع
جيب خيط النضم خلينا ليك نجـــــادع
مايهمك طناشاً اصـــــــلو تب مو واقع
الناس كلهم بين مندهش وراخي أضاناً سامع

mohamed merghani
07-03-2007, 12:01 PM
أصلك يا التلب للقول خبير ومقارع
جيب خيط النضم خلينا ليك نجـــــادع
مايهمك طناشاً اصـــــــلو تب مو واقع
الناس كلهم بين مندهش وراخي أضاناً سامع

كان ما حب المسدار باقى لى إدمان
ودفعاتك مؤثّرة دايمآ أصيل يا مان
زايد نغم نمّاتك العازفة فينا كمان
والله كُت فرّقت وفرتقت بدري زمان

خالد عثمان
07-03-2007, 01:59 PM
وين بتفوت تخلي الروح معاك مشدودة
بعد ولفتها علي الصيد والتبروالعيون السودة
شد الحيل تعال نسرح نسوح عزم الغزل معقودة
نفش الروح نغني على الله والكربة تمشي بلودا

mohamed merghani
08-22-2007, 07:22 AM
وين بتفوت تخلي الروح معاك مشدودة
بعد ولفتها علي الصيد والتبروالعيون السودة
شد الحيل تعال نسرح نسوح عزم الغزل معقودة
نفش الروح نغني على الله والكربة تمشي بلودا

كلامي سوقآ باير حروفو تب ما نفعو
كم جوني ناس تجّار ومليمة ساي ما دفعو
يكونو عن ثراى زي البزاة إرتفعو
بوستي فى تلاتة شهور مافى زولآ رفعو

mohamed merghani
08-27-2007, 09:51 PM
يا خالد أخوي وين اختفيت ليك مدّة
خلّيت لى طرّومي شبرين تمام اتمدّ
دايرك فى السدار تجيب لى شدّة ومدّة
وفى دوحات ظلالك نقيّل سوا ونتمدّ

خالد عثمان
08-28-2007, 11:53 AM
ود أم در تعال جيب الغنى وأشجينا
وين بنروح... في الغربة أم قهر هجينا
عايشين بالأمل حبل الصبر مدينا
غربة كريهه يقطع ذكرتا و سنينا

mohamed merghani
08-28-2007, 12:52 PM
ود أم در تعال جيب الغنى وأشجينا
وين بنروح... في الغربة أم قهر هجينا
عايشين بالأمل حبل الصبر مدينا
غربة كريهه يقطع ذكرتا و سنينا

فى الغربة الكريهة يا اخويا كان شن لينا
وما بتفرق نعوم لو كنا إتبلّينا
فى أرض الوطن لو رقنا يوم وحلينا
كنّا ارتحنا من (رسّل) (تعال جيب لينا)

فى سبيل اللا شئ صابنا التعب قاسينا
وما نسينا شجونّـا وكم مرة إتناسينا
عاصرين القلب بالحسرة إتكسّـينا
فى ذكرة الأحباب صبجنا وإتماسينا


جاهلين الأهل ما عرفو يوم شن فينا
شايفنّا مرتاحين ماكلين رغيف الفينا
لو ما الأمل خادعنا وبسرابو جا يكفّينا
كان لرجوعنا أكيد ساوّين شجونّا سفينة

خالد عثمان
08-30-2007, 09:27 AM
يا خلّي الوطن في حبّو من تاتينا

بندور القعاد الغربة كربة فيها شقينا

سايقنا الرزق والقصة مي في إيدينا

كان المولى قدر في بلدنا بقسمو لينا

****
الحال هسي مايل فيه كتال وكلو غبينة

بدور طولة نفس وناس يكتلو الشينة

ماناس شرهه تاكل ضعيفة ولا سمينة

ولا تضارى وتنحشر وفي أضانة خاتة الطينة

mohamed merghani
08-31-2007, 10:49 PM
يا خلّي الوطن في حبّو من تاتينا

بندور القعاد الغربة كربة فيها شقينا

سايقنا الرزق والقصة مي في إيدينا

كان المولى قدر في بلدنا بقسمو لينا

****
الحال هسي مايل فيه كتال وكلو غبينة

بدور طولة نفس وناس يكتلو الشينة

ماناس شرهه تاكل ضعيفة ولا سمينة

ولا تضارى وتنحشر وفي أضانة خاتة الطينة


فى عز البرد ما اتدمدمنا وإتغطينا
كاشفين فى الصقيعة والحال مطيّن طينة
لى حال العدو إتسدّرنا وإتناطينا
فى وقت القرار غيّبنا كأنّو إتعاطينا

خالد عثمان
09-01-2007, 11:12 AM
يا مرغنابي خليهو البلد بي حالو ما تحجينا
ماقالوا العارفين سواقين أكيد بيغرقوها سفينة
أحكي عن العفاف الفيهن أصيلة الطينة
أنسى البارن الزمن ولي الشلة ختن شينة

mohamed merghani
09-01-2007, 12:04 PM
يا خالد أخوي الليلة هلّ نورك باين
دي الصدفة الجميلة لمّتنى فيك اون لاين
لمتين أخوي فى سدارنا الناس تملّي تعاين
زي الكأنو أنحن ما درنا لينا زباين !!!!

mohamed merghani
09-01-2007, 12:10 PM
يا مرغنابي خليهو البلد بي حالو ما تحجينا
ماقالوا العارفين سواقين أكيد بيغرقوها سفينة
أحكي عن العفاف الفيهن أصيلة الطينة
أنسى البارن الزمن ولي الشلة ختن شينة

كيف أخلّي البلد النارو حرقت جوفى
ومن قومة الجهل جارفني حبّآ صوفى
مهما أوصّف فيهو بتعجز معاهو وصوفى
خلاني عز الحر دارع شمالى وصوفى

خالد عثمان
09-01-2007, 02:27 PM
يا خوي في البلد الكلام والهرجة تب ما نفعوا
كتير النقّوأ و ناضموا وأخيراً سلاحهم رفعوا
ونحن تعبنا ياخيي وراسنا زاد في وجعو
وهجينا إتشتتنا وعيالنا قط ما هجعو

خالد عثمان
09-02-2007, 09:43 AM
والله البلد لي شينا ما بندور
ولا بنرضالا شر وطبعنا مو محقور
غنية بي مواردا والفيها خير مشرور
بس الوجعة في الفيهم قصور وسوو قصور

mohamed merghani
09-03-2007, 08:35 AM
والله البلد لي شينا ما بندور
ولا بنرضالا شر وطبعنا مو محقور
غنية بي مواردا والفيها خير مشرور
بس الوجعة في الفيهم قصور وسوو قصور

وا خيبة الرجا وضيعة العشم وأملنا
يوم إنخدعنا بدين وركبوا فينا هملنا
باع عرض آخرتو وبالسوء قام عاملنا
وبرضو بنبح فينا( لا لدنيا قد عملنا)

خالد عثمان
09-03-2007, 09:55 AM
تعال نحلم بالوطن طيب جميل متســـــــــــامح
والأيام دول كــــــلام رب العبــــــاد هدا واضــح
مساواة وعدل ِننجم ننبسط والراحة تبقى ملامح
نلم الفات بعيد حتى الإنحـــسب في عداد الرايح

قلت ارحل
09-03-2007, 06:20 PM
ود مرغيني والله عيب علينا ما نحفظ كلامنا
بس كلامك سمح بالحيل
انا والله خلوني فراجه يمكن اتعلم منكم

mohamed merghani
09-12-2007, 08:50 AM
ود مرغيني والله عيب علينا ما نحفظ كلامنا
بس كلامك سمح بالحيل
انا والله خلوني فراجه يمكن اتعلم منكم

الفايت قديمو زي شجرة فاقدة جذورا
عامّيها المحل حتي الغراب ما بزورا
الكلمة الجميلة بنقولا ما محذورة
وقدر المستطاع حاولت أرمي بذورا

mohamed merghani
09-12-2007, 08:51 AM
شهر الصوم حبابو الهل لينا بخيرو
صادق فى ميعادو وما بسو تأخيرو
يا سيد الشهور أول سرورنا وأخيرو
لى غفر الذنوب مولاى جعل تسخيرو

الشهر الكريم غمر القلوب نفحاتو
والبركة التفوح عمت جميع ساحاتو
المغفرة فى نصو وفى بدايتو جات رحماتو
والعتق من النار كل زول جلت صفحاتو

يا شهر الصيام يا هدية الديان
مع خلايق النور بيك البشر سيان
إن شاء الله يوم الهول تذيعو فينا بيان
مع كافة الحاضرين ندخل من الريان

mohamed merghani
09-12-2007, 09:05 AM
تعال نحلم بالوطن طيب جميل متســـــــــــامح
والأيام دول كــــــلام رب العبــــــاد هدا واضــح
مساواة وعدل ِننجم ننبسط والراحة تبقى ملامح
نلم الفات بعيد حتى الإنحـــسب في عداد الرايح

وين حنلقى مسامح والكل بفتّش تارو
وفى رقبة أخوهو داير يجر بتّـارو
من حال الشتات عقولنا تب إحتارو
فصلآ قبيحآ بايخ دايرين نقِفْلو ستارو

mohamed merghani
09-14-2007, 10:49 PM
حباب شهر الصيام الفينا ناضر حل
للزمن المسخ فى وحودنا سكر وحل
من قيد الذنوب بيهو النفوس تتحل
شهر المكرمات ما شهر ملاهى وحلة

الذكر المكرم فيهو ابتدا تنزيلو
يسحق للظلام وحتى الضلال بيزيلو
المولى الكريم عطاهو لينا جزيلو
شامل للخلوق وكل حي هو فيهو نزيلو

الشهر الكريم طابت عليك أيامو
وقلبك فى الرحاب زايد عليهو هيامو
الذكر اب رياض لزمت حالى خيامو
ناوي على الشهر صيامو ثم قيامو

ساءلين القبول كافة عملنا الصالح
ونفوسنا اللوامة نفبل عليها نصالح
بعد ما جاتنا آية فى وضوحا ناقة صالح
شغل البعد والغفلة والله ما فى الصالح

مو الطيب
09-15-2007, 08:54 PM
يا ودمرغنى ناس رفاعه مابعرفو الجفاء لكن ابقالك تصبر عليهم شويه انت ضيف وسيد بيت وعلى راسنا من فوق(نحن حبينا مسدارك وياريت ماتنقطع

mohamed merghani
09-17-2007, 11:47 AM
يا ودمرغنى ناس رفاعه مابعرفو الجفاء لكن ابقالك تصبر عليهم شويه انت ضيف وسيد بيت وعلى راسنا من فوق(نحن حبينا مسدارك وياريت ماتنقطع

يا أخوي صوتي بحّ وقدّيت عديل المايك
وإن كان للصبر تراني ماضغ ولايك
مشيت براي فى دربي درب الغريب الشايك
ولو داري ماهو رفاعة لووكي برضك like

النؤرس الرحال
09-17-2007, 06:59 PM
http://www.rufaaforall.com/board/uploaded/1324_1190044782.gif

mohamed merghani
09-20-2007, 11:25 AM
http://www.rufaaforall.com/board/uploaded/1324_1190044782.gif

يا النورس الرحال دعيت رفعت كفوفي

ان شاء الله يوت أرضيك وتسمح علىّ ظروفى

شكرآ على التعليق الحفّز علىّ حروفى

كلماتك لطيفة بتلمع وخطّك منمّق كوفى

mohamed merghani
09-24-2007, 10:56 PM
شوف داك الغزال ممشوق وهادل كتفو
كل البرنو ليهو كايس أكيد لي حتفو
منايا أصبح نسرآ ريشاتو ما بتنتفو
وأطير هناك فوق حيو وانزل عليهو أختفو

mohamed merghani
09-24-2007, 11:00 PM
الهالك الشباب وهو لسع نونو
في أمر الدلال طوالي ساوي فنونو
مكتوب في الأزل أحيا وأموت مجنونو
سرّعني فى الذوبان حاكيت لنيدو ونونو

mohamed merghani
09-24-2007, 11:03 PM
الزينة أم خدود بوابا واقف ألفة
حارمني من نظراتا ال لحال فؤادي بتلفي
باب القلب يا السمحة مفتوح متاكا الضلفة
حلفتك تخشي لمتين تعزي الحلفة

دايمآ أجيك متقرب لي عن ديارك زلفي
سايقني الهيام وأسباب كتير مختلفة
يا ريت رثيتي لحالي ورفعتي بينا الكلفة
وبشفيني القليل إن شاء الله حبة سلفة

mohamed merghani
09-24-2007, 11:04 PM
لسانك قالو ليك لو صنتو ياما يصونك
بين الفكين ملاذك بتسلم أكيد في حصونك
وكون لطيف الجانب للناس ندية غصونك
ولو باحوا ليك بي سر خليو في حفظك وصونك

mohamed merghani
09-24-2007, 11:05 PM
يا المردا السحابك فوق راسنا ناثر در
جديع التميم الفي الوجود بندر
مرية وفيكي خايل والله عقيد الدر
مطروحة زينة الكون زينة بنات أم در

mohamed merghani
09-24-2007, 11:13 PM
حارس اليل براي نجومو لي ما برن
للفجر الطلع من حالي تب إتبرن
أخدن براهن هجعة باعني بحرآ وبرآ
وين القي الونيس البرعاني حبآ وبرآ

الزول المفدع خلقة أسواقو وجن حرن
من صدو ونفورو في دربو يوت أتحرن
أسراب الحمام كم للدلال بتحرن
هالكات الجميع بفعالا عبدآ وحرآ

منحول الضمير قدلو السحايب المرن
زي لعب النهائي والحكمة قال بتمرن
الخلي ساعاتي في الدنيا مسخن ومرن
حتي في الأحلام أطيافو يوم ما مرن

علي
09-25-2007, 12:09 AM
انت يا ود ميرغني اظنك جائ من الضهاري . لك التحية لابداعك وطرحك لهذا الموضوع وتناول القضايا الحديثة بالمســـــــــــــــــــــــــــــــــــــــــــــ ـــــــــــادير

خالد عثمان
09-27-2007, 10:16 AM
بالحق والصلاح خلــــيك دائماً صــــــــادح
الدين لي الجميع ما حددوا بالمـــــــــــالح
الزاهدين كـــــــــــــتار بيهم بلدنا ينافـــــح
والتانيين ضعاف لعبوا الورق لي الصـالح
****
الحق مو مضارا سواهو ربنا واضــــــــح
والدين في القلوب من غير دقون ومسابح
واحدين مسكوا فيهو سووهوا كـرتاً رابح
والتانيين زوروا سووا العقــــيدة مصــالح
****
الحق مــــو متاكا ولا بدور لو باكي ونائح
الدين عظمو عشـــان بكــــرة تبقى الناجح
واحدين بالقليل في الآخرة خيــــرهم طامح
واحدين بالكضب جمــعوه صــــالح و طالح
*****
يا سوداني شعبك طيب كــــــــريم ومسامح
في رزقو بيجابد يوت مكــــــابد وكــــــــادح
والدين بالعمــــــل مابي خطب ونصــــــــائح
والظالم أكـــــــــــيد راجـــــيه ليلاً كـــــــالح

mohamed merghani
09-27-2007, 12:13 PM
بالحق والصلاح خلــــيك دائماً صــــــــادح
الدين لي الجميع ما حددوا بالمـــــــــــالح
الزاهدين كـــــــــــــتار بيهم بلدنا ينافـــــح
والتانيين ضعاف لعبوا الورق لي الصـالح
****
الحق مو مضارا سواهو ربنا واضــــــــح
والدين في القلوب من غير دقون ومسابح
واحدين مسكوا فيهو سووهوا كـرتاً رابح
والتانيين زوروا سووا العقــــيدة مصــالح
****
الحق مــــو متاكا ولا بدور لو باكي ونائح
الدين عظمو عشـــان بكــــرة تبقى الناجح
واحدين بالقليل في الآخرة خيــــرهم طامح
واحدين بالكضب جمــعوه صــــالح و طالح
*****
يا سوداني شعبك طيب كــــــــريم ومسامح
في رزقو بيجابد يوت مكــــــابد وكــــــــادح
والدين بالعمــــــل مابي خطب ونصــــــــائح
والظالم أكـــــــــــيد راجـــــيه ليلاً كـــــــالح


فى حالنا البئيس ا اخوي بنوح النايح
كم مظلوم مقيم فيهو المقدّر طايح
وكم مغبون طفش فى الدنيا اصبح سايح
ومن بعد الدماس بنتوق لفجرآ لايح

الراكب الدين للدنيا زولآ رايح
طايع للّعين ساوّي العيوب وفضايح
لصنم المطامع كم نحر لو ذبايح
وعفنة فطيسة خلقو يا اخوي تجيب الرايح

الدين القويم فى روحو مانع وكابج
يهذّب للنفوس يخلّيها تبقى روابح
ما حكرآ هزيل بى إسمو داكا يناطح
عازل للجميع كلب الدروب النابح

لا نافعين فى دين لا الدنيا أمرآ ناجح
أفسدنا الجميع وما فينا عقلآ راجح
يا ماكلين حقوق زولآ ممغّس كادح
ما بتفيدكم والله مهما مدح المادح

أصحاب النفاق أهل الطريق الفاتح
سافّين (التحدّي) وما خلّو حتي (الفاتح)
جرح الوطن خلّوهو عميق منتّن فاتح
صايب للجميع حاسنّو دايمآ ناتح

كما كنّا جاتنا حكومة زي الكلب جرقاس
تفصيلا خايل فينا كأنّو شالوا مقاس
ديكآ نفش بيناتنا كم للفتن فقّـاس
أصلو ما بتتغيّـر لو ما الكلام إنقاس

mohamed merghani
10-03-2007, 12:02 PM
انت يا ود ميرغني اظنك جائ من الضهاري . لك التحية لابداعك وطرحك لهذا الموضوع وتناول القضايا الحديثة بالمســـــــــــــــــــــــــــــــــــــــــــــ ـــــــــــادير

مانى من الضهاري والبندر تراهو سكوني
وعاشق للسدار فى حركتي وللا سكوني
من ربوع أم در الزاهية نور الكوني
شايلة المشاعل واقفة زي التقول ماركوني

خالد عثمان
10-03-2007, 03:44 PM
ود أم در حبابك في ضهاري رفاعة
أم در بوتقة حضنت كل الاهل جماعة
جيب القول وكتر تلقى السمع والطاعة
وبنمسك في حب البلد لامن تقوم الساعة

mohamed merghani
10-14-2007, 12:49 AM
ود أم در حبابك في ضهاري رفاعة
أم در بوتقة حضنت كل الاهل جماعة
جيب القول وكتر تلقى السمع والطاعة
وبنمسك في حب البلد لامن تقوم الساعة

ترحيبك يا الهميم غامرني لا عند ساسي
ووجودك فى السدار يا اخويا والله أساسي
لى ذات الجوار ماني سادر ناسي
وأهل المكارم والله بالجملة أهلي وناسي

mohamed merghani
10-14-2007, 07:31 AM
العيد السعيد عليكم جميع يتبارك
ويحقق أمنياتكم مولاي إلهي تبارك
بي حق سورة البقرة والواقعة ثم تبارك
الباقي من أيامنا يصبح سعيد ومبارك

mohamed merghani
10-16-2007, 08:52 AM
إدمان السدار فى كل حواسي اتحكّم
مهما مرّ ساخر ومن حالى قام اتهكّم
يا جماعة الخير ما أظن لسانكم أبكم
أدّوني كلمة معاكم أصلو الكلام بى كم ؟؟؟

خالد عثمان
10-16-2007, 10:10 AM
العيد السعيد جانا وغشى الساحات
وقرب للبعيد جمـــــــّــع قلوب نافرات
بالهنا والســــــــــرور وحلاوة البركات
يغشاكم كل عام بي رفعة الدرجات

نيــــيـ 110 ـــــنة
10-16-2007, 08:11 PM
الله يديك العافيه يا ود مرغني
تقبل مروري

التهامي حميد البنا
10-16-2007, 08:53 PM
"ليه تقول( الفينا تب إنعرفت ) أظنك ما شفت الرهيد 0000000000000000

الــــرهــيد الطامح فوق أررض البطانه عزازه
قادل في الارض منو الارض تتخاذه في في مقلب حديث خبرت اهلو عزازه صا فبن في الكرم زي المطر رزازه

mohamed merghani
10-16-2007, 11:28 PM
"ليه تقول( الفينا تب إنعرفت ) أظنك ما شفت الرهيد 0000000000000000

الــــرهــيد الطامح فوق أررض البطانه عزازه
قادل في الارض منو الارض تتخاذه في في مقلب حديث خبرت اهلو عزازه صا فبن في الكرم زي المطر رزازه
مبادرين فى المكارم بهمّة عالية وسرعة
وبتدّو للمسكين قبّال يمد القرعة
ساحاتكم للكرم ساحات رحيبة ومرعي
وبحركم ديمة طامح ما هو المشحتف ترعة

يا دوبك جديد وأنا حولى طابق حولي
أحاحي فى المسدار وناسو كم فتحو لى
كم مرة لميت عفشي وأزمعت ياخي رحولى
و ديل خلوني ساكت بالقول السبق أوحوا لى

أهلآ مرحبابك نوّرت لينا الدارة
لمّيت المعاني الكان شكينا ودارا
فى الدنيا ام قدود اللينا يوت دردارة
والشوق والفرح فى قلوبنا ما بتدّاري

خالد عثمان
10-18-2007, 10:37 AM
النم والغنا المتلك بقالــــــــــــو جبارة
والدنيا أم قدود ترّتــــــــــنا بي مترارة
جيب القول وكتر واكشف كتير اسرارا
الشوق زايد خلاس والفرقة موقد نارا

mohamed merghani
10-22-2007, 10:26 PM
النم والغنا المتلك بقالــــــــــــو جبارة
والدنيا أم قدود ترّتــــــــــنا بي مترارة
جيب القول وكتر واكشف كتير اسرارا
الشوق زايد خلاس والفرقة موقد نارا

الدنيا ام قدود ناشرانا بي منشارة
ترمينا بي أهوالا وما بتدّي إشارة
تسلّب فى اللحم تذريو كأنو نشارة
وتنزع للفرح زي التقول قشّارة

حليل الفى الجمال حاشاهو ما بتباري
رظب كريمة الحالى ممازجو ليمون بارا
فارقتو ما بى إرادتي ومع همّي جيت اتباري
متين يتم سعدي وأمشي وازور لكبارا

mohamed merghani
10-23-2007, 09:03 AM
الله يديك العافيه يا ود مرغني
تقبل مروري

البوكسي الجديد الماهو داير عمرة
مية وعشرة بس مربوطة فيهو النمرة
بي دارنا عابر ماري عوادمو نثرت خٌمرة
قبّال أقولّو سلام خلاني واطي الجمرة

خالد عثمان
10-23-2007, 10:26 AM
أكتوبر غشى ذكرنا التوحد والعزة لينا عزيمة
كامنة الذكرى فينا صابرة الشعوب في ضيمها
بكرة صباحها يشرق ما بينــــــهزم تصميمها
بعد الهم تغرد بلابل تشــــــــدو وتزيد ترنيمها

mohamed merghani
10-23-2007, 02:49 PM
أكتوبر غشى ذكرنا التوحد والعزة لينا عزيمة
كامنة الذكرى فينا صابرة الشعوب في ضيمها
بكرة صباحها يشرق ما بينــــــهزم تصميمها
بعد الهم تغرد بلابل تشــــــــدو وتزيد ترنيمها

اكتوبر وغيرو ما ضقنا ليهو غنيمة
غير الأغاني الخالدة وحجوة بى ترنيمة
كل الشهور العبرت ترانا ماكلين نيما
وكان الأمل نلقاها ممزوجة بي تسنيما

عبدالله الشفيع
10-23-2007, 06:13 PM
ياود ميرغنى نمك بلحيل سمح ومحكم
من درر الكلام ماخد الجميل ومنظم
من قاضى الفرام موثوق ومختم.

محاوله كده ونحن متابعين

أمير كامل
10-30-2007, 02:05 PM
مرحب يالحبيب... قالدك بجر مســـــداري
لاني من القدام... ولّا الكــــبير مقـــــداري
إلاك في القصيد... ده البلقى فيهو مـداري
وفي عذب الكلام... شاري الوِلـف بوداري

خالد عثمان
10-30-2007, 03:50 PM
ركابي وود خليفة أم در سكــــــونك وولفك
حبك للغنا والســـــارحة بزيد تقل لي رفك
جوك ناس ود الشفيع والأمير بغزروا صفك
تعال انبسط ســـــــلّم لامن يسخّن كفك

mohamed merghani
10-31-2007, 08:15 AM
ياود ميرغنى نمك بلحيل سمح ومحكم
من درر الكلام ماخد الجميل ومنظم
من قاضى الفرام موثوق ومختم.

محاوله كده ونحن متابعين

أهلآ مرحبابك سلام أخوي عبدالله
نوّرت المكان زي الهلال الهلّ
بحروفك النايرات أرض السدار تتبلّ
ما تحرمنا جيتك كتّر وزيد فى الطلّة

mohamed merghani
10-31-2007, 08:21 AM
مرحب يالحبيب... قالدك بجر مســـــداري
لاني من القدام... ولّا الكــــبير مقـــــداري
إلاك في القصيد... ده البلقى فيهو مـداري
وفي عذب الكلام... شاري الوِلـف بوداري

اليوم السعيد لمّانا بأمير وزولآ كامل
فى المسدار ضليع وفى قولى ماني مجامل
تعال نقعد نفاضل فى القول ومرة نكامل
وحب السدار فى قلوبنا نارو عاملة عمايل

mohamed merghani
10-31-2007, 08:28 AM
ركابي وود خليفة أم در سكــــــونك وولفك
حبك للغنا والســـــارحة بزيد تقل لي رفك
جوك ناس ود الشفيع والأمير بغزروا صفك
تعال انبسط ســـــــلّم لامن يسخّن كفك

الشوق للصحاب فى قلبي سايل دفّق
ومن دون الصحاب ما أظنّي يوم أتوفّق
بعد ما كنت هايم فى الصي وحالى مطفّق
مع الأيادي الجات كفّي يا دوب صفّق

خالد عثمان
10-31-2007, 11:05 AM
طرينا النال متكل عابق طرينا صيدا نافر
كرفنا دعاش ماكان عشــــــــمنا نسافر
خلاس ناوين رجوع واصلو المولى غافر
كل ما ننوم نهبر ترب ويجري دمعنا طافر

أمير كامل
10-31-2007, 11:31 AM
كرار حــــــــــافرن... لامن دماهن جفــــــت...
شيال التقيــــــل... لا برازي لا بتلفـــــــــت...
ده الكامل أبوي... فيهو المكارم حفــــــــت...
أصلو خُلق رفاعة... من كل شريفة اتكفت...





* الكمال لله وحده سبحانه و تعالى.

mohamed merghani
10-31-2007, 12:09 PM
كرار حــــــــــافرن... لامن دماهن جفــــــت...
شيال التقيــــــل... لا برازي لا بتلفـــــــــت...
ده الكامل أبوي... فيهو المكارم حفــــــــت...
أصلو خُلق رفاعة... من كل شريفة اتكفت...

هنديك المكارم فى الدار حداك إتصفّت
وأخلاق الكرام خلاصة فيك إتصـفّـت
مكنات الفضل دايرات يمين ما خـفّـت
وصوت العز جهور كضب البقول إتخـفّت

mohamed merghani
10-31-2007, 12:18 PM
طرينا النال متكل عابق طرينا صيدا نافر
كرفنا دعاش ماكان عشــــــــمنا نسافر
خلاس ناوين رجوع واصلو المولى غافر
كل ما ننوم نهبر ترب ويجري دمعنا طافر

الإغتراب فى قلبي بى فاسو دايمآ حافر
وفى أمر الرجوع هلك الكراع والحافر
الخلانا بالبلدان للعيشة نجري نعافر
يغيّرو الخلاق بي حق تبارك وغافر

mohamed merghani
11-15-2007, 06:20 AM
في قول السدار أفكاري جن يدبن
ونبضات الحياه في عروقي دابن دبن
في ذكر الهيام وأمر الأرايل التبن
قمحان الأمل تبت يداهو وتبآ

mohamed merghani
11-15-2007, 06:21 AM
ساحة الأكرمين واجب علي تبجيلا
ساكن هواها فؤادي تشجيلو أو يشجيلا
رامينا الزمن بعذاب وفرقة عجيلة
وفي كل غمضة عين بحلم أسافر أجيلا

رفعت
11-15-2007, 06:33 AM
ساحة الأكرمين واجب علي تبجيلا
ساكن هواها فؤادي تشجيلو أو يشجيلا
رامينا الزمن بعذاب وفرقة عجيلة
وفي كل غمضة عين بحلم أسافر أجيلا


طريتنا البلد والقعده مسخت لينا
كل ما يمسي ليل يزداد هيامنا علينا
وين أهل المعزه الفرقهم كاوينا
فارجين الهموم لما الزمان يبلينا

mohamed merghani
11-15-2007, 06:43 AM
طرينا البلد والقعده مسخت لينا
كل ما يمسي ليل يزداد هيامنا علينا
وين أهل المعزه الفرقهم كاوينا
فارجين الهموم لما الزمان يبلينا

كيفن تقول طرّيتك شكلك كأنّك ناسي
يا رفعت أخوي أحسن تقول متناسي
فى بلد الحُنان بجيد طباق وجناسي
وا شوقي الشديد يا حليل بلادي وناسي

رفعت
11-15-2007, 06:49 AM
كيفن تقول طرّيتك شكلك كأنّك ناسي
يا رفعت أخوي أحسن تقول متناسي
فى بلد الحُنان بجيد طباق وجناسي
وا شوقي الشديد يا حليل بلادي وناسي


حقيقة الغربه في بعدك عن الرحمن
لو طعت الإله كل الأرض أوطان
في كتابه العزيز قال العلي الديان
أرض الله واسعه لهجرة الإنسان

رفعت
11-15-2007, 06:55 AM
رغم قساها برضو الغربه ليها فوائد
ترتيب الحياه من غير رتوش وزوائد
تنفك من خرافات تنظير كتير وعوائد
تبني البيت وتطرى السمحه ترجع عائد

mohamed merghani
11-15-2007, 07:01 AM
حقيقة الغربه في بعدك عن الرحمن
لو طعت الإله كل الأرض أوطان
في كتابه العزيز قال العلي الديان
أرض الله واسعه لهجرة الإنسان

طايعين الإله وين نمشي أي مكان
حافظين لى فروضو وكافّـة الأركان
لاكين الشجون فى القلوب سـكّـان
للغنّينا فوقو (ما سيكون وما قد كان )

mohamed merghani
11-15-2007, 07:07 AM
رغم قساها برضو الغربه ليها فوائد
ترتيب الحياه من غير رتوش وزوائد
تنفك من خرافات تنظير كتير وعوائد
تبني البيت وتطرى السمحه ترجع عائد

فوايد الغربة بانت زي سراب فى قيعة
عشمانين نكوس فى دروبا نلقي وقيعة
نلاتق فى القدود وغالبنا جد ترقيعا
وثيقة استسلام وعلينا بس توقيعا

رفعت
11-15-2007, 07:55 AM
ود المرغني الموهوب ضروعك باهله
مجاراتك علي المشغول دوام مي ساهله
كان نلقى الفراغ روقه وقعتّن ماهله
نجيب خبر الظريفه البي الأدب مي جاهله

mohamed merghani
11-15-2007, 09:09 AM
ود المرغني الموهوب ضروعك باهله
مجاراتك علي المشغول دوام مي ساهله
كان نلقى الفراغ روقه وقعتّن ماهله
نجيب خبر الظريفه البي الأدب مي جاهله

ساحتك يا الهمام بأهل المقاصد آهلة
من كرمك وظرفك طوّالى عابّـة وناهلة
جيب سيرة الظريفة أم قدلتآ متماهلة
خلينا النهيم ودروب الهيام مي ساهلة

رفعت
11-15-2007, 10:16 AM
ساحتك يا الهمام بأهل المقاصد آهلة
من كرمك وظرفك طوّالى عابّـة وناهلة
جيب سيرة الظريفة أم قدلتآ متماهلة
خلينا النهيم ودروب الهيام مي ساهلة


مالك يا الحبيب حركت فينا كوامن
طريتنا القبيل شاغل قلوبنا هيامن
مواسم الحج أتت خلّي التعدي أيامن
وبعد العيد نجيب خبر الرماني غرامن

mohamed merghani
11-15-2007, 10:28 AM
مالك يا الحبيب حركت فينا كوامن
طريتنا القبيل شاغل قلوبنا هيامن
مواسم الحج أتت خلّي التعدي أيامن
وبعد العيد نجيب خبر الرماني غرامن

نوينا الزيارة وأحرمنا من ميقاتن
راجين القبول والسيرة فى طرقاتن
أمّات العفاف الشغل جميع أوقاتن
هيّجن المشاعر الزادو فى روقاتن

حايزات الجمال الما تعدّي وفاتن
من بين طريف نعسان وتاني أحور فاتن
الهلك النفوس وأسرع عديل فى وفاتن
السور المصفّح الحامي لى شوفاتن

رفعت
11-16-2007, 02:19 PM
نوينا الزيارة وأحرمنا من ميقاتن



( أي جهاد غيرهنّ أُريدُ )
فاه بيها الجميل يومو النّطق بنشيدُ
العاشق العفيف إنشا الله ربي يزيدو
يقبل حجتو ودّيه مرضات (سيدو)

mohamed merghani
11-17-2007, 09:44 PM
( أي جهاد غيرهنّ أُريدُ )
فاه بيها الجميل يومو النّطق بنشيدُ
العاشق العفيف إنشا الله ربي يزيدو
يقبل حجتو ودّيه مرضات (سيدو)

عفاف القلوب فرض الغرام العذري
وفى البوح والوحيح ماني ماخد حذري
لو جاوزت حدي ليك ببوء بي وزري
والمحرية فيك تقبل كلامي وعذري

رفعت
11-18-2007, 04:39 AM
عفاف القلوب فرض الغرام العذري
وفى البوح والوحيح ماني ماخد حذري
لو جاوزت حدي ليك ببوء بي وزري
والمحرية فيك تقبل كلامي وعذري


حاشاك الوزر والعفه طبعا فيك
صادق وحّتك واللّهجه تشهد ليك
بوح بيه الغرام سوح بينا في واديك
تلقى أُذُنّا صاغيه والقَلبْ واعيك

السادة
11-18-2007, 08:42 AM
سلام أهل رُفاعة عامر نمّكُم بالحيل

والحرف النضير بتعرفوا ليه كتير بالحيل

سولفوا خلونا نفرج همنا معاكم زي ديل

ألكعوا غنّوا في الزايلة من الصباح لليل

...

mohamed merghani
11-18-2007, 09:23 AM
سلام أهل رُفاعة عامر نمّكُم بالحيل

والحرف النضير بتعرفوا ليه كتير بالحيل

سولفوا خلونا نفرج همنا معاكم زي ديل

ألكعوا غنّوا في الزايلة من الصباح لليل

...

أهلآ مرحبابك سلام أخونا السادة
فارشين الدروب أزهار وقلوبنا ليك وسادة
إنتعشت حروفنا الكنّا خفنا كسادا
ساءلين الإله يكفيها شر حسّادا

mohamed merghani
11-18-2007, 09:29 AM
حاشاك الوزر والعفه طبعا فيك
صادق وحّتك واللّهجه تشهد ليك
بوح بيه الغرام سوح بينا في واديك
تلقى أُذُنّا صاغيه والقَلبْ واعيك

عارفك يا أخوي بتشد دوام من أزري
وصروف الغرام كم بالرجال قد تزري
فى أرض الهيام تلقاني ناثر بذري
ومترجي الكريم يشتدّ عودي وجذري

خالد عثمان
11-18-2007, 02:23 PM
حباب مرحب حبــــــاب رفعت حبــــــــــاب السادة
زمال الغنا رايعين في القصيد والطلة لينا سعادة
حجينا بلا ميقات وطل قمرنا شفنا الخدود السادة
كترو من قعادتكم خلونا ننم نار الغــــــــــــرام وقادة

رفعت
11-19-2007, 04:50 AM
حباب مرحب حبــــــاب رفعت حبــــــــــاب السادة
زمال الغنا رايعين في القصيد والطلة لينا سعادة
حجينا بلا ميقات وطل قمرنا شفنا الخدود السادة
كترو من قعادتكم خلونا ننم نار الغــــــــــــرام وقادة


خالد معَ عثمان أسامي أهلنا
أرباب الغرام المِنْ رحيقو نهَلْنا
مسدار الهيام مُرْ فيه زيد شَهّلنا
جيب سيرة المَلَكْنا بسرعه ما مهّلنا

الرشيد ابراهيم
11-20-2007, 12:12 AM
سلام انا ضيف جديد الغبار لحس في راسي لكن قبال كوز المويد بقول ليك يا محمد ود ميرغني

يا محمد اخوي نار القويطرات وجن
والعجب اللهيج سكر جنيد ومعجن
الرشيد اصلو عارف عمرو كلو ملجن
لكن خايف عليك من نظرتن لا تجن
اها دا عربون صداقه وعقب بجيكم
:mh1313:

خالد عثمان
11-20-2007, 09:58 AM
أنا بصبق محمد مرحب يا الرشيدحبابك مية
عجيب نمك ســـــــــــــمح رايق النضم حنية
للسمحات موقــــــر عاشق ومنمنق القافية
ديل نظــرات عيوننن فيها سر و حكمة خفية

mohamed merghani
01-16-2008, 11:43 AM
ليك شهرين تمام واقف محلك سر
عدمت الصليح عدمت القريب والسر
يا بوست السدار ودّع معاك نسر
حلّق وطار بعيد ما تفشى هذا السر

mohamed merghani
01-16-2008, 11:48 AM
151 مشاركة ........ نصيبى منها 101 مشاركة !!!!!!!!!!!!!!!!!
شكرا لكل من تداخل معى .....
أبقوا عافية ...

رفعت
01-16-2008, 05:30 PM
ليك شهرين تمام واقف محلك سر
عدمت الصليح عدمت القريب والسر
يا بوست السدار ودّع معاك نسر
حلّق وطار بعيد ما تفشى هذا السر

حباب ود مرغني ود العزاز وابطال
سرَّتْنا شوفتك وشوقنا ليك أرْتال
قدومك كلُّو خير ياحبيبنا غيث هطَّال
ما نسينا السدار مهما الزمن ماطال

الكوزي
01-17-2008, 09:01 PM
مكلوما صريع جيتك وقف بي بابك
نادي وحالي حسك زايق وراقي خطابك
اسمح لي أدني واقعد قريب لجنابك
ابسط الكف واقبل بي قول لي حبابك

يوسف البشير يوسف
01-17-2008, 09:19 PM
151 مشاركة ........ نصيبى منها 101 مشاركة !!!!!!!!!!!!!!!!!
شكرا لكل من تداخل معى .....
أبقوا عافية ...

الزول العدا وحصل المية وواحد نما
ما دام دليلو الجمل اصلو ابد ما هما
الدايرو بيوصلو و ليهو تلقاهو فت! لما
انت الوحيد و فريد يحفظك جزء عما

الكوزي
01-17-2008, 10:40 PM
ديمة النار توج والروح تزيد اناته
تملا وتفرق الأجفان واتابعن عبراته
المالكني شاغل فكري فيه تلاته
عقلا زان وقلبا حان وروحه حلاته

الكوزي
01-18-2008, 08:48 AM
151 مشاركة ........ نصيبى منها 101 مشاركة !!!!!!!!!!!!!!!!!
شكرا لكل من تداخل معى .....
أبقوا عافية ...

يمين المية ما بتساوي في ايديه جدعة ودعة
تقيف طرف الاصابع وتنقص كمان بي سبعة
ودميرغني المسدار حزين بدور الرجعة
ننقز فوقو نطرب امكن نداوي الوجعة

الكوزي
01-18-2008, 11:19 AM
ماح بي جيدو غالب ريقي ما يدلى
جال بي طرفو طق قص الفواد وادلى
المن تب قام ما وصفو بي مزلة
حويتو الصالحين جملةً أهل الله

مالقيت لك وصف لا في كتاب لا مجلة
واريت الشفت كان شافوه ناس عبدالله
قافى للثريا ومن السماك قد ولى
ما بطولك طفيق اصلو الكريم ليك علا

كفيت خيل وكاسي الليل وحاجبو الهلة
فيه دلال وريقو زلال يداوي العلة
قام متاقل لاح بي ايدو جاب التلة
وزاد البي كرف عرفو قول يا الله

خالد عثمان
02-04-2008, 09:56 PM
صاحب المسدار ................عمار الدار
طولنا طولنا بس جينا

الكوزي
02-05-2008, 07:40 PM
صاحب المسدار ................عمار الدار
طولنا طولنا بس جينا

جيدا جيت وجيد الرجعة للمسدار
ننم فوق الحبيب ندوبي نقصر المشوار
من لاعب احتياطي مشطوب وما خد انذار
حليل ود ميرغني البفزع ويوقد النار

الكوزي
02-05-2008, 07:47 PM
قال المية قلنا المية ماها كفاية
ودميرغني المسدار بدورلو رفاية
عاشميكا اصم مو من قطن ونفاية
يربط ويحزم المسدار ويبقى عفاية

mohamed merghani
02-10-2008, 10:18 AM
حباب ود مرغني ود العزاز وابطال
سرَّتْنا شوفتك وشوقنا ليك أرْتال
قدومك كلُّو خير ياحبيبنا غيث هطَّال
ما نسينا السدار مهما الزمن ماطال

النجم البعيد يا اخويا ما بنطال
وان حيين نعود لو مرّ الزمن أو طال
جابنى ليكم شوق وفرق المحب بطّال
قولك وزونو الطن وما جايبو بالأرطال

الكوزي
02-13-2008, 07:24 PM
النجم البعيد يا اخويا ما بنطال
وان حيين نعود لو مرّ الزمن أو طال
جابنى ليكم شوق وفرق المحب بطّال
قولك وزونو الطن وما جايبو بالأرطال

حباب الطلتك غناوي الحن وفال اطفال
حباب العودتك ترد الروح تَهَدّي البال
غيابك مسخ البوست وكنا بنقرا قلنا وقال
سريع قول لينا في المحبوب حديثا عال

رفعت
02-14-2008, 08:30 AM
النجم البعيد يا اخويا ما بنطال
وان حيين نعود لو مرّ الزمن أو طال
جابنى ليكم شوق وفرق المحب بطّال
قولك وزونو الطن وما جايبو بالأرطال


محمد أخونا جيداً جيت تعال جالسنا
فاقدين اللبيب البي السدار يآ نسنا
ضاربانا الهموم مرض الزمن لابسنا
والناس دجَّلَتْ ومن الصداقة يئسْنا

mohamed merghani
02-15-2008, 12:19 PM
[CEN]حباب الطلتك غناوي الحن وفال اطفال
حباب العودتك ترد الروح تَهَدّي البال
غيابك مسخ البوست وكنا بنقرا قلنا وقال
سريع قول لينا في المحبوب حديثا عال[/]
حباب المزنو بى خيرا عميما شال
حباب شيّال التقيلة الغيرو ما بتنشال
فى كامل بهاهو دارع الوشاح والشال
شلال الفراسة لكف الشوارد شال

يا الراسية يا المحبوبة يا الزينة بت الخال
تاج الشرف فوق راسك أشرق عليكى وخال
الشى المتعّبنى ولى فكرى جهجه خال
يومى الربطّتى فليبي فى رنّة الخلخال

الكوزي
02-15-2008, 05:19 PM
حباب المزنو بى خيرا عميما شال
حباب شيّال التقيلة الغيرو ما بتنشال
فى كامل بهاهو دارع الوشاح والشال
شلال الفراسة لكف الشوارد شال

يا الراسية يا المحبوبة يا الزينة بت الخال
تاج الشرف فوق راسك أشرق عليكى وخال
الشى المتعّبنى ولى فكرى جهجه خال
يومى الربطّتى فليبي فى رنّة الخلخال

غورت العيون حيرت للنشال
بتابع للقوافي ماني الخفيف نشال
فرة بسمته الفاقت البريق الشال
صابت للقليب أفرته جابلو وشال

حصينة أمينة وممنوعة من دخال
كضب القال حواك أو في المنام ليك خال
الشي الملا الأفكار وجاب في العقول خلخال
نون الخد وطول القد وحاجبو الخال

الكوزي
02-15-2008, 07:20 PM
في رحم الغرام تيمان رضعنا الإلفة
واتربينا طيب الحن وزادنا العفة
ما هابينا واتوسمنا تب في خفة
لازمين النفوس نتوحوح نعضي الشفة

رفعت
02-16-2008, 09:21 AM
غورت العيون حيرت للنشال
بتابع للقوافي ماني الخفيف نشال
فرة بسمته الفاقت البريق الشال
صابت للقليب أفرته جابلو وشال

حصينة أمينة وممنوعة من دخال
كضب القال حواك أو في المنام ليك خال
الشي الملا الأفكار وجاب في العقول خلخال
نون الخد وطول القد وحاجبو الخال

حكيتوا جنُوننَّا يامحمد وياكوزينا
أعيدوا الحكوه بهدلتونا زِدتُوا البينا
الزول السكن جوَّانا دايما فينا
مرتاح في العروق شايل منام عينينا

محمد عبدالمنعم العليقي
02-16-2008, 09:49 AM
حباب رفعت الزول الفراقو مكنّا
ياسمح الكلام تاني لا تهمِّلنا
ردناك غصب شان زوقك العلمنا
نراجاهو الجمال منك تزيدو عجبا



خالص الود
ـــــــــــــــ
العليقي

رفعت
02-16-2008, 10:08 AM
حباب رفعت الزول الفراقو مكنّا
ياسمح الكلام تاني لا تهمِّلنا
ردناك غصب شان زوقك العلمنا
نراجاهو الجمال منك تزيدو عجبا



خالص الود
ـــــــــــــــ
العليقي

ود العليقي الظريف أبْدما شربات وخفيف
ياخي أنا بريدك بأريحية وعفوية، تقوم تريدني غصب
وبعدين حيرتني ما عرفتَ غصباً عنَّك واللا عنِّي
ياخي أنا حضرت معاك المجادعات بتاعة الجامعة وقصة الصيدله واللابتوب واللابكوت كدي راجع البوست

بس بيني وبينك لما الأجواء كانت متوترة قلنا أخير ناخد نفس شويه ....والحمد لله عاد التهامي فعدنا
والفضل من بعد الله لك وللباشمهندس يوسف.....

واعتذر لود مرغني والكوزي...لخبطنا ليهم المسدار شويه، لكن بصراحه لقيت فيك فرصة ما بفوتا
كان لازم أقول معاك كلمتين...ولوغصبا عننا

محمد عبدالمنعم العليقي
02-16-2008, 10:21 AM
رفعت ياأخوي ارجوك بس تعذرني
كان خاني الكلام وجاك مومخاترني
بي زوقاً رفيع دايماً أخوي تاسرني
بس فقدك كان عزيز وجوة القلب حارقني





خالص الود
ــــــــــــــــ
العليقي

رفعت
02-16-2008, 10:46 AM
رفعت ياأخوي ارجوك بس تعذرني
كان خاني الكلام وجاك مومخاترني
بي زوقاً رفيع دايماً أخوي تاسرني
بس فقدك كان عزيز وجوة القلب حارقني





خالص الود
ــــــــــــــــ
العليقي

شيشك عليْ ياعليقي ماتجنني
والحس الرهيف منَكْ يمين بهدلني
حرفك مستقيم حُرَّ المعاني شغلني
دايما نلتقي وأغني ليك وتغنِّي

mohamed merghani
02-16-2008, 11:36 AM
[قال المية قلنا المية ماها كفاية
ودميرغني المسدار بدورلو رفاية
عاشميكا اصم مو من قطن ونفاية
يربط ويحزم المسدار ويبقى عفاية[/g]

شايقنى السدار بلسم دواى وشفايا
وفينا نارو بتوقد تهدى البعيد دفّاية
فى الغربة يوت انسنى ونوّر على منفايا
وبى حالنا انت العالم وما بتخفى ليك خفايا

فى سما المسدار يا اخوى رفعت الراية
حقّيت الوصف فى الخدّو ضوّ مرايا
ايد واحدة ما بتصفّق ما بقدر عليهو برايا
وجميع الحاضرين سوّوها فينا قرايةة

ملحوظة ...
التنسيق الكتير فى الكتابة يخفيها عندى ..
واسف اذا أزلت التنسيق حتى اتمكّن من قراءة ما هو مكتوب

mohamed merghani
02-16-2008, 11:50 AM
[]غورت العيون حيرت للنشال
بتابع للقوافي ماني الخفيف نشال
فرة بسمته الفاقت البريق الشال
صابت للقليب أفرته جابلو وشال

حصينة أمينة وممنوعة من دخال
كضب القال حواك أو في المنام ليك خال
الشي الملا الأفكار وجاب في العقول خلخال
نون الخد وطول القد وحاجبو الخال[/SIZE][/


بى صحبتك يا اخوى جايينا حسن الفال
مفتاحك للقلوب ما بتغلبو الأقفال
سكّيت القوافى وحرف السجع جفّال
وقهّيت حداك زى شافع فى جنّة الأطفال

mohamed merghani
02-16-2008, 11:59 AM
محمد أخونا جيداً جيت تعال جالسنا
فاقدين اللبيب البي السدار يآ نسنا
ضاربانا الهموم مرض الزمن لابسنا
والناس دجَّلَتْ ومن الصداقة يئسْنا

حباب رفعت المسدار حباب فارسنا
جايين للجمال يللاكا قوم درّسنا
نغرس معاكا شتول من الهجير تحرسنا
ونتسادر سوا ونعمل حساب الاسنا

خالد عثمان
02-16-2008, 12:07 PM
جيـــــــــداً جيت تعال ود أم در خبير النم
نقعد نستريح في دوحتـــــــــــــك ننجم
في موقع فسيح في رفاعة مافي ندم
معاك نتدارس نشاور ناقص الفهم ينتم

الكوزي
02-16-2008, 01:31 PM
بى صحبتك يا اخوى جايينا حسن الفال
مفتاحك للقلوب ما بتغلبو الأقفال
سكّيت القوافى وحرف السجع جفّال
وقهّيت حداك زى شافع فى جنّة الأطفال

حرفك يالعزيز ضوى الكبس حفلها
لامس للشفاف شغل العقول طلسمها
تلاميذ حضرتك وانت بتقود رسنها
وما بتقهي لي كلمات انت حبرها

الكوزي
02-16-2008, 02:18 PM
ملحوظة ...
التنسيق الكتير فى الكتابة يخفيها عندى ..
واسف اذا أزلت التنسيق حتى اتمكّن من قراءة ما هو مكتوب

تشيل تنسيق تزيد تدقيق إياك رب الدار
وين تفلت النجمات مادام حواها مدار
كَدِّبُ بي مهل واقلع عويش وعدار
يحلو ويصفو للدايرنو والما دار

الكوزي
02-16-2008, 03:21 PM
حكيتوا جنُوننَّا يامحمد وياكوزينا
أعيدوا الحكوه بهدلتونا زِدتُوا البينا
الزول السكن جوَّانا دايما فينا
مرتاح في العروق شايل منام عينينا

شايل للمنام يارفعت ونايم غادي
مناي اظفرب واسعد في الزمان العادي
مفارق بالجسد وجوى القليب لي رقادي
يتهنابو يسعد ويتنعم يتم مرادي

رفعت
02-16-2008, 04:24 PM
حباب رفعت المسدار حباب فارسنا
جايين للجمال يللاكا قوم درّسنا
نغرس معاكا شتول من الهجير تحرسنا
ونتسادر سوا ونعمل حساب الاسنا


الإسنا والآتو وكَرِتْ خمسينا
مهما نلعبِن للغاليه ما تنَسِّينا
أفِكَّ الدُّو وامسك دامه حاليه حسينه
أغَيَّر لونا هارت وانسى المعاي جالْسِينا

خالد عثمان
02-17-2008, 10:33 AM
رفعت كوزي ومحمد شداد الزمل عمار مجالس النم
براكم تخرب ديار تشقى,,, ســــــــفّاية تبقى عدم
بركو للرواحل أقعدو نحل نربط والمبـــدي يوت ينتم
تعالوا بطانة فسيحةعامرة نال تبر غزلان وصيد وبهم

mohamed merghani
02-17-2008, 10:53 AM
جيـــــــــداً جيت تعال ود أم در خبير النم
نقعد نستريح في دوحتـــــــــــــك ننجم
في موقع فسيح في رفاعة مافي ندم
معاك نتدارس نشاور ناقص الفهم ينتم

فى رفاعة الأدب لى جذور وأواصر
وصاحب المواقف اللىّ دايما ناصر
سيد المكارم الجمّة الفايقة جهد الحاصر
شوقى ليكم جيشو لى قلبى ديمة محاصر

mohamed merghani
02-17-2008, 11:00 AM
[C]حرفك يالعزيز ضوى الكبس حفلها
لامس للشفاف شغل العقول طلسمها
تلاميذ حضرتك وانت بتقود رسنها
وما بتقهي لي كلمات انت حبرها[/G

غير الجمال فى دواى مافى شيتا أجدى
ليهو أشكى الشوق وبيهو أشرح وجدا
باين كلامى حداك كأنّو طوب النجدة
وناس الشعر فى القول عارفين مكان السجدة

mohamed merghani
02-17-2008, 11:13 AM
تشيل تنسيق تزيد تدقيق إياك رب الدار
وين تفلت النجمات مادام حواها مدار
كَدِّبُ بي مهل واقلع عويش وعدار
يحلو ويصفو للدايرنو والما دار

تدقيق شنو البتقولو وانت سيد الكار
شغل المداين نظمك وأنعش الأفكار
ضو الشموس الساطع مافى ليو انكار
وكل حرف من صوبك فى قلبى ليو تذكار

رفعت
02-17-2008, 12:31 PM
رفعت كوزي ومحمد شداد الزمل عمار مجالس النم
براكم تخرب ديار تشقى,,, ســــــــفّاية تبقى عدم
بركو للرواحل أقعدو نحل نربط والمبـــدي يوت ينتم
تعالوا بطانة فسيحةعامرة نال تبر غزلان وصيد وبهم


خالد اخوي سلام مستبشرين يا مراقب
في عهدَك تكون وحدتنا سِحْرَها جاذب
نبقَى اخوان صِدِقْ لا نختلف لا نعاتب
نَفَرِّق هم سرور نَنْعَمْ ونكسب صاحب

خالد عثمان
02-17-2008, 12:56 PM
يا رفعت اخوي .أخوان جد وأكيد من غير رتب والقاب
نعوس عوس مشترك للفهم الصحيح نفتح قلوبنا أبواب
بدور الناس كتار يتلموا في حارة وباردة يبقوا أحـــــباب
فيهم الكلس الفهموا راقي ورزيـن وفهيم أسد الغاب

يوسف البشير يوسف
02-17-2008, 01:03 PM
انا ما زول نم لكن مرات بنتاوق
يزعل يفرح ,شبابنا ليهو نوافق
ينصلح الحال و تزول معاهو فوارق
نبدا جديد, وننسي تلك سوابق

رفعت
02-17-2008, 02:53 PM
انا ما زول نم لكن مرات بنتاوق
يزعل يفرح ,شبابنا ليهو نوافق
ينصلح الحال و تزول معاهو فوارق
نبدا جديد, وننسي تلك سوابق


يمين زول نَم أخوي يوسف وعالي فهم
لي راقي الكلام شايفك دوام مهتم
قلبك صافي ذوقك وافي شايل هم
ما بِعْجِبَك الشِّقاق جبتَ التهامي العم

يوسف البشير يوسف
02-17-2008, 03:08 PM
يمين زول نَم أخوي يوسف وعالي فهم
لي راقي الكلام شايفك دوام مهتم
قلبك صافي ذوقك وافي شايل هم
ما بعجبك الشِّقاق جبتَ التهامي العم

خبرناهو منكم اهل النور و العلم
ما قصرتو بل طولتو سمح الكلم
اتحملتو و صبرتو و رفيقكم سلم
الجاوركم و عرفكم اصلا ما ندم

محمد عبدالمنعم العليقي
02-17-2008, 03:32 PM
ياناس السدار داير لي بينكم جمّة
عاجبني النضم فوق الغزل والحكمة
لو بينكم مكان والعدد ماتمّ
ادوني الاذن وخلوني النجر النمّة






خالص الود
ـــــــــــــــ
العليقي

يوسف البشير يوسف
02-17-2008, 03:46 PM
ياناس السدار داير لي بينكم جمّة
عاجبني النضم فوق الغزل والحكمة
لو بينكم مكان والعدد ماتمّ
ادوني الاذن وخلوني النجر النمّة

خالص الود
ـــــــــــــــ
العليقي

الفيتو معاك و ياك زول مروة و همة
في هند العلم سودانا لافيهو عمة
شرفت البطانة و اهل العوض و اللمة
فرحت و زغردت ست الحبايب يمة

رفعت
02-17-2008, 03:48 PM
ياناس السدار داير لي بينكم جمّة
عاجبني النضم فوق الغزل والحكمة
لو بينكم مكان والعدد ماتمّ
ادوني الاذن وخلوني النجر النمّة






خالص الود
ـــــــــــــــ
العليقي


سيد بيت يالعليقي ونحن جمله ضيوفك
مشتاقين دوام تظهر علينا نشوفك
جيب النم وزيل الهم وأحكي ظروفك
نسمع قصتك مستمتعين بحروفك

يوسف البشير يوسف
02-17-2008, 04:55 PM
ادخل نم خلينا نطرب, معاك نهيم
لي وصف الحبيب الكع, اسكرنا نديم
ليك وحشة العليقي, الله بينا عليم
حضورك ضرورة, انت تعود لينا سليم

محمد عبدالمنعم العليقي
02-17-2008, 05:39 PM
الليييييييييييييييييييييل
شكراً ياشباب اخجلتو لي عديل
معروفين دوام دايماً تعدلو الميل
عليها ام قدود ماظنكم بالحيل
والزوق والسماح مابيدورو دليل




خالص الود
ـــــــــــــــــ
العليقي

محمد عبدالمنعم العليقي
02-17-2008, 05:40 PM
اللييييييييييييييييييل
يوسف يالهميم دايما بدورو كلامك
في عز الهجير هابّات علي نسّامك
القول الشفيف ساطراهو ديمة اقلامك
مابتنظر وراك دايما تشوف قدامك




خالص الود
ــــــــــــــــ
العليقي

محمد عبدالمنعم العليقي
02-17-2008, 05:41 PM
اللييييييييييييييييييييييييل
رفت ياأخوي الساحة دايما هولك
من عهد الجمل عاجبني رفعت قولك
زرعت البهجة لابد من تشيل محصولك
دراج للهموم ومابتغبي عرفة زولك




خالص الود
ــــــــــــــــ
العليقي

رفعت
02-17-2008, 07:00 PM
اللييييييييييييييييييييييييل
رفت ياأخوي الساحة دايما هولك
من عهد الجمل عاجبني رفعت قولك
زرعت البهجة لابد من تشيل محصولك
دراج للهموم ومابتغبي عرفة زولك




خالص الود
ــــــــــــــــ
العليقي

أصلي بريدك، لكن عليَّ أزيدك
يالذوقك رفيع حالي النغم تغريدك
طايعاك الحرف نَوَّعْتَ لينا نشيدك
وافقين انتباه دايرين نشوفو جديدك

محمد عبدالمنعم العليقي
02-17-2008, 07:16 PM
رفعت يالحبيب وريني اعمل كيف
لما الهم يزيد يملاني حد القيف
الغربة السجم خلت خطايا تقيف
اسأل لي الاله يلفاني بالتخفيف




خالص الود
ـــــــــــــــ
العليقي

الكوزي
02-17-2008, 07:41 PM
رفعت كوزي ومحمد شداد الزمل عمار مجالس النم
براكم تخرب ديار تشقى,,, ســــــــفّاية تبقى عدم
بركو للرواحل أقعدو نحل نربط والمبـــدي يوت ينتم
تعالوا بطانة فسيحةعامرة نال تبر غزلان وصيد وبهم

مرحب خالد حباب تحرسنا ولينا تراقب
ومن حلو الحديث أسمعنا كل مناقب
ناير للبصيرة وفي المحنة رأيك ثاقب
جملابيا عزيز لاوي الشال وصوتك حاقب

رفعت
02-17-2008, 07:57 PM
رفعت يالحبيب وريني اعمل كيف
لما الهم يزيد يملاني حد القيف
الغربة السجم خلت خطايا تقيف
اسأل لي الاله يلفاني بالتخفيف




خالص الود
ـــــــــــــــ
العليقي


دوام الحال محال يامحترم ياسيِّد
يوم بِتْزَعِّلَكْ ويوماً بَسِطْ وتعَيِّد
تَسَلَّى بالصَّبُرْ واعبد إلهك جَيِّد
سلِّملُو الأمُرْ أركان يقينك شَيِّد

الكوزي
02-17-2008, 08:05 PM
غير الجمال فى دواى مافى شيتا أجدى
ليهو أشكى الشوق وبيهو أشرح وجدا
باين كلامى حداك كأنّو طوب النجدة
وناس الشعر فى القول عارفين مكان السجدة

أذاي ودواي بيه من تبيت
ملكت الأمر سويت الحشايا مبيت
ماني مفارقو وان عز المشي لي حبيت
ياهو الهالكني أكان بي رضاي واللا أبيت

الكوزي
02-17-2008, 08:22 PM
رفعت يالحبيب وريني اعمل كيف
لما الهم يزيد يملاني حد القيف
الغربة السجم خلت خطايا تقيف
اسأل لي الاله يلفاني بالتخفيف




خالص الود
ـــــــــــــــ
العليقي

سويلها الطناش واعمل كأنك مافي
افزع بي مهل واتبع هوى العنافي
تنساها الهموم والشوم كمان بتقافي
في قُرْبُ السَّعَدْ وفي بُعْدُ عاد لا خلافي

الكوزي
02-17-2008, 08:31 PM
دوام الحال محال يامحترم ياسيِّد
يوم بِتْزَعِّلَكْ ويوماً بَسِطْ وتعَيِّد
تَسَلَّى بالصَّبُرْ واعبد إلهك جَيِّد
سلِّملُو الأمُرْ أركان يقينك شَيِّد

سلمنا الأمر لي سيداً بعرف البينا
وراجين الكريم بي صحبت يسلينا
ان ضاقت الفجاج ياهو البكشف الشينا
وان كمل الصبر في قدرت شن لينا

محمد عبدالمنعم العليقي
02-17-2008, 08:38 PM
رفعت ياخوي نضمك حلاوتو السكّر
وباذن الاله كل الكسور تتجبّر
بي خوة متلكم ديمة القلوب تتصبّر
والمضبوح بموت كان ركز كان فرفر


خالص الود
ــــــــــــــــ
العليقي

الكوزي
02-17-2008, 08:46 PM
انا ما زول نم لكن مرات بنتاوق
يزعل يفرح ,شبابنا ليهو نوافق
ينصلح الحال و تزول معاهو فوارق
نبدا جديد, وننسي تلك سوابق

أدبك جم وقولك نم معاهو طلاوى
نفرش لك بساط ونجيب تمر وحلاوى
اصلح للشباب ان كان صعب أو لاوى
تتربع مدير تترقى وتلقى علاوى

الكوزي
02-17-2008, 08:53 PM
قال مرحب واتوارى لمح لي بنانو
بلح قنديلا ناجض دوبو في أجرنو
اتفضل سمع لهجا بلا شرب البطير ونانو
خار الشد وطار اللب وفر جنانو

محمد عبدالمنعم العليقي
02-17-2008, 08:57 PM
سويلها الطناش واعمل كأنك مافي
افزع بي مهل واتبع هوى العنافي
تنساها الهموم والشوم كمان بتقافي
في قُرْبُ السَّعَدْ وفي بُعْدُ عاد لا خلافي


الكوزي السمح القلبو دايماً صافي
ابراياً وهيط للشينة ديمة مجافي
مهما الهم يزيد بيكم علاجو الشافي
جمالكم ديمة واضح والله تب مو خافي



خالص الود
ـــــــــــــــــ
العليقي

يوسف البشير يوسف
02-17-2008, 10:04 PM
اللييييييييييييييييييل
يوسف يالهميم دايما بدورو كلامك
في عز الهجير هابّات علي نسّامك
القول الشفيف ساطراهو ديمة اقلامك
مابتنظر وراك دايما تشوف قدامك




خالص الود
ــــــــــــــــ
العليقي

في الخاص شرفت رسلت حكيت احلامك
شايلين حافطين قدرك ما حاكين افلامك
سائلين العليم عليقي انت يعلي مقامك
العزيزةانشاءالله تطول تحضر عرس هندامك

محمد عبدالمنعم العليقي
02-17-2008, 10:13 PM
يوسف يالحبيب لحفظكم شاكرين
ياها الحاريها فيك يااصدق الصادقين
باكر تجود ايامي بي شوفة الغاليين
وممكن تبوح بالسر بعدِ يوم عشرين!



خالص الود
ــــــــــــــــ
العليقي

يوسف البشير يوسف
02-17-2008, 10:15 PM
أدبك جم وقولك نم معاهو طلاوى
نفرش لك بساط ونجيب تمر وحلاوى
اصلح للشباب ان كان صعب أو لاوى
تتربع مدير تترقى وتلقى علاوى


انتو اهل حكم ناس ادب و خلاوي
سنة صيامكم تحيوها رطب بركاوي
بركاتكم اصلحت الكان واقع هاوي
ايدكم واصلة لاحقة ما لعب حاوي

رفعت
02-17-2008, 10:35 PM
رفعت ياخوي نضمك حلاوتو السكّر
وباذن الاله كل الكسور تتجبّر
بي خوة متلكم ديمة القلوب تتصبّر
والمضبوح بموت كان ركز كان فرفر


خالص الود
ــــــــــــــــ
العليقي

تعبيرك جميل نظمك ظريف ومُعَسَّلْ
عليقي الأديب معناك لطيف يا مؤصَّلْ
جبتَ الكلام عِقْداً نظيم ومُفَصَّلْ
ود عِزَّا قديم من خُوَّه ما بتِتْنَصَّلْ

يوسف البشير يوسف
02-18-2008, 02:24 AM
يوسف يالحبيب لحفظكم شاكرين
ياها الحاريها فيك يااصدق الصادقين
باكر تجود ايامي بي شوفة الغاليين
وممكن تبوح بالسر بعدِ يوم عشرين!



خالص الود
ــــــــــــــــ
العليقي

كدا الدش بموت في يدي مرتين
خبر نفرح ام الصالح بت الصالحين
كفانا كتير بشارتنا بس حلاوتين
خلاص! ختينا الخمسة في الاتنين

mohamed merghani
02-21-2008, 10:02 AM
فى حوشى الكبير داير لى طبعا رقدة
بعد ما الاغتراب عوّدنى شغل السقدة
بس ديك الفقر بحذر حداه النقدة
وما اظن من قريب تنفكّ منّى العقدة

خالد عثمان
02-21-2008, 01:03 PM
الغربة القهر لا خيارنا لا بي طـــــــــوعنا
عارفنها ضل ضحى والحتمى هو رجــوعنا
هششت العضم وتب جففتها فروعـــــــــــنا
هي الكترت الهواجس دستها جوة ضلوعنا

الكوزي
02-21-2008, 04:54 PM
فى حوشى الكبير داير لى طبعا رقدة
بعد ما الاغتراب عوّدنى شغل السقدة
بس ديك الفقر بحذر حداه النقدة
وما اظن من قريب تنفكّ منّى العقدة

االرقدة في الحوش الكبير ياااااااحليلا
وسهر (الجداد) لي ليمو كايس حيلة
لامتين الرجوع ويسعد حليل بحيلا
أها عاد العقد الليلة وا حلحيلا

الكوزي
02-21-2008, 05:40 PM
الغربة القهر لا خيارنا لا بي طـــــــــوعنا
عارفنها ضل ضحى والحتمى هو رجــوعنا
هششت العضم وتب جففتها فروعـــــــــــنا
هي الكترت الهواجس دستها جوة ضلوعنا

جيت بي زفة فرحانين أهل واقارب
وما شاورت تب القبلي خاضو تجارب
بقيت محنان ومن كأس المراير شارب
حامياني الضحك ومرا أشاكل أضارب

رفعت
03-05-2008, 05:16 PM
جَمْعَ العزاز حرَّك عليْ أشجاني

من سيدنا العليقي خبر لقاهم جاني

شموس ام در مع بت خيري فخرا داني

بي هضربات ست نولا سِرْ ناجاني

محمد عبدالمنعم العليقي
03-06-2008, 04:04 PM
رفعت يااخوي عقدت لي لساني
بالفعل الاصيل اللي منك جاني
بي خوة متلكم تاني ماهماني
وناس الامل خلهم كلامن تاني




خالص الود
ـــــــــــــــ
العليقي

رفعت
03-06-2008, 05:03 PM
رفعت يااخوي عقدت لي لساني
بالفعل الاصيل اللي منك جاني
بي خوة متلكم تاني ماهماني
وناس الامل خلهم كلامن تاني




خالص الود
ـــــــــــــــ
العليقي


أغلى من الكنوز صُحْبَة أخوك الصالح

مُؤاخاة الرجال شُغْلَ المفَتِّح وفالح

تعجبني الصداقة الراقية خاتْيَه مصالح

يوصيك الصديق بالخير وعمل الصَّالح

mohamed merghani
03-14-2008, 10:48 AM
ممكون الغرام نصّاحو هم أعداهو
والواطى الجمر بيعرف براهو مداهو
ما بفوتو الألم لى غيرو يتعدّاهو
أحسن يتابع قلبو يبراهو وين ودّاهو

الحب للقليب غير شك دواهو وداهو
لو نادى فى الظلمات مجبور تلبّى نداهو
والحظّو البعاد متكول أساهو حداهو
واللاقى الوصال محظوظ والله أداهو

رفعت
03-14-2008, 12:42 PM
ممكون الغرام نصّاحو هم أعداهو
والواطى الجمر بيعرف براهو مداهو
ما بفوتو الألم لى غيرو يتعدّاهو
أحسن يتابع قلبو يبراهو وين ودّاهو

الحب للقليب غير شك دواهو وداهو
لو نادى فى الظلمات مجبور تلبّى نداهو
والحظّو البعاد متكول أساهو حداهو
واللاقى الوصال محظوظ والله أداهو

كَتَّرْتَ الدواهي وَدِّيتنا نحن في داهيه
أتْعبتَ العشوق الساهره عينو وساهيه
ست البنات العاليه ساميه وباهيه
مكتول بي غرامَا الآمره فينا وناهيه

mohamed merghani
04-07-2008, 11:29 AM
كَتَّرْتَ الدواهي وَدِّيتنا نحن في داهيه
أتْعبتَ العشوق الساهره عينو وساهيه
ست البنات العاليه ساميه وباهيه
مكتول بي غرامَا الآمره فينا وناهيه

أمر الغرام يا أخوى فى بحثو داير مرجع
وكيف المحب بيسعد وكتين يضيق ويتوجّع
تلقانى باثّى الشكوى وجسمى جافى المضجع
ومهما يطول يعدى بيغلبنى الحنين ليك برجع

رفعت
04-07-2008, 12:20 PM
أمر الغرام يا أخوى فى بحثو داير مرجع
وكيف المحب بيسعد وكتين يضيق ويتوجّع
تلقانى باثّى الشكوى وجسمى جافى المضجع
ومهما يطول يعدى بيغلبنى الحنين ليك برجع

رجوعك يكون سريع ما يطول غيابك مني
خليني النَّبُثْ شوق الغرامو شغلني
جيب النَّمْ وقول زيل الهواجس عنِّي
شاركني السهر آنس قصيدك غَنِّي

mohamed merghani
04-07-2008, 08:16 PM
رجوعك يكون سريع ما يطول غيابك مني
خليني النَّبُثْ شوق الغرامو شغلني
جيب النَّمْ وقول زيل الهواجس عنِّي
شاركني السهر آنس قصيدك غَنِّي

مشاغل ام قدود منك بعيد ودّنّي
فى سجن الهموم قفلن على سدّنّي
لبّيت نداء أشواقى يوم ليك جن نادنّى
من خمرة هواك أملالى كاسى ودنّي

رفعت
04-07-2008, 08:54 PM
مشاغل ام قدود منك بعيد ودّنّي
فى سجن الهموم قفلن على سدّنّي
لبّيت نداء أشواقى يوم ليك جن نادنّى
من خمرة هواك أملالى كاسى ودنّي

داريها الهموم خليك سياسي وفني
مشاغل الدنيا دايما لي نفوسنا تَعَنِّي
مشكور يالبيب سعيك وقربك منِّي
كاسات الغرام رشفك دوام في ظنِّي

رفعت
04-16-2008, 10:07 AM
صنائع المعروف في الدنيا كتِّر فيها

ما يغُرَّك بريقَا وتجري متلافيها

تلِمَّها تجمعا وفي لحظه بتقافيها

بَعَد بارد نسيما بِغَبِّرَك سافيها

محمد عبدالمنعم العليقي
04-16-2008, 04:45 PM
صنائع المعروف في الدنيا كتِّر فيها

ما يغُرَّك بريقَا وتجري متلافيها

تلِمَّها تجمعا وفي لحظه بتقافيها

بَعَد بارد نسيما بِغَبِّرَك سافيها


رفعت يالهميم النضمو دايماً حِلِّو
ياطيب الاصل كرمك دوام تبهللو
الملهوف يجيك حالاً تفكو تحلو
يازين الرجال المابفز من خِلّو






خالص الود
ـــــــــــــــ
العليقي

رفعت
04-16-2008, 09:27 PM
رفعت يالهميم النضمو دايماً حِلِّو
ياطيب الاصل كرمك دوام تبهللو
الملهوف يجيك حالاً تفكو تحلو
يازين الرجال المابفز من خِلّو






خالص الود
ـــــــــــــــ
العليقي

كسرت الضهر مالك علي ياصديق
يَبَّست الكلام في حلقي جَفَّ الريق
طيب الأصل توبك غطاك يا أنيق
ذوقاني وفهيم شعرك رصين وبليغ

الكوزي
05-28-2008, 06:27 PM
ِوسط الحفلة جلست بي لطافة
اديبة وراقية لابسة التوب عفافة
ما خانت الحليل وخاتية الانحرافة
وجملة الطامعين رجعت اسافة


فاقت القمرة في ليلة تماما
وماذيني المنون كمان حالياه شامه
عاش جواي ريدها وفات حد التخامة
خراب عقلي وهزال جسمي هاتين العلامة

رفعت
05-30-2008, 09:19 AM
ِوسط الحفلة جلست بي لطافة
اديبة وراقية لابسة التوب عفافة
ما خانت الحليل وخاتية الانحرافة
وجملة الطامعين رجعت اسافة


فاقت القمرة في ليلة تماما
وماذيني المنون كمان حالياه شامه
عاش جواي ريدها وفات حد التخامة
خراب عقلي وهزال جسمي هاتين العلامة

وين يا الغالي كنتَ ونحن منتظرين
جيد الليلة بنتَ وجبتَ شعرا زين
الراسية وأديبة وخاتية طبعا شين
قول فيها الكلام واسقي الغرام كوزين

mohamed merghani
05-30-2008, 10:45 AM
داريها الهموم خليك سياسي وفني
مشاغل الدنيا دايما لي نفوسنا تَعَنِّي
مشكور يالبيب سعيك وقربك منِّي
كاسات الغرام رشفك دوام في ظنِّي

داريت الهموم الواقعي فيها سجنّي
الا الشوق بطبعو خلّاني قايم جنّي
للأهل والأصحاب المن زمان راجينّي
لي طيفهم بليلي بغنّي ناس ليلي ديلك جنّي

mohamed merghani
05-30-2008, 10:56 AM
ِوسط الحفلة جلست بي لطافة
اديبة وراقية لابسة التوب عفافة
ما خانت الحليل وخاتية الانحرافة
وجملة الطامعين رجعت اسافة


فاقت القمرة في ليلة تماما
وماذيني المنون كمان حالياه شامه
عاش جواي ريدها وفات حد التخامة
خراب عقلي وهزال جسمي هاتين العلامة

وسط الحفلة جلست قمرا مضوّي سماهو
وألقاب الجمال الشايعة هن أسماهو
ما ألطف شمايلو السمحة ما أسماهو
وبي دم القلوب كف الخضاب راسماهو

رفعت
05-30-2008, 03:51 PM
داريت الهموم الواقعي فيها سجنّي
الا الشوق بطبعو خلّاني قايم جنّي
للأهل والأصحاب المن زمان راجينّي
لي طيفهم بليلي بغنّي ناس ليلي ديلك جنّي

مين غير ليلى زاد اللِّيل علينا بلاوي
ساعة الليل يجِنْ جِنْ ليلى كيف بنْدَاوِي
مهما ننشغل عن ريدو نحكي حكاوي
كاشف سِرَّنا الهم والحسيس التَّاوي

الكوزي
05-30-2008, 06:11 PM
وسط الحفلة جلست قمرا مضوّي سماهو
وألقاب الجمال الشايعة هن أسماهو
ما ألطف شمايلو السمحة ما أسماهو
وبي دم القلوب كف الخضاب راسماهو

وسط الحفلة جلست حواها وقار
وتاهوا الحاضرين جملة كباروصغار
مكتول لحظوا مابنفع معاه عقار
غير قرب المحزز جيدو وازم منقار

الكوزي
05-30-2008, 07:01 PM
وين يا الغالي كنتَ ونحن منتظرين
جيد الليلة بنتَ وجبتَ شعرا زين
الراسية وأديبة وخاتية طبعا شين
قول فيها الكلام واسقي الغرام كوزين

الري بالردف قطعا شراب للباتع
والطاري أم خدود في غيو دايما راتع
يقالد في النجوم بيناتها بدرا ساطع
عايف للأرض مابيها ليه مقاطع

عبدالله الحاج بدري(جاعات)
05-30-2008, 11:48 PM
الضيف كان جانا يامحمد بنشيلو فوق الراس
نفتحلو القليب مشرع ومنو مابنقفلو بالترباس
حاشا علينا مابنتكلف نكوس المنقة والانناس
بالموجود بنكرمو لامن يقول كفاي شبعت خلاس


من بانت وبي اسم رفاعة العامرة مرحب بيك
وبالمحبة علي بياض نوقع ليك كمان الشيك
تتجول في منتداك وتتمدد تخلف كمان كرعيك
وكل واحد فينا يحلف يقول والله مشتاق ليك


ماني شاعر لكن عشانك بهديك كم مسدار
ولاني غناي ولا بجيد فن العزف علي الاوتار
لكني شفتك جايي مكتح وكرعيك ملانة غبار
قلت اتلقاك وبي محنة أقولك سلامة الاسفار

mohamed merghani
07-23-2008, 12:37 PM
قال ,,

الزول السَّمِحْ فـات الكُـبَار والقَـدْرُو
كان شافوه نـاس عبد الله كانوا بعَـقرُو
السبب الحَمَاني العيـد هنـاك ما أحضرو
دُرْديق الشّبيكي البَنّـتُـو في صـدرو

وقلنا ....

الزول السمح فى الكون عدمنا المتلو
في مصحف محاسنو براي أرتّل وأتلو
السبب الخلّاهو قلبي عجّل كتلو
شجر البرتكان الفي صدرو بادي فى شتلو

mohamed merghani
07-23-2008, 12:47 PM
ماني شاعر لكن عشانك بهديك كم مسدار
ولاني غناي ولا بجيد فن العزف علي الاوتار
لكني شفتك جايي مكتح وكرعيك ملانة غبار
قلت اتلقاك وبي محنة أقولك سلامة الاسفار

بي قولك منوّر فقت ضو البدري
صنديدا واسمك عبدالله ود حاج بدري
كنت ليك مستنّي من دغيشا بدري
نشيل مسدارنا نطرب للبدري والما بدري

محمد عبدالمنعم العليقي
07-23-2008, 01:09 PM
سيد بيت السدار انا جيت اعدي واسلِّم
يابنضماً سمح زولاً فقيه متعلِّم
يابفهماً وهيط ماك ساهي لا متبلِّم
شاحد الله الكريم من كل شينة يسلَّم

mohamed merghani
03-07-2011, 10:53 PM
ان شاء الله

كمال الدين ابوقرون
04-13-2011, 11:41 AM
ابداع يا رفاعة

كمال الدين ابوقرون
04-13-2011, 11:42 AM
اول مشاركاتى فى منتداكم العريق

الأمين الطيب الفكي
04-14-2011, 04:00 PM
الولد الخايف القبيلة تلومو
أخلف ساقو فوق تيسا طويل قدومو
أما يجيب رضوة البهم المنقر فومو
والا أتكاتحن قدح الرماد حرومو...

كمال الدين ابوقرون
04-14-2011, 06:59 PM
ياجميل شرفت الديار
من جبينك جاتنا انوار
وفى عينيك فيها اسحار
حيرت علما البحار

كمال الدين ابوقرون
04-14-2011, 07:02 PM
نحمد الله المـــــــــــــــــــــــــن عدم سوانا
نتكيفليك زى الجبنة البنـــــــــــــشم قليانة
يا عبدو يا اخوى فى قلبى ليك مـــــــــكانا
زى مطر الخرصانة الخلا الترس ملــــيانا

كمال الدين ابوقرون
04-14-2011, 07:03 PM
ياشبيه الصيد فى العيون
من جنسنا هو ماخد اللون
القوافل ليها نظرة تكون
بيهو خاصاهو خالق الكون

الأمين الطيب الفكي
04-17-2011, 11:22 AM
أنا الوبل العقب الكرامة وأنا الاسد النتر الفي كتفو شامة
أنا درب السراط يوم القيامة أنا الموت البخلي الناس يتاما

ابوعسجد
04-17-2011, 08:37 PM
قلبي المعذب للأسف تكيشو
يعشق مستحيل بالله اخرطيشو
يالشايفين جمال الخلقه في مقديشو
ذي ما يعيش جميل اهل الصبابه يعيشو

ابوعسجد
04-17-2011, 08:43 PM
شفتني ام ضربتآ شافيه بي نشابه
اقج ليها وكلما تقرب لشركتي تهابه
ديفت المجازيات ماها غزل الغابه
ومن قرب الغرازن ديمه عامله حسابه

mohamed merghani
07-14-2011, 10:19 AM
طلطاشر سنة من العمير مخصومة
أصارع في المحال اللادّي فيني خصومة
من معاصي المولي روحي جد معصومة
بنتابع الطاعات ساوّين صلاتا وصوما

فاقدين البلد يا حليل نسيم خرطوما
من شوق الرجوع نفيستي ما مفطومة
الشئ المصبّرني في غربتي المحطومة
معايا أولادي ناس علي وفطّومة